ᐋᐴᓯᑕᓖᑦ ᐱᓂᐊᕐᓂᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦᓯᑎᐹᓇᓯᐅᑉ ᐅᖃᓪᓚᖕᓂᖓ 1 ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑕ ᓯᑎᐹᓇᓯ ᐊᐱᕆᕚ, “ᑕᒪᓐᓇ ᓵᓐᖓᔭᐅᑦᔪᑎᒋᔧᑦ ᓱᓕᕚ?” 2 ᓯᑎᐹᓇᓯᐅᑉ ᐅᖃᐅᑎᕚ, “ᐃᓅᖃᑎᒃᑲ ᐊᖓᔪᖅᑳᖑᔪᓯᓗ, ᓈᓚᒃᓯᓐᖓ. ᒎᑎ ᓂᕐᑐᕐᓇᕐᑐᕐᔪᐊᖑᓪᓗᓂ ᓴᖅᑭᓚᐅᕐᐳᖅ ᐂᑉᕋᕼᐋᒻᒧᑦ ᐊᑖᑕᑦᑎᓐᓄᑦ, ᒥᓱᐳᑍᒥᐊᒦᑎᓪᓗᒍ ᕼᐊᕋᓐᒥ ᓄᓇᖃᓚᐅᕐᑎᓐᓇᒍ ᓱᓕ, 3 ᐅᖃᐅᑎᓪᓗᒍ, ‘ᓄᓇᖕᓂᑦ ᐃᓚᒋᔭᕐᓂᓪᓗ ᐊᐅᓪᓚᕆᑦ ᓄᓇᒥᒃ ᐅᐸᖕᓂᐊᕐᑕᕐᓂᒃ ᑕᑯᑎᑦᓱᒫᕐᐸᒋᑦ.’ 4 ᑕᕝᕙ ᓄᓇᒋᔭᓂ ᑲᐅᓪᑎᐊ ᕿᒪᓚᐅᕐᐹ, ᓄᓇᖃᕆᐊᕐᑐᕐᓗᓂ ᕼᐊᕋᓐᒥ, ᐊᑖᑕᖓ ᑐᖁᖕᒪ, ᒎᑎᐅᑉ ᑕᕝᕙᓐᖓᑦ ᐊᐅᓪᓚᕐᑎᓚᐅᕐᐹ ᒪᐅᖓ ᒫᓐᓇ ᓄᓇᒋᔭᑦᓯᓐᓄᑦ ᓄᓇᑖᕐᑎᓪᓗᒍ; 5 ᒎᑎᐅᑉ ᐂᑉᕋᕼᐋᒻ ᓄᓇᒥᒃ ᓇᖕᒥᓂᕐᑖᕐᑎᓚᐅᓐᖏᓛ ᒥᑭᔪᒥᒡᓘᓐᓃᑦ, ᒎᑎᐅᑉ ᐊᖏᕐᕕᒋᓚᐅᕐᐹ ᑕᒪᑐᒥᖓ ᓄᓇᒥᒃ ᑭᖑᕚᒃᓴᖏᓪᓗ ᓇᖕᒥᓂᖃᖁᓪᓗᒋᑦ, ᑍᑦᓱᒪᓂ ᑕᒪᑐᒥᖓ ᐊᖏᕐᕕᐅᑎᓪᓗᒍ ᐂᑉᕋᕼᐋᒻ ᕿᑐᕐᖓᖃᓚᐅᓐᖏᓚᖅ. 6 ᐃᒫᒃ ᒎᑎᐅᑉ ᐅᖃᐅᑎᓚᐅᕐᐹ, ‘ᑭᖑᕚᒃᓴᑎᑦ ᐊᓯᒥᖕᓄᑦ ᓄᓇᒋᔭᐅᔪᒥ ᓄᓇᖃᕈᒫᕐᐳᑦ, ᑕᕝᕙᓂ ᐱᑦᓯᐊᕐᑕᐅᖏᓪᓗᑎᒃ ᓯᐊᓚᕆᔭᐅᔪᒫᕐᐳᑦ ᐊᕐᕌᒍᓂᒃ 400ᓂᒃ. 7 ᐃᓅᖃᑎᒌᒡᔪᐊᑦ ᓱᒋᐊᕈᒫᕐᐸᒃᑲ ᐃᓄᖁᑎᓐᓂᒃ ᓱᒃᑯᔨᐊᖃᕐᑐᑦ, ᑭᖑᓂᖓᒍᑦ ᑕᕝᕙᓐᖓᑦ ᐊᐅᓪᓚᕈᒫᕐᐳᑦ ᑕᒪᐅᖓ ᓄᓇᒋᓕᕐᑕᑦᓯᓐᓄᑦ, ᑕᕝᕙᓂ ᑐᒃᓯᐊᕐᕕᒋᖃᑦᑕᕈᒫᕐᐹᖓ.’ 8 ᒎᑎᐅᑉ ᐊᖏᕈᑎᓂ ᓇᓗᓁᒃᑯᑦᓯᓚᐅᕐᐹ ᑭᐱᔭᐅᓂᕐᒥᒃ. ᑍᒤᒻᒪᑦ ᐂᑉᕋᕼᐋᑉ ᐂᓴᑭ ᐃᕐᓂᕐᑖᕆᒐᒥᐅᒃ, ᐅᓪᓗᐃ ᓯᑕᒪᐅᔪᕐᑐᖓᓐᓂ ᑭᐱᕚ; ᐂᓴᑭᐅᓪᓗ ᔧᑯ ᐃᕐᓂᕐᑖᕆᒐᒥᐅᒃ ᑭᐱᒋᕚ, ᔧᑰᓪᓗ ᐃᕐᓂᓂ ᓯᕗᓕᕆᔭᕗᑦ 12 ᑭᐱᓚᐅᕆᕔᑦ. 9 “ᔧᑰᑉ ᐃᕐᓂᖏᑕ ᖃᑕᓐᖑᑎᑎᒃ ᔫᓯᐱ ᓇᓪᓕᒋᔭᑑᓗᐊᕆᓪᓗᒍ ᓂᐅᕐᕈᑎᒋᕚᑦ ᐄᑦᔨᑉᑎᒧᑦ; ᒎᑎᐅᓪᓕ ᐃᓚᒋᓚᐅᕐᐹ, 10 ᓴᐳᑎᓪᓗᒍ ᖃᓄᐃᓐᓇᕐᑐᓕᒫᓂᑦ, ᐱᑦᓯᐊᕐᓂᖃᕐᑎᐹ ᓯᓚᑐᓂᖃᕐᑎᓪᓗᒍᓗ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑕ ᐰᕉᑉ ᓵᖓᓂ, ᔫᓯᐱ ᐊᖓᔪᖅᑳᕐᔪᐊᑉ ᐊᐅᓚᑦᓯᔨᓐᖑᕐᑎᓚᐅᕐᐹ ᐄᑦᔨᑉᑎᒥᐅᓄᑦ ᐊᖓᔪᖅᑳᕐᔪᐊᓪᓗ ᐃᒡᓗᖓᓃᑦᑐᓕᒫᓄᑦ. 11 ᑍᑦᓱᒪᓂ ᑳᖕᓇᕐᑐᐊᓗᖃᓚᐅᕐᒪᑦ ᐄᑦᔨᑉᑎᒥ ᑬᓇᓂᒥᓗ ᐅᖁᒤᒃᓴᕐᓇᕐᑐᐊᓘᓪᓗᓂ, ᓯᕗᓕᕕᓂᕗᑦ ᓂᕿᒃᓴᕐᓯᔪᓐᓁᓪᓕᓚᐅᕐᐳᑦ. 12 ᔧᑯ ᑐᓴᕋᒥ ᐄᑦᔨᑉᑎᒥ ᓂᐊᖂᔭᒃᓴᕐᑕᖃᕐᓂᖓᓂᒃ, ᐃᕐᓂᓂ ᓯᕗᓪᓕᕐᐹᒥᒃ ᑎᓕᕔᑦ ᑍᑯᖓ. 13 ᑭᖑᓪᓕᕐᒥᒃ ᐄᑦᔨᑉᑎᒧᐊᕐᒥᖕᒪᑕ ᔫᓯᐱ ᑭᓇᐅᓂᕐᒥᓂᒃ ᓇᓗᓁᓕᓚᐅᕐᐳᖅ ᐊᖓᔪᒥᓄᑦ, ᔫᓯᐱᐅᑉ ᐃᓚᓕᒫᖏᑦ ᖃᐅᔨᔭᐅᓕᕐᓗᑎᒃ ᐄᑦᔨᑉᑎᒥᐅᑦ ᐊᖓᔪᖅᑳᔪᐊᖓᓐᓄᑦ ᐰᕉᒧᑦ. 14 ᔫᓯᐱᐅᑉ ᐊᑖᑕᓂ ᔧᑯ, ᐅᖃᐅᑦᔭᐅᔭᕐᑐᖁᕚ ᐄᑦᔨᑉᑎᒧᐊᖁᓪᓗᒍ, ᐃᓚᒌᓕᒫᑦ ᑍᒃᑯᐊ ᐄᑦᔨᑉᑎᒧᐊᓚᐅᕐᐳᑦ; ᑲᑎᓪᓗᒋᑦ 75ᖑᔪᑦ; 15 ᔧᑯ ᐄᑦᔨᑉᑎᒧᐊᓚᐅᕐᐳᖅ, ᑕᕝᕙᓂ ᑐᖁᓚᐅᕐᐳᖅ ᓯᕗᓕᕕᓂᕗᓪᓗ. 16 ᑎᒥᖏᑦ ᐋᑕᐅᓚᐅᕐᐳᑦ ᓄᓇᒧᑦ ᓯᑭᒻᒧᑦ ᑕᕝᕙᓂ ᐃᓗᕕᕐᑕᐅᓪᓗᑎᒃ, ᐂᑉᕋᕼᐋᒻ ᑮᓇᐅᔭᓄᑦ ᓂᐅᕕᐊᕆᓯᒪᔭᖓᓄᑦ ᕼᐊᒧᕆᐅᑉ ᐃᓚᖏᓐᓂᑦ. 17 “ᒎᑎᐅᑉ ᐊᖏᕈᑎᒋᓯᒪᔭᖓᑕ ᐂᑉᕋᕼᐋᒻᒧᑦ ᓇᓪᓕᐅᓐᓂᖓ ᖃᒡᓕᓕᕐᒪᑦ, ᐃᓅᖃᑎᕗᑦ ᐄᑦᔨᑉᑎᒥ ᐅᓄᕐᑐᐊᓘᓕᓚᐅᕐᐳᑦ. 18 ᐊᓯᐊᓂᒃ ᐊᖓᔪᖅᑳᕐᔪᐊᕐᑖᓚᐅᕐᐳᑦ ᐄᑦᔨᑉᑎᒥ ᔫᓯᐱᒥᒃ ᖃᐅᔨᒪᖏᑦᑐᒥᒃ. 19 ᑖᑦᓱᒪ ᓯᕗᓕᕕᓂᕗᑦ ᓯᓔᕐᕆᕔᑦ, ᓱᒃᑯᔨᐊᕆᓪᓗᒋᑦ, ᕿᑐᕐᖓᕐᑖᖏᑦ ᐊᖏᕐᕋᖏᓐᓂᑦ ᐊᓂᑕᐅᑎᑉᐰᑦ ᑐᖁᖁᓪᓗᒋᑦ. 20 ᑕᒪᓐᓇ ᓇᓪᓕᐅᑎᓯᒪᑎᓪᓗᒍ ᒨᓯᓯ ᐃᓅᓕᓚᐅᕐᐳᖅ, ᐃᓂᖁᓇᕐᑐᒻᒪᕆᐅᓪᓗᓂ ᓄᑕᕋᐅᓚᐅᕐᐳᖅ, ᐊᖏᕐᕋᒥᓂ ᑲᒪᒋᔭᐅᓚᐅᕐᐳᖅ ᑕᖅᑭᓂᒃ ᐱᖓᓱᓂᒃ; 21 ᐊᖏᕐᕋᖓᓂᑦ ᐊᓂᑎᑕᐅᖕᒪᑦ, ᐰᕉᑉ ᐸᓂᖓᑕ ᑎᒍᐊᕐᑖᕆᕚ, ᐃᕐᓂᕐᒥᑐᑦ ᓇᖕᒥᓂᕐᒥᑐᑦ ᐱᕈᕐᓴᑎᓚᐅᕐᐹ. 22 ᒨᓯᓯ ᐃᓕᓐᓂᐊᕐᑎᑕᐅᓚᐅᕐᐳᖅ ᐄᑦᔨᑉᑎᒥᐅᑦ ᐃᓕᓯᒪᓂᓕᒫᖏᓐᓂᒃ ᐱᔪᓐᓇᑦᓯᐊᓕᕐᓗᓂ ᐅᖃᐅᓯᒃᑯᑦ ᐱᓂᐊᕐᓂᒃᑯᓪᓗ. 23 “ᒨᓯᓯ ᐊᕐᕌᒍᖃᓕᕐᓗᓂ 40ᓂᒃ, ᑕᑯᔪᒪᓕᓚᐅᕐᐳᖅ ᐃᓅᖃᑎᖏᑦ ᖃᓄᐃᓕᐅᕐᑕᐅᖕᒪᖔᑕ ᐃᓴᕆᐊᓕᒥᐅᑦ. 24 ᐃᓅᖃᑎᒥ ᐃᓚᖓᑦ ᑕᑯᒐᒥᐅᒃ ᐱᑦᓯᐊᕐᑕᐅᖏᑦᑐᖅ, ᐄᑦᔨᑉᑎᒥᐅᑕᕐᒧᑦ ᓴᐳᑎᔭᕐᑐᕐᐹ, ᐄᑦᔨᑉᑎᒥᐅᖅ ᐊᑭᓂᐊᕐᕕᒋᓪᓗᒍ ᑐᖁᑉᐹ. 25 ᐃᓅᖃᑎᓂ ᑐᑭᓯᓂᐊᕋᓱᒋᓚᐅᕐᐰᑦ ᒎᑎᒧᑦ ᐊᑐᕐᑕᐅᓗᓂ ᐃᓄᖁᑎᓂ ᓴᐳᑎᔪᒫᕐᒪᒋᑦ, ᐃᓅᖃᑎᖏᑦ ᑐᑭᓯᓚᐅᓐᖏᓚᑦ. 26 ᖃᐅᑎᓪᓗᒍ ᑕᑯᓚᐅᕐᐳᖅ ᐃᔅᕆᐊᓕᒥᐅᖕᓂᒃ ᓂᓐᖓᐅᑎᔫᖕᓂᒃ ᒨᓯᓯᐅᑉ ᐃᓂᕐᑎᕐᓗᒋᒃ ᐅᖃᐅᑎᕚᒃ, ‘ᐃᓴᕆᐊᓕᒥᐅᖃᑎᒌᒃᑐᓯᒃ ᓲᖅ ᐃᓕᑦᓯᖕᓄᑦ ᑍᒤᓕᐅᕐᐱᓰᒃ?’ 27 ᓂᓐᖓᐅᒪᓂᕐᓴᐅᓪᓕ ᒨᓯᓯ ᐊᔭᒃᓗᒍ ᐅᖃᐅᑎᕚ, ‘ᑭᐊ ᐊᐅᓚᑦᓯᔨᓐᖑᕐᑎᒻᒪᑏᑦ ᐃᖅᑲᕐᑐᐃᔨᓐᖑᕐᑎᓪᓗᑎᓪᓗ ᐅᕙᑦᑎᓐᓅᑦ? 28 ᑐᖁᑦᓱᒪᕕᖓᑦᑕᐅᖅ ᐄᑦᔨᑉᑎᒥᐅᑐᑦ ᑐᖁᓚᐅᕐᑕᕐᑐᑦ ᐃᑉᐸᒃᓴᖅ?’ 29 ᒨᓯᓯᐅᑉ ᑕᒪᓐᓇ ᑐᓴᕋᒥᐅᒃ ᕿᒪᒃᓯᕗᖅ, ᒥᑎᐊᓂᒥᐅᑦ ᓄᓇᖓᓐᓄᑦ ᕿᒫᓯᒪᓕᕐᓗᓂ, ᑍᑲᓂ ᐃᕐᓂᕐᑖᓚᐅᕐᐳᖅ ᒪᕐᕉᖕᓂᒃ. 30 “ᐊᕐᕌᒍᑦ 40 ᐊᓂᒍᕐᑎᓪᓗᒋᑦ, ᓴᖅᑭᕝᕕᐅᓚᐅᕐᐳᖅ ᐂᖏᓕᒧᑦ ᐃᓄᖃᖏᑦᑐᒥ ᖃᖅᑲᐅᑉ ᓮᓁᑉ ᓴᓂᐊᓂ, ᐅᕐᐱᒐᕐᓂ ᐃᑯᐊᓚᔪᒥ. 31 ᒨᓯᓯᐅᑉ ᑖᓐᓇ ᑕᑯᒐᒥᐅᒃ, ᑲᒪᒋᓕᕋᒥᐅᒡᓗ ᑕᑯᑦᓯᐊᕈᒪᓪᓗᒍ ᐅᐸᓚᐅᕐᐹ, ᑲᒡᓕᓕᕐᒪᒍ ᐊᑕᓂᐅᑉ ᓂᐱᖓᓂᒃ ᑐᓴᕐᐳᖅ ᐅᖃᕐᑐᒥᒃ, 32 ‘ᓯᕗᓕᕕᓂᕐᐱᑦ ᒎᑎᒋᕚᖓ, ᐂᑉᕋᕼᐋᒻ, ᐂᓴᑭᐅᓪᓗ, ᔧᑰᓪᓗ ᒎᑎᖓᑦ.’ ᒨᓯᓯ ᑲᑉᐱᐊᓱᖕᓂᕐᒧᑦ ᓴᔪᓕᕋᒥ ᑕᑯᓐᓇᕆᐊᒃᓴᖅ ᐊᔪᓕᓚᐅᕐᐳᖅ. 33 ᐊᑕᓂᐅᑉ ᐅᖃᐅᑎᕚ, ‘ᐃᑎᒐᒍᑏᒃᑭᒃ ᐲᒃᑭᒃ, ᑕᒪᓐᓇ ᓄᓇ ᑐᓪᓕᕋᕐᑍᑦ ᐃᑦᔪᕐᓁᑦᑑᖕᒪᑦ. 34 ᑕᑯᓯᒪᕗᖓ ᐃᓄᖁᑎᒪ ᐃᓖᔭᕆᔭᐅᓂᖏᓐᓂᒃ ᐄᑦᔨᑉᑎᒥ, ᓴᐳᑎᔭᐅᔪᒪᓂᖏᑦ ᐃᓖᔭᕐᓱᐃᔨᒋᔭᒥᖕᓂᑦ ᑐᓴᕋᒃᑭᑦ, ᓂᓪᓕᐊᓂᖏᓪᓗ ᑐᓴᕐᐸᒃᑲ, ᒫᓐᓇ ᐊᖅᑲᕐᐳᖓ ᓴᐳᑎᔭᕐᑐᕐᓗᒋᑦ. ᒫᓐᓇ ᕾᓕᕆᑦ, ᐄᑦᔨᑉᑎᒧᑦ ᑎᓕᔪᒪᒐᒃᑭᑦ.’ 35 “ᒨᓯᓯ ᐃᓴᕆᐊᓕᒥᐅᓂᑦ ᓇᕐᕈᒋᔭᐅᓚᐅᕐᑐᖅ ᐅᖃᐅᑦᔭᐅᓪᓗᓂ ‘ᑭᐊ ᐊᐅᓚᑦᓯᔨᓐᖑᕐᑎᒻᒪᑏᑦ ᐃᖅᑲᕐᑐᐃᔨᓐᖑᕐᑎᓪᓗᑎᓪᓗ ᐅᕙᑦᑎᓐᓅᑦ?’ ᑖᓐᓇ ᑎᓕᔭᐅᓚᐅᕐᐳᖅ ᒎᑎᒧᑦ, ᐊᐅᓚᑦᓯᔨᐅᖁᓪᓗᒍ ᓴᐳᑦᔨᔨᐅᖁᓪᓗᒍᓗ, ᐂᖏᓕᒥᒃ ᐊᖅᑯᑎᖃᕐᓗᓂ ᐅᕐᐱᒐᕐᓂ ᐃᑯᐊᓚᔪᒥ ᑕᑯᓚᐅᕐᑕᖓᓂᒃ. 36 ᑖᑦᓱᒪ ᐃᓄᐃᑦ ᐊᐅᓪᓚᕈᑎᓚᐅᕐᐰᑦ ᐄᑦᔨᑉᑎᒥᑦ, ᑲᒪᓇᕐᑐᓕᓂᕐᑎᒍᑦ ᓇᓗᓁᒃᑯᑕᕐᑎᒍᓪᓗ ᐱᓇᓱᐊᖃᑦᑕᕐᓗᓂ ᐄᑦᔨᑉᑎᒥ, ᐃᒪᕐᒥ ᐊᐅᐸᓗᒃᑕᒥ, ᓄᓇᒥᓗ ᐃᓄᖃᖏᑦᑐᒥ ᐊᕐᕌᒍᑦ 40 ᓈᓪᓗᒋᑦ. 37 ᑖᓐᓇ ᒨᓯᓯ ᐃᓴᕆᐊᓕᒥᐅᓄᑦ ᐅᖃᓚᐅᕐᐳᖅ, ‘ᒎᑎᐅᑉ ᑎᓕᓯᕕᒋᔪᒫᕐᐹᓯ ᓇᓚᐅᑦᑍᔪᒥᒃ ᐃᓅᖃᑎᑦᓯ ᐃᓚᖓᓐᓂᒃ ᑍᒫᑦᓮᓐᓇᖅ ᑎᓕᓚᐅᕋᒥᖓ.’ 38 ᑖᓐᓇ ᒨᓯᓯ ᐃᓴᕆᐊᓕᒥᐅᑦ ᐃᓚᒋᓚᐅᕐᑕᖓᑦ ᐃᓄᖃᖏᑦᑐᒥ; ᓯᕗᓕᕕᓂᑦᑕᓗ ᐃᓚᒋᓚᐅᕐᐹᑦ, ᐂᖏᓕᐅᓪᓗ ᐃᓚᒋᓚᐅᕆᕚ, ᐅᖃᖃᑎᒋᓪᓗᒍ ᖃᖅᑲᒥ ᓮᓁᒥ, ᑐᓂᓯᕕᐅᓚᐅᕐᑐᖅ ᒎᑎᐅᑉ ᐅᖃᐅᓯᕆᖁᔭᖏᓐᓂᒃ ᖃᓄᖅ ᐃᓅᔭᕆᐊᒃᓴᖅ ᖃᐅᔨᑦᔪᑎᒃᓴᓂᒃ ᑐᓂᓯᖁᓪᓗᒍ ᑎᑎᕋᕐᓯᒪᔪᓂᒃ ᐅᕙᑦᑎᓐᓄᑦ. 39 “ᓯᕗᓕᕕᓂᑦᑕ ᒨᓯᓯ ᓈᓚᒍᒪᓚᐅᓐᖏᓛᑦ, ᓇᕐᕈᒋᓪᓗᒍ ᐄᑦᔨᑉᑎᒧᑦ ᐅᑎᕈᒪᓂᕐᒥᒃ ᐃᓱᒪᖃᕐᓗᑎᒃ. 40 ᐅᖃᕐᓗᑎᒃ ᐂᕉᓂᒧᑦ, ‘ᒎᑎᒋᓂᐊᕐᑕᑦᑎᓐᓂᒃ ᓴᓐᓇᑎᓚᐅᕐᑎᒍᑦ ᐅᕙᑦᑎᓐᓂᒃ ᑕᓯᐅᕐᓯᓂᐊᕐᑐᒥᒃ; ᒨᓯᓯ ᐄᑦᔨᑉᑎᒥᑦ ᐊᐅᓚᕐᑎᑦᓯᔨᒋᓚᐅᕐᑕᕗᑦ ᖃᓄᐃᓕᐅᕋᓱᓕᕐᒪᖔᑦ ᓇᓗᓕᕋᑦᑎᒍ.’ 41 ᓴᓇᓚᐅᕐᐳᑦ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖓᓂᒃ, ᑐᓂᕐᕈᓯᕐᕕᒋᓪᓗᒍ ᖁᕕᐊᓱᖃᑎᒌᓚᐅᕐᐳᑦ ᓇᖕᒥᓂᖅ ᓴᓇᓚᐅᕐᑕᑎᒃ ᑖᓐᓇ ᐱᑦᔪᑎᒋᓪᓗᒍ. 42 ᒎᑎᐅᓪᓕ ᐊᓚᓚᐅᕐᐰᑦ ᓵᑎᓪᓗᒋᑦ ᕿᓚᐅᑉ ᐅᓪᓗᕆᐊᖏᓐᓂᒃ ᑐᒃᓯᐊᕐᕕᖃᕐᓂᕐᒧᑦ, ᓇᓚᐅᑦᑍᔪᑦ ᐊᒡᓚᖏᓐᓂ ᑎᑎᕋᕐᓯᒪᖕᒪᑦ: ‘ᐃᓴᕆᐊᓕᒥᐅᖑᔪᓯ, ᑐᖁᑦᓯᓗᓯ ᐆᒪᔪᓂᒃ ᑐᓂᕐᕈᓯᕐᕕᒋᓚᐅᕐᐱᓯᓐᖔ ᐊᕐᕌᒍᓂᒃ 40ᓂᒃ ᐃᓄᖃᖏᑦᑐᒦᑎᓪᓗᓯ? 43 ᒎᑎᓐᖑᐊᒥᒃ ᒧᓛᑭᐅᑉ ᑐᐱᖓᓂᒃ ᐊᑭᕋᓚᐅᕐᐳᓯ, ᕅᕙᓐᓂᐅᑉ ᒎᑎᓐᖑᐊᑉ ᐅᓪᓗᕆᐊᓐᖑᐊᖓᓂᒃ ᐊᒡᔭᕐᓯᓚᐅᕐᐳᓯ ᒎᑎᓐᖑᐊᕆᔭᑦᓯᓐᓂᒃ; ᑖᒃᑯᐊ ᒎᑎᓐᖑᐊᑦ ᓴᓇᓚᐅᕐᐸᓯ ᑐᒃᓯᐊᕐᕕᒋᔪᒪᓪᓗᒋᑦ. ᑍᒤᒻᒪᑦ ᐊᐅᓪᓚᕐᑎᓐᓂᐊᕐᐸᑦᓯ ᓄᓇᒋᓐᖏᑕᑦᓯᓐᓄᑦ ᐹᐱᓘᓂᐅᑉ ᐅᖓᑖᓄᑦ.’ 44 “ᓯᕗᓕᕕᓂᕗᑦ ᐊᖏᖃᑎᒌᒍᑎᒥᒃ ᐱᖁᔭᕐᑕᓕᖕᒥᒃ ᑐᐱᕐᒥᒃ ᐱᓯᒪᓚᐅᕐᐳᑦ ᐃᓄᖃᖏᑦᑐᒥ. ᑖᓐᓇ ᓴᓇᔭᐅᓯᒪᓚᐅᕐᐳᖅ ᒎᑎᐅᑉ ᓴᓇᔭᐅᖁᔨᓂᖓᑐᑦ ᒨᓯᓯᒧᑦ, ᒪᓕᒡᓯᒪᓪᓗᓂ ᒨᓯᓯᐅᑉ ᑕᑯᑎᑕᐅᑦᔪᑎᒋᓚᐅᕐᑕᖓᓂᒃ. 45 ᑭᖑᓂᖓᒍᑦ ᓯᕗᓕᕕᓂᑦᑕ ᑐᐱᖅ ᑖᓐᓇ ᐱᓚᐅᕆᕚᑦ ᓯᕗᓕᕕᓂᕐᒥᖕᓂᑦ, ᐊᒡᔭᓚᐅᕆᕚᓪᓗ ᔮᓱᐊ ᐃᓚᒋᓪᓗᒍ ᓄᓇᑖᓕᕋᒥᒃ ᓄᓇᓕᑐᖃᕐᓂᒃ ᒎᑎ ᐊᐅᓪᓚᕐᑎᑦᓯᖔᕐᑎᓪᓗᒍ. ᑕᒫᓃᓕᓚᐅᕐᐳᖅ ᑍᕕᑎ ᑎᑭᓪᓗᒍ. 46 ᑍᕕᑎ ᒎᑎᒧᑦ ᐱᓐᓇᕆᔭᐅᓚᐅᕐᒪᑦ, ᐃᓂᒃᓴᓕᐅᕈᓐᓇᕐᑎᑕᐅᔪᒪᓚᐅᕐᐳᖅ ᑖᑦᓱᒧᖓ ᔧᑰᑉ ᒎᑎᖓᓄᑦ. 47 ᓲᓗᒨᓂᐅᑉ ᒎᑎ ᐃᒡᓗᓕᐅᓚᐅᕐᐹ. 48 “ᒎᑎᓕ ᐊᖏᓂᕐᐹᖑᔪᖅ ᐃᒡᓗᓂ ᐃᓂᖃᓐᖏᓚᖅ ᐃᓄᖕᓄᑦ ᓴᓇᔭᐅᓯᒪᔪᓂ; ᓇᓚᐅᑦᑍᔪᖅ ᐅᖃᕐᓯᒪᖕᒪᑦ, 49 ‘ᐊᑕᓂᖅ ᐅᖃᕐᐳᖅ, ᕿᓚᒃ ᐃᒃᓯᕙᐅᑕᕐᔪᐊᕆᒐᒃᑯ, ᓄᓇᕐᔪᐊᕐᓗ ᐃᑎᒐᖕᒪ ᐃᑯᕐᕋᕆᕚ. ᖃᓄᐃᑦᑐᒥᒃ ᐃᒡᓗᓕᐅᕈᒪᕕᓰ ᐅᕙᓐᓄᑦ? ᓇᓂᓗ ᐃᓂᖃᕈᓐᓇᕐᐳᖓ? 50 ᑕᒪᒃᑯᐊ ᐅᕙᖓ ᓇᖕᒥᓂᖅ ᓴᓇᓯᒪᓐᖏᓚᒃᑳ?’” 51 ᓯᑎᐹᓇᓯ ᓱᓕ ᐅᖃᕐᐳᖅ, “ᓯᑎᔪᐊᓘᔪᓯ, ᑐᓴᕈᓐᓇᖏᑦᑐᐊᓘᓪᓗᓯ ᓈᓚᒍᓐᓇᖏᑦᑐᐊᓘᕗᓯ ᒎᑎᖃᖏᑦᑐᑎᑐᑦ, ᑍᒪᓐᖓᑦ ᐊᑭᕋᕐᑐᕐᑐᓯ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᓯᕗᓕᕕᓂᑦᓯᑐᑦ. 52 ᓇᓚᐅᑦᑍᔪᑦ ᓇᓪᓕᐊᑦ ᓯᕗᓕᕕᓂᑦᓯᓐᓂᑦ ᐊᑭᕋᕐᑐᕐᑕᐅᓚᐅᓐᖏᓛᖅ? ᑐᖁᑕᐅᓚᐅᕐᐳᑦ ᑍᒃᑯᐊ ᓯᕗᓂᖓᓂ ᐅᖃᐅᓯᒃᓴᖅᑲᕐᑎᑕᐅᓚᐅᕐᑐᑦ ᑎᑭᑦᓱᒫᕐᑐᒥᒃ ᓇᓛᒎᕐᑐᒥᒃ ᒎᑎᐅᑉ ᐱᔨᖓᓂᒃ, ᑖᓐᓇ ᐱᔭᐅᑎᓚᐅᕐᐸᓯ ᑐᖁᑕᐅᑎᓪᓗᒍᓗ. 53 ᐃᓕᑦᓯ ᐱᖁᔭᓂᒃ ᐱᑎᑕᐅᓚᐅᕐᑐᓯ ᐂᖏᓖᑎᒍᑦ ᑐᓂᔭᐅᔪᓂᒃ, ᑖᒃᑯᓂᖓ ᒪᓕᓚᐅᓐᖏᓚᓯ.” ᓯᑎᐹᓇᓯᐅᑉ ᐅᔭᖅᑲᓄᑦ ᒥᓪᓗᕐᑕᐅᓂᖓ 54 ᑲᑎᒪᔨᕐᔪᐊᑦ ᓯᑎᐹᓇᓯᒥᒃ ᓈᓚᒃᑐᑦ ᑕᒪᑐᒥᖓ ᑐᓴᕋᒥᒃ ᓂᓐᖓᒃᑐᐊᓘᕗᑦ, ᓂᓐᖓᐅᒪᓂᕐᒧᑦ ᑮᒻᒥᓕᕐᓗᑎᒃ ᑖᑦᓱᒧᖓ. 55 ᓯᑎᐹᓇᓯ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᓪᓗᓂ, ᕿᓚᖕᒧᑦ ᐋᕐᓗᕐᐳᖅ ᒎᑎᐅᑉ ᐱᓐᓇᕐᓇᕐᓂᕐᔪᐊᖓ ᑕᑯᕚ, ᔩᓱᓯᓗ ᓇᖏᕐᑐᖅ ᒎᑎᐅᑉ ᑕᓕᕐᐱᐊᓂ; 56 ᐅᖃᕐᓗᓂ, “ᑕᑯᒋᑦ, ᕿᓚᒃ ᐊᖕᒪᕐᑐᖅ ᑕᑯᕙᕋ, ᐃᓅᓪᓗ ᐃᕐᓂᖓ ᓇᖏᕐᑐᖅ ᒎᑎᐅᑉ ᑕᓕᕐᐱᐊᓂ.” 57 ᓂᐱᖅᑯᕐᑐᓪᓗᑎᒃ ᓂᓪᓕᐊᓕᕐᐳᑦ ᓯᐅᑎᑎᒃ ᒪᑐᓪᓗᒋᑦ, ᑕᒪᕐᒥᒃ ᐅᐸᒃᑐᕐᐳᑦ ᓯᑎᐹᓇᓯᒧᑦ. 58 ᐃᒡᓗᒐᓴᖕᓂᑦ ᐊᓂᑎᓐᓇᒥᑦᔪᒃ ᐅᔭᖅᑲᓄᑦ ᒥᓪᓗᕐᐹᑦ; ᒥᓪᓗᕐᑐᑦ ᐅᓕᒡᔪᐊᑎᒃ ᐲᕐᓗᒋᑦ ᑲᒪᒋᔭᐅᑎᑉᐰᑦ ᐃᓅᓱᒃᑐᒧᑦ ᓴᐅᓗᓯᒥᒃ ᐊᑎᓕᖕᒧᑦ. 59 ᓯᑎᐹᓇᓯ ᒥᓪᓗᕐᑕᐅᓪᓗᓂ ᑐᒃᓯᐊᕐᐳᖅ, “ᐊᑕᓃᖅ ᔩᓱᓯ, ᐊᓂᕐᓂᕋ ᐱᒍᒃ.” 60 ᓰᖅᑯᕐᓗᓂ ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᐊᑕᓃᖅ ᐊᔪᕐᑐᓕᓂᕐᒧᑦ ᑕᒪᑐᒧᖓ ᐸᓯᑦᑍᓕᒃᑭᑦ.” ᑍᒫᒃ ᐅᖃᕇᕋᒥ ᑐᖁᕗᖅ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society