ᑎᓴᓗᓁᑲᒥᐅᓄᑦ ᐂᑉᐸᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐅᑎᑎᒍᑦ

¹ ᑭᖑᓪᓕᕐᐹᒥᒡᓕ ᙭ᔅᑑᓯᒥᐅᑕᐅᖃᑎᒃᑲ, ᑐᒃᓯᐅᑎᑎᒍᑦ, ᐊᑕᓂᐅᑉ ᐅᖃᐅᓯᖏᑦ ᓱᒃᑲᔪᒥᒃ ᓯᐊᒻᒪᕐᑎᑕᐅᕙᓪᓕᐊᖁᓪᓗᒋᑦ ᓂᑐᕐᓇᕐᑎᑕᐅᓗᑎᒃᓗ ᓇᓂᑐᐃᓐᓇᖅ ᐅᐱᒋᔭᐅᑦᓯᐊᕐᓗᑎᒃ, ᐃᓕᑦᓯᑐᑦ,

² ᓴᐳᑎᔭᐅᖁᓪᓗᑕᓗ ᐃᓄᖕᓂᑦ ᐱᐅᖏᑦᑐᓂᑦ ᐊᔪᕐᑐᓕᔪᓂᓪᓗ; ᑕᒪᕐᒥᒃ ᐅᒃᐱᕐᑐᐃᓐᓇᐅᖏᒻᒪᑕ.

³ ᐊᑕᓂᕐᓕ ᓱᖁᓯᔪᐃᑦᑑᖕᒪᑦ; ᑖᑦᓱᒪ ᓴᓐᖏᔫᑎᓐᓂᐊᕐᐹᓯ ᓴᐳᑎᓗᓯᓗ ᓵᑖᓇᓯᒥᑦ.

⁴ ᖁᓚᓐᖏᓚᒍᓪᓕ ᑍᒤᑦᑐᓐᓇᕋᑦᓯ ᐊᑕᓂᕐᒥ, ᐱᓇᓱᐊᕐᓂᑦᓯᓐᓂᒃ ᐃᓕᑦᓯᓐᓄᓪᓗ ᐱᓇᓱᐊᒐᒃᓴᓕᐊᕆᔭᑦᑎᓐᓂᒃ ᐱᓇᓱᐊᕐᓂᐊᕋᑦᓯ.

⁵ ᐊᑕᓂᐅᑉ ᐆᒻᒪᑎᓯ ᑕᓯᐅᕐᓕᒋᑦ ᒎᑎᐅᑉ ᓇᒡᓕᖕᓂᖓᓄᑦ ᙭ᔅᑑᓯᐅᓪᓗ ᓱᖁᓯᔪᐃᑦᑑᓂᖓᓄᑦ.

ᐱᓇᓱᐊᕈᒪᖏᑦᑐᓂᒃ ᐃᓂᕐᑎᕆᓂᖅ

⁶ ᙭ᔅᑑᓯᒥᐅᑕᐅᖃᑎᒃᑲ ᓇᓪᓕᒋᔭᒃᑲ, ᒫᓐᓇ ᐱᖁᓪᓚᕆᒃᐸᑦᓯ, ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐊᑎᖓᓂ, ᐃᓚᖃᖁᓇᓯ ᐅᒃᐱᕐᑑᖃᑎᓂᒃ ᐃᓅᓯᖃᕐᑐᓂᒃ ᓱᓇᓕᕆᔪᒪᖏᑦᑐᒥᒃ ᐱᐅᓯᐅᓲᒥᒃ ᒪᓕᒐᓱᐊᖏᑦᑐᒥᒃ ᐊᔪᕆᕐᑑᑎᒋᓚᐅᕐᑕᑦᑎᓐᓂᒃ.

⁷ ᐃᓕᑦᓯ ᖃᐅᔨᒪᒐᑦᓯ ᐅᕙᑦᑎᓐᓂᒃ ᐃᑦᔪᐊᕐᓯᔭᕆᐊᖃᕋᑦᓯ; ᐃᓕᑦᓯᓐᓃᑎᓪᓗᑕ ᓱᓇᓕᕆᔪᒪᖏᑦᑑᓚᐅᖏᓐᓇᑦᑕ,

⁸ ᐊᑭᖃᖏᑦᑐᒥᒡᓗ ᓂᕿᒃᓴᑦᑎᓐᓂᒃ ᑎᒍᓯᓚᐅᓐᖏᓚᒍᑦ ᑭᓇᒥᓪᓘᓐᓃᑦ, ᐊᒃᓱᕈᕐᓗᑕᓕ ᐱᓇᓱᐊᓚᐅᕐᐳᒍᑦ ᐅᓪᓘᑎᓪᓗᒍ ᐅᓐᓄᐊᒥᓗ, ᐃᓕᑦᓯᓐᓂᒃ ᓇᓕᑦᓯᓐᓂᒃ ᐅᖁᒤᑦᑐᒦᖁᔨᓇᑕ.

⁹ ᑍᒤᓕᐅᓚᐅᕐᐳᒍᑦ ᐃᑲᔪᕐᑕᐅᔭᕆᐊᖃᖏᓐᓂᕐᒨᖏᑦᑐᖅ, ᐃᓕᑦᓯᓐᓄᓪᓕ ᒪᓕᒐᒃᓴᐅᔪᓐᓇᕐᑐᒥᒃ ᐃᓅᓯᖃᓚᐅᕐᐳᒍᑦ.

¹⁰ ᐃᓕᑦᓯᓐᓃᓪᓗᑕ ᓱᓕ, ᐃᓕᑦᓯᓐᓄᑦ ᒪᓕᒃᑕᐅᔪᓴᒥᒃ ᐋᕿᒃᓯᓚᐅᕐᐳᒍᑦ, “ᓇᓪᓕᐊᑦ ᐱᓇᓱᐊᕈᒪᖏᑦᑐᖅ, ᑖᓐᓇ ᓂᕆᔪᒃᓴᐅᓐᖏᓚᖅ.”

¹¹ ᑕᒪᑐᒥᖓᓕ ᐅᖃᕐᐳᒍᑦ ᑐᓴᓚᐅᕋᑦᑕ ᐃᓅᖃᑎᓯᒎᖅ ᐃᓚᖏᑦ ᓱᓇᓕᕆᔪᒪᖏᒻᒪᑕ, ᐃᓅᖃᑎᒥᖕᓂᒃ ᐅᖃᐅᑎᒃᓴᕈᒪᑐᐃᓐᓇᕐᑐᑦ, ᓱᓇᒥᒡᓘᓐᓃᑦ ᐱᓇᓱᐊᕈᒪᓇᑎᒃ.

¹² ᑍᒤᑦᑐᑦ ᐱᖁᓪᓚᕆᒃᓗᒋᑦ ᐃᓇᑉᐸᕗᑦ ᐊᑕᓂᑦᑎᒍᑦ ᔩᓱᓯ ᙭ᔅᑑᓯᒃᑯᑦ ᐋᖅᑮᒋᐊᖁᓪᓗᒋᑦ ᐃᓅᓯᕐᒥᖕᓂᒃ ᐱᓇᓱᐊᓕᖁᓪᓗᒋᓪᓗ ᓇᖕᒥᓂᖅ ᑮᓇᐅᔭᓕᐊᒥᖕᓄᑦ ᐆᒪᑦᔪᑎᒃᓴᕐᓯᐅᖁᓪᓗᒋᑦ.

¹³ ᐃᓕᑦᓯᓕ ᙭ᔅᑑᓯᒥᐅᑕᐅᖃᑎᒃᑲ, ᐱᐅᔪᒥᒃ ᐱᓇᓱᐊᕐᓂᖅ ᐃᕿᐊᓐᖒᑎᑦᑍᓕᓯᐅᒃ.

¹⁴ ᓇᓪᓕᐊᑦ ᑎᑎᕋᕐᑕᑦᑎᓐᓂ ᑖᒃᑯᓇᖓᑦ ᐅᖃᐅᓯᕆᔭᑦᑎᓐᓂᒡᓗ ᓈᓚᒍᒪᖏᑦᑐᖅ, ᑖᓐᓇ ᓇᓪᓕᐊᖑᖕᒪᖔᑦ ᓇᓗᓁᕐᓯᐅᒃ, ᐱᓇᓱᐊᖃᑎᒋᔪᓐᓃᓗᒍᓗ, ᑲᓐᖑᓱᒃᑎᑕᐅᖁᓪᓗᒍ.

¹⁵ ᐊᑭᕋᕐᑐᕐᑎᑎᑐᑦ ᐱᓂᐊᕐᕕᒋᖏᓪᓗᒍ, ᙭ᔅᑑᓯᒥᐅᑕᐅᖃᑎᑐᓪᓕ ᐃᓂᕐᑎᕐᓯᐅᒃ.

ᐅᖃᐅᓰᑦ ᓮᒪᕐᑎᑦᓯᓃᑦ

¹⁶ ᐊᑕᓂᐅᓪᓕ ᓇᖕᒥᓂᖅ ᓮᓕᓂᕐᒥᓄᑦ ᓮᒪᓇᕐᑐᒥᒃ ᑐᓂᓯᕕᒋᓕᓯ ᑍᒪᓐᖓᓕᒫᖅ ᓱᓇᑐᐃᓐᓇᕐᑎᒍᑦ. ᐊᑕᓂᐅᑉ ᐃᓚᒋᓕᓯ ᑕᒪᑦᓯ.

¹⁷ ᐅᓇ ᑕᕝᕙ ᓇᖕᒥᓂᖅ ᐊᒡᒐᓐᓄᑦ ᑎᑎᕋᕐᑕᕋ. ᑕᕝᕙᐅᕗᓯ ᐸᐅᓗᓯᒥᑦ. ᑍᒫᒃ ᑕᕝᕙ ᑎᑎᕋᓕᕌᖓᒪ ᐊᑎᓕᐅᕈᑎᒋᕙᒃᑕᕋ; ᑍᒫᒡᓗ ᑕᕝᕙ ᑎᑎᕋᕐᐸᒃᐳᖓ.

¹⁸ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ ᑕᒪᑦᓯ.