ᐋᐴᓯᑕᓖᑦ ᐱᓂᐊᕐᓂᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦᑰᓂᓘᓯᐅᑉ ᕾᖁᔨᓂᖓ ᐲᑦᑐᕉᓯᒥᒃ 1 ᓯᓴᕆᐊᒥ ᐊᖑᑎᑕᖃᓚᐅᕐᐳᖅ ᑰᓂᓕᐅᓯᒥᒃ ᐊᑎᓕᖕᒥᒃ, ᕉᒪᒥᐅᑦ ᐅᓇᑕᕐᑐᒃᓴᖁᑎᖏᓐᓄᑦ ᐊᖓᔪᖅᑳᕆᔭᐅᔪᒥᒃ, ᐊᖓᔪᖅᑲᐅᕕᒋᔭᖏᑦ ᑍᔭᐅᕗᑦ “ᐃᑕᓕᐊᒥᐅᑦ ᐅᓇᑕᕐᑐᒃᓴᖁᑎᖏᓐᓂᒃ.” 2 ᑖᓐᓇ ᐅᒃᐱᑦᓯᐊᕐᑑᕗᖅ ᒎᑎᒥᒃ ᐃᒃᐱᒋᔭᖃᑦᓯᐊᕐᓗᓂ ᐃᒡᓗᒥᐅᖃᑎᓂ ᐃᓚᒋᓪᓗᒋᑦ, ᑐᓂᓯᖃᑦᑕᓚᐅᕐᐳᖅ ᐃᓄᖕᓄᑦ ᐊᓐᓂᕈᓱᒐᓂ, ᒎᑎᒧᑦ ᑐᒃᓯᐊᖃᑦᑍᓐᓇᕐᓗᓂ. 3 ᐅᓐᓄᓴᒃᑯᑦ 3 ᖃᓂᒋᔮᓂ ᑕᑯᑎᑕᐅᓚᐅᕐᐳᖅ, ᐃᓕᓴᕐᓇᑦᓯᐊᕐᑐᒥᒃ ᒎᑎᐅᑉ ᐂᖏᓖᖓᓂᒃ ᕾᔪᒥᒃ ᐅᖃᕐᑐᒥᒃ ᑖᑦᓱᒧᖓ, “ᑰᓂᓕᐅᓯ.” 4 ᑰᓂᓕᐅᓯᐅᑉ ᑕᑯᓐᓇᓕᕐᐹ ᖁᐊᕐᓵᓪᓚᕐᒥᓗ ᐅᖃᕐᐳᖅ, “ᐊᑕᓃᖅ ᓱᔪᒪᕖᑦ?” ᑖᑦᓱᒪ ᐅᖃᐅᑎᕚ, “ᑐᒃᓯᐊᕐᓂᑎᑦ ᑐᓂᓯᖃᑦᑕᕐᓂᑎᓪᓗ ᒎᑎᐅᑉ ᖁᕕᐊᒋᕔᑦ ᐃᖅᑲᐅᒪᑦᔪᑎᒋᓪᓗᓂᒋᑦ ᐃᓕᖕᓂᒃ. 5 ᒫᓐᓇ ᐊᖑᑎᓂᒃ ᑎᓕᓯᓕᕆᑦ ᔮᐸᒧᑦ, ᓮᒨᓂ ᕾᖁᔭᐅᖁᓗᒍ ᐲᑦᑐᕉᓯᒥᒃ ᑍᔭᐅᔪᖅ; 6 ᑖᓐᓇ ᑐᔪᕐᒥᕗᖅ ᓮᒨᓂᒥ ᐊᒥᕐᓂᒃ ᕿᑐᒻᒪᒃᓮᔨᒥ, ᐃᒪᐅᑉ ᓯᓈᓂ ᐃᒡᓗᖃᕐᑐᒥ.” 7 ᐂᖏᓕᓗ ᐅᖃᕆᐊᕐᑐᕐᓯᒪᔪᖅ ᕿᒪᕉᑎᖕᒪᑦ, ᑰᓂᓕᐅᓯ ᐱᔨᒥᓂᒃ ᒪᕐᕉᖕᓂᒃ ᕾᖁᔨᕗᖅ, ᐅᓇᑕᕐᑐᒃᓴᒥᒡᓗ ᐅᒃᐱᑦᓯᐊᕐᑐᒥᒃ ᐱᔨᓪᓚᕆᒋᔭᒥᓂᒃ, 8 ᑖᒃᑯᐊ ᐅᓂᒃᑳᕐᕕᒋᑦᓯᐊᓚᐅᕐᓗᒋᑦ, ᔮᐸᒧᑦ ᑎᓕᕔᑦ. 9 ᖃᐅᑎᓪᓗᒍ ᑎᓕᔭᐅᔪᑦ ᐃᖏᕐᕋᑎᓪᓗᒋᑦ, ᔮᐸᒧᑦ ᖃᒡᓕᑎᓪᓗᒋᑦ, ᐲᑦᑐᕉᓯ ᐃᒡᓘᑉ ᖄᖓᓄᐊᕐᐳᖅ ᑐᒃᓯᐊᕆᐊᕐᑐᕐᓗᓂ, ᐅᓪᓗᖅ ᕿᑎᕋᓕᕐᑎᓪᓗᒍ. 10 ᑳᓕᕋᒥ ᓂᕆᔪᒪᓕᕐᐳᖅ; ᓂᕆᓂᐊᕐᑕᖏᓐᓂᒃ ᓂᕿᓕᐅᕐᑐᖃᕐᑎᓪᓗᒍ ᐃᓱᒪᒥᒍᑦ ᑎᒥᒥᓃᑦᓱᓐᓃᕐᐳᖅ. 11 ᑕᑯᓪᓗᓂ ᕿᓚᖕᒥᒃ ᐃᕐᐸᕐᑐᒥᒃ, ᑕᕝᕙᓐᖓᑦ ᓂᖏᑎᑕᐅᔪᖃᕐᐳᖅ ᓄᓇᕐᔪᐊᕐᒧᑦ, ᐊᖏᔪᒥᒃ ᑎᓴᒪᓂᒃ ᑎᕆᖅᑯᓕᖕᒥᒃ ᑎᖏᕐᕋᐅᑕᐅᔮᕐᑐᒥᒃ. 12 ᑖᓐᓇ ᐱᑕᖃᕐᐳᖅ ᐆᒪᔪᓂᒃ ᖃᓄᐃᑦᑐᑐᐃᓐᓇᕐᓂᒃ ᐱᓱᒃᑎᓂᒃ ᐹᕐᖑᕐᑎᓂᒡᓗ, ᑎᖕᒥᐊᓂᒡᓗ. 13 ᓂᐱᒥᑦ ᐅᖃᐅᑦᔭᐅᕗᖅ, “ᐲᑦᑐᕉᓰ ᒪᑭᓪᓗᑎᑦ; ᑐᖁᑦᓯᓗᑎᑦ ᓂᕆᓕᕆᑦ.” 14 ᐲᑦᑐᕉᓯᐅᑉ ᑭᐅᕚ, “ᐊᑕᓃᖅ ᑍᒤᑦᓱᓐᓇᓐᖏᓚᖓ; ᓂᕆᓚᐅᕐᓯᒪᖏᓐᓇᒪ ᐅᒃᐱᕐᓂᑦᑎᒍᑦ ᓴᓗᒤᓐᓂᕋᕐᑕᐅᔪᓂᒃ ᓂᕆᖁᔭᐅᖏᑦᑐᓂᒃᓗ.” 15 ᓂᐱᐅᑉ ᐂᑉᐸᖓᓂᒃ ᐅᖃᐅᑎᒃᑲᓐᓂᕐᐹ, “ᒎᑎᐅᑉ ᓴᓗᒻᒪᕐᑎᑕᖓᓂᒃ ᓇᕐᕈᓇᕐᑎᑦᓯᔪᒃᓴᐅᓐᖏᓚᑎᑦ.” 16 ᑍᒤᓕᐅᓚᐅᕐᐳᖅ ᐱᖓᓱᐊᕐᑎᕐᓗᓂ, ᑭᖑᕐᖓᒍᑦ ᕿᓚᖕᒧᑦ ᐅᑎᕐᑎᑕᐅᕗᖅ. 17 ᐲᑦᑐᕉᓯ ᑕᒪᑐᒥᖓ ᑕᑯᑎᑕᐅᓂᕐᒥᓂᒃ ᐃᓗᒥᒍᑦ ᐃᓱᒪᒃᓴᕐᓯᐅᕐᑎᓪᓗᒍ ᖃᓄᖅ ᑐᑭᖃᕐᒪᖔᑦ, ᑕᑯᒋᑦ, ᑰᓂᓕᐅᓯᐅᑉ ᑎᓕᔭᖏᑦ ᓮᒨᓂᐅᑉ ᐃᒡᓗᖓᓂᒃ ᓇᓂᓯᒐᒥᒃ ᐃᑎᕐᑕᕐᕕᖓᑕ ᓯᓚᑖᓃᓕᕐᐳᑦ. 18 ᐊᐱᕆᓪᓗᑎᒃ ᓮᒨᓂ ᐲᑦᑐᕉᓯᒥᒃ ᐊᑎᓕᒃ ᑕᕝᕙᓂ ᑐᔪᕐᒥᖕᒪᖔᑦ. 19 ᓱᓕ ᐲᑦᑐᕉᓯ ᑕᑯᑎᑕᐅᓂᕐᒥᓂᒃ ᐃᓱᒪᒃᓴᕐᓯᐅᕈᑎᖃᕐᑎᓪᓗᒍ, ᒎᑎᐅᑉ ᐊᓂᕐᓂᖓᑕ ᐅᖃᐅᑎᕚ, “ᑕᑯᒋᑦ, ᐊᖑᑎᓄᑦ ᐱᖓᓱᓄᑦ ᕿᓂᕐᑕᐅᓕᕐᐳᑎᑦ. 20 ᒪᑭᓪᓗᑎᑦ ᐊᖅᑲᓕᕆᑦ, ᑐᐊᕕᕐᓗᑎᑦ, ᒪᓕᖕᓂᐊᕐᐸᑎᑦ; ᑖᒃᑯᐊ ᑎᓕᒐᒃᑭᑦ.” 21 ᐲᑦᑐᕉᓯ ᐊᖅᑲᕐᑎᕋᒥ ᐊᖑᑏᑦ ᐅᐸᒃᑲᒥᒋᑦ ᐅᖃᕐᐳᖅ, “ᐅᕙᖓᐅᕗᖓ ᕿᓂᕐᑕᓯ; ᓱᓈ ᐱᓪᓗᒍ ᑕᒪᐅᓐᖓᕐᐱᓰ?” 22 ᑖᒃᑯᐊ ᑭᐅᕚᑦ, “ᑰᓂᓕᐅᓯᐅᑉ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᑎᓕᕚᑎᒍᑦ, ᑖᓐᓇ ᐅᒃᐱᑦᓯᐊᕐᑑᕗᖅ ᒎᑎᒥᒡᓗ ᐃᒃᐱᒋᔭᖃᑦᓯᐊᕐᓗᓂ, ᔫᑎᓕᒫᑦ ᐊᑲᐅᓂᕋᕐᑕᖓᑦ, ᒎᑎᐅᑉ ᐂᖏᓕᖓᓄᑦ ᐅᖃᐅᑦᔭᐅᓪᓗᓂ ᕾᖁᔭᐅᖁᖕᒪᑎᑦ ᐃᒡᓗᒥᓄᑦ, ᐅᖃᐅᓯᕐᓂᒃ ᑐᓴᕈᒪᓪᓗᓂ ᐃᓕᖕᓂᑦ.” 23 ᐊᖑᑎᑦ ᑖᒃᑯᐊ ᐲᑦᑐᕉᓯᐅᑉ ᐃᑎᖁᕔᑦ, ᑕᕝᕙᓂ ᓯᓂᒃᑕᖁᓪᓗᒋᑦ. ᖃᐅᑎᓪᓗᒍ ᒪᑭᒃᑲᒥᒃ ᐊᐅᓪᓚᖃᑎᒋᕔᑦ, ᐅᒃᐱᕐᑑᖃᑎᒌᑦ ᔮᐸᒥᐅᑦ ᐃᓚᖏᑕ ᐃᓚᒋᕚᑦ. 24 ᖃᐅᓕᖅᑭᒃᑎᓪᓗᒍ ᓯᓴᕆᐊᒧᑦ ᑎᑭᑉᐳᑦ. ᑰᓂᓕᐅᓯᐅᑉ ᓂᕆᐅᒋᓚᐅᕋᒥᒋᑦ ᐃᓚᓂ ᓇᖕᒥᓂᓂ ᐃᓚᓐᓇᕆᔭᓂᓗ ᑲᑎᖁᕔᑦ. 25 ᐲᑦᑐᕉᓯ ᐃᑎᕐᒪᑦ, ᑰᓂᓕᐅᓯᐅᑉ ᐸᕐᕆᐊᕐᐹ ᐹᒻᒪᒡᓗᓂ ᐃᑎᒐᖏᓐᓄᑦ. 26 ᐲᑦᑐᕉᓯᐅᓪᓕ ᒪᑭᑎᑉᐹ ᐅᖃᐅᑎᓪᓗᒍ, “ᓂᑯᕕᒋᑦ ᐃᓄᑐᐃᓐᓇᐅᒋᕗᖓᑦᑕᐅᖅ.” 27 ᐅᖃᖃᑎᒋᒐᒥᐅᒃ ᐃᑎᕐᐳᖅ, ᑕᑯᓪᓗᓂ ᐃᓄᖕᓂᒃ ᐊᒥᓱᓂᒃ ᑕᕝᕙᓃᑦᑐᓂᒃ. 28 ᐲᑦᑐᕉᓯᐅᑉ ᐅᖃᐅᑎᕔᑦ, “ᓇᖕᒥᓂᖅ ᖃᐅᔨᒪᕗᓯ ᔫᑎᑦ ᐱᖁᔭᖏᓐᓂᑦ ᔫᑎᑦ ᔫᑎᐅᖏᑦᑐᒥᒃ ᐃᓚᖃᖁᔭᐅᖏᒻᒪᑕ, ᐳᓛᖃᑦᑕᐅᑎᖁᔭᐅᓇᑎᒡᓗ; ᒎᑎᐅᓪᓕ ᑕᑯᑎᓚᐅᕐᐹᖓ ᐃᓄᖕᓂᒃ ᑭᒃᑯᑐᐃᓇᕐᓂᒃ ᓇᕐᕈᓇᕐᓂᕅᔪᒃᓴᐅᖏᓐᓇᒪ, ᐅᒃᐱᕆᔭᑦᑎᒍᑦ ᓴᓗᒤᓐᓂᕅᔪᒃᓴᐅᖏᓐᓇᒪ. 29 ᑍᒤᒻᒪᑦ ᐂᔭᐅᖁᒐᕕᖓ, ᑲᑦᑐᒊᕐᓯᒪᓪᓗᖓ ᑎᑭᑉᐳᖓ. ᒫᓐᓇ ᐊᐱᕆᕙᒋᑦ ᓱᓇ ᐱᓪᓗᒍ ᑕᒪᐅᓐᖓᖁᓚᐅᕐᐱᖔ?” 30 ᑰᓂᓕᐅᓯ ᐅᖃᕐᐳᖅ, “ᐅᓪᓗᐃᑦ ᓯᑕᒪᐅᓕᕐᐳᑦ, ᑍᒤᓪᓗᐊᓕᕐᑎᓪᓗᒍ ᐃᒡᓗᓐᓂ ᑐᒃᓯᐊᕐᑎᓪᓗᖓ ᐅᓐᓄᓴᒃᑯᑦ 3ᒧᐊᕐᑎᓪᓗᒍ; ᑕᑯᒋ, ᐊᖑᒻᒥᒃ ᓴᖅᑭᑦᑐᖃᑲᓪᓚᓚᐅᕐᐳᖅ ᖃᐅᒪᔪᕐᔪᐊᓂᒃ ᐊᓐᓄᕌᓕᖕᒥᒃ. 31 ᐅᖃᕐᓗᓂ, ‘ᑰᓂᓕᐅᓰ, ᑐᒃᓯᐊᕐᓂᑎᑦ ᑐᓴᕐᑕᐅᕗᑦ ᑐᓂᓯᖃᑦᑕᕐᓂᑎᑦ ᐃᖅᑲᐅᒪᔭᐅᕗᑦ ᒎᑎᒧᑦ. 32 ᑍᒤᒻᒪᑦ ᑎᓕᓯᓕᕆᑦ ᔮᐸᒧᑦ ᓮᒨᓂ ᐲᑦᑐᕉᓯᒥᒃ ᐊᑎᓕᒃ ᕾᖁᔭᐅᖁᓗᒍ; ᑖᓐᓇ ᑐᔪᕐᒥᕗᖅ ᓮᒨᓂᐅᑉ ᐊᒥᕐᓂᒃ ᕿᑐᒻᒪᒃᓮᔨᐅᑉ ᐃᒡᓗᖓᓂ ᐃᒪᐅᑉ ᓯᓈᓂ.’ 33 ᑍᒤᒻᒪᑦ ᑕᕝᕔᓐᓇᖅ ᕾᖁᔭᐅᖁᓕᓚᐅᕐᐸᒋᑦ, ᖁᔭᓕᕗᒍᑦ ᕾᔪᓐᓇᕋᕕᑦ, ᒫᓐᓇ ᑍᒤᒻᒪᑦ ᐅᕙᓃᑉᐳᒍᑦ ᒎᑎᐅᑉ ᓵᖓᓂ, ᑐᓴᕈᒪᓪᓗᑕ ᐊᑕᓂᐅᑉ ᐅᖃᐅᓯᕆᔭᐅᖁᔭᖏᓐᓂᒃ ᐊᖅᑯᑎᒋᔭᐅᓗᑎᑦ.” ᐲᑦᑐᕉᓯᐅᑉ ᐅᖃᓪᓚᖕᓂᖓ 34 ᐲᑦᑐᕉᓯ ᐅᖃᓯᕗᖅ: “ᒫᓐᓇ ᑐᑭᓯᕗᖓ ᒎᑎ ᐃᓔᓐᓇᕐᓯᐅᖏᒻᒪᑦ, ᐃᓄᓕᒫᓪᓕ ᐊᑦᔨᒌᒃᑎᒻᒪᒋᑦ. 35 ᑖᑦᓱᒥᖓ ᓯᕘᕋᔪᑦ ᓇᓛᒍᑦ ᐱᓇᓱᐊᕐᑐᑦ ᓇᓪᓕᐊᓐᓂᑐᐃᓐᓇᖅ ᐃᓅᖃᑎᒌᒡᔪᐊᓂᑦ ᐱᓯᒪᒐᓗᐊᕐᐸᑕ, ᒎᑎᐅᑉ ᐃᓚᓕᐅᕐᐰᑦ. 36 ᖃᐅᔨᒪᒐᑦᓯ ᐅᖃᐅᓯᕆᓚᐅᕐᑕᖏᓐᓂᒃ ᐃᓴᕆᐊᓕᒥᐅᓄᑦ, ᐊᔪᕆᕐᑑᓰᑦ ᐅᖃᐅᓰᑦ ᑐᓴᕈᒥᓇᕐᑐᑦ ᓮᒻᒪᕐᑎᑕᐅᓇᕐᑐᖅ ᔩᓱᓯ ᙭ᔅᑑᓯᒃᑯᑦ, ᑕᒤᓐᓄᑦ ᐊᑕᓂᐅᔪᒧᑦ. 37 ᖃᐅᔨᒪᕗᓯ ᐱᒋᐊᕐᓂᐅᓚᐅᕐᑐᒥᒃ ᔫᑎᐊᒥᐅᓕᒫᓄᑦ, ᒐᓕᓕᐊᒥᑦ ᐱᒋᐊᕐᓗᓂ, ᔪᐊᓇᓯᐅᑉ ᐹᑉᑎᑦᓯᓂᕐᒥᒍᑦ ᐊᔪᕆᕐᑐᐃᑦᔪᑎᒋᔭᖓᑕ, ᑭᖑᓂᖓᒍᑦ. 38 ᔩᓱᓯ ᓈᓴᕇᑎᒥᐅᖅ ᒎᑎᐅᑉ ᑯᕝᕕᕆᓚᐅᕐᑕᖓ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐱᔪᓐᓇᕐᓂᕐᒥᒡᓗ; ᑖᓐᓇ ᓇᒧᑐᐃᓐᓇᖅ ᐂᖃᑦᑕᓚᐅᕐᐳᖅ ᐱᐅᔪᓂᒃ ᐱᓇᓱᐊᕐᓗᓂ, ᐃᓅᓕᒃᓯᓪᓗᓂᓗ ᓵᑖᓇᓯᒧᑦ ᓵᓚᐅᓯᒪᔪᓂᒃ, ᒎᑎᐅᑉ ᐃᓚᒋᓚᐅᕐᒪᒍ. 39 ᐅᕙᒍᓪᓗ ᑕᑯᓚᐅᕐᐳᒍᑦ ᑕᒪᒃᑯᓂᖓ ᑕᒤᓐᓂᒃ ᐱᓂᐊᓚᐅᕐᑕᖏᓐᓂᒃ ᔫᑎᑦ ᓄᓇᖏᓐᓂ ᔨᕉᓴᓕᒻᒥᓗ. ᑖᓐᓇ ᑐᖁᓚᐅᕐᐹᑦ ᑭᑭᐊᒃᑐᕐᓗᒍ ᓴᓐᓂᖓᔪᓕᖕᒧᑦ; 40 ᒎᑎᐅᓪᓕ ᒪᑭᑎᓚᐅᕐᐹ ᐅᓪᓗᑦ ᐱᖓᔪᐊᓐᓂ ᑕᑯᔭᐅᑎᓪᓗᒍᓗ; 41 ᐃᓄᖕᓄᑦ ᑕᒤᓐᓅᖏᑦᑐᖅ, ᐅᕙᑦᑎᓐᓄᑦ ᒎᑎᐅᑉ ᓂᕈᐊᕐᓯᒪᔭᖏᓐᓄᑦ ᓇᓗᓁᕐᓯᔪᒃᓴᓄᑦ, ᓂᕆᖃᑎᒋᓚᐅᕐᐸᕗᑦ ᐃᒥᖃᑎᒋᓪᓗᒍᓗ ᑐᖁᖓᔪᓂᑦ ᒪᑭᓯᒪᓕᕐᑎᓪᓗᒍ. 42 ᑖᑦᓱᒪ ᐱᖁᓚᐅᕐᐹᑎᒍᑦ ᐃᓄᖕᓂᒃ ᐊᔪᕆᕐᑐᐃᖁᓪᓗᑕ, ᓇᓗᓁᕐᓯᓗᑕᓗ ᑖᓐᓇᐅᖕᒪ ᒎᑎᐅᑉ ᐃᖅᑲᕐᑐᐃᔨᒃᓴᓐᖑᕐᑎᓯᒪᔭᖓ ᐃᓅᔪᓄᑦ ᑐᖁᓯᒪᔪᓄᓪᓗ. 43 ᓇᓚᐅᑦᑍᔪᑦ ᑕᒪᕐᒥᒃ ᑖᑦᓱᒥᖓ ᓇᓗᓁᕐᓯᕗᑦ, ᐅᖃᕐᓗᑎᒃ ᑖᑦᓱᒧᖓ ᐅᒃᐱᕐᑐᑦ ᐊᔪᕐᓂᖏᓐᓂᑦ ᐃᓱᒪᒋᔪᓐᓁᕐᕕᐅᓂᕐᒥᒃ ᐱᑎᑕᐅᕗᑦ, ᑖᑦᓱᒪ ᐊᑎᖓᒍᑦ.” ᔫᑎᐅᖏᑦᑐᑦ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐱᑎᑕᐅᓂᖓᑦ 44 ᐲᑦᑐᕉᓯ ᓱᓕ ᑕᒪᒃᑯᓂᖓ ᐅᖃᓪᓚᒃᑎᓪᓗᒍ, ᐊᓂᕐᓂᖅ ᐃᑦᔪᕐᓁᑦᑐᖅ ᐊᖅᑲᕐᐳᖅ ᐅᖃᐅᓯᕐᓂᒃ ᑐᓵᔪᓕᒫᓄᑦ. 45 ᐅᒃᐱᕐᑐᑦ ᔫᑎᓪᓚᕇᑦ ᐲᑦᑐᕉᓯᐅᑉ ᐃᓚᒋᔭᖏᑦ ᑲᒪᓂᐊᕐᐳᑦ, ᐊᓂᕐᓂᐅᑉ ᐃᑦᔪᕐᓁᑦᑑᑉ ᑐᓂᔭᐅᓂᖓᓂᒃ, ᔫᑎᐅᖏᑦᑐᓄᑦ ᐊᒡᓛᑦ ᑯᕕᔭᐅᖕᒪᑦ. 46 ᑐᓵᒐᒥᑦᔪ ᐅᖃᐅᓯᕐᓂᒃ ᑐᓴᕐᖓᕐᑕᓂᒃ ᐅᖃᓪᓚᒃᑎᓪᓗᒋᑦ ᒎᑎᒥᒃ ᐱᓂᐊᕐᓂᕐᔪᐊᖓᓂᒡᓗ ᓂᕐᑐᐃᑎᓪᓗᒋᑦ. ᑕᕝᕙ ᐲᑦᑐᕉᓯ ᐅᖃᓕᕐᐳᖅ, 47 “ᑭᓇᒧᑦ ᐃᓂᕐᑎᕐᑕᐅᔪᓐᓇᕐᐱᑕ ᐅᑯᐊ ᐃᒥᕐᒧᑦ ᐹᑉᑎᑕᐅᖁᓇᒋᑦ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᖕᒥᖕᒪᑕ ᐅᕙᑦᑎᑑᑦ?” 48 ᐲᑦᑐᕉᓯᐅᑉ ᐱᖁᕔᑦ ᐹᑉᑎᑕᐅᖁᓪᓗᒋᑦ ᔩᓱᓯ ᙭ᔅᑑᓯᐅᑉ ᐊᑎᖓᓄᑦ. ᑖᒃᑯᐊ ᐲᑦᑐᕉᓯᒥᒃ ᑕᕝᕙᓃᑲᓐᓂᖁᔨᓕᕐᐳᑦ ᐅᓪᓗᓂᒃ ᐊᒥᓲᖏᑦᑑᒐᓗᐊᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society