ᐂᒨᓯᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐊᓯᕈᕐᑕᐅᓂᖓ

¹ ᑲᑉᐱᐊᓇᒦᒃ ᐃᓕᑦᓯ ᐊᒃᓱᕈᕐᓇᖏᑦᑐᒥ ᐃᓅᔪᓯ ᓮᐅᓂᒥ, ᑕᑎᖃᕐᑐᓪᓗ ᓴᒥᐊᕆᐊᑉ ᖃᖅᑲᖓᓂᒃ, ᓯᕗᓕᕐᑎᐅᔪᓯᓗ ᐅᐱᒋᔭᐅᓪᓗᓯ ᐃᓅᖃᑎᒌᒡᔪᐊᓂ ᐊᔪᖏᑦᑐᕐᔪᐊᓂ, ᐃᓴᕆᐊᓕᐅᑉ ᑭᖑᕚᖏᓐᓄᑦ ᑕᑎᒋᔭᐅᕙᒃᑐᓯ!

² ᐂᓕᕆᑦᓯ ᐃᒡᓗᒐᓴᖕᓄᑦ ᑳᓪᓂᒧᑦ ᑕᑯᓗᓯᐅᒡᓗ, ᑍᑲᓐᖓᓪᓗ ᐃᒡᓗᒐᓴᒡᔪᐊᓄᑦ ᕼᐊᒫᑎᒧᑦ; ᑕᐅᓄᖓᓗ ᐃᒡᓗᒐᓴᖕᓄᑦ ᒑᑎᒧᑦ ᐱᓕᔅᑍᓂᒥᐅᓄᑦ. ᐊᖓᔪᖅᑲᐅᕕᖏᑦ ᐱᐅᓂᕐᓴᐅᕚ ᐊᖓᔪᖅᑲᐅᕕᑦᓯᓐᓂᑦ? ᓄᓇᖁᑎᖏᓪᓗ ᐊᖏᓂᕐᓴᐅᕚᑦ ᓄᓇᖁᑎᑦᓯᓃᑦ?

³ ᑲᑉᐱᐊᓐᓇᒦᖑᔪᓯ ᐅᓪᓗᕐᒥᒃ ᓱᒋᐊᕐᑕᐅᕕᖕᒥᒃ ᐅᖓᓯᖕᓂᕅᔪᓯ, ᖃᒡᓕᒋᐊᕐᑎᑦᓯᒐᑦᓯ ᑲᑉᐱᐊᓇᕐᑐᒥᒃ.

⁴ ᑲᑉᐱᐊᓐᓇᒦᒃ ᐃᓕᑦᓯ ᐃᓐᓇᖓᕙᒃᑐᓯ ᐃᒡᓕᕐᓂ ᑑᒑᕐᓂᒃ ᐱᐅᓴᐅᑎᓕᖕᓂ, ᐃᒃᓯᕙᐅᑖᓗᖕᓂᓗ ᐊᑭᑐᔪᓂ ᓇᓚᕈᕐᐸᒃᑐᓯ, ᓰᐱᖁᑎᑦᓯᓗ ᓄᕐᕋᖏᓐᓂᒃ ᓂᕆᕙᒃᑐᓯ, ᐃᒻᒧᒃᓯᐅᒊᓪᓗ ᓄᕐᕋᖏᓐᓂᒃ ᓂᕆᕙᒃᑐᓯ ᐃᒻᒧᒃᓯᐅᒐᒃᑯᕕᑦᓯᓐᓂᑦ ᐱᔪᓂᒃ.

⁵ ᕼᐊᕐᐱᓄᓪᓗ ᐃᓐᖏᕐᐸᒃᑐᓯ ᐊᑑᑎᖃᖏᑦᑐᓂᒃ, ᑍᕕᑎᑐᓪᓗ ᐃᓐᖏᐅᑎᓕᐅᕐᓗᓯ ᓄᑖᓂᒃ;

⁶ ᕔᓂᒥᒃ ᐃᒥᕐᑐᐊᓘᕙᒃᑐᓯ ᖃᑦᑕᕐᓄᑦ, ᐅᕐᓱᕐᑎᕐᐸᒃᑐᓯᓗ ᐅᕐᓱᕐᑎᕈᑎᑦᓯᐊᕙᐅᓂᕐᐹᓄᑦ ᑎᐱᑦᓯᐊᕆᒃᑐᓄᑦ, ᕿᒃᓵᒍᑎᖃᖏᑦᑐᓯᓗ ᐃᓴᕆᐊᓕᐅᑉ ᐊᓯᕈᕐᑕᐅᓂᖓᓂᒃ.

⁷ ᑍᒤᒻᒪᑦ ᑎᒍᔭᐅᓂᐊᕐᐳᓯ ᐊᐅᓪᓚᕈᑦᔭᐅᓗᓯ ᑎᒍᔭᐅᔪᓄᑦ ᓯᕗᓪᓕᕐᐸᐅᓗᓯ, ᖁᕕᐊᓱᖃᑎᒌᒡᓗᓯᓗ ᓂᕆᕕᒃᔪᐊᖃᑦᑕᕐᓂᓯ ᓄᖅᑲᕐᓂᐊᕐᐳᑦ.

⁸ ᐊᑕᓂᖅ ᒎᑎᐅᓂᕐᒥᒍᑦ ᐊᖏᒻᒪᕆᒃᐳᖅ, ᕿᓚᖕᒥᐅᒐᓴᒃᔪᐊᑦ ᐊᑕᓂᖓ ᒎᑎ ᐅᖃᕐᐳᖅ, “ᔧᑰᑉ ᐱᐅᔪᕆᓂᖓ ᓇᕐᕈᒋᕙᕋ, ᕿᒫᕕᖏᓪᓗ ᐆᒥᒋᕙᒃᑲ, ᑍᒤᒻᒪᑦ ᐃᒡᓗᒐᓴᖓ ᐂᑦᑑᑎᒋᓂᐊᕐᐸᕋ ᑕᕝᕙᓃᑦᑐᓕᒫᓪᓗ.”

⁹ ᑕᒪᓐᓇᓗ ᓇᓪᓕᐅᑎᔪᒫᕐᐳᖅ, ᐊᖑᑏᑦ ᖁᓖᑦ ᐃᒡᓗᒥ ᐊᑕᐅᓯᕐᒥ ᐊᒥᐊᒃᑰᒃᐸᑕ, ᑖᒃᑯᐊ ᑐᖁᔪᐃᓐᓇᐅᔪᒫᕐᐳᑦ.

¹⁰ ᑐᖁᔪᓪᓗ ᐃᓚᒋᔭᖓᑦ, ᑎᒥᖏᓐᓂᒃ ᐃᑯᐊᓪᓔᓂᐊᕐᑐᖅ, ᐊᓂᑦᔨᔭᕐᑐᓕᕐᐸ ᐃᒡᓗᒥᑦ, ᐃᒡᓗᒦᑦᑐᒧᑦ ᐊᐱᕆᒃᐸᑦ, “ᓱᓕ ᑕᕝᕙᓃᑦᑐᖃᕐᐹ?” ᑭᐅᔭᐅᓂᐊᕐᐳᖅ, “ᓄᖑᑉᐳᑦ!” ᑕᕝᕙ ᐃᓚᒋᔭᖓ ᐅᖃᕐᓂᐊᕐᐳᖅ, “ᓂᐸᖏᕆᑦ, ᐊᑕᓂᐅᑉ ᐊᑎᖓᓂᒃ ᑍᓯᔭᕆᐊᖃᖏᓐᓇᑦᑕ.”

¹¹ ᑕᑯᒋᑦ, ᐊᑕᓂᖅ ᐱᖁᔨᓕᕐᐸᑦ, ᐃᒡᓗᕐᔪᐊᖅ ᓯᖁᑦᑎᕐᓂᐊᕐᐳᖅ, ᐃᒡᓗᕋᓛᕐᓗ ᓯᖃᓪᓕᓗᓂ.

¹² ᕿᒻᒥᕐᔪᐊᑦ ᐸᖓᓕᓲᖑᕚᑦ ᐅᔭᖅᑲᑎᒍᑦ? ᐊᖑᑏᑦ ᐃᒪᕕᖕᒥᒃ ᒪᒃᐱᕐᑎᕆᓲᖑᕚᑦ ᐃᒻᒧᒃᓯᐅᒐᕐᓄᑦ? ᐃᖅᑲᕐᑐᐃᑦᓯᐊᕐᓂᖅ ᑐᖁᓐᓇᕐᑐᓐᖑᕐᑎᑉᐸᓯ, ᐃᓱᐊᕐᑐᓕᓂᐅᓪᓗ ᐱᕈᕐᑐᖓ ᖁᐱᕐᕈᓐᖑᕐᑎᑉᐸᓯ ᓇᐹᕐᑐᓂᒃ ᓂᕆᓲᑎᑐᑦ.

¹³ ᐃᓕᑦᓯ ᖁᕕᐊᓲᑎᖃᕐᑐᓯ ᓵᓚᒃᓴᕐᓂᕐᒥᒃ ᓘ-ᑎᐹᕐᒥᒃ, ᐅᖃᕐᑐᓯᓗ, “ᑳᕐᓁᒻ ᑎᒍᓚᐅᓐᖏᓚᕘᑦ ᓇᖕᒥᓂᖅ ᓴᓐᖏᓂᑦᑎᓐᓅᑦ?”

¹⁴ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᒎᑎ ᐅᖃᕐᐳᖅ, “ᑕᑯᒋᑦ, ᐃᓅᖃᑎᒋᒡᔪᐊᓂᒃ ᒪᑭᑎᑦᓯᓂᐊᕐᐳᖓ ᐃᓕᑦᓯᓐᓂᒃ ᐊᑭᕋᕐᑐᕐᓂᐊᕐᑐᓂᒃ, ᐃᓴᕆᐊᓕᒧᑦ ᑭᖑᕚᖑᔪᓯ; ᐊᒃᓱᕈᕐᑎᑦᓯᓂᐊᕐᐳᓪᓗ ᐃᓕᑦᓯᓐᓂᒃ ᕼᐊᒫᑎᐅᑉ ᐃᑎᕆᐊᕐᕕᖓᓂᑦ ᐋᕋᐸᐅᑉ ᓇᕐᓴᖓ ᑎᑭᓪᓗᒍ.”