ᓴᒧᐃᓕ ᐂᑉᐸᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᓁᑕᓂᐅᑉ ᐅᖃᐅᓯᖏᑦ ᑍᕕᑎᒧᑦ

¹ ᐊᖓᔪᖅᑳᕐᔪᐊᖅ ᑍᕕᑎ ᐃᓂᖃᓕᓚᐅᕐᐳᖅ ᐊᖓᔪᖅᑳᕐᔪᐊᑉ ᐃᒡᓗᖓᓂ, ᐊᑕᓂᐅᓪᓗ ᓴᐳᑎᓯᒪᓚᐅᕐᐹ ᐊᑭᕋᓕᒫᖏᓐᓂᑦ ᖃᓂᒋᔭᖓᓃᑦᑐᓂᑦ,

² ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ ᓁᑕᓂᒧᑦ ᐊᑕᓂᐅᑉ ᐅᖃᕐᑎᖓᓄᑦ, “ᑕᑯᒋᑦ ᐃᒡᓗᒦᑉᐳᖓ ᕿᔪᑦᓯᐊᕙᖕᓄᑦ ᓰᑕᕆᓄᑦ ᓯᑎᔪᓄᑦ ᓴᓇᓯᒪᔪᒥ, ᒎᑎᐅᓪᓕ ᐃᒃᓯᕐᕕᖁᑎᖓ ᑐᐱᕐᒦᑐᐃᓐᓇᕐᑎᓪᓗᒍ!”

³ ᓁᑕᓂᓗ ᑭᐅᕗᖅ, “ᐃᓱᒪᒋᔧᑦ ᐊᑐᕐᓗᒍ ᐱᓇᓱᐊᓕᕆᑦ; ᐊᑕᓂᐅᑉ ᐃᓚᒋᒻᒪᑎᑦ.”

⁴ ᐅᓐᓄᒃᑎᓪᓗᒍᓕ ᐊᑕᓂᐅᑉ ᐅᖃᐅᓯᖓ ᓁᑕᓂᒧᐊᕐᐳᖅ,

⁵ “ᐱᔨᒐ ᑍᕕᑎ ᐅᐸᒡᓗᒍ ᐅᖃᐅᑎᔭᕐᑐᕈᒃ, ‘ᐊᑕᓂᖅ ᐃᒫᒃ ᐅᖃᕐᐳᖅ: ᐃᒡᓗᒥᒃ ᐃᓂᒃᓴᓐᓂᒃ ᓴᓇᔪᒪᕖᑦ?

⁶ ᑍᒪᓐᖓᓂᑦ ᐃᓴᕆᐊᓕᒥᐅᑦ ᐊᐅᓪᓚᐅᑎᓚᐅᕐᓯᒪᒐᒃᑭᑦ ᐄᑦᔨᑉᑎᒥᑦ ᒫᓐᓇᒧᑦ ᑎᑭᓪᓗᒍ ᐃᓂᖃᓚᐅᕐᓯᒪᓐᖏᓚᖓ ᐃᒡᓗᒥᒃ, ᐊᐅᓪᓚᖃᑕᐅᖃᑦᑕᓚᐅᕐᐳᖓᓕ ᑐᐱᕐᒥ ᐃᓂᖃᕐᓗᖓ.

⁷ ᐊᐅᓪᓚᖃᑕᐅᖃᑦᑕᕐᑎᓪᓗᖓ ᐃᓴᕆᐊᓕᒥᐅᓕᒫᑦ ᐱᖃᑎᒋᓪᓗᒋᑦ, ᐊᐱᕆᓚᐅᕐᓯᒪᓐᖏᓚᖓ ᓯᕗᓕᕐᑎᓂᒃ ᑎᓕᓯᒪᔭᓐᓂᒃ, ᓱᖕᒪᑦ ᓴᓇᓚᐅᕐᓯᒪᓐᖏᓚᓰ ᐃᒡᓗᒥᒃ ᐃᓂᒃᓴᓐᓂᒃ ᕿᔪᑦᓯᐊᕙᖕᓄᑦ ᓰᑕᕆᓄᑦ ᓴᓇᓯᒪᔪᒥᒃ?’

⁸ “ᒫᓐᓇ ᑍᒤᒻᒪᑦ ᐱᔨᒐ ᑍᕕᑎ ᐅᖃᐅᑎᔭᕐᑐᕈᒃ, ‘ᐊᑕᓂᖅ ᖁᑦᓯᖕᓂᕐᐹᖑᔪᖅ ᐃᒫᒃ ᐅᖃᕐᐳᖅ, ᕾᖁᓚᐅᕐᐸᒋᑦ ᓰᐱᓂᒃ ᐰᕐᓯᔨᐅᑎᓪᓗᑎᑦ, ᐊᐅᓚᑦᓯᔨᐅᖁᓪᓗᑎᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ.

⁹ ᐃᓚᒌᓐᓇᓚᐅᕐᐸᒋᑦ ᓇᒧᑐᐃᓐᓇᖅ ᐂᑎᓪᓗᑎᑦ, ᐊᑭᕋᓕᒫᑎᓪᓗ ᓵᓚᒋᖃᑦᑕᓚᐅᕐᐸᒃᑲ ᐱᓪᓗᑎᑦ; ᐅᐱᓐᓇᕐᑐᓐᖑᕐᑎᓐᓂᐊᕐᐸᒋᑦ, ᑍᒃᑯᑎᑐᓇᖅ ᐅᐱᓐᓇᕐᑑᓯᒪᔪᑎᑐᑦ ᓄᓇᕐᔪᐊᕐᒥ.

¹⁰ ᐃᓂᒃᓴᒥᒃ ᓂᕈᐊᕐᓂᐊᕐᐳᖓ ᐃᓄᖁᑎᒃᑲ ᐃᓴᕆᐊᓕᒥᐅᑦ ᐃᓂᖃᑦᓯᐊᖁᓪᓗᒋᑦ, ᓇᖕᒥᓂᖅ ᓄᓇᖃᖁᓪᓗᒋᑦ, ᐸᕝᕕᓴᒃᑕᐅᖃᑦᑕᖏᓪᓗᑎᒃ ᓇᓪᓕᐊᓐᓄᓪᓘᓐᓃᑦ; ᐃᓴᒋᔭᖃᖏᑦᑐᓄᓪᓗ ᐸᒡᕕᓴᒃᑕᐅᖃᑦᑕᕈᓐᓁᖁᓪᓗᒋᑦ, ᓯᕗᓕᕆᓚᐅᕐᑕᖏᑎᑐᑦ.

¹¹ ᑍᒪᓐᖓᑦ ᐃᓱᐊᕐᓮᔨᓂᒃ ᑎᓕᓯᖃᑦᑕᓕᓚᐅᕐᓂᓐᓂᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ; ᐸᒡᕕᓴᒃᑕᐅᑎᓐᓂᐊᕈᓐᓁᕐᐸᑦᓯ ᐊᑭᕋᕐᑐᕐᑎᓕᒫᑦᓯᓐᓂᑦ. ᓱᓕᓗ ᐊᑕᓂᐅᑉ ᓇᓗᓁᕐᓯᕕᒋᓪᓗᓯ ᐅᖃᐅᑎᕚᓯ ᐊᑕᓂᐅᑉ ᑭᖑᕚᒃᓴᓕᐅᕐᑎᓐᓂᐊᓕᕐᐹᓯ.

¹² ᑐᖁᒍᕕᓪᓗ ᓯᕗᓕᕕᓂᕐᓄᑦ ᐃᓗᕕᕐᑕᐅᖃᑕᐅᔪᒫᕐᐳᑎᑦ, ᑭᖑᕚᕕᓪᓗ ᐃᓚᖓᑦ ᐊᖓᔪᖅᑳᕐᔪᐊᕈᕐᑎᑦᓱᒫᕐᐸᕋ ᐊᑕᓂᐅᕕᖓᓗ ᓴᓐᖏᔫᔪᒫᕐᐳᖅ.

¹³ ᑖᓐᓇ ᓴᓇᔪᒫᕐᐳᖅ ᐃᒡᓗᒃᓴᓐᓂᒃ, ᑖᑦᓱᒪᓗ ᐊᖓᔪᖅᑲᐅᕕᖓ ᑲᔪᓯᑎᑦᓱᒫᕐᐸᕋ ᐃᓱᖃᖏᑦᑐᒧᑦ.

¹⁴ ᑖᑦᓱᒪ ᐊᑖᑕᒋᔪᒫᕐᐹᖓ, ᑖᓐᓇᓗ ᐃᕐᓂᕆᔪᒫᕐᐸᕋ. ᑖᓐᓇᓗ ᐊᔪᕐᑐᓕᒃᐸᑦ, ᓱᒋᐊᕈᒫᕐᐸᕋ ᐊᑖᑕᐅᔪᑐᑦ, ᐊᑖᑕᐅᑉ ᓱᒋᐊᕐᓯᕙᖕᓂᖓᑐᑦ ᐃᕐᓂᕐᒥᓂᒃ.

¹⁵ ᑭᓯᐊᓂᓕ ᑖᑦᓱᒧᖓ ᓇᒡᓕᖕᓂᕋ ᐲᓚᐅᕐᓯᒪᓂᐊᓐᖏᓚᕋ, ᓴᐅᓕᒥᑦ ᐲᕐᓯᓚᐅᕐᓂᑦᑐᑦ, ᑖᓐᓇ ᐊᒡᕔᕐᑎᓚᐅᕋᒃᑯ ᐊᖓᔪᖅᑳᕐᔪᐊᓐᖑᖔᖁᓪᓗᑎᑦ.

¹⁶ ᑭᖑᕚᑎᓪᓕ ᐊᑕᓂᐅᕖᓪᓗ ᓱᖁᓯᔪᐃᑦᑑᑎᑦᓱᒪᕙᒃᑲ ᐃᓱᖃᖏᑦᑐᒧᑦ; ᐊᖓᔪᖅᑲᐅᓃᓪᓗ ᑲᔪᓯᓂᐊᕐᐳᖅ ᐃᓱᖃᖏᑦᑐᒧᑦ.’”

¹⁷ ᓁᑕᓂᐅᑉ ᑍᕕᑎ ᐅᖃᐅᑎᓚᐅᕐᐹ ᒎᑎᐅᑉ ᐅᖃᕐᑕᐅᖁᔭᓕᒫᖏᓐᓂᒃ ᑕᑯᑎᑦᓯᑦᔪᑎᒋᓚᐅᕐᑕᓕᒫᖏᓐᓂᒡᓗ ᑖᑦᓱᒧᖓ.

ᑍᕕᑎᐅᑉ ᑐᒃᓯᐊᕐᓂᖓ ᖁᔭᓕᓂᕐᒧᑦ

¹⁸ ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᑍᕕᑎ ᑐᐱᕐᒧᐊᕐᐳᖅ ᐊᑕᓂᐅᑉ ᓇᔪᕐᑕᖓᓄᑦ, ᐃᖏᓪᓗᓂᓗ ᑐᒃᓯᐊᕐᐳᖅ ᐅᖃᕐᓗᓂ, “ᐊᑕᓃᖅ ᒎᑏ, ᓇᓗᖅᑯᑎᕗᖓ ᖃᓄᐃᓕᐅᕐᓯᒪᓂᕆᔭᕐᓂᒃ ᐅᕙᓐᓄᑦ ᐃᓚᓐᓄᓪᓗ.

¹⁹ ᑍᒤᒃᑲᓗᐊᕐᒪᑦ ᓱᓕᓕ ᐊᖏᓂᕐᓴᒥᒃ ᐱᓇᓱᐊᓕᕆᕗᑎᑦ ᐊᑕᓃᖅ ᒎᑏ; ᐊᖏᕈᑎᖃᕐᐳᑎᑦ ᑭᖑᕚᓐᓄᑦ ᓯᕗᓂᕐᒥ ᑎᑭᑦᓱᒫᕐᑐᓄᑦ, ᑕᑯᑎᓪᓗᖓᓗ ᓯᕗᓂᕐᒥ ᑭᖑᕚᕇᖑᔪᒫᕐᑐᓂᒃ, ᐊᑕᓃᖅ ᒎᑏ!

²⁰ ᖃᓄᕐᓗ ᐅᖃᒃᑲᓐᓂᕈᓐᓇᕐᐳᖔ ᐃᓕᖕᓄᑦ? ᐱᔩᑦ ᖃᐅᔨᒪᒐᕕᐅᒃ, ᐊᑕᓃᖅ ᒎᑏ!

²¹ ᑍᒫᒃ ᑕᒪᓐᓇ ᐊᖏᕈᑎᒋᒐᕕᐅᒃ, ᐆᒻᒪᑎᕕᓪᓗ ᐱᔪᒪᔭᕆᓪᓗᓂᐅᒃ ᑕᒪᒃᑯᐊ ᑲᒪᓇᕐᑐᕐᔪᐊᑦ ᐱᓇᓱᐊᕐᓯᒪᕙᑎᑦ, ᐱᔩᓪᓗ ᖃᐅᔨᑎᓪᓗᒍ ᑕᒪᑐᒥᖓ.

²² ᑍᒤᒻᒪᑦ ᐊᖏᔪᕐᔪᐊᖑᕗᑎᑦ, ᐊᑕᓃᖅ ᒎᑏ; ᓇᓪᓕᐊᓐᓂᒡᓘᓐᓃᑦ ᐊᑦᔨᖃᓐᖏᓚᑎᑦ, ᐊᓯᖕᓂᒡᓗ ᒎᑎᑕᖃᓐᖏᓚᖅ, ᑐᓴᕐᓯᒪᔭᓕᒫᕗᑦ ᒪᓕᒡᓗᒋᑦ.

²³ ᐃᓴᕆᐊᓕᒥᐅᑦ ᐃᓅᖃᑎᒌᒡᔪᐊᓂᒃ ᐊᑦᔨᖃᓐᖏᓚᑦ ᓄᓇᕐᔪᐊᕐᒥ, ᐄᑦᔨᑉᑎᒥᑦ ᓴᐳᑎᔭᕐᑐᓚᐅᕐᐸᑎᑦ ᐃᓄᖁᑎᑎᑦ ᐃᓚᒋᔪᒪᓪᓗᒋᑦ, ᑲᒪᓇᕐᑐᕐᔪᐊᓪᓗ ᐱᓂᐊᕐᓂᕆᓚᐅᕐᐸᑎᑦ ᑖᒃᑯᓄᖓ ᖃᐅᔨᒪᔭᐅᓕᕐᓗᑎᒡᓗ ᓯᓚᕐᔪᐊᒥᐅᓄᑦ, ᐃᓅᖃᑎᒌᒡᔪᐊᑦ ᒎᑎᓐᖑᐊᖏᓪᓗ ᓯᖏᓚᐅᕐᐸᑎᑦ ᐃᓄᖁᑎᑎᑦ ᓄᓇᑖᖔᖁᓪᓗᒋᑦ.

²⁴ ᐃᓴᕆᐊᓕᒥᐅᓪᓗ ᓇᖕᒥᓂᕐᑖᕆᓯᒪᕙᑎᑦ ᐃᓄᖁᑎᑖᕆᓪᓗᒋᑦ ᐃᓱᖃᖏᑦᑐᒧᑦ; ᐃᕝᕕᓪᓗ ᐊᑕᓃᖅ, ᒎᑎᒋᔭᐅᓕᕐᓗᑎᑦ ᑖᒃᑯᓄᖓ.

²⁵ “ᒫᓐᓇᓗ, ᐊᑕᓃᖅ ᒎᑏ, ᐊᖏᕈᑎᒋᓯᒪᔭᕕᑦ ᓱᓕᓂᖓ ᓇᓗᓁᓕᕈᒃ ᐅᕙᓐᓄᑦ ᑭᖑᕚᓐᓄᓪᓗ, ᐅᖃᐅᓯᕆᓚᐅᕐᑕᑎᓪᓗ ᑲᔪᓯᑎᓪᓗᒋᑦ.

²⁶ ᐊᑎᕐᐱᑦ ᖃᐅᔨᒪᔭᐅᓂᖓ ᐊᖏᒡᓕᓂᐊᕐᐳᖅ ᐃᓱᖃᖏᑦᑐᒧᑦ, ᐅᖃᕐᓗᑎᒃ, ‘ᐊᑕᓂᖅ ᖁᑦᓯᖕᓂᕐᐹᖑᔪᖅ ᒎᑎᐅᕗᖅ ᐃᓴᕆᐊᓕᒥᐅᓄᑦ,’ ᑲᔪᓯᑏᓐᓇᕐᓂᐊᕐᐸᑎᓪᓗ ᐱᔨᕕᑦ ᑍᕕᑎᐅᑉ ᑭᖑᕚᖏᑦ ᓵᖕᓂ.

²⁷ ᐃᕝᕕᑦ ᐊᑕᓃᖅ ᖁᑦᓯᖕᓂᕐᐹᖑᔪᑎᑦ, ᐃᓴᕆᐊᓕᒥᐅᑦ ᒎᑎᖓ, ᑕᒪᓐᓇ ᐱᔨᖕᓄᑦ ᑕᑯᔭᐅᑎᓚᐅᕋᕕᐅᒃ ᐅᖃᕐᓗᑎᑦ, ‘ᑭᖑᕚᑎᑦ ᐊᖓᔪᖅᑳᕐᔪᐊᖑᔪᒫᕐᐳᑦ’; ᑍᒤᒻᒪᑦ ᐱᔩᑦ ᓴᐱᖏᓪᓗᓂ ᑐᒃᓯᐊᕈᓐᓇᓕᕐᐳᖅ ᑐᒃᓯᐊᕐᓂᕐᒥᒃ ᑕᒪᑐᒥᖓ ᐃᓕᖕᓄᑦ.

²⁸ “ᒫᓐᓇᓗ, ᐊᑕᓃᖅ ᒎᑏ, ᐃᕝᕕᑦ ᒎᑎᐅᕗᑎᑦ, ᐅᖃᐅᓯᑎᓪᓗ ᓱᓕᓪᓗᑎᒃ, ᐊᖏᕈᑎᖃᕐᓗᑎᓪᓗ ᐱᐅᔪᐊᓗᖕᒥᒃ ᑕᒪᑐᒥᖓ ᐱᔨᖕᓄᑦ;

²⁹ ᒫᓐᓇ ᑍᒤᒻᒪᑦ ᖁᕕᐊᒋᒍᕕᐅᒃ ᑐᒃᓯᐊᕐᐳᖓ ᐱᔨᕕᑦ ᑭᖑᕚᖏᑦ ᓮᒻᒪᕐᑎᓚᐅᒃᑭᑦ, ᑲᔪᓯᑦᓯᐊᖁᓪᓗᒋᑦ ᓵᖕᓂ; ᐃᕝᕕᑦ, ᐊᑕᓃᖅ ᒎᑏ, ᐅᖃᓚᐅᕋᕕᑦ, ᓮᒻᒪᕐᑎᑦᓯᓃᓪᓗ ᐱᔨᕕᑦ ᑭᖑᕚᖏᓐᓄᑦ ᑲᔪᓯᖁᓪᓗᒍ ᐃᓱᖃᖏᑦᑐᒧᑦ.”