ᓴᒧᐃᓕ ᐂᑉᐸᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᐋᑉᓴᓚᐅᑉ ᓵᓚᐅᓂᖓ ᑐᖁᑕᐅᓂᖓᓗ

¹ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᓄᖁᑎᓕᒫᓂ ᑲᑎᖁᓚᐅᕐᐰᑦ, ᐊᕕᒃᑐᓚᐅᕐᐰᓪᓗ 1,000ᓄᑦ ᐊᖓᔪᖅᑳᖑᓂᐊᕐᑐᑦ, 100ᓄᓪᓗ.

² ᑍᕕᑎᐅᓪᓗ ᐊᐅᓪᓚᕐᑎᓚᐅᕐᐰᑦ ᐱᖓᓲᓕᓪᓗᒋᑦ, ᔪᐊᐱ ᐱᖓᔪᖏᓐᓂ ᐊᖓᔪᖅᑳᖑᓚᐅᕐᐳᖅ, ᔪᐊᐱᐅᓪᓗ ᓄᑲᖓ ᐊᐱᓮ ᐱᖓᔪᖓᑦᑕ ᐃᓚᖏᓐᓂ ᐊᖓᔪᖅᑳᖑᓪᓗᓂ ᔨᕈᐃᐊᐅᑉ ᐃᕐᓂᖏᒃ, ᐃᑍᓗ ᒋᑍᑎᒥᐅᑕᖅ ᐱᖓᔪᖓᑦᑕ ᐃᓚᖏᓐᓂ ᐊᖓᔪᖅᑳᖑᓪᓗᓂ. ᐊᖓᔪᖅᑳᕐᔪᐊᓪᓗ ᐅᖃᐅᑎᕔᑦ, “ᓇᖕᒥᓂᖅ ᐊᐅᓪᓚᖃᑎᒋᓂᐊᕐᐸᑦᓯ.”

³ ᑖᒃᑯᐊ ᑭᐅᕗᑦ, “ᐅᕙᑦᑎᓐᓂᒃ ᒪᓕᒋᐊᖃᓐᖏᓚᑎᑦ, ᕿᒫᓕᕈᑦᑕ, ᐅᕙᑦᑎᓐᓂᒃ ᑲᒪᑦᔮᖏᒻᒪᑕ. ᕿᑎᖅᑲᓕᒫᕗᑦ ᑐᖁᑕᐅᒐᓗᐊᕐᐸᑕ, ᖃᓄᐃᒃᓴᑦᔮᓐᖏᓚᑦ; ᐃᕝᕕᓪᓕ 10,000ᑎᑐᑦ ᐊᑑᑎᖃᕐᐳᑎᑦ ᐅᕙᑦᑎᓐᓄᑦ; ᐱᐅᓂᕐᓴᐅᕗᖅ ᐃᒡᓗᒐᓴᖕᓃᑐᐃᓐᓇᕐᓗᑎᑦ ᐃᑲᔪᕆᐊᕐᑐᓂᒃ ᑎᓕᓯᑐᐃᓐᓇᖃᑦᑕᕈᕕᑦ.”

⁴ ᐊᖓᔪᖅᑳᕐᔪᐊᖅ ᑭᐅᕗᖅ, “ᐱᓇᓱᐊᕐᓂᐊᕐᐳᖓ ᐱᐅᓂᕐᐹᖑᓇᓱᒋᔭᑦᓯᓐᓂᒃ.” ᑍᒤᒻᒪᑦ ᐊᖓᔪᖅᑳᕐᔪᐊᖅ ᐃᑎᕐᑕᕐᕕᐅᑉ ᓴᓂᐊᓂ ᓇᖏᓚᐅᕐᐳᖅ, ᐅᓇᑕᕐᑐᒃᓴᖁᑎᖏᑦ ᓴᓂᖅᑯᑎᓪᓗᒋᑦ ᐊᕕᒃᑐᕐᓯᒪᓪᓗᑎᒃ 100ᓄᑦ 1,000ᓄᓪᓗ.

⁵ ᐊᖓᔪᖅᑳᕐᔪᐊᑉ ᑎᓕᓚᐅᕐᐰᑦ ᔪᐊᐱᒃᑯᑦ, ᐊᐱᓮᓗ, ᐃᑍᓗ: “ᐅᕙᖓ ᐱᓪᓗᖓ ᐋᓐᓂᕐᑍᓕᓯᐅᒃ ᐃᓅᓱᒃᑐᖅ ᐋᑉᓴᓚᒻ.” ᐅᓇᑕᕐᑐᒃᓴᓕᒫᓪᓗ ᑐᓴᓚᐅᕐᐳᑦ ᑍᕕᑎᐅᑉ ᑎᓕᓯᑦᔪᑎᒋᔭᖓᓂᒃ ᐊᖓᔪᖅᑳᖑᔪᓄᑦ.

⁶ ᑕᕝᕙ ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᐅᓇᑕᕆᐊᓚᐅᕐᐳᑦ ᐃᓴᕆᐊᓕᒥᐅᓂᒃ; ᐃᕗᕅᒥᐅᓪᓗ ᓇᐹᕐᑐᖏᓐᓂ ᐅᓇᑕᓕᓚᐅᕐᐳᑦ.

⁷ ᐃᓴᕆᐊᓕᒥᐅᑦ ᓵᓚᐅᓚᐅᕐᐳᖅ ᑍᕕᑎᐅᑉ ᐅᓇᑕᕐᑐᒃᓴᖏᓐᓄᑦ, ᑐᖁᑕᐅᔪᓪᓗ ᐅᓄᕐᑐᐊᓘᓚᐅᕐᐳᑦ 20,000ᓮᑦ ᐅᓪᓗᒥ ᑍᑦᓱᒪᓂ.

⁸ ᓇᐹᕐᑐᐃᑦ ᐃᒻᒧᐊᓂ ᑐᖁᔪᑦ ᐅᓄᕐᓂᕐᓴᐅᓚᐅᕐᐳᑦ; ᐅᓇᑕᕐᓂᕐᓂᑦ ᓴᕕᒡᔪᐊᒧᑦ ᑐᖁᑕᐅᔪᓂᑦ ᓇᑎᕐᓇᒦᑦᑐᓂᑦ.

⁹ ᐋᑉᓴᓚᒻᓕ ᑲᑎᓯᑲᓪᓚᓚᐅᕐᐳᖅ ᑍᕕᑎᐅᑉ ᐅᓇᑕᕐᑐᒃᓴᖏᓐᓂᒃ. ᐋᑉᓴᓚᒻ ᓯᐅᑎᖅᑯᕐᑐᔫᑉ ᕿᒻᒥᕐᔪᐊᓪᓗ ᕿᑐᕐᖓᖓᓂᒃ ᕿᒧᒃᓯᐅᑎᖃᓚᐅᕐᐳᖅ, ᓇᐹᕐᑐᓪᓗ ᑎᓴᒃᑕᐅᑉ ᐊᑖᒎᓕᕋᒥ ᓂᐊᖁᐊ ᓇᒃᑎᑉᐳᖅ ᐊᕙᓚᖓᔪᖏᓐᓄᑦ, ᕿᒧᒃᓯᐅᑎᖓ ᑲᔪᓯᑎᓪᓗᒍ ᐋᑉᓴᓚᒻ ᓂᕕᖓᔪᖅ ᕿᒪᒃᐹ.

¹⁰ ᑍᕕᑎᐅᑉ ᐅᓇᑕᕐᑎᖏᑕ ᐃᓚᖓᓐᓂᑦ ᑕᑯᔭᐅᒐᒥ ᐅᖃᐅᓯᕆᕚᑦ ᔪᐊᐱᒧᑦ, “ᑕᑯᒋᑦ, ᐋᑉᓴᓚᒻ ᑕᑯᕙᕋ ᓇᐹᕐᑐᒥ ᑎᓴᒃᑕᒥ ᓂᕕᖓᔪᖅ!”

¹¹ ᔪᐊᐱ ᑭᐅᕗᖅ, “ᑕᑯᓚᐅᕈᕕᐅᒃ, ᖃᓄᐃᒻᒪᓕ ᑐᖁᓚᐅᖏᑉᐱᐅᒃ? ᓇᖕᒥᓂᖅ ᑐᓂᓯᕕᒋᒐᔭᕐᐸᒋᑦ ᓯᐅᓪᕕᕆᓂᒃ ᖁᓕᓂᒃ ᑕᑦᓯᒥᒡᓗ.”

¹² ᑖᓐᓇᓕ ᔪᐊᐱᒧᑦ ᑭᐅᕗᖅ, “1,000ᓂᒃ ᓯᐅᓪᕕᕆᓂᒃ ᑐᓂᓂᐊᕋᓗᐊᕈᕕᖓ, ᐊᒡᒐᓐᓄᑦ ᐱᒋᐊᕋᔭᓐᖏᓚᕋ ᐊᖓᔪᖅᑳᕐᔫᐊᑉ ᐃᕐᓂᖓ; ᑐᓴᓚᐅᕋᑦᑕ ᐊᖓᔪᖅᑳᕐᔪᐊᖅ ᐅᖃᐅᑦᔨᑎᓪᓗᒍ ᐃᓕᑦᓯᓐᓂᒃ ᐊᐱᓮᒥᒃ ᐃᑍᒥᒡᓗ, ‘ᐅᕙᖓ ᐱᓪᓗᖓ ᐋᓐᓂᕐᑕᐅᑦᑍᓕᓕ ᐃᓅᓱᒃᑐᖅ ᐋᑉᓴᓚᒻ.’

¹³ ᓈᓚᖏᓪᓗᖓ ᐊᖓᔪᖅᑳᕐᔪᐊᒥᒃ ᑐᖁᓚᐅᕈᒃᑯ ᐋᑉᓴᓚᒻ, ᐊᖓᔪᖅᑳᕐᔪᐊᑉ ᑕᒪᓐᓇ ᑐᓴᕋᔭᕐᐹ, ᑐᓴᐅᒪᓐᖏᑕᖃᕈᓐᓇᖏᒻᒪᑦ ᓱᓇᓕᒫᓂᒃ ᐃᕝᕕᓪᓗ ᓴᐳᑎᒐᔭᓐᖏᓚᕐᒪ.”

¹⁴ ᔪᐊᐱ ᐅᖃᕐᐳᖅ, “ᑕᒪᐅᖓᑐᐃᓐᓈᕈᑎᒋᔪᒪᔪᓐᓁᕐᐸᒋᑦ.” ᐱᖓᓱᓂᒃ ᑲᐱᓯᒍᑎᓂᒃ ᑎᒍᓯᕗᖅ, ᐋᑉᓴᓚᒻᓗ ᑖᒃᑯᓄᖓ ᑲᐱᕚ ᓴᒡᕕᖓᒍᑦ, ᓂᕕᖓᑎᓪᓗᒍ ᓇᐹᕐᑐᒥ ᑎᓴᒃᑕᒥ, ᓱᓕᓕ ᑐᖁᓚᐅᓐᖏᓚᖅ.

¹⁵ ᑕᕝᕙ ᔪᐊᐱᐅᑉ ᓴᐳᓐᓂᐊᕐᑎᖏᑦ ᖁᓖᑦ ᐋᑉᓴᓚᒻᒧᐊᕐᓗᑎᒃ ᑲᐳᕐᐹᑦ, ᑐᖁᓪᓗᒍᓗ.

¹⁶ ᑕᕝᕙ ᔪᐊᐱᐅᑉ ᑎᑦᑐᓚᐅᑎ ᓂᓪᓕᖁᕚ ᐅᓇᑕᕐᓂᖅ ᓄᖅᑲᖁᓪᓗᒍ, ᐅᓇᑕᕐᑐᒃᓮᓪᓗ ᐅᑎᕐᐳᑦ ᒪᓕᒃᑐᕕᓃᑦ ᐃᓴᕆᐊᓕᒥᐅᓂᒃ.

¹⁷ ᐋᑉᓴᓚᐅᓪᓗ ᑎᒥᖓ ᑎᒍᕚᑦ, ᐃᒋᓪᓗᒍᓗ ᐃᑎᕐᓵᓗᖕᒧᑦ ᓇᐹᕐᑐᓕᖕᓃᑦᑐᒧᑦ, ᕿᖕᓂᕚᓪᓗ ᐅᔭᕋᒡᔪᐊᓄᑦ; ᐃᓴᕆᐊᓕᒥᐅᓕᒫᓪᓗ ᕿᒪᒃᓯᕗᑦ ᐊᖏᕐᕋᒥᖕᓄᑦ.

¹⁸ ᐋᑉᓴᓚᒻ ᐃᓅᓪᓗᓂ ᓇᓗᓁᒃᑯᑕᕐᒥᒃ ᓇᑉᐸᕐᓯᓚᐅᓯᒪᕗᖅ ᐊᖓᔪᖅᑳᕐᔪᐊᑉ ᓇᕐᓴᖁᑎᖓᓂ, ᐅᖃᕐᓗᓂ, “ᐃᕐᓂᖃᖏᓐᓇᒪ ᐊᑎᕐᒪ ᐃᖅᑲᐅᒪᔭᐅᑦᔪᑎᒃᓴᖓᓂᒃ”; ᓇᑉᐸᕐᑎᑕᓂᓗ ᐃᒻᒥᓂᒃ ᐊᑦᓯᓚᐅᕐᐹ, ᐅᓪᓗᒥᒧᑦ ᓱᓕ ᑍᔭᐅᕗᖅ ᐋᑉᓴᓚᐅᑉ ᓇᓗᓁᒃᑯᑕᖓᓂᒃ.

ᑍᕕᑎᐅᑉ ᐅᖃᐅᑦᔭᐅᓂᖓ ᐋᑉᓴᓚᐅᑉ ᑐᖁᓂᖓᓂᒃ

¹⁹ ᑕᕝᕙ ᐊᕼᐂᒫᔅ ᔭᑑᑭᐅᑉ ᐃᕐᓂᖓ ᐅᖃᕐᐳᖅ ᔪᐊᐱᒧᑦ, “ᐅᓪᓚᒡᓗᖓ ᐅᖃᕆᐊᕐᑐᓚᐅᕐᓚᖓ ᐊᖓᔪᖅᑳᕐᔪᐊᕐᒧᑦ ᑐᓴᕈᒥᓇᕐᑐᒥᒃ ᐊᑕᓂᐅᑉ ᐱᐅᓕᓚᐅᕐᒪᒍ ᐊᑭᕋᖏᓐᓂᑦ.”

²⁰ ᔪᐊᐱ ᑭᐅᕗᖅ, “ᐋᒃᑲ, ᐅᓪᓗᒥ ᑐᓴᕈᒥᓇᕐᑐᒥᒃ ᐅᖃᕐᓂᐊᓐᖏᓚᑎᑦ; ᐅᓪᓗᐃᑦ ᐊᓯᖏᓐᓂ ᐅᖃᕈᓐᓇᓛᕐᐳᑎᑦ, ᐅᓪᓗᒥᐅᖏᑦᑐᖅ ᐊᖓᔪᖅᑳᕐᔪᐊᑉ ᐃᕐᓂᖓ ᑐᖁᖕᒪᑦ.”

²¹ ᐅᖃᐅᑦᔨᕗᕐᓗ ᐃᑎᐅᐱᐊᒥᐅᑕᕐᒧᑦ ᓂᐅᕕᐊᕆᓯᒪᓪᓗᓂᐅᒃ ᐱᔨᒥᓄᑦ, “ᐂᓕᕆᑦ ᐊᖓᔪᖅᑳᕐᔪᐊᕐᒧᑦ ᑕᑯᓚᐅᕐᑕᕐᓂᒃ ᐅᖃᐅᑎᔭᕐᑐᕐᓗᒍ.” ᐱᔨᖓᓗ ᐅᑯᓚᐅᕐᓗᓂ ᔪᐊᐱᒧᑦ, ᐅᓪᓚᒃᓯᕗᖅ.

²² ᐊᕼᐂᔅᓕ ᔭᑑᑭᐅᑉ ᐃᕐᓂᖓ ᐅᖃᕆᐊᓪᓚᓚᐅᕐᐳᖅ, “ᖃᓄᐃᓕᔭᐅᓂᐊᕋᓗᐊᕈᒪ ᐅᖃᕆᐊᕐᑐᕐᑎᓚᐅᓐᖓ ᐱᔨᖕᓄᑦ ᐱᖃᑕᐅᓗᖓ ᑯᔅᒥᐅᓂᒃ ᒪᓕᖃᑕᐅᓗᖓ.” ᔪᐊᐱᐅᑉ ᐊᐱᕆᕚ, “ᓱᖕᒪᑦ ᑍᒫᒃ ᐱᓂᐊᕈᒪᕕᑦ, ᐃᕐᓃᒃ? ᐊᑭᓕᕐᑕᐅᔮᓐᖏᑦᑐᑎᑦ ᑕᒪᑐᒧᖓ.”

²³ ᐊᕼᐂᒫᔅ ᐅᖃᕆᐊᓪᓚᒃᐳᖅ, “ᖃᓄᐃᑦᑐᖃᕐᓂᐊᕋᓗᐊᕐᐸᑦ, ᐅᓪᓚᖕᓂᐊᕐᐳᖓ.” ᔪᐊᐱ ᐅᖃᕐᐳᖅ, “ᐊᑏ ᐅᓪᓚᓕᕆᑦ.” ᐊᕼᐂᒫᔅ ᐅᓪᓚᒃᓯᓚᐅᕐᐳᖅ ᔫᐊᕐᑕᓂᐅᑉ ᓇᕐᓴᖓᒍᑦ, ᐊᑯᓂᐅᖏᑦᑐᕐᓗ ᐱᔨ ᑯᔅᒥᐅᑕᖅ ᖄᖏᕐᐹ.

²⁴ ᑍᕕᑎᓕ ᐃᒃᓯᕙᓚᐅᕐᐳᖅ ᐃᒡᓗᒐᓮᑦ ᐃᑎᕐᑕᕐᕕᐊᑕ ᐃᓗᐊᑕᓗ ᐊᑯᓐᓂᖓᓂ; ᖃᐅᔨᓴᕐᑎᓕ ᐊᕙᓗᕐᔪᐊᑉ ᖄᖓᓃᑦᑐᖅ ᒪᔪᕐᓗᓂ ᐃᑎᕐᑕᕐᕕᐅᑉ ᖁᓛᓄᑦ; ᑕᑯᓴᕋᒥ ᑕᑯᕗᖅ, ᐃᓄᖕᒥᒃ ᐃᓄᑑᓪᓗᓂ ᐅᓪᓚᒃᑐᒥᒃ.

²⁵ ᐊᖓᔪᖅᑳᕐᔪᐊᕐᓗ ᐅᖃᐅᑎᕚ, ᐊᖓᔪᖅᑳᕐᔪᐊᕐᓗ ᐅᖃᕐᐳᖅ, “ᐃᓄᑑᒍᓂ, ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕐᐳᖅ.” ᖃᒡᓕᕙᓪᓕᐊᓕᕐᑎᓪᓗᒍ ᐅᓪᓚᒃᑐᖅ.

²⁶ ᖃᐅᔨᓴᕐᑎ ᑕᑯᒋᕗᖅ ᐊᓯᐊᓂᒃ ᐃᓄᑑᓪᓗᓂ ᐅᓪᓚᒃᑐᒥᒃ, ᐃᑎᕐᑕᕐᕕᖕᒥᓗ ᑲᒪᔨᒧᑦ ᐅᖃᕐᐳᖅ, “ᑕᑯᒋᑦ! ᑍᑲᑦᑕᐅᖅ ᐊᖑᑦ ᐅᓪᓚᒃᑐᖅ!” ᐊᖓᔪᖅᑳᕐᔪᐊᖅ ᑭᐅᕗᖅ, “ᑖᓐᓇᑦᑕᐅᖅ ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕆᕗᖅ.”

²⁷ ᖃᐅᔨᓴᕐᑐᕐᓗ ᐅᖃᕐᐳᖅ, “ᑖᓐᓇ ᓯᕗᓪᓕᖅ ᐅᓪᓚᐅᓯᖃᕐᐳᖅ ᐊᕼᐂᒫᔅᑐᑦ ᔭᑑᑭᐅᑉ ᐃᕐᓂᖓᑐᑦ.” ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑖᓐᓇ ᐃᓄᑦᓯᐊᕙᐅᕗᖅ, ᐅᖃᕆᐊᕐᑐᕐᑐᖅ ᑐᓴᕈᒥᓇᕐᑐᒥᒃ.”

²⁸ ᐊᕼᐂᒫᔅ ᐊᖓᔪᖅᑳᕐᔪᐊᕐᒧᑦ ᓂᓪᓕᐅᓯᕐᒥᒃ ᓂᓪᓕᕐᐳᖅ, ᐹᒻᒪᒡᓗᓂᓗ ᒪᓂᖅᑲᒧᑦ ᑖᑦᓱᒪ ᓵᖓᓄᑦ, ᐅᖃᕐᓗᓂᓗ, “ᐊᑕᓂᖅ ᒎᑏᑦ ᓂᕐᑐᕐᑕᐅᓕ, ᓵᓚᖃᕐᑎᒻᒪᑎᑦ ᐃᓄᖕᓂᑦ ᐊᑭᕋᕐᑐᕐᑐᓂᒃ ᐊᖓᔪᖅᑳᕐᔪᐊᖅ!”

²⁹ ᐊᖓᔪᖅᑳᕐᔪᐊᖅ ᐊᐱᕆᕗᖅ, “ᐃᓅᓱᒃᑐᖅ ᐋᑉᓴᓚᒻ ᖃᓄᐃᖏᒃᑲᓗᐊᕐᐹ?” ᐊᕼᐂᒫᔅ ᑭᐅᕗᖅ, “ᐊᖓᔪᖅᑳᒃ, ᔪᐊᐱᐅᑉ ᑎᓕᖕᒪᖓ ᑕᑯᓚᐅᕐᐳᖓ ᐅᐃᒪᔮᕐᑐᓂᒃ, ᖃᐅᔨᓚᐅᓐᖏᓚᖓ ᖃᓄᐃᓕᐅᕐᒪᖔᑕ.”

³⁰ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐊᕙᓂ ᓇᖏᓚᐅᕆᑦ,” ᑕᐅᕗᓐᖓᕐᓗᓂᓗ ᓇᖏᓕᕐᐳᖅ.

³¹ ᓂᐅᕕᐊᖑᓯᒪᔪᖅ ᐱᔨ ᐃᑎᐅᐱᐊᒥᐅᑕᖅ ᑎᑭᓐᓇᒥ ᐅᖃᕐᐳᖅ ᐊᖓᔪᖅᑳᕐᔪᐊᕐᒧᑦ, “ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕐᐳᖓ ᐊᖓᔪᖅᑳᕐᔪᐊᖅ! ᐅᓪᓗᒥ ᐊᑕᓂᐅᑉ ᓵᓚᖃᕐᑎᑉᐹᑎᑦ ᐊᑭᕋᕐᑐᓕᓚᐅᕐᑐᓕᒫᓂᒃ ᐃᓕᖕᓂᒃ!”

³² ᐊᖓᔪᖅᑳᕐᔪᐊᖅ ᐊᐱᕆᕗᖅ ᐃᑎᐅᐱᐊᒥᐅᑕᒧᑦ, “ᐃᓅᓱᒃᑐᖅ ᐋᑉᓴᓚᒻ ᖃᓄᐃᓐᖏᓛᖅ?” ᓂᐅᕕᐊᖑᓯᒪᔪᖅ ᐱᔨ ᑭᐅᕗᖅ, “ᑖᓐᓇᓗ ᐊᑭᕋᕐᑐᕐᑐᓕᒫᓪᓗ ᐃᓕᖕᓄᑦ ᖃᓄᐃᖏᑦᑑᖁᔪᒥᓇᕋᓗᐊᕐᐳᑦ.”

³³ ᑕᕝᕙ ᐊᖓᔪᖅᑳᕐᔪᐊᖅ ᑎᑭᑕᐅᕗᖅ ᕿᒃᓵᖕᓂᕐᔪᐊᕐᒧᑦ, ᐃᒡᓗᕈᓯᕐᒧᐊᕐᐳᕐᓗ ᐃᑎᕐᑕᕐᕕᐅᑉ ᖁᓛᓄᑦ ᕿᐊᓕᕐᓗᓂ; ᕿᐊᓪᓗᓂᓗ ᐅᖃᕐᐳᖅ, “ᐃᕐᓃᒃ! ᐃᕐᓃᒃ ᐋᑉᓴᓚᒻ! ᐋᑉᓴᓚᒻ, ᐃᕐᓃᒃ! ᑐᖁᖔᓚᐅᕈᒪᓕ ᑐᖁᓐᖏᖔᕐᑎᓪᓗᑎᑦ, ᐃᕐᓃᒃ! ᐋᑉᓴᓚᒻ, ᐃᕐᓃᒃ!”