ᓴᒧᐃᓕ ᐂᑉᐸᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖏᖃᑎᒌᖕᓂᐅᑉ ᐃᒃᓯᕐᕕᖓᑕ ᔨᕉᓴᓕᒧᐊᕐᑕᐅᓂᖓ

¹ ᑍᕕᑎᐅᑉ ᐅᓇᑕᕐᑐᒃᓴᖁᑎᓂ ᐱᓯᑎᐅᓂᕐᐹᑦ ᐃᓴᕆᐊᓕᒥᐅᓂᑦ ᑲᑎᖁᓚᐅᕆᕔᑦ, ᑖᒃᑯᐊᓗ 30,000ᓴᐅᓚᐅᕐᐳᑦ.

² ᑍᕕᑎᐅᓪᓗ ᓯᕗᓕᕐᓗᒋᑦ ᐹᓚᒧᐊᖃᑎᒋᕔᑦ ᔫᑕᒦᑦᑐᒧᑦ, ᐂᒃᓯᕐᓗᑎᒃ ᐊᑕᓂᐅᑉ ᐃᒃᓯᕐᕕᖁᑎᖓᓂᒃ, ᑖᑦᓱᒥᖓ ᐊᑎᖃᕐᑎᑕᐅᔪᒥᒃ ᐊᑕᓂᖅ ᐊᔪᒐᖃᖏᑦᑐᖅ ᐃᒃᓯᕙᐅᑕᕐᔪᐊᕐᒥ ᐃᒃᓯᕙᓯᔪᖅ ᓯᕈᐱᒻ ᖁᓛᓃ.

³ ᐂᔭᐅᓚᐅᕐᐳᖅ ᐊᐱᓇᑕᐅᑉ ᐊᖏᕐᕋᖓᓂᑦ ᐱᖑᕐᒦᑦᑐᒥᑦ, ᐃᓕᓪᓗᒍᓗ ᐊᒃᓴᓗᐊᓕᖕᒧᑦ ᓄᑖᒧᑦ; ᐆᔭᓗ ᐊᕼᐂᐅᓗ ᐊᐱᓇᑕᐅᑉ ᐃᕐᓂᖏᒃ, ᐊᐅᓚᑦᓯᓚᐅᕐᐴᒃ ᐊᒃᓴᓗᐊᓕᖕᒥᒃ ᓅᑕᐅᓕᕐᑎᓪᓗᒍ.

⁴ ᐊᕼᐂᐅᓗ ᒎᑎᐅᑉ ᐃᒃᓯᕐᕕᖁᑎᖓᑕ ᓯᕗᓂᐊᓂ ᐱᓱᓚᐅᕐᐳᖅ.

⁵ ᑍᕕᑎᒃᑯᑦ ᐃᓴᕆᐊᓕᒥᐅᓕᒫᓪᓗ ᑖᓂᓯᓚᐅᕐᐳᑦ ᐃᓐᖏᕐᓗᑎᒡᓗ ᐱᔪᓐᓇᕐᓂᓕᒫᑎᒃ ᐊᑐᕐᓗᒍ, ᐊᑕᓂᕐᒥᒃ ᐅᐱᒍᓱᖕᓂᕐᒧᑦ ᓂᓪᓕᐊᑎᑦᓯᓚᐅᕐᐳᑦ ᕼᐊᕐᐱᓂᒃ, ᓄᖃᕐᑎᓕᖕᓂᒡᓗ, ᐊᓇᐅᓪᓚᒐᕐᓂᒃ, ᐊᕕᓗᕋᐅᑎᓂᒃ, ᓯᕙᓂᕈᑎᓂᒡᓗ.

⁶ ᓇᑰᓐᓗ ᓯᖃᓪᓕᓯᕕᖓᓄᑦ ᑎᑭᑎᓪᓗᒋᑦ, ᐃᒻᒧᒃᓯᐅᒐᖅ ᐅᕐᕈᑲᓴᖕᒪᑦ, ᐆᔭᐅᑉ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᐊᔭᑉᐸᒃᐹ.

⁷ ᐊᑕᓂᐅᓪᓗ ᓂᓐᖓᐅᓯᖓ ᐆᓴᒧᑦ ᑎᑭᑉᐳᖅ; ᒎᑎᐅᓪᓗ ᐊᓇᐅᕚ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᓂᒃ ᐊᒃᑐᕐᓯᓂᖓᓄᑦ; ᐆᔭᓗ ᑐᖁᕗᖅ ᐃᒃᓯᕐᕕᐅᑉ ᓴᓂᐊᓂ.

⁸ ᑍᕕᑎᓗ ᓂᓐᖓᒃᐳᖅ ᐊᑕᓂᐅᑉ ᐆᔭᒥᒃ ᓂᓐᖓᖕᓂᕐᒧᑦ ᓱᒋᐊᕐᓯᓂᖓᓄᑦ; ᑍᒪᓐᖓᓂᓪᓗ ᑖᓐᓇ ᓄᓇ ᑍᔭᐅᓕᓚᐅᕐᐳᖅ ᐱᕆᔾ-ᐆᔭᒥᒃ, ᐅᓪᓗᒥᒧᑦ ᑎᑭᓪᓗᒍ.

⁹ ᑍᕕᑎᓗ ᐅᓪᓗᒥ ᑕᕝᕙᓂ ᑲᑉᐱᐊᓱᓕᓚᐅᕐᐳᖅ ᐊᑕᓂᕐᒥᒃ ᐅᖃᕐᓗᓂᓗ, “ᖃᓄᕐᓕ ᐊᑕᓂᐅᑉ ᐃᒃᓯᕐᕕᖁᑎᖓ ᓇᒃᓴᕈᓐᓇᓕᕐᐸᕋ?”

¹⁰ ᑍᒤᒻᒪᑦ ᐊᑕᓂᐅᑉ ᐃᒃᓯᕐᕕᖁᑎᖓ ᑍᕕᑎᐅᑉ ᔨᕉᓴᓕᒧᐊᕈᑎᔪᒪᔪᓐᓃᓚᐅᕐᐹ; ᓴᓂᕐᕙᐅᑎᓚᐅᕐᐹᓕ ᐅᐱᑦ-ᐄᑕᒻ ᐃᒡᓗᖓᓄᐊᕈᑎᓪᓗᒍ ᒋᑍᑎᒥᐅᑕᕐᒧᑦ.

¹¹ ᐊᑕᓂᐅᓪᓗ ᐃᒃᓯᕐᕕᖁᑎᖓ ᒋᑍᑎᒦᓚᐅᕐᐳᖅ ᑕᖅᑭᓂᒃ ᐱᖓᓱᓂᒃ; ᐊᑕᓂᐅᓪᓗ ᓮᒻᒪᕐᑎᓚᐅᕐᐰᑦ ᐅᐱᑦ-ᐄᑕᒻ ᐃᓚᖏᓪᓗ.

¹² ᐊᖓᔪᖅᑳᕐᔪᐊᕐᓗ ᑍᕕᑎ ᐅᖃᐅᑦᔭᐅᕗᖅ, “ᐊᑕᓂᐅᑉ ᐅᐱᑦ-ᐄᑕᒻ ᐃᒡᓗᒥᐅᖃᑎᖏᓪᓗ ᓮᒻᒪᕐᑎᑉᐰᑦ ᐱᖁᑎᓕᒫᖏᓪᓗ, ᒎᑎᐅᑉ ᐃᒃᓯᕐᕕᖁᑎᖓ ᐱᓪᓗᒍ.” ᑍᒤᒻᒪᑦ ᑍᕕᑎᐅᑉ ᐃᒃᓯᕐᕕᒃ ᐂᓚᐅᕐᐹ ᐅᐱᑦ-ᐄᑕᒻ ᐃᒡᓗᖓᓂᑦ ᔨᕉᓴᓕᒧᐊᕈᑎᓪᓗᒍᓗ ᖁᕕᐊᓱᒃᑐᐊᓘᓪᓗᑎᒃ.

¹³ ᐊᑕᓂᐅᑉ ᐃᒃᓯᕐᕕᖁᑎᖓᓂᒃ ᐊᒡᔭᕐᓯᔪᑦ ᐱᖓᓲᔪᕐᑐᓂᒃ ᐊᓪᓗᕋᓗᐊᕐᑎᓪᓗᒋᑦ ᑍᕕᑎᐅᑉ ᓄᖅᑲᕐᑎᑉᐰᑦ, ᑐᓂᕐᕈᓯᓚᐅᕐᐳᕐᓗ ᐊᑕᓂᕐᒧᑦ ᐃᒻᒧᒃᓯᐅᒐᕐᒥᒃ ᓄᕐᕋᕐᒥᒡᓗ ᖁᐃᒃᓯᓴᕐᑕᐅᓯᒪᔪᒥᒃ.

¹⁴ ᑍᕕᑎᓗ ᑖᓂᓯᓚᐅᕐᐳᖅ ᐊᑕᓂᐅᑉ ᓵᖓᓂ ᐱᔪᓐᓇᕐᓂᓕᒫᒥᓂᒃ ᐊᑐᕐᓗᓂ; ᕿᑎᕈᓯᕐᓯᒪᓪᓗᓂ ᖃᓪᓗᓈᕐᑕᒥᒃ ᓵᑦᑐᒥᒃ ᑖᓐᓇᓗ ᐊᑐᕐᑕᑐᐊᕆᓪᓗᒍ.

¹⁵ ᑕᕝᕙ ᑍᕕᑎᐅᑉ ᐃᓴᕆᐊᓕᒥᐅᓕᒫᑦ ᐱᖃᑎᒋᓪᓗᒋᑦ ᐃᒃᓯᕐᕕᒃ ᔨᕉᓴᓕᒧᐊᕈᑎᓚᐅᕐᐹ ᖁᕕᐊᓱᒡᓗᑎᒃ ᕾᒐᓛᕐᓗᑎᒃ ᑎᑦᑐᓚᐅᑎᓄᓪᓗ ᓂᑦᔮᓪᓗᑎᒃ.

¹⁶ ᐃᒃᓯᕐᕕᒃ ᐃᒡᓗᒐᓴᖕᓄᐊᕐᑕᐅᓕᕐᑎᓪᓗᒍ, ᒤᑲᐅᓪ ᓴᐅᓕᐅᑉ ᐸᓂᖓ ᑕᑯᓴᕋᒥ ᐃᒐᓛᒃᑯᑦ, ᑕᑯᕗᖅ ᐊᖓᔪᖅᑳᕐᔪᐊᕐᒥᒃ ᑍᕕᑎᒥᒃ ᑖᓂᓯᕐᑐᒥᒃ ᕿᒡᒋᕐᑕᕐᑐᒥᒡᓗ ᐊᑕᓂᐅᑉ ᓵᖓᓂ; ᐆᒻᒪᑎᒥᒍᓪᓗ ᖁᕕᐊᒋᔪᓐᓃᓚᐅᕐᐹ.

¹⁷ ᐊᑕᓂᐅᓪᓗ ᐃᒃᓯᕐᕕᖁᑎᖓ ᐃᑎᐅᑦᔭᐅᕗᖅ, ᐃᓂᖓᓄᓪᓗ ᐃᓕᔭᐅᓪᓗᓂ, ᑐᐱᐅᑉ ᐃᓗᐊᓄᑦ ᑍᕕᑎᐅᑉ ᐋᖅᑭᒃᓱᓚᐅᕐᑕᖓᓄᑦ; ᑍᕕᑎᓗ ᑐᓂᕐᕈᓯᓚᐅᕐᐳᖅ ᐃᑯᐊᓚᑦᓯᓪᓗᓂᒃ ᑐᓂᕐᕈᑎᓂᒃ ᐃᓚᒌᑦᓯᐊᕐᓂᕐᒧᓪᓗ ᑐᓂᕐᕈᑎᒥᒃ ᐊᑕᓂᕐᒧᑦ.

¹⁸ ᑍᕕᑎᓗ ᑐᓂᕐᕈᓯᕇᕋᒥ ᑕᒪᒃᑯᓂᖓ ᑐᓂᕐᕈᑎᓂᒃ, ᐃᓄᐃᑦ ᓮᒻᒪᕐᑎᑉᐰᑦ ᐊᑕᓂᐅᑉ ᖁᑦᓯᖕᓂᕐᐹᖑᔫᑉ ᐊᑎᖓᓂ,

¹⁹ ᓂᖀᓪᓗ ᑐᓐᓂᕐᓴᐅᑎᒋᕔᑦ ᐃᓄᓕᒫᓄᑦ, ᐃᓴᕆᐊᓕᒥᐅᓕᒫᓄᑦ ᐊᖑᑎᓄᑦ ᐊᕐᓇᓄᓪᓗ, ᐊᑐᓂᑦ ᑐᓂᓯᕕᒋᕔᑦ ᓂᐊᖂᔭᒥᒃ, ᐃᒐᓯᒪᔪᒥᒡᓗ ᓂᕿᒥᒃ, ᓂᐊᖂᔭᓂᒡᓗ ᐸᐅᕐᖓᐅᔭᓕᖕᓂᒃ. ᑭᖑᓂᖓᒍᓪᓗ ᐃᓄᓕᒫᑦ ᑕᕝᕙᓐᖓᑦ ᕿᒪᕉᑎᕗᑦ, ᐊᑐᓂᑦ ᐊᖏᕐᕋᒥᖕᓄᐊᕐᓗᑎᒃ.

²⁰ ᑭᖑᓂᖓᒍᑦ ᑍᕕᑎ ᐊᖏᕐᕋᒥᓄᐊᕐᐳᖅ ᐃᓚᒥᓄᑦ, ᒤᑲᐅᓪᓕ ᓴᐅᓕᐅᑉ ᐸᓂᖓᑕ ᐸᕐᕆᐊᕐᐹ, ᐅᖃᐅᑎᓪᓗᒍᓗ, “ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐃᒻᒥᓂᒃ ᐅᐱᓐᓇᕐᑎᑉᐳᖅ ᐅᓪᓗᒥ, ᐃᒻᒥᓂᒃ ᑕᑯᔭᐅᑎᓚᐅᕐᒪᑦ ᐱᔨᒥᓄᑦ ᐊᕐᓇᓄᑦ, ᓯᓔᑦᑐᑎᑐᑦ ᑲᓐᖑᓱᒐᓂ ᐊᓐᓄᕅᔭᓚᐅᕐᐳᖅ ᑕᑯᓐᓇᕐᑎᓪᓗᒋᑦ!”

²¹ ᑍᕕᑎᓗ ᑭᐅᕗᖅ ᒤᑲᐅᓪᒧᑦ, “ᑖᓂᓯᖅᑲᐅᕗᖓ ᐊᑕᓂᖅ ᐅᐱᒋᓪᓗᒍ, ᐅᕙᓐᓂᒃ ᓂᕈᐊᓚᐅᕐᑐᒧᑦ ᐊᑖᑍᑦ ᐃᓇᖏᕐᑕᐅᖁᓪᓗᒍ, ᐃᓚᖏᓐᓄᓪᓗ ᓯᕗᓕᕐᑎᐅᖁᓪᓗᖓ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓴᕆᐊᓕᒥᐅᓄᑦ, ᑖᓂᓰᓐᓇᕐᓂᐊᕐᐳᖓᓗ ᖁᕕᐊᓱᒡᓗᖓ ᐊᑕᓂᕐᒥᒃ ᐅᐱᒍᓱᒡᓗᖓ.

²² ᐅᕙᓐᓂᒃ ᑕᒪᑐᒪᓐᖓᑦ ᑕᑯᒥᓇᖏᓐᓂᕐᓴᐅᓕᕐᑎᓐᓂᐊᕐᐳᖓ, ᐃᓕᖕᓄᑦ ᓱᓇᐅᖏᑦᑑᓂᐊᕋᓗᐊᕐᐳᖓ; ᐱᔨᖕᓄᓪᓕ ᐊᕐᓇᓄᑦ ᐅᖃᐅᓯᕆᔭᕐᓄᑦ, ᐅᐱᒋᔭᐅᑦᓯᐊᕐᓂᐊᕐᐳᖓ!”

²³ ᒤᑲᐅᓪᓗ ᓴᐅᓕᐅᑉ ᐸᓂᖓ ᕿᑐᕐᖓᕐᑖᓚᐅᓐᖏᓚᖅ ᑐᖁᓂᕐᒥᓄᑦ ᑎᑭᓪᓗᓂ.