ᐋᐴᓯᑕᓖᑦ ᐱᓂᐊᕐᓂᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦᓄᓇᒥ ᒪᐅᓪᑕᒥ 1 ᓄᓇᒦᓕᕋᑦᑕ ᑐᑭᓯᓕᕐᐳᒍᑦ ᕿᑭᕐᑕᖅ ᐊᑎᖃᕐᒪᑦ ᒪᐅᓪᑕᒥᒃ. 2 ᑕᕝᕙᓂ ᓄᓇᖃᕐᑐᑦ ᐱᑦᓯᐊᕐᕕᒋᕚᑎᒍᑦ, ᐃᑯᐊᓚᑎᑦᓯᓪᓗᑎᒃ ᑐᓐᖓᓱᒃᑎᑉᐹᑎᒍᑦ, ᓯᓚᓗᓕᕐᒪᑦ ᐃᒃᑮᕐᓇᕐᓯᓪᓗᓂᓗ. 3 ᐸᐅᓗᓯ ᕿᔪᖕᓂᒃ ᓄᐊᑦᓯᓪᓗᓂ ᐃᑯᒪᒧᑦ ᐃᓕᓯᓇᓱᐊᕐᑎᓪᓗᒍ, ᖁᒡᓗᒋᐊᖅ ᑐᖁᓐᓇᕐᑐᓕᒃ ᐆᓇᕐᑐᓕᐊᕋᓱᐊᑐᖅ ᓴᖅᑭᑉᐳᖅ, ᐸᐅᓗᓯᐅᑉ ᐊᒡᒐᖏᓐᓂᒃ ᑮᓯᒐᒥ ᐊᑕᓕᕐᐳᖅ. 4 ᒪᐅᓪᑕᒥᐅᓪᓕ ᑕᑯᒐᒥᑦᔪᒃ ᐊᒡᒐᖏᓐᓂ ᓂᕕᖓᔪᖅ, ᐃᒻᒥᖕᓄᑦ ᐅᖃᕐᐳᑦ, “ᓇᓗᓇᓐᖏᓚᖅ ᐅᓇ ᐃᓄᐊᕐᑎᐅᖕᒪᑦ, ᐃᒫᓂᑦ ᐱᐅᓕᔭᐅᒐᓗᐊᕋᒥ, ᐊᑭᓂᐊᕐᑕᐅᓂᕐᒥᓄᑦ ᐃᓅᑦᔮᔪᓐᓃᕐᑐᖅ.” 5 ᐸᐅᓗᓯᐅᓪᓕ ᖁᒡᓗᒋᐊᖅ ᐃᑯᒪᒧᑦ ᐃᒋᑉᐹ, ᖃᓄᐃᓕᔭᐅᓇᓂ ᑖᑦᓱᒧᖓ. 6 ᐃᓄᐃᑦ ᐅᑕᖅᑭᓕᕐᐳᑦ ᐸᐅᓗᓯ ᐳᕕᓕᕐᓂᐊᕋᓱᒋᓪᓗᒍ, ᐅᕝᕙᓘᓐᓃᑦ ᑐᖁᓗᓂ ᐅᕐᕈᐃᓐᓇᕐᓂᐊᕋᓱᒋᓪᓗᒍ; ᐊᑯᓂ ᐅᑕᖅᑭᓚᐅᕐᓗᑎᒃ ᖃᓄᐃᑉᐸᓪᓕᖏᒻᒪᑦ, ᐊᓯᐊᓂᒃ ᐃᓱᒪᖃᓕᕐᐳᑦ ᐅᖃᕐᓗᑎᒃ, “ᒎᑎᐅᓇ.” 7 ᓇᔪᕐᑕᑦᑕ ᖃᓂᒋᔮᓂ ᐳᑉᓕᐊᓯ ᓄᓇᖁᑎᖃᕋᒥ, ᕿᑭᕐᑕᒥ ᑕᕝᕙᓂ ᐊᖓᔪᖅᑳᕆᔭᐅᔪᖅ, ᑖᑦᓱᒪ ᑐᓐᖓᓱᒃᑎᑦᓯᐊᕐᐹᑎᒍᑦ, ᐅᓪᓗᓂᒡᓗ ᐱᖓᓱᓂᒃ ᑐᔪᕐᒥᐊᕆᕚᑎᒍᑦ. 8 ᐳᑉᓕᐊᓯᐅᓪᓗ ᐊᑖᑕᖓ ᐃᓂᓪᓚᖓᓚᐅᕐᐳᖅ ᐆᑎᕐᓇᕐᓯᖃᑦᑕᕐᓇᕐᑐᒥᒃ ᖃᓂᒪᓪᓗᓂ, ᐊᐅᖕᒥᒡᓗ ᐊᓇᖃᓯᐅᑦᔨᕙᒃᓗᓂ; ᐸᐅᓗᓯᐅᑉ ᐳᓛᕆᐊᕐᓗᓂᐅᒃ ᑐᒃᓯᐅᑎᕚ, ᐸᑎᒻᒥᓪᓗᒍ, ᐋᖅᑭᒃᐹ. 9 ᐸᐅᓗᓯ ᑍᒫᒃ ᐋᖅᑭᒃᓯᖕᒪᑦ, ᕿᑭᕐᑕᒥᐅᑦ ᐊᓯᖏᑦ ᖃᓂᒻᒪᓯᓖᑦ ᕾᑕᐅᒋᕗᑦ, ᐋᖅᑭᒃᑕᐅᓪᓗᑎᒃ. 10 ᓱᓇᑐᐃᓐᓇᕐᓂᒡᓗ ᐊᒥᓱᓂᒃ ᑐᓂᓯᕕᒋᕚᑎᒍᑦ; ᐅᒥᐊᕐᔪᐊᒃᑯᑦ ᐊᐅᓪᓚᓕᕋᑦᑕ ᑕᖁᐊᒃᓴᕐᑖᕐᑎᑉᐹᑎᒍᑦ ᐱᔭᕆᐊᑲᕐᑕᓕᒫᑦᑎᓐᓂᒃ. ᒪᐅᓪᑕᒥᑦ ᕉᒪᒧᑦ ᐃᖏᕐᕋᓂᕗᑦ 11 ᑕᖅᑮᑦ ᐱᖓᓱᑦ ᐊᓂᒍᕐᑎᓪᓗᒋᑦ ᐊᓕᒃᓵᓐᑐᕆᐊᒥᐅᑦ ᐅᒥᐊᕐᔪᐊᖁᑎᖓᒍᑦ ᐊᐅᓪᓚᕐᐳᒍᑦ, ᑖᓐᓇ ᐅᒥᐊᕐᔪᐊᖅ ᕿᑭᕐᑕᒥ ᐅᑮᔪᕕᓂᐅᖕᒪᑦ, ᓇᓗᓁᒃᑯᑕᖃᕐᑐᖅ ᒎᑎᓐᖑᐊᖕᓂᒃ ᒪᕐᕈᓕᐊᕕᓃᖕᓂᒃ ᑲᔅᑐᕆᒥᒡᓗ ᐳᓚᒃᓯᒥᒡᓗ, 12 ᓮᕋᑰᓯᒧᑦ ᑎᑭᓐᓇᑕ, ᑕᕝᕙᓃᑉᐳᒍᑦ ᐅᓪᓗᓂᒃ ᐱᖓᓱᓂᒃ. 13 ᑕᕝᕙᓐᖓᓪᓗ ᐊᐅᓪᓚᕋᑦᑕ ᕇᒡᒋᐅᒥᒧᑦ ᑎᑭᑉᐳᒍᑦ; ᖃᐅᑎᓪᓗᒍ ᐅᓪᓗᓪᓗᐊᑉ ᓇᓛᓂᑦ ᐊᓄᕌᓕᕐᒪᑦ ᐃᖏᕐᕋᓯᕗᒍᑦ, ᐅᓪᓘᒃ ᒪᕐᕉᒃ ᐊᓂᒍᕐᒪᑎᒃ ᐳᑎᐅᓕᒧᑦ ᑎᑭᑉᐳᒍᑦ. 14 ᑕᕝᕙᓂ ᐅᒃᐱᕐᑑᖃᑎᒌᓂᒃ ᑲᑎᓯᒐᑦᑕ, ᑖᒃᑯᐊ ᓇᔪᕐᑕᐅᑬᓐᓇᕈᒪᕗᑦ ᐱᓇᓱᐊᕈᓯᓕᒫᒥᒃ. ᑕᕝᕙᓐᖓᑦ ᕉᒪᒧᐊᕐᐳᒍᑦ. 15 ᐅᒃᐱᕐᑑᖃᑎᒌᓪᓕ ᑕᕝᕙᓃᑦᑐᑦ ᑐᓴᕋᒥᒃ ᐅᕙᑦᑎᓐᓂᒃ, ᐸᕐᕆᐊᕐᐹᑎᒍᑦ ᑲᑎᓪᓗᑕ ᑕᑯᕋᓐᓈᕐᕕᖕᒥ ᐊᐱᐅᓯᒥᒃ ᐊᑎᓕᖕᒥ, ᐊᓯᖏᓪᓗ ᑐᔪᕐᒥᕕᖕᓂᑦ ᐱᖓᓱᓂᒃ ᐊᑎᓕᖕᒥ ᑲᑎᒋᕙᕗᑦ. ᐸᐅᓗᓯᐅᑉ ᑕᑯᒐᒥᒋᑦ ᒎᑎ ᐊᖏᔪᒥᒃ ᖁᔭᒋᕚ, ᐊᖏᔪᒥᒃ ᐱᕙᓪᓕᕐᑎᑕᐅᓪᓗᓂ. ᕉᒪᒥ 16 ᕉᒪᒧᓪᓕ ᑎᑭᓐᓇᑕ, ᐸᐅᓗᓯ ᓇᖕᒥᓂᖅ ᐃᒡᓗᖃᕐᑎᑕᐅᕗᖅ, ᐅᓇᑕᕐᑐᒃᓴᒥᒃ ᖃᐅᔨᓴᕐᑎᖃᕐᓗᓂ. 17 ᐅᓪᓗᐃᑦ ᐱᖓᓱᑦ ᐊᓂᒍᕐᒪᑕ ᐸᐅᓗᓯᐅᑉ ᔫᑎᑦ ᓯᕗᓕᕐᑎᖏᑦ ᑲᑎᖁᓕᕐᐰᑦ; ᑲᑎᒪᓕᕐᒪᑕ ᐅᖃᐅᑎᕔᑦ, “ᔫᑎᐅᖃᑎᒃᑳ, ᐃᓅᖃᑎᑦᑎᓐᓄᑦ ᐊᑭᕋᕐᑐᕐᓂᕐᒥᒃ ᐊᑐᓚᐅᕐᑎᓐᓇᖓ ᐃᓕᖅᑯᓯᑦᑎᓐᓄᓪᓘᓐᓃᑦ ᓯᕗᓕᕕᓂᑦᑎᓐᓄᓪᓘᓐᓃᑦ, ᔨᕉᓴᓕᒻᒥ ᑎᒍᔭᐅᓚᐅᕐᐳᖓ, ᕉᒪᒥᐅᓄᑦ ᑐᓂᔭᐅᓪᓗᖓ. 18 ᑖᒃᑯᐊᓕ ᐅᕙᓐᓂᒃ ᖃᐅᔨᓴᕋᒥᒃ ᑎᒍᔭᐅᓯᒪᔪᓐᓃᕐᑎᑦᓯᖁᔨᓚᐅᕐᐳᑦ, ᖃᐅᔨᒐᒥᒃ ᐸᓯᔭᐅᑦᔪᑎᒃᓴᖃᖏᓐᓇᒪ ᑐᖁᑕᐅᑦᔪᑎᒃᓴᒥᒃ. 19 ᔫᑎᑦ ᐊᑲᐅᒃᓴᖏᒻᒪᑕ ᑕᒪᑐᒥᖓ, ᐅᖃᕋᓱᓕᓚᐅᕐᐳᖓ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᐃᖅᑲᕐᑐᕐᑕᐅᔪᒪᓪᓗᖓ, ᐸᓯᒃᓯᕈᑎᒃᓴᖃᖏᒃᑲᓗᐊᕐᓗᖓ ᐃᓅᖃᑎᑦᑎᓐᓄᑦ ᔫᑎᓄᑦ. 20 ᑕᒪᑐᒧᖓ ᑕᕝᕙ ᑕᑯᔪᒪᓚᐅᕐᐸᑦᓯ ᐅᖃᓪᓚᒡᕕᒋᔪᒪᓪᓗᓯᓗ, ᐊᒻᒪᑦᑕᐅᖅ ᒪᑯᓄᖓ ᐊᕐᓵᕐᑑᔭᓄᑦ ᐊᑦᑐᖏᕐᓱᕐᑕᐅᓯᒪᕗᖓ ᐃᓴᕆᐊᓕᒥᐅᑦ ᓂᕆᐅᖕᓂᕆᔭᖓᓐᓂᒃ ᓂᕆᐅᖕᓂᖃᕐᓂᕋ ᐱᑦᔪᑎᒋᓪᓗᒍ.” 21 ᑖᒃᑯᐊ ᐅᖃᐅᑎᕚᑦ, “ᑎᑎᖅᑲᐅᓯᐊᓚᐅᕐᓯᒪᓐᖏᓚᒍᑦ ᔫᑎᐊᒥᑦ ᐱᑦᔪᑎᒋᓗᑎᑦ, ᑕᐅᕙᓐᖓᑦ ᐃᓅᖃᑎᕗᑦ ᑎᑭᓯᒪᔪᑦ ᐅᖃᐅᓯᖃᓚᐅᕋᑎᒃ ᐅᕝᕙᓗ ᐱᐅᖏᑦᑐᒥᒃ ᐅᖃᐅᓯᖃᕐᑐᖃᓚᐅᕋᓂ ᐱᑦᔪᑎᒋᓗᑎᑦ. 22 ᑐᓴᕈᒪᔪᐊᓘᕗᒍᓪᓕ ᐃᓱᒪᒋᔭᕐᓂᒃ; ᖃᐅᔨᒪᒐᑦᑕ ᓇᓂᑐᐃᓐᓇᖅ ᐃᓄᐃᑦ ᐊᑭᕋᕐᑐᖃᑦᑕᕐᒪᑕ ᑕᒪᑐᒧᖓ ᐃᓚᐅᕕᒋᔭᕐᓄᑦ.” 23 ᐸᐅᓗᓯᒥᒡᓗ ᑲᑎᒪᖃᑎᖃᕐᕕᒃᓴᒥᖕᓂᒃ ᐅᓪᓗᒥᒃ ᓇᓗᓁᕐᓯᕗᑦ, ᓇᓪᓕᐅᑎᖕᒪᓪᓗ ᐅᓄᕐᓂᕐᓴᒻᒪᕆᐊᓗᐃᑦ ᕾᕗᑦ ᓇᔪᕐᑕᖓᓄᑦ. ᐅᓪᓛᒥᑦ ᐱᒋᐊᕐᓗᒍ ᐅᓐᓄᒧᑦ ᑎᑭᓪᓗᒍ, ᓇᓗᓇᕈᓐᓃᕐᑎᑦᓯᕗᕐᓗ ᐅᖃᐅᓯᖃᕐᓗᓂ ᒎᑎᐅᑉ ᐊᑕᓂᐅᕕᖓᓂᒃ ᔩᓱᓯᒥᒡᓗ ᑐᑭᓯᔭᐅᑎᑦᓯᓇᓱᐊᕐᐳᖅ ᒨᓯᓯᐅᑉ ᐱᖁᔭᖏᑦ, ᓇᓚᐅᑦᑍᔪᓪᓗ ᐊᒡᓚᖏᑦ ᐊᑐᕐᓗᒋᑦ. 24 ᐃᓚᖏᑦ ᐅᒃᐱᓕᕐᐳᑦ ᐅᖃᐅᓯᖏᓐᓂᒃ, ᐃᓚᖏᓪᓕ ᐅᒃᐱᓐᖏᓚᑦ. 25 ᑖᒃᑯᐊᓗ ᐃᒻᒥᖕᓄᑦ ᐊᖏᖃᑎᒌᒍᓐᓃᕋᒥᒃ, ᐊᓂᕗᑦ, ᐸᐅᓗᓯ ᐃᒫᒃ ᐅᖃᕐᒪᑦ: “ᐊᓂᕐᓂᖅ ᐃᑦᔪᕐᓁᑦᑐᖅ ᓈᒻᒪᓈᑦᓯᐊᕐᓗᓂ ᐅᖃᕐᓯᒪᕗᖅ ᑐᑭᓯᓇᕐᑐᒥᒃ ᓯᕗᓕᕕᓂᑦᓯᓐᓄᑦ ᐂᓮᐊᓯᒃᑯᑦ ᐅᖃᕋᒥ: 26 ‘ᐃᓄᐃᑦ ᐅᐸᒡᓗᒋᑦ ᐅᖃᐅᑎᒃᑭᑦ, ᑐᓴᖃᑦᑕᕋᓗᐊᕐᓗᓯ ᑐᑭᓯᔪᓐᓇᕐᓂᐊᓐᖏᓚᓯ; ᑕᑯᖃᑦᑕᕋᓗᐊᕐᓗᓯᓗ, ᐃᓕᑕᕐᓯᓂᐊᓐᖏᓚᓯ. 27 ᐃᓄᐃᑦ ᐅᑯᐊ ᐃᓱᒪᖏᑦ ᓯᑎᔪᐊᓘᓕᕐᒪᑕ, ᓯᐅᑎᖏᓪᓗ ᑐᓵᑦᓯᐊᖏᑦᑐᐊᓘᓕᕐᓗᑎᒃ, ᐃᔨᖏᓪᓗ ᓯᑯᓐᖏᖓᓪᓗᑎᒃ; ᑍᒤᖏᒃᑯᑎᒃ ᑕᑯᓂᐅᓴᒐᒥᒃ, ᓯᐅᑎᒥᖕᓄᓪᓗ ᑐᓵᓕᕋᔭᕋᒥᒃ, ᐆᒻᒪᑎᒥᒃᑎᒍᓪᓗ ᑐᑭᓯᐊᓕᕐᓗᑎᒃ, ᐅᕙᓐᓄᓪᓗ ᓵᒋᐊᕋᔭᕐᐳᑦ ᐅᕙᖓᓗ ᐋᖅᑭᒃᑲᔭᕋᒃᑭᑦ.’ 28 “ᑕᒪᓐᓇ ᐱᓪᓗᒍ ᖃᐅᔨᒪᖁᕙᑦᓯ ᒎᑎᐅᑉ ᐱᐅᓕᒃᓯᓂᖓ ᑐᕌᖓᑎᑕᐅᓕᕐᐳᖅ ᔫᑎᐅᖏᑦᑐᓄᑦ; ᑖᒃᑯᐊ ᓈᓚᒍᓐᓇᕐᒪᑕ.” [ 29 ᐸᐅᓗᓯ ᑍᒫᒃ ᐅᖃᕐᒪᑦ, ᔫᑎᑦ ᕿᒪᕉᑎᓕᕐᐳᑦ ᐂᕙᖃᑎᒌᓕᕐᓗᑎᒡᓗ ᐃᒻᒥᖕᓄᑦ.] 30 ᐊᕐᕌᒍᒃ ᒪᕐᕉᒃ ᓈᓪᓗᒋᒃ ᐸᐅᓗᓯ ᑕᕝᕙᓂ ᐃᓂᖃᓚᐅᕐᐳᖅ ᐃᒡᓗᒥᓂ ᓇᖕᒥᓂᖅ ᐊᑭᓕᕐᓱᐃᓪᓗᓂ, ᕾᔪᓕᒫᓂᒃ ᑐᓐᖓᓱᒃᑎᑦᓯᖃᑦᑕᓚᐅᕐᐳᖅ. 31 ᒎᑎᐅᑉ ᐊᑕᓂᐅᕕᖓᓂᒃ ᐊᔪᕆᕐᑐᐃᑦᔪᑎᖃᕐᓗᓂ ᐃᓕᓐᓂᐊᕐᑎᑦᓯᑦᔪᑎᖃᕐᓗᓂᓗ ᐊᑕᓂᕐᒥᒃ ᔩᓱᓯ ᙭ᔅᑑᓯᒥᒃ ᓯᕘᕋᓇᓂ ᐊᒡᕕᐊᕐᑕᐅᓇᓂᓗ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society