ᐋᐴᓯᑕᓖᑦ ᐱᓂᐊᕐᓂᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᐲᑦᑐᕉᓯᐅᑉ ᑎᒍᔭᐅᓂᖓ

¹ ᑍᑦᓱᒪᓂ ᐊᖓᔪᖅᑳᕐᔪᐊᖅ ᐃᕉᑕᓯ ᐅᒃᐱᕐᑑᖃᑎᒌᓄᑦ ᓂᑲᒍᓱᒐᓂ ᐊᑭᕋᕐᑐᓕᓚᐅᕐᐳᖅ.

² ᔧᒥᓯ ᑐᖁᑕᐅᑎᑉᐹ ᓴᕕᒡᔪᐊᒧᑦ, ᔪᐊᓇᓯᐅᑉ ᐊᖓᔪᐊ;

³ ᑐᑭᓯᒐᒥᓗ ᑕᒪᓐᓇ ᔫᑎᓄᑦ ᐊᑲᐅᒋᔭᐅᖕᒪᑦ, ᐲᑦᑐᕉᓯ ᑎᒍᔭᐅᑎᒃᑭᕚ. ᐳᕙᓪᓚᖅᑯᑎᖃᖏᑦᑐᓂᒃ ᓂᐊᖂᔭᓂᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᑎᓯᒪᑎᓪᓗᒍ.

⁴ ᑎᒍᒐᒥᐅᒃ, ᑎᒍᔭᐅᓯᒪᕕᖕᒧᐊᕐᑎᑉᐹ, ᑲᒪᒋᔭᐅᑎᓪᓗᒍ ᐅᓇᑕᕐᑐᒃᓴᓄ ᓯᑕᒤᓄᑦ ᐊᕕᒃᑐᕐᓯᒪᔪᓄᑦ ᐊᑐᓂᑦ ᓯᑕᒪᐅᓪᓗᑎᒃ, ᐃᓄᐃᑦ ᓵᖏᓐᓂ ᐃᖅᑲᕐᑐᕐᑕᐅᑎᑦᓱᒪᓪᓗᓂᐅᒃ ᖄᖏᕐᑕᐅᕕᒃ ᐊᓂᒍᕐᐸᑦ.

⁵ ᑍᒤᒻᒪᑦ ᐲᑦᑐᕉᓯ ᑎᒍᔭᐅᓯᒪᕕᖕᒦᓕᓚᐅᕐᐳᖅ; ᐃᓚᒌᒃᑐᓪᓕ ᐅᒃᐱᕐᑑᖃᑎᒌᑦ ᐃᓗᖏᕐᓱᕐᓗᑎᒃ ᒎᑎᒧᑦ ᑐᒃᓯᐊᕈᑎᒋᓚᐅᕐᐹᑦ.

ᐲᑦᑐᕉᓯᐅᑉ ᐊᓂᑎᑕᐅᓂᖓ ᑎᒍᔭᐅᓯᒪᕕᖕᒥᑦ

⁶ ᐅᓐᓄᖕᒥ ᑕᑉᕙᓂ ᐃᕉᑕᓯᐅᑉ ᖃᐅᒃᐸᑦ ᐊᓂᑎᑦᓱᒪᓕᕐᑎᓪᓗᓂᐅᒃ, ᐲᑦᑐᕉᓯ ᐅᓇᑕᕐᑐᒃᓵᒃ ᒪᕐᕉᒃ ᐊᑯᓐᓂᖓᓂ ᓯᓂᓚᐅᕐᐳᖅ, ᐊᕐᓵᕐᑑᔭᓄᑦ ᐊᑦᑐᖏᕐᓯᒪᓪᓗᓂ ᑖᒃᑯᖕᓅᖓ, ᖃᐅᔨᓴᕐᑏᒃ ᑎᒍᔭᐅᓯᒪᕕᐅᑉ ᐃᑎᕐᕕᖓᑕ ᐊᕙᑎᖏᖕᓃᓪᓗᑎᒃ;

⁷ ᑕᑯᒋᑦ, ᑕᕝᕔᓐᓇᖅ ᐊᑕᓂᐅᑉ ᐂᖏᓖᖓ ᓴᖅᑭᑉᐳᖅ, ᑎᒍᔭᐅᓯᒪᕕᐅᓪᓗ ᐃᓗᐊ ᖃᐅᒻᒪᒃᑎᐹ; ᐲᑦᑐᕉᓯ ᑐᐃᖓᒍᑦ ᐊᒃᑐᕐᓗᒍ ᑐᐹᕐᐹ ᐅᖃᐅᑎᓪᓗᒍ, “ᑐᐊᕕᕐᓗᑎᑦ ᒪᑭᒋᑦ.” ᐊᕐᓵᕐᑑᔧᑦ ᐊᒡᒐᐅᑎᖏᖕᓂᑦ ᑲᑕᒃᐳᑦ.

⁸ ᐂᖏᓕᐅᑉ ᐅᖃᐅᑎᕚ, “ᐊᓐᓄᕌᓕᕆᑦ, ᐃᑎᒐᒍᑏᒃᑭᒃ ᐊᑎᓗᒋᒃ.” ᐲᑦᑐᕉᓯᓗ ᑍᒤᓕᐅᕐᐳᖅ. ᐂᖏᓕ ᐅᖃᕆᕗᖅ, “ᐅᓖᑦ ᐊᑎᓗᒍ ᒪᓕᓐᖓ.”

⁹ ᐲᑦᑐᕉᓯᐅᑉ ᐂᖏᓕ ᐊᓂᓕᕐᑎᓪᓗᒍ ᒪᓕᒃᐹ; ᖃᐅᔨᒪᓐᖏᓚᖅ ᓱᓕᓪᓚᕆᒃᑐᒥᒃ ᐂᖏᓕ ᑍᒤᓕᐅᕐᒪᖔᑦ, ᐃᓱᒪᓚᐅᕐᐳᕐᓕ ᑕᑯᑎᑕᐅᓇᓱᒋᓪᓗᓂ.

¹⁰ ᐅᓇᑕᕐᑐᒃᓮᑦ ᖃᐅᔨᓴᕐᑎᐅᔫᒃ ᓯᕗᓪᓕᕐᐹᒃ ᐂᑉᐸᖏᒡᓗ ᖄᖏᕋᒥᒃᑯᒃ, ᐅᒃᑯᐊᕐᔪᐊᕐᒧᑦ ᓴᕕᕋᔭᖕᒧᑦ ᑎᑭᑉᐴᒃ ᐃᑎᕐᑕᕐᕕᖕᒧᑦ ᓯᓚᓪᓕᕐᐹᒦᑦᑐᒧᑦ, ᐃᒻᒥᓂᒡᓗ ᑖᓐᓇ ᐅᒃᑯᐃᕐᐳᖅ, ᐊᓂᒐᒥᒃ ᐊᑐᕆᐊᒃᑯᑦ ᐱᓱᓕᕐᐳᒃ; ᑕᕝᕔᓐᓇᕐᓗ ᐂᖏᓕᐅᑉ ᐲᑦᑐᕉᓯ ᕿᒪᒃᐹ.

¹¹ ᐲᑦᑐᕉᓯ ᖃᐅᔨᑦᓯᐊᓕᕋᒥ ᐅᖃᓕᕐᐳᖅ, “ᒫᓐᓇ ᖃᐅᔨᑦᓯᐊᕐᐳᖓ ᐊᑕᓂᐅᑉ ᐂᖏᓕᓂ ᑎᓕᖕᒪᒍ ᓴᐳᑎᓪᓗᖓᓗ ᐃᕉᑕᓯᒥᑦ ᔫᑎᓪᓗ ᐱᓇᓱᐊᕈᒪᔭᖏᓐᓂᑦ.”

¹² ᐲᑦᑐᕉᓯᐅᑉ ᑕᒪᓐᓇ ᖃᐅᔨᒐᒥᐅᒃ, ᒥᐊᕆᐅᑉ ᐃᒡᓗᖓᓄᐊᕐᐳᖅ, ᔪᐊᓇᓯᐅᑉ ᒫᑯᓯᒥᒃ ᐊᑎᓕᐅᑉ ᐊᓈᓇᖓᓄᑦ, ᑕᕝᕙᓂ ᐊᒥᓱᑦ ᑲᑎᓐᖓᕗᑦ ᑐᒃᓯᐊᕐᓗᑎᒃ.

¹³ ᐲᑦᑐᕉᓯ ᐅᒃᑯᐊᑉ ᓯᓚᓪᓕᕐᐹᖓᓂ ᑎᒡᓗᒃᑐᕐᒪᑦ, ᐃᓅᓱᒃᑐᖅ ᐊᕐᓇᖅ ᕉᑕᒥᒃ ᐊᑎᓕᒃ ᑕᑯᔭᕐᑐᕐᐳᖅ.

¹⁴ ᐲᑦᑐᕉᓯᐅᑉ ᓂᐱᖓ ᐃᓕᑕᕆᒐᒥᐅᒃ, ᖁᕕᐊᓱᖕᓂᕐᒧᑦ ᐅᒃᑯᐃᕈᑎᓇᒍ ᐃᓗᒻᒧᑦ ᐅᓪᓚᒃᓯᕗᖅ, ᐅᖃᐅᑎᓪᓗᒋᑦ, ᐲᑦᑐᕉᓯ ᐅᒃᑯᐊᑉ ᓯᓚᑖᓃᓐᓂᕋᕐᓗᓂᐅᒃ.

¹⁵ ᑖᒃᑯᐊᓕ ᕉᑕᒧᑦ ᐅᖃᕐᐳᑦ, “ᐃᓱᒪᖃᕈᓐᓃᕐᐲ” ᑖᓐᓇᓕ ᓱᓕᓂᕋᕐᐳᖅ. ᑖᒃᑯᐊ ᑭᐅᕚᑦ, “ᐃᓐᓇ ᐲᑦᑐᕉᓯᐅᑉ ᑕᕐᓂᖓ.”

¹⁶ ᐲᑦᑐᕉᓯ ᓱᓕ ᑎᒡᓗᒃᑐᖃᑦᑍᓐᓇᕐᐳᖅ; ᐅᒃᑯᐃᕋᒥᑦᔪᒃ ᑕᑯᕚᑦ ᑲᒪᓂᐊᕐᓗᑎᒃ.

¹⁷ ᐲᑦᑐᕉᓯ ᐃᓵᒡᓗᓂ ᓂᐸᖏᖁᕔᑦ, ᐅᓂᒃᑳᕐᕕᒋᕔᓪᓗ ᖃᓄᖅ ᐊᑕᓂᕐᒧᑦ ᐊᓂᑎᑕᐅᓂᕐᒥᓂᒃ ᑎᒍᔭᐅᓯᒪᕕᖕᒥᑦ. ᐅᖃᐅᑎᓪᓗᒋᑦ, “ᔧᒥᓯ ᑕᒪᑐᒥᖓ ᐅᖃᐅᑎᓂᐊᕐᐸᓯ ᐅᒃᐱᕐᑑᖃᑎᒌᓪᓗ,” ᐊᓂᒐᒥ ᐊᓯᐊᓄᐊᓕᕐᐳᖅ.

¹⁸ ᖃᐅᑎᓪᓗᒍ ᐅᓇᑕᕐᑐᒃᓮᑦ ᐊᖏᔪᒥᒃ ᐅᐃᒪᔮᓕᕐᐳᑦ, ᐲᑦᑐᕉᓯ ᖃᓄᐃᓕᓐᓂᕐᒪᖔᑦ ᖃᐅᔨᓇᓱᒃᓗᑎᒃ.

¹⁹ ᐃᕉᑕᓯᐅᓪᓕ ᕿᓂᕐᑕᐅᑎᓕᕐᐹ ᓇᓂᔭᐅᔪᓐᓇᖏᒻᒪᓪᓕ, ᐅᓇᑕᕐᑐᒃᓮᑦ ᑲᒪᔨᐅᔪᑦ ᐊᐱᕐᓱᕐᑕᐅᑎᓕᕐᐰᑦ ᐊᐱᕐᓱᕐᑕᐅᔭᕇᕐᒪᑕ ᑐᖁᑕᐅᔭᕐᑐᖁᓕᕐᐰᑦ. ᑕᒪᑐᒪᓗ ᑭᖑᓂᖓᒍᑦ ᐃᕉᑕᓯ ᔫᑎᐊᒥᑦ ᓯᓴᕆᐊᒧᐊᕐᐳᖅ ᑍᑲᓃᓕᕐᓗᓂ.

ᐃᕉᑕᓯᐅᑉ ᑐᖁᓂᖓ

²⁰ ᐃᕉᑕᓯ ᓂᓐᖓᒃᓯᒪᓚᐅᕐᐳᖅ ᐃᓄᖕᓄᑦ ᑍᕆᒥᐅᓄᑦ ᓮᑐᓂᒥᐅᓄᓪᓗ; ᑖᒃᑯᐊ ᐃᕉᑕᓯᒥᒃ ᑲᑎᓯᔭᕐᑐᕐᐳᑦ, ᑖᑦᓱᒧᓐᖓᖏᓐᓂᕐᒥᖕᓂᓕ ᐸᓛᓯᑕᔅ ᐃᑲᔪᕐᑎᑖᕆᓇᓱᓚᐅᕐᐹᑦ; ᐊᖓᔪᖅᑳᕐᔪᐊᑉ ᐃᒡᓗᖓᓂᒃ ᑲᒪᔨᐅᔪᖅ, ᐃᕉᑕᓯᒧᐊᕋᒥᒡᓗ ᐃᓅᖃᑎᖃᑦᓯᐊᕈᒪᓪᓗᑎᒃ ᐅᖃᕐᐳᑦ, ᐊᖓᔪᖅᑳᕐᔪᐊᕐᒧᑦ ᑭᓯᐊᓂ ᓄᓇᖁᑎᖓᓂ ᓂᕿᒃᓴᖃᕐᑎᑕᐅᕙᒃᑲᒥᒃ.

²¹ ᐅᓪᓗᒥ ᑲᑎᕕᐅᔪᒪᔪᒥ ᐃᕉᑕᓯᐅᑉ ᐊᖓᔪᖅᑳᕐᔪᐊᕐᓯᐅᑎᓂ ᐊᓐᓄᕌᑦ ᐊᑎᕔᑦ, ᐃᒃᓯᕙᐅᑕᕐᔪᐊᕐᒧᑦ ᐃᖏᓪᓗᓂ, ᑖᒃᑯᓄᖓ ᐅᖃᓪᓚᓕᕐᐳᖅ.

²² ᐃᓄᐃᑦ ᕾᒐᓛᕐᐳᑦ, “ᐅᓇ ᐅᖃᓪᓚᑐᖅ ᐃᓄᑐᐃᓐᓇᐅᓐᖏᓚᖅ ᒎᑎᓕ ᐅᖃᓪᓚᒃᐳᖅ!”

²³ ᑕᕝᕔᓐᓇᖅ ᐊᑕᓂᐅᑉ ᐂᖏᓕᖓᑕ ᐊᓇᐅᕚ, ᒎᑎᒥᒃ ᓂᕐᑐᕐᓇᕐᑎᑦᓯᖏᒻᒪᑦ; ᖁᐱᕐᕈᓄᑦ ᓂᕆᔭᐅᓪᓗᓂ ᑐᖁᕗᖅ.

²⁴ ᒎᑎᐅᓪᓕ ᐅᖃᐅᓯᖏᑦ ᓯᐊᒻᒪᕐᐸᓪᓕᐊᕗᑦ ᐱᕙᓪᓕᐊᑐᐃᓐᓇᕐᓗᑎᒃᓗ.

²⁵ ᐸᕐᓇᐹᓯᒃᑯᒃ ᓴᐅᓗᓯᒃᑯ ᐅᑎᕐᐴᒃ ᔨᕉᓴᓕᒻᒥᑦ ᐱᓇᓱᐊᒐᒃᓴᑎᒃ ᐱᔭᕇᕋᒥᑦᔪᒃ, ᔪᐊᓇᓯ ᒫᑯᓯᒥᒃ ᑍᔭᐅᔪᖅ ᐃᓚᒋᓪᓗᒍ.