ᓴᒧᐃᓕ ᐂᑉᐸᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐊᖓᔪᖅᑳᕐᔪᐊᓐᖑᕐᓂᖓ ᐃᓴᕆᐊᓕᒥᐅᓄᑦ ᔫᑕᒥᐅᓄᓪᓗ

¹ ᑕᕝᕙ ᐃᓴᕆᐊᓕᒥᐅᑦ ᑭᖑᕚᓕᒫᖏᑦ ᑍᕕᑎᒧᐊᕐᐳᑦ ᕼᐃᐸᕋᓐᒧᑦ ᐅᖃᐅᑎᓪᓗᒍᓗ, “ᑕᑯᒋᑦ ᓇᖕᒥᓂᕆᔭᐅᕗᒍᑦ ᐊᐅᖃᖃᑕᐅᓪᓗᑕᓗ ᐃᓕᖕᓄᑦ.

² ᑍᑦᓱᒪᓂ, ᓴᐅᓕ ᐊᖓᔪᖅᑳᕐᔪᐊᖑᑎᓪᓗᒍ, ᐃᓴᕆᐊᓕᒥᐅᑦ ᐃᓄᖏᑦ ᐅᓇᑕᕐᓂᒃᑯᑦ ᑕᓯᐅᓚᐅᕐᐸᑎᑦ, ᐊᑕᓂᐅᓪᓗ ᐊᖏᕐᕕᒋᓚᐅᕐᐹᑎᑦ, ‘ᐃᓄᖁᑎᓐᓂᒃ ᐰᕐᓯᔨᐅᓂᐊᕐᐳᑎᑦ, ᐊᖓᔪᖅᑳᕐᔪᕆᔭᐅᓗᑎᓪᓗ.’”

³ ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᖏᑕ ᐊᖓᔪᖅᑳᓕᒫᖏᑦ ᐊᖓᔪᖅᑳᕐᔪᐊᒧᐊᓚᐅᕐᐳᑦ ᑍᕕᑎᒧᑦ ᕼᐃᐸᕋᓐᒦᑦᑐᒧᑦ; ᑍᕕᑎᐅᓪᓗ ᐊᖏᖃᑎᒋᓚᐅᕐᐰᑦ ᐊᑕᓂᐅᑉ ᓵᖓᓂ, ᑖᒃᑯᓇᓐᖓᓪᓗ ᓇᐹᕐᑑᑉ ᐅᕐᓱᖓᓄᑦ ᑕᕝᕙᓂ ᐅᕐᓱᕐᑎᕐᑕᐅᕗᖅ, ᐊᖓᔪᖅᑳᕐᔪᐊᓐᖑᕐᑎᓪᓗᒍ ᐃᓴᕆᐊᓕᒥᐅᓄᑦ.

⁴ ᑍᕕᑎ ᐊᕐᕌᒍᖃᓚᐅᕐᐳᖅ 30ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 40ᓂᒃ.

⁵ ᐊᐅᓚᑦᓯᓚᐅᕐᐳᖅ ᔫᑕᒥᒃ ᕼᐃᐸᕋᓐᒦᓪᓗᓂ ᐊᕐᕌᒍᓂᒃ 7ᓂᒃ ᑕᖅᑭᓂᒡᓗ ᐱᖓᓲᔪᕐᑐᓂᒃ; ᔨᕉᓴᓕᒥᓗ ᐊᐅᓚᑦᓯᓚᐅᕐᐳᖅ ᐃᓴᕆᐊᓕᒥᐅᓕᒫᓂᒃ ᔫᑕᒥᒡᓗ ᐊᕐᕌᒍᓂᒃ 33ᓂᒃ.

⁶ ᐊᖓᔪᖅᑳᕐᔪᐊᕐᓗ ᑍᕕᑎ ᐃᓚᖏᓪᓗ ᐅᓇᑕᕆᐊᓚᐅᕐᐳᑦ ᔨᕉᓴᓕᒧᑦ ᔨᐳᓮᑎᒃᑯᓐᓂᒃ, ᑕᕝᕙᓂ ᓄᓇᖃᕐᑐᓂᒃ, ᑖᒃᑯᐊ ᐅᖃᓚᐅᕐᐳᑦ ᑍᕕᑎᒧᑦ, “ᑕᕝᕗᖓ ᐃᑎᓚᐅᕐᓯᒪᑦᔮᖏᑦᑐᑎᑦ, ᑕᐅᑐᖏᑦᑐᓂᑦ ᑐᓯᐊᑦᑐᓂᓪᓗ ᐅᓂᒃᓯᒪᑎᑕᐅᔪᓐᓇᕐᐳᑎᑦ.” ᐃᓱᒪᖃᓚᐅᕋᒥᒃ, “ᑍᕕᑎ ᐅᕗᖓ ᐃᑎᕈᓐᓇᓐᖏᓚᖅ.”

⁷ ᑍᕕᑎᐅᓪᓕ ᓵᓚᒋᓚᐅᕐᐹ ᑎᒍᓪᓗᒍᓗ ᓮᐅᓂᐅᑉ ᓲᖑᔫᑦᔪᑎᖓ, ᑍᔭᐅᓕᕐᓗᓂᓗ, “ᑍᕕᑎᐅᑉ ᐃᒡᓗᒐᓴᖏᓐᓂᒃ.”

⁸ ᑍᑦᓱᒪᓂ ᐅᓪᓗᒥ ᑍᕕᑎᐅᑉ ᐃᓄᖁᑎᓂ ᐅᖃᐅᑎᓚᐅᕐᐰᑦ, “ᑭᓇᒃᑰᑦ ᐆᒥᓱᖃᑎᒋᕙᒃᑲ ᔨᐳᓮᑎᓂᒃ; ᑐᖁᑦᓱᒪᓪᓗᒋᓪᓗ? ᐊᑏ ᐃᑎᓚᐅᕆᑦᓯ ᐃᒥᐅᑉ ᐊᖅᑯᑎᖓᒍᑦ ᐅᓇᑕᕆᐊᕐᓗᒋᑦ ᑕᐅᑐᖏᑦᑐᑦ ᑐᓯᐊᑦᑐᓪᓗ.” ᑍᒤᒻᒪᑦ ᐃᒫᒃ ᐅᖃᐅᓯᕐᑕᖃᕐᐳᖅ, “ᑕᐅᑐᖏᑦᑐᑦ ᑐᓯᐊᑦᑐᓪᓗ ᐃᑎᕐᓂᐊᓐᖏᓚᑦ ᐊᑕᓂᐅᑉ ᐃᒡᓗᖓᓄᑦ.”

⁹ ᐊᕙᓗᕐᔪᐊᓕᒡᓗ ᑎᒍᔭᕇᕋᒥᐅᒃ, ᑍᕕᑎ ᑍᑲᓂ ᓄᓇᑖᓚᐅᕐᐳᖅ, ᐊᑦᑎᕐᓗᒍᓗ ᑍᕕᑎᐅᑉ ᐃᒡᓗᒐᓴᖏᓐᓂᒃ. ᐃᒡᓗᒐᓴᓕᐅᓚᐅᕐᐳᕐᓗ ᑲᓂᒋᔭᖓᓃᑦᑐᓂᒃ, ᐱᒋᐊᕐᓗᓂ ᓄᓇᒥᑦ ᐳᕐᑐᓯᒋᐊᕐᓯᒪᔪᒥᑦ ᐱᖑᐊᕐᔫᑉ ᓯᕿᓂᐅᑉ ᓄᐃᕕᐊᓃᑦᑐᒥᑦ ᐃᒡᓗᒐᓮᑦ ᒥᒃᓯᖔᖓᓄᑦ ᑎᑭᓪᓗᑎᒃ.

¹⁰ ᑍᕕᑎᓗ ᓲᖑᓯᕙᓪᓕᐊᑐᐃᓐᓇᓕᓚᐅᕐᐳᖅ, ᐊᑕᓂᐅᑉ ᒎᑎᐅᑉ ᖁᑦᓯᖕᓂᕐᐹᖑᔫᑉ, ᐃᓚᒋᓚᐅᕐᒪᒍ.

¹¹ ᐊᖓᔪᖅᑳᕐᔪᐊᕐᓗ ᕼᐂᕋᒻ ᑍᕆᒥᐅᑕᖅ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᓂᒃ ᑍᕕᑎᒧᑦ; ᑐᓂᓪᓗᒍᓗ ᕿᔪᖕᓂᒃ ᓰᑕᕆᓂᒃ ᓯᑎᔪᓂᒃ, ᕿᔪᓕᕆᔨᓂᒃ ᐅᔭᕋᓕᕆᔨᓂᒡᓗ ᐊᖓᔪᖅᑳᕐᔪᐊᑉ ᐃᒡᓗᖓᓂᒃ ᓴᓇᔭᕐᑐᕐᑐᓂᒃ.

¹² ᑍᕕᑎᓗ ᖃᐅᔨᑦᓯᐊᓕᓚᐅᕐᐳᖅ ᐊᑕᓂᐅᑉ ᐊᖓᔪᖅᑳᕐᔪᐊᖑᓂᕐᒥᒃ ᐱᑎᒻᒪᒍ ᐃᓴᕆᐊᓕᒥᐅᓄᑦ, ᐊᑕᓂᐅᕕᖓᓗ ᐊᔪᕐᓴᕈᓐᓃᕐᑎᑉᐸᓪᓕᐊᓚᐅᕐᒪᒍ ᐃᓄᖁᑎᖏᑦ ᐱᓪᓗᒋᑦ.

¹³ ᓅᓯᒪᓕᕋᒥᓕ ᕼᐃᐸᕋᓐᒥᑦ ᔨᕉᓴᓕᒧᑦ, ᑍᕕᑎ ᓄᓕᐊᒐᕐᑖᒃᑲᓐᓂᓚᐅᕐᐳᖅ ᓄᓕᐊᓂᒃᑲᓐᓂᕐᓗᓂᓗ ᔨᕉᓴᓕᒥᑦ; ᐅᓄᕐᑐᓂᒡᓗ ᐃᕐᓂᕐᑖᒃᑲᓐᓂᓚᐅᕐᐳᖅ ᐸᓂᒃᑖᒃᑲᓐᓂᕐᓗᓂᓗ.

¹⁴ ᐅᑯᐊ ᑕᕝᕙ ᕿᑐᕐᖓᕐᑖᕆᓚᐅᕐᑕᖏᑦ ᔨᕉᓴᓕᒦᓕᕐᓗᓂ: ᓵᒧᐊ, ᓲᐸᑉ, ᓁᑕᓂ, ᓲᓗᒨᓂ,

¹⁵ ᐃᑉᕼᐊᕐ, ᐃᓔᓱ-ᐊ, ᓂᕕᒡ, ᔮᐱᐊ,

¹⁶ ᐃᓔᓴᒪ, ᐃᓔᐊᑕ, ᐃᓕᕕᓕᑦᓗ.

ᓵᓚᖃᕐᓃᑦ ᐱᓕᔅᑏᓂᒥᐅᓂᒃ

¹⁷ ᐱᓕᔅᑍᓂᒥᐅᓪᓕ ᑐᓴᕋᒥᒃ ᑍᕕᑎ ᐊᖓᔪᖅᑳᕐᔪᐊᓐᖑᕐᑎᑕᐅᓂᖓᓂᒃ ᐃᓴᕆᐊᓕᒥᐅᓄᑦ, ᐅᓇᑕᕐᑐᒃᓴᖁᑎᒥᖕᓂᒃ ᑎᓕᓯᓚᐅᕐᐳᑦ ᑍᕕᑎᒥᒃ ᑎᒍᓯᔭᕐᑐᖁᓪᓗᒋᑦ; ᑍᕕᑎᓕ ᑐᓴᕋᒥ ᐂᓚᐅᕐᐳᖅ ᓴᐴᓗᑕᓕᖕᒧᑦ.

¹⁸ ᐱᓕᔅᑍᓂᒥᐅᓪᓕ ᑎᑭᓐᓇᒥᒃ ᓇᕐᓴᒥ ᕆᐰᒻᒥ ᓯᐊᒻᒪᖓᓕᓚᐅᕐᐳᑦ.

¹⁹ ᑍᕕᑎᓗ ᐊᑕᓂᕐᒥᒃ ᐊᐱᕐᓱᓚᐅᕐᐳᖅ, “ᐅᓇᑕᕆᐊᕈᓐᓇᕐᐳᖔ ᐱᓕᔅᑍᓂᒥᐅᓂᒃ? ᑖᒃᑯᓂᖓ ᓵᓚᖃᕐᑎᓐᓂᐊᕐᐱᖔ?” ᐊᑕᓂᖅ ᑭᐅᕗᖅ, “ᐊᑏ ᐅᓇᑕᕆᐊᓕᕆᑦ; ᓵᓚᖃᕐᑎᓐᓂᐊᕐᐸᒋᑦ ᐱᓕᔅᑍᓂᒥᐅᓂᒃ.”

²⁰ ᑍᒤᒻᒪᑦ ᑍᕕᑎ ᐰᓕ-ᐱᕋᔨᒻᒧᐊᕐᐳᖅ, ᑍᑲᓂᓗ ᐱᓕᔅᑍᓂᒥᐅᑦ ᓵᓚᒋᕔᑦ; ᐅᖃᕐᐳᕐᓗ, “ᐊᑕᓂᖅ ᓯᕗᓂᓐᓂ ᓵᓚᖃᕐᐳᖅ ᐊᑭᕋᑦᑎᓐᓂᒃ, ᐃᒪᕐᒧᑦ ᖄᒥᐅᑦᔭᐅᔪᐊᑎᑐᑦ.” ᑍᒤᒻᒪᑦ ᑖᓐᓇ ᓄᓇ ᑍᔭᐅᓚᐅᕐᐳᖅ ᐰᓕ-ᐱᕋᔨᒻᒥᒃ.

²¹ ᐱᓕᔅᑍᓂᒥᐅᓪᓗ ᕿᒫᓚᐅᕐᐳᑦ ᒎᑎᓐᖑᐊᑎᒃ ᑕᕝᕗᖓ ᕿᒪᒡᓗᒋᑦ, ᑍᕕᑎᐅᓪᓗ ᐃᓄᖁᑎᖏᑕᓗ ᑖᒃᑯᐊ ᐊᐅᓪᓚᕈᑎᓚᕐᐰᑦ.

²² ᑭᖑᓂᐊᒍᓪᓕ ᐱᓕᔅᑍᓂᒥᐅᑦ ᐅᑎᓚᐅᕆᕗᑦ, ᓇᓂᑐᐃᓐᓈᓕᕐᓗᑎᒡᓗ ᕆᐰᒻ ᓇᕐᓴᖓᓂ.

²³ ᑕᕝᕙ ᑍᕕᑎᐅᑉ ᐊᑕᓂᖅ ᐊᐱᕆᕚ, ᑭᐅᕚᓗ, “ᐅᓇᑕᕆᐊᕐᑍᓕᒃᑭᑦ ᑕᒫᓐᖓᑦ; ᑐᓄᐊᓂᓪᓕ ᐅᐸᓕᒃᑭᑦ, ᐅᓇᑕᕆᐊᕐᓗᓯᐅᒃ ᓇᐹᕐᑐᐃᑦ ᐸᐅᕐᖓᓖᑦ ᖃᓂᒋᔮᓂᑦ.

²⁴ ᑐᓴᑐᐊᕈᑦᓯᓕ ᐱᓱᒡᕙᓗᖕᓂᒃ ᓇᐹᕐᑐᐃᑦ ᐸᐅᕐᖓᓖᑦ ᓄᕗᖏᓐᓃᓪᓗᓯ, ᐅᓇᑕᕆᐊᕐᓂᐊᕐᐳᓯ; ᑕᕝᕙ ᐊᑕᓂᖅ ᐃᓕᑦᓯᓐᓂᑦ ᓯᕗᓪᓕᐅᓗᓂ ᐅᓇᑕᕐᓂᐊᕐᐳᖅ ᓵᓚᒋᓗᒋᑦ ᐱᓕᔅᑍᓂᒥᐅᑦ ᐅᓇᑕᕐᑎᖏᑦ.”

²⁵ ᑍᕕᑎᓗ ᐱᓇᓱᐊᓚᐅᕐᐳᖅ ᐊᑕᓂᐅᑉ ᐱᓇᓱᐊᖁᔭᖓᓂᒃ, ᑐᖁᕅᓚᐅᕐᐳᕐᓗ ᐱᓕᔅᑍᓂᒥᐅᓂᒃ ᒋᐸᒥᑦ ᒋᔨᕆᒧᑦ ᑎᑭᓪᓗᒍ.