ᐋᐴᓯᑕᓖᑦ ᐱᓂᐊᕐᓂᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦᓴᐅᓗᓯᐅᑉ ᓵᒋᐊᕐᓂᖓ ᐋᐴᓯᑕᓖᑦ 22:6-16 ; 26:12-18 1 ᓴᐅᓗᓯ ᓱᓕ ᑲᑉᐱᐊᓇᕐᑐᒦᑎᑦᓯᓚᐅᕐᐳᖅ ᐊᑭᕋᕐᑐᕐᓂᕐᒥᓂᒃ ᑲᔪᓯᑎᑦᓯᓪᓗᓂ ᑐᖁᕅᔪᒪᓪᓗᓂᓗ ᐊᑕᓂᐅᑉ ᒪᓕᒃᑎᖏᓐᓂᒃ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᐊᐳᖅ, 2 ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓄᐊᕐᑐᓂᒃ ᑕᒫᓯᑰᓯᒧᑦ ᑎᑎᕋᕐᓯᒪᔪᓂᒃ ᑎᒍᓯᔪᓐᓇᕈᑎᒃᓴᓂᒃ ᐱᑎᑕᐅᔪᒪᓪᓗᓂ, ᓇᓂᓯᒍᓂ ᒪᓕᒃᑎᓂᒃ ᐊᑕᓂᐅᑉ ᐊᖅᑯᑎᖓᒎᕐᓂᕋᕐᑕᐅᔪᓂᒃ, ᑎᒍᓗᒋᑦ ᐊᖑᑎᑦ ᐊᕐᓁᓪᓗ ᔨᕉᓴᓕᒻᒧᑦ ᐅᑎᐅᑎᔪᒪᓪᓗᒋᑦ. 3 ᑕᒫᓯᑰᓯᒧᑦ ᖃᒡᓕᓕᕐᑎᓪᓗᒍ, ᖃᐅᒪᔪᐊᓗᖕᒧᑦ ᕿᓚᖕᒥᑦ ᐱᔪᒧᑦ ᑕᕝᕔᓐᓇᖅ ᖃᐅᒻᒥᑕᐅᕗᖅ. 4 ᓄᓇᒧᓪᓗ ᐅᕐᕈᓗᓂ ᑐᓴᕐᐳᖅ ᓂᐱᒥᒃ ᐅᖃᕐᑐᒥᒃ, “ᓴᐅᓗᓯ, ᓴᐅᓗᓯ, ᓱᖕᒪᑦ ᐊᑭᕋᕐᑐᕐᐱᖔ?” 5 ᓴᐅᓗᓯᐅᑉ ᐊᐱᕆᕚ, “ᐊᑕᓃᖅ ᑭᓇᐅᕕᑦ?” ᓂᐱᒧᑦ ᐅᖃᐅᑦᔭᐅᕗᖅ, “ᔩᓱᓯᐅᕗᖓ ᐊᑭᕋᕐᑐᕐᑍᑦ; 6 ᒪᑭᓪᓗᑎᑦ ᐃᒡᓗᒐᓴᖕᓄᐊᓕᕆᑦ, ᑍᑲᓂ ᐅᖃᐅᑦᔭᐅᓂᐊᕐᐳᑎᑦ ᖃᓄᐃᓕᐅᕆᐊᖃᕐᒪᖔᕐᐱᑦ.” 7 ᓴᐅᓗᓯᐅᑉ ᐃᖏᕐᕋᖃᑎᖏᑦ ᖁᐊᕐᓵᕐᓂᕐᒧᑦ ᑍᒤᓕᖓᑐᐃᓐᓇᓕᕐᐳᑦ ᓂᓪᓕᕈᓐᓇᕋᑎᒃ, ᓂᐱᒥᒃ ᑐᓵᒐᓗᐊᕐᓗᑎᒃ ᐃᓄᒃᓯᖏᓐᓇᒥᒃ. 8 ᓴᐅᓗᓯ ᓂᑯᕕᓐᓇᒥ; ᐅᐃᒃᑲᓗᐊᕋᒥ ᑕᑯᔪᓐᓇᓐᖏᓚᖅ; ᐊᒡᒐᖏᑎᒍᑦ ᑎᒍᓪᓗᒍ ᑕᓯᐅᕐᐹᑦ ᑕᒫᓯᑰᓯᒧᑦ. 9 ᐅᓪᓗᓂᒃ ᐱᖓᓱᓂᒃ ᑕᐅᑐᓚᐅᓐᖏᓚᖅ ᓂᕆᓚᐅᕋᓂᓗ ᐃᒥᓚᐅᓐᖏᓚᖅ. 10 ᐃᓕᓐᓂᐊᕐᑎᑕᖃᓚᐅᕐᐳᖅ ᑕᒫᓯᑰᓯᒥ ᐊᓇᓁᐊᓯᒥᒃ ᐊᑎᓕᖕᒥᒃ. ᑖᓐᓇ ᑕᑯᑎᑕᐅᓪᓗᓂ ᐊᑕᓂᐅᑉ ᐅᖃᐅᑎᕚ, “ᐊᓇᓁᐊᓯ.” ᑖᓐᓇ ᑭᐅᕗᖅ, “ᐊᑕᓃᖅ ᒫᓃᑉᐳᖓ.” 11 ᐊᑕᓂᐅᑉ ᐅᖃᐅᑎᕚ, “ᐊᖅᑯᒻᒧᑦ ᐂᓕᕆᑦ ᐊᑎᖃᕐᑐᒧᑦ ᑐᑭᓕᐊᕐᑐᒥᒃ, ᔫᑕᓯᐅᑉ ᐃᒡᓗᖓᓄᑦ ᑕᑯᔭᕐᑐᕐᕆᑦ ᐃᓄᖕᒥᒃ ᑖᕐᓱᓯᒥᐅᕐᒥᒃ ᓴᐅᓗᓯᒥᒃ ᐊᑎᓕᖕᒥᒃ, ᒫᓐᓇ ᑐᒃᓯᐊᕐᒪᑦ. 12 ᑕᑯᑎᑕᐅᓪᓗᓂ ᑕᑯᓚᐅᕐᒪᑦ ᐊᖑᒻᒥᒃ ᐊᓇᓁᐊᓯᒥᒃ ᐊᑎᓕᖕᒥᒃ ᑖᑦᓱᒧᖓ, ᐅᐸᒃᑕᐅᓪᓗᓂ ᐸᑎᒻᒥᔭᐅᓗᓂ ᑕᐅᑐᓕᕐᑎᑕᐅᖁᓪᓗᒍ.” 13 ᐊᓇᓁᐊᓯ ᑭᐅᕗᖅ, “ᐊᑕᓃᖅ, ᑖᑦᓱᒥᖓ ᑐᓴᐅᒪᒐᒪ ᐃᓄᖕᓂᑦ ᐅᓄᕐᑐᓂᑦ, ᑖᓐᓇ ᐃᓄᖁᑎᖕᓄᑦ ᔨᕉᓴᓕᒻᒥ ᐊᖏᔪᐊᓗᖕᒥᒃ ᐱᐅᖏᑦᑐᓂᒃ ᐱᓇᓱᐊᖃᑕᕐᓯᒪᓂᖓᓂᒃ; 14 ᒫᓐᓇ ᑕᒫᓯᑰᓯᒧᐊᕐᐳᖅ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᓐᓂᑦ ᐱᔪᓐᓇᕐᑎᑕᐅᓪᓗᓂ ᑎᒍᓯᔪᓐᓇᖁᓪᓗᒍ ᑭᒃᑯᑐᐃᓇᕐᓂᒃ ᑐᒃᓯᐊᕐᕕᖃᕐᑐᓂᒃ ᐃᓕᖕᓄᑦ.” 15 ᐊᑕᓂᐅᑉ ᐅᖃᐅᑎᕚ, “ᐂᓕᕆᑦ, ᑖᓐᓇ ᓂᕈᐊᕋᒃᑯ ᐅᕙᓐᓂᒃ ᐱᔨᑦᓯᖁᓪᓗᒍ, ᐊᑎᕋ ᑐᓴᕐᑕᐅᖁᓪᓗᒍ ᔫᑎᐅᖏᑦᑐᓄᑦ, ᐊᖓᔪᖅᑳᕐᔪᐊᓄᑦ, ᐃᓄᖕᓄᓪᓗ ᐃᓴᕆᐊᓕᒥᐅᓄᑦ; 16 ᖃᐅᔨᑎᓐᓂᐊᕋᒃᑯ ᖃᓄᖅ ᐊᖏᑎᒋᔪᒥᒃ ᐊᒃᓱᕈᕐᑎᑕᐅᔭᕆᐊᖃᕐᒪᑦ ᐱᑦᔪᑎᒋᓗᖓ.” 17 ᑕᕝᕙ ᐊᓇᓁᐊᓯ ᐂᕗᖅ, ᐃᒡᓗᒧᑦ ᐃᑎᕐᓗᓂ; ᐸᑎᒻᒥᓪᓗᓂᐅᒃ ᐅᖃᕐᐳᖅ, “ᐅᒃᐱᖃᑎᒐ ᓴᐅᓗᓰ, ᐊᑕᓂᐅᑉ ᔩᓱᓯᐅᑉ ᐃᓕᖕᓄᑦ ᓴᖅᑭᓚᐅᕐᑑᑉ ᕾᓕᕐᑎᓪᓗᑎᑦ, ᑎᓕᕚᖓ ᑕᐅᑐᓕᕐᑎᑕᐅᖁᓪᓗᑎᑦ ᐊᓂᕐᓂᕐᒥᒡᓗ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᖁᓪᓗᑎᑦ.” 18 ᑕᕝᕔᓐᓇᖅ ᐃᔨᖏᖕᓂᑦ ᑲᑕᒃᑐᖃᕐᐳᖅ ᐃᖃᓘᑉ ᑲᕕᓯᖏᑎᑐᑦ ᑍᒤᑦᑑᖕᓂᒃ ᑕᐅᑐᓕᕐᓗᓂ. ᒪᑭᓐᓇᒥ ᐹᑉᑎᑕᐅᕗᖅ; 19a ᓂᕆᔭᕇᕋᒥ ᓄᑭᖃᑦᓯᐊᓕᕐᐳᖅ. ᓴᐅᓗᓯᐅᑉ ᐊᔪᕆᕐᑐᐃᓂᖓ ᑕᒫᓯᑰᓯᒥ 19b ᓴᐅᓗᓯ ᐃᓕᓐᓂᐊᕐᑎᓃᓚᐅᕐᐳᖅ ᑕᒫᓯᑰᓯᒥ ᐅᓪᓗᓂᒃ ᐅᓄᖏᑦᑐᓂᒃ. 20 ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᓇᓗᓁᕐᓯᓕᓚᐅᕐᐳᖅ ᐅᖃᕐᓗᓂ: “ᔩᓱᓯ ᒎᑎᐅᑉ ᐃᕐᓂᕆᕚ.” 21 ᑐᓴᕐᑐᓕᒫᑦ ᑲᒪᓂᐊᕐᐳᑦ ᐅᖃᕐᓗᑎᒡᓗ, “ᑖᓐᓇᐅᓐᖏᓛᖅ ᔨᕉᓴᓕᒻᒥ ᑐᖁᑕᐅᑎᑦᓯᖃᑦᑕᓚᐅᕐᑐᖅ ᔩᓱᓯᒧᑦ ᑐᒃᓯᐊᕐᐸᒃᑐᓂᒃ? ᐅᕗᓐᖓᓚᐅᓐᖏᓚᕐᓘ ᑎᒍᓯᔭᕐᑐᕐᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᐅᑎᐅᑎᔪᒪᓪᓗᒌᑦ?” 22 ᓴᐅᓗᓯᐅᑉ ᐊᔪᕆᕐᑐᐃᓂᖓ ᐱᔪᓐᓇᕐᓯᕙᓪᓕᐊᓚᐅᕐᐳᖅ, ᔫᑎᑦ ᑕᒫᓯᑰᓯᒦᑦᑐᑦ ᑭᒡᒍᓯᒃᓮᕈᑎᓚᐅᕐᐰᑦ, ᔩᓱᓯ ᙭ᔅᑑᓯᐅᓂᖓᓂᒃ ᓇᓗᓁᕐᓯᕕᒋᓪᓗᒋᑦ. 23 ᐅᓪᓗᐃᑦ ᐊᒥᓱᑦ ᐊᓂᒍᕐᑎᓪᓗᒋᑦ, ᔫᑎᑦ ᑲᑎᒪᓪᓗᑎᒃ ᐊᖏᖃᑎᒌᒃᐳᑦ ᓴᐅᓗᓯ ᑐᖁᑦᓱᒪᓪᓗᒍ, 24 ᐃᓱᒪᒋᔭᖏᑦ ᓴᐅᓗᓯᐅᑉ ᖃᐅᔨᒪᓕᕐᐰᑦ. ᔫᑎᑦ ᐅᓪᓗᑕᒫᑦ ᐅᓐᓄᐊᑕᒫᓪᓗ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᓐᓂ ᖃᐅᔨᓴᑕᐅᓚᐅᕐᐳᑦ ᑐᖁᑦᓱᒪᒐᓗᐊᕐᓗᒍ; 25 ᐅᓐᓄᐊᒃᑯᓪᓕ ᓴᐅᓗᓯ ᒪᓕᒃᑎᒥᓄᑦ ᐊᕙᓗᕐᔪᐊᑉ ᓯᓚᑖᓄᑦ ᓂᖏᑎᑕᐅᕗᖅ ᐃᕕᐅᔭᒃᑯᑦ. ᓴᐅᓗᓯᐅᑉ ᔨᕉᓴᓕᒻᒧᐊᕐᓂᖓ 26 ᓴᐅᓗᓯ ᔨᕉᓴᓕᒻᒧᐊᕋᒥ ᐃᓕᓐᓂᐊᕐᑎᑦ ᐃᓚᒋᓇᓱᐊᓕᕐᐰᑦ; ᑖᒃᑯᐊᓕ ᓯᕘᕋᒋᕚᑦ, ᐅᒃᐱᕈᓱᖏᓐᓇᒥᒃ ᐃᓕᓐᓂᐊᕐᑎᐅᓕᕐᓂᖓᓂᒃ. 27 ᐸᕐᓇᐹᓯᐅᑉ ᐃᓚᓕᐅᕐᐹ ᐋᐴᓯᑕᓕᖕᓄᑦ ᐱᑎᓪᓗᓂᐅᒃ, ᐸᕐᓇᐹᓯᐅᑉ ᐅᖃᐅᑎᑦᓯᐊᓕᕐᐰᑦ ᓴᐅᓗᓯᐅᑉ ᐊᑕᓂᕐᒥᒃ ᑕᑯᑎᑕᐅᓚᐅᕐᓂᖓᓂᒃ ᐊᖅᑯᒻᒦᑎᓪᓗᒍ, ᐅᖃᕐᕕᐅᓚᐅᕐᓂᖓᓂᒡᓗ ᐊᑕᓂᕐᒧᑦ, ᑕᒫᓯᑰᓯᒥ ᓯᕘᕋᓇᓂ ᐊᔪᕆᕐᑐᐃᔪᑎᖃᖃᑦᑕᓚᐅᕐᓂᖓᓂᒃ ᔩᓱᓯᒥᒃ. 28 ᓴᐅᓗᓯᐅᓪᓕ ᓇᔪᓕᕐᐰᑦ ᔨᕉᓴᓕᒻᒥᐅᑦ ᐃᓅᖃᑎᒋᑦᓯᐊᓕᕐᓗᒋᑦ, ᓯᕘᕋᓇᓂ ᐊᔪᕆᕐᑐᐃᔪᑎᖃᖃᑦᑕᕐᐳᖅ ᐊᑕᓂᕐᒥᒃ. 29 ᐅᖃᖃᑎᖃᖃᑦᑕᕐᓗᓂ ᔫᑎᓂᒃ ᒍᕇᑭᑎᑐᑦ ᐅᖃᐅᓯᓕᖕᓂᒃ ᐂᕙᖃᑎᒋᓪᓗᒋᓪᓗ; ᑖᒃᑯᐊ ᑖᑦᓱᒥᖓ ᑐᖁᑦᓯᔪᒪᓕᕐᐳᑦ. 30 ᐅᒃᐱᕐᑑᖃᑎᒌᑦ ᖃᐅᔨᒐᒥᒃ, ᓴᐅᓗᓯ ᓯᓴᕆᐊᒧᐊᕈᑎᕚᑦ, ᑖᕐᓱᓯᒧᑦ ᐊᐅᓪᓚᕐᑎᓪᓗᒍ. 31 ᑍᑦᓱᒪᓂ ᐅᒃᐱᕐᑑᖃᑎᒌᑦ ᔫᑎᐊᒥ ᒐᓕᓕᐊᒥᓗ ᓴᒥᐊᕆᐊᒥᓗ ᐊᑭᕋᕐᑐᕐᑕᐅᔪᓐᓃᕐᐳᑦ ᐊᔪᕈᓐᓃᕐᐸᓪᓕᐊᓪᓗᑎᒃ; ᐊᑕᓂᕐᒥᒃ ᓯᕘᕋᒋᔭᖃᒻᒪᕆᒃᓗᑎᒃ ᐃᓅᓕᕐᐳᑦ ᐱᕙᓪᓕᕐᑎᑕᐅᓪᓗᑎᒃ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐅᓄᕐᓯᕙᓪᓕᐊᕗᑦ. ᐲᑦᑐᕉᓯᐅᑉ ᓔᑕᒦᓐᓂᖓ ᔮᐸᒦᓐᓂᖓᓗ 32 ᐲᑦᑐᕉᓯ ᓇᒧᑐᐃᓐᓇᖅ ᐂᖃᑦᑕᓚᐅᕐᐳᖅ, ᑎᑭᓚᐅᕆᕗᖅ ᒎᑎᐅᑉ ᐃᓄᖁᑎᖏᓐᓄᑦ ᓔᑕᒥᐅᓄᑦ. 33 ᑕᕝᕙᓂ ᐊᖑᒻᒥᒃ ᑲᑎᓯᕗᖅ ᐃᓂᐊᓯᒥᒃ ᐊᑎᓕᖕᒥᒃ, ᑖᓐᓇ ᓄᑭᖃᕋᓂ ᓇᓚᓚᐅᕐᐳᖅ ᐊᕐᕌᒍᓂᒃ 8ᓂᒃ. 34 ᐲᑦᑐᕉᓯᐅᑉ ᐅᖃᐅᑎᕚ, “ᐃᓂᐊᓯ, ᔩᓱᓯ ᙭ᔅᑑᓯᐅᑉ ᐋᖅᑭᒃᐹᑎᑦ; ᒪᑭᓪᓗᑎᑦ ᓇᓚᕖᑦ ᐃᒧᓕᕈᒃ.” ᑕᕝᕔᓐᓇᖅ ᒪᑭᑉᐳᖅ. 35 ᓔᑕᒥ ᓵᕋᓐᒥᓗ ᓄᓇᖃᕐᑐᑦ ᑖᑦᓱᒥᖓ ᑕᑯᒐᒥᒃ ᐊᑕᓂᕐᒧᑦ ᓵᒋᐊᕐᐳᑦ. 36 ᔮᐸᒥ ᐃᓕᓐᓂᐊᕐᑎᑕᖃᓚᐅᕐᐳᖅ ᑕᐱᓴᒥᒃ ᐊᑎᓕᖕᒥᒃ, ᒍᕇᑭᑎᑐᑦ ᑍᔭᐅᔪᒥᒃ ᑑᑲᓯᒥᒃ, ᑖᓐᓇ ᐱᓂᐊᕐᓂᖃᑦᓯᐊᓚᐅᕐᐳᖅ ᐃᑲᔪᑦᓯᐊᕐᐸᒡᓗᓂᓗ ᐊᔪᕐᓴᕐᑐᓄᑦ. 37 ᑍᑦᓱᒪᓂ ᑖᓐᓇ ᖃᓂᒻᒪᒃᑲᒥ ᑐᖁᕗᖅ; ᑎᒥᖓ ᐅᐊᓴᕐᑕᐅᔭᕇᕋᒥ, ᐃᓕᔭᐅᕗᖅ ᐃᒡᓘᑉ ᖁᓛᓃᑦᑐᒧᑦ. 38 ᓔᑕ ᔮᐸᒥᑦ ᖃᓂᑦᑑᖕᒪᑦ, ᐃᓕᓐᓂᐊᕐᑏᑦ ᑐᓴᕋᒥᒃ ᐲᑦᑐᕉᓯ ᔮᐸᒦᒻᒪᑦ, ᑎᓕᓯᕗᑦ ᐊᖑᑏᖕᓂᒃ ᒪᕐᕉᖕᓂᒃ ᕿᓄᕕᒋᓪᓗᒍ ᐃᒫᒃ, “ᑐᐊᕕᕐᓗᑎᑦ ᕾᒋᑦ.” 39 ᐲᑦᑐᕉᓯ ᐸᕐᓇᒃᑲᒥ ᑖᒃᑯᐊᒃ ᐃᓚᒋᓪᓗᒋᒃ ᐊᐅᓪᓚᕐᐳᑦ. ᑕᕝᕗᖓ ᑎᑭᒻᒪᑕ ᐋᑉᐹᑦ ᐃᒡᓘᑉ ᖁᓛᓃᑦᑐᒧᑦ. ᐅᐃᒡᒐᕐᓃᑦ ᑕᕝᕙᓃᑦᑐᑦ ᕿᐊᕗᑦ, ᐅᕕᓂᕈᕐᓂᒃ ᐊᓐᓄᕌᓂᒡᓗ ᐊᓯᖏᓐᓂᒃ, ᑑᑲᓯᐅᑉ ᐃᓅᓪᓗᓂ ᓴᓇᖃᑦᑕᕐᑕᕕᓂᖏᓐᓂᒃ ᐲᑦᑐᕉᓯᒧᑦ ᑕᑯᔭᐅᑎᑦᓯᕗᑦ. 40 ᐲᑦᑐᕉᓯᐅᑉ ᑕᕝᕙᓃᑦᑐᓕᒫᑦ ᐊᓂᖁᒐᒥᒋᑦ ᓰᖅᑯᕐᓗᓂ ᑐᒃᓯᐊᕐᐳᖅ; ᑎᒥᖓ ᓵᕝᕕᒋᓪᓗᓂᐅᖅ ᐅᖃᐅᑎᕚ, “ᑕᐱᓵ, ᒪᑭᑦᑎᑦ.” ᑖᓐᓇ ᐅᐃᑉᐳᖅ, ᐲᑦᑐᕉᓯ ᑕᑯᒐᒥᐅᒃ ᐃᖏᑉᐳᖅ. 41 ᐊᒡᒐᖏᑎᒍᑦ ᑎᒍᓪᓗᓂᐅ ᓂᑯᕕᑎᑉᐹ. ᐅᒃᐱᕐᑐᑦ ᐅᐃᒡᒐᕐᓃᓪᓗ ᕾᖁᕔᑦ ᑖᒃᑯᓄᖓ ᐆᒪᓕᕐᑐᖅ ᐂᑦᑑᑎᒋᕚ. 42 ᑕᒪᓐᓇ ᖃᐅᔨᔭᐅᓕᕐᐳᖅ ᔮᐸᒥ ᓄᓇᖃᕐᑐᓕᒫᓄᑦ, ᐊᒥᓱᑦ ᐅᒃᐱᓕᕐᐳᑦ ᐊᑕᓂᕐᒧᑦ. 43 ᐲᑦᑐᕉᓯ ᔮᐸᒦᓚᐅᕐᐳᖅ ᐅᓪᓗᓂᒃ ᐊᒥᓱᓂᒃ ᑐᔪᕐᒥᓪᓗᓂ ᓮᒨᓂᒥ ᐊᒥᕐᓂᒃ ᕿᑐᒻᒪᒃᓮᔨᒥ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society