ᓴᒧᐃᓕ ᐂᑉᐸᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐃᕐᓂᖏᑦ

¹ ᐅᓇᑕᕐᓃᑦ ᓴᐅᓕᐅᑉ ᐃᓚᖏᓐᓄᑦ ᑍᕕᑎᑯᓪᓗ ᐊᑯᓂ ᑲᔪᓯᓚᐅᕐᐳᖅ; ᑍᕕᑎᓕ ᓴᓐᖏᒃᑎᑉᐸᓪᓕᐊᓚᐅᕐᐳᖅ, ᓴᐅᓕᐅᑉ ᐃᓚᖏᑦ ᓴᓐᖐᓕᕚᓪᓕᐊᖔᓕᕐᑎᓪᓗᒋᑦ.

² ᑍᕕᑎ ᐃᕐᓂᕐᑖᓚᐅᕐᐳᖅ ᕼᐃᐸᕋᓐᒦᑎᓪᓗᒍ, ᐅᓇ ᐊᖓᔪᒃᓯᕐᐸᐅᑎᓪᓗᒍ ᐋᒻᓇᓐ, ᐊᓈᓇᖃᕐᑐᖅ ᐊᕼᐃᓄᐊᒥᒃ ᔨᔭᕆᐅᓪᒥᐅᑕᕐᒥᒃ;

³ ᑐᖓᓕᖃᕐᓗᓂ ᓯᓕᐊᑉᒥᒃ, ᐊᓈᓇᖃᕐᑐᖅ ᐊᐱᒊᓕᒥᒃ, ᓁᐳᓕᐅᑉ ᓄᓕᐊᕕᓂᖓᓂᒃ ᑳᕐᒥᐅᓪᒥᐅᑕᕐᒥᒃ; ᐱᖓᔪᖓᑦ ᐋᑉᓴᓚᒻ, ᐊᓈᓇᖃᕐᑐᖅ ᒫᑲᒥᒃ ᐊᖓᔪᖅᑳᕐᔪᐊᑉ ᑕᓪᒤᑉ ᒋᓱᕅᒥᐅᑕᐅᑉ ᐸᓂᖓᓂᒃ;

⁴ ᓯᑕᒪᖓᑦ ᐊᑐᓁᔭ, ᐊᓈᓇᖃᕐᑐᖅ ᕼᐊᒋᑎᒥᒃ; ᑕᓪᓕᒪᖓᑦ ᓯᕚᑍᐊ, ᐊᓈᓇᖃᕐᑐᖅ ᐊᐱᑕᐅᓪᒥᒃ;

⁵ ᐱᖓᓲᔪᕐᑐᖓ ᐃᑕᕆ-ᐊᒻ, ᐊᓈᓇᖃᕐᑐᖅ ᐃᒡᓚᒥᒃ. ᑖᒃᑯᐊ ᑕᕝᕙ ᑍᕕᑎᐅᑉ ᐃᕐᓂᖏᑦ ᕼᐃᐸᕋᓐᒦᑎᓪᓗᒍ ᐃᓅᓚᐅᕐᑐᑦ.

ᐋᑉᓅᑉ ᐃᓚᓕᐅᑎᓂᖓ ᑍᕕᑎᒧᑦ

⁶ ᐅᓇᑕᐅᑎᓃᑦ ᐃᒻᒥᖕᓄᑦ ᑍᕕᑎᒥᒃ ᓴᐅᓕᒥᒡᓗ ᐃᑲᔪᕐᑐᕐᑐᑦ ᑲᔪᓯᑎᓪᓗᒋᑦ, ᐋᑉᓄ ᐱᔪᓐᓇᕐᓯᕙᓪᓕᐊᓚᐅᕐᐳᖅ ᓴᐅᓕᐅᑉ ᒪᓕᒃᑎᖏᓐᓂ.

⁷ ᐅᓪᓗᐃᑦ ᐃᓚᖓᓂ ᐃᔅᐳᓯᐅᑉ ᓴᐅᓕᐅᑉ ᐃᕐᓂᖓᑕ ᐋᑉᓄ ᐸᓯᓚᐅᕐᐹ ᐃᓐᓇᖓᖃᑎᖃᕐᑐᕕᓂᐅᔪᕆᓪᓗᒍ ᓴᐅᓕᐅᑉ ᓄᓕᐊᒃᑲᓐᓂᖓᓂᒃ ᕆᔾᐸᒥᒃ ᐂᐊᐅᑉ ᐸᓂᖓᓂᒃ.

⁸ ᑕᕝᕙ ᐋᑉᓄ ᓂᓐᖓᒻᒪᕆᓚᐅᕐᐳᖅ ᐃᔅᐳᓴᐅᑉ ᐅᖃᐅᓯᕆᔭᖏᓐᓄᑦ, ᐅᖃᕐᓗᓂᓗ, “ᓴᐅᓕᒦᒃ ᐊᑭᕋᕐᑐᕐᓗᖓ ᔫᑕᒥᐅᓂᒃ ᑭᒡᒐᕐᑐᕋᓱᒋᕕᖓ ᐱᒋᐊᕐᓂᖓᓂᑦ ᑲᒪᑦᓯᐊᖏᓐᓇᓚᐅᕐᐳᖓ ᐊᑖᑕᖕᓂᒃ ᖃᑕᓐᖑᑎᖏᓐᓂᒡᓗ ᐱᖃᓐᓇᕆᔭᖏᓐᓂᒡᓗ, ᓵᓚᐅᑎᑦᓯᓚᐅᓐᖏᓚᖓ ᑍᕕᑎᒧᑦ; ᐅᓪᓗᒥᓕ ᐸᓯᓕᕐᐸᕐᒪ ᐊᕐᓇᒧᑦ.

⁹ ᒎᑎᐅᑉ ᐋᑉᓄ ᓱᒋᐊᕐᓕᐅᒃ ᑕᒪᓐᓇ ᓱᓕᑎᖏᒃᑯᒃᑯ, ᐊᑕᓂᐅᑉ ᐊᖏᕈᑎᒋᓚᐅᕐᒪᒍ ᑍᕕᑎ ᐃᓇᖐᓂᐊᕐᓂᕋᕐᓗᒍ ᓴᐅᓕᐅᑉ ᐊᖓᔪᖅᑲᐅᕕᖓᓂᒃ,

¹⁰ ᑍᕕᑎᓗ ᐊᖓᔪᖅᑳᕐᔪᐊᓐᖑᕐᓂᐊᕐᓂᕋᓚᐅᕐᒪᒍ ᓴᐅᓕᒥᒃ ᐃᓇᖐᓗᓂ ᐃᓴᕆᐊᓕᒥᐅᓄᑦ ᔫᑕᒥᐅᓄᓪᓗ, ᓄᓇᓕᖕᓂᑦ ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒍ.”

¹¹ ᐃᔅᐳᓯᑦᓕ ᐋᑉᓄᒥᒃ ᑭᐅᒃᑲᓐᓂᕈᓐᓁᓪᓕᓚᐅᕐᐳᖅ, ᑲᑉᐱᐊᓱᒻᒪᕆᓕᕋᒥ ᑖᑦᓱᒥᖓ.

¹² ᑕᕝᕙ ᐋᑉᓄ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᑍᕕᑎᒧᑦ ᕼᐃᐸᕋᓐᒦᑎᓪᓗᒍ, ᐅᖃᕐᓗᓂ, “ᑭᓇ ᐊᐅᓚᑦᓯᓂᐊᕐᐸ ᓄᓇᒥᒃ? ᐊᖏᖃᑎᒌᓚᐅᕐᓗᒃ, ᑕᑯᒋᑦ ᐃᑲᔪᕐᓂᐊᕐᐸᒋᑦ ᐃᓴᕆᐊᓕᒥᐅᑦ ᐃᓕᖕᓂᒃ ᓈᓚᓕᕐᑎᓪᓗᒋᑦ.”

¹³ ᑍᕕᑎᓗ ᑭᐅᕗᖅ, “ᑕᒪᓐᓇ ᐱᐅᕗᖅ; ᐊᖏᖃᑎᒋᓂᐊᕐᐸᒋᑦ ᑭᓯᐊᓂ ᐊᑕᐅᓯᕐᒥᒃ ᐃᓚᖃᕐᑎᓪᓗᒍ ᐃᒤᑦᑑᖁᕙᒋᑦ; ᑮᓇᓐᓂᒃ ᑕᑯᓂᐊᓐᖏᓚᑎᑦ, ᑭᓯᐊᓂ ᓴᐅᓕᐅᑉ ᐸᓂᖓ ᒤᑲᐅᓪ ᑎᑭᑦᔪᑎᖅᑳᕐᓗᒍ, ᐅᕙᓐᓂᒃ ᑕᑯᓕᕋᔭᕐᐳᑎᑦ.”

¹⁴ ᑕᕝᕙ ᑍᕕᑎ ᐅᖃᕆᐊᕐᑐᕐᑎᑦᓯᕗᖅ ᐃᔅᐳᓯᑦᒧᑦ ᓴᐅᓕᐅᑉ ᐃᕐᓂᖓᓄᑦ ᐃᒫᒃ ᐅᖃᖁᓪᓗᒋᑦ, “ᓄᓕᐊᕋ ᒤᑲᐅᓪ ᐅᕙᓐᓄᐊᕐᑎᓚᐅᕈᒃ, ᐊᑭᓖᓚᐅᕐᓯᒪᒐᒪ 100ᓂᒃ ᐱᓕᔅᑍᓂᒥᐅᑦ ᐅᓱᖏᑕ ᐅᓕᕝᕙᖏᓐᓂᒃ ᑲᑎᑎᑕᐅᔪᓐᓇᕐᓯᖁᓪᓗᓄᒃ.”

¹⁵ ᐃᔅᐳᓯᓪᓗ ᑎᓕᓯᓚᐅᕐᐳᖅ, ᐅᐃᖓᓂᑦ ᑎᒍᔭᐅᖁᓪᓗᒍ ᐱᐅᓪᑎ-ᐃᐅᓪᒥᑦ ᓔᓯᐅᑉ ᐃᕐᓂᖓᓂᑦ.

¹⁶ ᐅᐃᖓᑕᓕ ᐱᐅᓪᑎ-ᐃᐅᑉ ᒪᓖᓐᓇᓚᐅᕐᐹ, ᕿᐊᖏᓐᓇᕐᓗᓂ ᓄᓇᓕᖕᓄᑦ ᐸᕼᐅᕆᒻᒧᑦ ᑎᑭᓪᓗᓂ. ᑕᕝᕙ ᐋᑉᓅᑉ ᐅᖃᐅᑎᕙ, “ᐊᖏᕐᕋᒧᑦ ᐅᑎᓕᕆᑦ,” ᑕᕝᕙ ᐅᑎᓚᐅᕐᐳᖅ.

¹⁷ ᑕᕝᕙ ᐋᑉᓅᑉ ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᑲᑎᒪᖃᑎᒋᓕᕐᐰᑦ ᐅᖃᐅᑎᓪᓗᒋᓪᓗ, “ᐊᑯᓂᐊᓗᒃ ᑍᕕᑎ ᐊᖓᔪᖅᑳᕐᔪᐊᕐᑖᕆᔪᒪᓚᐅᕋᑦᓯᐅᒃ.

¹⁸ ᒫᓐᓇ ᐱᕕᒃᓴᖃᓕᕐᐳᓯ; ᐊᑕᓂᐅᑉ ᐊᖏᕐᕕᒋᓯᒪᖕᒪᒍ, ‘ᐱᔨᒐ ᑍᕕᑎ ᐊᑐᕐᓗᒍ ᐃᓴᕆᐊᓕᒥᐅᑦ ᐃᓄᖏᑦ ᐱᐅᓕᓂᐊᕐᐸᒃᑲ ᐱᓕᔅᑍᓂᒥᐅᓂᑦ, ᐊᑭᕋᓕᒫᖏᓐᓂᓪᓗ.’”

¹⁹ ᐊᒻᒪ ᐋᑉᓄ ᐅᖃᓪᓚᓚᐅᕆᕗᖅ ᐱᓐᔭᒥᓂᐅᑉ ᑭᖑᕚᖏᓐᓄᑦ; ᑭᖑᓂᖓᒍᓪᓗ ᕼᐃᐸᕋᓐᒧᑦ ᑍᕕᑎ ᐅᖃᐅᑎᔭᕐᑐᕐᓚᐅᕐᐹ ᐃᓴᕆᐊᓕᒥᐅᑦ ᐱᓐᔭᒥᓂᐅᓪᓗ ᑭᖑᕚᓕᒫᖏᑕ ᐊᖏᖃᑎᒌᖕᓂᖏᓐᓂᒃ ᐱᑦᓯᐊᕈᒪᓪᓗᑎᒃ.

²⁰ ᐋᑉᓄ ᑍᕕᑎᒧᐊᓚᐅᕐᐳᖅ ᕼᐃᐸᕋᓐᒧᑦ ᐃᓚᖃᕐᓗᓂ ᐊᖑᑎᓂᒃ 20ᓂᒃ, ᑍᕕᑎᓗ ᓂᕆᕕᒃᔪᐊᕐᑎᑦᓯᓚᐅᕐᐳᖅ ᐋᑉᓄᒥᒃ ᐃᓚᒋᔭᖏᓐᓂᒡᓗ.

²¹ ᑕᕝᕙ ᐋᑉᓅᑉ ᑍᕕᑎ ᐅᖃᐅᑎᕙ, “ᑕᒫᓐᖔᕐᓗᖓ ᐱᓇᓱᐊᕐᓂᐊᓕᕐᐳᖓ ᑲᑎᕐᓱᐃᔭᕐᑐᕐᓗᖓ ᐃᓴᕆᐊᓕᒥᐅᓕᒫᑦ ᐊᖓᔪᖅᑲᐅᕕᖕᓄᑦ ᐃᓚᓕᐅᑎᓗᑎᒃ, ᐊᖏᖃᑎᒌᒍᑎᓕᐅᖁᓪᓗᒋᑦ ᐃᓕᖕᓄᑦ, ᐊᖓᔪᖅᑳᕐᔪᐊᖑᓕᖁᓪᓗᑎᑦ ᐱᔪᒪᓯᒪᔭᕐᓂᒃ ᐱᖁᓪᓗᑎᑦ ᓄᓇᖃᑎᒌᓕᒫᑦ ᐊᐅᓚᓕᕐᓗᒋᑦ.” ᑕᕝᕙ ᑍᕕᑎᐅᑉ ᐋᑉᓄ ᐊᐅᓪᓚᕐᑎᑉᐹ; ᐃᓱᒫᓘᑎᖃᕋᓂᓗ ᑕᕝᕙᓐᖓᑦ ᐊᐅᓪᓚᕐᐳᖅ.

ᐋᑉᓅᑉ ᑐᖁᑕᐅᓂᖓ

²² ᑕᕝᕙ ᑭᖑᓂᑦᓯᐊᖓᒍᑦ ᔪᐊᐱ ᑍᕕᑎᐅᓪᓗ ᐊᖓᔪᖅᑳᖁᑎᒋᑦ ᑎᑭᑉᐳᑦ, ᓵᓚᖃᐅᓯᐊᒥᖕᓂᒃ ᐊᖏᔪᓂᒃ ᓇᒃᓴᕐᓗᑎᒃ. ᐋᑉᓄᓕ ᑕᕝᕙᓃᑦᓱᓐᓁᓚᐅᕐᐳᖅ ᕼᐃᐸᕋᓐᒥ ᑍᕕᑎᐅᑉ ᓇᔪᕐᑕᖓᓂ, ᑍᕕᑎᐅᑉ ᐊᐅᓪᓚᕐᑎᓚᐅᕐᒪᒍ ᐃᓱᒫᓗᖏᑦᓯᐊᖁᓪᓗᓂᐅᒃ.

²³ ᔪᐊᐱᒃᑯᑦ ᐃᓚᒋᔭᖏᓪᓗ ᑎᑭᓐᓇᒥᒃ, ᐅᖃᐅᑦᔭᐅᕗᑦ ᐋᑉᓅᑉ ᓂᕆᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᒧᐊᓚᐅᕐᓂᖓᓂᒃ ᑍᕕᑎᒧᑦ, ᐊᐅᓪᓚᕐᑎᓚᐅᕐᒪᒍ, ᐃᓱᒫᓘᑎᖃᖏᑦᓯᐊᕐᓗᓂ ᐊᐅᓪᓚᕐᑎᑕᕕᓂᐅᓂᖓᓂᒃ.

²⁴ ᑕᕝᕙ ᔪᐊᐱ ᐊᖓᔪᖅᑳᕐᔪᐊᒧᐊᕐᐳᖅ ᐅᖃᐅᑎᓪᓗᒍᓗ, “ᖃᓅᖅ ᐱᓇᓱᐊᕐᓂᕐᐲᑦ? ᑕᑯᒋᑦ, ᐋᑉᓅᑉ ᐅᐸᓚᐅᕐᒪᑎᑦ; ᓱᖕᒪᑦ ᖃᓄᐃᓕᓇᒍ ᐊᐅᓪᓚᕐᑎᓚᐅᕐᐱᐅᒃ?

²⁵ ᖃᐅᔨᒪᕗᑎᑦ ᐋᑉᓄ ᓂᕆᐅᑉ ᐃᕐᓂᖓ ᕾᓚᐅᕐᐳᖅ ᐃᓕᖕᓂᒃ ᓯᓔᕐᕆᒃᓯᔭᕐᑐᕐᓗᓂ, ᖃᐅᔨᒋᐊᕐᓗᓂ ᖃᓄᐃᓕᐅᖃᑦᑕᕐᒪᖔᕐᐱᑦ ᓇᒧᓐᖓᕐᐸᖕᒪᖔᕐᐱᓪᓗ, ᖃᐅᔨᓇᓱᐊᕆᐊᕐᑐᕐᓗᓂᑎᑦ.”

²⁶ ᔪᐊᐱ ᑍᕕᑎᒥᒃ ᕿᒤᒐᒥ, ᑎᓕᓯᓚᐅᕐᐳᖅ ᐋᑉᓄᒥᒃ ᒪᓕᒃᑕᐅᖁᓪᓗᒍ, ᐅᑎᐅᑦᔭᐅᓚᐅᕐᐳᕐᓗ ᓯᓯᑎᕆᓐᒥᑦ ᓰᕋᒦᑦᑑᑉ ᐃᒥᕐᑕᕐᕕᖓᓂᑦ; ᑍᕕᑎᓕ ᖃᐅᔨᒪᓚᐅᓐᖏᓚᖅ ᑕᒪᑐᒥᖓ.

²⁷ ᐋᑉᓄᓕ ᑎᑭᒻᒪᑦ ᕼᐃᐸᕋᓐᒧᑦ, ᔪᐊᐱᐅᑉ ᓴᓂᕐᕙᐅᑎᓚᐅᕐᐹ ᐃᑎᕐᑕᕐᕕᐅᑉ ᓴᓂᐊᓄᑦ, ᐃᓄᑑᖃᑎᒋᓪᓗᒍ ᐅᖃᕐᕕᒋᔪᒪᔫᔮᕐᓗᓂᐅᒃ, ᑍᑲᓂᓗ ᑲᐱᕙ ᓈᖓᒍᑦ, ᑕᕝᕙᓂᓗ ᐋᑉᓄ ᑐᖁᕗᖅ, ᑐᖁᑦᓯᓚᐅᕐᓂᖓ ᐱᓪᓗᒍ ᔪᐊᐱᐅᑉ ᓄᑲᖓᓂᒃ ᐊᓴᕼᐃᐅᓪᒥᒃ.

²⁸ ᑭᖑᓂᖓᒍᑦ, ᑍᕕᑎ ᑕᒪᑐᒥᖓ ᑐᓴᕋᒥ, ᐅᖃᕐᐳᖅ, “ᐊᑕᓂᖅ ᖃᐅᔨᒪᕗᖅ ᐅᕙᖓᓗ ᐊᐅᓚᑦᓯᔨᒃᑲᓗ ᐸᓯᔭᒃᓴᐅᓐᖏᓐᓇᑦᑕ ᐋᑉᓅᑉ ᓂᕆᐅᑉ ᐃᕐᓂᖓᑕ ᑐᖁᑕᐅᓂᖓᓄᑦ.

²⁹ ᐸᓯᔭᒃᓴᐅᓂᕐᓕ ᔪᐊᐱᒧᑦ ᑐᕌᖓᓕᕐᓕ, ᐃᓚᖏᓐᓄᓪᓗ ᑭᖑᕚᖏᓐᓄᓪᓗ ᐊᖑᑎᓂ ᖁᐱᕐᕆᓯᒪᔪᕐᑕᖃᓕᕐᓕ, ᐅᕝᕙᓗ ᐸᕐᑎᕐᑐᖃᕐᓕ, ᐅᕝᕙᓗ ᐊᕐᓇᐅᑉ ᐱᔪᓐᓇᕐᑕᖓᓂᒃ ᑭᓯᐊᓂ ᐱᔪᓐᓇᕐᓗᓂ, ᐅᕝᕙᓗ ᑐᖁᑕᐅᔪᖃᕐᓗᓂ, ᐅᕝᕙᓗ ᓂᕿᒃᓴᖃᖏᑦᑐᖃᕐᓕ!”

³⁰ ᑍᒤᒻᒪᑦ ᔪᐊᐱᓗ ᓄᑲᖓᓗ ᐊᐱᓮ ᑍᒫᒃ ᐊᑭᓂᐊᓚᐅᕐᐴᒃ ᐋᑉᓄᒥᒃ, ᑐᖁᑦᓯᓚᐅᕐᓂᖓ ᓄᑲᖓᓂᒃ ᐊᓴᕼᐃᐅᓪᒥᒃ ᐱᓪᓗᒍ ᐅᓇᑕᕐᑎᓪᓗᒋᑦ ᒋᐱᐅᓂᒥ.

ᐋᑉᓅᑉ ᐃᓗᕕᕐᑕᐅᓂᖓ

³¹ ᑕᕝᕙ ᑍᕕᑎᐅᑉ ᔪᐊᐱᒃᑯᑦ ᐃᓚᖏᓪᓗ ᐅᖃᐅᑎᕔᑦ, “ᐊᓐᓄᕌᓯ ᐊᓕᒃᑐᕐᓯᒋᑦ, ᐊᓐᓄᕌᕐᓗᓯᓗ ᐊᕐᔭᓕᓂᑎᕐᓯᒪᔪᓂᒃ, ᕿᒃᓵᒍᑎᖃᓪᓗᓯ ᐋᑉᓄᒥᒃ.” ᐃᓗᕕᕐᑕᐅᓕᕐᑎᓪᓗᒍᓗ ᐊᖓᔪᖅᑳᕐᔪᐊᖅ ᑍᕕᑎ ᐱᓱᓚᐅᕐᐳᖅ ᐃᒃᓯᕐᕕᐊᑕ ᑭᖑᓂᖓᓂ.

³² ᐋᑉᓄ ᐃᓗᕕᕐᑕᐅᓚᐅᕐᐳᖅ ᕼᐃᐸᕋᓐᒥ; ᐊᖓᔪᖅᑳᕐᔪᐊᕐᓗ ᓂᐱᖃᕐᓗᓂ ᕿᐊᓚᐅᕐᐳᖅ ᐃᓗᕕᕐᓯᕕᖕᒥ; ᐃᓄᓕᒫᓪᓗ ᕿᐊᓕᕆᓪᓗᑎᒃ.

³³ ᑍᕕᑎᓗ ᕿᒃᓵᒍᑎᒥᓂᒃ ᐃᓐᖏᓚᐅᕐᐳᖅ ᐋᑉᓄᒧᑦ, ᐅᖃᕐᓗᓂ, “ᓱᖕᒪᑦ ᐋᑉᓄ ᑐᖁᔭᕆᐊᖃᓚᐅᕐᐹ ᓯᓔᑦᑐᑎᑐᑦ?

³⁴ ᐊᒡᒐᖏᑦ ᕿᓚᒃᑕᐅᓯᒪᓚᐅᓐᖏᓚᑦ, ᐃᑎᒐᖏᓪᓗ ᕿᓚᒃᑕᐅᓯᒪᓚᐅᕋᑎᒃ; ᑐᖁᓚᐅᕐᐳᖅ ᐱᐅᖏᑦᑐᓕᔪᑎᑐᑦ ᑐᖁᑕᐅᓪᓗᓂ.” ᐃᓄᓕᒫᓪᓗ ᑍᕕᑎ ᕿᐊᖃᑎᒋᕚᑦ.

³⁵ ᑕᕝᕙ ᐃᓄᖕᓂᑦ ᑍᕕᑎ ᐅᓪᓗᓕᒫᖅ ᓂᕆᑎᑕᐅᓇᓱᓚᐅᕋᓗᐊᕐᐳᖅ, ᐊᖏᕈᑎᖃᒻᒪᕆᓚᐅᕐᐳᕐᓕ ᐃᒫᒃ, “ᒎᑎᐅᑉ ᓱᒋᐊᕐᓂᐊᕐᐹᖓ ᓯᕿᓂᖅ ᓂᐱᓚᐅᕐᑎᓐᓇᒍ ᓂᕆᑐᐊᕈᒪ!”

³⁶ ᑕᒪᓐᓇ ᐃᓄᖕᓄᑦ ᐃᒃᐱᒋᔭᐅᑦᓯᐊᓚᐅᕐᐳᖅ, ᖁᕕᐊᓲᑕᐅᓪᓗᓂᓗ; ᐊᖓᔪᖅᑳᕐᔪᐊᓪᓗ ᐱᓇᓱᐊᕐᑕᓕᒫᖏᑦ ᖁᕕᐊᒋᔭᐅᓚᐅᕐᐳᑦ ᐃᓄᓕᒫᓄᑦ.

³⁷ ᑕᒪᓐᓇ ᐃᓴᕆᐊᓕᒥᐅᓕᒫᓄᑦ ᑐᑭᓯᑦᔪᑕᐅᓚᐅᕐᐳᑦ ᐊᖓᔪᖅᑳᕐᔪᐊᖅ ᑐᖁᑦᓯᔪᓄᑦ ᐋᑉᓄᒥᒃ ᓂᕆᐅᑉ ᐃᕐᓂᖓᓂᒃ ᐱᓇᓱᐊᖃᑕᐅᓚᐅᖏᓐᓂᖓᓂᒃ.

³⁸ ᐊᖓᔪᖅᑳᕐᔪᐊᕐᓗ ᐱᔨᒥᓄᑦ ᐅᖃᕐᐳᖅ, “ᖃᐅᔨᒪᓐᖏᓚᓰ ᐅᓪᓗᒥ ᐃᓴᕆᐊᓕᒥᐅᑦ ᓯᕗᓕᕐᑎᖓ ᐊᔪᖏᓐᓂᕐᐹᖅ ᑐᖁᖕᒫᑦ?

³⁹ ᐅᓪᓗᒥᓗ ᓴᓐᖐᑦᑑᓕᕐᐳᖓ, ᐊᖓᔪᖅᑳᕐᔪᐊᖑᖁᓪᓗᖓ ᓂᕈᐊᕐᑕᐅᓯᒪᒐᓗᐊᕐᓗᖓ; ᑖᒃᑯᐊ ᔨᕈᐃᐊᐅᑉ ᐃᕐᓂᖏᑦ ᐅᑯᒤᓗᐊᕐᒪᑕ ᐅᕙᓐᓄᑦ. ᐊᑕᓂᐅᑦᑐᖅ ᓱᒋᐊᕐᓕᒋᑦ ᐱᐅᖏᑦᑐᓕᔪᑦ ᐱᓇᓱᐊᕐᓂᕆᓯᒪᔭᖏᑦ ᒪᓕᒡᓗᒋᑦ!”