ᐂᒨᓯᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᒧᐊᐱ

¹ ᐊᑕᓂᖅ ᐃᒫᒃ ᐅᖃᕐᐳᖅ, “ᒧᐊᐱᐅᑉ ᐊᔪᕐᑐᓕᓂᖏᓐᓄᑦ ᐱᖓᓱᓄᑦ ᓯᑕᒪᓄᓪᓗ, ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ, ᐄᑐᒥᐅᑉ ᐊᖓᔪᖅᑳᕐᔪᐊᖓᑕ ᓴᐅᓂᖏᑦ ᐃᑭᑕᐅᓚᐅᕐᒪᑕ ᐊᕐᔭᓕᓂᓐᖑᕐᓗᒋᑦ.

² ᒧᐊᐱ ᐃᑯᐊᓪᓚᒃᑎᓐᓂᐊᕐᐸᕋ ᑭᕆᐅᑎᐅᓪᓗ ᕿᒫᕕᖏᑦ ᓄᖑᓪᓗᒋᑦ; ᒧᐊᐱ ᑐᖁᓂᐊᕐᐳᖅ ᓂᐱᓕᐊᓗᖕᒥ, ᕾᒐᓛᕐᑎᓪᓗᒋᑦ ᑎᑦᑐᓚᐅᑎᓗ ᑐᓴᕐᓴᐅᑎᓪᓗᒋᑦ.

³ ᐊᐅᓚᑦᓯᔨᖏᑦ ᓄᖑᓐᓂᐊᕐᐸᒃᑲ ᐊᑯᓐᓂᖓᓐᓂ, ᐊᖓᔪᖅᑳᖁᑎᖏᓪᓗ ᑐᖁᓐᓂᐊᕐᐸᒃᑲ,” ᐊᑕᓂᖅ ᐅᖃᕐᐳᖅ.

ᔫᑕ

⁴ “ᔫᑕᐅᑉ ᐊᔪᕐᑐᓕᓂᖏᓐᓄᑦ ᐱᖓᓱᓄᑦ, ᓯᑕᒪᖓᓪᓗ, ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ. ᓇᕐᕈᓕᓚᐅᕐᒪᑕ ᐊᑕᓂᐅᑉ ᐱᖁᔭᖓᓂᒃ, ᒪᓕᒃᑕᐅᖁᔭᖏᓐᓂᒡᓗ. ᓱᓕᖏᑦᑐᓄᑦ ᐃᒻᒥᖕᓂᒃ ᑕᒻᒪᕐᑎᒻᒪᑕ, ᓯᕗᓕᖏᑕ ᐱᐅᓯᕆᓚᐅᕐᑕᖏᑎᑐᑦ.

⁵ ᔫᑕ ᐃᑯᐊᓪᓚᒃᑎᓐᓂᐊᕐᐸᕋ, ᔨᕉᓴᓕᐅᓪᓗ ᕿᒫᕕᖏᑦ ᓄᖑᑎᓐᓂᐊᕐᐸᒃᑲ.”

ᒎᑎᐅᑉ ᐃᖅᑲᕐᑐᐃᓂᖓ ᐃᓴᕆᐊᓕᒥᒃ

⁶ ᐊᑕᓂᖅ ᐃᒫᒃ ᐅᖃᕐᐳᖅ, “ᐃᓴᕆᐊᓕᐅᑉ ᐊᔪᕐᑐᓕᓂᖏᓐᓄᑦ ᐱᖓᓱᓄᑦ ᓯᑕᒪᓄᓪᓗ, ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ. ᐃᓱᐊᕐᑐᓂᒃ ᓂᐅᕐᕈᑎᖃᓚᐅᕐᒪᑕ ᓯᐅᓪᕕᕆᒧᑦ, ᐊᔪᕐᓴᕐᑐᓂᒡᓗ ᓂᐅᕐᕈᑎᖃᓚᐅᕐᐳᑦ ᐃᑎᒐᒍᑎᓄᑦ.

⁷ ᑐᓪᓕᕋᕐᒪᑕ ᐊᔪᕐᓴᕐᑐᑦ ᓂᐊᖁᖏᓐᓂᒃ ᒪᓂᖅᑲᒥᒃ ᑐᓪᓕᕋᕐᑐᑎᑐᑦ, ᓵᓚᐅᓯᒪᔪᓪᓗ ᐱᑦᓯᐊᕐᓇᒋᑦ ᐊᒡᕖᕐᑎᓚᐅᕐᒪᒋᑦ; ᐊᑖᑕᒌᓪᓗ ᐊᕐᓇᒥᒃ ᑖᑦᓱᒥᖓᑦᓮᓐᓇᖅ ᐱᖃᑎᖃᖃᑦᑕᓚᐅᕐᒪᑕ, ᑕᒪᑐᒧᖓ ᐊᑎᕋ ᐃᑦᔪᕐᓁᑦᑐᖅ ᐃᑦᔪᕐᓇᕐᓯᑎᕐᑕᐅᕗᖅ.

⁸ ᑐᓂᕐᕈᓯᕐᕕᓕᒫᓪᓗ ᑭᒡᓕᖏᓐᓂ ᓇᓚᖃᑦᑕᕐᒪᑕ ᐊᑭᓕᐅᑕᐅᓯᒪᔪᑦ ᐊᓐᓄᕌᑦ ᖄᖏᓐᓂ; ᒎᑎᖏᑦᑕᓗ ᐃᒡᓗᖓᓂ ᕔᓂᑐᖃᑦᑕᕐᒪᑕ ᐊᑭᓖᔭᕆᐊᓖᑦ ᐊᑭᓕᐅᑎᕕᓂᖏᓐᓂᒃ.

⁹ “ᐊᓯᕈᓚᐅᕋᓗᐊᕋᒃᑭᑦ ᐊᒧᕅᑎᒥᐅᑦ ᓵᖏᓐᓂ, ᓇᐹᕐᑐᑎᑐᑦ ᓰᑕᕆᑎᑐᑦ ᐳᕐᑐᑎᒋᓚᐅᕋᓗᐊᕐᐳᑦ ᑐᑭᓕᐊᕐᑐᑎᑐᑦ ᐳᕐᑐᔪᑎᑐᑦ, ᓲᖑᑎᒋᓚᐅᕋᓗᐊᕐᑎᓪᓗᒋᑦ ᓯᑕᒃᑕᑎᑐᑦ ᐆᒃᑎᑐᑦ; ᖄᖓᓃᑦᑐᑦ ᐱᕈᕐᑐᖏᑦ ᐊᓯᕈᓚᐅᕐᐸᒃᑲ, ᐊᒫᖏᓪᓗ ᐊᑖᓃᑦᑐᑦ ᐱᖃᓯᐅᑎᓪᓗᒋᑦ.

¹⁰ ᐊᐅᓪᓚᕐᑎᓚᐅᕐᐸᑦᓯ ᐄᑦᔨᑉᑎᐅᑉ ᓄᓇᖓᓂᑦ, ᑕᓯᐅᓚᐅᕐᐸᑦᓯᓗ ᐊᕐᕌᒍᓂᒃ 40ᓂᒃ ᐃᓄᖃᔪᐃᑦᑐᒥ, ᓄᓇᑖᖁᓪᓗᓯ ᐊᒧᕅᑎᑦ ᓄᓇᖓᓐᓂᒃ.

¹¹ ᐃᕐᓂᓯᓗ ᐃᓚᖏᑦ ᐅᖃᕐᑎᑖᕆᓚᐅᕐᐸᒃᑲ, ᐃᓅᓱᒃᑐᖁᑎᓯᓗ ᐊᖑᑎᑦ ᐃᓚᖏᑦ ᓴᓂᕐᕙᓚᐅᕐᐸᒃᑲ ᓈᓴᕅᑎᐅᖁᓪᓗᒋᑦ. ᑍᒤᓚᐅᓐᖏᓛᖅ, ᐃᓕᑦᓯᓐᓂ ᐃᓴᕆᐊᓕᒥᐅᖑᔪᓯ?” ᐊᑕᓂᖅ ᐅᖃᕐᐳᖅ.

¹² “ᓴᓂᕐᕙᒃᓯᒪᔭᒃᑲᓗ ᓈᓴᕅᑎᑦ ᕔᓂᑐᕐᑎᓚᐅᕐᐸᓯ, ᐅᖃᕐᑎᒃᑲᓗ ᐅᖃᐅᑎᓚᐅᕐᐸᓯ, ‘ᓂᐱᖃᓐᖏᓚᐅᕆᑦᓯ!’

¹³ ᑕᑯᒋᑦ, ᐊᕐᑐᕐᓴᕐᑎᓐᓂᐊᕐᐸᑦᓯ ᐅᓂᐊᒐᐅᑉ ᐅᖁᒤᓐᓂᖓᑐᑦ ᑕᑕᑦᑐᑎᑐᑦ ᓂᐊᖂᔭᒃᓴᒥᒃ.

¹⁴ ᐅᕿᓚᔫᒐᓗᐊᑦ ᐊᓐᓇᖕᓂᐊᓐᖏᓚᑦ, ᓴᓐᖏᔪᓪᓗ ᓴᓐᖐᓕᓂᐊᕐᐳᑦ, ᐊᔪᖏᑦᑐᕐᔪᐊᓪᓗ ᐅᓇᑕᕐᑏ ᐃᒻᒥᖕᓂᒃ ᓴᐳᑎᔪᓐᓇᕐᓂᐊᓐᖏᓚᑦ.

¹⁵ ᐱᓯᒃᓯᓕᔭᕐᑐᓪᓗ ᓴᐳᑦᔨᓯᒪᔪᓐᓇᕐᓂᐊᓐᖏᓚᑦ, ᐅᕿᓚᔪᓪᓗ ᐊᓐᓇᒍᓐᓇᕐᓂᐊᓐᖏᓚᑦ, ᕿᒻᒥᕐᔪᐊᒦᑦᑐᓪᓗ ᕿᒫᔪᓐᓇᕐᓂᐊᕋᑎᒃ.

¹⁶ ᐅᓇᑕᕐᑏᓪᓗ ᐱᓯᑎᐊᓗᐃᑦ ᐅᓪᓗᒥ ᑕᕝᕙᓂ ᕿᒫᔪᒫᕐᐳᑦ ᓱᓇᖃᕈᓐᓃᕐᓗᑎᒃ,” ᐊᑕᓂᖅ ᐅᖃᕐᐳᖅ.