ᓴᒧᐃᓕ ᐂᑉᐸᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐃᓐᖏᕈᑎᖓ ᓵᓚᖃᕐᓂᕐᒧᑦ

¹ ᐊᑕᓂᐅᑉ ᐱᐅᓕᖕᒪᒍ ᓴᐅᓕᒥᑦ ᐊᑭᕋᕐᑐᕐᑎᖏᓐᓂᓪᓗ ᐊᓯᖏᓐᓂᑦ, ᑍᕕᑎ ᐃᓐᖏᓚᐅᕐᐳᖅ ᐃᓐᖏᕈᒻᒥᒃ ᐊᑕᓂᕐᒧᑦ:

² ᐅᖃᕐᓗᓂ, “ᐊᑕᓂᖅ ᕾᕐᑐᕆᕙᕋ, ᓴᐳᑦᔨᔨᒋᓪᓗᒍᓗ; ᓱᖑᔫᓪᓗᓂ ᓴᐴᓗᑕᕆᕙᕋ.

³ ᒎᑎᒐ ᕾᕐᑐᕆᓪᓗᒍ ᕿᒫᕕᒋᕙᕋ, ᓴᐴᓗᑕᕆᕙᕋ ᐱᐅᓕᔭᐅᕕᒃᓴᒪᓗ ᓴᒃᑯᒋᖕᒪᒍ, ᕿᒫᕕᒃᓴᕆᒐᒃᑯ ᓵᓚᐅᓂᐊᖏᑦᑐᖅ, ᐱᐅᓕᔨᒐ; ᐱᐅᓕᒐᕕᖓ ᑲᑉᐱᐊᓇᕐᑐᓂᑦ.

⁴ ᐊᑕᓂᕐᒧᑦ ᑐᒃᓯᐊᓚᐅᕐᐳᖓ, ᑖᓐᓇ ᓂᕐᑐᒐᒃᓴᐅᖕᒪᑦ, ᐱᐅᓕᕚᖓᓗ ᐊᑭᕋᕐᑐᕐᑎᓐᓂᑦ.

⁵ ᑐᖁᒧᑦ ᐃᓗᒪᔭᐅᓚᐅᕐᐳᖓ ᐊᕙᑎᓕᒫᓐᓂᑦ; ᐊᓯᕈᕐᑕᐅᓇᕐᑐᒧᓪᓗ ᐊᕙᓗᔭᐅᓚᐅᕐᐳᖓ.

⁶ ᐃᓗᕕᐅᑉ ᐊᒃᓱᓈᖓᓄᑦ ᓂᒐᕕᑕᐅᓚᐅᕐᐳᖓ, ᑐᖂᓪᓗ ᓂᒐᖓᓄᑦ ᓯᕗᕐᖏᕐᑕᐅᓚᐅᕐᐳᖓ.

⁷ ᐊᒃᓱᕈᕐᓇᕐᑐᒦᓕᕐᑎᓪᓗᖓ ᐊᑕᓂᕐᒧᑦ ᑐᒃᓯᐊᓚᐅᕐᐳᖓ; ᒎᑎᓐᓄᑦ ᑐᒃᓯᐊᓚᐅᕐᐳᖓ ᐃᑲᔪᕐᑕᐅᔪᒪᓪᓗᖓ. ᑐᒃᓯᐊᕐᕕᖁᑎᖕᒥᓂᑦ ᓂᐱᒐ ᑐᓴᓚᐅᕐᐹ; ᓈᓚᓚᐅᕐᐹᖓᓗ ᐃᑲᔪᕐᑕᐅᔪᒪᓂᕆᔭᓐᓂᒃ.

⁸ ᑕᕝᕙ ᓄᓇ ᓴᔪᓕᕐᐳᖅ ᓴᔪᒃᐱᓪᓚᒡᓗᓂᓗ; ᕿᓚᐅᓪᓗ ᑐᓐᖓᕕᖓ ᐊᐅᓚᑦᔭᓚᐅᕐᐳᖅ ᓴᔪᓕᕐᓗᓂᓗ, ᒎᑎ ᓂᓐᖓᓚᐅᕐᒪᑦ.

⁹ ᐳᔪᕐᒥᒃ ᓱᕐᓗᖓᓂᑦ ᓄᐃᔪᖃᓚᐅᕐᐳᖅ, ᐃᑯᒪᒥᒃ ᐃᑯᐊᓪᓚᒃᑎᑦᓯᔪᒥᒃ ᐃᑯᒪᔪᓪᓗ ᐊᐅᒫᓗᐃᑦ ᐊᓂᓚᐅᕐᐳᑦ ᖃᓂᖓᓂᑦ.

¹⁰ ᕿᓔᑦ ᐊᖕᒪᕐᓗᒋᑦ ᐊᖅᑲᓚᐅᕐᐳᖅ, ᓄᕗᔭ ᑖᕐᑐᖅ ᐃᑎᒐᖏᑕ ᐊᑖᓃᑎᓪᓗᒍ.

¹¹ ᐃᖏᕐᕋᓚᐅᕐᐳᖅ ᓱᒃᑲᓕᓪᓗᓂ, ᐃᓴᕈᓕᖕᓄᑦ ᐃᑭᒪᓪᓗᓂ; ᑕᑯᔭᐅᓚᐅᕐᐳᖅ ᐃᓴᕈᖃᕐᑎᓪᓗᒍ ᐊᓄᕆᒥᒃ.

¹² ᐃᒻᒥᓂᒃ ᑕᓕᑎᓯᒪᓚᐅᕐᐳᖅ ᑖᕐᑐᒧᑦ; ᓄᕗᔭᕐᔪᐊᓄᑦ, ᐃᒥᕐᒥᒃ ᑕᑕᑦᑐᓄᑦ ᐊᕙᓗᔭᐅᓯᒪᓚᐅᕐᐳᖅ;

¹³ ᖃᐅᒪᔪᐊᓗᖕᒧᑦ ᑖᑦᓱᒪ ᓵᖓᓃᑦᑐᒧᑦ ᐃᑯᒪᔪᓂᒃ ᐊᐅᒫᓗᖕᓂᒃ ᓴᖅᑭᑦᑐᖃᕐᐳᖅ.

¹⁴ ᐊᑕᓂᖅ ᐃᒃᑑᓕᔮᓚᐅᕐᐳᖅ ᕿᓚᖕᒥᑦ, ᖁᑦᓯᖕᓂᕐᐸᐅᔫᓪᓗ ᓂᐱᖓ ᑐᓴᕐᓴᐅᕗᖅ.

¹⁵ ᖃᕐᔪᒥᓄᑦ ᐱᓯᒋᐊᕐᒪᑦ, ᐊᑭᕋᖏᑦ ᓯᐊᒻᒪᕐᐳᑦ; ᑲᓪᓕᕐᒧᑦ ᕿᒪᒃᓯᑎᑉᐰᑦ ᐅᓪᓚᒃᓯᓪᓗᑎᒃ.

¹⁶ ᑕᕝᕙ ᐃᒪᕕᐅᑉ ᐃᖅᑲᖓ ᑕᑯᔭᐅᓚᐅᕐᐳᑦ, ᓄᓇᕐᔪᐊᓪᓗ ᑐᓐᖓᕕᖏᑦ ᓴᖅᑭᑉᐳᑦ ᐃᔨᕐᓯᒪᔪᖃᕈᓐᓃᕐᓗᑎᒃ, ᐊᑕᓂᐅᑉ ᓱᐊᒃᐰᑦ ᐊᑭᕋᓂ, ᐊᓄᕆᕐᔪᐊᒧᑦ ᓱᕐᓗᖓᓂᓐᖔᕐᑐᒧᑦ.

¹⁷ ᖁᑦᓯᒃᑐᒥᑦ ᐃᓴᒃᓗᓂ, ᑎᒍᓚᐅᕐᐹᖓ; ᐊᒧᓚᐅᕐᐹᖓ ᐃᒪᕐᒥᑦ ᐃᑎᔪᒥᑦ.

¹⁸ ᐱᐅᓕᓚᐅᕐᐹᖓ ᓲᖑᔪᓂᑦ ᐊᑭᕋᓐᓂᑦ, ᐅᕙᓐᓂᒃ ᐆᒥᓱᒃᑐᓂᑦ; ᓲᖑᔫᓗᐊᓚᐅᕐᒪᑕ ᐅᕙᓐᓄᑦ.

¹⁹ ᐅᖁᒤᑦᑐᒦᓕᕐᑎᓪᓗᖓ ᐅᓇᑕᕆᐊᓚᐅᕐᐹᖓ; ᐊᑕᓂᐅᓪᓕ ᓴᐳᑎᓚᐅᕐᐹᖓ.

²⁰ ᐂᑎᓚᐅᕐᐹᖓ ᐃᓂᒃᓴᒧᑦ ᐱᕕᑐᔪᒧᑦ; ᓴᐳᑎᓪᓗᖓ ᖁᕕᐊᒋᒐᒥᖓ.

²¹ ᐊᑕᓂᐅᑉ ᐊᑭᓕᓚᐅᕐᐹᖓ ᓱᓕᔪᒥᒃ ᐱᓇᓱᐊᕐᓂᕋ ᐱᓪᓗᒍ; ᓮᒻᒪᕐᑎᑉᐹᖓ ᐱᓂᐊᕐᓂᒃᑯᑦ ᐸᓯᔭᒃᓴᐅᖏᓐᓂᕋ ᐱᓪᓗᒍ.

²² ᐊᑕᓂᐅᑉ ᐱᖁᔭᖏᑦ ᓈᓚᓚᐅᕐᐸᒃᑲ; ᒎᑎᓐᓂᒃ ᕿᒤᓚᐅᖏᓐᓇᒪ ᐱᐅᖏᑦᑐᓕᓂᕐᒧᑦ.

²³ ᐱᖁᔭᖏᑦ ᖃᐅᔨᓴᑦᓯᐊᕐᓯᒪᕙᒃᑲ; ᒪᓕᒐᒃᓴᐅᖁᔭᖏᓪᓗ ᑐᓄᓚᐅᓐᖏᓚᒃᑲ.

²⁴ ᐸᓯᔭᒃᓴᐅᓂᖃᓚᐅᓐᖏᓚᖓ ᑖᑦᓱᒪ ᓵᖓᓂ, ᐅᕙᓐᓂᒃ ᐸᓯᔭᒃᓴᓐᖑᕐᑎᑦᑍᓕᒪᓚᐅᕋᒪ.

²⁵ ᑍᒤᒻᒪᑦ ᐊᑭᓕᕐᐹᖓ ᐱᑦᓯᐊᕐᓂᕋ ᒪᓕᒡᓗᒍ, ᖃᐅᔨᒪᒐᒥ ᐸᓯᔭᒃᓴᐅᖏᓐᓂᓐᓂᒃ ᑖᑦᓱᒪ ᓵᖓᓂ.

²⁶ ᑲᒪᑦᓯᐊᕐᑐᓄᑦ ᑲᒪᑦᓯᐊᕐᓃᑦ ᓴᖅᑭᑎᑉᐸᑦ, ᐸᓯᔭᒃᓴᐅᖏᑦᑐᓄᓪᓗ ᐸᓯᔭᒃᓴᐅᖏᓐᓃᑦ ᓴᖅᑭᑎᑉᐸᑦ.

²⁷ ᐃᑦᔪᕐᓁᑦᑐᓄᑦ ᐃᑦᔪᕐᓁᓐᓃᑦ ᓴᖅᑭᑎᑉᐸᑦ, ᐱᐅᖏᑦᑐᓕᔪᓄᓪᓗ ᐃᓕᕋᓇᕐᓃᑦ ᓴᖅᑭᑎᓪᓗᒍ.

²⁸ ᒥᑭᒡᓕᑎᕐᓯᒪᔪᑦ ᐃᓄᐃᑦ ᐱᐅᓕᕙᑎᑦ, ᐱᐅᔪᕆᔪᓪᓕ ᑕᑯᓴᕐᓗᒋᑦ ᒥᑭᒡᓕᑎᑉᐸᑎᑦ.

²⁹ ᐊᑕᓃᖅ ᐃᕝᕕᑦ ᖃᐅᒻᒪᖅᑯᑎᒋᕙᒋᑦ, ᒎᑎᒪᓗ ᑖᕐᑐᒦᓐᓂᕋ ᖃᐅᒻᒪᒃᑎᑉᐹ.

³⁰ ᐃᓛᒃ, ᐃᑲᔪᕐᑎᒋᓗᑎᑦ ᐅᓇᑕᕐᑐᒃᓮᑦ ᐅᐸᒃᑐᕈᓐᓇᕐᐸᒃᑲ, ᒎᑎᒐᓗ ᐂᑉᐸᕆᓗᒍ ᐊᕙᓗᕐᔪᐊᑉ ᐅᖓᑖᓄᑦ ᒥᓯᒍᓐᓇᕐᐳᖓ.

³¹ ᑖᓐᓇ ᒎᑎ-ᐱᓂᐊᕐᓂᖃᕐᐳᖅ ᓈᒻᒪᓈᑦᓯᐊᕐᑐᒥᒃ; ᐊᑕᓂᐅᑉ ᐊᖏᕈᑎᒋᓯᒪᔭᖏᑕ ᓱᓕᓂᖏᑦ ᓴᖅᑭᑎᑕᐅᕗᑦ; ᓴᐴᓗᑕᐅᕗᖅ ᕿᒫᔪᓕᒫᓄᑦ ᑖᑦᓱᒧᖓ.

³² ᑭᓇ ᒎᑎᐅᕙ? ᐊᑕᓂᖅ ᑖᓐᓇᑐᐊᖅ; ᑭᓇᓗ ᕾᕐᑑᕙ? ᒎᑎ ᑖᓐᓇᑐᐊᖅ.

³³ ᒎᑎ ᓲᖑᔫᓪᓗᓂ ᕿᒫᕕᒃᓴᕆᕙᕋ, ᐊᖅᑯᑎᒋᓂᐊᕐᑕᒃᑲᓗ ᐊᑦᑕᕐᓇᕈᓐᓃᕐᑎᑉᐰᑦ.

³⁴ ᐃᑎᒐᒃᑲ ᑐᒃᑐᖓᔫᑉ ᐃᑎᒐᖏᑎᑐᑦ ᑍᒤᑎᑉᐰᑦ; ᖁᐃᑦᓵᖏᑦᓯᐊᕐᑎᓪᓗᖓ ᖃᖅᑲᐅᑉ ᖄᖏᓐᓂ ᐳᕐᑐᔪᓂ.

³⁵ ᐃᓕᓴᑎᑉᐹᖓ ᐅᓇᑕᕐᓂᕐᒥᒃ, ᕿᓗᓯᔪᓐᓇᖁᓪᓗᖓ ᐱᓯᒃᓯᓂᒃ ᑲᓐᓄᔭᓂᒃ.

³⁶ ᐊᑕᓃᖅ, ᓴᐳᑎᕙᕐᒪ ᐱᐅᓕᒃᓯᓂᕐᓄᑦ, ᐃᑲᔪᕐᓂᕐᓄᓪᓗ ᐊᔪᕈᓐᓃᕐᑎᑉᐸᕐᒪ.

³⁷ ᓯᓕᒃᑐᒥᒃ ᓇᖏᕐᕕᖃᕐᑎᓐᓇᕕᖓ ᑎᒍᔭᐅᑎᓚᐅᓐᖏᓚᕐᒪ, ᐃᑎᒐᒃᑲᓗ ᖁᐂᔭᕿᑎᓚᐅᕐᓇᒋᑦ.

³⁸ ᐊᑭᕋᕐᑐᕐᑎᒃᑲ ᒪᓕᒡᓗᒋᑦ ᓵᓚᒋᓚᐅᕐᐸᒃᑲ; ᐅᑎᕆᐊᓚᐅᓐᖏᓚᖓᓗ ᓄᖑᓚᐅᖏᓐᓂᖏᓐᓂ.

³⁹ ᓄᖑᓚᐅᕐᐸᒃᑲ; ᑐᓪᓕᕋᕐᓗᒋᑦ, ᒪᑭᑦᓱᓐᓁᓪᓕᖁᓪᓗᒋᑦ; ᐅᕐᕈᕗᑦ ᓵᓚᐅᓪᓗᑎᒃ ᓵᓐᓂ.

⁴⁰ ᓲᖑᓂᕐᑖᕐᑎᑉᐸᕐᒪ ᐅᓇᑕᕐᓂᕐᒧᑦ; ᓵᓚᖃᕐᑎᑉᐸᕐᒪᓗ ᐊᑭᕋᕐᑐᕐᑎᓐᓂᒃ.

⁴¹ ᐊᑭᕋᕐᑐᕐᑎᒃᑲ ᕿᒫᑎᑉᐸᑎᑦ ᐅᕙᓐᓂᒃ, ᐊᓯᕈᕐᐸᒃᑲᓗ ᐅᕙᓐᓂᒃ ᐆᒥᓱᒃᑐᑦ.

⁴² ᐃᑲᔪᕐᑎᒃᓴᒥᖕᓂᒃ ᕿᓂᕋᓗᐊᕐᐳᑦ, ᐱᐅᓕᔭᐅᔪᓐᓇᓐᖏᓚᓪᓕ; ᐊᑕᓂᕐᒧᑦ ᑐᒃᓯᐊᕋᓗᐊᕐᐳᑦ, ᑖᑦᓱᒪᓕ ᑭᐅᓐᖏᓔᑦ.

⁴³ ᓯᖃᓪᓕᒐᒃᑭᑦ, ᐳᔪᕋᑐᐃᓐᓇᓐᖑᕐᐳᑦ, ᑐᓪᓕᕋᕐᐸᒃᑲ ᒪᕐᕋᕐᑎᑐᑦ ᐊᖅᑯᑎᒦᑦᑐᑎᑐᑦ.

⁴⁴ ᐱᐅᓕᕙᕐᒪ ᐃᓄᖕᓂᑦ ᐊᑭᕋᕐᑐᕐᑎᓐᓂᑦ; ᐊᐅᓚᑦᓯᓂᕋ ᑲᔪᓯᑎᑉᐸᑦ ᐃᓅᖃᑎᒋᒡᔪᐊᓄᑦ; ᐃᓄᐃᑦ ᖃᐅᔨᒪᓚᐅᓐᖏᑕᒃᑲ ᐱᔨᑦᓯᕐᑎᒋᓕᕐᐸᒃᑲ.

⁴⁵ ᐃᓅᖃᑎᒃᓴᔭᕆᓐᖏᑕᒃᑲ ᓵᓐᓄᑦ ᐹᒻᒪᒃᑎᕐᐳᑦ; ᐅᕙᓐᓂᒃ ᑐᓴᕐᑐᐊᕋᒥᒃ, ᓈᓚᒃᐹᖓ.

⁴⁶ ᐃᓅᖃᑎᒃᓴᔭᕆᓐᖏᑕᕗᑦ ᓴᐱᓕᖃᑦᑕᕐᐳᑦ, ᓴᔪᓕᕐᓗᑎᒡᓗ ᕾᖃᑦᑕᕐᐳᑦ ᓴᐴᓗᑕᖃᕐᕕᖕᒥᓂᑦ.

⁴⁷ ᐊᑕᓂᖅ ᐃᓅᕗᖅ; ᓂᕐᑐᕐᑕᐅᓕ ᓴᐳᑦᔨᔨᒐ! ᐊᖏᔪᕈᕐᑎᑕᐅᓕ ᒎᑎᒐ, ᐱᐅᓕᔭᐅᓂᕐᒪ ᕾᕐᑐᖓ!

⁴⁸ ᒎᑎᐅᑉ ᓵᓚᖃᕐᑎᑉᐹᖓ ᐊᑭᕋᕐᑐᕐᑎᓐᓂᒃ; ᐃᓅᖃᑎᒋᒡᔪᐊᓪᓗ ᓵᓐᓄᑦ ᐱᑎᑉᐰᑦ,

⁴⁹ ᐱᐅᓕᕚᖓ ᐊᑭᕋᕐᑐᕐᑎᓐᓂᑦ; ᐊᑕᓃᖅ, ᐃᕝᕕᑦ ᓵᓚᖃᕐᑎᑉᐸᕐᒪ ᐊᑭᕋᕐᑐᕐᑎᓐᓂᒃ, ᓴᐳᑎᕙᕐᒪᓗ ᐃᓄᖕᓂᑦ ᑲᑉᐱᐊᓇᕐᑐᓂᑦ.

⁵⁰ ᑍᒤᒻᒪᑦ ᐊᖏᒡᓕᑎᑉᐸᒋᑦ ᐊᑕᓃᖅ, ᐃᓅᖃᑎᒌᒡᔪᐊᑦ ᐊᑯᕐᖓᓐᓂ; ᐃᓐᖏᕐᕕᒋᕙᒋᓪᓗ ᐊᑎᕐᓂᒃ ᓂᕐᑐᐃᑦᔪᑎᓂᒃ.

⁵¹ ᐊᖏᔪᒥᒃ ᓵᓚᖃᕐᑎᑦᓯᕗᖅ ᐊᖓᔪᖅᑳᕐᔪᐊᖁᑎᒥᓂᒃ; ᓇᒡᓕᒍᓱᐃᓐᓇᕐᓂᕐᒥᓂᒃ ᓴᖅᑭᑎᑦᓯᕗᖅ ᐅᕐᓱᕐᑎᕐᓯᒪᔭᒥᓄᑦ, ᑍᕕᑎᒧᑦ, ᑭᖑᕚᖏᓐᓄᓪᓗ ᐃᓱᖃᖏᑦᑐᒧᑦ.”