ᐋᐴᓯᑕᓖᑦ ᐱᓂᐊᕐᓂᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦᐸᐅᓗᓯᐅᑉ ᔨᕉᓴᓕᒻᒧᐊᕐᓂᖓ 1 ᑖᒃᑯᐊ ᑕᕝᕙᐅᕗᑏᕇᕋᑦᑎᒍ ᐊᐅᓪᓚᕐᐳᒍᑦ ᐅᒥᐊᕐᔪᐊᒃᑯᑦ, ᑐᑭᓕᐊᕐᓗᑕ ᐃᑳᕋᑦᑕ ᑰᓯᒧᑦ ᑎᑭᑉᐳᒍᑦ, ᖃᐅᑎᓪᓗᒍ ᕉᑎᓯᒧᑦ ᑎᑭᑉᐳᒍᑦ, ᑕᕝᕙᓐᖓᑦ ᐸᑕᕋᒧᐊᕐᐳᒍᑦ. 2 ᑕᕝᕙᓂ ᐅᒥᐊᕐᔪᐊᒥᒃ ᑲᑎᓯᒐᑦᑕ ᐱᓃᓯᐊᓕᐊᕐᑐᒥᒃ, ᑕᕝᕗᖓ ᐃᑭᒐᑦᑕ, ᐊᐅᓪᓚᕐᐳᒍᑦ. 3 ᓮᐳᕋᓯ ᑕᑯᒃᓴᐅᓕᕐᒪᑦ, ᓴᐅᒥᐊᑕ ᑭᑖᒍᑦ ᓯᕆᐊᒧᐊᕐᐳᒍᑦ, ᑍᕆᒧᑦ ᓄᓈᕐᐳᒍᑦ; ᑕᕝᕙᓂ ᐅᒥᐊᕐᔪᐊᖅ ᐅᓯᖏᐊᕆᐊᖃᕐᒪᑦ. 4 ᐃᓕᓐᓂᐊᕐᑎᓂᒃ ᑕᕝᕙᓂ ᑲᑎᓯᒐᑦᑕ, ᓇᔪᓕᕐᐸᕗᑦ ᐅᓪᓗᓂᒃ 7ᓂᒃ. ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑖᒃᑯᐊ ᐅᖃᕐᑎᑕᐅᓪᓗᑎᒃ ᐸᐅᓗᓯ ᔨᕉᓴᓕᒻᒧᐊᖁᓐᖏᓛᑦ. 5 ᑕᕝᕙᓃᕝᕕᒃᓴᕗᑦ ᐃᓱᓕᒻᒪᑦ ᕿᒪᓕᕐᐸᕗᑦ ᐊᐅᓪᓚᕆᐊᕐᑐᓕᕐᓗᑕ, ᑖᒃᑯᐊ ᑕᒪᕐᒥᒃ ᓄᓕᐊᑎᒃ ᕿᑐᕐᖓᑎᒡᓗ ᐃᓚᒋᓪᓗᒋᑦ, ᓄᓇᓖᑦ ᓯᓚᑖᓄᑦ ᓯᒡᔭᒧᑦ ᖃᓂᐅᕐᐹᑎᒍᑦ; ᑕᒫᓂᓗ ᓰᖅᑯᕐᓗᑕ ᑐᒃᓯᐊᖃᑎᒌᒃᐳᒍᑦ. 6 ᑕᕝᕙᐅᕗᑏᖃᑎᒋᓚᐅᕐᓗᑕ ᐅᒥᐊᕐᔪᐊᒧᑦ ᐃᑭᕗᒍᑦ, ᑖᒃᑯᐊᓕ ᐊᖏᕐᕋᐅᓕᕐᐳᑦ. 7 ᑍᕆᒥᑦ ᐃᖏᕐᕋᒐᑦᑕ ᑐᓕᒤᓯᒧᑦ ᑎᑭᑉᐳᒍᑦ; ᑕᕝᕙᓂ ᐅᒃᐱᕐᑑᖃᑎᒌᑦ ᑲᑎᒐᑦᑎᒍ ᓇᔪᑬᓐᓇᕐᐸᕗᑦ ᐅᓪᓗᒥᒃ ᐊᑕᐅᓯᕐᒥᒃ. 8 ᖃᐅᑎᓪᓗᒍ ᐊᐅᓪᓚᕋᑦᑕ ᓯᓴᕆᐊᒧᑦ ᑎᑭᑉᐳᒍᑦ; ᑕᕝᕙᓂ ᑐᔪᕐᒥᕗᒍᑦ ᐱᓕᑉᐴᓯᐅᑉ ᓵᒋᐊᕐᑎᑦᓯᔨᐅᑉ ᐃᒡᓗᖓᓂ, ᑖᓐᓇ 7 ᓂᕈᐊᕐᑕᐅᓚᐅᕐᑐᑦ ᐃᓚᖓᑦ ᔨᕉᓴᓕᒻᒥ ᐃᑲᔪᕐᑎᐅᖁᓪᓗᒋᑦ. 9 ᑖᓐᓇ ᓯᑕᒪᓂᒃ ᐅᐃᖃᖏᑦᑐᓂᒃ ᐸᓂᖃᕐᐳᖅ, ᑖᒃᑯᐊ ᒎᑎᐅᑉ ᐅᖃᐅᓯᐅᖁᔭᖓᓂᒃ ᐅᖃᐅᓯᖃᖃᑦᑕᕐᐳᑦ. 10 ᐅᓪᓗᓂᒃ ᐊᒥᓱᓂᒃ ᑕᕝᕙᓃᒃᑲᑦᑕ, ᓇᓚᐅᑦᑍᔪᖅ ᐋᒐᐹᓯᒥᒃ ᐊᑎᓕᒃ ᔫᑎᐊᒥᑦ ᑎᑭᑉᐳᖅ. 11 ᑖᓐᓇ ᐅᕙᑦᑎᓐᓄᐊᕋᒥ ᐸᐅᓗᓯᐅᑉ ᑕᑦᓯᖓ ᑎᒍᕚ ᓇᖕᒥᓂᖅ ᐊᒡᒐᓂ ᐃᑎᒐᓂᓗ ᕿᓚᒃᓱᕐᐰᑦ, ᐅᖃᕐᓗᓂ, “ᐊᓂᕐᓂᖅ ᐃᑦᔪᕐᓁᑦᑐᖅ ᐅᖃᕐᐳᖅ, ‘ᒪᑐᒥᖓ ᑕᑦᓯᖃᕐᑐᖅ ᔨᕉᓴᓕᒻᒥ ᐃᒫᒃ ᕿᓚᒃᓱᑦᑕᐅᔪᒫᕐᐳᖅ ᔫᑎᓂᑦ, ᑐᓂᔭᐅᓗᓂ ᔫᑎᐅᖏᑦᑐᓄᑦ.’” 12 ᑕᒪᓐᓇ ᑐᓴᕋᑦᑎᒍ, ᑕᒪᑦᑕ ᐸᐅᓗᓯ ᐃᓂᕐᑎᕋᓱᐊᓕᕐᐸᕗᑦ ᔨᕉᓴᓕᒻᒧᐊᖁᓇᒍ. 13 ᐸᐅᓗᓯᓕ ᑭᐅᕗᖅ, “ᓱᖕᒪᑦ ᕿᐊᕕᓰ? ᐆᒻᒪᑎᒃᑯᑦ ᓰᖁᒥᑎᓐᓇᑦᓯᓐᖓ, ᐅᐸᓗᖕᒊᕐᓯᒪᕗᖓᓕ ᕿᓚᒃᓱᕐᑕᐅᓂᕐᒧᑐᐃᓐᓇᐅᖏᑦᑐᖅ, ᑐᖁᑕᐅᓂᕐᒧᓪᓕ ᐊᒡᓛᑦ ᔨᕉᓴᓕᒻᒥ ᐊᑕᓂᖅ ᔩᓱᓯ ᐱᑦᔪᑎᒋᓗᒍ.” 14 ᓴᖑᑎᑕᒃᓴᐅᖏᒻᒪᑦ ᓴᐱᓕᕋᑦᑕ ᐅᖃᓕᕐᐳᒍᑦ, “ᐊᑕᓂᐅᑉ ᐱᔪᒪᔭᖓ ᐱᓕᕐᓕ.” 15 ᐊᑯᓂ ᑕᕝᕙᓃᓚᐅᕐᓗᑕ, ᐸᕐᓇᓕᕐᐳᒍᑦ ᔨᕉᓴᓕᒻᒧᑦ ᐊᐅᓪᓚᕐᓗᑕ. 16 ᐃᓕᓐᓂᐊᕐᑎᑦ ᐃᓚᖏᑕ ᓯᓴᕆᐊᒥᐅᑍᑦ ᐃᓚᒋᕚᑎᒍᑦ, ᑖᒃᑯᐊ ᓁᓴᓂᐅᑉ ᓮᐳᕋᓯᒥᐅᑕᐅᑉ ᐃᒡᓗᖓᓄᐊᕈᑎᕚᑎᒍᑦ, ᑖᓐᓇ ᐅᒃᐱᕐᑐᑐᖃᐅᕗᖅ, ᑕᕝᕙᓂ ᓯᓂᒃᑕᖁᔭᐅᕗᒍᑦ. ᐸᐅᓗᓯᐅᑉ ᐳᓛᕆᐊᕐᓂᖓ ᔧᒥᓯᒥᒃ 17 ᔨᕉᓴᓕᒻᒧᑦ ᑎᑭᓐᓇᑦᑕ, ᐅᒃᐱᕐᑑᖃᑎᑦᑕ ᑐᓐᖓᓱᒃᑎᑉᐹᑎᒍᑦ ᖁᕕᐊᓱᒡᓗᑎᒃ. 18 ᖃᐅᑎᓪᓗᒍ ᐸᐅᓗᓯ ᐃᓚᒋᓪᓗᑎᒍ ᔧᒥᓯᒥᒃ ᑕᑯᔭᕐᑐᕐᐳᒍᑦ; ᐅᒃᐱᕐᑑᖃᑎᒌᑦ ᓯᕗᓕᕐᑎᖏᑦ ᑕᒪᕐᒥᒃ ᑕᕝᕙᓃᑉᐳᑦ. 19 ᐸᐅᓗᓯᐅᑉ ᑎᒎᑎᔭᕇᕋᒥᒋᑦ ᐅᓂᒃᑳᕐᕕᒋᕔᑦ ᒎᑎᐅᑉ ᐱᓇᓱᐊᖃᑦᑕᕐᓂᖓᓂᒃ ᔫᑎᐅᖏᑦᑐᓂ ᐱᔨᑦᓯᕐᓂᕐᒥᒍᑦ. 20 ᑖᒃᑯᐊ ᑕᒪᑐᒥᖓ ᑐᓴᕋᒥᒃ, ᒎᑎ ᓂᕐᑐᕐᐹᑦ. ᐅᖃᕐᓗᑎᒃ, “ᐸᐅᓗᓰ, ᖃᐅᔨᒪᕗᑎᑦ ᔫᑎᑦ 1000ᓂᑦ ᐅᓄᕐᓂᕐᓴᒻᒪᕇᑦ ᐅᒃᐱᓕᕐᒪᑕ, ᑕᒪᕐᒥᒡᓗ ᒨᓯᓯᐅᑉ ᐱᖁᔭᖏᓐᓂᒃ ᐊᑐᕈᒪᒻᒪᕆᓕᕐᓗᑎᒃ. 21 ᑐᓴᕐᑎᑕᐅᓯᒪᓕᕐᐳᒍᑦ ᔫᑎᑦ ᔫᑎᐅᖏᑦᑐᓃᑦᑐᑦ ᐊᔪᕆᕐᑐᖃᑦᑕᕋᕕᒋᑦ ᒨᓯᓯᐅᑉ ᐱᖁᔭᖏᓐᓂᒃ ᒪᓕᖁᓇᒋᑦ, ᕿᑐᕐᖓᒥᖕᓂᒡᓗ ᑭᐱᓯᖁᓇᒋᑦ, ᔫᑎᓪᓗ ᐃᓕᖅᑯᓯᑐᖃᖏᓐᓂᒃ ᐊᑐᖁᖏᓐᓇᕕᒋᑦ. 22 ᑍᒃᑯᐊ ᑐᓴᕐᓂᐊᓕᕐᒥᖕᒪᑕ ᑎᑭᓯᒪᓂᕐᓂᒃ, ᑍᒪᓕ ᖃᓄᖅ ᐱᓂᐊᓕᕐᐱᑖ? 23 ᐃᒤᓕᐅᓚᐅᕐᑕ, ᐅᕙᓃᑦᑐᖃᕐᒪᑦ ᐊᖑᑎᓂᒃ ᓯᑕᒪᓂᒃ ᐊᖏᕈᑎᒥᖕᓂᒃ ᓇᓗᓁᕐᓯᓯᒪᔪᓂᒃ; 24 ᑖᒃᑯᐊ ᐃᓚᒋᓚᐅᒃᑭᑦ ᐅᒃᐱᕐᓂᒃᑯᑦ ᓴᓗᒻᒪᕐᓴᕐᑕᐅᓂᕐᒥᒃ ᐱᖃᑕᐅᓕᕆᑦ, ᐊᑭᓕᕆᐊᖃᕐᑕᖏᑦ ᐃᕝᕕᑦ ᐊᑭᓕᕐᓗᒋᑦ; ᓄᔭᖏᑦ ᕿᐅᕐᑕᕐᑕᐅᖁᓪᓗᒋᑦ. ᑍᒤᓕᐅᕐᓂᒃᑯᑦ ᐃᓄᐃᑦ ᖃᐅᔨᓕᖁᓪᓗᒋᑦ ᐅᓂᒃᑲᐅᓯᐅᖃᑦᑕᕐᓂᕐᕕᑦ ᓱᓕᖏᓐᓂᖏᓐᓂᒃ, ᒨᓯᓯᐅᑉ ᐱᖁᔭᖏᓐᓂᒃ ᒪᓕᑦᓯᐊᕐᓂᕐᓂᒃ. 25 ᔫᑎᐅᖏᑦᑐᑦ ᐅᒃᐱᕐᑑᓕᕐᑐᑦ, ᐅᖃᐅᓯᕆᓯᒪᔭᑦᑎᓐᓂᒃ ᑎᑎᕋᕐᕕᒋᓯᒪᕙᕗᑦ, ᓂᕆᖃᑦᑕᖁᓇᒋᑦ ᒎᑎᓐᖑᐊᓄᑦ ᑐᓂᕐᕈᑕᐅᓯᒪᔪᓂᒃ, ᐊᐅᖏᔭᕐᑕᐅᓯᒪᖏᑦᑐᓂᒃ ᕿᒥᑕᐅᓯᒪᔪᕕᓂᕐᓂᒡᓗ ᓂᕆᖁᓇᒋᑦ, ᓄᓕᐊᕐᓂᕐᒥᒡᓗ ᐊᑐᕐᓂᕐᓗᖁᓇᒋᑦ.” 26 ᖃᐅᑎᓪᓗᒍ ᐸᐅᓗᓯᐅᑉ ᑖᒃᑯᐊ ᐊᖑᑎᑦ ᐃᓚᒋᓪᓗᒋᑦ ᐅᒃᐱᕐᓂᒃᑯᑦ ᓴᓗᒻᒪᕐᓴᕐᑕᐅᓂᕐᒥᒃ ᐊᑐᖃᑎᒋᕔᑦ ᑐᒃᓯᐊᕐᕕᒡᔪᐊᒧᓪᓗ ᐃᑎᕐᓗᓂ, ᓇᓗᓁᕐᓯᕗᖅ ᐅᒃᐱᕐᓂᒃᑯᑦ ᓴᓗᒻᒪᕐᓴᕐᑕᐅᓂᐅᑉ ᓯᕕᑐᓂᕆᓂᐊᕐᑕᖓᓂᒃ, ᐃᓱᐊᓂ ᑐᓂᕐᕈᓯᕐᑐᖃᕆᐊᑲᕐᓂᐊᕐᓂᖓᓂᒃ ᑖᒃᑯᐊ ᐊᑐᓂᑦ ᐱᓪᓗᒋᑦ. ᐸᐅᓗᓯᐅᑉ ᑎᒍᔭᐅᓂᖓ ᑐᒃᓯᐊᕐᕕᒡᔪᐊᒥ 27 ᐅᓪᓗᐃᓪᓕ 7 ᓈᓕᕐᑎᓪᓗᒋᑦ, ᔫᑎᑦ ᐂᓯᐊᒥᑦ ᐱᓯᒪᔪᑦ ᐸᐅᓗᓯ ᑕᑯᕚᑦ ᑐᒃᓯᐊᕐᕕᒡᔪᐊᕐᒦᑎᓪᓗᒍ, ᑖᒃᑯᐊ ᐅᐃᒪᔮᕐᑎᑦᓯᓕᕐᐳᑦ ᐃᓄᖕᓂᒃ, ᑎᒍᓪᓗᒍ. 28 ᕾᒐᓛᓕᕐᐳᑦ, “ᐃᓴᕆᐊᓕᒥᐅᑕᐅᔪᓯ ᐃᑲᔪᕐᑎᒍᑦ! ᐅᒫ ᐃᓄᐃᑦ ᓇᓂᑐᐃᓐᓇᖅ ᓄᓇᖃᕐᑐᑦ ᐊᔪᕆᕐᑐᖃᑦᑕᕐᒪᒋᑦ ᐃᓅᖃᑎᕗᓪᓗ ᐱᖁᔭᓂᒃ ᑐᒃᓯᐊᕐᕕᒡᔪᐊᒥᒡᓗ ᒪᓕᖁᓇᒋᑦ, ᒫᓐᓇ ᒍᕇᑭᓂᒃ ᐊᒡᓛᑦ ᑐᒃᓯᐊᕐᕕᒡᔪᐊᕐᒧᑦ ᐃᑎᕐᑎᑦᓯᓯᒪᓕᕐᐳᖅ ᐃᑦᔪᕐᓁᑦᑐᒥᒃ ᓇᕐᕈᓇᕐᓯᑎᑦᓯᓪᓗᓂ.” 29 ᑍᒤᓕᐅᓚᐅᕐᐳᑦ ᑕᑯᓚᐅᕋᒥᒃ ᑐᕉᐱᒨᓯᒥᒃ ᐃᐱᓲᓯᒥᐅᒥᒃ ᐸᐅᓗᓯ ᐂᑉᐸᖃᕐᑎᓪᓗᒍ ᔨᕉᓴᓕᒻᒥ, ᐃᓱᒪᓪᓗᑎᒡᓗ ᐸᐅᓗᓯ ᑖᑦᓱᒥᖓ ᑐᒃᓯᐊᕐᕕᒡᔪᐊᕐᒧᑦ ᕾᖁᔨᓯᒪᓇᓱᒋᓪᓗᒍ. 30 ᓄᓇᓕᖕᓂ ᑕᕝᕙᓂ ᐃᓄᓕᒫᑦ ᐅᐃᒪᔮᓕᕐᐳᑦ, ᐃᓄᐃᓪᓗ ᓇᑭᑐᐃᓐᓇᖅ ᐅᓪᓚᒃᓗᑎᒃ ᑲᑎᓕᕐᐳᑦ; ᐸᐅᓗᓯ ᑎᒍᓪᓗᒍ ᑐᒃᓯᐊᕐᕕᒡᔪᐊᕐᒥᑦ ᐊᓐᓂᓯᕚᑦ, ᑕᕝᕔᓐᓇᖅ ᑐᒃᓯᐊᕐᕕᒡᔪᐊᑉ ᒪᑐᖏᑦ ᒪᑐᔭᐅᕗᑦ. 31 ᐃᓄᐃᑦ ᐸᐅᓗᓯᒥᒃ ᑐᖁᑦᓯᓇᓱᐊᓕᕐᑎᓪᓗᒋᑦ, ᕉᒪᒥᐅᑦ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑐᓴᕐᑎᑕᐅᕗᖅ ᔨᕉᓴᓕᒻᒥᐅᓕᒫᑦ ᐅᐃᒪᔮᕐᑐᐊᓘᓂᕋᕐᑕᐅᑎᓪᓗᒋᑦ. 32 ᑕᕝᕔᓐᓇᖅ ᑖᓐᓇ ᐅᓇᑕᕐᑐᒃᓴᓂᒃ ᐊᖓᔪᖅᑳᖑᔪᓂᒃ ᐃᓚᖃᕐᓗᓂ, ᑐᐊᕕᕐᓗᑎᒃ ᐃᓄᒐᓴᒡᔪᐊᓄᐊᓕᕐᐳᖅ; ᐃᓄᐃᑦ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑕᑯᒐᒥᑦᔪᒃ ᐅᓇᑕᕐᑐᒃᓮᓪᓗ ᐃᓚᒋᔭᖏᑦ, ᐸᐅᓗᓯ ᐊᓇᐅᓕᕈᓐᓃᕐᐹᑦ. 33 ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐅᐸᒃᑲᒥᐅᒃ ᐸᐅᓗᓯ ᑎᒍᕚ ᐊᕐᓵᕐᑑᔭᓄᑦ ᒪᕐᕈᐃᓄᑦ ᕿᓚᒃᓱᕐᑕᐅᖁᕚ. ᐊᐱᕐᓱᓕᕐᓗᓂ ᑭᓇᐅᖕᒪᖔᑦ ᖃᓄᐃᓕᐅᓚᐅᕐᒪᖔᓪᓗ. 34 ᐃᓄᐃᑦ ᕾᒐᓛᕐᓗᑎᒃ ᐊᑦᔨᒌᓐᖏᓗᐊᕐᑐᓂᒃ ᐅᖃᐅᓯᖃᓕᕐᒪᑕ; ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑐᑭᓯᔪᓐᓇᖏᓐᓇᒥ ᓂᐱᕐᔪᐊᓄᑦ, ᐸᐅᓗᓯ ᐅᓇᑕᕐᑐᒃᓮᑦ ᐃᒡᓗᖓᓄᑦ ᐋᑕᐅᖁᓕᕐᐹ. 35 ᒪᔪᕋᐅᑎᖏᓐᓄᑦ ᑎᑭᑎᓪᓗᒋᑦ ᐃᓄᐃᑦ ᐱᓗᐊᕐᓂᖏᓐᓄᑦ, ᐅᓇᑕᕐᑐᒃᓴᓂᑦ ᐸᐅᓗᓯ ᐊᒡᔭᕐᑕᐅᔭᕆᐊᖃᓕᕐᐳᖅ; 36 ᐃᓄᐃᑦ ᒪᓕᒡᑐᑦ ᕾᒐᓛᕐᐳᑦ ᐅᖃᕐᓗᑎᒃ, “ᑐᖁᑕᐅᓕ!” ᐸᐅᓗᓯᐅᑉ ᐃᒻᒥᓂᒃ ᓴᐳᑎᓇᓱᐊᕐᓂᖓ 37 ᐸᐅᓗᓯ ᐃᑎᕐᑎᑕᐅᓂᐊᓕᕐᑎᓪᓗᒍ ᐅᓇᑕᕐᑐᒃᓮᑦ ᐃᒡᓗᖓᓄᑦ, ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᑦ ᐅᖃᕐᐳᖅ, “ᐅᖃᕈᓐᓇᕐᐳᖔ ᐃᓕᖕᓄᑦ?” ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐊᐱᕆᕗᖅ, “ᒍᕇᑭᑎᑐᑦ ᐅᖃᕈᓐᓇᕐᐲᑦ? 38 ᑍᓐᓇᐅᖏᒃᑲᓗᐊᕐᐲᑦ ᐄᑦᔨᑉᑎᒥᐅᖅ ᐅᐃᒪᔮᓕᕐᑎᑦᓯᓚᐅᕐᑐᖅ ᐅᓇᑕᕐᑎᑦᓯᓇᓱᐊᕐᑐᓂᒃ 4000ᓂᒃ, ᐃᓄᖃᖏᑦᑐᒧᑦ ᐊᐅᓪᓚᖃᑎᖃᓚᐅᕐᑐᖅ?” 39 ᐸᐅᓗᓯ ᑭᐅᕗᖅ, “ᔫᑎᐅᕗᖓ, ᑖᕐᓱᓯᒥ ᓯᓕᓯᐊᒦᑦᑐᒥ ᐃᓅᓕᕐᓯᒪᔪᖓ, ᓄᓇᖃᖃᑕᐅᓪᓗᖓ ᐃᒡᓗᒐᓴᒡᔪᐊᕐᓂ ᐱᓪᓚᕆᐅᓂᕐᐹᓂ; ᕿᓄᕕᒋᕙᒋᑦ, ᐃᓄᖕᓄᑦ ᐅᖃᓚᐅᕐᓚᖓ.” 40 ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᐅᖃᕈᓐᓇᕐᑎᒻᒪᒍ, ᐸᐅᓗᓯ ᒪᔪᕋᐅᑎᓂ ᓇᖏᕐᓗᓂ ᐃᓄᖕᓄᑦ ᓄᓪᓗᐊᕐᑐᕐᐳᖅ ᓂᐸᖏᖁᓪᓗᒋᑦ; ᓂᐱᖃᕈᓐᓃᕐᒪᑕ, ᐸᐅᓗᓯᐅᑉ ᐅᖃᕐᕕᒋᓕᕐᐰᑦ ᐄᑉᕉᑎᑐᑦ ᐅᖃᕐᓗᓂ: |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society