ᐋᐴᓯᑕᓖᑦ ᐱᓂᐊᕐᓂᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᐸᐅᓗᓯᐅᑉ ᒫᓯᑑᓂᐊᒧᐊᕐᓂᖓ ᐊᑬᐊᒧᓪᓗ

¹ ᐃᓄᐃᑦ ᐅᐃᒪᔮᕐᓂᐊᓗᐊᑦ ᓄᖅᑲᕐᒪᑦ, ᐸᐅᓗᓯᐅᑉ ᐃᓕᓐᓂᐊᕐᑎᑦ ᑲᑎᖁᕔᑦ, ᐱᕙᓪᓕᕈᑎᒃᓴᖏᓐᓂᒃ ᐅᖃᐅᑎᔭᕇᕋᒥᒋᑦ ᒫᓯᑑᓂᐊᒧᑦ ᐊᐅᓪᓚᕐᐳᖅ.

² ᑖᒃᑯᑎᒎᓇᖅ ᐃᖏᕐᕋᒐᒥ ᐃᓄᐃᑦ ᑕᒫᓃᑦᑐᑦ ᐱᕙᓪᓕᕈᑎᒃᓴᖏᓐᓂᒃ ᐊᔪᕆᕐᑐᒻᒪᕆᓚᐅᕐᓗᒋᑦ, ᑭᖑᕐᖓᒍᑦ ᒍᕇᓯᒧᐊᕐᐳᖅ ᐊᑬᐊᒦᑦᑐᒧᑦ,

³ ᑕᕝᕙᓃᓕᕐᐳᖅ ᑕᖅᑭᓂᒃ ᐱᖓᓱᓂᒃ, ᖃᐅᔨᒐᒥ ᑐᖁᑕᐅᔪᒪᓂᕐᒥᓂᒃ ᔫᑎᓄᑦ; ᓯᕆᐊᒧᑦ ᐊᐅᓪᓚᑐᐃᓐᓇᕆᐊᖃᓕᕐᓗᓂ; ᒫᓯᑑᓂᐊᒃᑰᕐᓗᓂ ᐅᑎᖔᕈᒪᓕᕐᐳᖅ.

⁴ ᓱᐹᑎᕆ ᐰᕋᓯᐅᑉ ᐃᕐᓂᖓ ᐱᕆᐊᒥᐅᖅ ᐃᓚᒋᕚ, ᐊᕆᔅᑕᑰᓯᓗ ᓯᑲᓐᑐᓯᓗ ᑎᓴᓗᓁᑲᒥᐅᒃ, ᒊᐊᓯᓗ ᑑᕆᐱᒥᐅᖅ, ᑍᑭᑰᓯᓗ ᑐᕉᐱᒨᓯᓗ ᐂᓯᐊᒥᐅᑖᒃ, ᑎᒧᑎᓗ.

⁵ ᑖᒃᑯᐊᓗ ᓯᕗᓂᑦᑎᓐᓂ ᐊᐅᓪᓚᕋᒥᒃ ᑐᕈᐊᓯᒥ ᐅᑕᖅᑭᓕᕐᐹᑎᒍᑦ.

⁶ ᐱᓕᐰᒥᑦ ᐅᒥᐊᕐᑐᓕᕐᐳᒍᑦ ᓇᓪᓕᐅᓐᓂᕐᓯᐅᕇᕋᑦᑕ ᐳᕙᓪᓚᖅᑯᑎᖃᖏᑦᑐᓂᒃ ᓂᐊᖂᔭᕐᑐᕐᕕᖕᒥᒃ, ᐅᓪᓗᑦ ᑕᓪᓕᒪᑦ ᓈᖕᒪᑕ ᐃᓚᕗᑦ ᑎᑭᑉᐸᕗᑦ ᑐᕈᐊᓯᒦᑦᑐᑦ, ᑕᕝᕙᓃᓕᕐᐳᒍᑦ ᐱᓇᓱᐊᕈᓯᓕᒫᒥᒃ.

ᐸᐅᓗᓯᐅᑉ ᑭᖑᓪᓕᕐᐹᒥ ᓂᐅᕐᕈᓂᖓ ᑐᕈᐊᓯᒧᑦ

⁷ ᓴᐸᑎᐅᑉ ᐅᓐᓄᖓᓂ ᑲᑎᓪᓗᑕ ᓂᕆᖃᑎᒌᒋᐊᕐᑐᕐᐳᒍᑦ, ᐸᐅᓗᓯ ᖃᐅᒃᐹᕋᒥ, ᐃᓄᐃᑦ ᐅᖃᓪᓚᒃᕕᒋᓕᕐᐰᑦ; ᐅᓐᓄᐊᑉ ᕿᑎᕋᕐᓂᖓ ᑎᑭᓪᓗᒍ.

⁸ ᐃᒡᓗᒥ ᖁᓕᕇᖕᒦᒃᑲᑦᑕ ᑲᑎᒪᕕᒋᔭᕗᑦ ᖃᐅᒪᑎᑕᐅᕗᖅ ᓇᓂᕈᐊᓄᑦ ᐅᓄᕐᑐᓄᑦ.

⁹ ᐃᓅᓱᒃᑐᖅ ᐊᖑᑦ ᐃᐅᑎᑲᓯᒥᒃ ᐊᑎᓕᒃ ᐃᒐᓛᕐᒥ ᐃᒃᓯᕙᕗᖅ ᐸᐅᓗᓯ ᐊᑯᓂ ᐅᖃᓪᓚᒃᑎᓪᓗᒍ. ᑖᓐᓇ ᐃᖁᒻᒪᔪᓐᓁᓪᓕᒐᒥ ᓯᓂᓕᕐᐳᖅ; ᐃᒐᓛᕐᒥᑦ ᐃᔪᒃᑲᕐᐳᖅ ᓄᓇᒧᑦ ᐃᒡᓘᑉ ᖁᓕᕇᑉ ᐱᖓᔪᐊᓐᓂᑦ, ᐅᐸᒃᑲᒥᑦᔪᒃ ᑎᒍᕚᑦ ᑐᖁᖓᓕᕐᑐᖅ.

¹⁰ ᐸᐅᓗᓯ ᑕᐅᓄᓐᖓᕋᒥ ᐅᑯᕕᒋᓪᓗᒍ ᐃᕿᑉᐹ, ᐅᖃᕐᓗᓂ, “ᐅᐃᒪᔮᖏᓪᓗᓯ, ᑕᕐᓂᖓ ᓱᓕ ᑕᕝᕙᓃᒻᒪᑦ.”

¹¹ ᐃᒡᓗᒧᑦ ᓇᔪᕐᑕᒥᖕᓄᑦ ᐅᑎᕋᒥᒃ ᐸᐅᓗᓯᐅᑉ ᓂᐊᖂᔭᖅ ᐊᕕᒃᐹ ᓂᕆᓪᓗᑎᒡᓗ, ᓱᓕ ᐊᑯᓂ ᐅᖃᕐᕕᒋᓚᐅᕐᓗᒋᑦ, ᓯᕿᓂᐅᑉ ᓄᐃᓕᕐᓂᖓ ᑎᑭᓪᓗᒍ, ᐸᐅᓗᓯᐅᓪᓗ ᕿᒪᓕᕐᐰᑦ.

¹² ᐃᓄᐃᑦ ᐃᓅᓱᒃᑐᖅ ᑖᓐᓇ ᖃᓄᐃᑦᑐᓐᓃᕐᑐᖅ ᐊᖏᕐᕋᐅᑎᕚᑦ, ᐊᖏᔪᒥᒃ ᓮᒻᒪᕐᑎᑕᐅᓪᓗᑎᒃ.

ᑐᕈᐊᓯᒥᑦ ᒥᓕᑑᓯᒧᑦ

¹³ ᐅᒥᐊᕐᔪᐊᒃᑯᑦ ᓯᕗᓪᓕᐅᓪᓗᑕ ᐊᐅᓪᓚᕐᐳᒍᑦ ᐋᓱᓯᒧᑦ, ᑍᑲᓂ ᐸᐅᓗᓯ ᐃᑭᔪᒪᓯᒪᖕᒪᑦ; ᑍᒫᒃ ᐅᖃᐅᑎᓚᐅᕐᒪᑎᒍᑦ, ᓇᖕᒥᓂᖅ ᓄᓇᒃᑯᑦ ᑍᑯᓐᖓᕈᒪᓪᓗᓂ.

¹⁴ ᑍᑲᓂᓗ ᐋᓱᓯᒥ ᑲᑎᒐᑦᑎᒍ, ᐅᕙᑦᑎᓐᓄᑦ ᐃᑭᕗᖅ, ᒥᑍᓕᓃᒧᑦ ᐊᐅᓪᓚᕐᐳᒍᑦ.

¹⁵ ᑕᕝᕙᓐᖓᑦ ᐅᒥᐊᕐᑐᓕᕐᒥᒐᑦᑕ ᖃᐅᑎᓪᓗᒍ ᑬᐅᓯᐅᑉ ᐊᑭᐊᓄᑦ ᑎᑭᑉᐳᒍᑦ; ᖃᐅᒃᑲᓐᓂᕐᑎᓪᓗᒍᓗ ᓵᒧᓯᒧᑦ ᑎᑭᑉᐳᒍᑦ, ᐊᒻᒪ ᓱᓕ ᖃᐅᒃᑲᓐᓂᕐᑎᓪᓗᒍ ᒥᓕᑑᓯᒧᑦ ᑎᑭᑉᐳᒍᑦ.

¹⁶ ᐸᐅᓗᓯ ᐅᖃᕐᓯᒪᖕᒪᑦ ᐃᐱᓲᓯ ᖄᖐᓐᓇᕈᒪᓪᓗᒍ ᐂᓯᐊᒦᑐᐃᓐᓇᕈᒪᓇᓂ; ᑐᐊᕕᓕᕋᒥ ᐊᔪᕐᓇᖏᑉᐸᑦ ᐱᓐᑎᑰᔅᑎᒥ ᔨᕉᓴᓕᒻᒦᑦᑐᒪᓪᓗᓂ.

ᐸᐅᓗᓯᐅᑉ ᑕᕝᕙᐅᕗᑏᕐᓂᖓ ᐃᐱᓲᓯᒥᐅᑦ ᐅᐱᕐᑑᖃᑎᒌᑦ ᐊᖓᔪᖅᑳᖏᓐᓄᑦ

¹⁷ ᒥᓕᑑᓯᒥᑦ ᐸᐅᓗᓯ ᐅᖃᕆᐊᕐᑐᕐᑎᑦᓯᕗᖅ ᐅᒃᐱᕐᑑᖃᑎᒌᑦ ᓯᕗᓕᕐᑎᖏᓐᓄᑦ ᐃᐱᓲᓯᒧᑦ ᑲᑎᖃᑎᒋᔪᒪᓪᓗᒋᑦ.

¹⁸ ᑎᑭᒻᒪᑕ ᐅᖃᕐᕕᒋᓕᕐᐰᑦ: “ᖃᐅᔨᒪᕗᓯ ᐃᓕᑦᓯᓐᓃᑎᓪᓗᖓ ᐱᓂᐊᕐᓂᕆᓚᐅᕐᑕᓐᓂᒃ ᐂᓯᐊᒧᐊᕐᕕᒋᓚᐅᕐᑕᕋ ᐱᒋᐊᕐᓗᒍ,

¹⁹ ᐊᑕᓂᕐᒥᒃ ᐱᔨᑦᓯᓚᐅᕐᐳᖓ ᓇᓗᖅᑯᑎᒻᒪᕆᒃᓗᖓ ᖁᕝᕕᐅᖃᑕᕐᓗᖓ, ᐅᖁᒤᑦᑐᑰᖃᑦᑕᕐᓂᓐᓄᑦ ᔫᑎᓄᑦ ᑐᖁᑕᐅᔪᒪᖃᑦᑕᕐᓂᓐᓄᑦ;

²⁰ ᐅᖃᕐᑍᓕᕙᓚᐅᓐᖏᓚᖓᓗ ᑲᓐᖑᓱᖕᓇᖓ ᐃᓕᑦᓯᓐᓄᑦ ᐱᕚᓕᕈᑕᐅᔪᓐᓇᕐᑐᓂᒃ ᐊᔪᕆᕐᑐᐃᖃᑦᑕᕐᓗᖓᓗ ᐃᓄᐃᑦ ᓵᖏᓐᓂ, ᐃᓪᓗᖏᓐᓂᓗ.

²¹ ᔫᑎᓄᑦ ᒍᕇᑭᓄᓪᓗ ᐊᑦᔨᒌᓂᒃ ᐅᖃᐅᑦᔪᐃᕙᓚᐅᕐᐳᖓ ᒎᑎᒧᑦ ᖃᕿᐊᓕᕐᓗᑎᒃ ᓵᒋᐊᖁᓪᓗᒋᑦ ᐊᔪᕐᓂᕐᒥᖕᓂᑦ; ᐅᒃᐱᖁᓪᓗᒋᓪᓗ ᐊᑕᓂᕐᒧᑦ ᔩᓱᓯᒧᑦ.

²² ᒫᓐᓇ ᑕᑯᒋᑦ, ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐱᖁᔭᐅᓂᓐᓄᑦ ᔨᕉᓴᓕᒻᒧᐊᕐᓂᐊᕐᐳᖓ, ᖃᐅᔨᒪᓇᖓ ᑍᑲᓂ ᖃᓄᐃᑕᐅᓂᐊᕐᒪᖔᕐᒪ;

²³ ᑭᓯᐊᓂ ᖃᐅᔨᒪᕗᖓ ᐊᓂᕐᓂᖅ ᐃᑦᔪᕐᓁᑦᑐᖅ ᓇᓗᓁᕐᓯᖕᒪᑦ ᑎᒍᔭᐅᓯᒪᓃᑦ ᐋᓐᓂᐊᑎᑕᐅᓃᓪᓗ ᐅᑕᖅᑭᖕᒪᑕ ᐅᕙᓐᓂᒃ ᓄᓇᓕᓕᒫᓂ.

²⁴ ᐃᓅᓯᕐᒪ ᐅᕙᓐᓄᑦ ᐊᑐᕐᓇᓗᐊᖏᓐᓂᖓ ᖃᐅᔨᒪᕙᕋ, ᐱᔭᕇᕋᓱᐊᕈᒪᓂᕋ ᐃᓱᒪᓇᕐᓂᕐᓴᐅᕗᖅ ᐊᑕᓂᐅᑉ ᔩᓱᓯᐅᑉ ᐅᕙᓐᓄᑦ ᑎᓕᓯᑦᔪᑎᒋᓯᒪᔭᖓᓂᒃ, ᓇᓗᓁᕐᓯᖁᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ.

²⁵ “ᒫᓐᓇ ᑕᑯᒋᑦ, ᐃᓕᑦᓯᓐᓄᑦ ᐊᔪᕆᕐᑐᐃᖃᑦᑕᓚᐅᕐᑐᖓ ᒎᑎᐅᑉ ᐊᑕᓂᐅᕕᖓᓂᒃ ᖃᐅᔨᒪᕗᖓ ᑕᑯᒃᑲᓐᓂᕐᓂᐊᕈᓐᓃᕋᑦᓯᓐᖓ.

²⁶ ᑍᒤᒻᒪᑦ ᐅᓪᓗᒥ ᐅᖃᐅᑎᕙᑦᓯ ᐸᓯᔭᒃᓴᐅᓂᐊᕈᓐᓃᕐᐳᖓ ᑕᕐᓂᓯ ᐱᑦᔪᑎᒋᓪᓗᒋᑦ,

²⁷ ᐅᖃᕐᑍᓕᒪᓚᐅᖏᓐᓇᒪ ᐃᓕᑦᓯᓐᓄᑦ ᒎᑎᐅᑉ ᐊᑐᕐᑕᐅᖁᔭᓕᒫᖏᓐᓂᒃ.

²⁸ ᖃᐅᔨᓴᑦᓯᐊᓕᕆᑦᓯ ᐃᓅᓯᕆᔭᑦᓯᓐᓂᒃ ᑲᒪᒋᑦᓯᐊᕐᓗᒋᑦ ᐅᒃᐱᕐᑑᖃᑎᓯᓗ. ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᒃᐱᕐᑑᖃᑎᒌᓄᑦ ᓯᕗᓕᕐᑎᓐᖑᕐᑎᓯᒪᖕᒪᓯ ᑖᒃᑯᓄᖓ, ᐰᕐᓯᔨᐅᓕᕆᑦᓯ ᒎᑎᐅᑉ ᐃᓚᒌᒃᑐᖁᑎᖏᓐᓂᒃ ᑖᒃᑯᐊ ᓇᖕᒥᓂᕐᑖᕆᓯᒪᖕᒪᒋᑦ ᐃᕐᓂᕐᒥ ᐊᐅᖓᒍᑦ.

²⁹ ᖃᐅᔨᒪᕗᖓ ᐊᐅᓪᓚᕈᒪ ᐊᒪᕈᐃᑦ ᐃᕐᓯᓇᕐᑐᑦ ᐊᑯᓐᓇᑦᓯᓐᓄᐊᕈᒫᕐᒪᑕ, ᐃᓚᒌᒃᑐᑦ ᐅᒃᐱᕐᑑᖃᑎᒌᑦ ᐊᒃᑐᕐᑕᐅᖏᑦᑐᖃᕐᓂᐊᓐᖏᓚᑦ;

³⁰ ᐃᓄᒃᑕᖃᓕᕈᒫᕐᒪᑦ ᐊᑯᓐᓇᑦᓯᓐᓂᑦ ᐱᔪᓂᒃ ᓱᓕᖏᑦᑐᒥᒃ ᐊᔪᕆᕐᑐᐃᖃᑦᑕᕐᑐᓂᒃ, ᒪᓕᒃᑎᑖᕋᓱᐊᕐᓗᑎᒃ ᐃᓕᓐᓂᐊᕐᑎᓂᒃ.

³¹ ᑍᒤᒻᒪᑦ ᖃᐅᔨᓴᑦᓯᐊᓕᕆᑦᓯ, ᐃᖅᑲᐅᒪᓗᓯᓗ ᖁᕝᕕᐅᖃᑦᑕᕐᓗᖓ ᐅᓪᓗᒃᑯᑦ ᐅᓐᓄᐊᒃᑯᓪᓗ ᓄᖅᑲᓚᐅᕐᓯᒪᓇᖓ ᐊᔪᕆᕐᑐᖃᑦᑕᓚᐅᕋᑦᓯ ᐊᕐᕌᒍᓂᒃ ᐱᖓᓱᓂᒃ.

³² “ᒫᓐᓇ ᒎᑎᒧᑦ ᑐᓂᓕᕐᐸᑦᓯ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐊᔪᕆᕐᑐᐃᑦᔪᑕᐅᓂᖓᓄᑦ ᑕᒪᑐᒧᖓ ᐱᔪᓐᓇᕐᓯᕙᓪᓕᐊᑎᑕᐅᔪᓐᓇᕋᑦᓯ ᑭᖑᕐᖑᑎᔭᒃᓴᒥᒡᓗ ᑐᓂᓯᕕᒋᔪᓐᓇᕐᐹᓯ ᒎᑎᐅᑉ ᐃᓄᖁᑎᓕᒫᒥᓄᑦ ᐊᖏᕈᑎᒋᓯᒪᔭᒥᓂᒃ.

³³ ᑮᓇᐅᔭᓂᒃ ᐊᓐᓄᕌᒃᓴᓂᒡᓘᓐᓃᑦ ᐃᓕᑦᓯᓐᓂᑦ ᕿᓄᓚᐅᓐᖏᓚᖓ.

³⁴ ᓇᖕᒥᓂᖅ ᖃᐅᔨᒪᕗᓯ ᐱᓇᓱᐊᖃᑦᑕᕐᓯᒪᒐᒪ ᓇᖕᒥᓂᖅ ᐃᓅᑦᔪᑎᒃᓴᓐᓂᒃ, ᐃᓚᒋᔭᒪᓗ ᐃᓅᑦᔪᑎᒃᓴᖏᓐᓂᒃ.

³⁵ ᓇᖕᒥᓂᖅ ᖃᐅᔨᑎᓚᐅᕐᐸᑦᓯ ᐊᒃᓱᕈᕐᓂᑦᑎᓐᓄᑦ ᐱᓇᓱᐊᕐᓗᑕ ᓴᓐᖐᑦᑐᓂᒃ ᐃᑲᔪᕆᐊᖃᕋᑦᑕ, ᐊᑕᓂᐅᑉ ᔩᓱᓯᐅᑉ ᐅᖃᐅᓯᖏᑦ ᐃᖅᑲᕐᓗᒋᑦ ᐅᖃᕐᓯᒪᖕᒪᑦ, ‘ᑐᓂᓯᓂᖅ ᓮᒻᒪᕐᑎᑕᐅᓇᕐᓂᕐᓴᐅᕗᖅ ᐂᑦᑐᕐᑕᐅᓂᕐᒥᑦ.’”

³⁶ ᐸᐅᓗᓯ ᑕᒪᒃᑯᓂᖓ ᐅᖃᕇᕋᒥ ᓰᖅᑯᕐᓗᓂ ᑐᒃᓯᐊᖃᑎᒋᕔᑦ.

³⁷ ᐊᑕᖏᕐᖢᑎᒃ ᑕᕝᕙᐅᕗᑏᓕᕋᒥᒃ ᖁᕝᕕᐅᕐᐳᑦ ᐸᐅᓗᓯ ᐃᕿᓪᓗᒍ ᑯᓂᒃᐹᑦ,

³⁸ ᑕᑯᒃᑲᓐᓂᕐᓂᐊᕈᓐᓃᕐᓂᕋᕐᓗᒋᑦ ᐅᖃᓚᐅᕐᓂᖓ ᕿᒃᓵᒍᑎᒋᓗᐊᕐᐹᑦ. ᐅᒥᐊᕐᔪᐊᒧᑦ ᑎᑭᓪᓗᑎᒃ ᖃᓂᐅᕐᐹᑦ.