ᐋᐴᓯᑕᓖᑦ ᐱᓂᐊᕐᓂᖏᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᐸᐅᓗᓯᐅᑉ ᓇᖕᒥᓂᖅ ᓴᐳᑎᓇᓱᐊᕐᓂᖓ ᐊᒍᕆᐹᑉ ᓵᖓᓂ

¹ ᐊᒍᕆᐸ ᐸᐅᓗᓯᒧᑦ ᐅᖃᕐᐳᖅ, “ᒫᓐᓇ ᐱᕕᒃᓴᖃᕐᐳᑎᑦ ᓇᖕᒥᓂᖅ ᐅᖃᐅᓯᕆᓗᑎᑦ.” ᐸᐅᓗᓯ ᐃᓵᒡᓗᓂ, ᓴᐳᑎᓇᓱᐊᕐᓗᓂ ᐃᒻᒥᓂᒃ ᐅᖃᓕᕐᐳᖅ:

² “ᐊᖓᔪᖅᑳᕐᔪᐊᖅ ᐊᒍᕆᐸ, ᐊᖏᔪᐊᓗᖕᒥ ᖁᕕᐊᓲᑎᒋᕙᕋ ᐅᓪᓗᒥ ᓵᖕᓂ ᓇᖏᕋᒪ, ᐅᕙᓐᓂᒃ ᐅᖃᐅᓯᕆᔪᓐᓇᕐᓗᖓ ᔫᑎᑦ ᐸᓯᒃᖠᕋᓱᐊᕐᓂᖏᑦ ᐅᕙᓐᓂᒃ ᐱᓪᓗᒋᑦ,

³ ᐱᓗᐊᕐᑐᒥᒃ ᔫᑎᑦ ᐃᓕᖅᑯᓯᖏᑦ ᖃᐅᔨᒪᑦᓯᐊᕋᕕᒋᑦ ᐃᓱᒪᒋᔭᖏᓪᓗ; ᑍᒤᒻᒪᑦ ᐅᖃᕐᑎᓪᓗᖓ ᐅᑕᖅᑭᑦᓯᐊᕐᓗᑎᑦ ᓈᓚᒃᑕᐅᔪᒪᒐᓗᐊᕐᐳᖓ.

⁴ “ᔫᑎᓕᒫᑦ ᖃᐅᔨᒪᖕᒪᑕ ᓱᕈᓯᐅᓂᓐᓂᑦ ᑍᑲᓐᖓᑦ ᐃᓕᖅᑯᓯᕆᔭᓐᓂᒃ, ᐃᓅᓯᓕᒫᓐᓂ ᓄᓇᒋᔭᑦᑎᓐᓂ, ᔨᕉᓴᓕᒻᒦᓐᓂᓐᓂᓗᑦᑕᐅᖅ.

⁵ ᐊᑯᓂᐊᓗᒃ ᖃᐅᔨᒪᓕᕐᒪᑕ ᐅᕙᓐᓂᒃ ᐅᖃᑦᓯᐊᕈᓐᓇᕐᓗᑎᒃ ᐅᖃᕈᒪᒍᑎᒃ; ᐹᕆᓯᓄᑦ ᐃᓚᒋᔭᐅᓚᐅᕋᒪ ᑍᒃᑯᓄᖓ ᒪᓕᒋᐊᖃᕐᑕᒥᖕᓂᒃ ᐊᑐᕋᓱᒃᑲᐅᓂᕐᐹᖑᔪᓄᑦ.

⁶ ᒫᓐᓇᓕ ᐃᖅᑲᕐᑐᕐᑕᐅᑦᔪᑎᖃᕐᐳᖓ ᓂᕆᐅᖕᓂᖃᕐᓂᓐᓄᑦ ᒎᑎᐅᑉ ᐊᖏᕈᑎᒋᓚᐅᕐᑕᖓᓂᒃ ᓯᕗᓕᕕᓂᑦᑎᓐᓄᑦ,

⁷ ᑕᒪᓐᓇ ᑕᕝᕙ ᐊᖏᕐᓂᖅ ᓂᕆᐅᒋᔭᐅᓚᐅᕐᑐᖅ ᑭᖑᕚᖑᖃᑎᒌᓄᑦ 12ᓄᑦ, ᑍᒪᓐᖓᑦ ᑐᒃᓯᐊᕐᓂᕐᒥᖕᓄᑦ ᐅᓪᓘᑎᓪᓗᒍ ᐅᓐᓄᐊᒥᓗ, ᐊᖓᔪᖅᑳᕐᔪᐊᖅ, ᑕᒪᓐᓇ ᑕᕝᕙ ᓂᕆᐅᖕᓂᖅ ᐱᑦᔪᑎᒋᓪᓗᒍ ᔫᑎᑦ ᐸᓯᓇᓱᐊᕐᐹᖓ.

⁸ ᓱᖕᒪᓪᓕ ᐃᓕᑦᓯ ᐅᕙᓃᑦᑐᓯ ᐅᒃᐱᕆᔪᓐᓇᓐᖏᓚᓯᐅᒃ ᒎᑎᐅᑉ ᑐᖁᖓᔪᓂᒃ ᐆᒻᒪᕐᑎᑦᓯᔪᓐᓇᕐᓂᖓ?

⁹ “ᐅᕙᖓᑦᑕᐅᖅ ᐃᓱᒪᖃᓚᐅᕐᐳᖓ ᔩᓱᓯ ᓈᓴᕇᑎᒥᐅᖅ ᐊᑭᕋᕐᑐᕈᒪᓪᓗᒍ ᐊᔪᓐᖏᑕᓕᒫᓐᓄᑦ.

¹⁰ ᑍᒫᒡᓗ ᐱᓇᓱᐊᓚᐅᕐᐳᖓ ᔨᕉᓴᓕᒻᒥ; ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᐱᔪᓐᓇᕐᓂᖃᕐᑎᑕᐅᓪᓗᖓ ᐊᒥᓱᑦ ᐅᒃᐱᕐᑐᑦ ᑎᒍᔭᐅᓯᒪᕕᖕᒨᕐᑎᓚᐅᕐᐸᒃᑲ, ᑐᖁᑕᒃᓴᕈᕐᑎᑕᐅᔭᕌᖓᑕ ᓈᒻᒪᒃᓴᖃᑦᑕᓚᐅᕐᐳᖓ.

¹¹ ᐅᓄᕐᑐᐃᕐᓱᕐᖢᖓ ᓱᒋᐊᕐᑕᐅᑎᖃᑦᑕᓚᐅᕐᐸᒃᑲ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ, ᔩᓱᓯᒥᒃ ᐅᒃᐱᕆᔭᖃᕈᓐᓃᖁᓪᓗᒋᑦ ᐅᖃᕐᑎᓐᓇᓱᖃᑦᑕᓚᐅᕐᐸᒃᑲ; ᐊᖏᔪᒥᒃ ᓂᓐᖓᐅᑎᓯᒪᒐᒃᑭᑦ ᐊᑭᕋᕐᑐᕐᓂᕐᒧᑦ ᐊᒡᓛᑦ ᓄᓇᓖᑦ ᐊᓯᖏᓐᓄᑦ ᐅᖓᓯᒃᑐᓄᑦ ᕿᓂᖃᑦᑕᓚᐅᕐᐸᒃᑲ.”

ᐸᐅᓗᓯᐅᑉ ᐅᓂᒃᑳᕐᓂᖓ ᓵᒋᐊᕐᓂᕕᓂᕐᒥᓂᒃ

¹² “ᑕᒪᓐᓇ ᐱᑦᔪᑎᒋᓪᓗᒍ ᑕᒫᓯᑰᓯᒧᐊᓕᓚᐅᕐᐳᖓ ᐱᔪᓐᓇᐅᑎᖃᕐᑎᑕᐅᓪᓗᖓ ᑎᓕᔭᐅᓪᓗᖓᓗ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ.

¹³ ᐊᖓᔪᖅᑳᕐᔪᐊᖅ, ᖃᐅᒪᔪᐊᓗᖕᒥᒃ ᑕᑯᓚᐅᕐᐳᖓ ᐊᑐᕆᐊᒥ ᐅᓪᓘᑉ ᕿᑎᕋᕐᓂᖓᓂ, ᓯᕿᓂᕐᒥᑦ ᖃᐅᒪᓂᕐᓴᒻᒪᕆᐊᓗᖕᒥᒃ, ᕿᓚᖕᒥᑦ ᖃᐅᒻᒪᒃᑎᑕᐅᔪᒥᒃ ᐅᕙᓐᓄᑦ ᐃᖏᕐᕋᖃᑎᓐᓄᓪᓗ.

¹⁴ ᑕᒪᑦᑕ ᓄᓇᒧᑦ ᐅᕐᕈᒐᑦᑕ, ᑐᓴᓚᐅᕐᐳᖓ ᓂᐱᒥᒃ ᐄᑉᕉᑎᑐᑦ ᐅᖃᕐᑐᒥᒃ, ‘ᓴᐅᓗᓰ, ᓴᐅᓗᓰ, ᓱᖕᒪᑦ ᐊᑭᕋᕐᑐᕐᐱᖓ? ᐃᓕᖕᓂᒃ ᐋᓐᓂᕐᓯᑐᐃᓐᓇᕐᐳᑎᑦ ᑐᒡᒐᕋᓱᒃᑐᑎᑐᑦ, ᐊᖑᓴᓪᓘᑉ ᑐᒃᑲᕋᓱᖕᓂᖓᑐᑦ ᐃᓄᐊᑕ ᐊᓇᐅᑕᖓᓂᒃ ᑲᐴᑎᓕᖕᒥᒃ.’

¹⁵ ᐊᐱᕆᕙᕋ, ‘ᐊᑕᓃᖅ ᑭᓇᐅᕖᑦ?’ ᐊᑕᓂᐅᑉ ᐅᖃᐅᑎᕚᖓ, ‘ᔩᓱᓯᐅᕗᖓ ᐊᑭᕋᕐᑐᕐᑍᑦ.

¹⁶ ᒫᓐᓇ ᓂᑯᕕᓕᕆᑦ; ᐃᓕᖕᓄᑦ ᓴᖅᑭᑦᔪᑎᖃᕐᐳᖓ ᑎᓕᔪᒪᒐᒃᑭᑦ, ᐅᕙᓐᓂᒃ ᐅᖃᐅᓯᖃᖁᓪᓗᑎᑦ ᐃᓄᖕᓄᑦ ᑕᑯᑎᑕᐅᑦᔪᑎᒋᔭᕐᓂᒃ ᑕᑯᑎᑦᓯᔪᑎᒋᖃᑦᑕᓂᐊᕐᑕᓐᓂᒡᓗ ᓱᓕ ᐃᓕᖕᓄᑦ,

¹⁷ ᓴᐳᑎᓂᐊᕐᐸᒋᑦ ᔫᑎᐅᖃᑎᖕᓂᑦ, ᔫᑎᐅᖏᑦᑐᓂᓪᓗ, ᑖᒃᑯᓄᖓ ᑎᓕᓕᕐᐸᒋᑦ.

¹⁸ ᐃᔨᖏᑦ ᐅᐃᑎᑕᐅᖁᓪᓗᒋᑦ, ᑖᕐᑐᒥᑦ ᓵᒋᐊᖁᓪᓗᒋᑦ ᖃᐅᒪᔪᒧᑦ, ᓵᑖᓇᓯᐅᓪᓗ ᐱᔪᓐᓇᕐᓂᖓᓂᑦ ᒎᑎᒧᑦ, ᐅᒃᐱᕐᓂᕐᒥᒍᓪᓗ ᐅᕙᓐᓄᑦ ᐊᔪᕐᓂᕐᒥᖕᓂᑦ ᐃᓱᒪᒋᔪᓐᓁᕐᕕᐅᖁᓪᓗᒋᑦ, ᐃᓂᖃᓕᖁᓪᓗᒋᓪᓗ ᒎᑎᐅᑉ ᐃᑦᔪᕐᓁᑎᓯᒪᔭᖏᓐᓂ ᐅᒃᐱᕐᓂᒃᑯᑦ.’”

ᐸᐅᓗᓯᐅᑉ ᐱᓇᓱᐊᕐᓂᕐᒥᓂᒃ ᐅᓂᒃᑳᕐᓂᖓ

¹⁹ “ᑍᒫᒡᓕ, ᐊᖓᔪᖅᑳᕐᔪᐊᖅ ᐊᒍᕆᐹ, ᑕᑯᑎᑕᐅᓂᕋ ᒪᓕᑦᓯᐊᓚᐅᕐᐸᕋ ᕿᓚᖕᒥᑦ ᐱᔪᖅ.

²⁰ ᐱᓇᓱᐊᓚᐅᕐᐳᖓᓕ ᑕᒫᓯᑰᓯᒥᑦ ᐱᒋᐊᕐᓗᖓ, ᔨᕉᓴᓕᒻᒥᓗ, ᔫᑎᐊᒦᑦᑐᓕᒫᓂᓗ, ᔫᑎᐅᖏᑦᑐᓂᓗᑦᑕᐅᖅ ᐊᔪᕆᕐᑐᐃᖃᑦᑕᓚᐅᕐᐳᖓ ᐊᔪᕐᓂᕐᒥᖕᓂᑦ ᖃᕿᐊᓕᖁᓪᓗᒋᑦ ᒎᑎᒧᓪᓗ ᓵᒋᐊᖁᓪᓗᒋᑦ, ᖃᕿᐊᓕᕐᓂᕐᒥᖕᓂᒡᓗ ᓇᓗᓁᕐᓯᖁᓪᓗᒋᑦ ᐱᓂᐊᕐᓂᕐᒥᒃᑎᒍᑦ.

²¹ ᑕᒪᓐᓇ ᑕᕝᕙ ᐱᑦᔪᑎᒋᓪᓗᒍ ᔫᑎᑦ ᑎᒍᓚᐅᕐᐹᖓ ᑐᒃᓯᐊᕐᕕᒡᔪᐊᕐᒦᑎᓪᓗᖓ ᑐᖁᑕᐅᓇᓱᐊᓚᐅᕐᐳᖓᓗ.

²² ᒎᑎᐅᓪᓕ ᐃᑲᔪᐃᓐᓇᕐᐹᖓ ᐅᓪᓗᒥᒧᑦ ᑎᑭᓪᓗᒍ, ᒫᓐᓇᓗ ᓇᖏᕐᐳᖓ ᓇᓗᓁᕐᓯᔪᓐᓇᕐᓗᖓ ᐊᑦᔨᒌᒃᑐᒥᒃ ᐃᓄᖕᓄᑦ ᐊᑦᔨᒌᖏᑦᑐᓄᑦ, ᐅᖃᐅᓯᖃᕐᐳᖓ ᓇᓚᐅᑦᑍᔪᑦ ᒨᓯᓯᐅᓪᓗ ᓇᓪᓕᐅᑎᓂᐊᕐᓂᕋᕐᓯᒪᔭᖏᑕ ᐊᓯᐊᒎᖏᑦᑐᓂᒃ.

²³ ᑖᓐᓇ ᙭ᔅᑑᓯ ᐋᓐᓂᐊᕐᑎᑕᐅᔭᕆᐊᖃᓚᐅᕐᒪᑦ ᓯᕗᓪᓕᕐᐹᖑᓪᓗᓂᓗ ᑐᖁᒥᑦ ᒪᑭᓪᓗᓂ; ᐱᐅᓕᔭᐅᓂᐅᑉ ᖃᐅᒻᒤᓂᖓᓂᒃ ᐅᖃᐅᓯᖃᕐᓗᓂ ᐃᓅᖃᑎᒥᓄᑦ ᔫᑎᐅᖏᑦᑐᓄᓪᓗ.”

²⁴ ᐸᐅᓗᓯ ᐸᓯᔭᒃᓴᐅᖏᓐᓂᕐᒥᓂᒃ ᑍᒫᒃ ᓇᓗᓁᕐᓯᑎᓪᓗᒍ, ᕕᓯᑕᓯᐅᑉ ᕾᒐᓛᕐᕕᒋᕚ, “ᐸᐅᓗᓯ, ᐃᓱᒤᕈᑎᓕᕐᑐᑎᑦ; ᐃᓕᓯᒪᓂᐊᓗᖕᓄᑦ ᑐᑭᖃᕈᓐᓃᕐᑎᑕᐅᕗᑎᑦ.”

²⁵ ᐸᐅᓗᓯ ᑭᐅᕗᖅ, “ᐃᓱᒤᕈᑎᓐᖏᓚᖓ, ᐊᖓᔪᖅᑳᖅ ᕕᓯᑕᓰ, ᐅᖃᐅᓯᕆᔭᒃᑲᓕ ᓱᓕᑦᓯᐊᕐᐳᑦ ᑐᑭᖃᑦᓯᐊᕐᓗᑎᒡᓗ.

²⁶ ᐊᖓᔪᖅᑳᕐᔪᐊᖅ ᐊᒍᕆᐸ ᑕᒪᒃᑯᓂᖓ ᖃᐅᔨᒪᑦᓯᐊᕐᒪᑦ ᓯᕘᕋᖏᓪᓗᖓᓗ ᐅᖃᐅᑎᑦᓯᐊᕈᓐᓇᕐᐸᕋ; ᖃᐅᔨᒪᒐᒪ ᑕᒪᒃᑯᓂᖓ ᖃᐅᔨᒪᑦᓯᐊᕐᒪᑦ, ᑕᒪᓐᓇ ᐃᔨᕐᓯᒪᓗᓂ ᐱᓇᓱᐊᕐᑕᐅᖏᒻᒪᑦ.

²⁷ ᐊᖓᔪᖅᑳᕐᔪᐊᖅ ᐊᒍᕆᐹ, ᓇᓚᐅᑦᑍᔪᓂᒃ ᐅᒃᐱᕈᓱᒃᐲᑦ? ᖃᐅᔨᒪᕗᖓ ᐅᒃᐱᕆᒐᕕᒋᑦ.”

²⁸ ᐊᒍᕆᐸ ᐸᐅᓗᓯᒧᑦ ᐅᖃᕐᐳᖅ, “ᑍᒫᒃ ᕿᓚᒻᒥᐅᑎᒋᔪᒦᒃ ᙭ᔅᑑᓯᒥᐅᑕᓐᖑᕐᑎᓐᓂᐊᕋᓱᒋᕕᖓ?”

²⁹ ᐸᐅᓗᓯᐅᑉ ᑭᐅᕚ, “ᕿᓚᒻᒥᐅᒐᓗᐊᕐᐸᑦ, ᐊᑯᓂᐅᒐᓗᐊᕐᐸᓪᓘᓐᓃᑦ, ᒎᑎ ᑐᒃᓯᐊᕐᕕᒋᕙᕋ ᐃᕝᕕᑐᐊᖑᖏᑦᑐᖅ ᓈᓚᒃᑐᓪᓕᑕᐅᖅ ᐅᑯᐊ ᐅᕙᑦᑐᑦ ᑍᒤᓕᖁᒐᓗᐊᕐᐸᑦᓯ, ᕿᓚᒃᓱᕐᑕᐅᓯᒪᖏᓪᓗᑎᒡᓕ ᐅᑯᑎᑐᓇᖅ.”

³⁰ ᐊᖓᔪᖅᑳᕐᔪᐊᖅ ᓂᑯᕕᑉᐳᖅ, ᕉᒪᒥᐅᓄᑦ ᐊᐅᓚᑦᓯᔨᐅᑎᑕᐅᔪᖅ ᐱᕐᓁᓯᓗ, ᐃᒃᓯᕙᖃᑎᓕᒫᖏᓪᓗ ᓂᑯᕕᖃᑕᐅᕗᑦ.

³¹ ᑕᕝᕙᓐᖓᑦ ᐊᓂᒐᒥᒃ, ᐅᖃᖃᑎᒌᓕᕐᐳᑦ, “ᑖᓐᓇ ᐊᖑᑦ ᑐᖁᑕᐅᑦᔪᑎᒃᓴᒥᒃ ᑎᒍᔭᐅᓯᒪᑦᔪᑎᒃᓴᒥᒡᓘᓐᓃᑦ ᐱᓇᓱᐊᕐᓯᒪᖏᓐᓂᕋᕐᓗᒍ.”

³² ᐊᒍᕆᐹᓗ ᕕᓯᑕᓯᒧᑦ ᐅᖃᕐᐳᖅ, “ᑖᓐᓇ ᐊᖑᑦ ᑎᒍᔭᐅᓯᒪᕕᖕᒥᑦ ᐊᓂᑎᑕᒃᓴᐅᓚᐅᕐᑑᒐᓗᐊᖅ ᓰᓴᕆᒧᑦ ᐃᖅᑲᕐᑐᕐᑕᐅᔪᒪᓚᐅᖏᑉᐸᑦ.”