ᐋᐴᓯᑕᓖᑦ ᐱᓂᐊᕐᓂᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᐸᐅᓗᓯᐅᑉ ᐊᑭᕋᕐᑐᕐᑕᐅᓂᖓ ᔫᑎᓂᑦ

¹ ᐅᓪᓗᐃᑦ ᑕᓪᓕᒪᑦ ᐊᓂᒍᕐᑎᓪᓗᒋᑦ ᑐᓂᕐᕈᕐᓯᑎᑦᓯᔩᑦ ᐊᖓᔪᖅᑳᖓᑦ ᐊᓇᓁᐊᓯ ᓯᓴᕆᐊᒧᐊᕐᐳᖅ ᔫᑎᑦ ᐊᖓᔪᖅᑳᖏᑕ ᐃᓚᖏᑦ ᐃᓚᒋᓪᓗᒋᑦ, ᐱᖁᔭᓂᒃ ᐃᓕᓯᒪᔪᖅ ᑖᕐᑐᓛᓯᒥᒃ ᐊᑎᓕᒃ ᐃᓚᒋᓪᓗᒍ. ᑖᒃᑯᐊ ᐸᓯᔭᒃᓴᐅᓂᕅᕗᑦ ᐸᐅᓗᓯᒥᒃ, ᕉᒪᒥᐅᓄᑦ ᐊᐅᓚᑦᓯᔨᐅᑎᑕᐅᔪᒧᑦ ᕖᓕᒃᓯᒧᑦ;

² ᐸᐅᓗᓯᓗ ᕾᖁᔭᐅᒐᒥ, ᑖᕐᑐᓛᓯᐅᑉ ᐸᓯᓕᕐᐹ ᐅᖃᕐᓗᓂ: “ᐊᖓᔪᖅᑳᖅ! ᑕᓯᐅᕐᓯᑦᓯᐊᕐᓂᕐᓄᑦ ᐊᑯᓂᐊᓗᒃ ᓄᓇᒥ ᑕᒫᓂ ᐅᓇᑕᕐᑐᖃᖏᒻᒪᑦ, ᐅᓄᕐᑐᓪᓗ ᐋᖅᑭᒋᐊᕆᐊᓖᑦ ᐋᖅᑭᒋᐊᕐᓯᒪᖕᒪᑕ, ᓄᓇᑦᑕ ᐱᐅᓯᕚᓪᓕᕈᑎᒃᓴᖏᑦ,

³ ᓇᓂᑐᐃᓐᓇᖅ ᑍᒪᓐᖓᑦ ᐊᖓᔪᖅᑳᖅ ᕖᓕᒃᓰ, ᑕᒪᒃᑯᐊ ᑐᓐᖓᒋᑦᓯᐊᕐᐸᕗᑦ ᖁᔭᓕᑦᔪᑎᒋᓪᓗᑎᒍᓗ.

⁴ ᐃᓱᒪᔮᕐᑎᒃᑲᓐᓂᕈᒪᖏᒃᑲᓗᐊᕐᐸᒋᑦ, ᐃᓱᒪᒋᔭᑦᑎᓐᓂᒡᓕ ᑐᓵᖁᒐᓗᐊᕐᐸᑦᑎᒋᑦ.

⁵ “ᐅᓇ ᐊᖑᑦ ᖃᐅᔨᔭᕗᑦ ᐃᓅᖃᑎᒌᓂᒃ ᓱᕋᒃᑎᕆᔨᐅᖕᒪᑦ, ᔫᑎᓂᒃ ᓇᓂᑐᐃᓐᓇᖅ ᐅᐃᒪᔮᕐᑎᑦᓯᕙᒃᓗᓂ, ᐊᖓᔪᖅᑳᕆᔭᐅᔪᕐᓗ ᓈᓴᕇᑎᒥᐅᓄᑦ ᐅᒃᐱᕐᑐᓂᑦ.

⁶ ᑐᒃᓯᐊᕐᕕᒡᔪᐊᕐᒥᒃ ᓇᕐᕈᓇᕐᓯᑎᑦᓯᓇᓱᐊᕐᓯᒪᓪᓗᓂ, ᑍᒫᒃ ᑕᕝᕙ ᑎᒍᓚᐅᕐᐸᕗᑦ, ᐱᖁᔭᕗᑦ ᒪᓕᒡᓗᒋᑦ ᐃᖅᑲᕐᑐᕈᒪᓚᐅᕐᐸᕗᑦ;

⁷ ᐅᓇᑕᕐᑐᒃᓮᓪᓕ ᐊᒐᔪᖅᑳᖓᑦᑕ ᓔᓯᐊᓯᐅᑉ ᐱᔪᓐᓇᕐᓂᕐᒥᓄᑦ ᓱᓇᐅᑎᓐᓇᓂᑎᒍᑦ ᑖᑦᓱᒥᖓ ᐊᕐᓵᓚᐅᕐᐹᑎᒍᑦ.

⁸ ᑭᖑᓂᖓᒍᑦ ᓔᓯᐊᓯ ᐱᖁᔨᓚᐅᕐᐳᖅ ᑖᑦᓱᒪ ᐸᓯᒃᓯᕐᑎᖏᑦ ᐃᓕᖕᓄᐊᖁᓪᓗᒋᑦ, ᐃᕝᕕᓪᓕ ᓇᖕᒥᓂᖅ ᑖᓐᓇ ᐊᐱᕐᓱᕈᕕᐅᒃ ᑐᑭᓯᔪᓐᓇᕐᐳᑎᑦ ᑕᒪᒃᑯᓂᖓ ᑕᒤᓐᓂᒃ ᐸᓯᒃᓯᕈᑎᒋᔭᑦᑎᓐᓂᒃ ᑖᑦᓱᒧᖓ.”

⁹ ᔫᑎᑦ ᑕᒪᑐᒥᖓ ᐸᓯᒃᓯᕈᑎᒋᔭᒥᖕᓂᒃ ᐊᖏᖃᑎᒌᒃᓗᑎᒃ ᓱᓕᓂᕅᕗᑦ.

ᐸᐅᓗᓯᐅᑉ ᐃᒻᒥᓂᒃ ᓴᐳᑎᓇᓱᐊᕐᓂᖓ

¹⁰ ᐊᐅᓚᑦᓯᔨᐅᑎᑕᐅᔫᑦ ᐸᐅᓗᓯ ᐅᖃᖁᓪᓗᓂᐅᒃ ᓇᓗᓁᕐᓯᕕᒋᖕᒪᒍ, ᐸᐅᓗᓯ ᐅᖃᓕᕐᐳᖅ, “ᖃᐅᔨᒪᕗᖓ ᐊᕐᕌᒍᓂᒃ ᐊᒥᓱᓂᒃ ᐋᖅᑭᒃᓱᐃᔨᒋᔭᐅᓕᕋᕕᑦ ᐃᓅᖃᑎᒌᒡᔪᐊᓄᑦ ᑕᒫᓃᑦᑐᓄᑦ, ᒫᓐᓇ ᖁᕕᐊᓱᒡᓗᖓ ᐅᕙᓐᓂᒃ ᓴᐳᑎᓇᓱᐊᕈᑎᓐᓂᒃ ᐅᖃᕐᓂᐊᕐᐳᖓ.

¹¹ ᒫᓐᓇᓗ ᑐᑭᓯᑎᑕᐅᑦᓯᐊᕈᓐᓇᕋᕕᑦ, ᐅᓪᓗᐃᑦ 12 ᐅᖓᑖᓂᐅᖏᑦᑐᖅ ᔨᕉᓴᓕᒻᒧᐊᓚᐅᕐᐳᖓ ᑐᒃᓯᐊᕆᐊᕐᑐᕐᓗᖓ;

¹² ᐅᕙᓐᓂᒃ ᐸᓯᒃᓯᕐᑐᑦ ᖃᐅᔨᓚᐅᓐᖏᓚᑦ ᐂᕙᖃᑎᖃᓚᐅᕐᒪᖔᕐᒪᓘᓐᓃᑦ ᑐᒃᓯᐊᕐᕕᒡᔪᐊᕐᒥ, ᐃᓄᖕᓂᒡᓘᓐᓃᑦ ᐅᐃᒪᔮᕐᑎᑦᓯᓚᐅᕐᒪᖔᕐᒪ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ, ᓄᓇᓕᖕᓂᓘᓐᓃᑦ ᓇᓂᑐᐃᓐᓇᖅ.

¹³ ᑖᒃᑯᐊ ᒫᓐᓇ ᐃᓕᖕᓄᑦ ᓇᓗᓁᕐᓯᒻᒪᕆᒍᓐᓇᓐᖏᓚᑦ ᐸᓯᒃᓯᕈᑎᒋᔭᒥᖕᓂᒃ ᐅᕙᓐᓂᒃ.

¹⁴ ᐊᓐᖏᒍᑎᔪᒪᓐᖏᓚᒋᑦ; ᓯᕗᓕᕕᓂᑦᑕ ᒎᑎᖓ ᑐᒃᓯᐊᕐᕕᒋᕙᒃᐸᕋ, ᒫᓐᓇ ᐊᑕᓂᕐᒧᑦ ᒪᓕᒡᑎᐅᓂᕐᒥᒃ ᐃᓚᐅᕗᖓ, ᑖᒃᑯᐊ ᓱᓕᖏᑦᑐᒧᑦ ᐅᒃᐱᕈᓯᐅᓂᕋᕐᑕᖓᓐᓄᑦ, ᐅᒃᐱᕈᓱᑦᓯᐊᕐᐳᖓ ᒨᓯᓯᐅᑉ ᐱᖁᔭᖏᓐᓂᒃ, ᓇᓚᐅᑦᑍᔪᓪᓗ ᐊᒡᓚᖏᓐᓂ ᑎᑎᕋᕐᓯᒪᔪᓂᒃ,

¹⁵ ᓂᕆᐅᖕᓂᖃᕐᐳᖓᓗ ᒎᑎᒥᑦ ᑖᒃᑯᐊ ᓂᕆᐅᖕᓂᕆᔭᖏᑕ ᐊᑦᔨᖓᓂᒃ, ᑐᖁᒥᓪᓗ ᒪᑭᓐᓂᖃᕈᒫᕐᒪᑦ ᑕᒤᓐᓄᑦ ᓇᓛᒎᕐᑐᓄᑦ ᓇᓛᒎᖏᑦᑐᓄᓪᓗ.

¹⁶ ᑍᒪᓐᖓᑦ ᐱᓇᓱᐊᕐᐳᖓ ᐃᓱᒪᒃᑯᑦ ᐸᓯᔭᒃᓴᐅᔪᒪᓇᖓ ᒎᑎᒧᑦ, ᐃᓄᖕᓄᓪᓗ.

¹⁷ “ᐊᕐᕌᒍᓂᒃ ᐊᒥᓱᓂᒃ ᐊᐅᓪᓚᕐᓯᒪᓚᐅᕐᓗᖓ ᔨᕉᓴᓕᒻᒧᑦ ᐅᑎᓚᐅᕐᐳᖓ, ᐃᓅᖃᑎᒃᑲ ᐊᔪᕐᓴᕐᑐᑦ ᑮᓇᐅᔭᓂᒃ ᑐᓂᓯᕕᒋᔭᕐᑐᕐᓗᒋᑦ, ᑐᓂᕐᕈᓯᕆᐊᑐᕐᓗᖓᓗ ᑐᒃᓯᐊᕐᕕᒡᔪᐊᒥ.

¹⁸ ᔫᑎᑦ ᐅᒃᐱᕐᓂᖓᑦ ᒪᓕᒡᓗᒍ ᓴᓗᒻᒪᕐᓴᕐᑕᐅᑎᓪᓗᖓ ᑐᒃᓯᐊᕐᕕᒡᔪᐊᑉ ᐃᓗᐊᓂ, ᑖᒃᑯᓇᓐᖓᑦ ᖃᐅᔨᔭᐅᓚᐅᕐᐳᖓ; ᐃᓄᒋᐊᒃᑐᓂᒃ ᐃᓚᖃᓚᐅᓐᖏᓚᖓ, ᐅᐃᒪᔮᕐᑐᖃᓚᐅᓐᖏᓚᕐᓘᓐᓃᑦ.

¹⁹ ᔫᑎᓪᓕ ᐂᓯᐊᒥᐅᑦ ᑕᕝᕙᓃᓚᐅᕆᕗᑦ, ᑍᒃᑯᐊ ᐸᓯᒃᓯᕈᑎᒃᓴᖃᕈᑎᒃ ᐅᕙᓐᓄᑦ ᐅᖃᐅᓯᖃᕐᑐᒃᓴᐅᒐᓗᐊᕆᕗᑦ ᐃᓕᖕᓄᑦ ᒫᓐᓇ.

²⁰ ᐅᕝᕙᓘᓐᓃᑦ ᐅᑯᐊ ᐅᕙᓃᑦᑐ ᒫᓐᓇ ᓇᓗᓁᕐᓯᔪᒃᓴᐅᕗᑦ ᖃᐅᔨᓯᒪᔭᒥᖕᓂᒃ ᔫᑎᑦ ᐃᖅᑲᕐᑐᐃᔨᕐᔪᐊᖏᓐᓄᑦ ᐃᖅᑲᕐᑐᕐᑕᐅᑎᓪᓗᖓ ᓱᓇᒥᒃ ᐸᓯᔭᒃᓴᐅᑦᔪᑎᖃᓚᐅᕐᒪᖔᕐᒪ.

²¹ ᑭᓯᐊᓂ ᑍᒪ ᐸᓯᒃᓯᕈᑎᒋᒐᔭᕐᑕᖓᑦ ᐅᖃᐅᓯᕆᓚᐅᕐᑕᕋ ᑖᒃᑯᓄᖓ ᐃᒫᒃ, ‘ᒫᓐᓇ ᐃᖅᑲᕐᑐᕐᐸᑦᓯᓐᖓ ᐅᒃᐱᕈᓱᖕᓂᓐᓄᑦ ᑐᖁᖓᔪᑦ ᒪᑭᑦᓱᒫᕐᓂᖏᓐᓂᒃ.’”

²² ᕖᓕᒃᓯ ᐊᑕᓂᕐᒧᑦ ᒪᓕᒡᑎᐅᓂᕐᒥᒃ ᑐᓴᐅᒪᑦᓯᐊᕋᒥ ᑐᓴᕋᓱᐊᕐᓂᓂ ᑖᒃᑯᓇᓐᖓᑦ ᓄᖅᑲᕐᑎᑉᐹ, ᐅᖃᕐᓗᓂ, “ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᓔᓯᐊᓯ ᑎᑭᑉᐸᑦ, ᖃᓄᐃᓕᖓᓛᕐᒪᖔᕐᐱᑦ ᑐᑭᓯᓛᕐᐳᖓ.”

²³ ᐅᓇᑕᕐᑐᒃᓴᓄᑦ ᐊᖓᔪᖅᑳᕆᔭᐅᔪᒧᑦ ᑲᒪᒋᔭᐅᖁᕚ, ᐱᕕᒃᓴᖃᕐᑎᑉᐹ ᐃᓱᒤᓐᓇᕐᕆᕕᒃᓴᖃᖁᓪᓗᒍ, ᐃᓚᓐᓈᕆᔭᖏᓐᓄᓪᓗ ᐅᐸᒃᓯᒪᔭᐅᔪᓐᓇᕐᑎᑉᐹ ᐱᔭᕆᐊᖃᕐᑕᖏᓐᓂᒡᓗ ᐱᑎᑕᐅᔪᓐᓇᕐᑎᓪᓗᓂᐅᒃ.

ᐸᐅᓗᓯᐅᑉ ᐅᖃᓪᓚᖕᓂᖓ ᕖᓕᒃᓯᐅᑉ ᑐᕉᓯᓚᐅᓪᓗ ᓵᖓᓂ

²⁴ ᐅᓪᓗᒐᓔᑦ ᐊᓂᒍᕐᑎᓪᓗᒋᑦ ᕖᓕᒃᓯᐅᑉ ᓄᓕᐊᓂ ᑐᕉᓯᓚ ᔫᑎᐅᔪᖅ ᐱᖃᑎᒋᓪᓗᒍ ᑎᑭᑉᐴᒃ; ᐸᐅᓗᓯ ᕾᑕᐅᖁᕚ, ᑐᓵᔪᒪᓪᓗᓂ ᐅᖃᓪᓚᒃᑎᓪᓗᒍ ᐅᒃᐱᕐᕕᖃᕐᓂᕐᒥᒃ ᙭ᔅᑑᓯ ᔩᓱᓯᒥᒃ.

²⁵ ᐸᐅᓗᓯ ᓇᓗᓇᕈᓐᓁᕐᑎᑦᓯᕗᖅ ᓇᓛᒎᑦᓯᐊᕐᓂᕐᒥᒃ ᓇᖕᒥᓂᕐᓗ ᐱᓯᒪᑦᓯᐊᕈᓐᓇᕐᓂᕐᒥᒃ, ᐃᖅᑲᕐᑐᕐᑕᐅᔪᒫᕐᓂᕐᒥᒃ, ᕖᓕᒃᓯ ᓯᕘᕋᓕᕐᓗᓂ ᐅᖃᕐᐳᖅ, “ᒫᓐᓇ ᐊᓂᑲᓚᐅᕆᑦ; ᐱᕕᒃᓴᑖᑲᓐᓂᕈᑦᑕ ᕾᖁᓛᕆᕙᒋᑦ.”

²⁶ ᕖᓕᒃᓯ ᐃᓱᒪᖃᕐᐳᖅ ᐸᐅᓗᓯᒥᑦ ᑮᓇᐅᔭᓂᒃ ᑐᓂᓯᕕᐅᓂᐊᕋᓱᒋᓪᓗᓂ; ᑕᒪᓐᓇ ᐱᓪᓗᒍ ᐸᐅᓗᓯ ᕾᖁᖃᑦᑕᕐᐹ ᐅᖃᖃᑎᒋᕙᒃᓗᓂᐅᒃ.

²⁷ ᐊᕐᕌᒎᒃ ᒪᕐᕉᒃ ᐊᓂᒍᕐᑎᓪᓗᒋᒃ, ᕖᓕᒃᓯ ᑭᖑᕝᕕᕐᑕᐅᕗᖅ ᐴᑭᐅᓯ ᕕᓯᑕᓯᒧᑦ; ᕖᓕᒃᓯ ᔫᑎᓄᑦ ᐊᑲᐅᒋᔭᐅᔪᒪᒐᒥ, ᐸᐅᓗᓯ ᑎᒍᔭᐅᓯᒪᕕᖕᒦᑏᓐᓇᕐᐹ.