ᐋᐴᓯᑕᓖᑦ ᐱᓂᐊᕐᓂᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐃᓕᓐᓂᐊᕐᑎᒥᓂᒃ ᑲᑎᒪᒃᓯᓱᖓᕐᓂᖓ

¹ ᑎᐅᐱᓘᓰ, ᑎᑎᕋᓚᐅᕐᑕᓐᓂ ᓯᕗᓪᓕᕐᓂ, ᑎᑎᕋᐅᓯᖃᓚᐅᕐᐳᖓ ᔩᓱᓯᐅᑉ ᐱᓂᐊᕐᓂᕆᓚᐅᕐᑕᓕᒫᖏᓐᓂᒃ ᐊᔪᕆᕐᑐᐃᑦᔪᑎᒋᓚᐅᕐᑕᖏᓐᓂᒡᓗ, ᐱᒋᐊᓕᕐᓂᕐᒥᓂᑦ,

² ᐅᓪᓗᖅ ᑍᓐᓇ ᕿᓚᓕᐊᕐᓂᖓ ᑎᑭᓪᓗᒍ, ᕿᓚᓕᐊᓚᐅᖏᓐᓂᕐᒥᓂ, ᐊᑐᕐᑕᐅᖁᔭᒥᓂᒃ ᐅᖃᓚᐅᕐᒪᑦ ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ ᐋᐴᓯᑕᓕᖕᓄᑦ ᓂᕈᐊᕐᓯᒪᔭᒥᓄᑦ.

³ ᐋᓐᓂᐊᑎᑕᐅᓂᕐᒥ ᑭᖑᓂᖓᓂ ᐅᓪᓗᓂᒃ 40ᓂᒃ ᓴᖅᑭᖃᑦᑕᓚᐅᕐᐳᖅ ᑖᒃᑯᓄᖓ ᐅᓄᕐᑐᐃᕐᓱᕐᓗᓂ, ᒪᑭᓯᒪᓪᓚᕆᖕᓂᕐᒥᓂᒃ ᖁᓚᖏᑦᓯᐊᓕᕈᑎᒃᓮᑦ ᐊᑐᕐᓗᒋᑦ, ᐅᖃᖃᑎᒋᓪᓗᒋᑦ ᒎᑎᐅᑉ ᐊᑕᓂᐅᕕᖓᓂᒃ.

⁴ ᑲᑎᒪᖃᑎᒋᒐᒥᒋᑦ ᐅᖃᐅᑎᓪᓚᕆᒃᐰᑦ ᐊᐅᓪᓚᖁᓇᒋᑦ ᔨᕉᓴᓕᒻᒥᑦ, “ᐅᑕᖅᑭᒋᑦᓯ ᐊᑖᑕᒪ ᑐᓂᓂᐊᕐᓂᕋᕐᓯᒪᔭᖓᓂᒃ ᐅᖃᐅᑎᒋᓚᐅᕐᑕᓐᓂᒃ ᐃᓕᑦᓯᓐᓄᑦ.

⁵ ᔪᐊᓇᓯ ᐹᑉᑎᑦᓯᓚᐅᕐᐳᖅ ᐃᒥᕐᒧᑦ, ᐅᓪᓗᐃᑦ ᒪᒃᑯᐊ ᐅᓄᖏᑦᑐᑦ ᑭᖑᓂᖓᑦᑎᒍᑦ ᐹᑉᑎᑕᐅᓛᕐᐳᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ.”

ᔩᓱᓯᐅᑉ ᕿᓚᓕᐊᕐᓂᖓ

⁶ ᐋᐴᓯᑕᓖᑦ ᑲᑎᒪᒐᒥᒃ ᔩᓱᓯᒥᒃ ᐃᓚᖃᕐᓗᑎᒃ ᐊᐱᕆᕚᑦ, “ᐊᑕᓃᖅ ᒫᓐᓇᐅᔪᖅ ᐃᓴᕆᐊᓕᒥᐅᑦ ᐊᖓᔪᖅᑲᐅᕕᖓ ᐱᒋᐊᕐᑎᒃᑲᓐᓂᕐᓂᐊᕐᐱᐅᒃ?”

⁷ ᔩᓱᓯᐅᑉ ᑭᐅᕔᑦ, “ᐃᓕᑦᓯ ᑕᒪᑐᒥᖓ ᖃᐅᔨᒪᔭᕆᐊᖃᓐᖏᓚᓯ ᐱᕕᒃᓴᒥᒃ ᓇᓪᓕᐅᑎᕕᒃᓴᓂᒡᓗ ᐊᑖᑕᒪ ᑕᒪᒃᑯᐊ ᐱᔪᓐᓇᕐᓂᕐᒥᓄᑦ ᐋᖅᑭᒃᓯᒪᖕᒪᒋᑦ.

⁸ ᐱᔪᓐᓇᕐᓂᕐᒥᒡᓕ ᐱᑎᑕᐅᓛᕐᐳᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑎᑭᑕᐅᒍᑦᓯ; ᐅᕙᓐᓂᒃ ᓇᓗᓁᕐᓯᔨᒋᓛᕐᐸᑦᓯ ᔨᕉᓴᓕᒻᒥ ᔫᑎᐊᓕᒫᒥᓗ ᓴᒥᐊᕆᐊᒥᓗ ᓄᓇᕐᔪᐊᓪᓗ ᐃᓱᐊ ᑎᑭᓪᓗᒍ.”

⁹ ᑍᒫᒃ ᐅᖃᕇᕋᒥ, ᑖᒃᑯᐊ ᑕᑯᓐᓇᕐᑎᓪᓗᒋᑦ ᖁᒻᒧᐊᒃᑎᑕᐅᓕᕐᐳᖅ ᕿᓚᓕᐊᓕᕐᓗᓂ, ᓄᕗᔭᒧᑦ ᑕᑯᒃᓴᐅᔪᓐᓃᕐᓗᓂ ᑖᒃᑯᓄᖓ.

¹⁰ ᑖᒃᑯᐊ ᕿᓚᖕᒧᑦ ᓱᓕ ᐋᕐᓗᖓᑎᓪᓗᒋᑦ ᖁᒻᒧᐊᒃᑎᑕᐅᕕᒋᔭᖓᓄᑦ, ᑕᑯᒋᑦ, ᐊᖑᑏᒃ ᒪᕐᕉᒃ ᖃᑯᕐᑖᖕᓂᒃ ᐊᓐᓄᕌᓖᒃ ᑖᒃᑯᐊ ᓴᓂᐊᓂ ᓇᖏᓕᕐᐴᒃ,

¹¹ ᐅᖃᕐᓗᑎᒃ, “ᒐᓕᓕᐊᒥᐅᖑᔪᓯ, ᓲᖅ ᕿᓚᖕᒧᑦ ᐋᕐᓗᖓᕕᓰ? ᑖᓐᓇ ᔩᓱᓯ, ᑕᑯᓐᓇᕐᑕᓯ ᕿᓚᖕᒧᐊᕐᑎᓪᓗᒍ, ᐅᑎᓛᕆᕗᖅ ᑍᒫᑦᓮᓐᓇᖅ ᑕᑯᓐᓇᕋᑖᕋᑦᓯᐅᒃ ᖁᒻᒧᐊᒃᑎᓪᓗᒍ ᕿᓚᖕᒧᑦ.”

ᔫᑕᓯᐅᑉ ᐃᓇᖏᕐᑎᖓ

¹² ᑕᕝᕙ ᐋᐴᓯᑕᓖᑦ ᔨᕉᓴᓕᒻᒧᑦ ᐅᑎᕐᐳᑦ ᖃᖅᑲᒥᑦ ᐸᐅᕐᒐᖃᕐᑐᒥᑦ ᐅᕐᓱᒃᓴᐅᓕᕈᓐᓇᕐᑐᓂᒃ ᓇᐹᕐᑐᓕᖕᒥᑦ, ᔨᕉᓴᓕᐅᑉ ᖃᓂᒋᔭᖓᓃᑦᑐᒥᑦ 1ᒤᓕᐅᑉ ᕿᑎᖅᑲᖓᓂᒃ ᐅᖓᓯᖕᓂᖃᕐᑐᒥᑦ.

¹³ ᐃᒡᓗᒐᓴᒡᔪᐊᓄᑦ ᐃᑎᕋᒥᒃ, ᐃᒡᓘᑉ ᖁᓛᓃᑦᑐᒧᑦ ᓇᔪᒐᕐᒥᖕᓄᑦ ᐃᑎᕐᐳᑦ, ᐲᑦᑐᕉᓯ ᔪᐊᓇᓯ ᔧᒥᓯ ᐋᓐᑐᕉᓗ, ᐱᓕᑉᐴᓯ ᑑᒪᓯᓗ, ᐸᑎᐅᓗᒥᐅ ᒫᑎᐅᓯᓗ, ᔧᒥᓯᓗ ᐊᐅᓪᐱᐊᓯᐅᑉ ᐃᕐᓂᖓ ᓮᒨᓂᓗ ᕉᒪᒥᐅᓂᒃ ᐊᑭᓂᐊᕐᑎᒥᒃ ᑍᔭᐅᔪᖅ, ᔫᑕᓯᓗ ᔧᒥᓯᐅᑉ ᐃᕐᓂᖓ.

¹⁴ ᐊᑕᖏᕐᓗᑎᒃ ᐊᑕᐅᓯᐅᓕᖅᑲᖓᑦᓯᐊᕐᓗᑎᒃ ᑲᑦᓱᖕᒊᕐᓯᒪᑦᓯᐊᕐᓗᑎᒃ ᑐᒃᓯᐊᖃᑦᑕᓚᐅᕐᐳᑦ, ᐊᕐᓁᑦ ᐃᓚᒋᓪᓗᒋᑦ ᒥᐊᕆᓗ ᔩᓱᓯᐅᑉ ᐊᓈᓇᖓ, ᖃᑕᓐᖑᑎᖏᓪᓗ.

¹⁵ ᐅᒃᐱᕐᑐᑦ ᐊᑕᖏᕐᓗᑎᒃ 120 ᖃᓂᒋᔭᖓᓃᓚᐅᕐᐳᑦ, ᐅᓪᓗᐃᑦ ᐃᓚᖓᓐᓂ ᑲᑎᒪᑎᓪᓗᒋᑦ ᐲᑦᑐᕉᓯ ᓂᑯᕕᑉᐳᖅ ᐅᖃᕐᓗᓂ,

¹⁶ “ᐃᓅᖃᑎᒃᑲ, ᐊᒡᓔᑦ ᓇᓚᐅᑦᓯᔭᕆᐊᖃᓚᐅᕐᒪᑕ, ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᕆᓯᒪᔭᖏᑦ ᑍᕕᑎᒃᑯᑦ, ᓇᓚᐅᑦᑍᑦᔪᑕᐅᓯᒪᔪᑦ ᔫᑕᓯᒥᒃ, ᑖᓐᓇ ᑕᓯᐅᕐᑎᐅᓚᐅᕐᒪᑦ ᔩᓱᓯᒥᒃ ᑎᒍᓯᓚᐅᕐᑐᓄᑦ.

¹⁷ ᑖᓐᓇ ᐃᓚᒋᓚᐅᕐᐸᕗᑦ, ᓂᕈᐊᕐᑕᐅᖃᑎᒋᓚᐅᕐᐸᕗᓪᓗ ᐱᓇᓱᐊᕐᓂᑦᑎᓐᓂᒃ ᐱᓇᓱᐊᖃᑎᒋᓪᓗᑎᒍ.”

¹⁸ (ᑖᑦᓱᒪ ᔫᑕᓯᐅᑉ ᐊᔪᕐᑐᓕᓂᕆᓚᐅᕐᑕᒥ ᐊᑭᖓᓄᑦ ᐱᕈᕐᓰᕕᖕᒥᒃ ᓂᐅᕕᓚᐅᕐᐳᖅ; ᑕᕝᕙᓂ ᐃᔪᒃᑲᕋᒥ ᑐᖁᓚᐅᕐᐳᖅ, ᖄᕐᓗᓂ ᐃᕐᕋᕕᓕᒫᖏᓪᓗ ᐊᓂᓚᐅᕐᐳᑦ.

¹⁹ ᔨᕉᓴᓕᒻᒥᐅᓕᒫᑦ ᑕᒪᑐᒥᖓ ᖃᐅᔨᒪᓕᕐᐳᑦ, ᐅᖃᐅᓯᕐᒥᒃᑎᒍᑦ ᐊᑎᖃᕐᑎᓕᕐᐹᑦ ᐊᑭᓪᑕᒪᒥᒃ, ᑐᑭᖃᕐᑐᖅ ᐱᕈᕐᓰᕕᒃ ᐊᐅᒃᑕᓕᒃ.)

²⁰ “ᑍᕕᑎᐅᑉ ᐃᓐᖏᕈᑎᖏᓐᓂ ᑎᑎᕋᕐᓯᒪᖕᒪᑦ, ‘ᑖᑦᓱᒪ ᐃᒡᓗᖓ ᐃᓄᖃᕈᓐᓃᕐᓕ, ᑕᕝᕙᓂ ᐃᒡᓗᖃᕐᑐᖃᕈᓐᓃᕐᓕ;’ ᐊᒻᒪᓗ ᐅᖃᕐᓯᒪᔪᖃᒃᑲᓐᓂᕆᕗᖅ, ‘ᐱᓇᓱᐊᕐᓂᖓ ᐊᓯᐊᓄᑦ ᐃᓇᖏᕐᑕᐅᓕᕐᓕ.’

²¹ “ᑍᒤᒻᒪᑦ ᐊᑲᐅᓈᕋᔭᕐᐳᖅ ᓂᕈᐊᕈᑦᑕ ᐊᖑᑏᑦ ᐃᓚᖓᓐᓂᒃ ᑍᒪᓐᖓᑦ ᐃᓚᒋᖃᑦᑕᕐᓯᒪᔭᑦᑎᓐᓂᒃ ᐊᑕᓂᖅ ᔩᓱᓯ ᐃᖏᕐᕋᖃᑎᒋᓪᓗᑎᒍ ᑎᑭᑉᐸᒃᓗᑕ ᐊᐅᓪᓚᕐᐸᒃᓗᑕᓗ,

²² ᐱᒋᐊᖃᑕᐅᓯᒪᔪᒥᒃ ᔪᐊᓇᓯᐅᑉ ᐹᑦᑎᑦᓯᖃᑦᑕᓕᕐᓂᖓᓂᑦ ᔩᓱᓯᐅᑉ ᕿᓚᓕᐊᕐᑎᑕᐅᓂᖓ ᑎᑭᓪᓗᒍ, ᑍᒤᑦᑐᒥᒃ ᐃᓚᑖᕆᐊᖃᕐᐳᒍᑦ ᖃᐅᔨᓯᒪᔭᑦᑎᓐᓂᒃ ᓇᓗᓁᕐᓯᔨᐅᖃᑕᐅᖁᓪᓗᒍ ᔩᓱᓯᐅᑉ ᒪᑭᓯᒪᓂᖓᓂᒃ.”

²³ ᑖᒃᑯᐊ ᓂᕈᐊᒐᒃᓴᓕᐅᕐᐳᑦ ᒪᕐᕉᖕᓂᒃ, ᔫᓯᐱᒥᒃ ᐹᕐᓴᐸᓯᒥᒃ ᑍᔭᐅᔪᒥᒃ ᐊᑎᖃᒃᑲᓐᓂᕐᑐᒥᒃ ᔭᔅᑕᓯᒥᒃ, ᐊᒻᒪᓗ ᒪᑍᐊᓯᒥᒃ.

²⁴ ᑖᒃᑯᐊ ᑐᒃᓯᐊᓕᕋᒥᒃ ᐅᖃᕐᐳᑦ, “ᐊᑕᓃᖅ, ᐃᓄᓕᒫᑦ ᐆᒻᒪᑎᖏᓐᓂᒃ ᖃᐅᔨᒪᔪᑎᑦ, ᓇᓗᓁᕐᓯᕕᒋᓚᐅᕐᑎᒍᑦ ᐅᑯᐊᒃ ᓇᓪᓕᐊᓐᓂᒃ ᓂᕈᐊᕐᒪᖔᕐᐱᑦ.

²⁵ ᐃᓇᖏᐅᑎᓂᐊᕐᑐᒥᒃ ᑕᒪᑐᒧᖓ ᐱᓇᓱᐊᕐᓂᕐᒧᑦ ᐋᐴᓯᑕᓕᐅᓂᕐᒧᑦ ᔫᑕᓯᐅᑉ ᕿᒪᓚᐅᕐᑕᖓᓄᑦ, ᑖᓐᓇ ᓇᖕᒥᓂᖅ ᐂᕕᒋᓂᐊᕐᑕᒥᓄᑦ ᐂᓯᒪᓕᕐᒪᑦ.”

²⁶ ᓇᓚᐅᑦᓵᓕᕋᒥᒃ, ᒪᑍᐊᓯ ᓇᓚᐅᑕᐅᕗᖅ; ᐃᓚᓕᐅᑎᔭᐅᓪᓗᓂᓗ ᐋᐴᓯᑕᓕᖕᓄᑦ 11ᓄᑦ.