ᐂᒨᓯᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᖃᕿᐊᓕᖁᔨᓂᖅ

¹ “ᐅᖃᐅᓯᖅ ᐅᓇ ᓈᓚᒃᓯᐅᒃ ᐃᓕᑦᓯᓐᓄᑦ ᓵᓐᖓᓯᑦᔪᑎᒐ, ᐅᒡᒍᐊᓕᕆᑦᓯ, ᐃᓴᕆᐊᓕᒥᐅᑦ ᐃᓄᖏᑦ:

² ᐊᕐᓇᖅ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ ᐃᓴᕆᐊᓕᒥᐅᖅ ᐅᕐᕈᕗᖅ; ᒪᑭᒃᑲᓐᓂᕐᓂᐊᕈᓐᓁᕐᓗᓂ! ᓇᓚᕗᖅ ᕿᒪᒃᑕᐅᓪᓗᓂ ᓄᓇᒥᓂ; ᑭᓇᒥᒡᓘᓐᓃᑦ ᒪᑭᑎᑦᓯᔨᒃᓴᖃᓐᖏᓚᖅ.”

³ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “1,000 ᐃᒡᓗᒐᓴᖕᓂᑦ ᐊᓂᔪᑦ ᐊᒥᐊᒃᑯᖃᕐᓂᐊᕐᐳᖅ 100ᓂᒃ, 100ᓪᓗ ᐊᓂᔪᑦ ᐊᒥᐊᒃᑯᖃᕐᓂᐊᕐᐳᑦ 10ᓂᒃ ᐃᓴᕆᐊᓕᐅᑉ ᑭᖑᕚᖏᓐᓂᑦ.”

⁴ ᐃᒫᒃ ᐊᑕᓂᖅ ᐅᖃᕐᐳᖅ ᐃᓴᕆᐊᓕᐅᑉ ᑭᖑᕚᖏᓐᓄᑦ: “ᐅᕙᓐᓂᒃ ᕿᓂᓕᕆᑦᓯ ᐃᓅᓕᕐᓗᓯᓗ;

⁵ ᐱᑎᓕ ᕿᓂᕈᓐᓁᕐᓯᐅᒃ, ᒋᐅᓪᒐᓪᓘᓐᓃᑦ ᐃᑎᕐᑍᓕᓯᐅᒃ, ᐱᐊᕐᓯᐸᓘᓐᓃᑦ ᐊᖅᑯᓵᕐᑍᓕᓯᐅᒃ; ᒋᐅᓪᒐᓪᒥᐅᓪᓕ ᐊᐅᓪᓚᕈᑦᔭᐅᔪᒫᕐᒪᑕ, ᐱᑎᓕᓗ ᐱᑕᖃᕈᓐᓁᕈᒫᕐᓗᓂ.

⁶ “ᐊᑕᓂᖅ ᕿᓂᓕᕐᓯᐅᒃ ᐃᓅᓕᕐᓗᓯᓗ, ᔫᓯᐱᐅᑉ ᑭᖑᕚᖏᓐᓂᒃ ᐃᑯᐊᓪᓔᔪᑎᑐᑦ ᐱᖁᓇᒍ, ᐊᓯᕈᕐᑕᐅᓗᑎᒡᓗ, ᐱᑎᓕᓗ ᖃᒥᑕᐅᔪᓐᓇᕐᓂᐊᓐᖏᓚᖅ.

⁷ ᐃᖅᑲᕐᑐᐃᑦᓯᐊᕐᓂᕐᒥᒃ ᒧᒥᒃᑎᑦᓯᒐᑦᓯ, ᖁᐱᕐᕈᑎᑐᑦ ᓇᐹᕐᑐᓂᒃ ᓂᕆᔪᑎᑐᑦ, ᐃᓱᐊᕐᑐᓕᓂᕐᓗ ᐊᑐᑦᓯᐊᖏᓐᓇᑦᓯᐅᒃ ᓄᓇᒧᑦ ᐃᒋᑕᐅᔪᑎᑐᑦ.

⁸ ᑖᓐᓇ ᐅᓪᓗᕆᐊᑦ ᐃᓂᒋᔭᖏᑕ ᖃᓄᐃᓕᖓᓂᖏᓐᓂᒃ ᓴᓇᓚᐅᕐᑐᖅ, ᑖᕐᑐᕐᔪᐊᕐᒥᒡᓗ ᒧᒥᒃᑎᑦᓯᕙᒃᑐᖅ ᐅᓪᓛᓐᖑᕐᑎᓪᓗᒍ, ᐅᓪᓗᕐᒥᒡᓗ ᑖᕐᓯᑎᑦᓯᕙᒃᑐᖅ ᐅᓐᓄᐊᖑᓕᕐᓗᓂ, ᑕᕆᐅᕐᔪᐊᒥᒃ ᕾᖁᔨᕙᒃᑐᖅ, ᑯᕕᓪᓗᒍᓗ ᓄᓇᕐᔪᐊᑉ ᖄᖓᓄᑦ, ᐊᑎᖃᕐᐳᖅ ᐊᑕᓂᕐᒥᒃ.

⁹ ᓴᓐᖏᔪᐊᓗᐃᑦ ᐊᓯᕈᕐᑕᐅᓂᕐᒧᑦ ᑎᑭᑎᑕᐅᑎᑉᐰᑦ, ᐊᕙᓗᕐᔪᐊᓖᓪᓗ ᕿᒫᕖᑦ ᐊᓯᕈᕐᓗᒋᑦ.

¹⁰ “ᐆᒥᓱᖕᒪᑕ ᐃᓂᕐᑎᕆᔪᒥᒃ, ᓇᕐᕈᓪᓗᑎᒡᓗ ᓱᓕᔪᒥᒃ ᐅᖃᐅᓯᓕᖕᒥᒃ ᐃᖅᑲᕐᑐᐃᕕᖕᒥ.

¹¹ ᐊᔪᕐᓴᕐᑐᓂᒃ ᑐᓪᓕᕌᕋᑦᓯ ᐊᕐᓵᕋᑦᓯᐅᓪᓗ ᓂᐊᖂᔭᒃᓴᖏᓐᓂᒃ, ᑍᒫᒃᑕᐅᖅ, ᐃᒡᓗᕐᔪᐊᓕᐅᕐᓯᒪᒐᓗᐊᕐᑐᓯ ᐅᔭᕋᖕᓄᑦ ᓴᓇᔭᐅᓯᒪᔪᓄᑦ ᐃᓂᒋᓂᐊᓐᖏᓚᓯᓕ, ᐱᐅᔪᐊᓗᖕᓂᒡᓗ ᕔᓂᒃᓴᓂᒃ ᐱᕈᕐᓰᕕᓕᐅᕐᓯᒪᒐᓗᐊᕐᑐᓯ, ᐃᒥᕐᕕᒋᓂᐊᓐᖏᓚᓯᓕ.

¹² ᐊᔪᕐᓂᓯ ᐅᓄᕐᓂᖏᑦ ᖃᐅᔨᒪᒐᒃᑭᑦ, ᐊᔪᕐᑐᓕᓯᒪᔪᐊᓘᓂᓯᓗ, ᐊᑭᕋᕐᑐᕋᑦᓯᐅᒡᓗ ᐃᓱᐊᕐᑐᓕᔪᑦ, ᐊᑭᓕᕐᑕᐅᓪᓗᓯᓗ ᓴᖑᑎᑕᐅᕙᒃᓗᓯ; ᐊᔪᕐᓴᕐᑐᓪᓗ ᐱᑦᓯᐊᕐᕕᒋᓇᒋᑦ ᐃᖅᑲᕐᑐᐃᕕᖕᓂ.

¹³ ᑍᒤᒻᒪᑦ ᓯᓚᑐᔪᖅ ᓂᐱᖃᕐᓂᐊᓐᖏᓚᖅ ᑍᒤᑦᑐᒥ, ᐱᕕᒃᓴᖅ ᓇᓪᓕᐅᑎᔪᖅ ᐱᐅᖏᑦᑑᖕᒪᑦ.

¹⁴ “ᐱᐅᔪᒥᒃ ᕿᓂᕆᑦᓯ ᐱᐅᖏᑦᑐᒥᐅᖏᑦᑐᖅ, ᐃᓅᖁᓪᓗᓯ, ᑕᕝᕙ ᕿᓚᖕᒥᐅᒐᓴᒡᔪᐊᑦ ᐊᑕᓂᖓᑕ ᒎᑎᐅᑉ ᐃᓚᒋᓂᐊᕐᐹᓯ, ᐅᖃᐅᓯᕆᔭᓯ ᒪᓕᒡᓗᒍ.

¹⁵ ᐱᐅᖏᑦᑐᖅ ᐆᒥᒋᓯᐅᒃ, ᐱᐅᔪᖅ ᐅᖓᒋᓗᒍ, ᐊᑲᐅᔪᒥᒡᓕ ᐱᓇᓱᐊᕆᑦᓯ ᐃᖅᑲᕐᑐᐃᕕᖕᓂ, ᕿᓚᖕᒥᐅᒐᓴᒡᔪᐊᑦ ᐊᑕᓂᖓ ᒎᑎ ᓂᑲᒍᓱᓕᖁᓪᓗᒍ ᔫᓯᐱᐅᑉ ᑭᖑᕚᖏᑕ ᐊᒥᐊᒃᑯᖏᓐᓂᒃ.”

¹⁶ ᑍᒤᒻᒪᑦ ᐊᑕᓂᖅ, ᕿᓚᖕᒥᐅᒐᓴᒡᔪᐊᑦ ᐊᑕᓂᖓ ᒎᑎ ᐅᖃᕐᐳᖅ: “ᕿᐊᓂᕐᔪᐊᖃᕈᒫᕐᐳᖅ ᓄᓇᓖᑦ ᑲᑎᑕᕐᕕᖏᓐᓂ, ᓂᓪᓕᐊᔪᒫᕐᐳᓪᓗ ᐊᖅᑯᑎᓕᒫᓂ, ᐱᕈᕐᓰᕕᓕᕆᔩᓪᓗ ᕿᒃᓵᖁᔭᐅᓂᐊᕐᐳᑦ ᐃᓚᓐᖓᕐᑐᑎᑐᑦ ᕿᐊᖃᑎᖃᕐᓗᑎᒃ ᐊᑭᓕᕐᑕᐅᓗᑎᒃ ᕿᒃᓵᒃᑎᓂᒃ.

¹⁷ ᕔᓂᒃᓴᓂᒡᓗ ᐱᕈᕐᓰᕕᓕᒫᓂ ᕿᐊᓂᕐᔪᐊᖃᕈᒫᕐᐳᖅ, ᑕᒪᐅᓇ ᐃᓕᑦᓯᑎᒍᑦ ᐊᖅᑯᓵᕈᒫᕋᒪ,” ᐊᑕᓂᖅ ᐅᖃᕐᐳᖅ.

¹⁸ “ᑲᑉᐱᐊᓐᓇᒦᒃ ᐃᓕᑦᓯ ᐊᑕᓂᐅᑉ ᐅᓪᓗᖓᓂᒃ ᓂᕆᐅᒃᑐᓯ! ᖃᓄᖅ ᐊᑕᓂᐅᑉ ᐅᓪᓗᖓ ᐱᐅᒐᔭᕋᓱᒋᒐᑦᓯᐅᒃ ᐃᓕᑦᓯᓐᓄᑦ? ᐅᓪᓗᖅ ᑍᓐᓇ ᑕᕐᑐᕐᔪᐊᖑᔪᒫᕐᒪᑦ ᖃᐅᒪᓂᖃᖏᓪᓗᓂ.

¹⁹ ᐊᑦᔨᖃᕈᒫᕐᒪᑦ ᐊᖑᒻᒥᒃ ᓛᔭᒥᒃ ᕿᒫᔪᒥᒃ, ᓇᓄᕐᒥᒡᓗ ᐹᕐᓯᔪᒥᒃ! ᐅᕝᕙᓗ ᐊᑦᔨᖃᕈᒫᕆᕗᖅ ᐃᒡᓗᒧᑦ ᐃᑎᕐᑐᒥᒃ, ᐊᑭᓐᓇᒧᑦ ᐊᔭᑉᐸᒃᐸᑦ ᖁᒡᓗᒋᐊᒧᑦ ᑮᔭᐅᔪᑐᑦ!

²⁰ ᐊᑕᓂᐅᑉ ᐅᓪᓗᖓ ᑕᕐᑐᕐᔪᐊᖑᕗᖅ, ᖃᐅᒪᔫᓇᓂᓗ, ᑖᕐᔪᖓᕗᕐᓗ ᖃᐅᒻᒪᓪᓚᕆᒐᓂ.

²¹ “ᓇᓪᓕᐅᓐᓂᕐᓯᐅᕐᕕᓯ ᐆᒥᒋᕙᒃᑲ ᓇᕐᕈᒋᓪᓗᒋᑦ, ᑐᒃᓯᐊᕆᐊᕐᓯᒪᓂᓯᓗ ᖁᕕᐊᒋᓐᖏᓚᒃᑲ.

²² ᐅᕙᓐᓄᑦ ᑐᓂᕐᕈᓯᕋᓗᐊᕋᑦᓯ ᐃᑯᐊᓚᑦᓯᓂᕐᒧᑦ ᑐᓂᕐᕈᑎᓂᒃ, ᓂᐊᖂᔭᒃᓴᓂᒡᓗ ᑐᓂᕐᕈᓯᕋᓗᐊᕋᑦᓯ ᐃᓚᓕᐅᕐᓂᐊᓐᖏᓚᒃᑲ, ᑐᓂᕐᕈᓯᕋᓗᐊᕈᑦᓯᓗ ᐃᓚᒋᔭᐅᑦᓯᐊᕈᒪᓂᕐᒧᑦ ᖁᐃᒃᑎᓴᕐᑕᐅᓯᒪᔪᓂᒃ ᐃᒃᐱᒋᓂᐊᓐᖏᓚᒃᑲ.

²³ ᐃᓐᖏᕐᓂᓯ ᐅᕙᓐᓄᑦ ᓂᐸᖏᓚᐅᕐᓕᑦ, ᓂᑦᔮᑎᑦᓯᓂᓯᓗ ᓄᖃᕐᑎᓕᖕᓄᑦ ᓈᓚᖕᓂᐊᓐᖏᓚᒃᑲ.

²⁴ ᐃᖅᑲᕐᑐᐃᑦᓯᐊᕐᓂᓯ ᑯᕕᓕᕐᓕᑦ ᐃᒪᕐᑎᑐᑦ, ᐃᓱᐊᕐᑐᓕᓂᕐᓗ ᑰᒃᑎᑐᑦ ᖄᒥᓪᓗᓂ ᐃᒤᕐᓂᐊᖏᑦᑐᑎᑐᑦ.

²⁵ “ᐃᓴᕆᐊᓕᒥᐅᖑᔪᓯ ᑭᖑᕚᖑᖃᑎᒌᑦ ᐅᕙᓐᓄᑦ ᑐᓂᕐᕈᓯᓚᐅᕐᐱᓰ ᐆᑕᒃᓴᓂᒃ ᑐᓂᕐᕈᑎᓂᒡᓗ, ᐃᓄᖃᔪᐃᑦᑐᒦᑎᓪᓗᓯ ᐊᕐᕌᒍᓂᒃ 40ᓂᒃ?

²⁶ ᐊᖓᔪᖅᑳᕐᔪᐊᑦᓯᓐᓂᒃ ᒎᑎᓐᖑᐊᒥᒃ ᓴᑰᑎᒥᒃ ᐊᒡᔭᕐᓯᔭᕆᐊᖃᕐᓂᐊᓕᕐᐳᓯ, ᑬᐅᐊᓐᒥᒡᓗ ᒎᑎᓐᖑᐊᑦᓯᓐᓂᒃ ᐅᓪᓗᕆᐊᓐᖑᐊᒥᒃ ᓇᖕᒥᓂᖅ ᓴᓇᓚᐅᕐᑕᑦᓯᓐᓂᒃ.

²⁷ ᑍᒤᒻᒪᑦ ᐊᐅᓪᓚᕈᑎᔪᒫᓕᕐᐸᑦᓯ ᑕᒫᓯᑰᓯᐅᑉ ᐅᖓᑖᓄᑦ,” ᐊᑕᓂᖅ ᐅᖃᕐᐳᖅ, ᕿᓚᖕᒥᐅᒐᓴᒡᔪᐃᑦ ᒎᑎᖓᓐᓂᒃ ᐊᑎᖃᕐᑐᖅ.