ᐋᐴᓯᑕᓖᑦ ᐱᓂᐊᕐᓂᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦᐃᑲᔪᕐᑏᑦ 7 ᓂᕈᐊᕐᑕᐅᔪᑦ 1 ᑍᑦᓱᒪᓂ ᐃᓕᓐᓂᐊᕐᑎᑦ ᐅᓄᕐᓯᕙᓪᓕᐊᑎᓪᓗᒋᑦ, ᔫᑎᑦ ᒍᕇᑭᑎᑐᑦ ᐅᖃᐅᓯᓖᑦ, ᐂᕙᖃᑎᖃᓕᓚᐅᕐᐳᑦ ᐄᑉᕉᐃᓂᒃ ᐅᐃᒡᒐᕐᓂᖁᑎᒥᖕᓂᒃ ᑲᒪᒋᔭᐅᑦᓯᐊᖏᓐᓂᕅᓪᓗᑎᒃ ᖃᐅᑕᒫᑦ ᑐᓂᐅᕋᑕᐅᖃᑦᑕᕐᑐᑦ ᐱᑦᔪᑎᒋᓪᓗᒋᑦ. 2 ᑍᒤᒻᒪᑦ ᐋᐴᓯᑕᓖᑦ 12 ᑲᑎᖁᔨᓕᕐᐳᑦ ᐅᒃᐱᕐᑑᖃᑎᒌᓕᒫᓂᒃ ᐅᖃᐅᑎᓪᓗᒋᑦ, “ᓈᒻᒪᓐᖏᓚᖅ ᒎᑎᐅᑉ ᐅᖃᐅᓯᖏᓐᓂᒃ ᐊᔪᕆᕐᑐᐃᖃᑦᑕᕈᓐᓃᕈᑦᑕ ᓂᕿᓕᕆᑐᐃᓐᓇᓕᕐᓗᑕ. 3 ᑍᒤᒻᒪᑦ, ᐃᓅᖃᑎᒃᑲ, ᓂᕈᐊᓚᐅᕆᑦᓯ ᐊᖑᑎᓂᒃ 7ᓂᒃ ᖃᐅᔨᒪᔭᕆᑦᓯᐊᕐᑕᑦᓯᓐᓂᒃ, ᐊᓂᕐᓂᕐᒥᒡᓗ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᓯᒪᔪᓂᒃ ᓯᓚᑐᓂᖃᕐᑐᓂᒃ, ᐱᔨᑦᓯᕐᓂᕐᒧᑦ ᑕᒪᑐᒧᖓ ᑲᒪᔨᐅᓂᐊᕐᑐᓂᒃ. 4 ᐅᕙᒍᓪᓕ ᑍᒪᓐᖓᑦ ᐱᓇᓱᐊᕐᓂᐊᕐᐳᒍᑦ ᑐᒃᓯᐊᕐᓂᕐᒥᒃ ᐊᔪᕆᕐᑐᐃᓂᕐᒥᒡᓗ.” 5 ᐅᒃᐱᕐᑑᖃᑎᒌᓕᒫᑦ ᐋᐴᓯᑕᓖᑦ ᐅᖃᐅᓯᖏᓐᓂᒃ ᐊᑲᐅᒃᓴᓚᐅᕐᐳᑦ, ᓂᕈᐊᓚᐅᕐᐳᑦ ᓯᑎᐹᓇᓯᒥᒃ, ᐅᒃᐱᕐᓂᖃᑦᓯᐊᕐᑐᒥᒃ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᓯᒪᔪᒥᒃ, ᐱᓕᑉᐴᓯᒥᒡᓗ, ᐳᕈᑯᕉᓯᒥᒡᓗ, ᓁᑲᓄᐊᕆᒥᒡᓗ, ᑍᒨᓂᒥᒡᓗ, ᐸᕐᒥᓈᓯᒥᒡᓗ, ᓂᑯᓚᓯᒥᒡᓗ, ᑖᓐᓇ ᔫᑎᓐᖑᕐᑎᑕᐅᓯᒪᔪᖅ ᐊᓐᑎᐅᑭᐊᒥᐅᖅ. 6 ᑖᒃᑯᐊ ᐋᐴᓯᑕᓕᖕᓄᑦ ᐱᑎᑕᐅᕗᑦ, ᐋᐴᓯᑕᓖᑦ ᑐᒃᓯᐅᑎᕔᑦ ᐸᑎᒻᒥᓪᓗᒋᑦ. 7 ᒎᑎᐅᑉ ᐅᖃᐅᓯᖏᑦ ᐅᒃᐱᕆᔭᐅᓕᕐᐸᓪᓕᐊᕗᑦ; ᐃᓕᓐᓂᐊᕐᑎᑦ ᔨᕉᓴᓕᒻᒥ ᐅᓄᕐᑐᐊᓘᓕᓚᐅᕐᐳᑦ ᐃᓚᕙᓪᓕᐊᓪᓗᑎᒃ, ᑐᓂᕐᕈᓯᕐᑎᑦᓯᔨᑦ ᐊᒥᓱᑦ ᓈᓚᒡᓗᑎᒃ ᐅᒃᐱᓕᓚᐅᕐᐳᑦ. ᓯᑎᐹᓇᓯᐅᑉ ᑎᒍᔭᐅᓂᖓ 8 ᓯᑎᐹᓇᓯ, ᒎᑎᐅᑉ ᓮᒻᒪᕐᑎᑦᓯᓂᖓᓂᒃ ᐱᔪᓐᓇᕐᓂᖓᓂᒡᓗ ᐃᓗᒻᒥᕐᑕᐅᓯᒪᔪᖅ, ᑲᒪᓇᕐᑐᓕᓚᐅᕐᐳᖅ ᓇᓗᓁᒃᑯᑕᕐᔪᐊᓂᒃ ᐱᓇᓱᐊᕐᓗᓂ ᐃᓄᐃᑦ ᑕᒃᑯᐊᓐᓂ. 9 ᐊᑭᕋᕐᑐᕐᑕᐅᓕᓚᐅᕐᐳᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂᑦ ᐱᓯᒪᔪᓂᑦ, ᕗᕇᑦᒥᓂᒃ ᑍᔭᐅᔪᓂᑦ. ᓮᕆᓂᒥᐅᓂᑦ ᐊᓕᒃᓵᓐᑐᕆᐊᒥᐅᓂᓪᓗ ᐱᓯᒪᔪᓂᑦ, ᐊᓯᖏᓪᓗ ᔫᑎᑦ ᓯᓕᓯᐊᒥᐅᓂᑦ ᐂᓯᐊᒥᐅᓂᓪᓗ ᐱᓯᒪᔪᑦ ᐂᕙᖃᑎᖃᕋᓱᓚᐅᕐᐳᑦ ᓯᑎᐹᓇᓯᒥᒃ. 10 ᓯᑎᐹᓇᓯ ᓯᓚᑐᓂᖃᕐᑎᑕᐅᓂᖓᓄᑦ ᐊᓂᕐᓂᕐᒧᑦ ᐅᖃᐅᑎᒋᔭᖏᑦ ᑭᐅᒪᔪᓐᓇᓚᐅᓐᖏᓛᑦ. 11 ᐊᖑᑎᑦ ᖃᐅᔨᔭᐅᑦᑍᓕᓪᓗᑎᒃ, ᐊᑭᓖᕗᑦ ᐊᖑᑎᓂᒃ ᓴᒡᓗᖁᔨᓪᓗᑎᒃ ᐃᒫᒃ ᐅᖃᖁᓪᓗᒋᑦ, “ᐅᓇ ᑐᓴᓚᐅᕐᑕᕗᑦ ᐅᖃᕐᓂᕐᓘᑎᖃᕐᑎᓪᓗᒍ ᒨᓯᓯᒥᒃ ᒎᑎᒥᒡᓗ.” 12 ᑍᒤᓕᖕᒪᑕ ᐅᐃᒪᔮᕐᑎᑦᓯᓕᕐᐳᑦ ᐃᓄᖕᓂᒃ ᔫᑎᓪᓗ ᐊᖓᔪᖅᑳᖏᓐᓂᒃ ᐱᖁᔭᓂᒡᓗ ᐃᓕᓮᔨᓂᒃ, ᑖᒃᑯᐊ ᓯᑎᐹᓇᓯ ᑎᒍᕚᑦ ᑲᑎᒪᔨᕐᔪᐊᓄᓪᓗ ᐋᓪᓗᒍ. 13 ᑎᒍᔭᐅᑎᑦᓯᔪᑦ ᑲᑎᒪᔨᕐᔪᐊᓄᐊᕐᑎᑦᓯᕗᑦ ᐊᖑᑎᓂᒃ ᓯᑎᐹᓇᓯᒥᒃ ᓴᒡᓗᑎᖃᕐᓂᐊᕐᑐᓂᒃ, ᐅᖃᕐᓗᑎᒃ, “ᐅᓇ ᐊᖑᑦ ᐊᑭᕋᕐᑐᕐᓗᓂ ᑐᒃᓯᐊᕐᕕᒡᔪᐊᑦᑎᓐᓂᒃ ᐃᑦᔪᕐᓁᑦᑐᒥᒃ ᒨᓯᓯᐅᓪᓗ ᐱᖁᔭᖏᓐᓂᒃ ᐅᖃᐅᓯᖃᖃᑦᑕᕐᑐᖅ; 14 ᑐᓴᓚᐅᕐᐸᕗᑦ ᐅᖃᕐᑎᓪᓗᒍ, ᑖᓐᓇᒎᖅ ᔩᓱᓯ ᓈᓴᕇᑎᒥᐅᖅ ᐆᒥᖓ ᑐᒃᓯᐊᕐᕕᒡᔪᐊᕐᒥᒃ ᐊᓯᕈᐃᓂᐊᕐᒪᑦ, ᐃᓕᖅᑯᓯᕗᑦ ᐊᓯᑦᔨᕐᓗᓂᒋᑦ ᒨᓯᓯᒥᑦ ᐱᓯᒪᔭᕗᑦ.” 15 ᑲᑎᒪᔨᕐᔪᐊᑦ ᑲᑎᒪᖃᑕᐅᔪᑦ ᑕᑯᓐᓇᓕᕐᐳᑦ ᓯᑎᐹᓇᓯᒥᒃ ᑮᓇᖓᑕ ᑕᐅᑦᑐᐊ ᑕᑯᕚᑦ ᐂᖏᓕᐅᑉ ᑮᓇᖓᑐᑦ ᑍᒤᓕᕐᑐᖅ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society