ᓴᒧᐃᓕ ᐂᑉᐸᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐊᖓᔪᖅᑳᕐᔪᐊᕈᕐᑎᑕᐅᓂᖓ ᔫᑕᒥ

¹ ᑕᒪᑐᒪ ᑭᖑᕐᖓᓂ ᑍᕕᑎᐅᑉ ᐊᑕᓂᖅ ᐊᐱᕆᕚ, “ᔫᑕᐅᑉ ᓄᓇᓕᖁᑎᖏᓐᓄᑦ ᐂᔪᒃᓴᐅᕗᖔ ᐊᐅᓚᒋᐊᕐᑐᓕᕐᓗᒋᑦ?” ᐊᑕᓂᖅ ᑭᐅᕗᖅ, “ᐂᔪᓐᓇᕐᐳᑎᑦ.” ᑍᕕᑎ ᐊᐱᕆᕗᖅ, “ᓇᓪᓕᐊᓐᓄᑦ ᓄᓇᓕᖕᓄᑦ?” ᐊᑕᓂᖅ ᐅᖃᕐᐳᖅ, “ᕼᐃᐸᕋᓐᒧᑦ.”

² ᑍᒤᒻᒪᑦ ᑍᕕᑎ ᐂᓚᐅᕐᐳᖅ ᕼᐃᑉᐸᕋᓐᒧᑦ, ᓄᓕᐊᖕᓂ ᒪᕐᕉᒃ ᐃᓚᒋᓪᓗᒋᒃ: ᐊᕼᐃᓄᐊᒻ, ᔨᔭᕆᐅᓪᒥᐅᑕᖅ, ᐊᐱᒊᓕᓗ ᓁᐳᓕᐅᑉ ᓄᓕᐊᕕᓂᖓ ᑳᕐᒥᐅᓪᒥᐅᑕᖅ.

³ ᑍᕕᑎᓗ ᐊᖑᑏᑦ ᐃᓚᒋᕙᒃᑕᒥ ᐃᓚᖏᑦ ᐃᓚᒋᓚᐅᕐᐰᑦ, ᐃᒡᓗᒥᐅᖃᑎᖏᓪᓗ ᐊᑕᖏᕐᓗᑎᒃ; ᓄᓇᑖᓚᐅᕐᐳᓪᓗ ᕼᐃᐸᕋᓐᒥ ᓄᓇᓕᖕᓂᓗ ᖃᓂᒋᔮᓃᑦᑐᓂ.

⁴ ᔫᑕᐅᓪᓗ ᐃᓄᖏᑕ ᐅᐸᒃᐹᑦ ᕼᐃᐸᕋᓐᒧᑦ, ᑕᕝᕙᓂᓗ ᑍᕕᑎ ᐅᕐᓱᕐᑎᕐᐹᑦ ᐊᖓᔪᖅᑳᕐᔪᐊᓐᖑᕐᑎᓪᓗᒍ ᔫᑕᒥᐅᓄᑦ. ᑍᕕᑎᓗ ᐅᖃᐅᑎᕚᑦ “ᔭᐲᓯ-ᒋᓖᑎᒥᐅᑦ ᐃᓗᕕᕐᓯᓚᐅᕐᐳᑦ ᓴᐅᓕᒥᒃ.”

⁵ ᑕᕝᕙ ᑍᕕᑎ ᐅᖃᕆᐊᕐᑐᕐᑎᑦᓯᕗᖅ ᔭᐲᓯ-ᒋᓖᑎᒥᐅᓄᑦ, ᐅᖃᐅᑎᓗᒋᓪᓗ: “ᐊᑕᓂᐅᑉ ᓮᒻᒪᕐᑎᓪᓕᓯ, ᐅᐱᒍᓱᑦᓯᐊᕐᓂᑦᓯᓐᓂᒃ ᐊᖓᔪᖅᑳᕐᔪᐊᑦᓯᓐᓄᑦ ᓴᐅᓕᒧᑦ ᓴᖅᑭᑎᑦᓯᒐᑦᓯ, ᑖᑦᓱᒥᖓ ᐃᓗᕕᕐᓯᓂᑦᓯᓐᓄᑦ!

⁶ ᒫᓐᓇᓕ ᐊᑕᓂᐅᑉ ᓇᒡᓕᖕᓂᕐᒥᓂᒃ ᐱᑦᓯᐊᕐᓂᕐᒥᓂᒡᓗ ᓴᖅᑭᑎᑦᓯᕕᒋᓕᓯ! ᐅᕙᖓᓗ ᐱᑦᓯᐊᕐᕕᒋᓂᐊᕐᐸᑦᓯ ᑍᒫᒃ ᐱᓂᐊᕐᓂᕆᓚᐅᕐᑕᓯ ᐱᓪᓗᒍ.

⁷ ᒫᓐᓇᓗ ᑍᒤᒻᒪᑦ ᓲᖑᔫᓕᕆᑦᓯ, ᓯᕗᕋᖏᓪᓗᓯᓗ; ᓴᐅᓕ ᐊᖓᔪᖅᑳᕐᔪᐊᓯ ᑐᖁᖕᒪᑦ, ᔫᑕᐅᓪᓗ ᐃᓄᖏᑕ ᐅᕐᓱᕐᑎᓚᐅᕐᐹᖓ ᐊᖓᔪᖅᑳᕐᔪᐊᕆᔭᐅᖁᓪᓗᖓ ᑖᒃᑯᓄᖓ.”

ᐃᔅᐳᓴᐅᑉ ᐊᖓᔪᖅᑳᕐᔪᐊᕈᕐᑎᑕᐅᓂᖓ ᐃᓴᕆᐊᓕᒥᐅᓄᑦ

⁸ ᓴᐅᓕᐅᑉ ᐅᓇᑕᕐᑐᒃᓴᖏᓐᓄᑦ ᐊᖓᔪᖅᑳᖑᔪᖅ ᐋᑉᓄ ᓂᕆᐅᑉ ᐃᕐᓂᖓ, ᓴᐅᓕᐅᑉ ᐃᕐᓂᖓᓂᒃ ᐃᔅᐳᓴᒥᒃ ᐱᖃᑎᖃᕐᓗᓂ ᐃᑳᓚᐅᕐᐴᒃ ᔪᐊᕐᑕᓂᐅᑉ ᑰᖓᓂᒃ ᒪᕼᐊᓁᒧᑦ ᐂᓪᓗᑎᒃ.

⁹ ᑍᑲᓂᓗ ᐋᑉᓅᑉ ᐃᔅᐳᓴᑦ ᐊᖓᔪᖅᑳᕐᔪᐊᕈᕐᑎᓚᐅᕐᐹ ᓄᓇᓕᖕᓄᑦ ᒋᓕᐊᑎᒧᑦ, ᐋᓱᕅᑎᒧᑦ, ᔨᔭᕆᐅᓪᒧᑦ, ᐃᕗᕅᒧᑦ, ᐱᓐᔭᒥᓂᒃᑯᓐᓄᓪᓗ, ᐊᒡᓛᑦ ᐃᓴᕆᐊᓕᒥᐅᓕᒫᓄᑦ.

¹⁰ ᐃᔅ-ᐳᓴᑦ ᓴᐅᓕᐅᑉ ᐃᕐᓂᖓ ᐊᕐᕌᒍᖃᓚᐅᕐᐳᖅ 40ᓂᒃ ᐊᖓᔪᖅᑳᕐᔪᐊᕈᕐᑎᑕᐅᑎᓪᓗᒍ ᐃᓴᕆᐊᓕᒥᐅᓄᑦ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒎᖕᓂᒃ ᒪᕐᕉᖕᓂᒃ. ᔫᑕᐅᓪᓕ ᑭᖑᕚᖏᑦ ᑍᕕᑎᒥᒃ ᒪᓕᖔᓚᐅᕐᐳᑦ.

¹¹ ᑍᕕᑎᓗ ᐊᐅᓚᑦᓯᓚᐅᕐᐳᖅ ᕼᐃᐸᕋᓐᒥ ᔫᑕᐅᑉ ᑭᖑᕚᖏᓐᓂᒃ ᐊᕐᕌᒍᓂᒃ 7ᓂᒃ ᑕᖅᑭᓂᒡᓗ ᐱᖓᓲᔪᕐᑐᓂᒃ.

ᐃᓴᕆᐊᓕᒥᐅᑦ ᔫᑕᒥᐅᓪᓗ ᐅᓇᑕᐅᑎᓂᖏᑦ

¹² ᐋᑉᓄ ᓂᕆᐅᑉ ᐃᕐᓂᖓ, ᐃᔅᐳᓴᐅᓪᓗ ᓴᐅᓕᐅᑉ ᐃᕐᓂᖓᑕ ᐊᖓᔪᖅᑳᖁᑎᖏᑦ ᒪᕼᐊᓁᒥᑦ ᒋᐱᐅᓂᒧᑦ ᐂᓚᐅᕐᐳᑦ.

¹³ ᔪᐊᐱᓗ ᐊᓈᓇᖃᕐᑐᖅ ᔨᕈᐃᐊᒥᒃ, ᑍᕕᑎᐅᓪᓗ ᐊᖓᔪᖅᑳᖁᑎᖏᑦ ᑲᑎᓯᓚᐅᕐᐳ ᑖᒃᑯᓂᖓ ᑕᓯᓕᐅᕐᓯᒪᔪᒥ ᒋᐱᐅᓂᒥ; ᑕᕝᕙᓂᓗ ᐃᒃᓯᕙᓚᐅᕐᐳᑦ, ᐊᑭᓕᕇᒃᓱᑎᒃ.

¹⁴ ᑕᕝᕙ ᐋᑉᓄ ᐅᖃᕐᐳᖅ ᔪᐊᐱᒧᑦ, “ᐅᕕᒃᑬᑦ ᐃᓚᖏᑦ ᐅᓇᑕᖃᑎᒌᓚᐅᕐᓕᑦ ᑕᑯᓐᓈᕐᑎᓪᓗᑕ ᓵᓚᒋᖃᑦᑕᐅᑎᓇᓱᐊᕐᓗᑎᒃ.” ᔪᐊᐱᓗ ᑭᐅᕗᖅ, “ᐊᑏ.”

¹⁵ ᑍᒤᒻᒪᑦ 12ᐃᑦ ᒪᑭᑉᐳᑦ, ᐃᔅᐳᓴᐅᑉ ᓴᐅᓕᐅᑉ ᐃᕐᓂᖓᑕ ᐃᓄᖁᑎᖏᓐᓂᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᔪᑦ, ᐊᒻᒪ 12ᑕᐅᖅ ᑍᕕᑎᐅᑉ ᐃᓄᖁᑎᖏᓐᓂᒃ ᐱᒋᓪᓗᑎᒃ.

¹⁶ ᑖᒃᑯᐊᓗ ᐊᑐᓂᑦ ᓂᐊᖁᕐᒥᒃᑎᒍᑦ ᑎᒍᖃᑦᑕᐅᑎᓚᐅᕐᐳᑦ, ᐊᑭᓕᕐᒥᓂᒡᓗ ᑲᐱᓯᓪᓗᑎᒃ ᓴᓂᕋᖓᒍᑦ; ᑖᒃᑯᐊᓕᒫᓪᓗ 24 ᐅᕐᕈᓚᐅᕐᐳᑦ ᐊᑕᐅᑦᓯᒃᑯᑦ ᑐᖁᓪᓗᑎᒃ. ᑍᒤᒻᒪᑦ ᑖᓐᓇ ᓄᓇ ᒋᐱᐅᓂᒦᑦᑐᖅ ᑍᔭᐅᓕᓚᐅᕐᐳᖅ ᕼᐃᓕᑲᑦ-ᕼᐊᔪᕆᒥᒃ, “ᓴᕕᒡᔪᐊᑉ ᐱᕈᕐᓰᕕᖓᓂᒃ.”

¹⁷ ᐅᓪᓗᒥᓗ ᑕᕝᕙᓂ ᐅᓇᑕᓕᓚᐅᕐᐳᑦ ᓂᓐᖓᐅᑎᖃᑦᑕᐅᑎᓯᒪᓪᓗᑎᒃ; ᐋᑉᓄᒃᑯᓪᓗ ᐃᓴᕆᐊᓕᒥᐅᑦ ᓵᓚᐅᓚᐅᕐᐳᑦ ᑍᕕᑎᐅᑉ ᐃᓄᖁᑎᖏᓐᓄᑦ.

¹⁸ ᔨᕈᐃᐊᐅᓪᓗ ᐃᕐᓂᖏᑦ ᐱᖓᓱᑦ ᑍᑲᓃᓚᐅᕐᐳᑦ ᐅᑯᐊ: ᔪᐊᐱ, ᐊᐱᓮ, ᐊᓴᕼᐃᐅᓗ. ᑖᓐᓇᓗ ᐊᓴᕼᐃᐅᓪ ᑎᐊᕐᑎᑐᑦ ᑐᒃᑐᖓᔪᑎᑐᑦ ᓱᑲᑦᑑᑎᒋᔪᓐᓇᓚᐅᕐᐳᖅ;

¹⁹ ᐊᓴᕼᐃᐅᓗ ᒪᓕᒃᓴᕐᐳᖅ ᐋᑉᓄᒥᒃ, ᑐᕌᓪᓗᐊᕐᓗᒍᓗ ᐅᓪᓛᕆᓚᐅᕐᐹ ᓴᖑᓚᐅᕋᓂ ᓴᐅᒥᒧᑦ ᑕᓕᕐᐱᒧᓪᓘᓐᓃᑦ.

²⁰ ᑕᕝᕙ ᐋᑉᓄ ᑕᑯᓴᕋᒥ ᑭᖑᒧᑦ ᐅᖃᕐᐳᖅ, “ᐃᕝᕕᐅᕖᑦ, ᐊᓴᕼᐃᐅᓪ?” ᑭᐅᕗᖅ, “ᐄ ᑖᓐᓇᐅᕗᖓ.”

²¹ ᐋᑉᓅᑉ ᐅᖃᐅᑎᕙ, “ᒪᓕᖔᓚᐅᕆᑦ ᐅᓇᑕᕐᑐᓮᑦ ᐃᓚᖓᓐᓂᒃ ᐱᖏᓐᓂᒡᓗ ᐱᓗᑎᑦ.” ᑭᓯᐊᓂᓕ ᐊᓴᕼᐃᐅᓪ ᒪᓖᓐᓇᓚᐅᕐᐳᖅ ᑖᑦᓱᒥᖓ.

²² ᐋᑉᓅᓪᓗ ᐊᓴᕼᐃᐅᓪ ᐅᖃᐅᑎᒋᐊᓪᓚᒃᐹ, “ᒪᓕᓐᖏᓚᐅᓐᖓ; ᖃᓄᐃᒻᒪᑦ ᐅᕙᓐᓄᑦ ᑐᖁᑕᐅᑎᓐᓇᓱᐊᕐᐲᑦ? ᑐᖁᑐᐊᕈᒃᑭᑦ ᐊᖓᔪᐃᑦ ᔪᐊᐱ ᑕᑯᓴᕈᓐᓇᕋᔭᖏᓐᓇᒃᑯ.”

²³ ᐊᓴᕼᐃᐅᓕ ᓄᖅᑲᓚᐅᓐᖏᓚᖅ; ᑍᒤᒻᒪᑦ ᐋᑉᓅᑉ ᖃᓗᒋᐊᒥᓄᑦ ᑲᐱᒋᐊᕋᒥᐅᒃ, ᑲᐱᓚᐅᕐᐹ ᓈᖓᒍᑦ ᐳᑐᒻᒥᑖᕐᓗᓂᐅᒃ ᖃᓗᒋᐊᖓᓗ ᑐᓄᐊᒍᑦ ᓄᐃᓪᓗᓂ; ᐊᓴᕼᐃᐅᓪᓗ ᑕᕝᕙᓂ ᐅᕐᕈᕗᖅ, ᑐᖁᓪᓗᓂᓗ. ᐊᖅᑯᓵᕐᑐᓕᒫᓗ ᐊᓴᕼᐃᐅᑉ ᐅᕐᕈᕕᖓᓄᑦ ᑐᖁᕕᖓᓄᓪᓗ, ᓄᖅᑲᖃᑦᑕᓚᐅᕐᐳᑦ.

²⁴ ᔪᐊᐱᒃᑯᒡᓕ ᐊᐱᓮᒃᑯᒃ ᒪᓕᒃᓴᓚᐅᕐᐴᒃ ᐋᑉᓄᒥᒃ; ᓯᕿᓂᖅ ᓂᐱᓕᕐᑎᓪᓗᒍ ᖃᖅᑲᒧᐊᓚᐅᕐᐳᑦ ᐊᒻᒪᒧᑦ, ᒋᐊᑉ ᓯᕗᓂᖓᓃᑦᑐᒧᑦ ᐃᓄᖃᔪᐃᑦᑐᓕᐊᖓᔫᑉ ᐊᖅᑯᑖᓃᑦᑐᒧᑦ ᒋᐱᐅᓂᒥ.

²⁵ ᐱᓐᔭᒥᓂᐅᓪᓗ ᑭᖑᕚᖏᑦ ᑕᕝᕙᓂ ᑲᑎᓚᐅᕐᐳᑦ ᐋᑉᓄᒧᑦ ᐊᑐᐃᓐᓇᐅᓕᕐᓗᑎᒃ, ᑲᑎᓐᖓᓚᐅᕐᐳᑦ ᖃᖅᑲᐅᑉ ᖄᖓᓂ.

²⁶ ᑕᕝᕙ ᐋᑉᓄ ᔪᐊᐱᒧᑦ ᐅᖃᕐᐳᖅ, “ᐅᓇᑍᓐᓇᕆᐊᖃᕐᐱᑖ ᐃᓱᖃᖏᑦᑐᒧᑦ? ᖃᐅᔨᒪᓐᖏᓚᑏᑦ ᑕᒪᑐᒪ ᑭᖑᕐᖓᓂ ᑕᒪᓐᓇ ᖃᓯᓕᓇᕐᑑᓂᐊᕐᒪᑦ? ᐃᓚᒌᒃᐳᒍᑦ ᓄᓇᖃᑎᒌᓪᓗᑕ ᖃᖓᓖ ᓄᖅᑲᕐᑎᑦᓯᓂᐊᕐᐱᑦ ᐃᓄᖁᑎᖕᓂᒃ ᐅᕙᑦᑎᓐᓂᒃ ᒪᓕᒃᑐᓂᒃ?”

²⁷ ᔪᐊᐱᓗ ᑭᐅᕗᖅ, “ᓱᓕᑦᓯᐊᕐᐳᖓ ᒎᑎ ᐆᒪᖕᒪᑦ, ᐅᖃᓚᐅᖏᒃᑯᕕᑦ, ᐃᓄᖁᑎᓐᓄᑦ ᒪᓕᒃᑕᐅᖏᓐᓇᕋᔭᓚᐅᕐᐳᑎᑦ ᐅᓪᓛᒧᑦ ᑎᑭᓪᓗᒍ.”

²⁸ ᑕᕝᕙ ᔪᐊᐱ ᑎᑦᑐᓚᐅᑎᒥᓂᒃ ᓂᓪᓕᕐᑎᑦᓯᕗᖅ; ᓄᖅᑲᖁᔨᓕᕐᓗᓂ ᒪᓕᖕᓂᖏᓐᓂᒃ ᐃᓴᕆᐊᓕᒥᐅᓂᒃ, ᐅᓇᑕᕐᓂᖓᓪᓗ ᓄᖅᑲᓚᐅᕐᐳᖅ.

²⁹ ᐋᑉᓄᒃᑯᓪᓗ ᐃᓄᖁᑎᖏᓪᓗ ᐅᓐᓄᐊᓕᒫᖅ ᐱᓱᓚᐅᕐᐳᑦ ᔪᐊᕐᑕᓂᐅᑉ ᓇᕐᓴᖓᒍᑦ ᐊᕋᐸᒃᑯᑦ; ᔪᐊᕐᑕᓂᐅᓪᓗ ᑰᖓᓂᒃ ᐃᑳᕋᒥᒃ, ᑲᔪᓯᓪᓗᑎᒃ ᐅᓪᓛᓐᖑᕐᑎᓪᓗᒍ ᒪᕼᐊᓁᒧᑦ ᑎᑭᓚᐅᕐᐳᑦ.

³⁰ ᔪᐊᐱᓗ ᒪᓕᒍᓐᓃᕋᒥ ᐋᑉᓄᒥᒃ; ᐃᓄᖁᑎᓕᒫᓂᓗ ᑲᑎᑎᓐᓇᒥᒋᑦ, ᑭᓐᖑᐃᓚᐅᕐᐳᑦ 19ᓂᒃ ᑍᕕᑎᐅᑉ ᐃᓄᖁᑎᖏᓐᓂᒃ, ᐊᓴᕼᐃᐅᓪ ᐱᖃᑕᐅᑎᓐᓇᒍ.

³¹ ᑍᕕᑎᐅᓪᓕ ᐃᓄᖁᑎᖏᑦ ᑐᖁᑦᓯᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ 360ᓂᒃ ᐋᑉᓅᑉ ᐃᓄᖁᑎᖏᓐᓂᒃ.

³² ᔪᐊᐱᐅᓪᓗ ᐃᓄᖁᑎᖏᑕ ᐊᓴᕼᐃᐅᓕᐅᑉ ᑎᒥᖓ ᑎᒍᓪᓗᒍ ᐃᓗᕕᕐᐹᑦ ᐃᓚᒌᑦ ᐃᓗᕕᖓᓄᑦ ᐱᑦᓕᐊᒥ. ᔪᐊᐱᒃᑯᓪᓗ ᐅᓐᓄᐊᓕᒫᖅ ᐱᓱᓚᐅᕐᐳᑦ, ᖃᐅᒻᒪᓕᕐᑎᓪᓗᒍᓗ ᕼᐃᐸᕋᓐᒧᑦ ᑎᑭᑉᐳᑦ.