ᐋᐴᓯᑕᓖᑦ ᐱᓂᐊᕐᓂᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᑯᕆᓐᑎᒥ

¹ ᑕᒪᑐᒪ ᑭᖑᕐᖓᒍᑦ ᐸᐅᓗᓯ ᐋᑎᓐᓯᒥᑦ ᐊᐅᓪᓚᕐᐳᖅ ᑯᕆᓐᑎᒧᐊᕐᓗᓂ.

² ᑕᕝᕙᓂᓗ ᑲᑎᓯᕗᖅ ᔫᑎᐅᔪᒥᒃ ᐊᑯᐃᓚᒥᒃ ᐊᑎᓕᖕᒥᒃ, ᐹᓐᑕᓯᒥ ᐃᓅᓕᕐᓯᒪᔪᒥᒃ, ᑕᕝᕗᓐᖓᕋᑖᕐᑐᕕᓂᖅ ᐃᑕᓕᒥᑦ ᓄᓕᐊᓂ ᐳᕆᓯᓚ ᐂᑉᐸᕆᓪᓗᒍ, ᐊᖓᔪᖅᑳᕐᔪᐊᑉ ᑲᓚᐅᑎᐊᓯᐅᑉ ᔫᑎᓕᒫᑦ ᐊᐅᓪᓚᖁᓚᐅᕐᒪᒋᑦ ᕉᒪᒥᑦ. ᐸᐅᓗᓯᐅᑉ ᑕᑯᔭᕐᑐᕋᒥᒋᒃ;

³ ᐱᓇᓱᐊᖃᑎᒋᓕᕐᐹᒃ ᓇᔪᕐᑎᒋᓪᓗᒋᒃ, ᑐᐱᓕᐅᕐᑎᐅᒐᒥᒃ ᑕᒪᕐᒥᒃ ᑐᐱᕐᓂᒃ ᓴᓇᓪᓗᑎᒃ ᓂᐅᕐᕈᑎᒃᓴᓕᐅᖃᑦᑕᕐᐳᑦ.

⁴ ᐅᖃᖃᑎᖃᖃᑦᑕᕐᐳᖅ ᓴᐸᑎᐅᓕᕌᖓᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓂ, ᑐᑭᓯᑎᓐᓇᓱᐊᕐᓗᒋᑦ ᔫᑎᑦ ᒍᕇᑭᓪᓗ.

⁵ ᓮᓚᓯᒃᑯᒃ ᑎᒧᑎᒃᑯᒃ ᒫᓯᑑᓂᐊᒥᑦ ᑎᑭᒻᒪᑎᒃ, ᐸᐅᓗᓯ ᐊᔪᕆᕐᑐᐃᖏᓐᓇᕐᓂᕐᓴᐅᓕᕐᐳᖅ ᑎᓕᔭᐅᑦᔪᑎᒥᓂᒃ, ᓇᓗᓁᔧᓪᓗᓂ ᔫᑎᓄᑦ ᔩᓱᓯᐅᑉ ᙭ᔅᑑᓯᐅᓂᖓᓂᒃ.

⁶ ᑖᒃᑯᐊ ᐊᑭᕋᕐᑐᕐᒪᑕ ᐅᖃᕐᓂᕐᓘᑎᖃᕐᒪᑕᓗ ᐸᐅᓗᓯᒥᒃ; ᐊᓐᓄᕌᓂ ᐳᔪᕐᓗᖏᑦ ᐃᑦᓱᒃᐰᑦ ᐊᖏᖃᑎᒋᖏᒻᒪᕆᒃᓗᒋᓪᓗ ᐅᖃᐅᑎᕔᑦ, “ᑕᕐᓂᓯ ᐊᓯᐅᒃᐸᑕ ᐃᓕᑦᓯᓐᓂᒃ ᓇᖕᒥᓂᖅ ᐱᔭᕆᓂᐊᕐᐳᓯ! ᐅᕙᖓ ᐸᓯᔭᒃᓴᐅᓂᐊᓐᖏᓚᖓ. ᒫᓐᓇᒥᑦ ᔫᑎᐅᖏᑦᑐᑦ ᐊᔪᕆᕐᑐᖔᕐᓂᐊᓕᕐᐸᒃᑲ.”

⁷ ᕿᒪᒃᑲᒥᒋᑦ ᐂᕗᖅ ᑍᑑᓯ ᔭᔅᑕᓯᐅᑉ ᐃᒡᓗᖓᓄᑦ, ᑕᕝᕙᓂ ᑐᔪᕐᒥᓕᕐᓗᓂ, ᑖᓐᓇ ᒎᑎᒧᑦ ᑐᒃᓯᐊᕐᐸᒃᑐᖅ, ᑖᑦᓱᒪ ᐃᒡᓗᖓ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᑦᑕ ᓴᓂᑦᑎᐊᖓᓃᑉᐳᖅ.

⁸ ᑯᕆᔅᐸᓯ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓄᑦ ᐊᖓᔪᖅᑳᖑᔪᖅ, ᐊᑕᓂᕐᒧᑦ ᐅᒃᐱᓕᕐᐳᖅ, ᐃᒡᓗᒥᐅᖃᑎᓂ ᐃᓚᒋᓪᓗᒋᑦ; ᐅᓄᕐᑐᓪᓗ ᑯᕆᓐᑎᒥᐅᑦ ᐸᐅᓗᓯᐅᑉ ᐅᖃᐅᓯᖏᓐᓂᒃ ᑐᓴᕐᑐᑦ ᐅᒃᐱᓕᕋᒥᒃ ᐹᑉᑎᑕᐅᕗᑦ.

⁹ ᐅᓐᓄᐃᑦ ᐃᓚᖓᓐᓂ ᐊᑕᓂᖅ ᐸᐅᓗᓯᒧᑦ ᐅᖃᕐᐳᖅ ᑕᑯᑎᑦᔪᑎᒃᑯᑦ, “ᓯᕘᕋᖏᓪᓗᑎᑦ, ᐊᔪᕆᕐᑐᐃᑐᐃᓐᓇᕆᑦ ᓄᖅᑲᕐᑍᓕᓗᑎᑦ;

¹⁰ ᐃᓚᒋᒐᒃᑭᑦ, ᑭᓇᒧᓪᓘᓐᓃᑦ ᐅᐸᒃᑐᕐᑕᐅᓂᐊᓐᖏᓚᑎᑦ ᐊᓐᓂᕐᑕᐅᔭᕐᑐᕐᓗᑎᑦ, ᐊᒥᓱᓂᒃ ᐃᓄᖁᑎᖃᕋᒪ ᑕᕝᕙᓂ ᐃᒡᓗᒐᓴᖕᓂ.”

¹¹ ᑍᒤᒻᒪᑦ ᑕᕝᕙᓃᓚᐅᕐᐳᖅ ᐊᕐᕌᒍᒥᒃ ᐊᑕᐅᓯᕐᒥᒃ ᑕᖅᑭᓂᒡᓗ ᐱᖓᓲᔪᕐᑐᓂᒃ, ᒎᑎᐅᑉ ᐅᖃᐅᓯᖏᓐᓂᒃ ᐊᔪᕆᕐᑐᐃᓪᓗᓂ ᑖᒃᑯᓇᓂ.

¹² ᒑᓕᐅ ᐊᖓᔪᖅᑳᓐᖑᕐᑎᑕᐅᖕᒪᑦ ᐊᑬᐊᒥ, ᔫᑎᑦ ᑕᐱᕇᓕᓗᑎᒃ ᐸᐅᓗᓯ ᑎᒍᕚᑦ ᐃᖅᑲᕐᑐᐃᕕᖕᒧᓪᓗ ᐱᑎᑉᐹᑦ.

¹³ ᐅᖃᕐᓗᑎᒃ, “ᐅᓇ ᐃᓄᖕᓂᒃ ᑐᒃᓯᐊᕐᑎᑦᓯᖃᑦᑕᕋᓱᒃᑐᖅ ᒎᑎᒧᑦ, ᐱᖁᔭᑦᑎᓐᓄᑦ ᐊᑭᕋᕐᑐᕐᑐᒥᒃ ᐊᑐᕐᓗᓂ.”

¹⁴ ᐸᐅᓗᓯᓕ ᓂᓪᓕᕐᓂᐊᓕᕐᑎᓪᓗᒍ, ᒑᓕᐅ ᔫᑎᓄᑦ ᐅᖃᕐᐳᖅ, “ᑕᒪᓐᓇ ᐱᐅᖏᑦᑐᓕᓂᐊᓘᒃᐸᑦ ᐱᕋᔭᖕᓂᐅᒃᐸᓪᓘᓐᓃᑦ, ᐃᓕᑦᓯᓐᓄᑦ ᔫᑎᐅᔪᓯ ᓈᓚᒐᓱᐊᕋᔭᕐᐳᖓ,

¹⁵ ᑭᓯᐊᓂ ᐅᖃᐅᓯᕐᓂᒃ ᐊᑎᕐᓂᒡᓗ ᓇᖕᒥᓂᕐᓗ ᐱᖁᔭᑦᓯᓐᓂᒃ ᐱᑦᔪᑎᒃᓴᖃᕐᑎᓪᓗᒍ, ᐃᓕᑦᓯ ᓇᖕᒥᓂᖅ ᐋᖅᑭᒐᓱᐊᓕᕐᓯᐅᒃ; ᐅᕙᖓᓕ ᑕᒪᒃᑯᓄᖓ ᐃᖅᑲᕐᑐᐃᔨᐅᔪᒪᓐᖏᓚᖓ.”

¹⁶ ᑕᕝᕙᓐᖓᑦ ᐃᖅᑲᕐᑐᐃᕕᖕᒥᑦ ᐊᓂᖁᕔᑦ.

¹⁷ ᑖᒃᑯᐊ ᓲᔅᑎᓃᓯ ᔫᑎᑦ ᑲᑎᒪᕕᖓᓐᓄᑦ ᐊᖓᔪᖅᑳᖑᔪᖅ ᑎᒍᕚᑦ, ᐃᖅᑲᕐᑐᐃᔪᑦ ᑕᑯᓐᓇᕐᑎᓪᓗᒋᑦ ᐊᓇᐅᓕᓕᕐᐹᑦ. ᒑᓕᐅᓪᓕ ᑲᒪᒋᓐᖏᓔᑦ.

ᐊᓐᑎᐅᑭᐊᒧᑦ ᐅᑎᕐᓂᖏᑦ

¹⁸ ᑕᒪᑐᒪ ᑭᖑᕐᖓᒍᑦ ᐸᐅᓗᓯ ᑯᕆᓐᑎᒦᓚᐅᕐᐳᖅ ᐅᓪᓗᓂᒃ ᐊᒥᓱᓂᒃ, ᐅᒃᐱᕐᑑᖃᑎᒌᑦ ᕿᒪᓚᐅᕆᕔᑦ ᓯᕆᐊᒧᓪᓗ ᐅᒥᐊᕐᑐᕐᐳᖅ ᐳᕆᓯᓚ ᐊᑯᐃᓚᓗ ᐃᓚᒋᓪᓗᒋᒃ. ᑭᓐᑯᕆᐊᒥ ᐸᐅᓗᓯᐅᑉ ᓄᔭᓂ ᕿᐅᕐᑕᕐᐰᑦ, ᓱᓕᓂᐊᕐᓂᕋᕐᓗᓂ ᑍᒫᒃ ᐊᖏᕈᑎᖃᕐᓯᒪᒐᒥ.

¹⁹ ᐃᐱᓲᓯᒧᑦ ᑎᑭᓐᓇᒥᒃ ᐃᓚᓂ ᐳᕆᓯᓚ ᐊᑯᐃᓚᓗ ᕿᒪᒃᐹᒃ; ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓄᐊᕐᓗᓂ, ᔫᑎᑦ ᐅᖃᖃᑎᒋᕔᑦ.

²⁰ ᐃᓄᐃᑦ ᐊᑯᓂᒃᑲᓐᓂᖅ ᑕᕝᕙᓃᖁᒐᓗᐊᕐᐹᑦ ᐊᖏᓐᖏᓔᓪᓕ;

²¹ ᕿᒪᓕᕋᒥᒋᑦ ᐅᖃᐅᑎᕔᑦ, “ᒎᑎ ᐱᖁᔨᒃᐸᑦ ᐃᓕᑦᓯᓐᓄᑦ ᐅᑎᓛᕆᕗᖓ.” ᐅᒥᐊᒃᑯᑦ ᐃᐱᓲᓯᒥᑦ ᐊᐅᓪᓚᕐᐳᖅ.

²² ᓯᓴᕆᐊᒧᑦ ᑎᑭᓐᓇᒥ, ᔨᕉᓴᓕᒻᒧᐊᕐᐳᖅ ᐅᒃᐱᕐᑑᖃᑎᖐᓂᒃ ᑲᑎᓯᓚᐅᕐᓗᓂ, ᐊᓐᑎᐅᑭᐊᒧᑦ ᐊᐅᓪᓚᓕᕆᕗᖅ.

²³ ᐊᑯᓂ ᑕᕝᕙᓃᓚᐅᕐᓗᓂ ᐊᐅᓪᓚᕆᕗᖅ, ᒐᓔᑎᐊ ᐊᖅᑯᑎᒋᓪᓗᒍ ᐴᕐᒋᐊᓗ, ᐃᓕᓐᓂᐊᕐᑎᓕᒫᑦ ᐱᕙᓪᓕᕐᑎᑉᐰᑦ.

ᐊᐴᓗᓯᐅᑉ ᐃᐱᓲᓯᒦᓐᓂᖓ ᑯᕆᓐᑎᒥᓗ

²⁴ ᑍᑦᓱᒪᓂ ᐊᖑᑦ ᔫᑎ ᐊᐴᓗᓯᒥᒃ ᐊᑎᓕᒃ, ᐊᓕᒃᓴᓐᑐᕆᐊᒥ ᐃᓅᓕᕐᓂᑯ, ᐃᐱᓲᓯᒧᑦ ᑎᑭᑉᐳᖅ. ᑖᓐᓇ ᐅᖃᓪᓚᑦᓯᐊᕈᓐᓇᕐᑑᖅ, ᐊᒡᓚᓂᒃ ᖃᐅᔨᒪᑦᓯᐊᕐᓗᓂ.

²⁵ ᑖᓐᓇᓗ ᐊᑕᓂᕐᒥᒃ ᒪᓕᖕᓂᕐᒥᒃ ᐊᔪᕆᕐᑐᕐᑕᐅᓯᒪᕗᖅ; ᑕᒪᑐᒥᖓ ᑲᑦᓱᖕᒊᕐᓯᒪᑦᓯᐊᕐᓗᓂ, ᐊᔪᕆᕐᑐᐃᕗᖅ ᓈᒻᒪᓈᕐᓯᒪᑦᓯᐊᕐᓗᓂ ᔩᓱᓯᐅᑉ ᒥᒃᓵᓄᑦ, ᔪᐊᓇᓯᐅᓪᓕ ᐹᑉᑎᑦᓯᑦᔪᑖᓂᒃ ᖃᐅᔨᒪᔭᑐᐊᖃᕐᐳᖅ.

²⁶ ᑖᓐᓇ ᐊᔪᕆᕐᑐᐃᓕᕐᐳᖅ ᓯᕘᕋᓇᓂ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ; ᐳᕆᓯᓚᐅᑉ ᐊᑯᐃᓚᓪᓗ ᑐᓵᒐᒥᒃᑯᒃ, ᐊᖏᕐᕋᐅᑎᕚᒃ ᐊᔪᕆᕐᑐᕆᐊᒃᑲᓐᓂᕐᓗᒍ ᒎᑎᒧᑦ ᒪᓕᒃᑎᐅᓂᕐᒥᒃ.

²⁷ ᐊᐴᓗᓯ ᐊᑬᐊᒧᐊᕈᒪᖕᒪᑦ, ᐅᒃᐱᕐᑑᖃᑎᒌᑦ ᐃᑲᔪᕐᑐᕐᐹᑦ, ᑎᑎᕋᕐᓗᑎᒃ ᐃᓕᓐᓂᐊᕐᑎᓄᑦ ᐃᓚᓕᐅᕐᑕᐅᖁᓪᓗᒍ. ᑍᑯᖓ ᑎᑭᒻᒪᑦ, ᐊᖏᔪᒥᒃ ᐃᑲᔪᕐᐳᖅ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ ᐅᒃᐱᕐᑐᓐᖑᕐᑎᑕᐅᓚᐅᕐᑐᓂᒃ.

²⁸ ᐅᖃᕈᓐᓇᑦᓯᐊᕐᓂᕐᒥᓄᓪᓗ ᔫᑎᑦ ᓵᓚᒋᕔᑦ ᐃᓄᐃᑦ ᑕᒃᑯᐊᓂ, ᐊᒡᓔᑦ ᐅᖃᐅᓯᖏᑦ ᓇᓗᓁᓕᓪᓗᒋᑦ ᔩᓱᓯᐅᑉ ᙭ᔅᑑᓯᐅᓂᖓᓂᒃ.