ᓴᒧᐃᓕ ᐂᑉᐸᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑕ ᓵᓚᖃᕐᓂᖏᑦ

¹ ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᑍᕕᑎ ᐅᓇᑕᕆᐊᕋᒥ ᐱᓕᔅᑍᓂᒥᐅᑦ ᓵᓚᒋᕔᑦ, ᓄᓇᓗ ᒥᑎᒋ-ᐊᒪ ᓄᓇᑖᕆᕚ ᐱᓕᔅᑍᓂᒥᐅᓂᑦ ᐊᕐᓵᕐᓯᑦᔪᑎᒋᓪᓗᓂᐅᒃ.

² ᒧᐊᐱᒥᐅᓪᓗ ᓵᓚᒋᒋᕔᑦ, ᑎᒍᔭᓂᓗ ᒪᓂᖅᑲᒧᑦ ᓇᓪᓚᕐᑎᑉᐰᑦ; ᐊᒃᓱᓈᒧᑦ ᐆᒃᑐᕋᐅᑎᖃᕐᓗᓂ ᐊᒃᓱᓈᑉ ᐃᓗᐊᓃᑦᑐᑦ ᒪᕐᕈᐃᕐᑕᕐᓗᒋᑦ ᑖᒃᑯᐊ ᑐᖁᑕᐅᑎᑉᐰᑦ, ᐆᒃᑐᕋᕐᑕᖏᑕ ᐱᖓᔪᖏᓐᓃᑦᑐᑦ ᑐᖁᑕᐅᕙᒐᑎᒃ. ᑍᒤᒻᒪᑦ ᒧᐊᐱᒥᐅᑦ ᑍᕕᑎᐅᑉ ᐱᔨᑖᕆᓚᐅᕐᐰᑦ ᑮᓇᐅᔧᔭᓕᕐᓗᑎᒡᓗ ᑖᒃᓰᕈᑎᒥᖕᓂᒃ ᑖᑦᓱᒧᖓ.

³ ᑍᕕᑎᐅᓪᓗ ᔫᐸᒥᐅᑦ ᐊᖓᔪᖅᑳᕐᔪᐊᖓ ᕼᐊᑕᑎᔨᕆ ᕅᕼᐊᑉ ᐃᕐᓂᖓ ᓵᓚᒋᓚᐅᕆᕚ, ᑖᓐᓇ ᕼᐊᑕᑎᔨᕆ ᐊᐅᓪᓚᓚᐅᕐᑑᒐᓗᐊᖅ ᓄᓇᖁᑎᕕᓂᓂ ᐅᑎᕐᑎᑦᓱᒪᓪᓗᒍ ᐃᕗᕅᑎᐅᑉ ᑰᖓᑕ ᖁᓛᓃᑦᑐᖅ.

⁴ ᑍᕕᑎᐅᓪᓗ ᑎᒍᓚᐅᕐᐰᑦ 1,700ᐃᑦ ᕿᒻᒥᕐᔪᐊᒃᑰᕐᑏᑦ, 20,000ᐃᓪᓗ ᐅᓇᑕᕐᑐᒃᓮᑦ ᐱᓱᒃᑏᑦ; 100ᓂᒡᓗ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᑎᒍᓯᓚᐅᕐᐳᖅ ᐊᓯᓕᒫᖏᑦ ᑭᖑᓪᓖᖏᑕ ᓄᑭᖏᑦ ᓱᒃᑯᑎᕐᓗᒋᑦ.

⁵ ᓯᕆᐊᒥᐅᑦ ᑕᒫᓯᑰᓯᒥᐅᑍᑦ ᐅᓇᑕᕐᑐᒃᓴᖁᑎᓂᒃ ᐊᐅᓪᓚᕐᑎᑦᓯᓚᐅᕐᐳᑦ ᐃᑲᔪᕆᐊᕐᑐᓂᒃ ᔫᐸᐅᑉ ᐊᖓᔪᖅᑳᕐᔪᐊᖓᓂᒃ ᕼᐊᑕᑎᔨᕆᒥᒃ, ᑍᕕᑎᐅᑉ ᑐᖁᓚᐅᕐᐰᑦ 22,000 ᓯᕆᐊᒥᐅᑦ.

⁶ ᑕᕝᕙ ᑍᕕᑎ ᐅᓇᑕᕐᑐᒃᓴᖁᑎᒥᓂᒃ ᓄᓇᓕᖏᓐᓂ ᐃᓂᑖᕐᑎᑦᓯᓚᐅᕐᐳᖅ ᐊᕌᒻᒥ ᑕᒫᓯᑰᓯᒦᑦᑐᒥ; ᓯᕆᐊᒥᐅᓪᓗ ᐱᔨᑖᕆᓚᐅᕐᐰᑦ ᑮᓇᐅᔧᔭᓕᕐᓗᑎᒡᓗ ᑖᑦᓱᒧᖓ. ᐊᑕᓂᐅᓪᓗ ᑍᕕᑎ ᓵᓚᖃᕐᑎᖃᑦᑕᓚᐅᕐᐹ ᓇᒧᑐᐃᓐᓇᖅ ᐂᑐᐊᕌᖓᑦ.

⁷ ᑍᕕᑎᐅᓪᓗ ᒎᓗᐃᑦ ᕼᐊᑕᑎᔨᕆᐅᑉ ᓴᐴᓗᑕᖏᑦ ᑎᒍᓚᐅᕐᐰᑦ ᑖᑦᓱᒪ ᐱᔨᖓᑕ ᐊᒡᔭᖃᑦᑕᓚᐅᕐᑕᖏᑦ, ᔨᕉᓴᓕᒧᐊᕈᑎᓪᓗᒋᓪᓗ.

⁸ ᑍᕕᑎᓗ ᐊᖏᔪᐊᓗᖕᒥᒃ ᑲᓐᓄᔭᒥᒃ ᑎᒍᓯᓚᐅᕐᐳᖅ ᓄᓇᒥᑦ ᐱᑕᒥᑦ ᐱᕈᑍᒥᓪᓗ, ᐃᒡᓗᒐᓴᖕᓂᑦ ᕼᐊᑕᑎᔨᕆᐅᑉ ᐊᐅᓚᓚᐅᕐᑕᖏᓐᓂᑦ.

⁹ ᐊᖓᔪᖅᑳᕐᔪᐊᕐᓕ ᑐᐃ ᕼᐊᒫᑎᒥᐅᑕᖅ ᑐᓴᕋᒥ ᑍᕕᑎᐅᑉ ᓵᓚᖃᕐᓂᖓᓂᒃ ᕼᐊᑕᑎᔨᕆᐅᑉ ᐅᓇᑕᕐᑐᒃᓴᖁᑎᓕᒫᖏᓐᓂᒃ.

¹⁰ ᐃᕐᓂᓂ ᔪᕌᒥ ᑎᓕᕚ ᐊᖓᔪᖅᑳᕐᔪᐊᕐᒧᑦ ᑍᕕᑎᒧᑦ, ᐅᐱᒍᓱᒋᐊᕐᑐᖁᓪᓗᒍ ᕼᐊᑕᑎᔨᕆᒥᒃ ᐅᓇᑕᓚᐅᕐᒪᑦ ᓵᓚᒋᓪᓗᒍᓗ; ᑐᐃᒥᒃ ᐅᓇᑕᖃᑎᖃᕐᐸᓚᐅᕐᒪᑦ ᐅᓄᕐᑐᐃᕐᓱᕐᓗᓂ. ᔪᕌᒥ ᓇᒃᓴᓚᐅᕐᐳᖅ ᑍᕕᑎᒧᑦ ᒎᓗᒥᒃ, ᓯᐅᓪᕕᕆᒥᒃ, ᑲᓐᓄᔭᓂᒡᓗ;

¹¹ ᑕᒪᒃᑯᐊᑦᑕᐅᖅ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐂᑦᑑᑎᒋᓚᐅᕐᐰᑦ ᐊᑕᓂᕐᒧᑦ, ᓯᐅᓪᕕᕇᑦ ᒎᓗᐃᓪᓗ ᐱᖃᓯᐅᑎᓪᓗᒋᑦ ᑎᒍᓚᐅᕐᑕᓕᒫᑎᒃ ᐃᓅᖃᑎᒌᒡᔪᐊᓂᑦ ᓵᓚᒋᓚᐅᕐᑕᒥᖕᓂᑦ,

¹² ᐄᑐᒥᒥᑦ, ᒧᐊᐱᒥᑦ, ᐊᒧᓁᑎᒥᑦ, ᐱᓕᔅᑍᓂᒥᑦ, ᐊᒪᓕᒃᒥᓪᓗ, ᐃᓚᖃᕐᓗᑎᒃ ᑎᒍᓚᐅᕐᑕᒥᓂᒃ ᕼᐊᑕᑎᔨᕆᒥᑦ ᕅᕼᐊᑉ ᐃᕐᓂᖓᓂᑦ, ᔫᐸᐅᑉ ᐊᖓᔪᖅᑳᕐᔪᐊᖓᓂᑦ.

¹³ ᑍᕕᑎᓗ ᖃᐅᔨᒪᔭᐅᒋᐊᓪᓚᒃᑲᓐᓂᓕᓚᐅᕐᐳᖅ, ᐅᑎᕐᒪᑦ ᑐᖁᑦᓯᓚᐅᕐᑎᓪᓗᒍ 18,000ᓂᒃ ᐄᑐᒤᑎᒥᐅᓂᒃ ᓇᕐᓴᒥ ᐊᑎᓕᖕᒥ ᑕᕆᐅᕐᒥᒃ.

¹⁴ ᐅᓇᑕᕐᑐᒃᓴᖁᑎᒥᓂᒡᓗ ᐃᓂᑖᕐᑎᑦᓯᓚᐅᕐᐳᖅ ᐄᑐᒥᓕᒫᒥ; ᐃᓄᓕᒫᖏᓪᓗ ᐱᔨᑖᕆᓚᐅᕐᐰᑦ. ᐊᑕᓂᐅᓪᓗ ᑍᕕᑎ ᓵᓚᖃᕐᑎᖃᑦᑕᓚᐅᕐᐹ ᓇᒧᓐᖓᑐᐊᕌᖓᑦ.

¹⁵ ᑕᕝᕙ ᑍᕕᑎ ᐊᐅᓚᑦᓯᓕᓚᐅᕐᐳᖅ ᐃᓴᕆᐊᓕᓕᒫᒥᒃ; ᐃᓄᓕᒫᖏᓪᓗ ᑲᒪᒋᔭᐅᑦᓯᐊᕐᑎᓚᐅᕐᐰᑦ ᐱᑦᓯᐊᕐᑕᐅᑎᓪᓗᒋᓪᓗ.

¹⁶ ᔪᐊᐱᓗ ᔨᕈᐃᐊᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ ᐅᓇᑕᕐᑐᒃᓴᖁᑎᖏᓐᓄᑦ; ᔨᕼᐆᓴᐸᑦ ᐊᕼᐃᓗᑎᐅᑉ ᐃᕐᓂᖓ ᑲᒪᔨᐅᑎᓪᓗᒍ ᐱᖁᑎᓕᒫᖏᓐᓂᒃ;

¹⁷ ᔭᑑᒃ ᐊᕼᐃᑑᑉ ᐃᕐᓂᖓ ᐊᕼᐃᒥᓕᒡᓗ ᐊᐰᐊᑕᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔨᐅᓚᐅᕐᐴᒃ; ᓯᕅᐊ ᑎᑎᕋᕐᑎᐅᑎᓪᓗᒍ;

¹⁸ ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ ᑲᒪᔨᐅᓚᐅᕐᐳᖅ ᓴᐳᓐᓂᐊᕐᑎᓂᒃ ᓯᕆᑍᑎᓂᒃ ᐱᓕᑍᑎᓂᒡᓗ; ᑍᕕᑎᐅᓪᓗ ᐃᕐᓂᖏᑦ ᐊᖓᔪᖅᑳᖑᓚᐅᕐᐳᑦ.