ᓴᒧᐃᓕ ᐂᑉᐸᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᓰᐸᐅᑉ ᐊᑭᕋᕐᑐᓕᕐᓂᖓ

¹ ᒋᐅᓪᒐᐅᓪᒦᑦᑐᖃᓚᐅᕐᐳᖅ ᐊᑎᓕᖕᒥᒃ ᓰᐸᒥᒃ, ᐱᑭᕆᐅᑉ ᐃᕐᓂᖓᓂᒃ ᑐᑭᖃᑦᓯᐊᖏᑦᑐᒥᒃ, ᐱᓐᔭᒥᓂᐅᑉ ᑭᖑᕚᖏᓐᓂᒥᐅᑕᒥᒃ; ᑎᑦᑐᓚᐅᑎᓂ ᓂᓪᓕᕐᑎᓪᓗᓂᐅᒃ ᕾᒐᓪᓛᓚᐅᕐᐳᖅ, “ᑍᕕᑎ ᑲᑕᓕᕐᓕ! ᒪᓕᑦᔮᓐᖏᓚᕗᑦ ᔨᓯᐅᑉ ᐃᕐᓂᖓ; ᐃᓴᕆᐊᓕᒥᐅᑦ ᐃᓄᖏᑦ, ᐊᖏᕐᕋᓕᕐᑕ!”

² ᑍᒤᒻᒪᑦ ᐃᓴᕆᐊᓕᒥᐅᑉ ᕿᒤᓚᐅᕐᐳᑦ ᑍᕕᑎᒥᒃ ᓰᐸᒥᒡᓗ ᐱᑭᕆᐅᑉ ᐃᕐᓂᖓᓂᒃ ᒪᓕᖔᓕᕐᓗᑎᒃ, ᔫᑕᐅᓪᓕ ᐃᓄᖏᑦ ᐱᑦᓯᐊᖏᓐᓇᓚᐅᕐᐳᑦ ᒪᓖᓐᓇᕐᓗᒍᓗ ᑍᕕᑎ ᔪᐊᕐᑕᓂᐅᑉ ᑰᖓᓂᑦ ᔨᕉᓴᓕᒧᑦ.

³ ᑍᕕᑎ ᑎᑭᓐᓇᒥ ᐃᒡᓗᒥᓄᑦ ᔨᕉᓴᓕᒧᑦ, ᓄᓕᐊᓂ ᖁᓖᑦ ᐅᑎᕐᕕᒋᓚᐅᕐᐰᑦ ᑲᒪᖁᓚᐅᕐᑕᓂ ᐃᒡᓗᒥᓂᒃ, ᖃᐅᔨᓴᕐᑎᒧᓪᓗ ᑲᒪᒋᔭᐅᑎᓕᕐᓗᒋᑦ, ᐱᔭᕆᐊᖃᕐᑕᖏᓐᓂᒃ ᑲᒪᒋᑦᓯᐊᓚᐅᕐᐰᑦ, ᑭᓯᐊᓂᓕ ᐃᓐᓇᖓᖃᑎᒋᓚᐅᓐᖏᓔᑦ. ᐱᑦᑍᓕᓕᕐᑎᓚᐅᕐᐰᑦ ᐃᓅᓯᓕᒫᖏᓐᓂ, ᐃᓅᓕᓚᐅᕐᐳᑦ ᐅᐃᒡᒐᕐᓂᑯᑎᑐᑦ.

⁴ ᐊᖓᔪᖅᑳᕐᔪᐊᖅ ᐊᒪᓴᒧᑦ ᐅᖃᕐᐳᖅ, “ᐊᖑᑏᑦ ᔫᑕᒥᐅᑦ ᑲᑎᖁᓚᐅᒃᑭᑦ ᐅᕙᓐᓄᑦ ᐅᑎᕐᓂᐊᕐᓗᑎᓪᓗ ᖃᐅᒃᐸᑦ ᐅᖓᓕᐊᒍ.”

⁵ ᑕᕝᕙ ᐊᒪᓴ ᐊᐅᓪᓚᕐᐳᖅ ᔫᑕᒧᐊᕐᓗᓂ, ᑭᓯᐊᓂᓕ ᐅᑎᓚᐅᓐᖏᓚᖅ ᐊᖓᔪᖅᑳᕐᔪᐊᑉ ᐅᑎᕐᕕᒋᖁᓚᐅᕐᑕᖓᓂ.

⁶ ᑍᒤᒻᒪᑦ ᑍᕕᑎ ᐅᖃᕐᐳᖅ ᐊᐱᓮᒧᑦ, “ᓰᐸᐅᑉ ᐱᑭᕆᐅᑉ ᐃᕐᓂᖓᑕ ᐋᑉᓴᓚᒻᒥᑦ ᐊᖏᓂᕐᓴᒥᒃ ᐊᒃᓱᕈᕐᑎᓐᓂᐊᕐᐹᑎᒍᑦ; ᐃᓄᖁᑎᒃᑲ ᐃᓚᒋᓗᒋᑦ ᒪᓕᒃᓴᓚᐅᕈᒃ, ᓄᓇᓕᖕᓂᒃ ᓴᐴᓗᑕᓕᖕᓂᒃ ᑎᒍᓯᑐᐃᓐᓇᕆᐊᖃᕐᒪᑦ ᐅᕙᑦᑎᓐᓂᒡᓗ ᕿᒪᒃᓯᓗᓂ.”

⁷ ᑕᕝᕙ ᔪᐊᐱᐅᑉ ᐃᓄᖁᑎᖏᑦ, ᐊᖓᔪᖅᑳᕐᔪᐊᓪᓗ ᓴᐳᓐᓂᐊᕐᑎᖏᑦ ᓯᕆᑍᑏᑦ ᐱᓕᑍᑏᓪᓗ, ᐅᓇᑕᕐᑐᒃᓴᓕᒫᓪᓗ ᔨᕉᓴᓕᒥᑦ ᐊᐅᓪᓚᕐᐳᑦ ᐊᐱᓮ ᐃᓚᒋᓪᓗᒍ ᒪᓕᒃᓴᕐᓗᑎᒃ ᓰᐸᒥᒃ ᐱᑭᕆᐅᑉ ᐃᕐᓂᖓᓂᒃ.

⁸ ᐅᔭᕋᓱᒡᔪᖕᒧᑦ ᒋᐱᐅᓂᒦᑦᑐᒧᑦ ᑎᑭᒻᒪᑕ, ᐊᒪᓴᐅᑉ ᐅᐸᒃᐰᑦ. ᔪᐊᐱᓕ ᐊᓐᓄᕌᕐᓯᒪᓚᐅᕐᐳᖅ ᐅᓇᑕᕐᑐᕐᓯᐅᑎᓂᒃ, ᓴᕕᒡᔪᐊᖓᓗ ᐴᕐᓯᒪᕗᖅ ᑕᑦᓯᖓᓄᑦ ᕿᓚᒃᓯᒪᓪᓗᓂ, ᐅᑯᖕᒪᓪᓕ ᓴᕕᒡᔪᐊᖓ ᑲᑕᒃᐳᖅ.

⁹ ᔪᐊᐱ ᐅᖃᕐᐳᖅ ᐊᒪᓴᒧᑦ, “ᖃᓄᐃᑉᐲᑦ, ᐱᖃᓐᓇᕆᔮᒃ?” ᐅᒥᖏᑦ ᑎᒍᕔᑦ ᑕᓕᕐᐱᖕᒥᓄᑦ ᑯᓂᒐᓱᐊᕐᓗᒍ.

¹⁰ ᐊᒪᓴᓕ ᑎᓪᓕᖏᓐᓇᒥ ᓴᕕᒡᔪᐊᒥᒃ ᔪᐊᐱᐅᑉ ᑎᒍᒥᐊᕐᑕᖓᓂᒃ ᐊᒡᒐᒥ ᐂᑉᐸᖓᓄᑦ, ᔪᐊᐱᐅᑉ ᐱᓚᒃᐹ ᓈᖓᒍᑦ, ᐃᕐᕋᕕᖏᓪᓗ ᐊᓂᕗᑦ ᒪᓂᖅᑲᒧᑦ, ᑐᖁᑦᓴᐅᑎᒋᓪᓗᓂᓗ, ᔪᐊᐱᐅᓪᓗ ᑲᐱᒃᑲᓐᓂᕆᐊᖃᓚᐅᓐᖏᓛ. ᔪᐊᐱᓗ ᓄᑲᖓᓗ ᐊᐱᓮ ᒪᓕᒃᓴᕆᐊᓪᓚᓚᐅᕐᐴᒃ ᓰᐸᒥᒃ ᐱᑭᕆᐅᑉ ᐃᕐᓂᖓᓂᒃ.

¹¹ ᔪᐊᐱᐅᑉ ᐃᓄᖁᑎᖓᑕ ᐃᓚᖓ ᓇᖏᕐᑐᖅ ᐊᒪᓴᐅᑉ ᑎᒥᖓᑕ ᓴᓂᐊᓂ ᕾᒐᓛᓚᐅᕐᐳᖅ, “ᓇᓪᓕᐊᑦ ᔪᐊᐱᒥᒃ ᓈᒻᒪᒃᓴᕐᑐᖅ, ᑍᕕᑎᒥᒡᓗ ᒪᓕᓚᐅᕐᓕ ᔪᐊᐱᒥᒃ!”

¹² ᐊᒪᓴᐅᓪᓗ ᑎᒥᖓ ᐊᐅᖏᓐᓇᐅᔪᖅ, ᓇᓚᓚᐅᕐᐳᖅ ᐊᖅᑯᑎᐅᑉ ᕿᑎᐊᓂ. ᔪᐊᐱᐅᑉ ᐃᓄᖁᑎᖏᑦ ᑕᕝᕘᓈᕐᑐᓕᒫᑦ ᓄᖅᑲᖃᑦᑕᓚᐅᕐᐳᑦ; ᐃᓚᖓᓪᓕ ᑕᑯᓕᕋᒥᒃ ᓄᖅᑲᖃᑦᑕᕐᑐᓂᒃ ᑕᕝᕗᖓ, ᑕᕝᕙ ᐊᒪᓴᐅᑉ ᑎᒥᖓ ᐅᓂᐊᓚᐅᕐᐹ ᐊᖅᑯᑎᐅᑉ ᓯᓚᑖᓄᑦ, ᐅᓕᒃᓱᓂᐅᒡᓗ ᕿᐱᖕᒧᑦ.

¹³ ᑎᒥᖓ ᓅᑕᐅᓯᒪᓕᕐᑎᓪᓗᒍ ᐊᖅᑯᑎᒥᑦ, ᐃᓄᓕᒫᑦ ᒪᓕᓕᓚᐅᕐᐳᑦ ᔪᐊᐱᒥᒃ ᒪᓕᒃᓴᕐᓗᑎᒃ ᓰᐸᒥᒃ ᐱᑭᕆᐅᑉ ᐃᕐᓂᖓᓂᒃ.

¹⁴ ᓰᐸᓗ ᐊᖅᑯᓵᓚᐅᕐᐳᖅ ᐃᓴᕆᐊᓕᐅᑉ ᑭᖑᕚᖏᑕ ᓄᓇᖁᑎᓕᒫᖏᑎᒍᑦ ᐃᒡᓗᒐᓴᖕᓄᐊᓚᐅᕆᕗᖅ ᐊᐱᐅᓪ ᐱᑦ-ᒫᑲᒧᑦ ᐱᕅᑎᒦᑦᑐᒧᑦ, ᐃᓚᓕᒫᖏᓪᓗ ᐱᑭᕆᐅᑉ ᑭᖑᕚᖏᑦ ᑲᑎᓚᐅᕐᐳᑦ ᒪᓕᒡᓗᒍᓗ ᐃᒡᓗᒐᓴᖕᓄᑦ.

¹⁵ ᔪᐊᐱᐅᓪᓗ ᐃᓚᒋᔭᓕᒫᖏᑦ ᑐᓴᕋᒥᒃ ᓰᐸᐅᑉ ᑍᑲᓃᓐᓂᖓᓂᒃ, ᑍᑯᖓ ᐂᕗᑦ ᐃᒡᓗᒐᓮᓪᓗ ᐊᐱᐅᓪ ᐱᑦ-ᒫᑲ ᐊᕙᓗᓚᐅᕐᐹᑦ, ᐃᑯᕐᕋᓕᐅᓚᐅᕐᐳᑦ ᓄᓇᒥᒃ ᐊᑭᓐᓇᐅᑉ ᓯᓚᑖᒍᑦ ᐃᑎᕐᓴᓕᐅᕐᓗᑎᒡᓗ ᐊᑭᓐᓈᓗᒃ ᐅᕐᕈᑎᓐᓇᓱᐊᕐᓗᒍ.

¹⁶ ᑕᕝᕙᓂᓕ ᐃᒡᓗᒐᓴᖕᓂ ᐊᕐᓇᒥᒃ ᓯᓚᑐᔪᖃᓚᐅᕐᐳᖅ ᐊᑭᓐᓇᒥᑦ ᕾᒐᓛᕐᑐᒥᒃ, “ᓈᓚᒋᑦᓯ! ᓈᓚᒋᑦᓯ! ᔪᐊᐱ ᕾᖁᓚᐅᕐᓯᐅᒃ ᑕᒪᐅᖓ; ᐅᖃᐅᑎᔪᒪᒐᒃᑯ.”

¹⁷ ᔪᐊᐱᓗ ᐂᕗᖅ, ᐊᕐᓇᐅᓪᓗ ᐊᐱᕆᕚ, “ᔪᐊᐱᐅᕖᑦ?” ᑭᐅᕗᖅ, “ᑖᓐᓇᐅᕗᖓ.” ᐊᕐᓇᖅ ᐅᖃᕐᐳᖅ, “ᓈᓚᓚᐅᕆᑦ ᐅᕙᓐᓂᒃ, ᐊᖓᔪᖅᑳᒃ.” ᑭᐅᕗᖅ, “ᓈᓚᒃᐳᖓ.”

¹⁸ ᐊᕐᓇᖅ ᐅᖃᕐᐳᖅ, “ᑍᑦᓱᒪᓂᐊᓗᒃ ᐅᖃᕐᑐᖃᕐᐸᓚᐅᕐᐳᖅ, ‘ᑭᐅᔭᐅᔪᒪᒍᕕᑦ ᐂᓕᕆᑦ ᐃᒡᓗᒐᓴᖕᓄᑦ ᐂᐱᓕᒧᑦ’; ᑕᕝᕙ ᑭᐅᔭᐅᑦᓯᐊᖃᑦᑕᓚᐅᕐᐳᑦ.

¹⁹ ᐃᒡᓗᒐᓴᕗᑦ ᐱᐅᔪᐊᓘᕗᖅ, ᓮᓕᑦᓯᐊᕐᓇᕐᓂᕐᐹᖑᕗᖅ ᐱᑦᓯᐊᕐᓂᕐᐹᖑᓪᓗᓂᓗ ᐃᓴᕆᐊᓕᒥᐅᓂ; ᓱᖕᒪᓪᓕ ᐊᓯᕈᕋᓱᐊᕐᐱᐅᒃ? ᓱᒃᑯᐃᔪᒪᕖᑦ ᐊᑕᓂᐅᑉ ᐱᖓᓂᒃ?”

²⁰ ᔪᐊᐱ ᑭᐅᕗᖅ, “ᑍᒤᓚᐅᕐᓯᒪᓂᐊᓐᖏᓚᖅ! ᓱᒃᑯᑎᕐᓂᐊᓐᖏᓚᕋ ᐊᓯᕈᕐᓂᐊᕐᓇᒍᓗ ᐃᒡᓗᒐᓴᖁᑎᓯ!

²¹ ᑍᒪᓐᓇ ᐱᓇᓱᐊᓐᖏᓚᒍᑦ. ᐊᖑᑦ ᓰᐸᒥᒃ ᐊᑎᓕᖕᒥᒃ ᐱᑭᕆᐅᑉ ᐃᕐᓂᖓ ᐃᕗᕅᒥᐅᑦ ᖃᖅᑲᖏᓐᓂᑦ ᐱᓯᒪᔪᖅ, ᐊᖓᔪᖅᑳᕐᔪᐊᕐᒥᒃ ᑍᕕᑎᒥᒃ ᐊᑭᕋᕐᑐᕋᓱᐊᓕᕐᑎᑦᓯᓚᐅᕐᒪᑦ; ᑖᓐᓇᑐᐊᖅ ᐊᖑᑦ ᕾᑎᓚᐅᕈᖅ, ᐃᒡᓗᒐᓴᓯᓗ ᕿᒪᖕᓂᐊᕐᐸᕗᑦ.” ᐊᕐᓇᖅ ᔪᐊᐱᒧᑦ ᐅᖃᕐᐳᖅ, “ᓂᐊᖁᐊ ᐃᒋᓐᓂᐊᕐᐸᕗᑦ ᐊᕙᓗᕐᔪᐊᑉ ᖁᓛᒍᑦ.”

²² ᑖᓐᓇ ᐊᕐᓇᖅ ᐂᓚᐅᕐᐳᖅ ᐃᒡᓗᒐᓮᑦ ᐃᓄᖏᓐᓄᑦ ᐃᓱᒪᒋᔭᒥᓂᒃ ᐅᖃᐅᑎᓪᓗᒋᑦ, ᓰᐸᐅᓪᓗ ᐱᑭᕆᐅᑉ ᐃᕐᓂᖓᑕ ᓂᐊᖁᐊ ᓇᑲᑕᐅᕗᖅ ᐃᒋᑕᐅᓪᓗᓂᓗ ᐊᕙᓗᕐᔪᐊᑉ ᖁᓛᒍᑦ ᔪᐊᐱᒧᑦ. ᑕᕝᕙ ᑎᑦᑐᓚᐅᑎᓂ ᓂᓪᓕᕐᑎᑉᐹ ᓇᓗᓁᒃᑯᑕᐅᓪᓗᓂ ᐊᐅᓪᓚᕆᐊᖃᓕᕐᓂᖏᓐᓂᒃ ᐃᒡᓗᒐᓴᖕᓂᑦ, ᐊᖏᕐᕋᒥᓄᓪᓗ ᐅᑎᕐᐳᑦ. ᔪᐊᐱᓗ ᐅᑎᓚᐅᕆᕗᖅ ᔨᕉᓴᓕᒧᑦ ᐊᖓᔪᖅᑳᕐᔪᐊᕐᒧᑦ.

ᑍᕕᑎᐅᑉ ᐊᖓᔪᖅᑳᖁᑎᖏᑦ

²³ ᔪᐊᐱ ᐊᖓᔪᖅᑳᖑᓚᐅᕐᐳᖅ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᓕᒫᖏᓐᓄᑦ; ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ ᑍᕕᑎᐅᑉ ᓴᐳᓐᓂᐊᕐᑎᖏᓐᓄᑦ ᓯᕆᑍᑎᓄᑦ ᐱᓕᑍᑎᓄᓪᓗ;

²⁴ ᐊᑐᕌᒻᓗ ᐊᖓᔪᖅᑳᖑᓚᐅᕐᐳᖅ ᐃᖅᑲᓁᔭᕐᑎᑕᐅᔪᓄᑦ; ᔨᕼᐆᓴᐸᑦᓗ ᐊᕼᐃᓗᑎᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ ᑎᑎᕋᕐᑕᐅᕙᓪᓕᐊᔪᓄᑦ;

²⁵ ᓰᕙ ᐃᖅᑲᕐᑐᐃᔨᓄᑦ ᑎᑎᕋᕐᑎᐅᓚᐅᕐᐳᖅ; ᔭᑑᒃᓗ ᐊᐰᐊᑕᓗ ᑐᓂᕐᕈᓯᕐᑎᑦᓯᔨᐅᓚᐅᕐᐴᒃ,

²⁶ ᐂᕋᓗ ᓄᓇᓕᖕᓂᑦ ᔧᕅᑎᒥᐅᓂᑦ ᐱᓯᒪᔪᖅ ᑍᕕᑎᐅᑉ ᑐᓂᕐᕈᓯᕐᑎᑦᓯᔨᒋᓚᐅᕆᕚ.