ᓴᒧᐃᓕ ᐂᑉᐸᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᕼᐅᓮᑉ ᑕᒻᒪᕐᑎᑦᓯᓂᖓ ᐋᑉᓴᓚᒻᒥᒃ

¹ ᐊᑯᓂᐅᖏᑦᑐᖅ ᑕᒪᑐᒪ ᑭᖑᓂᐊᒍᑦ, ᐊᕼᐃᑐᐱᓕ ᐅᖃᕐᐳᖅ ᐋᑉᓴᓚᒻᒧᑦ, “ᓂᕈᐊᕐᑎᓚᐅᓐᖓ ᐊᖑᑎᓂᒃ 12,000ᓂᒃ, ᐅᓐᓄᒃ ᒪᓕᒃᓴᕆᐊᕐᓂᐊᕋᑦᑕ ᑍᕕᑎᒥᒃ.

² ᐅᓇᑕᕆᐊᕐᓂᐊᕋᒃᑯ ᑕᖃᓯᒪᓂᖓᓂ ᓴᓐᖐᓕᓯᒪᓂᖓᓂᓗ, ᐅᐃᒻᒪᒃᑎᓐᓂᐊᕋᒃᑯ; ᐃᓚᒋᔭᓕᒫᖏᓪᓗ ᕿᒪᒃᓯᑎᓪᓗᒋᑦ. ᐊᖓᔪᖅᑳᕐᔪᐊᖅ ᑖᓐᓇᑐᐊᖅ ᑐᖁᓐᓂᐊᕋᒃᑯ,

³ ᐃᓚᒋᔭᓕᒫᖏᓪᓗ ᐅᑎᕐᑎᓐᓂᐊᕐᐸᒃᑲ ᐃᓕᖕᓄᑦ ᓄᓕᐊᒃᓴᑐᑦ ᐅᐃᒃᓴᒥᓄᑦ ᐅᑎᕐᕕᐅᔪᑎᑐᑦ. ᐊᑕᐅᓯᕐᒥᒃ ᑭᓯᐊᓂ ᐃᓄᖕᒥᒃ ᑐᖁᑦᓯᔪᒪᒐᕕᑦ, ᐊᓯᖏᓪᓕ ᐊᓯᕈᕐᑕᐅᓂᐊᓐᖏᓚᑦ.”

⁴ ᑕᒪᓐᓇ ᐋᑉᓴᓚᐅᑉ ᖁᕕᐊᒋᕚ ᐃᓴᕆᐊᓕᒥᐅᓪᓗ ᐊᖓᔪᖅᑳᓕᒫᖏᑕ.

⁵ ᑕᕝᕙ ᐋᑉᓴᓚᒻ ᐅᖃᕐᐳᖅ, “ᒫᓐᓇ ᕼᐅᓮ ᐊᑬᑎᒥᐅᑕᖅ ᕾᖁᔭᐅᓕ, ᑐᓴᓚᐅᕐᑕᓕ ᖃᓄᖅ ᐅᖃᐅᓯᖃᕐᓂᐊᕐᒪᖔᑦ.”

⁶ ᕼᐅᓮ ᑎᑭᐅᑎᖕᒪᑦ, ᐋᑉᓴᓚᐅᑉ ᐅᖃᐅᑎᕚ, “ᐊᕼᐃᑐᐱᓕᐅᑉ ᐃᓱᒪᑖᕐᑎᑦᓯᒍᑎᒋᓚᐅᕐᑕᖓᓂᒃ; ᒪᓕᒃᑐᒃᓴᐅᕕᑖ? ᒪᓕᒃᑐᒃᓴᐅᖏᒃᑯᑦᑕ ᐅᖃᐅᑎᓚᐅᕐᑎᒍᑦ ᖃᓄᐃᓕᐅᕐᑐᒃᓴᐅᖕᒪᖔᑦᑕ.”

⁷ ᑕᕝᕙ ᕼᐅᓮ ᐋᑉᓴᓚᒻᒧᑦ ᑭᐅᕗᖅ, “ᐊᕼᐃᑐᐱᓕᐅᑉ ᐃᓱᒻᒥᕐᑐᐃᑦᔪᑎᒋᔭᖓ ᑕᒪᑐᒪᓂ ᐱᐅᓐᖏᓚᖅ.”

⁸ ᕼᐅᓮᓗ ᐅᖃᒃᑲᓐᓂᕐᐳᖅ, “ᖃᐅᔨᒪᕗᑎᑦ ᐊᑖᑍᑦ ᑍᕕᑎ ᐃᓚᒋᔭᖏᓪᓗ ᐅᓇᑕᒃᑲᒻᒪᕆᐊᓘᖕᒪᑕ, ᐃᕐᓯᓇᕐᑑᕗᓪᓗ ᓇᓄᕐᑐᑦ ᐊᕐᓵᕐᑕᐅᕋᑖᕐᑐᑐᑦ ᐱᐊᕋᕐᒥᓂᒃ, ᐊᑖᑍᓪᓗ ᖃᐅᔨᒪᔪᒻᒪᕆᐅᓪᓗᓂ ᐅᓇᑕᕐᓂᕐᒥᒃ; ᐅᓐᓄᒃᑯᓪᓗ ᐃᓅᖃᑎᒥᓃᖃᑦᑕᕋᓂ.

⁹ ᒫᓐᓇ ᐃᒻᒪᖄ ᐃᔨᕐᓯᒪᕗᖅ ᕾᕈᓱᖕᒥ, ᐊᓯᐊᓂᓘᓐᓃᑦ. ᑍᕕᑎᓗ ᐅᓇᑕᕆᐊᕈᓂ ᐅᓇᑕᕐᑎᖁᑎᖕᓂᒃ, ᑐᓴᕐᑐᒥᒃ ᐅᖃᕐᑐᖃᕐᓂᐊᕐᐳᖅ, ‘ᐋᑉᓴᓚᐅᑉ ᐃᓄᖁᑎᖏᑦ ᓵᓚᐅᕗᑦ.’

¹⁰ ᐊᒡᓛᑦ ᓯᕘᕋᔪᐃᑦᑐᑦ ᐊᖑᑏᑦ, ᑲᑉᐱᐊᓱᖃᖏᑦᑐᓪᓗ ᓛᔭᑎᑐᑦ, ᑲᑉᐱᐊᓱᓕᕐᓂᐊᕐᐳᑦ ᐃᓴᕆᐊᓕᒥᐅᓕᒫᑦ ᖃᐅᔨᒪᖕᒪᑕ ᐊᑖᑍᑦ ᐅᓇᑕᒃᑲᒻᒪᕆᐊᓘᖕᒪᑦ ᐅᓇᑕᕐᑐᒃᓴᖁᑎᖏᓪᓗ ᐅᓇᑕᒃᑲᒻᒪᕆᐊᓘᓪᓗᑎᒃ.

¹¹ ᐃᒤᒋᐊᖃᕐᑐᕆᕙᒋᓪᓕ ᐃᓴᕆᐊᓕᒥᐅᓕᒫᑦ ᑲᑎᑎᓪᓗᒋᑦ ᓄᓇᒋᔭᖏᓐᓂᑦ ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒋᑦ, ᓯᒡᔭᒥ ᓯᐅᕋᕐᑎᑐᑦ ᐅᓄᕐᑎᒋᔪᑦ, ᐃᕝᕕᓪᓗ ᓇᖕᒥᓂᖅ ᓯᕗᓕᕐᓗᒋᑦ ᐅᓇᑕᕆᐊᕐᓗᑎᑦ.

¹² ᓇᓂᔪᓐᓇᕐᓂᐊᕐᐸᕗᑦ ᑍᕕᑎ ᓇᓃᒐᓗᐊᕐᐸᑦ, ᐅᓇᑕᕆᐊᕐᓗᒍᓗ ᖃᐅᔨᓚᐅᖏᓐᓂᖓᓂ ᖃᓄᐃᑦᑐᖃᓕᕐᒪᖔᑦ; ᑖᓐᓇᓗ ᐃᓚᒋᔭᖏᓪᓗ ᐊᓐᓇᑦᑐᖃᕐᓂᐊᓐᖏᓚᑦ.

¹³ ᕿᒫᑐᐊᕐᐸᓪᓗ ᐃᒡᓗᒐᓴᖕᓄᑦ, ᐃᓄᖁᑎᓕᒫᕗᑦ ᐊᒃᓱᓈᒥᒃ ᓇᒃᓴᕐᓂᐊᕐᐳᑦ ᐃᒡᓗᒐᓴᖕᓄᑦ, ᑕᕝᕙᓐᖓᓪᓗ ᐃᒡᓗᒐᓴᓕᒫᖅ ᓄᓱᖕᓂᐊᕐᐸᕗᑦ ᓇᕐᓴᒧᑦ, ᐊᑕᐅᓯᕐᒥᒡᓘᓐᓃᑦ ᐅᔭᕋᖕᒥᒃ ᖃᓕᕇᒃᑐᖃᕈᓁᕐᓂᐊᕐᐳᖅ ᖃᖅᑲᐅᑉ ᖄᖓᓂ.”

¹⁴ ᐋᑉᓴᓚᒻ ᐃᓴᕆᐊᓕᒥᐅᓕᒫᓪᓗ ᐅᖃᕐᐳᑦ, “ᕼᐅᓮᑉ ᐊᑬᑎᒥᐅᑕᐅᑉ ᐃᓱᒻᒥᕐᑐᐃᑦᔪᑎᒋᔭᖓ ᐱᐅᓂᕐᓴᐅᕗᖅ ᐊᕼᐃᑐᐱᐅᑉ ᐃᓱᒻᒥᕐᓱᐃᑦᔪᑎᖏᓐᓂᑦ.” ᐊᑕᓂᖅ ᐱᒋᐊᕐᑎᑦᓯᓚᐅᕐᒪᑦ ᐊᕼᐃᑐᐱᓕᐅᑉ ᐃᓱᒻᒥᕐᑐᐃᒍᑎᒋᔭᖓ ᐱᐅᔪᐊᓗᒃ ᒪᓕᒃᑕᐅᖁᓇᒍ, ᑲᑕᖕᓇᕐᑐᒧᑦ ᑎᑭᑎᑦᓯᔪᓐᓇᖁᓪᓗᒍ ᐋᑉᓴᓚᒻᒧᑦ.

ᑍᕕᑎᐅᑉ ᐅᖃᐅᑦᔭᐅᓂᖓ ᕿᒪᒃᓯᓂᖓᓗ

¹⁵ ᑭᖑᓂᐊᒍᑦ ᕼᐅᓮᑉ ᐅᖃᐅᑎᕚᒃ ᔭᑑᒃ ᐊᐰᐊᑕᓗ ᑐᓂᕐᕈᓯᕐᑎᑦᓯᔩᒃ ᖃᓄᖅ ᐃᓱᒻᒥᕐᑐᐃᒍᑎᖃᓚᐅᕐᓂᕐᒥᓂᒃ ᐋᑉᓴᓚᒻᒧᑦ ᐃᓴᕆᐊᓕᒥᐅᓪᓗ ᐊᖓᔪᖅᑳᖏᓐᓄᑦ ᖃᓄᕐᓗ ᐊᕼᐃᑐᐱᐅᓪ ᐅᖃᓚᐅᕐᒪᖔᑦ.

¹⁶ ᕼᐅᓮ ᐅᖃᕆᐊᓪᓚᒃᐳᖅ, “ᑐᐊᕕᕐᓗᓯ ᒫᓐᓇ! ᐅᖃᕆᐊᕐᑐᕐᑎᑦᓯᓕᕆᑦᓯᒃ ᑍᕕᑎᒧᑦ ᓯᓂᒃᑕᖁᓇᒍ ᑰᑉ ᐃᑳᕐᕕᖓᓂ ᐃᓄᖃᔪᐃᑦᑐᒥ, ᐃᑳᖔᖁᓪᓗᒋᓪᓕ ᔫᐊᕐᑕᓂᐅᑉ ᑰᖓᓂᒃ ᒫᓐᓇᑦᓴᐅᑎᒋᒃᑯᑦ, ᐊᖓᔪᖅᑳᕐᔪᐊᖅ ᐃᓄᖁᑎᓕᒫᖏᓪᓗ ᐊᖑᔭᐅᖁᓇᒋᑦ ᑐᖁᑕᐅᖁᓇᒋᓪᓗ.”

¹⁷ ᐊᐱᐊᑕᐅᑉ ᐃᕐᓂᖓ ᔫᓇᑕᓂ ᔭᑑᑭᐅᓪᓗ ᐃᕐᓂᖓ ᐊᕼᐂᒫᔅ ᐅᑕᕿᓚᐅᕐᐴᒃ ᐃᓐ-ᕈᒋᓕᐅᑉ ᑰᖓᓂ, ᔨᕉᓴᓕᐅᑉ ᖃᓂᒋᔭᖓᓂ, ᑕᑯᔭᐅᔪᒪᖏᓐᓇᒥᒃ ᐃᑎᕐᑎᓪᓗᒋᒃ ᐃᒡᓗᒐᓴᖕᓄᑦ; ᐱᔨᒧᑦ ᐊᕐᓇᒧᑦ ᐅᐸᒃᑕᐅᖏᓐᓇᖃᑦᑕᓚᐅᕐᐴᒃ ᐅᖃᐅᑎᔭᐅᕙᒡᓗᑎᒡᓗ ᖃᓄᐃᑉᐸᓪᓕᐊᓕᕐᓂᖏᓐᓂᒃ, ᑖᒃᑯᐊᒃᑕᐅᖅ ᐅᖃᕆᐊᕐᑐᖃᑦᑕᓚᐅᕐᐴᒃ ᑍᕕᑎᒧᑦ.

¹⁸ ᐅᓪᓗᐃᓪᓕ ᐃᓚᖓᓐᓂ ᓄᑲᑉᐱᐊᒧᑦ ᑕᑯᔭᐅᓚᐅᕐᐴᒃ, ᐋᑉᓴᓚᒻᓗ ᐅᖃᐅᑎᓪᓗᒍ, ᑍᒤᒻᒪ ᑐᐊᕕᕐᓗᑎᒃ ᐃᔨᕆᐊᕐᑐᓚᐅᕐᐴᒃ ᐊᖑᑎᐅᑉ ᐸᕼᐅᕆᐅᑉ ᐃᒡᓗᖓᓄᑦ, ᑖᓐᓇ ᐃᒥᕐᑕᕐᕕᖃᓚᐅᕐᐳᖅ ᐃᒡᓗᖓᑕ ᖃᓂᒋᔭᖓᓂ; ᑖᒃᑯᐊᒡᓗ ᐃᓗᐊᓄᑦ ᐃᔨᓚᐅᕐᐴᒃ.

¹⁹ ᐊᖑᑎᐅᑉ ᓄᓕᐊᖓᑕ ᐃᒥᕐᑕᕐᕕᐅᑉ ᑭᓪᓚᖓ ᐅᓕᓚᐅᕐᐹ ᓂᐊᖂᔭᒃᓴᒥᒡᓗ ᑲᓐᖓᕐᓱᕐᕕᒋᓪᓗᒍ, ᖃᐅᔨᔭᐅᖁᓇᒍ.

²⁰ ᐋᑉᓴᓚᐅᑉ ᐊᖓᔪᖅᑳᖁᑎᖏᑦ ᑎᑭᓐᓇᒥᒃ ᐃᒡᓗᒧᑦ ᐊᕐᓇᒧᑦ ᐊᐱᕆᕗᑦ, “ᓇᐅᒡᓕ ᐊᕼᐂᒫᔅᑯᒃ ᔫᓇᑕᓂᒃᑯᒃ?” ᐊᕐᓇᐅᑉ ᑭᐅᕔᑦ, “ᑰᖕᒥᒃ ᐃᑳᓚᐅᕐᐴᒃ.” ᐊᖑᑏᑦ ᕿᓂᓚᐅᕐᐳᑦ ᓇᓂᓯᓇᑎᒡᓗ, ᑕᕝᕙ ᐅᑎᓚᐅᕐᐳᑦ ᔨᕉᓴᓕᒧᑦ.

²¹ ᐊᐅᓪᓚᕆᕐᒪᑕ, ᐊᕼᐂᒫᔅᑯᒃ ᔫᓇᑕᓂᒃᑯᒃ ᐊᓂᕘᒃ ᐃᒥᕐᑕᕐᕕᖕᒥᑦ, ᐊᐅᓪᓚᕐᓗᑎᒡᓗ ᐅᖃᕆᐊᕐᑐᕐᓗᑎᒃ ᑍᕕᑎᒧᑦ. ᐅᖃᐅᑎᓚᐅᕐᐹ ᐊᕼᐃᑐᐱᓕᐅᑉ ᐃᓱᒪᒋᓚᐅᕐᑕᖓᓂᒃ ᑖᓐᓇ ᐱᓪᓗᒍ ᐅᖃᐅᑎᓚᐅᕐᐹᓗ, “ᑐᐊᕕᕐᓗᑎᑦ ᐃᑳᓕᕆᑦ ᑰᖕᒥᒃ.”

²² ᑍᒤᒻᒪᑦ ᑍᕕᑎᒃᑯᑦ ᐃᓄᖁᑎᖏᓪᓗ ᐸᕐᓇᒃᑲᒥᒃ ᐃᑳᓚᐅᕐᐳᑦ ᔪᐊᕐᑕᓂᐅᑉ ᑰᖓᓂᒃ; ᖃᐅᒻᒪᓕᕐᑎᓪᓗᒍ ᐃᑳᕇᕐᑐᐃᓐᓇᐅᓚᐅᕐᐳᑦ.

²³ ᐊᕼᐃᑐᐱᓕ ᖃᐅᔨᒐᒥ ᐃᓱᒻᒥᕐᑐᐃᒍᑎᒋᔭᖓ ᒪᓕᒃᑕᐅᖏᓐᓂᖓᓂᒃ, ᓯᐅᑎᖅᑯᕐᑐᔪᖁᑎᒥᓄᑦ ᐃᑭᕗᖅ ᐅᑎᕐᓗᓂᓗ ᓄᓇᒧᑦ ᐱᕈᕐᕕᒋᓯᒪᔭᒥᓄᑦ. ᐱᓇᓱᐊᕆᐊᓕᖕᒥᓂᒡᓕ ᐊᖏᕐᕋᒥᓂ ᐱᔭᕇᕋᒥ, ᐃᒻᒥᓂᒃ ᕿᒥᑉᐳᖅ; ᑐᖁᓪᓗᓂᓗ, ᐃᓗᕕᕐᑕᐅᓚᐅᕐᐳᕐᓗ ᐃᓚᒌᑦ ᐃᓗᕕᖃᕐᕕᖓᓄᑦ.

²⁴ ᑕᕝᕙ ᑍᕕᑎ ᓄᓇᓕᖕᓄᑦ ᒪᕼᐊᓁᒧᑦ ᑎᑭᑉᐳᖅ, ᐋᑉᓴᓚᒻᑯᑦ ᐃᓴᕆᐊᓕᒥᐅᓪᓗ ᐃᑳᓕᕐᑎᓪᓗᒋᑦ ᔪᐊᕐᑕᓂᐅᑉ ᑰᖓᓂᒃ.

²⁵ ᐋᑉᓴᓚᐅᑉ ᐊᒪᓴ ᑲᒪᔨᓐᖑᕐᑎᓚᐅᕐᐹ ᐅᓇᑕᕐᑐᒃᓴᓄᑦ ᔪᐊᐱᒥᒃ ᐃᓇᖐᓪᓗᓂ. ᐋᒪᓴ ᐃᕐᓂᕆᔭᐅᓚᐅᕐᐳᖅ ᔨᑎᕆᒧᑦ ᐃᓴᕆᐊᓕᒥᐅᑕᕐᒧᑦ; ᐊᓈᓇᖓᓗ ᐊᐱᒊᓕᒥᒃ ᐊᑎᖃᕐᐳᖅ, ᓇᕼᐊᓯᐅᑉ ᐸᓂᖓ ᔨᕈᐃᐊᐅᑉ ᔪᐊᐱᐅᓪᓗ ᐊᓈᓇᖓᑕ ᓄᑲᖓ.

²⁶ ᐋᑉᓴᓚᒻᑯᑦ ᐃᓄᖁᑎᖏᓪᓗ ᑕᖕᒫᓚᐅᕐᐳᑦ ᒋᓕᐊᑎᐅᑉ ᓄᓇᖓᓂ.

²⁷ ᑍᕕᑎᓕ ᑎᑭᒻᒪᑦ ᒪᕼᐊᓁᒧᑦ, ᐅᐸᒃᑕᐅᕗᖅ ᓱᐰᒧᑦ ᓇᕼᐊᓯᐅᑉ ᐃᕐᓂᖓᓄᑦ ᐃᒡᓗᒐᓴᖕᓂᑦ ᕌᐸᒥᑦ ᐊᒧᓁᑎᒦᑦᑐᒥᑦ ᐱᔪᒥᑦ, ᒪᑬᕆᒧᓪᓗ ᐊᒥᐅᓕᐅᑉ ᐃᕐᓂᖓᓄᑦ ᓘᑎᐸᒥᑦ ᐱᔪᒥᑦ, ᐸᕐᔨᓔᒥᓪᓗ ᒋᓕᐊᑎᒥᐅᑕᒥᑦ ᕉᒋᓕᒦᑦᑐᒥᑦ,

²⁸ ᑖᒃᑯᐊ ᓇᒃᓴᕐᐳᑦ ᐊᐅᒻᒥᓯᓂᒃ, ᐴᒍᑕᕐᓂᒃ, ᐅᒃᑯᓯᖕᓂᒡᓗ ᒪᕐᕋᕕᓂᕐᓂᒃ, ᓂᕿᒃᓴᓂᒡᓗ, ᓂᐊᖂᔭᒃᓮᓪᓗ ᓄᕗᖕᒥᐅᑕᖏᓐᓂᒃ ᐹᕐᓕᓂᒃ, ᓂᕿᓂᒡᓗ, ᓂᕿᓕᐅᕐᓯᒪᔪᓂᒃ ᐊᓗᒐᒃᓴᓂᒃ, ᐲᓐᓂᓯᓂᒡᓗ ᓂᕿᒧᓪᓗ ᐃᓚᒃᓴᓂᒃ ᓕᓐᑎᓂᒃ,

²⁹ ᕼᐊᓂᓂᒡᓗ, ᓰᐱᓂᒡᓗ ᓰᓯᓂᒡᓗ, ᓂᕿᓂᒡᓗ ᐆᒪᔪᖁᑎᖏᓐᓂᑦ ᐱᔪᓂᒃ, ᑍᕕᑎᒃᑯᑦ ᐃᓚᖏᑕᓗ ᓂᕆᔭᒃᓴᖏᓐᓂᒃ; ᖃᐅᔨᒪᓚᐅᕋᒥᒃ ᑍᕕᑎᒃᑯᑦ ᐃᓚᖏᓪᓗ ᑳᒐᔭᕐᓂᖏᓐᓂᒃ ᑕᖃᓯᒪᓗᑎᒡᓗ ᐃᒥᕈᒃᑲᔭᕐᓂᖏᓐᓂᒡᓗ ᐃᓄᖃᔪᐃᑦᑐᒥᓐᖔᕐᓗᑎᒃ.