ᐂᒨᓯᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑐᓴᕐᓯᐅᒃ ᐊᑕᓂᐅᑉ ᐅᖃᐅᓯᖓ ᐃᓕᑦᓯᓐᓂᒃ ᐅᖃᐅᑦᔨᔪᖅ, ᐃᓴᕆᐊᓕᒥᐅᑦ ᐃᓄᖏᓐᓂᒃ, ᐅᖃᐅᑦᔨᔪᑦ ᐃᓚᒌᓕᒫᓂᒃ ᐄᑦᔨᑉᑎᐅᑉ ᓄᓇᖓᓂᑦ ᐊᐅᓪᓚᕐᑎᓚᐅᕐᑕᓐᓂᒃ, ᐅᖃᕐᓗᖓ:

² “ᐃᓚᒌᒃᑐᓕᒫᓂᑦ ᓄᓇᕐᔪᐊᒥ ᖃᓂᒋᔭᑐᐊᕆᓯᒪᕙᑦᓯ; ᑍᒤᒻᒪᑦ ᐊᔪᕐᑐᓕᓂᓯ ᒪᓕᒡᓗᒋᑦ ᓱᒋᐊᕐᓂᐊᕐᐸᑦᓯ.”

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐱᔭᒃᓴᖏᑦ

³ “ᒪᕐᕉᒃ ᐃᖏᕐᕋᖃᑎᒌᒃᐸᓐᖏᓛᒃ ᐊᖏᖃᑎᒌᒃᓯᒪᒍᑎᒃ ᑭᓯᐊᓃ?

⁴ “ᓛᔭ ᓂᐱᖅᑯᕐᑐᓗᓂ ᓂᓪᓕᐊᕙᒃᐹ ᓇᐹᕐᑐᐃᑦ ᐊᑯᕐᖓᓐᓂ ᓂᕆᔭᒃᓴᖃᕈᓐᓃᕈᓂ? “ᐃᓅᓱᒃᑐᖅ ᓛᔭ ᖃᓕᖑᓛᕐᐸᒃᐹ ᓯᑎᒥᓂ ᓱᓇᒥᒃ ᓂᕆᔭᒃᓴᖃᖏᒃᑯᓂ?

⁵ “ᑎᖕᒥᐊᖅ ᓂᒐᕐᑎᑕᐅᔪᓐᓇᕐᐹᑦ ᓄᓇᒥ ᓂᒐᕐᑕᖃᖏᑦᑐᒥ? “ᓂᒐᖅ ᒪᓂᖅᑲᒥᑦ ᐃᒻᒥᓂᒃ ᐱᒋᐊᕈᓐᓇᕐᐹ, ᓱᓇᒥᒃ ᓂᒐᕐᑎᑕᒃᓴᖃᖏᓪᓗᓂ?

⁶ “ᐃᒡᓗᒐᓴᖕᓂ ᑎᑦᑐᓚᐅᑦ ᓂᓪᓕᕐᐸᑦ ᐃᓄᖏᑦ ᑲᑉᐱᐊᓱᒐᔭᓐᖏᓛᑦ? “ᐱᓂᕐᓗᖕᓂᐊᓗᖃᕈᓐᓇᕐᐹ ᐃᒡᓗᒐᓴᖕᓂ, ᐊᑕᓂᖅ ᐱᖁᔨᑎᓐᓇᒍ?

⁷ “ᓱᓕᓪᓚᕆᒃᐳᖅ ᐊᑕᓂᖅ ᐱᓂᐊᓲᖑᖏᒻᒪᑦ ᓇᓗᓇᕐᑐᒥᒃ, ᓇᓗᓁᕐᓯᓚᐅᖅᑳᕋᓂ ᐱᔨᓄᑦ ᐅᖃᕐᑎᖁᑎᒥᓄᑦ?

⁸ “ᓛᔭ ᓂᓪᓕᐊᓗᓂ ᐃᕐᓯᓵᕐᐸᑦ! ᑭᓈ ᓯᕘᕋᒐᔭᓐᖏᓛᖅ? “ᐊᑕᓂᖅ ᒎᑎ ᐅᖃᓚᒃᐸᑦ; ᑭᓇ ᐅᖃᐅᓯᖃᕐᑍᓕᔪᓐᓇᕐᐹ?”

ᓴᒥᐊᕆᐊᑉ ᐊᓯᕈᕐᑕᐅᓂᒃᓴᖓ

⁹ ᐅᖃᕆᐊᕐᑐᕆᑦ ᕿᒫᕕᖕᓄᑦ ᐋᔅᑖᑦᒧᑦ, ᐄᑦᔨᑉᑎᐅᓪᓗ ᕿᒫᕕᖏᓐᓄᑦ, ᐃᒫᒃ ᐅᖃᕐᓗᑎᑦ, “ᑲᑎᓕᕆᑦᓯ ᓴᒥᐊᕆᐊᑉ ᖃᖅᑲᖓᓄᑦ; ᑕᑯᓕᕆᑦᓯᓗ ᑕᕝᕙᓂ ᐅᐃᒪᔮᕐᑐᓂᒃ, ᐱᑦᓯᐊᕐᑕᐅᖏᑦᑐᓂᒡᓗ ᐃᓄᖕᓂᒃ.

¹⁰ “ᐱᓂᐊᕐᓂᕐᒥᒃ ᐃᓱᐊᕐᑐᒥᒃ ᖃᐅᔨᒪᖏᒻᒪᑕ.” ᐊᑕᓂᖅ ᐅᖃᕐᐳᖅ, “ᑖᒃᑯᐊ ᑲᑉᐱᐊᓱᒃᑎᑦᓯᓂᒃᑯᑦ ᑎᒡᓕᒐᕐᓂᒃᑯᓪᓗ ᐱᓯᒪᔭᒥᖕᓂᒃ ᑐᖅᑯᕐᑎᕆᓯᒪᕗᑦ ᕿᒫᕕᖕᒥᖕᓂ.”

¹¹ ᑕᒪᓐᓇ ᐱᓪᓗᒍ ᐊᑕᓂᖅ ᒎᑎ ᐅᖃᕐᐳᖅ: “ᐊᑭᕋᕐᑐᕐᑎᖏᑦ ᓄᓇᒥ ᓇᓂᑐᐃᓐᓈᓕᕐᓂᐊᕐᐳᑦ, ᓴᐳᓐᓂᐊᕈᑎᖏᓪᓗ ᓯᖁᒥᓐᓂᐊᕐᐰᑦ, ᕿᒫᕕᖏᓪᓗ ᑎᒡᓕᒐᕐᕕᒋᓗᒋᑦ.”

¹² ᐊᑕᓂᖅ ᐃᒫᒃ ᐅᖃᕐᐳᖅ, “ᓰᐱᓕᕆᔨ ᐊᕐᓵᕐᓯᕙᖕᒪᑦ ᓛᔭᒥᒃ ᓂᐅᖕᓂᒃ ᒪᕐᕈᐃᓐᓈᖕᓂᒃ ᓯᐅᑎᐅᓪᓗ ᐃᓔᓐᓇᖓᓂᒃ; ᑍᒫᒃᑕᐅᖅ ᐃᓴᕆᐊᓕᐅᑉ ᐃᓄᖏᑦ ᐃᓔᓐᓇᖏᑦ ᓴᐳᑎᔭᐅᓂᐊᕐᐳᑦ ᓄᓇᖃᕐᑐᑦ ᓴᒥᐊᕆᐊᒥ; ᐊᔪᕐᓴᖏᑦᑐᕐᓯᐅᑎᓂ ᐃᒡᓕᕐᓂ ᓇᓚᕈᕐᑐᑦ, ᐃᒃᓯᕙᐅᑖᓗᖕᓂᓗ ᐃᒃᓯᕙᔪᑦ.

¹³ ᓈᓚᒋᑦᓯ ᐊᑭᕋᕐᑐᕐᓗᓯᓗ ᔧᑰᑉ ᑭᖑᕚᖏᓐᓄᑦ,” ᐊᑕᓂᖅ ᒎᑎ ᐅᖃᕐᐳᖅ, ᕿᓚᖕᒥᐅᒐᓴᒡᔪᐊᑦ ᒎᑎᖓᑦ.

¹⁴ “ᐅᓪᓗᒥ ᑍᑲᓂ ᐃᓴᕆᐊᓕᑎᑦ ᓱᒋᐊᕈᒃᑭᑦ ᐊᔪᕐᓂᖏᑦ ᐱᓪᓗᒋᑦ, ᐱᑎᓕᐅᓪᓗ ᑐᓂᕐᕈᓯᕐᕕᖏᑦ ᓯᑯᒥᖃᓯᐅᑎᓂᐊᕐᐸᒃᑲ; ᑐᓂᕐᕈᓯᕐᕕᖏᑕᓗ ᓇᒡᔪᖏᒃ ᓇᑲᑦᓱᒫᕐᐳᒃ ᒪᓂᖅᑲᒧᓪᓗ ᑲᑕᒡᓗᑎᒃ.

¹⁵ ᐃᒡᓗᐃᓪᓗ ᐅᑭᐅᕐᓯᐅᑎᑦ ᐊᐅᔭᕐᓯᐅᑎᓪᓗ ᐊᓇᐅᓂᐊᕐᐸᒃᑲ, ᑑᒑᓪᓗ ᐃᒡᓗᐃᑦ ᓯᑯᒥᓐᓂᐊᕐᐳᑦ, ᐃᒡᓗᑦᓯᐊᕚᓗᐃᓪᓗ ᓄᖑᓪᓗᑎᒃ,” ᐊᑕᓂᖅ ᐅᖃᕐᐳᖅ.