ᑎᒧᑎᒧᑦ ᐂᑉᐸᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ1 ᐱᖁᓪᓚᕆᒃᐸᒋᑦ ᒎᑎᐅᑉ ᓵᖓᓂ ᙭ᔅᑑᓯ ᔩᓱᓯᐅᓪᓗ ᑖᓐᓇ ᐃᖅᑲᕐᑐᐃᔪᒫᕐᒪᑦ ᐃᓅᔪᓂᒃ ᑐᖁᖓᔪᓂᒡᓗ, ᑎᑭᑦᓱᒫᕐᒪᓪᓗ ᐊᐅᓚᑦᓯᔭᕐᑐᕐᓗᓂ. 2 ᐊᔪᕆᕐᑐᐃᖁᓪᓗᑎᑦ ᐅᖃᐅᓯᕐᓂᒃ, ᐊᔪᐃᓐᓇᕐᓗᑎᑦ ᐱᕕᒃᓴᖃᑦᓯᐊᕈᕕᑦ ᐱᕕᒃᓴᖃᑦᓯᐊᖏᒃᑲᓗᐊᕈᕕᓪᓘᓐᓃᑦ, ᓇᓗᓁᕐᓯᓗᑎᑦ, ᐃᓂᕐᑎᕆᓗᑎᑦ, ᐃᓇᑦᓯᓗᑎᓪᓗ, ᑲᔪᓯᓗᑎᑦ ᕿᓄᐃᓵᕐᓂᒃᑯᑦ ᐊᔪᕆᕐᑐᐃᓂᒃᑯᓪᓗ. 3 ᓇᓪᓕᐅᑎᔪᒫᕐᒪᑦ ᓇᓛᒎᕐᑑᑉ ᐊᔪᕆᕐᑑᑕᐅᓂᖏᓐᓂᒃ ᓈᓚᒍᒪᖏᑦᑐᓂᒃ, ᑖᒃᑯᐊᓗ ᐊᔪᕆᕐᑐᐃᔪᒃᓴᕐᓯᐅᓕᕈᒫᕐᐳᑦ ᑐᓴᕐᓂᕆᔭᒥᖕᓂᒃ ᐊᔪᕆᕐᑐᐃᔪᓐᓇᕐᑐᓂᒃ ᖁᕕᐊᒋᔭᖏᓐᓂᒡᓗ ᐊᔪᕆᕐᑐᐃᔪᓐᓇᕐᑐᓂᒃ, 4 ᓱᓕᓂᕐᒥᒡᓗ ᓈᓚᒍᓐᓃᕐᓗᑎᒃ ᐅᓂᒃᑳᑐᐃᓐᓇᕐᓄᑦ ᓈᓚᖕᓂᕐᓴᐅᓕᕈᒫᕐᐳᑦ. 5 ᐃᕝᕕᓪᓕ ᐃᓕᖕᓂᒃ ᐱᓯᒪᑦᓯᐊᕆᐊᖃᕐᐳᑎᑦ, ᐅᖁᒤᑦᑐᓂᒃ ᕿᓄᐃᓵᕈᑎᖃᕐᓗᑎᑦ, ᓵᒋᐊᕐᑎᑦᓯᓂᕐᒥᒃ ᐱᓇᓱᐊᕆᑦ, ᐱᔭᒃᓴᕆᔭᑎᑦ ᐱᓇᓱᐊᑦᓯᐊᕐᓗᒋᑦ. 6 ᐅᕙᖓᓕ ᑐᓂᕐᕈᑎᒃᓴᑐᑦ ᑐᖁᑕᐅᓂᒃᓴᕋ ᓇᓪᓕᐅᑎᓕᕐᐳᖅ; ᐃᓅᔪᓐᓂᕐᕕᒃᓴᕋ ᒫᓐᓇ ᓇᓪᓕᐅᑎᕗᖅ. 7 ᐅᓇᑕᓚᐅᕐᐳᖓ ᐱᐅᔪᒥᒃ ᐅᓇᑕᐅᑎᖃᕐᓗᖓ, ᐱᔭᕇᕐᐸᕋ ᐅᓪᓚᐅᑎᔭᕆᐊᖃᓚᐅᕐᓂᕋ, ᐅᒃᐱᕐᓂᖅ ᐱᓯᒤᓐᓇᕐᓗᒍ. 8 ᓵᓚᒃᓴᐅᓯᐊᒃᓴᖅ ᐅᕙᓐᓂᒃ ᐅᑕᖅᑭᓕᕐᐳᖅ ᓂᐊᖂᑎᒃᓴᖅ ᐃᓗᐊᕐᑐᓕᔪᓄᑦ, ᐊᑕᓂᐅᑉ ᐃᓗᐊᕐᑐᒥᒃ ᐃᖅᑲᕐᑐᐃᔫᑉ ᑐᓂᔪᒫᕐᑕᖓ ᐅᕙᓐᓄᑦ ᐅᓪᓗᖅ ᓇᓪᓕᐅᑎᒃᐸᑦ, ᐅᕙᓐᓄᑐᐊᖑᖏᑦᑐᕐᓕ ᑍᒃᑯᓄᖓᓕᑦᑕᐅᖅ ᐊᑕᓂᐅᑉ ᓴᖅᑭᓐᓂᒃᓴᖓᓂᒃ ᖁᕕᐊᓱᒡᓗᑎᒃ ᐅᑕᖅᑭᔪᓄᑦ. ᐸᐅᓗᓯᐅᑉ ᓇᖕᒥᓂᖅ ᐅᖃᐅᓯᕆᔭᖏᑦ 9 ᐱᕕᓕᒫᒃᑯᑦ ᐅᕙᓐᓄᑦ ᑎᑭᓵᓕᓇᓱᐊᕐᓂᐊᕐᐳᑎᑦ. 10 ᑏᒪᓯᐅᑉ ᕿᒪᖕᒪᖓ, ᓯᓚᕐᔫᑉ ᐱᖏᑦ ᐅᖓᒋᓕᕋᒥᒋᑦ, ᑎᓴᓗᓁᑲᒧᐊᓚᐅᕐᒪᑦ; ᑯᕇᓯᓃᓯᓗ ᒐᓔᑎᐊᒧᐊᓚᐅᐳᖅ, ᑍᑑᓯᓗ ᑕᓪᒪᑎᐊᒧᐊᓚᐅᕆᓪᓗᓂ. 11 ᓘᑲᓯᐅᑉ ᑭᓯᐊᓂ ᓇᔪᕐᑕᑐᐊᕆᕚᖓ. ᒫᑯᓯ ᐃᓇᓪᓗᒍ ᑎᑭᖃᑎᒋᓛᕐᐸᑦ; ᑖᑦᓱᒪ ᐊᑑᑎᓕᖕᒥᒃ ᐃᑲᔪᕈᓐᓇᕐᒪᖓ ᐱᓇᓱᐊᒐᒃᓴᓐᓂᒃ. 12 ᑍᑭᑰᓯᓗ ᐃᐱᓲᓯᒧᑦ ᑎᓕᓚᐅᕐᐸᕋ. 13 ᑕᒪᐅᓐᖓᓕᕈᕕᑦ, ᐅᓕᒡᔪᐊᕋ ᓇᒃᓴᓛᕐᐸᑦ ᑐᕈᐊᓯᒥ ᕿᒪᓚᐅᕐᑕᕋ ᑳᕐᐸᓯᒃᑯᓐᓄᑦ, ᐊᒡᓔᓪᓗ ᓇᒃᓴᓛᕆᕚᑎᑦ, ᑎᑎᕋᕐᕕᒃᓮᓪᓗ ᐃᒧᒪᔪᑦ ᐱᓗᐊᕐᓗᒋᑦ ᐱᔪᒪᕙᒃᑲ. 14 ᐊᓕᒃᓵᓐᑐᕆᐅᓪᓗ ᑲᓐᓄᔭᒃᓴᓂᒃ ᓴᓇᕙᒃᑑᑉ ᓈᒻᒪᖏᑦᑐᐊᓗᖕᒥᒃ ᐱᓂᐊᕐᕕᒋᓯᒪᕚᖓ; ᐊᑕᓂᐅᓪᓕ ᐱᓂᐊᕐᕕᒋᔪᒫᕐᐹ ᐱᓂᐊᕐᓯᒪᔭᖏᑦ ᒪᓕᒡᓗᒋᑦ. 15 ᑖᓐᓇ ᖃᐅᔨᒪᓇᓱᐊᑦᓯᐊᕐᓂᐊᕐᐸᑦ, ᐊᔪᕆᕐᑑᑎᑦᑎᓐᓂᒃ ᐊᖏᔪᒥᒃ ᐊᑭᕋᕐᑐᒻᒪᕆᓚᐅᕐᒪᑦ. 16 ᓇᖕᒥᓂᖅ ᓴᐳᑎᓇᓱᐊᕐᑎᓪᓗᖓ ᐃᖅᑲᕐᑐᐃᕕᖕᒥ ᐃᑲᔪᕐᑕᐅᓚᐅᖏᓐᓇᒪ; ᑕᒤᓐᓄᓪᓕ ᕿᒪᒃᑕᐅᓚᐅᕐᐳᖓ. ᑍᒃᑯᐊᓕ ᓵᑕᒃᓴᓐᖑᖁᖏᒃᑲᓗᐊᕐᐸᒃᑲ ᑕᒪᑐᒧᖓ! 17 ᐊᑕᓂᐅᓪᓕ ᓇᔪᕐᒪᖓ ᑖᑦᓱᒪ ᐱᔪᓐᓇᕐᓂᖃᕐᑎᓚᐅᕐᐹᖓ ᐅᖃᓪᓚᒍᓐᓇᓚᐅᕐᐳᖓ ᑕᒤᓐᓂᒃ ᐅᖃᕆᐊᖃᕐᑕᓐᓂᒃ, ᔫᑎᐅᖏᑦᑐᓕᒫᑦ ᑐᓴᕈᓐᓇᖁᓪᓗᒋᑦ. ᑕᕝᕙ ᓔᔭᓐᐅᑉ ᖃᓂᖏᓐᓂᑦ ᓴᐳᑎᔭᐅᓚᐅᕐᐳᖓ. 18 ᐊᑕᓂᐅᑉ ᐱᐅᖏᑦᑐᓂᑦ ᑕᒤᓐᓂᑦ ᓴᐳᑎᓂᐊᕐᐹᖓ ᖃᓄᐃᖏᓪᓗᖓ ᐊᑕᓂᐅᕕᖓᓄᑦ ᕿᓚᖕᒦᑦᑐᒧᑦ ᑎᑭᑦᑐᓐᓇᖁᓪᓗᖓ. ᑖᓐᓇ ᓂᕐᑐᕐᑕᐅᓕ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒥᓐ. ᑭᖑᓪᓕᕐᐹᑦ ᑕᕝᕙᐅᕗᑏᕐᓃᑦ 19 ᐳᕆᓯᓚᒃᑯᒃ ᐊᑯᐃᓚᒃᑯᒃ ᑕᕝᕙᐅᕗᑏᕐᐹᒃᑲᒃ, ᐅᓂᓯᐳᕋᓯᐅᓪᓗ ᐃᒡᓗᒥᐅᖃᑎᖏᑦ. 20 ᐃᕌᔅᑕᓯ ᑯᕆᓐᑎᒥ ᓅᓚᐅᓐᖏᓚᖅ, ᑐᕉᐱᒨᓯᓗ ᒥᓕᑑᓯᒥ ᕿᒪᓚᐅᕐᐸᕋ, ᖃᓂᒻᒪᓚᐅᕐᒪᑦ. 21 ᑎᑭᓐᓇᓱᐊᓛᕐᐳᑎᑦ ᐅᑭᐅᓐᖑᓚᐅᖏᓐᓂᖓᓂ. ᐃᐅᐳᓚᓯᐅᑉ, ᐴᑎᓐᓯᐅᓪᓗ, ᓔᓄᓯᐅᓪᓗ, ᑲᓚᐅᑎᐊᓪᓗ ᑕᕝᕙᐅᕗᑏᕆᕚᓯ ᑕᒤᓐᓂᓪᓗ ᐅᒃᐱᕐᑑᖃᑎᓕᒫᑦᑎᓐᓂᑦ. 22 ᐊᑕᓂᐅᑉ ᐊᓂᕐᓃᑦ ᐃᓚᒋᓕᐅᒃ. ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ ᐃᓚᒋᔭᐅᒋᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society