ᓴᒧᐃᓕ ᐂᑉᐸᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᓗ ᒥᕼᐃᐳᓯᑎᓗ

¹ ᑍᕕᑎᓗ ᐅᖃᕐᐳᖅ, “ᓴᐅᓕᐅᑉ ᐃᓚᖏᓐᓂᒃ ᐊᒥᐊᒃᑯᑕᖃᓐᖏᓛᖅ? ᐱᑕᖃᑐᐊᕐᐸᑦ ᐱᑦᓯᐊᕐᕕᖃᕈᒪᒐᒪ ᔫᓇᑕᓂ ᐱᓪᓗᒍ.”

² ᓴᐅᓕᐅᑉ ᐃᓚᖏᓐᓄᑦ ᐱᔨᑲᑖᒃᑕᖃᓚᐅᕐᐳᖅ ᐊᑎᓕᖕᒥᒃ ᔨᐸᒥᒃ, ᑖᓐᓇᓗ ᕾᖁᔭᐅᕗᖅ ᑍᕕᑎᒧᐊᖁᓪᓗᒍ; ᐊᖓᔪᖅᑳᕐᔪᐊᓪᓗ ᐊᐱᕆᕚ, “ᔨᐸᐅᕖᑦ?” ᑭᐅᕗᖅ, “ᑖᓐᓇᐅᕗᖓ ᐱᔩᑦ ᐊᖓᔪᖅᑳᒃ.”

³ ᐊᖓᔪᖅᑳᕐᔪᐊᓪᓗ ᐅᖃᐅᑎᕚ, “ᓴᐅᓕᐅᑉ ᐃᓚᖏᓐᓃᒃ ᐊᒥᐊᒃᑯᑕᖃᓐᖏᓛᖅ? ᐱᑦᓯᐊᕐᕕᒋᔪᒪᓪᓗᒋᑦ ᒎᑎᒧᑦ ᐊᖏᓚᐅᕐᓯᒪᒐᒪ.” ᔨᐸ ᑭᐅᕗᖅ, “ᐱᑕᖃᕐᐳᖅ ᓱᓕ ᐊᑕᐅᓯᕐᒥᒃ ᔫᓇᑕᓂᐅᑉ ᐃᕐᓂᖓᓂᒃ; ᓯᕝᕖᑦᑐᒥᒃ.”

⁴ ᑕᕝᕙ ᐊᖓᔪᖅᑳᕐᔪᐊᑉ ᐅᖃᐅᑎᕚ, “ᓇᓃᑉᐸᓖ?” ᔨᐸ ᑭᐅᕗᖅ, “ᒪᑬᕆᐅᑉ ᐊᖏᕐᕋᖓᓃᑉᐳᖅ ᐊᒥᐅᓕᐅᑉ ᐃᕐᓂᖓᓂ, ᓘᑎ-ᐸᒥᐅᑕᒥ.”

⁵ ᑕᕝᕙ ᐊᖓᔪᖅᑳᕐᔪᐊᑉ ᑍᕕᑎᐅᑉ ᕾᖁᔭᐅᒃᑲᕐᐹ, ᒪᑬᕆᐅᑉ ᐊᖏᕐᕋᖓᓂᑦ ᐊᒥᐅᓕᐅᑉ ᐃᕐᓂᖓᑕ, ᓘᑎ-ᐸᒥᐅᑕᒥᑦ.

⁶ ᒥᐱᐳᓴᑎᓕ ᔫᓇᑕᓂᐅᑉ ᐃᕐᓂᖓ, ᓴᐅᓕᐅᑉ ᐃᕐᖑᑕᖓ, ᕾᒐᒥ ᐹᒻᒪᒃᐳᖅ ᑍᕕᑎᐅᑉ ᓵᖓᓄᑦ ᐃᒃᐱᒍᓱᑦᓯᐊᕐᓂᕐᒧᑦ. ᑍᕕᑎᓗ ᐅᖃᕐᐳᖅ, “ᒥᐱᐳᓴᑏ!” ᑖᓐᓇ ᑭᐅᕗᖅ, “ᐱᔨᒋᕙᕐᒪ ᐊᖓᔪᖅᑳᒃ.”

⁷ ᑍᕕᑎᐅᓪᓗ ᐅᖃᐅᑎᕚ, “ᑲᑉᐱᐊᓱᖏᓪᓗᑎᑦ; ᐱᑦᓯᐊᕐᕕᒋᓂᐊᕐᐸᒋᑦ ᐊᑖᑍᑦ ᔫᓇᑕᓂ ᐱᓪᓗᒍ, ᑐᓂᓯᕕᒋᓂᐊᕐᐸᒋᑦ ᐅᑎᕐᑎᑦᓯᕕᒋᓗᑎᑦ ᐊᑖᑕᑦᓯᐊᕕᑦ ᓴᐅᓕᐅᑉ ᓄᓇᖁᑎᒋᓚᐅᕐᑕᓕᒫᖓᓂᒃ; ᑍᒪᓐᖓᓕᒫᕐᓗ ᓂᕆᖃᑦᑕᕐᓂᐊᕐᐳᑎᑦ ᓂᕆᕕᓐᓂ.”

⁸ ᒥᐱᐳᓯᑎᓕ ᐅᑯᒋᐊᓪᓚᒃᐳᖅ ᐅᖃᕐᓗᓂᓗ, “ᐱᐅᓂᕐᓴᐅᓐᖏᓚᖓ ᕿᒻᒥᒥᑦ ᑐᖁᖓᔪᒥᑦ ᐊᖓᔪᖅᑳᒃ! ᓱᖕᒪᑦ ᐱᑦᓯᐊᕆᐊᖃᕐᐱᖓ?”

⁹ ᑕᕝᕙ ᐊᖓᔪᖅᑳᕐᔪᐊᑉ ᔨᐸ ᕾᖁᕚ, ᓴᐅᓕᐅᑉ ᐱᔨᖓ, ᐅᖃᐅᑎᓪᓗᒍᓗ, “ᒥᐱᐳᓯᑎ ᐊᖓᔪᖅᑳᕕᑦ ᐃᕐᖑᑕᖓ, ᑐᓂᕙᕋ ᓴᐅᓕᐅᑉ ᐃᓚᖏᑕᓗ ᐱᒋᓚᐅᕐᑕᓕᒫᖏᓐᓂᒃ.

¹⁰ ᐃᕝᕕᑦ, ᐃᕐᓂᑎᓪᓗ, ᐱᔨᕕᓪᓗ ᓄᓇᖓᓂᒃ ᐆᒪᔪᖃᐅᑎᖓᓂᒃ ᑲᒪᔪᒃᓴᐅᕗᓯ ᐊᖓᔪᖅᑳᑦᓯ ᐃᓚᖏᓐᓂᒃ ᐱᕈᕐᑐᓂᒡᓗ ᓄᐊᑦᓯᕙᒡᓗᓯ, ᓂᕿᒃᓴᖃᕈᓐᓇᖁᓪᓗᒋᑦ; ᒥᐱᐳᓴᑎᓕ ᐊᖓᔪᖅᑳᕕᑦ ᐃᕐᓂᖓ ᓂᕆᕕᓐᓂ ᓂᕆᖃᑕᐅᖏᓐᓇᕐᑐᒃᓴᐅᕗᖅ.” ᔨᐸᓕ 15ᓂᒃ ᐃᕐᓂᖃᓚᐅᕐᐳᖅ 20ᓂᒡᓗ ᐱᔨᖃᕐᓗᓂ.

¹¹ ᑕᕝᕙ ᔨᐸ ᐅᖃᕐᐳᖅ, “ᐱᔭᐅᖁᔭᓕᒫᕐᓂᒃ ᐊᑕᓃᖅ ᐊᖓᔪᖅᑳᕐᔪᐊᖅ ᐱᓇᓱᐊᕐᓂᐊᕐᐳᖓ.” ᑍᒤᒻᒪᑦ ᒥᐱᐳᓴᑎ ᓂᕆᖃᑕᐅᖃᑦᑕᓚᐅᕐᐳᖅ ᐊᖓᔪᖅᑳᕐᔪᐊᑉ ᓂᕆᕕᖓᓂ, ᐊᖓᔪᖅᑳᕐᔪᐊᑉ ᐃᕐᓂᖏᑎᑐᑦ.

¹² ᒥᐱᐳᓴᑎᓗ ᐃᕐᓂᖃᓚᐅᕐᐳᖅ ᓄᑲᑉᐱᐊᒥᒃ ᐊᑎᓕᖕᒥᒃ ᒤᑲᒥᒃ. ᔨᐸᐅᓪᓗ ᐃᒡᓗᒥᐅᖃᑎᓕᒫᖏᑦ ᐱᔨᑖᕆᔭᐅᓚᐅᕐᐳᑦ ᒥᐱᐳᓴᑎᒧᑦ.

¹³ ᑍᒤᒻᒪᑦ ᒥᐱᐳᓴᑎ ᓄᓇᖃᓕᓚᐅᕐᐳᖅ ᔨᕉᓴᓕᒥ; ᓂᕆᖃᑕᐅᕙᒡᓗᓂᓗ ᐊᖓᔪᖅᑳᕐᔪᐊᑉ ᓂᕆᕕᖓᓂ, ᓯᕝᕖᑦᑑᓚᐅᕐᐳᕐᓕ ᐃᑎᒐᖏᒃ ᐃᒡᓗᒃᑐᑦ ᓯᖁᒥᓯᒪᖕᒪᑎᒃ.