ᐋᐴᓯᑕᓖᑦ ᐱᓂᐊᕐᓂᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐃᓅᖃᑎᒌᖑᔪᓯ ᐊᖓᔪᒃᖠᐅᔪᓯᓗ, ᐅᕙᓐᓂᒃ ᑐᑭᓯᔭᐅᑎᓐᓇᓱᐊᕐᑎᓪᓗᖓ, ᓈᓚᓚᐅᕐᓯᓐᖓ.”

² ᐃᓄᐃᑦ ᑐᓴᕋᒥᒃ ᐄᑉᕉᑎᑐᑦ ᐅᖃᕐᒪᑦ, ᓂᐱᖃᖏᑦᓯᐊᓕᕐᐳᑦ; ᐸᐅᓗᓯ ᐅᖃᓪᓚᓕᕐᐳᖅ:

³ “ᔫᑎᐅᕗᖓ, ᑖᕐᓱᓯᒥ ᓯᓕᓯᐊᒦᑦᑐᒥ ᐃᓅᓕᕐᓯᒪᔪᖓ, ᔨᕉᓴᓕᒻᒥ ᑕᕝᕙᓂ ᐱᕈᓚᐅᕐᐳᖓ, ᒐᒤᓕᐊᓕᒧᑦ ᐃᓕᓐᓂᐊᕐᑎᒋᔭᐅᓪᓗᖓ, ᐃᓕᓐᓂᐊᕐᑎᑕᐅᑦᓯᐊᓚᐅᕐᐳᖓ ᓯᕗᓕᕕᓂᑦᑕ ᐱᖁᔭᖏᓐᓂᒃ, ᑲᔪᖏᕐᓂᖃᓚᐅᕐᐳᖓᓗ ᒎᑎᒧᑦ ᓲᕐᓗᑦᑕᐅᖅ ᐅᓄᕐᑑᓪᓗᓯ ᑍᒤᒃᑲᑦᓯ ᒫᓐᓇ.

⁴ ᐊᑭᕋᕐᑐᓚᐅᕐᐸᒃᑲ ᒫᓐᓇᐅᓕᕐᑐᖅ ᐅᒃᐱᕐᓂᐅᔪᒧᑦ ᒪᓕᒃᑐᑦ ᑐᖁᑕᐅᖁᓪᓗᒋᑦ, ᑎᒍᓯᕙᓚᐅᕐᐳᖓ ᐊᖑᑎᓂᒃ ᐊᕐᓇᓂᒡᓗ ᑎᒍᔭᐅᓯᒪᕕᖕᒧᐊᕐᑕᐅᖁᓪᓗᒋᑦ.

⁵ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ, ᔫᑎᓪᓗ ᐊᖓᔪᖅᑳᓕᒫᖏᑦ ᓇᓗᓁᕐᓯᔪᓐᓇᕐᐳᑦ ᑕᒪᑐᒥᖓ. ᑍᒃᑯᓇᓐᖓᑦ ᐊᒡᓛᑦ ᑎᑎᖅᑲᓂᒃ ᑎᒍᓯᔪᓐᓇᕈᑎᒃᓴᓂᒃ ᓇᒃᓴᕐᑎᑕᐅᓚᐅᕐᐳᖓ ᔫᑎᐅᖃᑎᒥᖕᓄᑦ ᑕᒫᓯᑰᓯᒦᑦᑐᓄᑦ, ᑍᑯᓐᖓᓚᐅᕐᐳᖓᓗ ᐅᒃᐱᕐᑐᑦ ᑎᒍᔭᕐᑐᕐᓗᒋᑦ ᔨᕉᓴᓕᒻᒧᐊᕈᑎᔪᒪᓪᓗᒋᑦ ᓱᒋᐊᕐᑕᐅᖁᓪᓗᒋᑦ.”

ᐸᐅᓗᓯᐅᑉ ᐅᓂᒃᑳᕐᓂᖓ ᓵᒋᐊᕐᓂᕐᒥᓂᒃ

⁶ “ᑕᒫᓯᑰᓯᒧᓪᓕ ᖃᒡᓕᓕᕐᑎᓪᓗᖓ, ᐅᓪᓗᖅ ᕿᑎᕋᓕᕐᑎᓪᓗᒍ ᕿᓚᖕᒥᑦ ᖃᐅᒪᔪᐊᓗᖕᒥᑦ ᖃᐅᒻᒪᒡᕕᐅᓚᐅᕐᐳᖓ.

⁷ ᓄᓇᒧᑦ ᐅᕐᕈᒐᒪ ᓂᐱᒥᒃ ᑐᓴᓕᕐᐳᖓ ᐅᕙᓐᓄᑦ ᐅᖃᕐᑐᒥᒃ, ‘ᓴᐅᓗᓯ! ᓴᐅᓗᓯ! ᓱᖕᒪᑦ ᐊᑭᕋᕐᑐᕐᐱᖔ?’

⁸ ᐊᐱᕆᕙᕋ, ‘ᐊᑕᓃᖅ ᑭᓇᐅᕕᑦ?’ ᑭᐅᕚᖓᓗ, ‘ᔩᓱᓯᐅᕗᖓ ᓈᓴᕇᑎᒥᐅᖅ ᐊᑭᕋᕐᑐᕐᑍᑦ.’

⁹ ᐃᓚᒋᔭᒪᓕ ᖃᐅᒪᔪᖅ ᑕᑯᒐᓗᐊᕐᐹᑦ, ᑐᓴᕋᑎᒡᓕ ᓂᐱᒥᒃ ᐅᕙᓐᓄᑦ ᐅᖃᕐᑐᒥᒃ.

¹⁰ ᐊᐱᕆᕙᕋᓗ, ‘ᐊᑕᓃᖅ ᖃᓄᐃᓕᐅᖁᕕᖓ?’ ᐊᑕᓂᐅᑉ ᐅᖃᐅᑎᕚᖓ, ‘ᒪᑭᓪᓗᑎᑦ, ᑕᒫᓯᑰᓯᒧᐊᓕᕆᑦ, ᐱᓂᐊᒐᒃᓴᓕᒫᑎᑦ ᑍᑲᓂ ᓇᓗᓁᕐᑕᐅᑦᓯᐊᕐᓂᐊᕐᐳᑦ.’

¹¹ ᐃᓚᒋᔭᒪ ᑕᓯᐅᕐᐹᖓ ᑕᒫᓯᑰᓯᒧᑦ, ᖃᐅᒪᔪᐊᓘᑉ ᑕᐅᑐᒍᓐᓃᕐᑎᓚᐅᕐᒪᖓ.

¹² “ᐊᓇᓁᐊᓯᒥᒃ ᐊᑎᓕᐅᑉ, ᑕᕝᕙᓂ ᑕᑯᔭᕐᑐᓚᐅᕐᐹᖓ ᑖᓐᓇ ᐅᒃᐱᑦᓯᐊᕐᑑᓪᓗᓂ ᐱᖁᔭᓂᒃ ᒪᓕᑦᓯᐊᕐᐳᖅ, ᔫᑎᓂᑦ ᓄᓇᖃᑎᖏᓐᓂᑦ ᐱᓪᓗᕆᒃᑐᖁᑕᐅᔪᖅ.

¹³ ᑖᓐᓇ ᕾᒐᒥ ᓴᓂᓐᓂ ᓇᖏᕐᓗᓂ ᐅᖃᐅᑎᕚᖓ, ‘ᖃᑕᓐᖑᑏᒃ ᓴᐅᓗᓰ, ᑕᐅᑐᓕᕆᑦ!’ ᑕᕝᕙᑦᓮᓐᓇᖅ ᑕᐅᑐᓕᕐᐳᖓ ᑖᓐᓇ ᑕᑯᓪᓗᒍ.

¹⁴ ᐅᖃᐅᑎᕚᖓ, ‘ᓯᕗᓕᕕᓂᑦᑕ ᒎᑎᖓᑕ ᓂᕈᐊᕐᒪᑎᑦ ᖃᐅᔨᖁᓪᓗᓂᑎᑦ ᐱᔪᒪᔭᖓᓂᒃ, ᖃᐅᔨᖁᓪᓗᑎᑦ ᓇᓛᒎᑦᓯᐊᕐᑐᑐᐊᖑᔪᒥᒃ, ᑐᓴᖁᓪᓗᑎᑦ ᐅᖃᐅᓯᕐᓂᒃ ᓇᖕᒥᓂᖅ ᐅᖃᐅᓯᕆᔭᖏᓐᓂᒃ;

¹⁵ ᑖᑦᓱᒪ ᓇᓗᓁᕐᓯᔨᒋᓂᐊᕐᐹᑎᑦ ᐃᓄᓕᒫᓄᑦ, ᑕᑯᓯᒪᔭᕐᓂᒃ ᑐᓴᕐᓯᒪᔭᕐᓂᒡᓗ.

¹⁶ ᒫᓐᓇᓕ ᓱᓇᒦᒃ ᐅᑕᖅᑭᕖᑦ? ᒪᑭᓪᓗᑎᑦ ᐹᑉᑎᑕᐅᓕᕆᑦ, ᐊᔪᕐᓂᑎᑦ ᐅᐊᓴᕐᑕᐅᓂᐊᕐᒪᑕ, ᔩᓱᓯ ᑐᒃᓯᐊᕐᕕᒋᓕᕈᒃ.’”

ᐸᐅᓗᓯᐅᑉ ᕾᖁᔭᐅᓂᖓ ᐊᔪᕆᕐᑐᐃᖁᓪᓗᒍ ᔫᑎᐅᖏᑦᑐᓂᒃ

¹⁷ “ᔨᕉᓴᓕᒻᒧᑦ ᐅᑎᕋᒪ ᑐᒃᓯᐊᕐᕕᒡᔪᐊᒥ ᑐᒃᓯᐊᕐᑎᓪᓗᖓ ᐃᓱᒪᒃᑯᑦ ᑎᒥᓐᓃᑦᓱᓐᓁᓚᐅᕐᐳᖓ.

¹⁸ ᐊᑕᓂᖅ ᑕᑯᓚᐅᕐᐸᕋ ᐅᖃᕐᑐᖅ, ‘ᑐᐊᕕᕐᓗᑎᑦ ᔨᕉᓴᓕᒻᒥᑦ ᐊᐅᓪᓚᕆᑦ, ᑕᕝᕙᓂ ᓄᓇᓕᖕᓂ ᐅᕙᓐᓂᒃ ᐅᖃᐅᓯᖃᕐᓂᑎᑦ ᐃᓚᓕᐅᕐᑕᐅᓂᐊᖏᒻᒪᑕ.’

¹⁹ ᑭᐅᕙᕋ, ‘ᐊᑕᓃᖅ ᐃᓄᐃᑦ ᑖᒃᑯᐊ ᖃᐅᔨᒪᕗᑦ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓄᑦ ᐃᑎᕐᐸᓚᐅᕋᒪ ᑎᒍᔭᐅᑎᑦᓯᔭᕐᑐᕐᓗᖓ ᐊᓇᐅᓕᕐᑕᐅᑎᑦᓯᔪᒪᓪᓗᖓᓗ ᐃᓕᖕᓄᑦ ᐅᒃᐱᕐᑐᓂᒃ.

²⁰ ᐃᓄᖁᑏᑦ ᓯᑎᐹᓇᓯ ᑐᖁᑕᐅᑎᓪᓗᒍ ᓴᓂᐊᓂ ᓇᖏᓚᐅᕐᐳᖓ, ᑐᖁᑕᐅᓂᖓ ᓈᒻᒪᒋᓪᓗᒍ, ᑐᖁᑦᓯᔪᑦ ᐊᓐᓄᕌᖏᑦ ᑲᒪᒋᓚᐅᕐᐸᒃᑲ.’

²¹ ᐊᑕᓂᐅᑉ ᐅᖃᐅᑎᓚᐅᕐᐹᖓ, ‘ᐊᐅᓪᓚᓕᕆᑦ; ᑎᓕᔪᒪᒐᒃᑭᑦ ᐅᖓᓯᒃᑐᒦᑐᓄᑦ ᔫᑎᐅᖏᑦᑐᓄᑦ.’”

²² ᐃᓄᐃᑦ ᐸᐅᓗᓯᒥᒃ ᓈᓚᑦᓯᐊᕐᐳᑦ; ᐅᖃᐅᓯᕆᔭᖏᑦ ᑭᖑᓪᓕᕐᐹᑦ ᑎᑭᓪᓗᒋᑦ, ᓂᐱᖁᕐᑐᓪᓗᑎᒃ ᓂᓪᓕᐊᓚᐅᕐᐳᑦ, “ᑖᓐᓇ ᑐᖁᑕᐅᓕ, ᑍᒤᑦᑐᖅ ᐃᓅᔪᒃᓴᐅᖏᒻᒪᕆᒃᐳᖅ ᓄᓇᒥ.”

²³ ᐃᓄᐃᓪᓕ ᓂᐱᓕᐊᓘᓕᕐᐳᑦ ᐊᓐᓄᕌᒥᖕᓂᒃ ᓄᓗᕋᐅᑎᖃᕐᓗᑎᒃ ᓴᓂᕐᓂᒡᓗ ᖁᒻᒧᑦ ᐃᒋᑦᓯᕙᒃᖢᑎᒃ,

²⁴ ᕉᒪᒥᐅᑦ ᐅᓇᑕᕐᑐᒃᓴᖏᑕ ᐊᖓᔪᖅᑳᖓᑦᑕ ᐸᐅᓗᓯ ᐅᓇᑕᕐᑐᒃᓮᑦ ᐃᒡᓗᖓᓄᑦ ᐃᑎᕐᑕᐅᖁᓕᕐᐹᑦ, ᑏᒐᕐᑐᕐᑕᐅᖁᕚᓗ, ᑐᑭᓯᓇᓱᐊᕐᕕᐅᖁᓪᓗᒍ ᓱᖕᒪᑦ ᐃᓄᖕᓄᑦ ᐅᐃᒪᔮᕈᑕᐅᖕᒪᖔᑦ.

²⁵ ᕿᓚᒃᓱᕐᒪᑦᔪᒃ ᑏᒐᕐᑐᕐᓂᐊᕐᓗᒍ, ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᖅ ᓴᓂᒥᓂ ᓇᖏᕐᑐᖅ ᐸᐅᓗᓯᐅᑉ ᐅᖃᐅᑎᕚ, “ᐱᖁᔭᓂᒃ ᒪᓕᒐᔭᕐᐱᓰ ᕉᒪᒥᐅᖑᖃᑕᐅᔪᖅ ᑏᒐᕐᑐᕐᑕᐅᒃᐸᑦ ᐃᖅᑲᕐᑐᕐᑕᐅᓚᐅᕐᑎᓐᓇᒍᓘᓐᓃᑦ?”

²⁶ ᐅᓇᑕᕐᑐᒃᓴᓄᑦ ᐊᖓᔪᖅᑳᑉ ᑕᒪᓐᓇ ᑐᓴᕋᒥᐅᒃ, ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐅᖃᐅᑎᔭᕐᑐᕐᐹ, ᐊᐱᕆᓪᓗᓂᐅᒃ, “ᖃᓄᕐᓕ ᐱᓂᐊᓕᕐᐲᑦ? ᑖᓐᓇ ᐊᖑᑦ ᑎᒍᔭᕗᑦ ᕉᒪᒥᐅᖑᖕᒪᑦ.”

²⁷ ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐸᐅᓗᓯᒧᑦ ᐂᓪᓗᓂ ᐊᐱᕆᕚ, “ᐅᖃᐅᑎᓚᐅᓐᖓ, ᕉᒪᒥᐅᖑᕖᑦ?” ᐸᐅᓗᓯᐅᑉ ᑭᐅᕚ, “ᐄ, ᕉᒪᒥᐅᖑᕗᖓ.”

²⁸ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐅᖃᓕᕐᐳᖅ, “ᑮᓇᐅᔭᓂᒃ ᐅᓄᕐᑐᐊᓗᖕᓂᒃ ᐊᑭᓖᓚᐅᕐᐳᖓ ᕉᒪᒥᐅᓐᖑᕋᓱᐊᕐᓗᖓ.” ᐸᐅᓗᓯᓕ ᐅᖃᕐᐳᖅ, “ᐅᕙᖓᓕ ᐃᕐᓂᐊᖑᓂᒃᑯᑦ ᕉᒪᒥᐅᑕᐅᕗᖓ.”

²⁹ ᑖᒃᑯᐊ ᐸᐅᓗᓯᒥᒃ ᐊᐱᕐᓱᕐᓂᐊᖅᑲᐅᔪᑦ ᑕᕝᕔᓐᓇᖅ ᕿᒪᕉᑎᕗᑦ; ᐅᓇᑕᕐᑐᒃᓮᓪᓗ ᐊᖓᔪᖅᑳᖓᑦ ᓯᕘᕋᓕᕐᐳᖅ, ᐸᐅᓗᓯ ᕉᒪᒥᐅᑕᐅᑎᓪᓗᒍ ᑎᒍᔭᐅᑎᓚᐅᕋᒥᐅᒃ ᕿᓚᒃᓱᑕᐅᑎᓪᓗᒍᓗ.

ᐸᐅᓗᓯᐅᑉ ᐃᖅᑲᕐᑐᕐᑕᐅᓂᖓ ᔫᑎᑦ ᐃᖅᑲᕐᑐᐃᔨᕐᔪᐊᖏᓐᓄᑦ

³⁰ ᖃᐅᑎᓪᓗᒍ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑐᑭᓯᑦᓯᐊᕈᒪᒐᒥ ᓱᖕᒪᑦ ᐸᐅᓗᓯ ᐸᓯᔭᐅᖕᒪᖔᑦ ᔫᑎᓄᑦ, ᕿᓚᒃᓱᕐᓯᒪᑦᔪᑎᖏᑦ ᐲᕐᑕᐅᖁᕔᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᑦ ᔫᑎᑦ ᐃᖅᑲᕐᑐᐃᔨᕐᔪᐊᖏᑦ ᑲᑎᖁᕔᑦ. ᐸᐅᓗᓯᓗ ᑖᒃᑯᐊ ᓵᖓᓐᓄᐊᕐᑎᑉᐹ.