ᐋᐴᓯᑕᓖᑦ ᐱᓂᐊᕐᓂᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐸᐅᓗᓯ ᔫᑎᑦ ᐃᖅᑲᕐᑐᐃᔨᕐᔪᐊᖏᓐᓄᑦ ᑕᑯᓴᓪᓗᐊᕐᓗᓂ ᐅᖃᐅᑎᕔᑦ, “ᔫᑎᐅᖃᑎᒃᑳ, ᐃᓅᓚᐅᕐᐳᖓ ᐃᓅᓯᕆᔭᓐᓂ ᒎᑎᐅᑉ ᓵᖓᓂ ᐃᓱᒫᓗᑎᒃᓴᖃᕐᓇᖓ ᐃᓱᒪᒃᑯᑦ ᐅᓪᓗᒥᒧᑦ ᑎᑭᓪᓗᒍ.”

² ᑍᒤᓕᖕᒪᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐊᓇᓁᐊᓯᐅᑉ, ᐸᐅᓗᓯ ᓴᓂᐊᓃᑦᑐᓄᑦ ᖃᓂᕈᕐᑕᐅᖁᕚ.

³ ᐸᐅᓗᓯᐅᑉ ᐅᖃᐅᑎᕚ, “ᒎᑎᐅᑦᑕᐅᖅ ᐊᓇᐅᓂᐊᕆᕚᑎᑦ, ᓱᓕᓐᖑᐊᕐᑐᐊᓘᔪᑎᑦ! ᑕᕝᕙᓂ ᐃᒃᓯᕙᔪᑎᑦ ᐱᖁᔧᑦ ᒪᓕᒡᓗᒋᑦ ᐅᕙᓐᓂᒃ ᐃᖅᑲᕐᑐᐃᔭᕆᐊᖃᕋᕕᑦ, ᐱᖁᔧᑦ ᒪᓕᖕᓇᒋᑦ ᖃᓂᕈᕐᑕᐅᖁᕙᕐᒪ.”

⁴ ᐸᐅᓗᓯᐅᑉ ᓴᓂᐊᓂ ᓇᖏᕐᑐᑦ ᐅᖃᕐᐳᑦ, “ᓱᔪᐊᓘᕕᑦ, ᑐᓂᕐᕈᓯᕐᑎᑦᓯᔨᓄᑦ ᒎᑎᐅᑉ ᐊᖓᔪᖅᑳᖁᑎᖓ ᐅᖃᕐᓂᕐᓗᒡᕕᒋᕕᐅᒃ?”

⁵ ᐸᐅᓗᓯ ᐅᖃᕐᐳᖅ, “ᐃᓚᒃᑳ, ᖃᐅᔨᒪᕋᑖᖏᓐᓇᒪ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕆᔭᐅᖕᒪᖔᑦ; ᑎᑎᕋᕐᓯᒪᖕᒪᑦ: ᐃᓅᖃᑎᕕᑦ ᐊᐅᓚᑦᓯᔨᒋᔭᖏᓐᓄᑦ ᐅᖃᐅᓯᕐᓗᒃᑐᒃᓴᐅᓐᖏᓚᑎᑦ.”

⁶ ᐸᐅᓗᓯ ᖃᐅᔨᒪᒐᒥ, ᐃᓚᖏᑦ ᓵᑦᔪᓰᐅᖕᒪᑕ ᐃᓚᖏᓪᓗ ᐹᕆᓯᐅᖕᒪᑕ, ᐃᖅᑲᕐᑐᐃᔨᕐᔪᐊᓄᑦ ᐅᖃᕐᐳᖅ, “ᐃᓚᒃᑳ, ᐹᕆᓯᐅᕗᖓ, ᐹᕆᓯᒧᑦ ᐃᕐᓂᕆᔭᐅᕗᖓ; ᒫᓐᓇ ᓇᖏᕐᐳᖓ ᐃᖅᑲᕐᑐᕐᑕᐅᓪᓗᖓ, ᓂᕆᐅᒋᔭᖃᕐᓂᕋ ᐱᑦᔪᑎᒋᓪᓗᒍ ᑐᖁᖓᔪᑦ ᒪᑭᑦᓱᒫᕐᓂᖏᓐᓂᒃ.”

⁷ ᑍᒫᒡ ᐅᖃᕐᒪᑦ, ᐹᕆᓯᑦ ᓵᑦᔪᓰᓪᓗ ᐂᕙᖃᑎᒌᓕᕐᐳᑦ; ᑲᑎᒪᔪᑦ ᐊᕕᒃᓗᑎᒃ ᒪᕐᕈᐃᓕᕗᑦ.

⁸ ᓵᑦᔪᓰᑦ ᐅᖃᕐᒪᑕ ᒪᑭᕝᕕᒃᓴᖃᖏᓐᓂᕅᓪᓗᑎᒃ, ᐂᖏᓖᖃᖏᓐᓂᕅᓪᓗᑎᒡᓗ ᐊᓂᕐᓂᕐᑕᖃᖏᓐᓂᕅᓪᓗᑎᒡᓗ, ᐹᕆᓯᓪᓕ ᐅᖃᕐᒪᑕ ᑖᒃᑯᓂᖓ ᑍᒤᓐᓂᒃ ᐱᑕᖃᕐᓂᕅᓪᓗᑎᒃ.

⁹ ᑖᒃᑯᐊ ᓂᐱᖅᑯᕐᑐᔪᐊᓘᓕᕐᐳᑦ ᐱᖁᔭᓂᒡᓗ ᐃᓕᓮᔩᑦ ᐹᕆᓯᓄᑦ ᐃᓚᒋᔭᐅᔪᑦ ᓇᖏᕐᓯᓪᓗᑎᒃ ᓵᓚᖃᕆᐊᓪᓚᕆᒡᓗᑎᒃ ᐅᖃᕐᐳᑦ, “ᐃᓅᑉ ᑖᑦᓱᒪ ᓈᒻᒪᖏᑦᔪᑎᖓᓂᒃ ᓇᓂᓯᓐᖏᓚᒍᑦ. ᐃᒻᒪᖄᓕ ᐂᖏᓕᒧᑦ ᐊᓂᕐᓂᕐᒧᓪᓘᓐᓃᑦ ᐅᖃᕐᕕᐅᓐᓂᕐᐳᖅ.”

¹⁰ ᐂᕙᔪᑦ ᑲᑉᐱᐊᓇᕐᓯᖕᒪᑕ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐊᑦᑕᕈᓱᓕᕋᒥ ᐸᐅᓗᓯ ᐊᓕᒃᑐᕐᑕᐅᓂᐊᕋᓱᒋᓪᓗᒍ ᑖᒃᑯᓄᖓ, ᐅᓇᑕᕐᑐᒃᓴᖁᑎᓂ ᑎᓕᕔᑦ, ᐸᐅᓗᓯᒥᒃ ᐂᒃᓯᖁᓪᓗᒋᑦ, ᐋᑕᐅᖁᓪᓗᒍ ᐅᓇᑕᕐᑐᒃᓮᑦ ᐃᒡᓗᖓᓐᓄᑦ.

¹¹ ᐅᓐᓄᐊᖑᓕᕐᑎᓪᓗᒍᓕ ᐸᐅᓗᓯᐅᑉ ᓴᓂᐊᓂ ᐊᑕᓂᖅ ᓇᖏᕐᓗᓂ ᐅᖃᕐᐳᖅ, “ᓯᕘᕋᓂᐊᕐᓇᒃ, ᔨᕉᓴᓕᒻᒥ ᐅᖃᐅᓯᖃᓚᐅᕋᕕᑦ ᐅᕙᓐᓂᒃ, ᑍᒫᒃᑕᐅᖅ ᕉᒪᒥ ᐅᖃᐅᓯᕆᔭᕆᐊᖃᕆᕙᕐᒪ.”

ᐸᐅᓗᓯᐅᑉ ᐃᔨᕋᕐᑐᕐᑐᓄᑦ ᑐᖁᑕᐅᓇᓱᐊᕐᓂᖓ

¹² ᖃᐅᑎᓪᓗᒍ ᐅᓪᓛᒃᑯᑦ, ᔫᑎᑦ ᑲᑎᒪᕗᑦ ᐊᖏᖃᑎᒌᒍᑎᓕᐅᕐᐳᓪᓗ ᓱᓕᒻᒪᕆᒡᓗᑎᒃ ᓂᕆᔪᒪᓇᑎᒃ ᐃᒥᕈᒪᓇᑎᒡᓗ ᐸᐅᓗᓯᒥᒃ ᑐᖁᑦᓯᓚᐅᖏᓐᓂᕐᒥᖕᓂ.

¹³ ᑖᒃᑯᐊᓗ ᐊᖏᖃᑎᒌᒃᑐᑦ ᐊᖑᑎᑦ 40 ᐅᖓᑖᓂᑉᐳᑦ.

¹⁴ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᓐᓄᐊᕐᐳᑦ ᔫᑎᓪᓗ ᐊᖓᔪᖅᑳᖏᓐᓄᑦ ᐅᖃᕐᓗᑎᒃ, “ᓴᖑᑎᓐᓂᐊᓐᖏᑕᑦᑎᓐᓂᒃ ᐊᖏᖃᑎᒌᒃᐳᒍᑦ ᓂᕆᔪᒪᓇᑕ ᓱᓇᑐᐃᓐᓇᕐᒥᒃ ᐸᐅᓗᓯᒥᒃ ᑐᖁᑦᓯᓚᐅᖏᓐᓂᑦᑎᓐᓂ.

¹⁵ ᑍᒤᒻᒪᑦ ᔫᑎᓄᑦ ᐃᖅᑲᕐᑐᐃᔨᐅᔪᓯ ᐱᖁᔨᓚᐅᕆᑦᓯ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ, ᐸᐅᓗᓯ ᓵᑦᓯᓐᓂ ᐊᐱᕐᓱᕈᒪᓂᕋᕐᓗᒍ ᑐᓴᕐᕕᒋᑦᓯᐊᒃᑲᓐᓂᕈᒪᓐᖑᐊᕐᓗᒍᓗ. ᐅᕙᒍᓪᓕ ᐅᐸᓗᖕᒊᕐᓯᒪᓂᐊᕐᐳᒍᑦ ᑐᖁᑦᓱᒪᓪᓗᒍ ᑕᕝᕗᖓ ᑎᑭᓚᐅᖏᓐᓂᖓᓂ.”

¹⁶ ᐸᐅᓗᓯᐅᓪᓕ ᐅᔪᕈᖓ ᑐᖁᑦᓯᔪᒪᔪᓂᒃ ᑐᓴᕋᒥ: ᐅᓇᑕᕐᑐᒃᓮᑦ ᐃᒡᓗᖓᓐᓄᐊᕐᐳᖅ ᐸᐅᓗᓯᓗ ᐅᖃᐅᑎᓪᓗᓂᐅᒃ.

¹⁷ ᐸᐅᓗᓯ ᐅᓇᑕᕐᑐᒃᓮᑦ ᐊᖓᔪᖅᑳᖏᑕ ᐃᓚᖓᓐᓂᒃ ᐅᖃᐅᑦᔨᕗᖅ, “ᐅᓇ ᐃᓅᓱᒃᑐᖅ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᐊᕈᑎᓯᐅᒃ, ᐅᖃᐅᓯᒃᓴᖃᕐᒪᑦ ᑖᑦᓱᒧᖓ.”

¹⁸ ᑕᕝᕙ ᑖᑦᓱᒪ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᑦ ᐋᑉᐹ ᐅᖃᕐᓗᓂ, “ᑎᒍᔭᐅᓯᒪᔫᑉ ᐸᐅᓗᓯᐅᑉ ᐅᓇ ᐃᓅᓱᒃᑐᖅ ᐃᓕᖕᓄᐊᕐᑎᑕᐅᖁᖕᒪᒍ, ᐅᖃᐅᓯᒃᓴᖃᕐᒪᒡᒎᖅ ᐃᓕᖕᓄᑦ.”

¹⁹ ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐃᓅᓱᒃᑐᖅ ᐊᒡᒐᖏᑎᒍᑦ ᑎᒍᓪᓗᒍ ᐃᓄᑑᖃᑎᒋᓕᕐᓗᒍ ᐊᐱᕆᕚ, “ᖃᓄᖅ ᐅᕙᓐᓄᑦ ᐅᖃᐅᓯᒃᓴᖃᕋᕖᑦ?”

²⁰ ᐃᓅᓱᒃᑐᖅ ᐅᖃᕐᐳᖅ, “ᔫᑎᑦ ᐊᐅᓚᑦᓯᔨᖏᑦ ᐊᖏᖃᑎᒌᒃᓯᒪᕗᑦ ᖃᐅᒃᐸᑦ ᐃᓕᖕᓄᑦ ᐅᖃᕈᒪᓪᓗᑎᒃ ᐸᐅᓗᓯ ᔫᑎᑦ ᐃᖅᑲᕐᑐᐃᔨᖏᓐᓄᑦ ᐋᑕᐅᖁᓪᓗᒍ, ᑖᒃᑯᐊ ᓱᓕᓇᑎᒃ ᑐᓴᒃᑲᓐᓂᕈᒪᓐᖑᐊᕐᓂᐊᕐᐳᑦ ᐸᐅᓗᓯᒥᒃ.

²¹ ᐊᖏᕐᑍᓕᒃᑭᑦ; 40ᓂᑦ ᐅᓄᕐᓂᕐᓴᓂᒃ ᐅᑕᖅᑭᔪᖃᕐᒪᑦ ᑍᑯᓐᖓᐅᑦᔭᐅᓕᕐᑎᓪᓗᒍ ᑐᖁᑦᓯᔪᒪᓪᓗᑎᒃ ᐅᐸᓗᖕᒊᕐᓯᒪᔪᓂᒃ, ᑖᒃᑯᐊ ᓴᖑᑎᓐᓂᐊᓐᖏᑕᒥᖕᓂᒃ ᐊᖏᖃᑎᒌᒃᓯᒪᕗᑦ ᓂᕆᔪᒪᓇᑎᒃ ᐃᒥᕈᒪᓇᑎᒡᓗ ᐸᐅᓗᓯᒥᒃ ᑐᖁᑦᓯᓚᐅᖏᓐᓂᕐᒥᖕᓂ; ᒫᓐᓇᓕ ᐅᑕᖅᑭᓕᕐᐳᑦ, ᐊᖏᕐᓂᐊᕐᒪᖔᕐᐱᑦ.”

²² ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐊᓂᑎᓕᕋᒥᐅᒃ, ᐅᖃᕐᐳᖅ, ᐃᓅᓱᒃᑐᒧᑦ, “ᓇᒧᑐᐃᓐᓇᖅ ᐅᖃᕐᑍᓕᒋᑦ ᑕᒪᑐᒥᖓ ᐅᕙᓐᓄᑦ ᐅᖃᕐᓂᕋᕐᓗᑎᑦ.”

ᐸᐅᓗᓯᐅᑉ ᐊᐅᓪᓚᕈᑦᔭᐅᓂᖓ ᕉᒪᒧᑦ

²³ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᖕᓂᒃ ᒪᕐᕉᖕᓂᒃ ᕾᖁᔨᕗᖅ ᐅᖃᐅᑎᓪᓗᒋᑦ, “ᐅᓇᑕᕐᑐᒃᓴᓂᒃ 200ᓂᒃ ᐸᕐᓇᒃᑎᑦᓯᓕᕆᑦᓯᒃ 70ᓂᒡᓗ ᕿᒧᒃᓯᐅᑎᓂ ᐃᑭᒪᓂᐊᕐᑐᓂᒃ, 200ᓂᒡᓗ ᐅᓇᑕᕐᑐᒃᓴᓂᒃ ᐱᓱᖕᓂᐊᕐᑐᓂᒃ, ᒫᓐᓇ ᐅᓐᓄᒃ 9ᒨᕐᐸᑦ ᓯᓴᕆᐊᒧᑦ ᐊᐅᓪᓚᕐᓂᐊᕐᑐᓂᒃ.

²⁴ ᕿᒧᒃᓯᐅᑎᓂᒃᑕᐅᖅ ᐸᐅᓗᓯᐅᑉ ᐊᑐᕐᓂᐊᕐᑕᖏᓐᓂᒃ ᖃᓄᐃᖏᓪᓗᓂ ᕉᒪᒥᐅᑦ ᐊᐅᓚᑦᓯᔨᐅᑎᑕᖓᓄᑦ ᕖᓕᒃᓯᒧᑦ ᓯᕗᒧᖁᓪᓗᒍ.”

²⁵ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑎᑎᕋᕐᐳᖅ ᐃᒫᒃ:

²⁶ “ᑲᓚᐅᑎᐊᓯ ᓔᓯᐊᓯᒥᑦ, ᐊᐅᓚᑦᓯᔨᐅᑎᑕᐅᔪᒧᑦ ᕖᓕᒃᓯᒧᑦ; ᑎᑎᕋᕐᕕᒋᕙᒋᑦ.

²⁷ ᐅᓇ ᐊᖑᑦ ᔫᑎᓂᑦ ᑎᒍᔭᐅᔪᖅ, ᑐᖁᑕᐅᑲᓴᓕᕐᒪᑦ, ᐅᕙᖓ ᐅᓇᑕᕐᑐᒃᓴᖁᑎᒃᑲᓗ ᓴᐳᑎᓚᐅᕐᐸᕗᑦ, ᖃᐅᔨᓪᓗᑕ ᕉᒪᒥᐅᑕᐅᓂᖓᓂᒃ.

²⁸ ᖃᐅᔨᔪᒪᓪᓗᖓ ᓱᖕᒪᑦ ᐸᓯᔭᐅᖕᒪᖔᑦ, ᔫᑎᑦ ᐃᖅᑲᕐᑐᐃᔨᖏᓐᓄᑦ ᐱᑎᓚᐅᕐᐸᕋ.

²⁹ ᖃᐅᔨᓚᐅᕐᐳᖓ ᔫᑎᑦ ᐱᖁᔭᖏᑦ ᐱᑦᔪᑎᒋᓪᓗᒋᑦ, ᐸᓯᔭᐅᑦᔪᑎᖃᓚᐅᕐᒪᑦ, ᐸᓯᔭᐅᑦᔪᑎᖓᓕ ᖃᐅᔨᓚᐅᕐᐸᕋ ᑐᖁᑕᐅᓂᕐᒧᑦ ᐱᑦᔪᑎᒃᓴᐅᖏᒻᒪᑦ ᑎᒍᔭᐅᓯᒪᓂᕐᒧᓪᓘᓐᓃᑦ.

³⁰ ᐅᖃᐅᑦᔭᐅᒐᒪᓕ ᑍᒃᑯᓇᖓᑦ ᑐᖁᑕᐅᓇᓱᐊᕈᒪᓂᖓᓂᒃ, ᑐᐊᕕᕐᓗᖓ ᐃᓕᖕᓄᐊᕐᑎᑉᐸᕋ, ᐸᓯᒃᓯᕋᓱᐊᕐᑐᑦ ᑖᑦᓱᒥᖓ ᐃᓕᖕᓄᑦ ᓇᖕᒥᓂᖅ ᓇᓗᓁᕐᓯᖁᓪᓗᒋᑦ.”

³¹ ᑕᕝᕙ ᐅᓇᑕᕐᑐᒃᓮᑦ ᐱᖁᔭᐅᓂᑎᒃ ᒪᓕᒡᓗᒍ, ᐸᐅᓗᓯ ᐅᓐᓄᐊᒃᑯᑦ ᐊᐅᓪᓚᕈᑎᕚᑦ, ᐋᓐᑎᐹᑐᕇᓯᒧᐊᕈᑎᓪᓗᒍ.

³² ᖃᐅᑎᓪᓗᒍ ᐅᓇᑕᕐᑐᒃᓴᓄᑦ ᕿᒧᒃᓯᐅᑎᓃᑦᑐᓄᑦ, ᐋᑕᐅᖁᕚ, ᐅᓇᑕᕐᑐᒃᓮᑦ ᐱᓱᒃᑐᑦ ᐅᑎᕐᐳᑦ ᐅᓇᑕᕐᑐᒃᓮᑦ ᐃᒡᓗᖓᓐᓄᑦ.

³³ ᑖᒃᑯᐊ ᓯᓴᕆᐊᒧᐊᕈᑎᕚᑦ, ᕉᒪᒥᐅᑦ ᐊᐅᓚᑦᓯᔨᐅᑎᑕᖓᓐᓄᑦ ᑎᑎᖅᑬᑦ ᑐᓂᓪᓗᒋᑦ, ᐸᐅᓗᓯᓗᑦᑕᐅᖅ ᑖᑦᓱᒧᓐᖓᐅᑎᕚᑦ.

³⁴ ᕉᒪᒥᐅᑦ ᐊᐅᓚᑦᓯᔨᐅᑎᑕᖓᑕ ᑎᑎᖅᑬᑦ ᐅᖃᓕᒫᕇᕋᒥᒋᑦ, ᐸᐅᓗᓯ ᓇᓂ ᓄᓇᖃᕐᒪᖔᑦ ᐊᐱᕆᕗᖅ. ᑐᑭᓯᒐᒥ ᐸᐅᓗᓯ ᓯᓕᓯᐊᒥᑦ ᐱᓯᒪᖕᒪᑦ,

³⁵ ᐅᖃᕐᐳᖅ, “ᐸᓯᒃᓯᕐᑎᒋᔭᑎᑦ ᑎᑭᑉᐸᑕ ᑐᓴᕐᕕᒋᓇᓱᐊᕐᓂᐊᕐᐸᒋᑦ.” ᐸᐅᓗᓯ ᐅᓇᑕᕐᑐᒃᓴᓄᑦ ᑲᒪᒋᔭᐅᑦᓯᐊᖁᕚ ᐃᕉᑕᓯᐅᑉ ᐃᒡᓗᕐᔪᐊᖓᓂ.