ᐂᒨᓯᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐅᑯᐊ ᐂᒧᓯᐅᑉ ᐅᖃᐅᓯᖏᑦ, ᓰᐱᓕᕆᔨᐅᖃᑕᐅᓚᐅᕐᑑᑉ ᑎᑯᐊᒥ, ᑕᑯᓚᐅᕐᑕᖏᑦ ᐃᓴᕆᐊᓕᒥᐅᑉ ᐱᓪᓗᒋᑦ, ᐅᓮᐊ ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒥ, ᔨᕈᐳᐊᒻ ᐅᓪᓗᖏᓐᓂ ᔪᐊᓯᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᑎᓪᓗᒍ ᐃᓴᕆᐊᓕᒥᐅᓄᑦ, ᐊᕐᕌᒎᒃ ᒪᕐᕉᒃ ᓯᕗᓂᖓᒍᑦ ᓄᓇ ᓴᔪᒃᐱᓪᓚᓚᐅᕐᑎᓐᓇᒍ.

² ᐅᖃᕐᐳᕐᓗ, “ᐊᑕᓂᖅ ᓂᐱᖅᑯᕐᑐᓪᓗᓂ ᓂᓪᓕᐊᕗᖅ ᓮᐅᓂᒥᑦ, ᓂᐱᕐᔪᐊᖓᓗ ᑐᓴᕐᓴᐅᕗᑦ ᔨᕉᓴᓕᒥᑦ; ᓰᐱᓕᕆᔩᑦ ᐊᒡᓛᑦ ᓂᕿᒃᓴᖁᑎᖏᑦ ᑐᖁᓕᑎᑕᐅᕗᑦ, ᖃᖅᑲᐅᓪᓗ ᑳᕐᒥᐅᑉ ᖄᖓ ᑐᖁᓕᓕᕐᓗᓂ.”

ᒎᑎᐅᑉ ᐃᖅᑲᕐᑐᐃᓂᖓ ᐃᓴᕆᐊᓕᒥᐅᑦ ᓯᓚᖅᑲᑎᖏᓐᓄᑦ ᓯᕆᐊ

³ ᐊᑕᓂᖅ ᐃᒫᒃ ᐅᖃᕐᐳᖅ: “ᐱᖓᓱᑦ ᑕᒫᓯᑰᓯᐅᑉ ᐊᔪᕐᑐᓕᓂᖏᑦ ᐱᓪᓗᒋᑦ, ᓯᑕᒪᖓᓪᓕ ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ, ᒋᓕᐊᑎᒥᐅᓂᒃ ᑐᓪᓕᕋᕐᓯᒪᓂᖏᑦ ᐱᓪᓗᒋᑦ, ᑐᓪᓕᕅᑦᔪᑎᓄᑦ ᓴᕕᕋᔭᓕᖕᓄᑦ.

⁴ ᐃᑯᐊᓪᓚᒃᑎᓐᓂᐊᕐᐸᕋ ᕼᐊᔧᐅᓕᐅᑉ ᐃᒡᓗᖓ, ᐊᖓᔪᖅᑳᕐᔪᐊᑉ ᐱᓐ-ᕼᐊᑖᑎᐅᑉ ᕿᒫᕕᖓ ᑕᒪᑐᒧᖓ ᓄᖑᑕᐅᓂᐊᕐᐳᖅ.

⁵ ᑕᒫᓯᑰᓯᐅᓪᓗ ᐃᑎᕐᑕᕐᕕᖓᑕ ᓴᕕᕋᔭᖓ ᓱᕋᒃᑎᕐᓂᐊᕐᐸᕋ, ᓄᓇᖃᕐᑐᓪᓗ ᐂᕙᓐ ᓇᕐᓴᖓᓂ ᓄᖑᑎᓐᓂᐊᕐᐸᒃᑲ, ᑍᓐᓇᓗ ᑎᒍᒥᐊᕐᑐᖅ ᐊᖓᔪᖅᑳᕐᔪᐊᑉ ᑎᒃᑯᐊᕐᓯᑦᔪᑎᖓᓂᒃ ᐱᑦ-ᐄᑕᓂᒥ; ᓯᕆᐊᓪᓗ ᐃᓄᖏᑦ ᑎᒍᔭᐅᓂᐊᕐᐳᑦ ᑭᕆᒧᑦ ᐊᐅᓪᓚᕈᑦᔭᐅᓗᑎᒃ,” ᐊᑕᓂᖅ ᐅᖃᕐᐳᖅ.

ᐱᓕᔅᑎᐊ

⁶ ᐊᑕᓂᖅ ᐃᒫᒃ ᐅᖃᕐᐳᖅ: “ᒑᓴᐅᑉ ᐊᔪᕐᑐᓕᓂᖏᓐᓄᑦ ᐱᖓᓱᓄᑦ, ᓯᑕᒪᖓᓪᓗ ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ, ᐃᓄᖕᓂᒃ ᐊᐅᓪᓚᕈᑦᔨᓚᐅᕐᓂᖏᓐᓂᒃ ᐃᓘᓐᓇᖏᓐᓂᒃ ᑎᒍᔭᐅᑎᑦᓯᓪᓗᑎᒃ ᐂᑎᓪᓗᒋᓪᓗ ᐄᑐᒥᒧᑦ.

⁷ ᒑᓴᐅᓪᓗ ᐊᕙᓗᕐᔪᐊᖓ ᐃᑯᐊᓪᓚᒃᑎᓐᓂᐊᕐᐸᕋ, ᕿᒫᕕᖏᓪᓗ ᑕᒪᑐᒧᖓ ᓄᖑᑕᐅᓂᐊᕐᐳᑦ.

⁸ ᓄᓇᖃᕐᑐᓪᓗ ᐋᔅᑖᑦᒥ ᓄᖑᑎᓐᓂᐊᕐᐸᒃᑲ, ᐊᖓᔪᖅᑳᕐᔪᐊᓪᓗ ᑎᒃᑯᐊᕐᓯᑦᔪᑎᖓᓂᒃ ᑎᒍᒥᐊᕐᑐᖅ ᐊᓯᑭᓗᓂᒥ; ᐊᒡᒐᒃᑲᓗ ᓵᑎᓐᓂᐊᕐᐸᒃᑲ ᐃᑯᕋᓂᒧᑦ, ᐱᓕᔅᑍᓂᒥᐅᓪᓗ ᐊᒥᐊᒃᑯᖏᑦ ᓄᖑᓐᓂᐊᕐᐳᑦ,” ᐊᑕᓂᖅ ᒎᑎ ᐅᖃᕐᐳᖅ.

ᑍᕋ

⁹ ᐊᑕᓂᖅ ᐅᖃᕐᐳᖅ, “ᐱᖓᓱᓄᑦ ᑍᕆᐅᑉ ᐊᔪᕐᑐᓕᓂᖏᓐᓄᑦ, ᓯᑕᒪᖓᓪᓗᑦ ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ, ᑎᒍᔭᐅᓯᒪᔪᓕᒫᓂᒃ ᐄᑐᒥᒧᐊᕐᑎᑦᓯᓚᐅᕐᒪᑕ, ᐃᖅᑲᐅᒪᓚᐅᖏᒻᒪᑕ ᐊᖏᖃᑎᒌᖕᓂᕆᓚᐅᕐᑕᒥᖕᓂᒃ ᐃᓚᒌᑦᓯᐊᕈᒪᓂᕐᒥᒃ.

¹⁰ ᑍᕆᐅᓪᓗ ᐃᒡᓗᕐᔪᐊᖓᑕ ᐊᕙᓗᕐᔪᐊᖓ ᐃᑯᐊᓪᓚᒃᑎᓐᓂᐊᕐᐸᕋ, ᑕᒪᑐᒧᖓ ᕿᒫᕕᖏᑦ ᐊᓯᕈᕐᑕᐅᖁᓪᓗᒋᑦ.”

ᐄᑐᒥ

¹¹ ᐊᑕᓂᖅ ᐃᒫᒃ ᐅᖃᕐᐳᖅ, “ᐄᑐᒥᐅᑉ ᐊᔪᕐᑐᓕᓂᖏᓐᓄᑦ ᐱᖓᓱᓄᑦ, ᓯᑕᒪᖓᑦᑕᓗ ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ, ᖃᑕᓐᖑᑎᓂ ᓴᕕᒡᔪᐊᒧᑦ ᕿᒫᑎᓪᓗᒍ ᒪᓕᓚᐅᕐᒪᒍ, ᓂᑲᒍᓱᒐᓂᓗ ᐱᓇᓱᐊᓚᐅᕐᒪᑦ; ᓂᓐᖓᐅᒪᓂᖓᓗ ᓯᖁᑦᑎᕆᓚᐅᕐᒪᑦ ᑕᐅᕗᖓᓕᒫᖅ, ᓂᓐᖓᐅᒪᓂᓂᓗ ᑲᔪᓯᑎᓚᐅᕐᐹ ᐃᓱᖃᖏᑦᑐᒧᑦ.

¹² ᑏᒪᓐ ᐃᑯᐊᓪᓚᒃᑎᓐᓂᐊᕐᐸᕋ, ᑕᒪᑐᒧᖓᓗ ᐳᔾᕋᒥᐅᑦ ᕿᒫᕕᖏᑦ ᓄᖑᑕᐅᓂᐊᕐᐳᑦ.”

ᐋᒪᓐ

¹³ ᐊᑕᓂᖅ ᐅᖃᕐᐳᖅ, “ᐊᒧᓁᒥᐅᑦ ᐊᔪᕐᑐᓕᓂᖏᓐᓄᑦ ᐱᖓᓱᓄᑦ, ᓯᑕᒪᖓᑦᑕᓪᓗ ᓱᒋᐊᕐᑕᐅᓂᒃᓴᖓ ᐲᕐᓂᐊᓐᖏᓚᕋ, ᐊᕐᓇᓂᒃ ᕿᑐᕐᖓᒃᓴᓕᖕᓂᒃ ᐱᓚᒃᓯᓚᐅᕐᒪᑕ ᐊᖕᒪᕐᓗᒋᑦ ᒋᓕᐊᑎᒥ, ᓄᓇᖁᑎᑎᒃ ᐊᖏᒡᓕᒋᐊᕈᒪᓪᓗᒍ.

¹⁴ ᕌᐸᐅᑉ ᐊᕙᓗᕐᔪᐊᖓ ᐃᑯᐊᓪᓚᒃᑎᓐᓂᐊᕐᐸᕋ, ᑕᒪᑐᒧᖓᓗ ᕿᒫᕕᖏᑦ ᐊᓯᕈᕐᑕᐅᓂᐊᕐᐳᑦ, ᐃᓄᖏᓪᓗ ᕾᒐᓛᕐᓂᐊᕐᐳᑦ ᓂᐱᕐᔪᐊᖃᕐᓗᑎᒃ ᐅᓇᑕᕆᐊᕐᑐᑎᑐᑦ, ᓱᓗᒃᓱᕐᔪᐊᕐᑐᑎᑐᓪᓗ ᐊᓄᕌᕐᑎᓪᓗᒍ ᐅᓚᔪᔨᕋᕐᑐᑎᑐᑦ.

¹⁵ ᐊᖓᔪᖅᑳᕐᔪᐊᖓᓗ ᑎᒍᔭᐅᔪᒫᕐᐳᖅ ᐊᐅᓪᓚᕈᑦᔭᐅᓗᓂ, ᐊᖓᔪᖅᑳᖁᑎᖏᓪᓗ ᐊᑕᐅᑦᓯᒃᑯᑦ,” ᐊᑕᓂᖅ ᐅᖃᕐᐳᖅ.