ᓴᒧᐃᓕ ᐂᑉᐸᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐅᖃᐅᓯᖏᑦ ᑭᖑᓪᓕᕐᐹᑦ

¹ ᑍᕕᑎ ᔨᓯᐅᑉ ᐃᕐᓂᖓ ᑖᓐᓇ ᒎᑎᐅᑉ ᐊᖏᔪᕈᕐᑎᓚᐅᕐᐹ, ᔧᑰᑉ ᒎᑎᖓᑕ ᓂᕈᐊᓚᐅᕐᑕᖓ ᐊᖓᔪᖅᑳᕐᔪᐊᓐᖑᖁᓪᓗᒍ, ᐃᓐᖏᐅᓯᓕᐅᕐᑎᐅᓚᐅᕐᑐᖅ ᐱᐅᔪᐊᓗᖕᓂᒃ ᐃᓴᕆᐊᓕᒥᐅᓄᑦ. ᐅᑯᐊ ᑕᕝᕙ ᑍᕕᑎᐅᑉ ᐅᖃᐅᓯᖏᑦ ᑭᖑᓪᓕᕐᐹᑦ:

² “ᐊᑕᓂᐅᑉ ᐊᓂᕐᓂᖓ ᐅᕙᒃᑯᑦ ᐅᖃᓪᓚᒃᐳᖅ, ᐅᖃᐅᓯᖏᓪᓗ ᖃᓂᓐᓃᑉᐳᑦ.

³ ᐃᓴᕆᐊᓕᐅᑉ ᒎᑎᖓ ᐅᖃᓚᐅᕐᐳᖅ; ᐃᓴᕆᐊᓕᐅᑉ ᓴᐳᑦᔨᔨᖓ ᐅᕙᓐᓄᑦ ᐅᖃᓚᐅᕐᐳᖅ: ᐊᖓᔪᖅᑳᕐᔪᐊᖅ ᐊᐅᓚᑦᓯᔪᖅ ᓱᓕᑦᓯᐊᕐᑐᒥᒃ, ᐊᐅᓚᑦᓯᔪᖅ ᓈᓚᑦᓯᐊᕐᓗᓂ ᒎᑎᒥᒃ,

⁴ ᐅᓪᓛᒻᒪᕆᒃᑯᑦ ᓄᕗᔭᖃᖏᑦᑐᒥ ᓯᕿᓂᕐᒧᑦ ᓄᐃᕕᐅᔪᑐᑦ ᑍᒤᑉᐳᖅ, ᓯᕿᓂᕐᒧᑦ ᐃᕕᒃᓱᒃᒊᑦ ᕿᓪᓛᒡᒋᕐᑕᕐᑎᑕᐅᔪᑎᑐᑦ ᓯᓚᓗᕋᑖᕐᑎᓪᓗᒍ.

⁵ ᑍᒫᒃ ᒎᑎᐅᑉ ᑭᖑᕚᒃᑲ ᓮᒻᒪᕐᑎᑦᓱᒫᕐᐰᑦ, ᑍᒫᒃ ᐃᓱᖃᖏᑦᑐᒧᑦ ᐊᖏᕐᕕᒋᓯᒪᖕᒪᖓ, ᐱᖁᔨᑦᔪᑎᖓ ᑕᒤᑎᒍᑦ ᓱᖁᓯᔪᐃᑦᑑᕗᖅ. ᑕᒪᓐᓇ ᐱᕙᓪᓕᐊᑎᓯᒪᓐᖏᓚᐅᒃ ᐃᑲᔪᕐᑕᐅᓂᓕᒫᒃᑲ ᐱᔪᒪᔭᕆᔭᒃᑲᓗ?

⁶ ᒎᑎᖃᖏᑦᑐᓕᒫᓪᓕ ᑲᑭᓪᓚᕐᓇᕐᑎᑐᑦ ᐃᒋᑕᐅᕗᑦ; ᐊᒃᑐᕐᑕᐅᔪᓐᓇᕐᓂᐊᓐᖏᓚᓪᓗ ᐊᒡᒐᑐᐃᓐᓇᕐᓄᑦ;

⁷ ᐃᓄᖕᒧᑦ ᐊᒃᑐᕐᑕᐅᓂᐊᕈᑎᒃ ᐊᑐᕐᑐᒃᓴᐅᕗᑦ ᓴᕕᕋᔭᖕᒥᒃ ᓴᓇᕐᕈᑎᒥᒃ ᖃᓗᒋᐊᕐᒥᒡᓗ, ᐃᑭᑕᐅᓂᐊᕐᒪᑕ ᓄᖑᑕᐅᑦᓯᐊᕐᓗᑎᒃ.”

ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᖃᐅᔨᒪᔭᐅᑦᓯᐊᕐᑐᑦ

⁸ ᐅᑯᐊ ᑕᕝᕙ ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᐊᔪᖏᑦᑐᕐᔪᐊᖑᓚᐅᕐᑐᑦ; ᓯᕗᓪᓕᕐᐹᖅ ᔫᓯᑉ-ᐹᔅᓰᐸᔅ ᑖᓐᓇ ᑕ-ᑭᒧᓁᑎᒥᐅᑕᖅ; ᐊᖓᔪᖅᑳᖑᓚᐅᕐᑐᖅ ᐱᖓᓱᓄᑦ; ᐅᓈᕐᒥᓄᑦ ᐅᓇᑕᓚᐅᕐᑐᖅ 800ᓂᒃ ᐊᖑᑎᓂᒃ, ᑐᖁᓪᓗᒋᓪᓗ ᐅᓇᑕᕐᓂᕐᒥ ᐊᑕᐅᓯᕐᒥ.

⁹ ᑖᑦᓱᒪ ᑐᖓᓕᕆᔭᖓ ᑖᒃᑯᓇᓐᖓᑦ ᐊᔪᖏᑦᑐᕐᔪᐊᖑᓚᐅᕐᑐᓂᑦ ᐱᖓᓱᓂᑦ ᐃᓕᓯᕆᐅᕗᖅ ᑐᑑᑉ ᐃᕐᓂᖓ ᐊᕼᐅᕼᐂᒥᐅᑕᖅ. ᑖᓐᓇ ᑍᕕᑎᒥᒃ ᐃᓚᖃᓚᐅᕐᐳᖅ ᐱᓕᔅᑍᓂᒥᐅᓂᒃ ᓵᓐᖓᓯᓪᓗᑎᒃ ᐅᓇᑕᕆᐊᕐᑎᓪᓗᒋᑦ, ᐃᓴᕆᐊᓕᒥᐅᓪᓗ ᐃᓄᖏᑦ ᕿᒫᒃᓯᓚᐅᕐᐳᑦ.

¹⁰ ᑖᓐᓇ ᕿᒪᒃᓯᓇᓂ ᐃᓂᒥᓂ ᓂᑯᕕᓚᐅᕐᐳᖅ ᐱᓕᔅᑍᓂᒥᐅᓪᓗ ᑐᖁᕋᓚᐅᕐᐰᑦ ᐊᒡᒐᖏᑦ ᑕᖃᓚᐅᖏᓐᓂᖏᓐᓂ, ᓴᕕᒡᔪᐊᖓ ᓂᐱᓐᖓᓕᓚᐅᕐᐳᖅ ᐊᒡᒐᖓᓄᑦ; ᐊᑕᓂᕐᓗ ᐊᖏᔪᒥᒃ ᓵᓚᒃᓴᕐᑎᑦᓯᓚᐅᕐᐳᖅ ᑍᑦᓱᒪᓂ ᐅᓪᓗᒥ; ᐅᓇᑕᕐᑐᒃᓮᓪᓕ ᐅᑎᓚᐅᕐᐳᑦ ᐃᓕᓯᕆᒧᑦ ᐊᓐᓄᕅᔭᕐᓯᔭᕐᑐᑐᐃᓐᓇᓕᕐᓗᑎᒃ ᑐᖁᖓᔪᓂᒃ.

¹¹ ᑖᑦᓱᒪ ᑐᖓᓕᒃᑲᓐᓂᐊ ᓵᒻᒪᐅᕗᖅ ᐊᒌᑉ ᐃᕐᓂᖓ ᕼᐊᕋᕅᑎᒥᐅᑕᖅ. ᑍᑦᓱᒪᓂ ᐱᓕᔅᑏᓐᒥᐅᑦ ᑲᑎᖕᒪᑕ ᐱᕈᕐᓰᕕᖕᒧᑦ ᐱᕈᕐᑐᓕᖕᒧᑦ ᓕᕼᐃᒧᑦ; ᐃᓴᕆᐊᓕᒥᐅᑦ ᕿᒫᓚᐅᕐᒪᑕ ᐱᓕᔅᑍᓂᒥᐅᓂᑦ.

¹² ᑖᓐᓇᓕ ᐃᓂᒥᓂᑦ ᓂᑯᕕᓚᐅᕐᐳᖅ, ᓴᐳᓐᓂᐊᓕᕐᓗᓂᓗ, ᐱᓕᔅᑍᓂᒥᐅᓪᓗ ᑐᖁᕋᓚᐅᕐᐰᑦ; ᐊᑕᓂᕐᓗ ᐊᖏᔪᒥᒃ ᓵᓚᒃᓴᕕᒃᔪᐊᕐᑎᑦᓯᓚᐅᕐᐳᖅ.

¹³ ᑲᑎᕐᓱᐃᕕᒃ ᓇᓪᓕᐅᑎᑎᓪᓗᒍ, ᐱᖓᓱᑦ ᐊᖓᔪᖅᑳᖑᔪᑦ 30ᓂᑦ ᐱᓯᒪᔪᑦ ᑕᐅᓄᖓ ᑍᕕᑎᒧᐊᓚᐅᕐᐳᑦ ᕾᕈᓱᖕᒧᑦ ᐊᑑᓚᒻᒧᑦ, ᐱᓕᔅᑍᓂᒥᐅᑦ ᑕᖕᒫᕐᓯᒪᑎᓪᓗᒋᑦ ᓇᕐᓴᒥ ᕆᐰᒻᒥ.

¹⁴ ᑍᕕᑎ ᑍᑦᓱᒪᓂ ᖃᖅᑲᒥ ᓴᐴᓗᑕᓕᖕᒦᓚᐅᕐᐳᖅ, ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖃᕐᕕᖕᒥᓃᑎᓪᓗᒋᑦ ᐱᑦᓕᐊᒥ.

¹⁵ ᑍᕕᑎᓗ ᐃᒥᕈᒃᑐᐊᓘᓕᕋᒥ, ᐅᖃᓚᐅᕐᐳᖅ, “ᐃᒥᕐᑎᑕᐅᑦᓴᓚᐅᕐᓚᖓᑐᖅ ᐃᒥᕐᑕᕐᕕᖕᒥᑦ ᐱᑦᓕᐊᑉ ᐃᑎᕐᑕᕐᕕᐊᑕ ᓴᓂᐊᓃᑦᑐᒥᑦ!”

¹⁶ ᑕᕝᕙ ᐊᖑᑏᑦ ᑖᒃᑯᐊ ᐱᖓᓱᑦ ᐊᔪᖏᑦᑐᐊᓗᐃᑦ ᐱᓕᔅᑍᓂᒥᐅᑎᒎᓚᐅᕐᐳᖅ, ᐃᒥᕐᑕᓚᐅᕐᐳᓪᓗ ᐃᒥᕐᑕᕐᕕᖕᒥᑦ ᐱᑦᓕᐊᒥᑦ ᐃᑎᕐᑕᕐᕕᐅᑉ ᓴᓂᐊᓃᑦᑐᒥᑦ, ᑐᓂᓚᐅᕐᐹᓪᓗ ᑍᕕᑎᒧᑦ. ᑍᕕᑎᐅᓪᓕ ᐃᒥᕈᒪᓚᐅᓐᖏᓛ, ᑯᕕᓚᐅᕐᐹᓕ ᐊᑕᓂᕐᒧᑦ ᑐᓂᕐᕈᑎᒋᓪᓗᒍ.

¹⁷ ᐅᖃᕐᓗᓂᓗ, “ᐃᒥᕈᓐᓇᓐᖏᑕᕋᐅᓇ ᐊᑕᓃᖅ! ᐃᒥᕋᔭᕐᑑᔮᕋᒪ ᑖᒃᑯᐊ ᐊᖑᑏᑦ ᐊᐅᖏᓐᓂᒃ ᑐᖁᓐᓇᕐᑐᒃᑰᓚᐅᕐᓂᖏᑦ ᐱᓪᓗᒋᑦ!” ᑍᒤᒻᒪᑦ ᐃᒥᕈᒪᓚᐅᓐᖏᓛ. ᑕᒪᒃᑯᐊ ᑕᒪᑦᔭ ᐊᖑᑏᑦ ᑖᒃᑯᐊ ᐊᔪᖏᑦᑐᐊᓗᐃᑦ ᐱᓂᐊᕐᓂᕆᓚᐅᕐᑕᖏᑦ.

¹⁸ ᐊᐱᓮ ᔪᐊᐱᐅᑉ ᓄᑲᖓ ᔨᕈᐃᐊᐅᑉ ᐃᕐᓂᖓ, ᐊᖓᔪᖅᑳᕆᔭᐅᓛᐅᕐᐳᖅ ᑖᒃᑯᓄᖓ 30ᓄᑦ. ᐅᓈᓂ ᐊᑐᕐᓗᒍ 300ᓂᒃ ᑐᖁᑦᓯᓚᐅᕐᐳᖅ, ᑍᒤᒻᒪᑦ ᖃᐅᔨᒪᔭᐅᒻᒪᕆᓕᓚᐅᕐᐳᖅ ᑖᒃᑯᑎᑐᓇᖅ ᐱᖓᓱᑎᑐᑦ.

¹⁹ ᐅᐱᒋᔭᐅᓂᕐᓴᐅᓚᐅᕐᐳᖅ ᑖᒃᑯᓇᓐᖓᑦ 30ᓂᑦ, ᑖᒃᑯᓄᖓᓗ ᐊᖓᔪᖅᑳᕐᑖᕆᔭᐅᓚᐅᕐᐳᖅ, ᑭᓯᐊᓂᓕ ᑖᒃᑯᑎᑐᓇᖅ ᐱᖓᓱᑎᑐᑦ ᖃᐅᔨᒪᔭᐅᑦᓯᐊᕐᑎᒋᓚᐅᓐᖏᓚᖅ.

²⁰ ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ, ᐃᕐᓂᕆᔭᐅᓚᐅᕐᐳᖅ ᐊᔪᖏᑦᑐᐊᓗᖕᒧᑦ, ᑲᑉᔨᐅᓪᒥᑦ ᐱᓯᒪᔪᖅ, ᐱᓂᐊᕐᓂᖃᓚᐅᕐᐳᖅ ᓯᕘᕋᖏᑦᓯᐊᕐᓗᓂ, ᑐᖁᑦᓯᓚᐅᕐᑐᖅ ᐊᖑᑏᖕᓂᒃ ᒪᕐᕉᖕᓂᒃ ᓛᔭᑎᑑᕐᑑᖕᓂᒃ ᒧᐊᐱᒥᐅᑖᖕᓂᒃ, ᑐᖁᑦᓯᓚᐅᕐᑐᕐᓗ ᓛᔭᒥᒃ ᐃᑎᕐᓴᒦᑦᑐᒥᒃ ᖃᓐᓂᕐᑎᓪᓗᒍ.

²¹ ᐄᑦᔨᑉᑎᒥᐅᑕᒥᒡᓗ ᑐᖁᑦᓯᓚᐅᕐᐳᖅ, ᐊᖑᒻᒥᒃ ᐊᖏᔪᐊᓗᖕᒥᒃ. ᐄᑦᔨᑉᑎᒥᐅᑕᖅ ᖃᓗᒋᐊᕐᒥᓂᒃ ᑎᒍᒥᐊᓚᐅᕐᐳᖅ; ᑖᑦᓱᒪᓕ ᐅᐸᓚᐅᕐᐹ ᐊᔭᐅᑉᐱᐊᓕᔭᕐᓗᓂ, ᐅᓇᑕᕐᓗᓂᐅᒃ ᐄᑦᔨᑉᑎᒥᐅᑕᖅ ᐊᕐᓵᓚᐅᕐᐹ ᖃᓗᒋᐊᖓᓂᒃ, ᑐᖁᓪᓗᒍᓗ ᐅᓈᖓᓄᑦ.

²² ᑕᒪᒃᑯᐊ ᐱᓁᐊᐅᑉ ᔨᕼᐅᐃᐊᑕᐅᑉ ᐃᕐᓂᖓᑕ ᐱᓂᐊᕐᓂᕆᓚᐅᕐᐰᑦ, ᑖᓐᓇᑦᑕᐅᖅ ᖃᐅᔨᒪᔭᐅᑦᓯᓚᐅᕐᐳᖅ ᑖᒃᑯᑎᑐᓇᖅ ᐱᖓᓱᑎᑐᑦ ᐊᔪᖏᑦᑐᕐᔪᐊᑎᑐᑦ.

²³ ᐅᐱᒋᔭᐅᓂᕐᓴᐅᓚᐅᕐᐳᖅ ᑖᒃᑯᓇᓐᖓᑦ 30ᓂᑦ, ᑭᓯᐊᓂᓕ ᑖᒃᑯᓄᖓ ᐱᖓᓱᓄᑦ ᑍᒫᓪᓗᐊᖃᑕᐅᓚᐅᓐᖏᓚᖅ. ᑍᕕᑎᐅᓪᓗ ᓂᕈᐊᓚᐅᕐᐹ ᓴᐳᓐᓂᐊᕐᑎᒥᓄᑦ ᐊᖓᔪᖅᑳᖑᖁᓪᓗᒍ.

²⁴ ᐅᑯᐊ 30ᓄᑦ ᐃᓚᒋᔭᐅᓚᐅᕐᐳᑦ; ᐊᓴᕼᐃᐅᓪ ᔪᐊᐱᐅᑉ ᖃᑕᓐᖑᑎᖓ, ᐃᐅᓪᕼᐊᓇᓐ ᑐᑑᑉ ᐱᑦᓕᐊᒥᐅᑕᐅᑉ ᐃᕐᓂᖓ,

²⁵ ᓴᒪ ᐃᓕᑲᓗ ᕼᐊᕉᑎᒥᐅᑖᒃ,

²⁶ ᕼᐃᓕᔾ ᐱᐅᓪᑍᑎᒥᐅᑕᖅ, ᐂᕋ ᐃᒃᑭᓴᐅᑉ ᐃᕐᓂᖓ ᑎᑯᐊᒥᐅᑕᖅ,

²⁷ ᐊᐰᔨᕆ ᐊᓇᑑᑎᒥᐅᑕᖅ, ᒥᐳᓐᓁ ᕼᐅᓴᑍᑎᒥᐅᑕᖅ,

²⁸ ᔭᓪᒧᓐ ᐊᕼᐅᕼᐂᒥᐅᑕᖅ, ᒪᕼᐊᕅ ᓂᑐᐸᕼᐊᒥᐅᑕᖅ,

²⁹ ᕼᐃᓕᑉ ᐹᓇᐅᑉ ᐃᕐᓂᖓ ᓂᑐᐸᕼᐊᒥᐅᑕᖅ, ᐃᑍ ᕆᐰᑉ ᐃᕐᓂᖓ ᒋᐱᐊᒥᐅᑕᖅ ᐱᓐᔭᒥᓂᐅᑉ ᑭᖑᕚᖏᓐᓂᑦ,

³⁰ ᐱᓁᐊ ᐱᕋᑐᓁᒥᐅᑕᖅ, ᕼᐃᑍ ᒑᔅ ᑰᖓᓂᒥᐅᑕᖅ,

³¹ ᐊᐰ-ᐊᐅᓪᐹᓐ, ᐋᕐᐸᑍᑎᒥᐅᑕᖅ, ᐊᔾᒪᕕᑎ ᐸᕼᐅᕆᒻᒥᐅᑕᖅ,

³² ᐃᓔᕼᐊᐸ ᓵ-ᐊᓪᐳᓁᒥᐅᑕᖅ, ᔮᓯᓐ ᐃᕐᓂᖏᑕ ᐃᓚᖓᑦ, ᔫᓇᑕᓂ,

³³ ᓴᒪ ᕼᐊᕋᕅᑎᒥᐅᑕᖅ, ᐊᕼᐂᐊᒻ ᓵᕋᕆᐅᑉ ᕼᐊᕋᕅᑎᒥᐅᑕᐅᑉ ᐃᕐᓂᖓ,

³⁴ ᐃᓕᕕᓕᑦ ᐊᕼᐊᔅᐰᑉ ᐃᕐᓂᖓ ᒫᑲᑍᑎᒥᐅᑕᖅ, ᐃᓕᐊᒻ ᐊᕼᐃᑐᐱᓕᐅᑉ ᐃᕐᓂᖓ ᒋᓗᓁᑎᒥᐅᑕᖅ,

³⁵ ᕼᐃᔪᕈ ᑳᕐᒥᐅᓪᒥᐅᑕᖅ, ᐹᕅ ᐊᕐᐰᒥᐅᑕᖅ,

³⁶ ᐃᒐᐅᓪ ᓁᑕᓂᑉ ᔪᐹᒥᐅᑕᐅᑉ ᐃᕐᓂᖓ, ᐹᓂ ᒐᑍᑎᒥᐅᑕᖅ,

³⁷ ᔨᓕᒃ ᐊᒧᓁᑎᒥᐅᑕᖅ, ᓇᕼᐊᕅ ᐱ-ᐊᕌᔅᑕᒥᐅᑕᖅ, ᔪᐊᐱᐅᑉ ᐅᓇᑕᐅᑎᖏᓐᓂᒃ ᑲᒪᔨᐅᓚᐅᕐᑐᖅ ᔨᕈᐃᐊᐅᑉ ᐃᕐᓂᖓ,

³⁸ ᐂᕋ ᐃᑕᕅᑎᒥᐅᑕᖅ, ᒐᕆᑉ ᐃᑕᕅᑎᒥᐅᑕᖅ,

³⁹ ᔪᕅᐊ ᕼᐃᑍᑎᒥᐅᑕᖅ: ᑖᒃᑯᐊ ᑲᑎᓪᓗᒋᑦ 37ᐅᓚᐅᕐᐳᑦ.