ᓴᒧᐃᓕ ᐂᑉᐸᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᐅᓕᐅᑉ ᑭᖑᕚᖏᑕ ᑐᖁᑕᐅᓂᖏᑦ

¹ ᑍᕕᑎᐅᑉ ᐊᐅᓚᑦᓯᓂᖓᑕ ᐃᓚᖓᓂ ᑳᖕᓇᕐᑐᕐᔪᐊᖃᓚᐅᕐᐳᖅ ᐊᕐᕌᒍᓂᒃ ᐱᖓᓱᓂᒃ, ᑍᕕᑎᓗ ᐊᑕᓂᕐᒧᑦ ᖃᐅᔨᓇᓱᐊᖃᑦᑕᓚᐅᕐᐳᖅ ᑕᒪᓐᓇ ᐱᓪᓗᒍ, ᐊᑕᓂᕐᓗ ᐅᖃᕐᐳᖅ, “ᓴᐅᓕᒃᑯᑦ ᐃᓚᖏᓪᓗ ᐸᓯᔭᒃᓴᐅᕗᑦ ᑐᖁᑦᓯᓂᕐᒧᑦ; ᒋᐱᐅᓁᑎᒥᐅᑦ ᑐᖁᑕᐅᑎᓚᐅᕐᓯᒪᖕᒪᒋᑦ.”

² (ᒋᐱᐅᓁᑎᒥᐅᑦ ᐃᓴᕆᐊᓕᒥᐅᑕᐅᖏᒻᒪᑕ; ᐅᓄᖏᑦᑐᑦ ᐊᒧᕅᑎᓂ ᐊᒥᐊᒃᑰᓯᒪᕗᑦ; ᐃᓴᕆᐊᓕᒥᐅᓄᓪᓕ ᐊᖏᕐᕕᐅᓯᒪᓚᐅᕐᐳᑦ ᓴᐳᒻᒥᔭᐅᓂᐊᕐᓂᕋᕐᑕᐅᓪᓗᑎᒃ, ᓴᐅᓕᐅᓪᓕ ᐊᓯᕈᓚᐅᕐᐰᑦ ᐃᓴᕆᐊᓕᒥᐅᓂᒃ ᔫᑕᒥᐅᓂᒡᓗ ᐃᓱᒫᓗᒍᑎᖃᕐᓂᕐᓴᐅᓪᓗᓂ.)

³ ᑍᒤᒻᒪᑦ ᑍᕕᑎᐅᑉ ᒋᐱᐅᓁᑎᒥᐅᑦ ᑲᑎᖁᓚᐅᕐᐰᑦ ᐅᖃᐅᑎᓪᓗᒋᓪᓗ, “ᖃᓄᐃᓕᐅᕐᑐᒃᓴᐅᕗᖔ ᐃᓕᑦᓯᓐᓄᑦ? ᖃᓄᕐᓗ ᐋᖅᑮᒋᐊᕈᓐᓇᕐᐳᖓ ᐱᑦᓯᐊᕐᑕᐅᖏᓐᓂᕆᓯᒪᔭᑦᓯᓐᓂᒃ, ᐊᑕᓂᐅᑉ ᐃᓄᖁᑎᖏᓐᓂᒃ ᓮᒻᒪᕐᑎᑦᓯᔪᓐᓇᖁᓪᓗᓯ.”

⁴ ᒋᐱᐅᓁᑎᒥᐅᑦ ᑭᐅᕗᑦ, “ᐊᑭᕋᕐᑑᑎᓂᕗᑦ ᓴᐅᓕᒥᒃ ᐃᓚᖏᓐᓂᒡᓗ ᐊᑭᓕᕐᑕᐅᔪᓐᓇᓐᖏᓚᑦ ᓯᐅᓪᕕᕆᒧᑦ ᒎᓗᒧᓪᓘᓐᓃᑦ, ᓇᓪᓕᐊᓐᓂᒡᓘᓐᓃᑦ ᑐᖁᑦᓯᔪᒪᓐᖏᓚᒍᑦ ᐃᓴᕆᐊᓕᒥᐅᓂᒃ.” ᑍᕕᑎᓗ ᐅᖃᕐᐳᖅ, “ᖃᓄᕐᓕ ᐅᕙᓐᓂᒃ ᐱᓇᓱᐊᕆᐊᖃᕐᑐᕆᒃᓯᕕᓰ?”

⁵ ᑖᒃᑯᐊ ᑭᐅᕗᑦ, “ᓴᐅᓕᐅᑉ ᓄᖑᓐᓇᓱᓚᐅᕐᐹᑎᒍᑦ ᐊᓯᕈᕋᓱᐊᕐᓗᑕᓗ ᓇᓕᕐᐳᓪᓘᓐᓃᑦ ᐃᓅᖁᓇᒍ ᐃᓴᕆᐊᓕᒥᐅᓂ.

⁶ ᑍᒤᒻᒪᑦ ᐊᖑᑎᓂᒃ 7ᓂᒃ ᑭᖑᕚᖏᓐᓂᑦ ᕾᑦᓯᓚᐅᕆᑦ, ᕿᒥᓐᓂᐊᕋᑦᑎᒍ ᐊᑕᓂᐅᑉ ᓵᖓᓂ ᒋᐱᐊᓐᒥ ᓴᐅᓕᐅᑉ ᓄᓇᖓᓂ, ᐊᑕᓂᐅᑉ ᖃᖅᑲᖁᑎᖓᓂ.” ᐊᖓᔪᖅᑳᕐᔪᐊᖅ ᑭᐅᕗᖅ, “ᐃᓕᑦᓯᓐᓄᑦ ᑐᓂᓂᐊᕐᐸᒃᑲ.”

⁷ ᔫᓇᑕᓂᒃᑯᒡᓕ ᐊᖏᖃᑎᒌᒍᑎᒋᓚᐅᕐᓯᒪᔭᖓᓄᑦ ᐃᒻᒥᖕᓄᑦ, ᑍᕕᑎᐅᑉ ᑐᖁᑕᐅᑎᓚᐅᓐᖏᓛ ᔫᓇᑕᓂᐅᑉ ᐃᕐᓂᖓ ᒥᐱᐳᓴᑎ, ᓴᐅᓕᐅᑉ ᐃᕐᖑᑕᖓ.

⁸ ᐊᕐᒧᓁᓗ ᒥᐱᐳᓴᑎᓗ ᑎᒍᓚᐅᕐᐰᑦ, ᕆᔾᐸᐅᑉ ᐃᕐᓂᖏᒃ ᒪᕐᕉᒃ ᐂᐊᐅᑉ ᐸᓂᖓᒍᑦ ᕿᑐᕐᖓᕐᑖᕆᔭᐅᓯᒪᔪᒃ ᓴᐅᓕᒧᑦ; ᑎᒍᓚᐅᕆᕔᑦᑕᐅᖅ ᓴᐅᓕᐅᑉ ᐸᓂᖓᑕ ᒥᕋᐱᐅᑉ ᐃᕐᓂᖏᑦ ᑕᓪᓕᒪᑦ, ᐃᕐᓂᕐᑖᕆᓯᒪᔭᖏᑦ ᐊᑦᕆᐅᓪᒥᑦ ᐸᕐᔨᓔᑉ ᐃᕐᓂᖓᓂᑦ, ᒥᕼᐅᓚᑍᑎᒥᐅᑕᕐᒥᑦ.

⁹ ᑍᕕᑎᐅᑉ ᑖᒃᑯᐊ ᑐᓂᓚᐅᕐᐰᑦ ᒋᐱᐊᓁᑎᒥᐅᑦ ᐃᓄᖏᓐᓄᑦ, ᑖᒃᑯᓇᓐᖓᑦ ᖃᖅᑲᐅᑉ ᖄᖓᓂ ᕿᒥᑕᐅᓚᐅᕐᐳᑦ ᐊᑕᓂᐅᑉ ᓵᖓᓂ, ᑖᒃᑯᐊᓕᒫᑦ 7 ᐊᑕᐅᑦᓯᒃᑯᑦ ᑐᖁᓚᐅᕐᐳᑦ ᐅᐱᕐᖔᖅ ᐃᓱᓕᒋᐊᕕᒃᑎᓪᓗᒍ, ᓂᐊᖂᔭᒃᓮᑦ ᓄᐊᑕᐅᒋᐊᕐᕕᐊᓂ.

¹⁰ ᓴᐅᓕᐅᓪᓕ ᓄᓕᐊᖓ ᕆᔾᐸ, ᐂᐊᐅᑉ ᐸᓂᖓ, ᐊᑐᓚᐅᕐᐳᖅ ᐳᑐᕐᓛᒥᒃ, ᐅᓕᒋᓪᓗᒍ ᐅᔭᕋᐅᑉ ᖄᖓᓂ ᑐᖁᖓᔪᑦ ᓇᔪᕐᑕᖓᓂ, ᑍᑲᓃᓚᐅᕐᐳᓪᓗ ᑲᑎᕐᓱᐃᕕᐅᑉ ᐱᒋᐊᕐᓂᖓᓂᑦ ᐅᑭᐊᒃᓵᑉ ᓯᓚᓗᓕᕐᓂᖓ ᑎᑭᓪᓗᒍ; ᐅᓪᓗᒃᑯᑦ ᑎᖕᒥᐊᓂᑦ ᑐᖁᖓᔪᑦ ᓴᐳᑎᓚᐅᕐᐰᑦ, ᐅᓐᓄᒃᑯᓪᓗ ᓴᐳᑎᓚᐅᕆᕔᑦ ᐃᕐᓯᓇᕐᑐᓂᑦ ᐆᒪᔪᓂᑦ.

¹¹ ᑍᕕᑎᓕ ᑕᒪᑐᒥᖓ ᑐᓴᕋᒥ ᕆᔾᐸᐅᑉ ᐂᐊᐅᑉ ᐸᓂᖓᑕ ᐱᓂᐊᕐᓂᖓᓂᒃ ᓴᐅᓕᐅᑉ ᓄᓕᐊᒃᑲᓐᓂᖓᑕ,

¹² ᑍᕕᑎ ᑕᕝᕗᓐᖓᕐᐳᖅ ᓴᐅᓕᐅᓪᓗ ᐃᕐᓂᖓᑕᓗ ᔫᓇᑕᓂᐅᑉ ᓴᐅᓂᖏᑦ ᐂᓪᓗᒋᑦ ᔭᐲᓯ-ᒋᓖᑎᒦᑦᑐᒥᑦ. (ᑖᒃᑯᓇᓐᖓᑦ ᑎᒡᓕᒃᑕᐅᓯᒪᔪᑦ ᐃᓄᒋᐊᑐᒃᑯᕕᖕᒥᑦ ᐱᑦ-ᓵᓂᒥᑦ, ᐱᓕᔅᑍᓂᒥᐅᓂᑦ ᓂᕕᓐᖓᕐᑕᐅᓚᐅᕐᓯᒪᔪᑦ ᑍᑦᓱᒪᓂ ᐅᓪᓗᒥ ᓴᐅᓕᑯᒃ ᑐᖁᑕᐅᑎᓪᓗᒋᒃ ᖃᖅᑲᒥ ᒋᐅᓪᐳᐊᒥ.)

¹³ ᑍᕕᑎᐅᑉ ᓴᐅᓕᒃᑯᒃ ᔫᓇᑕᓂᒃᑯᒃ ᓴᐅᓂᖏᑦ ᐂᓚᐅᕐᐰᑦ; ᕿᒥᑕᐅᓚᐅᕐᑐᓪᓗ ᓴᐅᓂᖏᑦ ᑲᑎᓪᓗᒋᑦ ᓇᒃᓴᓚᐅᕆᕔᑦ.

¹⁴ ᓴᐅᓕᐅᓪᓗ ᔫᓇᑕᓂᐅᓪᓗ ᓴᐅᓂᖏᑦ ᐃᓗᕕᕐᑕᐅᓚᐅᕐᐳᑦ ᓴᐅᓕᐅᑉ ᐊᑖᑕᖓᑕ ᑭᓯᐅᑉ ᐃᓗᕕᖃᕐᕕᖓᓄᑦ, ᓄᓇᓕᖕᓂ ᔨᓚᒥ ᐱᓐᔭᒥᓂᐅᑉ ᓄᓇᖓᓂ, ᐊᖓᔪᖅᑳᕐᔪᐊᑉ ᑎᓕᓯᑦᔪᑎᒋᔭᖓᓂᒃ ᐊᑐᕐᓗᑎᒃ ᐱᓇᓱᐊᓚᐅᕐᐳᑦ. ᑕᒪᑐᒪ ᑭᖑᓂᐊᒍᑦ ᒎᑎᐅᑉ ᑐᒃᓯᐊᕐᓂᖏᓐᓂᒃ ᑭᐅᓚᐅᕐᐰᑦ ᓄᓇᖓ ᐱᓪᓗᒍ.

ᐅᓇᑕᕐᓃᑦ ᐱᓕᔅᑍᓂᒥᐅᑦ ᐃᓄᒃᐸᖏᓐᓂᒃ

¹⁵ ᐅᓇᑕᕆᐊᓪᓚᓚᐅᕆᕗᑦ ᐱᓕᔅᑍᓂᒥᐅᑦ ᐃᓴᕆᐊᓕᒥᐅᓪᓗ, ᑍᕕᑎᒃᑯᑦ ᐃᓚᖏᓪᓗ ᐅᓇᑕᕆᐊᓚᐅᕐᐳᑦ ᐱᓕᔅᑏᓂᒥᐅᓄᑦ, ᐅᓇᑕᕐᑎᓪᓗᒋᑦ ᐱᓕᔅᑍᓂᒥᐅᓂᒃ; ᑍᕕᑎᓗ ᑕᖃᓚᐅᕐᐳᖅ.

¹⁶ ᐃᓄᒃᐹᓗᒃ ᐊᑎᓕᒃ ᐃᓯᐱ-ᐱᓈᑉᒥᒃ ᕌᐸᒃᑯᑦ ᑭᖑᕚᖓᓐᓂᒥᐅᖅ, ᑲᓐᓄᔭᒥᒃ ᖃᓗᒋᐊᓕᒃ ᐅᖁᒤᓐᓂᓕᖕᒥᒃ 7ᐸᐅᓐ ᐊᕝᕙᕐᒥᒡᓗ ᓴᕕᒡᔪᐊᒥᒡᓗ ᓄᑖᒥᒃ ᐊᑐᕐᓗᓂ, ᐃᓱᒪᖃᓚᐅᕐᐳᖅ ᑐᖁᑦᓯᔪᓐᓇᕋᓱᒋᓪᓗᓂ ᑍᕕᑎᒥᒃ.

¹⁷ ᐊᐱᓮᓕ ᔨᕈᐃᐊᐅᑉ ᐃᕐᓂᖓ ᑍᕕᑎᒥᒃ ᐃᑲᔪᕆᐊᕐᐳᖅ, ᐃᓄᒃᐹᓗᒃ ᐱᓕᔅᑍᓂᒥᐅᖅ ᐅᓇᑕᓕᕐᓗᒍ ᑐᖁᓪᓗᒍᓗ. ᑕᕝᕙ ᑍᕕᑎᐅᑉ ᐃᓚᖏᑕ ᑍᕕᑎ ᐊᖏᕐᑎᓚᐅᕐᐹᑦ ᐅᓇᑕᕆᐊᒃᑲᓐᓂᖃᑦᑕᖁᔭᐅᔪᓐᓃᕐᓗᓂ ᑖᒃᑯᐊ ᐃᓚᒋᓗᒋᑦ, ᐅᖃᕐᓗᑎᒃ, “ᐃᓴᕆᐊᓕᒥᐅᓄᑦ ᓂᕆᐅᖕᓂᖃᕐᕕᒋᔭᐅᒐᕕᑦ, ᐃᓕᖕᓂᒃ ᐊᓯᐅᔨᔪᒪᓐᖏᓚᒍᑦ.”

¹⁸ ᑕᒪᑐᒪ ᑭᖑᓂᐊᒍᑦ ᐅᓇᑕᕐᓂᖃᓕᓚᐅᕆᕗᑦ ᐱᓕᔅᑍᓂᒥᐅᓂᒃ ᒑᑉᒥ, ᑍᑦᓱᒪᓂ ᓯᐱᑬ ᕼᐅᓴᑍᑎᒥᐅᑕᖅ ᑐᖁᑦᓯᓚᐅᕐᐳᖅ ᐃᓄᒃᐸᖕᒥᒃ ᓴᑉᐸᒥᒃ ᐊᑎᓕᖕᒥᒃ ᕌᐸᒃᑯᑦ ᑭᖑᕚᖏᓐᓂᒥᐅᑕᕐᒥᒃ.

¹⁹ ᐅᓇᑕᕐᓂᖃᕆᐊᓪᓚᓚᐅᕆᕗᖅ ᐱᓕᔅᑍᓂᒥᐅᓂᒃ ᒑᑉᒥ, ᐃᐅᓪᕼᐊᓇᓐᓗ ᔮᕆ-ᐅᕆᒡᒋᐅᑉ ᐃᕐᓂᖓ ᐱᑦᓕᐊᒥᐅᑕᖅ ᑐᖁᑦᓯᓚᐅᕐᐳᖅ ᒍᓔᐊᒥᒃ ᒋᑍᑎᒥᐅᑕᒥᒃ, ᑖᓐᓇ ᖃᓗᒋᐊᖃᓚᐅᕐᐳᖅ ᓄᕕᕐᓴᕐᕕᐅᑉ ᐃᑳᖓᔪᐊᑐᑦ ᓯᓕᒃᑎᒋᔪᒥᒃ.

²⁰ ᐊᓯᐊᓂ ᐅᓇᑕᕐᓂᖃᕆᐊᓪᓚᓚᐅᕆᕗᖅ ᒑᑎᒥ, ᐃᓄᒃᐸᒃᑕᖃᓚᐅᕐᐳᖅ ᐅᓇᑕᕆᐊᒃᓴᖅ ᐊᓕᐊᓁᒍᓱᒃᑐᒥᒃ 6ᓂᒃ ᐃᓗᒃᑐᑦ ᐊᒡᒐᖏᑦ ᐃᓄᒐᓐᖑᐊᖃᓚᐅᕐᐳᑦ 6ᓂᒡᓗ ᐃᑎᒐᖏᑦ ᐃᒡᓗᒃᑐᑦ ᐃᓄᒐᓐᖑᐊᖃᕆᓪᓗᑎᒃ, ᑲᑎᓪᓗᖏᑦ 24ᓂᒃ ᐃᓄᒐᓐᖑᐊᖃᕐᑐᒥᒃ; ᑖᓐᓇᑦᑕᐅᖅ ᕌᐸᒃᑯᑦ ᑭᖑᕚᖏᓐᓂᒥᐅᑕᒋᕗᖅ.

²¹ ᑖᓐᓇ ᓇᕐᕈᓇᕐᑎᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ, ᔫᓇᑕᓂᐅᓪᓗ ᓯᒥᐊᑉ ᐃᕐᓂᖓᑕ ᑐᖁᓚᐅᕐᐹ, ᑍᕕᑎᐅᑉ ᖃᑕᓐᖑᑎᖓᑕ.

²² ᑖᒃᑯᐊ ᓯᑕᒪᑦ ᐃᓄᒃᐸᖕᓄᑦ ᕌᐸᒃᑯᓐᓄᑦ ᒑᑎᒥᐅᓄᑦ ᑭᖑᕚᕆᔭᐅᓚᐅᕐᐳᑦ, ᑖᒃᑯᐊ ᑐᖁᑕᐅᓚᐅᕐᐳᑦ ᑍᕕᑎᒧᑦ ᐃᓚᒋᔭᖏᓐᓄᓪᓗ.