ᓴᒧᐃᓕ ᐂᑉᐸᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᓈᓮᑎᑦᓯᓂᖓ

¹ ᐊᑕᓂᖅ ᓂᓐᖓᒃᑎᑕᐅᓚᐅᕆᕗᖅ ᐃᓴᕆᐊᓕᒥᐅᓄᑦ, ᑍᕕᑎᓗ ᖁᕕᐊᓇᖏᑦᑐᒥᒃ ᓴᖅᑭᑎᑦᓯᑎᓚᐅᕐᐹ ᑖᒃᑯᓄᖓ, ᐅᖃᐅᑎᓪᓗᒍ, “ᐂᓕᕆᑦ ᐃᓴᕆᐊᓕᒥᐅᓪᓗ ᔫᑕᒥᐅᓪᓗ ᐃᓄᖏᑦ ᓈᓴᕆᐊᕐᑐᒃᑭᑦ.”

² ᑕᕝᕙ ᑍᕕᑎ ᐅᖃᕐᐳᖅ ᔪᐊᐱᒧᑦ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᑦ, “ᐂᓕᕆᑦ ᐊᖓᔪᖅᑳᖁᑎᑎᑦ ᐃᓚᒋᓗᒋᑦ ᐃᓴᕆᐊᓕᒥᐅᑉ ᑭᖑᕚᖏᓐᓄᑦ ᓄᓇᓖᑦ ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒋᑦ, ᐃᓄᐃᑦ ᓈᓴᕐᓗᒋᑦ, ᖃᐅᔨᔪᒪᒐᒪ ᖃᑦᓯᐅᖕᒪᖔᑕ.”

³ ᔪᐊᐱᓕ ᑭᐅᕗᖅ ᐊᖓᔪᖅᑳᕐᔪᐊᒧᑦ, “ᐊᖓᔪᖅᑳᕐᔪᐊᖅ, ᐊᑕᓂᐅᑉ ᒎᑎᕕᑦ ᐃᓴᕆᐊᓕᒥᐅᑦ ᐃᓄᖏᑦ ᐅᓄᕐᓯᒋᐊᕐᑎᓪᓕᒋᑦ 100ᐃᕐᓱᕐᓗᒋᑦ, ᐃᓅᓗᑎᑦ ᓱᓕ ᑕᑯᖁᓪᓗᑎᑦ; ᓱᖕᒪᓪᓕ ᐊᖓᔪᖅᑳᕐᔪᐊᕋ ᑍᒤᓕᐅᖁᔨᕚ?”

⁴ ᐊᖓᔪᖅᑳᕐᔪᐊᓪᓕ ᔪᐊᐱᒃᑯᑦ ᐊᖓᔪᖅᑳᖁᑎᖏᓪᓗ ᐱᖁᔨᓂᕐᒥᓂᒃ ᒪᓕᒃᑎᓚᐅᕐᐰᑦ. ᑕᕝᕙᓐᖓᑦ ᓇᔪᕐᑕᖓᓂᑦ ᐊᐅᓪᓚᕐᐳᑦ ᐃᓴᕆᐊᓕᒥᐅᑦ ᐃᓄᖏᑦ ᓈᓴᕆᐊᕐᑐᕐᓗᒋᑦ.

⁵ ᔪᐊᕐᑕᓂᐅᑉ ᑰᖓᓂᒃ ᐃᑳᕋᒥᒃ ᑕᖕᒫᓚᐅᕐᐳᑦ ᐊᕈᐃᕆᐅᑉ ᓯᕿᓂᖓᓂ, ᐃᒡᓗᒐᓴᒡᔪᐊᓂ ᓇᕐᓴᐅᑉ ᕿᑎᐊᓃᑦᑐᒥ, ᒑᑦ ᓄᓇᖓᓂᑦ ᑍᑲᓐᖓᑦ ᐱᓪᓗᑎᒃ ᔧᔨᕆᒧᐊᓚᐅᕐᐳᑦ.

⁶ ᑲᔪᓯᓪᓗᑎᒡᓗ ᒋᓕᐊᑎᒧᑦ, ᑲᑎᓯᒧᑦ ᕼᐃᑍᑎᒥᐅᑦ ᓄᓇᖓᓄᑦ; ᑕᕝᕙᓐᖓᑦ ᑖᓐᒨᓚᐅᕐᐳᑦ, ᑖᓐᒥᓪᓗ ᓴᖑᓪᓗᑎᒃ ᓮᑐᓂᒧᐊᓚᐅᕐᐳᑦ.

⁷ ᑕᕝᕙᓐᖔᕐᓗᑎᒃ ᐃᒡᓗᒐᓴᖕᓄᑦ ᓴᐴᓗᑕᓕᖕᒧᑦ ᑍᕆᒧᐊᓚᐅᕐᐳᑦ, ᑲᔪᓯᓪᓗᑎᒃ ᐃᒡᓗᒐᓴᖕᓄᑦ ᕼᐃᕔᑎᒥᐅᓄᑦ ᑬᓇᓂᒥᐅᓄᓪᓗ; ᑭᖑᓪᓕᕐᐹᒥᒡᓗ ᓂᒋᑉᒧᑦ, ᔫᑕᐅᑉ ᓄᓇᖓᓄᐊᓚᐅᕐᐳᑦ ᐱᐊᕐᓯᐸᒧᑦ.

⁸ ᓄᓇᓕᓕᒫᓂᒃ ᐅᐸᒍᑎᔭᕇᕋᒥᒃ, ᐅᑎᓚᐅᕐᐳᑦ ᔨᕉᓴᓕᒧᑦ ᑕᖅᑮᑦ 9 ᐅᓪᓗᐃᓪᓗ 20 ᐊᓂᒍᕐᑎᓪᓗᒋᑦ.

⁹ ᑕᕝᕙ ᔪᐊᐱ ᐊᖓᔪᖅᑳᕐᔪᐊᕐᒧᑦ ᐅᖃᕆᐊᕐᑐᕐᐳᖅ ᐊᖑᑏᑦ ᐅᓇᑕᕈᓐᓇᕐᑐᑦ ᐅᓄᕐᓂᖏᓐᓂᒃ: 800,000ᐃᑦ ᐃᓴᕆᐊᓕᒥ ᐅᓇᑕᕈᓐᓇᕐᐳᑦ, 500,000ᐃᓪᓗ ᔫᑕᒥ ᐅᓇᑕᕈᓐᓇᕆᓪᓗᑎᒃ.

¹⁰ ᑍᕕᑎᓕ ᓈᓮᑎᑦᓯᔭᕇᕋᒥ ᐃᓗᒥᒍᑦ ᐋᓐᓂᐊᓂᕐᒥᒃ ᐃᒃᐱᖕᓂᐊᓕᓚᐅᕐᐳᖅ, ᐊᑕᓂᕐᒧᓪᓗ ᐅᖃᕐᓗᓂ, “ᐱᐅᖏᑦᑐᐊᓗᖕᒥᒃ ᐊᔪᕐᑐᓕᓯᒪᕗᖓ ᑍᒤᓕᐅᕐᑎᑦᓯᓂᓐᓄᑦ. ᒫᓐᓇᓕ ᐊᑕᓃᖅ ᐃᓱᒪᒋᔪᓐᓁᕐᕕᒋᓚᐅᓐᖓ ᐱᐅᖏᑦᑐᓕᓯᒪᓂᓐᓂᑦ; ᓯᓔᑦᑐᐊᓗᖕᒥᒃ ᐱᓇᓱᐊᕐᓯᒪᒐᒪ.”

¹¹ ᖃᐅᑎᓪᓗᒍ ᐅᓪᓛᒃᑯᑦ ᑍᕕᑎ ᒪᑭᒻᒪᑦ, ᐊᑕᓂᖅ ᐅᖃᕐᐳᖅ ᒑᑦᒧᑦ, ᑍᕕᑎᐅᑉ ᐅᖃᕐᑎᖓᓄᑦ ᐅᖃᕐᓗᓂ,

¹² “ᑍᕕᑎᒧᐊᕐᓗᑎᑦ ᐅᖃᐅᑎᔭᕐᑐᓚᐅᕈᒃ, ‘ᐊᑕᓂᖅ ᐃᒫᒃ ᐅᖃᕐᐳᖅ, ᐱᖓᓱᓂᒃ ᓇᓖᕌᕐᑎᓐᓂᐊᕋᒃᑭᑦ; ᐊᑕᐅᓯᕐᒥᒃ ᓂᕈᐊᕐᓂᐊᕐᐳᑎᑦ, ᐱᓇᓱᐊᕐᓂᐊᕋᒪ ᓂᕈᐊᕐᑕᕐᓂᒃ.’”

¹³ ᑕᕝᕙ ᒑᑦ ᑍᕕᑎᒧᐊᕐᐳᖅ ᐅᖃᐅᑎᓪᓗᒍᓗ, “ᐊᕐᕌᒍᑦ ᐱᖓᓱᑦ ᑳᖕᓇᑐᕐᔪᐊᑦ ᑎᑭᑦᑐᒃᓴᐅᕚᑦ ᐃᓕᖕᓄᑦ ᓄᓇᖕᓄᓪᓗ? ᐅᕝᕙᓗ ᑕᖅᑭᓂᒃ ᐱᖓᓱᓂᒃ ᕿᒫᓯᒪᓗᑎᑦ ᐊᑭᕋᕐᓂᑦ ᐱᔭᐅᓇᓱᐊᕐᑎᓪᓗᑎᑦ? ᐅᕝᕙᓗ ᐅᓪᓗᓂᒃ ᐱᖓᓱᓂᒃ ᖃᓂᒪᓐᓇᕐᑐᒧᑦ ᑎᑭᑕᐅᓗᑎᑦ ᓄᓇᖕᓂ? ᑖᒃᑯᐊ ᐃᓱᒪᒃᓴᕐᓯᐅᕈᑎᒋᓕᒃᑭᑦ, ᐅᖃᐅᑎᓂᐊᕐᐸᕐᒪ ᑭᐅᒍᑎᖕᓂᒃ ᐊᑕᓂᕐᒧᑦ ᐅᕙᓐᓂᒃ ᑎᓕᓯᓚᐅᕐᑐᒧᑦ ᐅᖃᐅᓯᕆᓂᐊᕋᒃᑯ.”

¹⁴ ᑕᕝᕙ ᑍᕕᑎ ᑭᐅᕗᖅ ᒑᑦᒧᑦ, “ᐊᖏᔪᒥᒃ ᐊᒃᓱᕈᕐᓇᕐᑐᒦᓕᕐᐳᖓ; ᐊᑕᓂᐅᑉ ᓇᖕᒥᓂᖅ ᓱᒋᐊᓕᕐᓕᑎᒍᑦ, ᑖᓐᓇ ᓈᒃᑭᒍᓱᖕᓂᕐᔪᐊᖃᕐᒪᑦ; ᑭᓯᐊᓂᓕ ᐃᓄᖕᓄᑦ ᓱᒋᐊᕐᑕᐅᔪᒪᓐᖏᓚᖓ.”

¹⁵ ᑍᒤᒻᒪᑦ ᐊᑕᓂᖅ ᖃᓂᒪᓇᕐᑐᒥᒃ ᑎᑭᑎᑦᓯᓚᐅᕐᐳᖅ ᐃᓴᕆᐊᓕᒥᐅᓄᑦ, ᑕᕝᕙᓐᖓᑦ ᐅᓪᓛᒥᑦ ᐱᒋᐊᕐᓗᓂ ᓄᖅᑲᕐᕕᒋᖁᓚᐅᕐᑕᒥᓄᑦ ᑎᑭᓪᓗᒍ; ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒋᑦ 70,000ᐃᑦ ᐃᓴᕆᐊᓕᒥᐅᑦ ᑐᖁᓚᐅᕐᐳᑦ.

¹⁶ ᐊᑕᓂᐅᓪᓕ ᐂᖏᓕᖓ ᐊᓯᕈᐃᒋᐊᕐᓂᐊᓕᕐᑎᓪᓗᒍ ᔨᕉᓴᓕᒥᒃ, ᐊᑕᓂᐅᑉ ᐃᓱᒪᓂ ᓴᖑᑎᓚᐅᕐᐹ ᓱᒋᐊᕐᓯᔪᒪᓂᓂ ᐃᓄᖕᓂᒃ, ᐂᖏᓕᓗ ᑐᖁᕅᔪᖅ ᐅᖃᐅᑎᕚ, “ᓄᖅᑲᕆᑦ! ᑍᒪ ᓈᒻᒪᒃᓯᕗᖅ.” ᐂᖏᓕᓗ ᐊᕋᐅᓇᐅᑉ ᓂᐊᑰᔭᒃᓴᓂᒃ ᐃᕖᔧᕕᖓᓃᓚᐅᕐᐳᖅ ᔨᐳᓮᑎᒥᐅᑕᐅᑉ.

¹⁷ ᑍᕕᑎᐅᓪᓕ ᐂᖏᓕ ᐃᓄᖕᓂᒃ ᑐᖁᕅᔪᖅ ᑕᑯᒐᒥᐅᒃ, ᐊᑕᓂᕐᒧᑦ ᐅᖃᕐᐳᖅ, “ᐅᕙᖓ ᐊᔪᕐᑐᓕᓯᒪᕗᖓ, ᐅᕙᖓ ᐱᐅᖏᑦᑐᓕᓚᐅᕐᐳᖓ; ᐅᑯᐊᓕ ᐃᓄᐃᑦ ᖃᓄᐃᓕᐅᓚᐅᕐᐹ? ᑐᒃᓯᐊᕐᕕᒋᕙᒋᑦ ᐅᕙᓐᓂᒃ ᐃᓚᓐᓂᒡᓗ ᓱᒋᐊᕐᓯᖔᕐᑐᒃᓴᐅᕗᑎᑦ.”

¹⁸ ᑍᑦᓱᒪᓂᑦᓮᓐᓇᖅ ᒑᑦ ᑍᕕᑎᒧᐊᕐᐳᖅ ᐅᖃᐅᑎᓪᓗᒍᓗ, “ᒪᔪᕋᓚᐅᕆᑦ, ᐊᕋᐅᓇᐅᑉ ᐃᕖᔧᕕᖓᓄᑦ ᔨᐳᓮᑎᒦᑦᑐᒧᑦ, ᑍᑲᓂ ᑐᓂᕐᕈᓯᕐᕕᓕᐅᓕᕆᑦ ᐊᑕᓂᕐᒧᑦ.”

¹⁹ ᑕᕝᕙ ᑍᕕᑎ ᐂᓚᐅᕐᐳᖅ ᒑᑦ ᐅᖃᐅᓯᖏᑦ ᒪᓕᒡᓗᒋᑦ, ᐊᑕᓂᐅᑉ ᑎᓕᓯᑦᔪᑎᒋᔭᖓᓂᒃ.

²⁰ ᐊᕋᐅᓇᓕ ᑕᑯᒐᒥ ᐊᖓᔪᖅᑳᕐᔪᐊᒥᒃ ᐊᖓᔪᖅᑳᖁᑎᖏᓐᓂᒡᓗ ᕾᓕᕐᑐᓂᒃ ᐃᒻᒥᓄᑦ; ᐊᕋᐅᓇ ᐸᕐᕆᐊᓚᐅᕐᐳᖅ, ᐹᒻᒪᒃᓗᓂᓗ ᒪᓂᖅᑲᒧᑦ ᑍᕕᑎᐅᑉ ᓵᖓᓄᑦ.

²¹ ᐊᕋᐅᓇᐅᓪᓗ ᐊᐱᕆᕚ, “ᐊᖓᔪᖅᑳᖅ, ᓱᖕᒪᑦ ᑕᒪᐅᓐᖓᕐᐲᑦ?” ᑍᕕᑎ ᑭᐅᕗᖅ, “ᓂᐊᖂᔭᒃᓴᓂᒃ ᐃᕖᔧᕕᖕᓂᒃ ᓂᐅᕕᕆᐊᕐᐳᖓ, ᑐᓂᕐᕈᓯᕐᕕᖕᒥᒃ ᓴᓇᔪᒪᓪᓗᖓ ᐊᑕᓂᕐᒧᑦ, ᖃᓂᒻᒪᓯᖅ ᑕᒪᓐᓇ ᐃᓄᖕᓂᑦ ᓄᖅᑲᕐᑎᑕᐅᖁᓪᓗᒍ.”

²² ᑕᕝᕙ ᐊᕋᐅᓇ ᑍᕕᑎᒧᑦ ᐅᖃᕐᐳᖅ, “ᐱᒋᓕᕈᖅ ᐊᖓᔪᖅᑳᒃ, ᐃᓱᒪᕐᓱᑎᒋᓗᒍ ᐊᑕᓂᕐᒧᑦ ᑐᓂᕐᕈᓯᓕᕆᑦ ᐃᓱᐊᕐᑑᔪᕆᔭᕐᓂᒃ; ᐅᑯᐊ ᑕᕝᕙ ᐆᒪᔪᐃᑦ ᐃᒻᒧᒃᓯᐅᒊᑦ ᐃᑯᐊᓪᓚᒡᓗᒋᑦ ᑐᓂᕐᕈᑎᒃᓮᑦ; ᐅᑯᐊᓗ ᑕᕝᕙ ᓇᖕᒪᐅᑕᖏᑦ ᓯᖃᓕᑦᓯᕕᐅᓪᓗ ᕿᔪᒃᓴᖏᑦ ᐃᑯᐊᓪᓚᖅᑯᑎᒃᓮᑦ.”

²³ ᐊᕋᐅᓇᐅᑉ ᑕᒪᕐᒥᒃ ᑕᒪᒃᑯᐊ ᑐᓂᓚᐅᕐᐰᑦ ᐊᖓᔪᖅᑳᕐᔪᐊᕐᒧᑦ ᐅᖃᐅᑎᓪᓗᒍᓗ, “ᐊᑕᓂᐅᑉ ᒎᑎᕕᑦ ᑐᓂᕐᕈᑎᑎᑦ ᓈᒻᒪᒋᓕᒋᑦ.”

²⁴ ᐊᖓᔪᖅᑳᕐᔪᐊᕐᓕ ᐊᕋᐅᓇᒧᑦ ᑭᐅᕗᖅ, “ᐊᑭᓕᕐᓂᐊᕐᐸᒃᑲ ᑐᓂᕐᕈᓯᕈᒪᖏᓐᓇᒪ ᐊᑕᓂᕐᒧᑦ ᒎᑎᓐᓄᑦ ᑐᓂᕐᕈᑎᓂᒃ ᐊᑭᖃᖏᑦᑐᓂᒃ.” ᑕᕝᕙ ᑍᕕᑎᐅᑉ ᓂᐅᕕᓚᐅᕐᐹ ᓂᐊᖂᔭᒃᓴᓂᒥᒃ ᐃᕖᔧᕕᒃ ᐃᒻᒧᒃᓯᐅᒊᓪᓗ 50ᓄᑦ ᓯᐅᕕᕆᓄᑦ.

²⁵ ᑕᕝᕙᓂᓗ ᑍᕕᑎ ᑐᓂᕐᕈᓯᕐᕕᖕᒥᒃ ᐊᑕᓂᕐᒧᑦ ᓴᓇᕗᖅ, ᑐᓂᕐᕈᓯᕐᓗᓂᓗ ᐃᑯᐊᓪᓚᑎᑦᓯᓂᕐᒧᑦ ᑐᓂᕐᕈᑎᓂᒃ ᐃᓚᒌᑦᓯᐊᓕᕐᓂᕐᒧᓪᓗ ᑐᓂᕐᕈᑎᒥᒃ. ᐊᑕᓂᐅᓪᓗ ᑐᓂᕐᕈᓯᕈᑎᐅᔪᑦ ᓄᓇ ᐱᓪᓗᒍ ᐃᓚᓕᐅᓚᐅᕐᐰᑦ, ᖃᓂᒻᒪᓯᕐᓗ ᐃᓴᕆᐊᓕᒥᐅᓂ ᓄᖅᑲᕐᑎᓚᐅᕐᐹ.