ᐋᐴᓯᑕᓖᑦ ᐱᓂᐊᕐᓂᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦᐸᓇᐹᓯᓗ ᓴᐅᓗᓯᓗ ᓂᕈᐊᕐᑕᐅᕘᒃ ᑎᓕᔭᐅᓪᓗᑎᒃ 1 ᐃᓚᒌᒃᑐᓂ ᐊᓐᑎᐅᑭᐊᒥ ᓇᓚᐅᑦᑍᔪᓂᒃ ᐊᔪᕆᕐᑐᐃᔨᓂᒡᓗ ᐱᑕᖃᓚᐅᕐᐳᖅ, ᐸᕐᓇᐹᓯ, ᓯᒥᐅᓂ ᑍᔭᐅᔪᖅ ᕿᕐᓂᕐᑕᒥᒃ, ᓗᓯᐅᓯᓗ ᓮᕆᓂᒥᐅᖅ, ᒪᓁᓂᓗ ᐊᖓᔪᖅᑳᕐᔪᐊᕐᒥ ᐃᕉᑕᓯᒥ ᐱᕈᕐᓴᓚᐅᕐᑐᖅ, ᓴᐅᓗᓯᓗ. 2 ᐊᑕᓂᕐᒧᑦ ᑐᒃᓯᐊᕐᑎᓪᓗᒋᑦ ᓂᕆᑦᑍᓕᓪᓗᑎᒡᓗ, ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᑎᕔᑦ, “ᐸᕐᓇᐹᓯᒃᑯᒃ ᓴᐅᓗᓯᒃᑯᒃ ᑎᓕᓚᐅᕐᓯᒋᒃ ᐱᓇᓱᐊᖁᓪᓗᒋᒃ; ᑕᒪᑐᒧᖓ ᕾᖁᓯᒪᒐᒃᑭᒃ.” 3 ᑖᒃᑯᐊ ᓂᕆᑦᑍᓕᓪᓗᑎᑦ ᑐᒃᓯᐊᕇᕋᒥᒃ, ᐸᑎᒻᒥᕚᒃ ᑎᓕᓪᓗᒋᒡᓗ. ᓮᐳᕋᓯᒥ 4 ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑎᓕᔭᐅᒐᒥᒃ, ᓯᓘᓯᐊᒧᐊᕐᐴᒃ; ᑕᕝᕙᓐᖓᑦ ᐅᒥᐊᒃᑯᑦ ᕿᑭᕐᑕᒧᐊᕐᐴᒃ ᓮᐳᕋᓯᒥᒃ ᐊᑎᓕᖕᒧᑦ. 5 ᓄᓇᓕᖕᓄᑦ ᓴᓛᒥᓯᒧᐊᕋᒥᒃ, ᒎᑎᐅᑉ ᐅᖃᐅᓯᖏᓐᓂᒃ ᐊᔪᕆᕐᑐᐃᕘᒃ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ. ᔪᐊᓇᓯ ᒫᑯᓯ ᐃᑲᔪᕐᑎᒋᓪᓗᒍ. 6 ᕿᑭᕐᑕᒥ ᑕᕝᕙᓂ ᓄᓇᖃᕐᑐᓕᒫᓄᑦ ᐂᓕᕐᓗᑎᒃ ᐹᐳᓯᒧᐊᕐᐴᒃ, ᑕᕝᕙᓂ ᐊᖓᒃᑯᒥᒃ ᑲᑎᓯᕘᒃ ᐹᕐ-ᔩᓱᓯᒥᒃ ᐊᑎᓕᖕᒥᒃ, ᑖᓐᓇ ᔫᑎᐅᕗᖅ ᐃᒻᒥᓂᒡ ᓇᓚᐅᑦᑍᔪᓂᕋᕐᑐᖅ. 7 ᐃᓚᓐᓇᕆᔭᖃᓚᐅᕐᐳᖅ ᕿᑭᕐᑕᒥᐅᑦ ᐊᖓᔪᖅᑳᖓᓐᓂᒃ ᓰᕐᒋᐊᓯ ᐸᐅᓛᓯᒥᒃ ᐊᑎᓕᖕᒥᒃ ᓯᓚᑐᔪᒥᒃ, ᐊᖓᔪᖅᑳᕐᓗ ᑖᓐᓇ ᕾᖁᔨᕗᖅ ᐸᕐᓇᐹᓯᒥᒃ ᓴᐅᓗᓯᒥᒡᓗ, ᒎᑎᐅᑉ ᐅᖃᐅᓯᖏᓐᓂᒃ ᑐᓴᕈᒪᓪᓗᓂ. 8 ᑖᑦᓱᒪᓕ ᐊᖓᒃᑰᑉ ᒍᕇᑭᑎᑐᑦ ᐃᓔᒪᓯᒥᒃ ᐊᑎᓕᐅᑉ ᐊᑭᕋᕐᑐᕐᐹᒃ, ᐊᖓᔪᖅᑳᖅ ᐅᒃᐱᕐᓂᕐᒥᒃ ᑕᒪᑐᒥᖓ ᑲᒪᔪᓐᓃᕐᑎᓐᓇᓱᐊᕐᐹ. 9 ᓴᐅᓗᓯ ᐸᐅᓗᓯᒥᒃ ᑍᔭᐅᕙᖕᒥᔪᖅ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᓪᓗᓂ, ᐊᖓᒃᑯᖅ ᑖᓐᓇ ᑕᑯᓐᓈᓕᕐᐹ. 10 ᐅᖃᕐᓗᓂ, “ᓵᑖᓇᓯᐅᑉ ᐃᕐᓂᖓ, ᓇᓛᒎᕐᑐᓕᒫᓂᒃ ᐊᑭᕋᕐᑐᕐᑎᐅᔪᑎᑦ, ᓯᓔᕐᕆᒃᓯᓂᐊᓗᖕᓂᒃ ᓴᒡᓗᓂᕐᓂᒡᓗ ᑕᑕᑦᑐᑎᑦ, ᐊᑕᓂᐅᑉ ᐊᖅᑯᑎᖓᑕ ᓱᓕᑦᓯᐊᕐᓂᖓᓂᒃ ᓴᖑᑎᑦᓯᓇᓱᐊᖏᓐᓇᕐᓂᐊᕐᐲᑦ? 11 ᒫᓐᓇ ᑕᑯᒋᑦ, ᐊᑕᓂᐅᑉ ᓱᒋᐊᕐᓂᐊᕐᐹᑎᑦ, ᑕᐅᑐᒍᓐᓃᕐᓂᐊᕐᐳᑎᑦ ᐊᑯᓂ ᓯᕿᓂᕐᒥᒃ ᑕᑯᔪᓐᓁᓪᓕᓂᐊᕐᐳᑎᑦ.” ᑕᕝᕔᓐᓇᖅ ᐃᓔᒪᓯᐅᑉ ᑕᐅᑐᒃᑕᖓ ᐳᔪᕐᒧᑦ ᑖᕐᑐᒧᑦ ᐅᓕᒃᑕᐅᕗᖅ, ᑕᒪᐅᖓᑐᐃᓐᓇᖅ ᕿᓂᓕᕐᐳᖅ ᑕᓯᐅᕐᑎᒃᓴᒥᓂᒃ. 12 ᑕᕝᕙ ᐊᖓᔪᖅᑳᖅ ᐅᒃᐱᓕᕐᐳᖅ, ᑕᒪᓐᓇ ᐱᓂᐊᕐᓂᐅᔪᖅ ᑕᑯᒐᒥᐅᒃ, ᐊᑕᓂᐅᑉ ᐊᔪᕆᕐᑐᐃᑦᔪᑕᐅᓂᖓ ᐊᖏᔪᒥᒃ ᑲᒪᓂᐊᕈᑎᒋᕚ. ᐊᓐᑎᐅᑭᐊᒥ ᐱᓯᑎᐊᒥᓗ 13 ᐸᐅᓗᓯ ᐱᓇᓱᐊᖃᑎᓂ ᐃᓚᒋᓪᓗᒋᑦ ᐅᒥᐊᕐᑐᓕᕐᐳᑦ ᐹᐳᓯᒥᑦ, ᐃᒡᓗᒐᓴᖕᓄᑦ ᐴᕐᒐᒧᑦ ᐊᑎᓕᖕᓄᑦ ᑎᑭᓪᓗᑎᒃ ᐸᒻᐱᓕᐊᒦᑦᑐᒧᑦ. ᑕᕝᕙᓂ ᔪᐊᓇᓯ ᒫᑯᓯᐅᑉ ᑭᒪᒃᐹᒃ ᔨᕉᓴᓕᒻᒧᑦ ᐅᑎᕐᓗᓂ. 14 ᑖᒃᑯᐊ ᐴᕐᒐᒥᑦ ᐊᓐᑎᐅᑭᐊᒧᐊᕐᐳᑦ ᐱᓯᑎᐊᒦᑦᑐᒧᑦ, ᓴᐸᑎᐅᓕᕐᒪᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓄᐊᕐᐳᑦ ᐃᒃᓯᕙᓕᕐᓗᑎᒃ. 15 ᒨᓯᓯᐅᑉ ᐱᖁᔭᖏᑦ ᓇᓚᐅᑦᑍᔪᓪᓗ ᐅᖃᐅᓯᖏᑦ ᐅᖃᓕᒫᕐᑕᐅᔭᕇᕐᒪᑕ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᑦᑕ ᐊᖓᔪᖅᑳᖏᑕ ᐅᖃᐅᑦᔭᐅᔭᕐᑐᖁᕚᒃ ᐅᖃᕐᓗᓂ, “ᐃᓅᖃᑎᒃᑲ, ᐱᕙᓪᓕᕈᑎᒃᓴᒥᒃ ᐃᓄᖕᓄᑦ ᐅᖃᐅᓯᒃᓴᖃᕈᑦᓯ ᐅᖃᓪᓚᖁᔨᕗᒍᑦ.” 16 ᐸᐅᓗᓯ ᓂᑯᕕᑉᐳᖅ ᐃᓵᓚᐅᕐᓗᓂ ᐅᖃᕐᐳᖅ: “ᐃᓴᕆᐊᓕᒥᐅᖑᔪᓯ, ᐃᓕᑦᓯᓗ ᒎᑎᒧᑦ ᐅᒃᐱᕐᑐᓯ ᑕᒪᑦᓯ, ᓈᓚᒃᓯᖓ. 17 ᐃᓄᐃᑦ ᐃᓴᕆᐊᓕᒥᐅᑦ ᒎᑎᖓᑦᑕ ᓯᕗᓕᕕᓂᕗᑦ ᓂᕈᐊᓚᐅᕐᐰᑦ, ᐃᓄᒋᐊᒃᑐᐊᓘᓕᕐᑎᓚᐅᕐᐰᑦ ᐄᑦᔨᑉᑎᒥ ᓄᓇᖃᕐᑎᓪᓗᒋᑦ, ᐱᔪᓐᓇᕐᓂᕐᔪᐊᒥᓄᑦ ᐊᐅᓪᓚᕐᑎᓚᐅᕐᐰᑦ ᐄᑦᔨᑉᑎᒥᑦ. 18 ᐊᕐᕌᒍᓂᒃ 40ᓂᒃ ᐃᓄᖃᖏᑦᑐᒥ ᕿᓄᐃᓵᕈᑎᒋᓚᐅᕐᐰᑦ. 19 ᐃᓅᖃᑎᒋᒡᔪᐊᑦ 7 ᓵᓚᒋᒐᒥᒋᑦ ᑬᓇᓂᒥ ᓄᓇᖃᕐᑐᑦ, ᑕᒪᓐᓇ ᓄᓇ ᓇᖕᒥᓂᕐᑖᕆᔭᐅᑎᓚᐅᕐᐹ ᐃᓴᕆᐊᓕᒥᐅᓄᑦ, ᐊᕐᕌᒍᓂᒃ 450ᓂᒃ. 20 “ᑭᖑᓂᖓᒍᑦ ᐃᓱᒪᓕᐅᕐᑎᓄᑦ ᐱᓇᓱᐊᕐᕕᐅᑎᓚᐅᕐᐰᑦ, ᓇᓚᐅᑦᑍᔪᑦ ᓴᒧᐃᓕ ᑎᑭᓪᓗᒍ. 21 ᐊᖓᔪᖅᑳᕐᔪᐊᒃᓴᒥᒡᓗ ᑐᒃᓯᕋᕐᒪᑕ; ᒎᑎᐅᑉ ᑐᓂᓯᕕᒋᓚᐅᕐᐰᑦ ᓴᐅᓕᒥᒃ ᑭᓯᐅᑉ ᐃᕐᓂᖓᓂᒃ, ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᔪᖅ ᐊᖓᔪᖅᑳᕐᔪᐊᖑᖁᓪᓗᒍ ᐊᕐᕌᒍᓂᒃ 40ᓂᒃ. 22 ᓴᐅᓕ ᐊᖓᔪᖅᑲᐅᕕᖕᒥᑦ ᐲᕐᑎᓐᓇᒥᐅᒃ, ᑍᕕᑎ ᑖᒃᑯᓄᖓ ᐊᖓᔪᖅᑳᕐᔪᐊᓐᖑᕐᑎᓚᐅᕐᐹ; ᐃᒫᒃ ᐅᖃᐅᓯᕆᓪᓗᒍ, ‘ᑍᕕᑎ ᓇᓂᕙᕋ ᔨᓯᐅᑉ ᐃᕐᓂᖓ ᐊᖑᑦ ᓈᒻᒪᒋᔭᕋ ᐊᑐᕐᑕᐅᖁᔭᓐᓂᒃ ᐊᑐᑦᓯᐊᕈᓐᓇᕐᑐᖅ.’ 23 ᑍᕕᑎᐅᑉ ᑭᖑᕚᖓ ᐃᓴᕆᐊᓕᒥᐅᓄᑦ ᒎᑎᐅᑉ ᐱᐅᓕᔨᓐᖑᕐᑎᓚᐅᕐᐹ, ᔩᓱᓯ, ᑍᒫᒃ ᐱᓂᐊᕐᓂᕋᕐᓯᒪᒐᒥ. 24 ᔩᓱᓯ ᐱᓇᓱᐊᓚᐅᕐᑎᓐᓇᒍ ᔪᐊᓇᓯ ᐊᔪᕆᕐᑐᐃᓚᐅᕐᐳᖅ ᐃᓴᕆᐊᓕᒥᐅᓕᒫᑦ ᖃᕿᐊᓕᖁᓪᓗᒋᑦ ᐹᑉᑎᑕᐅᖁᓪᓗᒋᓪᓗ. 25 ᔪᐊᓇᓯ ᐱᔭᕇᓕᕋᒥ ᐱᔭᒃᓴᒥᓂᒃ ᐅᖃᓚᐅᕐᐳᖅ, ‘ᐃᓕᑦᓯ ᑭᓇᐅᓇᓱᒋᕕᓯᓐᖔ? ᑖᓐᓇᐅᓐᖏᓚᖓ ᐅᑕᖅᑭᔭᓯ. ᑕᑯᒋᑦ ᑭᖑᓂᒃᑯᑦ ᕾᓂᐊᕐᐳᖅ, ᓇᓗᖅᑯᑎᕗᖓᓘᓐᓃᑦ ᐃᑎᒐᒍᑎᖏᒃᑕ ᓯᖏᖏᓐᓂᒃ ᕿᓚᕈᑦᔮᕐᓯᔭᕆᐊᒃᓴᖅ.’ 26 “ᐃᓴᕆᐊᓕᒥᐅᖑᖃᑎᒃᑲ, ᐂᑉᕋᕼᐋᒻ ᑭᖑᕚᖏᑦ, ᐃᓕᑦᓯᓗ ᐅᕙᓃᑦᑐᓯ ᒎᑎᒥᒃ ᓯᕘᕋᔪᓯ, ᐅᕙᑦᑎᓐᓄᑦ ᐅᖃᐅᓰᑦ ᑕᒪᒃᑯᐊ ᐱᐅᓕᔭᐅᓇᕐᑐᑦ ᑐᓂᔭᐅᓯᒪᕗᑦ. 27 ᐃᓄᐃᑦ ᔨᕉᓴᓕᒻᒥ ᓄᓇᖃᕐᑐᑦ ᐊᖓᔪᖅᑳᕆᔭᖏᓪᓗ ᖃᐅᔨᒪᓚᐅᖏᒻᒪᑕ ᐱᐅᓕᔨᐅᖕᒪᖔᑦ, ᑐᑭᓯᓚᐅᖏᒻᒪᑕᓘᓐᓃᑦ ᓇᓚᐅᑦᑍᔪᑦ ᐅᖃᐅᓯᖏᓐᓂᒃ ᓴᐸᑎᑕᒫᑦ ᐅᖃᓕᒫᕐᑕᐅᕙᒃᑲᓗᐊᕐᑎᓪᓗᒋᑦ, ᔩᓱᓯᒥᒃ ᑐᖁᑕᒃᓴᓐᖑᕐᑎᑦᓯᓂᕐᒥᒍᑦ ᐅᖃᐅᓰᑦ ᓇᓚᐅᑦᓯᑎᑕᐅᓚᐅᕐᐳᑦ. 28 ᓇᓂᓯᔪᓐᓇᖏᒃᑲᓗᐊᕋᒥᒃ ᑐᖁᑕᐅᑦᔪᑎᒃᓴᖓᓂᒃ, ᐰᓛᑑᓯᒥᒃ ᑎᓕᓯᓚᐅᕐᐳᑦ ᑖᓐᓇ ᑐᖁᑕᐅᖁᓪᓗᒍ. 29 ᑖᑦᓱᒥᖓ ᐅᖃᐅᓯᖃᕐᓯᒪᔪᑦ ᒎᑎᐅᑉ ᐅᖃᐅᓯᖏᓐᓂ ᑕᒪᕐᒥᑦᓯᐊᖅ ᓇᓚᐅᑦᓯᔭᕇᕐᒪᑕ, ᐊᖅᑲᕐᑎᓚᐅᕐᐹᑦ ᓴᓐᓂᖓᔪᓕᖕᒥᑦ, ᐃᓗᕕᕐᓗᒍ. 30 ᒎᑎᐅᓪᓕ ᐆᒻᒪᕐᑎᓚᐅᕆᕚ ᑐᖁᒥᑦ; 31 ᐅᓪᓗᓂᒡᓗ ᐊᒥᓱᓂᒃ ᓴᖅᑭᖃᑦᑕᓚᐅᕐᐳᖅ ᐃᖏᕐᕋᖃᑎᒋᖃᑦᑕᓚᐅᕐᑕᒥᓄᑦ ᒐᓕᓕᐊᒥᑦ ᔨᕉᓴᓕᒻᒧᑦ, ᑕᑯᓚᐅᕐᑐᑦ ᑕᕝᕙ ᒫᓐᓇ ᓇᓗᓁᕐᓯᔨᐅᓕᕐᐳᑦ ᐃᓄᖕᓄᑦ. 32 ᐅᕙᒍᓪᓗ ᐅᕙᓃᑉᐳᒍᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᑐᓴᕐᑎᑕᐅᖁᓪᓗᓯ, ᓯᕗᓕᕕᓂᑦᑎᓐᓄᑦ ᒎᑎᐅᑉ ᐱᓂᐊᕐᓂᕋᕐᓯᒪᔭᖓᓂᒃ, 33 ᑕᒪᓐᓇ ᐱᓇᓱᐊᕇᓚᐅᕐᐹ ᐅᕙᑦᑎᓐᓄᑦ ᑭᖑᕚᖑᔪᓄᑦ ᔩᓱᓯ ᐆᒻᒪᕐᑎᓐᓇᒥᐅᒃ; ᐅᕙᓂ ᑎᑎᕋᕐᓯᒪᖕᒪᑦ ᐃᓐᖏᕈᒻᒥ 2ᒥ, ‘ᐃᕐᓂᕆᕙᒋᑦ, ᐅᓪᓗᒥ ᐃᕐᓂᕐᑖᕆᕙᒋᑦ.’ 34 ᑐᖁᖓᔪᓂᑦ ᐆᒻᒪᕐᑎᓐᓇᒥᐅᒃ, ᐅᑎᒃᑲᓐᓂᕐᓂᐊᕐᓂᕋᕈᓐᓃᕐᓗᒍ ᑐᖁᒧᑦ ᑎᒥᒥᒃ ᐃᒍᓇᕐᑎᑦᓯᔪᒧᑦ, ᑭᖑᓂᖓᓂ ᐃᒫᒃ ᐅᖃᓚᐅᕐᐳᖅ: ‘ᑐᓂᓯᕕᒋᓂᐊᕐᐸᑦᓯ ᓮᒻᒪᕐᑎᓪᓗᓯ ᑍᕕᑎᒧᑦ ᐊᖏᕈᑎᒋᓚᐅᕐᑕᓐᓂᒃ.’ 35 ᑍᒫᒃᑕᐅᖅ ᐃᓐᖏᕈᑎᓂ ᓱᓕ ᐅᖃᕐᓯᒪᕗᖅ, ‘ᐃᑦᔪᕐᓁᑦᑐᖁᑏᑦ ᐃᒍᓇᖁᓂᐊᓐᖏᓚᑦ ᐃᓗᕕᕐᒥ.’ 36 ᑍᕕᑎ ᐱᔨᑦᓯᓚᐅᕐᐳᖅ ᒎᑎᐅᑉ ᐱᔪᒪᔭᖓ ᒪᓕᒡᓗᒍ, ᑭᖑᓂᖓᒍᓪᓕ ᑐᖁᓚᐅᕐᐳᖅ ᐃᓕᔭᐅᓪᓗᓂ ᓯᕗᓕᕕᓂᕐᒥ ᐃᓗᕕᕐᑕᐅᕕᖓᓐᓄᑦ, ᑎᒥᖓ ᐃᓗᕕᕐᒥ ᐃᒍᓇᓚᐅᕐᐳᖅ; 37 ᑖᑦᓱᒪᓕ ᒎᑎᐅᑉ ᐆᒻᒪᕐᑎᓚᐅᕐᑕᖓᑕ ᑎᒥᖓ ᐃᒍᓇᓚᐅᓐᖏᓚᖅ. 38 ᑍᒤᒻᒪᑦ ᐃᓅᖃᑎᒃᑲ ᖃᐅᔨᒪᓕᕆᑦᓯ, ᐃᓄᒃᑯᑦ ᑖᑦᓱᒨᓇ ᐊᔪᕐᓂᕐᓂᑦ ᐃᓱᒪᒋᔪᓐᓁᕕᐅᔪᒃᓇᕐᓂᕐᒥᒃ ᐅᖃᕐᕕᐅᕗᓯ, 39 ᑖᑦᓱᒨᓇ ᑕᒪᕐᒥᑦᓯᐊᑦ ᐅᒃᐱᕐᑐᑦ ᕿᓚᕈᑦᔮᕐᑕᐅᕗᑦ ᕿᓚᒃᓱᕐᑕᐅᕕᒋᓯᒪᔭᓕᒫᒥᖕᓂᑦ, ᒨᓯᓯᐅᑉ ᐱᖁᔭᖏᑎᒍᑦ ᕿᓚᕈᑦᔮᕐᑕᐅᕕᒋᔪᓐᓇᓐᖏᑕᒥᖕᓂᑦ. 40 ᒫᓐᓇ ᑍᒤᒻᒪᑦ ᖃᐅᔨᒪᑦᓯᐊᓕᕆᑦᓯ, ᓇᓚᐅᑦᑍᔪᑎᒍᑦ ᐅᖃᐅᓯᐅᓯᒪᔪᓄᑦ ᓇᓚᐅᑕᐅᓕᖁᓇᓯ ᐃᒤᓕᔪᓂᑦ: 41 ‘ᑕᑯᒋᑦᓯ, ᒥᑕᐅᑎᒃᓴᕐᑎᐅᔪᓯ, ᑕᑕᒥᓐᓂᐊᕐᓗᓯᓗ, ᐊᓯᕈᕐᑕᐅᓕᕆᑦᓯ; ᐃᓅᑎᓪᓗᓯ ᐱᓂᐊᕐᓂᖃᕐᓂᐊᕋᒪ, ᐱᓂᐊᕐᓂᕐᓂᒃ ᐅᒃᐱᕆᔭᕆᐊᒃᓴᖅ ᐊᔪᕐᑕᑦᓯᓐᓂᒃ, ᐅᖃᐅᓯᐅᒐᓗᐊᕐᐸᑦ ᑐᑭᓯᓇᕐᓯᑎᑕᐅᒐᓗᐊᕐᐸᓪᓘᓐᓃᑦ.’” 42 ᐸᐅᓗᓯᒃᑯᒃ ᐸᕐᓇᐹᓯᒃᑯᒃ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂᑦ ᐊᓂᓕᕐᑎᓪᓗᒋᒃ, ᐃᓄᖕᓂᑦ ᓴᐸᑎᐅᓕᕐᒥᒃᐸᑦ ᐅᑎᒃᑲᓐᓂᖁᔭᐅᕘᒃ, ᑕᒪᒃᑯᓂᖓ ᐅᖃᕐᕕᐅᒃᑲᓐᓂᕈᒪᓪᓗᑎᒃ. 43 ᔫᑎᑦ ᑲᑎᒪᕕᖓᓐᓂ ᑲᑎᒪᔭᕇᕋᒥᒃ, ᔫᑎᑦ ᐊᒥᓱᑦ, ᔫᑎᐅᖏᑦᑐᓪᓗ ᐊᒥᓱᑦ ᔫᑎᓐᖑᕐᑎᑕᐅᓯᒪᔪᑦ ᒪᓕᒃᐳᑦ ᐸᐅᓗᓯᒥᒃ ᐸᕐᓇᐹᓯᒥᒡᓗ, ᐸᐅᓗᓯᒃᑯᒃ ᑖᒃᑯᓄᖓ ᐅᖃᓪᓚᒃᐴᒃ ᐃᓇᒃᓱᕐᓗᒋᑦ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂ ᐃᓅᖏᓐᓇᖁᓪᓗᒋᑦ. 44 ᓴᐸᑎᐅᒃᑲᓐᓂᓕᕐᒪᑦ ᓄᓇᓖᑦ ᐃᓄᓕᒫᑲᓴᖏᑦ ᑲᑎᒪᔭᕐᑐᕐᐳᑦ ᑐᓵᔭᕐᑐᕐᓗᑎᒃ ᐊᑕᓂᐅᑉ ᐅᖃᐅᑕᐅᓂᖓᓂᒃ. 45 ᔫᑎᓪᓕ ᐃᓄᒋᐊᒃᑐᐊᓗᖕᓂᒃ ᑕᑯᒐᒥᒃ ᐊᑲᐅᒃᓴᕈᓐᓃᕐᐳᑦ ᓵᓐᖓᔭᐅᓂᕐᓴᐅᔪᒪᓪᓗᑎᒃ; ᐅᖃᐅᓯᕐᒥᖕᓄᑦ ᓵᓚᖃᕋᓱᐊᕐᐳᑦ ᐸᐅᓗᓯᒥᒃ ᐱᐅᒋᔭᐅᔪᓐᓃᑎᓇᓱᐊᕐᖢᒍ. 46 ᐸᐅᓗᓯᒃᑯᒡᓕ ᐸᕐᓇᐹᓯᒃᑯᒃ ᓯᕘᕋᓇᑎᒃ ᐅᖃᓚᓪᓕᕐᐴᒃ ᐃᒫᒃ, “ᐱᔭᕆᐊᖃᒻᒪᕆᓚᐅᕐᒪᑦ ᐊᑕᓂᐅᑉ ᐅᖃᐅᑕᐅᓂᖓ ᐃᓕᑦᓯᓐᓄᑦ ᓯᕗᓪᓕᕐᐹᒥᒃ ᐅᖃᐅᓯᐅᖁᓪᓗᒍ. ᑭᓯᐊᓂᓕ ᐃᓚᓕᐅᖏᓐᓇᑦᓯᐅᒃ ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᔪᒃᓴᐅᔪᓐᓃᕐᑎᓐᓇᑦᓯ ᐃᓕᑦᓯᓐᓂᒃ, ᔫᑎᐅᖏᑦᑐᓄᑦ ᑕᕝᕙ ᓵᓐᓂᐊᓕᕐᐳᒍᑦ. 47 ᐃᒫᒃ ᐊᑕᓂᐅᑉ ᐱᖁᓯᒪᖕᒪᑎᒍᑦ: ‘ᖃᐅᒻᒪᒃᓮᔪᒃᓴᓐᖑᕐᑎᓚᐅᕐᐹᓯ ᔫᑎᐅᖏᑦᑐᓄᑦ, ᓄᓇᕐᔪᐊᕐᒥᐅᑦ ᐅᖓᓯᒃᑐᒦᑦᑐᑦ ᐱᐅᓕᔭᐅᓂᕐᒥᒃ ᑐᓴᕐᑎᑕᐅᖁᓪᓗᒋᑦ.’” 48 ᔫᑎᐅᖏᑦᑐᓪᓕ ᑕᒪᑐᒥᖓ ᑐᓴᕋᒥᒃ ᖁᕕᐊᓱᒃᑐᐊᓘᕗᑦ, ᐊᑕᓂᖅ ᓂᕐᑐᕐᐹᑦ ᐅᖃᐅᓯᖏᑦ ᐱᓪᓗᒋᑦ; ᐃᓄᓯᕐᒥᒃ ᓄᖑᓱᐃᑦᑐᒥᒃ ᐱᑎᑕᐅᒐᒥᒃ ᐅᒃᐱᓕᕐᓗᑎᒡᓗ. 49 ᐊᑕᓂᐅᑉ ᐅᖃᐅᓯᖏᑦ ᓯᐊᒻᒪᕐᑎᑕᐅᕗᑦ ᓄᓇᓕᖕᓄᑦ ᖃᓂᒋᔭᖏᓐᓃᑦᑐᓕᒫᓄᑦ. 50 ᔫᑎᓪᓕ ᐅᐃᒪᔮᕐᑎᑦᓯᓕᕐᐳᑦ ᐊᕐᓇᓂᒃ ᐅᒃᐱᕐᑐᓂᒃ ᐱᓪᓚᕆᐅᑎᑕᐅᔪᓂᒃ, ᐊᖑᑎᓂᒡᓗ ᐊᐅᓚᑦᓯᔨᐅᔪᓂᒃ ᓄᓇᓕᖕᓂ, ᐊᑭᕋᕐᑐᕐᑕᐅᑎᑦᓯᓕᕐᓗᑎᒃ ᐸᐅᓗᓯᒥᒃ ᐸᕐᓇᐹᓯᒥᒡᓗ, ᐊᐅᓪᓚᕐᑎᓪᓗᒋᒡᓗ ᓄᓇᓕᖕᓂᑦ: 51 ᐸᐅᓗᓯᒃᑯᒡᓕ ᐸᕐᓇᐹᓯᒃᑯᒃ ᓴᓃᑦ ᐃᑎᒐᖕᒥᖕᓂᑦ ᐲᔭᕐᐹᒃ ᐂᑯᓂᐊᒧᓪᓗ ᐊᐅᓪᓚᕐᓗᑎᒃ. 52 ᐃᓕᓐᓂᐊᕐᑐᓪᓕ ᖁᕕᐊᓱᖕᓂᕐᒥᒃ ᐃᓗᒻᒥᕐᑕᐅᕗᑦ ᐊᓂᕐᓂᕐᒥᒡᓗ ᐃᑦᔪᕐᓁᑦᑐᒥ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society