ᐋᐴᓯᑕᓖᑦ ᐱᓂᐊᕐᓂᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᓱᒍᓐᓇᖏᑦᑑᑉ ᐱᓱᒍᓐᓇᕐᓯᑎᑕᐅᓂᖓ

¹ ᑕᕝᕙ ᐲᑦᑐᕉᓯ ᔪᐊᓇᓯᓗ ᑐᒃᓯᐊᕐᕕᒡᔪᐊᒧᐊᓕᕐᐴᒃ ᑐᒃᓯᐊᕐᓇᕐᓯᓕᕐᑎᓪᓗᒍ ᐃᑲᕐᕋᒥ, ᐅᓐᓄᓴᒃᑯᑦ 3ᒨᕐᑎᓪᓗᒍ.

² ᐃᑎᕐᑕᕐᕕᖕᒧᑦ ᑕᑯᒥᓇᕐᑐᕐᔪᐊᕐᒥᒃ ᐊᑎᓕᖕᒧᑦ ᑎᑭᓕᕐᑎᓪᓗᒋᒃ ᐊᒡᔭᕐᑕᐅᔪᖃᕐᐳᖅ ᐊᖑᒻᒥᒃ ᐃᓅᓕᕐᓂᕐᒥᓂᑦ ᐱᓱᒍᓐᓇᖏᑦᑐᒥᒃ, ᑖᓐᓇᓗ ᖃᐅᑕᒫᑦ ᐊᒡᔭᕐᑕᐅᖃᑦᑕᓚᐅᕐᐳᖅ ᑕᕝᕗᖓ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᓄᑦ, ᐃᑎᓕᕐᑐᓂᑦ ᕿᓄᖁᓪᓗᒍ ᑮᓇᐅᔭᓂᒃ.

³ ᐲᑦᑐᕉᓯᒃᑯᒃ ᔪᐊᓇᓯᒃᑯᒃ ᑐᒃᓯᐊᕐᕕᒡᔪᐊᕐᒧᑦ ᐃᑎᕆᐊᕐᑐᕐᑑᒃ ᑕᑯᒐᒥᒋᒃ, ᑐᒃᓯᕋᓕᕐᐳᖅ ᑮᓇᐅᔭᓂᒃ.

⁴ ᐲᑦᑐᕉᓯᐅᑉ ᔪᐊᓇᓯᐅᓪᓗ ᕿᕕᐊᕐᓗᒍ ᑕᑯᓐᓈᓕᕐᐹᒃ, ᐅᖃᐅᑎᓪᓗᒍ, “ᑕᑯᓴᕐᑎᒍᒃ.”

⁵ ᑖᓐᓇ ᑕᑯᓴᕐᐳᖅ ᑖᒃᑯᖕᓄᖓ, ᑐᓂᓯᕕᐅᓂᐊᕋᓱᒋᓪᓗᓂ.

⁶ ᐲᑦᑐᕉᓯᐅᑉ ᐅᖃᐅᑎᕚ, “ᑮᓇᐅᔭᖃᓐᖏᓚᖓ, ᐱᒋᔭᓐᓂᒡᓕ ᑐᓂᓯᕝᕕᒋᕙᒋᑦ; ᔩᓱᓯ ᙭ᔅᑑᓯᐅᑉ ᓈᓴᕇᑎᒥᐅᑉ ᐊᑎᖓᓂ ᐅᖃᐅᑎᕙᒋᑦ, ᐱᓱᒋᑦ.”

⁷ ᐊᒡᒐᖏᑕ ᑕᓕᕐᐱᐊᒍᑦ ᑎᒍᓪᓗᓂᐅᒃ ᓂᑯᕕᑎᑉᐹ; ᑕᕝᕔᓐᓇᖅ ᐃᑎᒐᖏᑦ ᓯᖏᕐᓂᖏᒡᓗ ᓄᑭᒃᑖᕐᐳᑦ.

⁸ ᓂᑯᕕᓐᓇᒥ ᕿᒡᒋᕐᐳᖅ ᐱᓱᓕᕐᓗᓂ ᑐᒃᓯᐊᕐᕕᒡᔪᐊᕐᒧᑦ ᐃᑎᖃᑕᐅᓕᕐᐳᖅ, ᐱᓱᒃᓗᓂ ᕿᒡᒋᖃᑦᑕᕐᓗᓂᓗ ᒎᑎ ᓂᕐᑐᕐᐹ.

⁹ ᐃᓄᓕᒫᓂᑦ ᑕᑯᔭᐅᒐᒥ ᐱᓱᓕᕐᑐᖅ ᒎᑎᒥᒡᓗ ᓂᕐᑐᐃᑎᓪᓗᒍ,

¹⁰ ᐃᓕᑕᕆᕚᑦ ᑍᓐᓇᐅᖕᒪᑦ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᓂ ᑕᑯᒥᓇᕐᑐᕐᔪᐊᒥᒃ ᐊᑎᓕᖕᒥ ᐃᒃᓯᕙᖃᑦᑕᓚᐅᕐᑐ ᑐᒃᓯᕋᕐᓗᓂ ᑮᓇᐅᔭᓂᒃ; ᐃᓄᐃᑦ ᑲᒪᒻᒪᕆᓕᕐᐳᑦ ᖁᐊᕐᓵᖓᓪᓗᑎᒡᓗ ᐋᖅᑭᒃᑕᐅᓂᖓᓄᑦ.

ᐲᑦᑐᕉᓯᐅᑉ ᐊᔪᕆᕐᑐᐃᓂᖓ ᑐᒃᓯᐊᕐᕕᒡᔪᐊᒥ

¹¹ ᐊᖑᑦ ᐲᑦᑐᕉᓯᒥᒃ ᔪᐊᓇᓯᒥᒡᓗ ᑎᒍᒥᐊᕐᑎᓪᓗᒍ ᓱᓕ, ᐃᓄᐃᑦ ᑐᐊᕕᕐᓗᑎᒃ ᑖᒃᑯᓄᓐᖓᕐᐳᑦ ᑲᒪᒻᒪᕆᒡᓗᑎᒃ, ᑕᕝᕗᖓ ᓲᓗᒨᓂᐅᑉ ᑐᕐᓲᖓᓂᒃ ᑍᔭᐅᔪᒧᑦ.

¹² ᐲᑦᑐᕉᓯᐅᑉ ᐃᓄᐃᑦ ᑕᑯᒐᒥᒋᑦ ᐅᖃᐅᑎᕔᑦ, “ᐃᓴᕆᐊᓕᒥᐅᖑᔪᓯ, ᓲᖅ ᑕᒪᓐᓇ ᑲᒪᓂᐊᕈᑎᒋᕕᓯᐅᒃ? ᓱᖕᒪᑦ ᐅᕙᑦᑎᓐᓄᑦ ᑕᑯᓐᓇᕐᐱᓰ? ᐅᕙᒍᒃ ᓇᖕᒥᓂᖅ ᐱᔪᓐᓇᕐᓂᑦᑎᓐᓄᑦ ᐅᒃᐱᑦᓯᐊᕐᓂᑦᑎᓐᓄᓪᓘᓐᓃᑦ ᐆᒥᖓ ᐱᓱᒍᓐᓇᕐᓯᑎᑦᓯᓇᓱᒋᕕᑎᒎᒃ?

¹³ ᐂᑉᕋᕼᐋᒻ ᒎᑎᖓ ᐂᓴᑭᐅᓪᓗ ᒎᑎᖓ ᔧᑰᓪᓗ ᒎᑎᖓᑕ, ᓯᕗᓕᕕᓂᑦᑕᓗ ᒎᑎᖓᑕ, ᐱᔨᓂ ᔩᓱᓯ ᓂᕐᑐᕐᓇᕐᓯᑎᓚᐅᕐᐹ, ᑖᓐᓇ ᐊᖓᔪᖅᑳᓄᑦ ᑎᒍᔭᐅᑎᓚᐅᕐᑕᓯ ᓇᕐᕈᓇᕐᓯᑎᓚᐅᕐᑕᓯᓗ ᐰᓛᑑᓯᐅᑉ ᑕᒃᑯᐊᓂ, ᐰᓛᑑᓯᐅᑉ ᐊᓂᑎᑕᐅᖁᒐᓗᐊᕐᑎᓪᓗᓂᐅᒃ.

¹⁴ ᑖᓐᓇ ᐃᑦᔪᕐᓁᑦᑐᖅ ᐊᑲᐅᔪᕐᓗ ᓇᕐᕈᒋᓚᐅᕐᐸᓯ, ᐃᓄᐊᕐᓯᒪᔪᒥᒃ ᐊᓂᑎᑕᐅᖁᔨᖔᓚᐅᕐᐳᓯ,

¹⁵ ᑐᖁᑕᐅᑎᑦᓯᓚᐅᕐᐳᓯ ᐃᓅᓯᕐᑖᕐᑎᑦᓯᔨᒥᒃ, ᑖᓐᓇ ᒎᑎᐅᑉ ᒪᑭᑎᓚᐅᕐᐹ ᑐᖁᒥᑦ. ᑕᒪᑐᒥᖓ ᖃᐅᔨᓯᒪᓪᓗᑕ ᓇᓗᓁᕐᓯᔨᐅᕗᒍᑦ.

¹⁶ ᑖᑦᓱᒪ ᐱᔪᓐᓇᕐᓂᖓᓄᑦ ᐅᒃᐱᕐᓂᒃᑯᑦ ᑖᑦᓱᒪ ᐊᑎᖓᓄᑦ, ᐅᓇ ᐱᓱᒍᓐᓇᓚᐅᖏᑦᑐᖅ ᓄᑭᒃᑖᕐᑎᑕᐅᕗᖅ ᑕᑯᔭᓯ ᖃᐅᔨᒪᔭᓯᓗ; ᐅᒃᐱᕐᓂᒃᒧᑦ ᔩᓱᓯᒃᑯᑦ ᖃᓄᐃᖏᑦᓯᐊᓕᕐᐳᖅ ᐃᓘᓐᓇᓯ ᒫᓐᓇ ᑕᑯᔭᓯ.

¹⁷ “ᒫᓐᓇ ᐃᓅᖃᑎᒃᑲ, ᖃᐅᔨᒪᕗᖓ ᓇᓗᓂᕐᒧᑦ ᐊᖓᔪᖅᑳᓯᓗ ᔩᓱᓯᒥᒃ ᑍᒤᓕᐅᕆᓚᐅᕐᐳᓯ.

¹⁸ ᒎᑎᐅᑉ ᓯᕗᓂᖓᓂ ᐅᖃᐅᓯᕆᓯᒪᖕᒪᒍ ᓇᓚᐅᑦᑍᔪᑎᒍᑦ, ᙭ᔅᑑᓯᖁᑎᓂ ᐋᓐᓂᐊᑎᑕᐅᓂᐊᕐᓂᕋᕐᓗᒍ, ᑍᒤᑎᓚᐅᕐᐹᓗ.

¹⁹ ᑍᒤᒻᒪᑦ ᖃᕿᐊᓕᕆᑦᓯ, ᒎᑎᒧᓪᓗ ᓵᒋᐊᕐᓗᓯ, ᐱᐅᖏᑐᓕᓂᓯ ᑕᕝᕙ ᐲᔭᕐᓂᐊᕐᐰᑦ, ᓄᑖᒥᒡᓗ ᐱᔪᓐᓇᕐᓂᕐᑖᕐᑎᑕᐅᖃᑦᑕᕐᓂᐊᕐᐳᓯ ᐊᑕᓂᐅᑉ ᓇᔫᑎᓂᖓᓄᑦ,

²⁰ ᒎᑎᐅᑉ ᑎᓕᓂᐊᕐᐹ ᙭ᔅᑑᓯ ᓂᕈᐊᕐᓯᒪᔭᓂ ᐱᑦᔪᑎᒋᓪᓗᓯ, ᑕᕝᕙ ᔩᓱᓯ.

²¹ ᑖᓐᓇ ᕿᓚᖕᒦᑦᑕᕆᐊᖃᓚᐅᕐᐳᖅ ᒎᑎᐅᑉ ᑍᑦᓱᒪᓂᐊᓗᖕᓂᑦ ᐅᖃᐅᓯᕆᓯᒪᔭᖏᑦ ᓇᓚᐅᑦᑍᔪᑎᒍᑦ ᐃᑦᔪᕐᓁᑦᑐᑎᒍᑦ ᓈᒻᒪᒃᓯᑎᑕᐅᓚᐅᖏᓐᓂᖏᓐᓂ.

²² ᒨᓯᓯ ᐅᖃᓚᐅᕐᒪᑦ, ‘ᐊᑕᓂᐅᑉ ᒎᑎᑦᓯ ᑎᓕᓯᕕᒋᔪᒫᕐᐹᓯ ᓇᓚᐅᑦᑍᔪᒥᒃ ᐃᓅᖃᑎᑦᓯ ᐃᓚᖓᓐᓂᒃ ᑍᒫᑦᓮᓐᓇᖅ ᑎᓕᓚᐅᕋᒥᖓ. ᓈᓚᒋᐊᖃᕈᒫᕐᐸᓯ ᖃᓄᑐᐃᓐᓇᖅ ᐅᖃᐅᑎᑐᐊᕐᐸᓯ.

²³ ᐃᒤᑦᓱᒫᕐᐳᕐᓗ ᓇᓪᓕᐊᑦ ᑖᑦᓱᒥᖓ ᓇᓚᐅᑦᑍᔪᒥᒃ ᓈᓚᖏᑦᑐᖅ, ᐃᓄᖕᓂᑦ ᐊᕕᑕᐅᓗᓂ ᐊᓯᕈᕐᑕᐅᔪᒫᕐᐳᖅ.’

²⁴ ᓇᓚᐅᑦᑍᔪᑦ, ᓴᒧᐃᓕᒥᑦ ᐱᒋᐊᕐᓗᑎᒃ ᑭᖑᓪᓕᖏᓐᓄᓪᓗ ᐅᖃᐅᓯᐅᓚᐅᕐᐳᖅ ᑕᒪᓐᓇ ᐅᓪᓗᒥ ᐊᑐᕐᑕᐅᔪᖅ.

²⁵ ᑭᖑᕚᖑᕗᓯ ᓇᓚᐅᑦᑍᔪᑦ ᒎᑎᐅᓪᓗ ᐊᖏᕈᑎᒋᓯᒪᔭᖓᓄᑦ ᓯᕗᓪᓕᕕᓂᑦᓯᓐᓄᑦ ᐃᓚᐅᕗᓯ, ᐂᑉᕋᕼᐋᒻᒧᑦ ᐅᖃᓚᐅᕐᒪᑦ, ‘ᐃᕝᕕᑦ ᑭᖑᕚᖏᑎᒍᑦ ᐃᓄᓕᒫᑦ ᓄᓇᕐᔪᐊᕐᒦᑦᑐᑦ ᓮᒻᒪᕐᑎᑕᐅᔪᒫᕐᐳᑦ.’

²⁶ ᒎᑎᐅᑉ ᐱᔨᓂ ᓂᕈᐊᕋᒥᐅᒃ ᑎᓕᓚᐅᕐᐹ ᐃᓕᑦᓯᓐᓄᑦ ᓯᕗᓪᓕᕐᐹᒥᒃ, ᓮᒻᒪᕐᑎᑦᓯᓂᖓᒍᑦ ᑕᒪᑦᓯ ᐊᑐᓂᑦ ᐊᔪᕐᑐᓕᓂᕐᒥᒃ ᕿᒤᖁᓪᓗᓯ.”