ᓴᒧᐃᓕ ᐂᑉᐸᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᐋᑉᓴᓚᐅᑉ ᐊᑭᕋᕐᑐᕋᓱᐊᕐᓂᖓ

¹ ᑕᒪᑐᒪ ᑭᖑᓂᐊᒍᑦ, ᐋᑉᓴᓚᒻ ᐃᒻᒥᓂᒃ ᕿᒧᒃᓯᐅᑎᒥᒃ ᐊᒃᓴᓗᐊᓕᒃᑖᓚᐅᕐᐳᖅ ᕿᒻᒥᕐᔪᐊᓂᒡᓗ, ᒪᓕᒃᑎᑖᕐᓗᓂᓗ ᐊᖑᑎᓂᒃ 50ᓂᒃ.

² ᐅᓪᓛᒃᑯᑦ ᒪᑭᖃᑦᑕᓚᐅᕐᐳᖅ ᐂᕙᒡᓗᓂᓗ ᐊᖅᑯᑎᐅᑉ ᓴᓂᐊᓄᑦ ᐃᒡᓗᒐᓮᑦ ᐃᑎᕐᑕᕐᕕᐊᓄᑦ ᑕᕝᕙᓂᓗ ᓇᖏᕐᐸᒡᓗᓂ; ᓇᓪᓕᐊᓪᓗ ᑕᒪᐅᓈᕋᖓᑦ ᐃᓱᐃᓪᓕᐅᕈᑎᖃᕐᓗᓂ ᐊᖓᔪᖅᑳᕐᔪᐊᒧᑦ ᐋᖅᑭᒃᑕᐅᖁᔭᒥᓂᒃ, ᐋᑉᓴᓚᐅᑉ ᕾᖁᓚᐅᕐᐹ ᓇᑭᓐᖔᕐᒪᖔᓪᓗ ᐊᐱᕆᓪᓗᒍ, ᐊᖑᑎᐅᓪᓗ ᐅᖃᐅᑎᑐᐊᕐᐸᒍ ᓇᓪᓕᐊᓐᓂᑦ ᑭᖑᕙᕇᓂᑦ ᐱᓯᒪᖕᒪᖔᑦ,

³ ᐋᑉᓴᓚᐅᑉ ᐅᖃᐅᑎᒐᔭᓚᐅᕐᐹ, “ᑕᑯᒋᑦ, ᐱᖁᔭᒧᑦ ᓴᐳᑎᔭᐅᓯᒪᕗᑎᑦ, ᑭᓯᐊᓂᓕ ᐃᑲᔪᕐᑎᖃᓐᖏᓚᑎᑦ ᐊᖓᔪᖅᑳᕐᔪᐊᒧᑦ ᑐᓴᕐᑕᐅᔪᓐᓇᕐᓗᑎᑦ.”

⁴ ᐋᑉᓴᓚᒻᓗ ᐅᖃᕆᐊᓪᓚᒃᐳᖅ, “ᖃᓄᕐᑐᖅ ᐋᖅᑭᒃᓱᐃᔨᐅᓚᐅᕐᓚᖓ! ᐃᓱᐃᓪᓕᐅᕈᑎᖃᕐᑐᖃᑐᐊᕐᐸᑦ ᐅᕙᓐᓄᑦ ᐂᒐᔭᕐᒪᑕ ᐱᔭᕆᐊᓕᖏᓐᓂᒡᓗ ᐱᑎᑦᓱᓐᓇᕋᔭᕋᒃᑭᑦ.”

⁵ ᐊᖑᒻᒧᑦ ᐋᑉᓴᓚᒻ ᐅᐸᒃᑕᐅᑐᐊᕌᖓᒥ ᐹᒻᒪᒃᑎᕐᕕᐅᓪᓗᓂ, ᐋᑉᓴᓚᐅᑉ ᐃᓴᒃᓗᓂ ᐃᕿᑉᐸᓚᐅᕐᐰᑦ, ᑯᓂᒡᓗᒋᓪᓗ.

⁶ ᐋᑉᓴᓚᒻ ᑍᒤᓕᐅᓚᐅᕐᐳᖅ ᐃᓴᕆᐊᓕᒥᐅᓕᒫᓂᒃ ᐊᖓᔪᖅᑳᕐᔪᐊᕐᒧᑦ ᐂᓇᓱᐊᕐᑐᓂᒃ ᐃᑲᔪᕐᑕᐅᔭᕐᑐᕐᓗᑎᒃ, ᑍᒤᓕᐅᕐᓂᕐᒥᓄᑦ ᐱᐅᒋᔭᐅᓕᓚᐅᕐᐳᖅ.

⁷ ᐊᕐᕌᒍᐃᑦ ᓯᑕᒪᑦ ᐊᓂᒍᕐᑎᓪᓗᒋᑦ ᐋᑉᓴᓚᒻ ᐊᖓᔪᖅᑳᕐᔪᐊᕐᒧᑦ ᑍᕕᑎᒧᑦ ᐅᖃᕐᐳᖅ, “ᐊᖓᔪᖅᑳᒃ, ᕼᐃᐸᕋᓐᒧᐊᕈᓐᓇᕐᑎᓚᐅᓐᖓ ᐊᖏᕈᑎᒋᓯᒪᔭᓐᓂᒃ ᑲᔪᓯᑎᑦᓯᓗᖓ ᑐᓂᓯᔪᓐᓇᖁᓪᓗᖓ ᐊᑕᓂᕐᒧᑦ.

⁸ ᒋᓱᕅᒦᑎᓪᓗᖓ ᓯᕆᐊᒥ, ᐊᑕᓂᕐᒧᑦ ᐊᖏᓚᐅᕋᒪ ᐅᑎᕐᑎᑐᐊᕐᐸᖓ ᔨᕉᓴᓕᒧᑦ, ᑐᒃᓯᐊᕐᕕᒋᓛᕐᓂᐊᕐᓂᕋᕐᓗᒍ ᕼᐃᐸᕋᓐᒥ.”

⁹ ᑕᕝᕙ ᐊᖓᔪᖅᑳᕐᔪᐊᑉ ᐅᖃᐅᑎᕚ, “ᐊᐅᓪᓚᓕᕆᑦ ᐃᓱᒫᓗᖏᑦᓯᐊᕐᓗᑎᑦ.” ᑕᕝᕙ ᒪᑭᓐᓇᒥ, ᐋᑉᓴᓚᒻ ᕼᐃᐸᕋᓐᒧᐊᓕᓚᐅᕐᐳᖅ.

¹⁰ ᑭᓯᐊᓂᓕ ᐃᔨᕋᕐᑐᕐᓗᓂ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᐃᓴᕆᐊᓕᒥᐅᑦ ᑭᖑᕚᓕᒫᖏᓐᓄᑦ ᐃᒫᒃ ᐅᖃᖁᓪᓗᒋᑦ, “ᑎᑦᑐᓚᐅᑎᓂᒃ ᑐᓴᑐᐊᕈᑦᓯ, ᕾᒐᓛᓛᕐᐳᓯ, ‘ᐋᑉᓴᓚᒻ ᐊᖓᔪᖅᑳᕐᔪᐊᕈᕐᐳᖅ ᕼᐃᐸᕋᓐᒥ!’”

¹¹ ᐋᑉᓴᓚᒻ ᐊᖑᑎᓂᒃ 200ᓂᒃ ᐃᓚᖃᓚᐅᕐᐳᖅ ᕾᖁᓚᐅᕐᑕᒥᓂᒃ ᔨᕉᓴᓕᒥᑦ ᐊᐅᓪᓚᓕᕐᓗᑎᒃ; ᑖᒃᑯᐊ ᐃᓚᒋᓚᐅᕐᐹᑦ ᖁᕕᐊᓱᒡᓗᑎᒃ, ᖃᐅᔨᒪᓇᑎᒃ ᐊᑭᕋᕐᑐᕋᓱᐊᕐᓂᖓᓂᒃ.

¹² ᐂᑦᑑᑎᒥᓂᒃ ᑐᓂᕐᕈᓯᕐᑎᓪᓗᒍ, ᐋᑉᓴᓚᒻ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᓄᓇᓕᖕᓄᑦ ᐃᕼᐃᑐᐱᓕᒥᐅᓄᑦ ᒋᓗᓁᑎᒦᑦᑐᒧᑦ, ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᓱᒪᓕᐅᕐᑎᖓᑕ ᐃᓚᖓᓐᓄᑦ. ᐊᖓᔪᖅᑳᕐᔪᐊᒥᒃ ᓯᖏᑦᓯᓇᓱᐊᕐᑐᑦ ᓲᖑᓯᕙᓪᓕᐊᓚᐅᕐᐳᑦ, ᐋᑉᓴᓚᐅᓪᓗ ᒪᓕᒃᑎᖏᑦ ᐅᓄᕐᓯᕙᓪᓕᐊᖏᓐᓇᓕᓚᐅᕐᐳᑦ.

ᑍᕕᑎᐅᑉ ᕿᒪᒃᓯᓂᖓ ᔨᕉᓴᓕᒥᑦ

¹³ ᐅᖃᕆᐊᕐᑐᕐᑐᒥᒃ ᑍᕕᑎᒧᐊᕐᑐᖃᕐᐳᖅ, ᐅᖃᕐᓗᓂ, “ᐃᓴᕆᐊᓕᒥᐅᑉ ᓴᖑᓕᕐᒪᑕ ᐋᑉᓴᓚᒻᒥᒃ ᒪᓕᖔᕈᒪᓪᓗᑎᒃ.”

¹⁴ ᑕᕝᕙ ᑍᕕᑎᐅᑉ ᐊᖓᔪᖅᑳᖁᑎᓕᒫᓂ ᔨᕉᓴᓕᒦᑦᑐᑦ ᐅᖃᐅᑎᕔᑦ, “ᒪᑭᓪᓗᑕ ᒫᓐᓇᑦᓴᐅᑎᒋ ᕿᒪᒃᓯᓕᕐᑕ; ᑕᒪᐅᓐᖓᑐᐊᕐᐸᑦ ᓴᐱᔭᐅᓗᑕ ᓵᓚᒋᓂᐊᕐᒪᑎᒍᑦ; ᑐᐊᕕᕐᓗᑕ! ᐋᑉᓴᓚᐅᑉ ᐱᕕᒃᓮᕈᑎᑐᐃᓐᓇᕆᐊᖃᕐᒪᑎᒍᑦ, ᐱᐅᖏᑦᑐᐊᓗᖕᒥᒡᓗ ᐅᕙᑦᑎᓐᓄᑦ ᑎᑭᑎᑦᓯᒐᔭᕐᒪᑦ ᐃᒡᓗᒐᓴᖕᒦᑦᑐᓕᒫᓪᓗ ᑐᖁᓪᓗᓂᒋᑦ!”

¹⁵ ᑖᒃᑯᐊ ᐊᖓᔪᖅᑳᖁᑎᖏᑦ ᑭᐅᕗᑦ ᐊᖓᔪᖅᑳᕐᔪᐊᕐᒧᑦ, “ᑕᑯᒋᑦ, ᐱᔨᑎᑦ ᐊᑐᐃᓐᓇᐅᕗᑦ ᖃᓄᑐᐃᓐᓇᖅ ᑐᑭᑖᑐᐊᕈᕕᑦ.”

¹⁶ ᑕᕝᕙ ᐊᖓᔪᖅᑳᕐᔪᐊᖅ ᐊᐅᓪᓚᓕᕐᐳᖅ, ᐃᒡᓗᒥᐅᖃᑎᓕᒫᓂ ᐃᓚᒋᓪᓗᒋᑦ, ᓄᓕᐊᒃᑲᓐᓂᓂᓕ ᖁᓖᑦ ᕿᒪᓚᐅᕐᐰᑦ ᐃᒡᓗᖓᓂᒃ ᑲᒪᖁᓪᓗᒋᑦ.

¹⁷ ᐊᖓᔪᖅᑳᕐᔪᐊᖅ ᐃᓄᐃᓪᓗ ᐃᓚᒋᔭᖏᑦ ᐃᒡᓗᒐᓴᖕᓂᑦ ᐊᐅᓪᓚᓕᕋᒥᒃ; ᓄᖅᑲᓚᐅᕐᐳᑦ ᐃᒡᓗᒧᑦ ᑭᖑᓪᓕᕐᐹᒧᑦ.

¹⁸ ᐊᖓᔪᖅᑳᖁᑎᖏᑦ ᓴᓂᐊᓂ ᓇᖏᕐᑎᓪᓗᒋᑦ ᓴᐳᓐᓂᐊᕐᑏᑦ ᓯᕆᑍᑏᑦ, ᐱᓕᑍᑏᓪᓗ ᓵᖓᒍᑦ ᖄᖏᓚᐅᕐᐳᑦ, ᐅᓇᑕᕐᑐᒃᓮᓪᓗ 600 ᒋᑍᑎᒥᐅᑦ ᒪᓕᒃᑐᑦ ᒑᑎᒥᑦ ᖄᖏᓚᐅᕆᕗᑦ, ᐊᖓᔪᖅᑳᕐᔪᐊᑉ ᓯᕗᕌᒍᑦ.

¹⁹ ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ ᐃᑍᒧᑦ ᒋᑍᑎᒥᐅᑕᕐᒧᑦ, “ᓱᖕᒪᑦ ᐅᕙᑦᑎᓐᓂ ᐃᓚᐅᕖᑦ? ᐅᑎᓕᕆᑦ ᐊᖓᔪᖅᑳᕐᔪᐊᓐᖑᕐᑐᖅ ᐱᖃᑎᒋᓕᕈᒃ; ᓄᓇᖃᑎᒃᓴᔭᕆᖏᓐᓇᑦᑎᒋᑦ, ᓇᖕᒥᓂᕐᓗ ᕿᒫᓯᒪᓪᓗᑎᑦ ᓄᓇᖕᓂᑦ.

²⁰ ᕿᓚᒥᐊᐱᒃ ᑕᒫᓂ ᓄᓇᖃᕐᓯᒪᒐᕕᑦ, ᓱᖕᒪᓪᓕ ᓇᒧᑐᐃᓐᓇᖅ ᐃᖏᕐᕋᖃᑎᒋᔭᕆᐊᖃᕐᐱᒌᑦ? ᖃᐅᔨᒪᖏᓐᓇᒪᓘᓐᓃᑦ ᓇᒧᑦ ᐂᖕᒪᖔᕐᒪ; ᐅᑎᓕᕆᑦ, ᐃᓅᖃᑎᑎᑦ ᐃᓚᒋᓗᒋᑦ; ᐊᑕᓂᐅᓪᓗ ᐱᑦᓯᐊᕐᕕᒋᓕᑎᑦ ᓱᖁᓯᔪᐃᑦᑑᕕᒋᓕᑎᓪᓗ.”

²¹ ᐃᑍᓕ ᑭᐅᕗᖅ, “ᐊᖓᔪᖅᑳᒃ, ᐊᑕᓂᖅ ᐃᓅᖕᒪᑦ, ᐊᑕᓂᕋᓗ ᐊᖓᔪᖅᑳᕐᔪᐊᕋ ᐃᓅᓪᓗᓂ, ᐊᖓᔪᖅᑳᕐᔪᐊᕋ ᐊᑕᓂᕋᓗ ᓇᒧᓐᖓᑐᐊᕐᐸᑦ ᒪᓖᓐᓇᐅᔭᕐᓂᐊᕐᐸᕋ, ᑐᖁᓂᐊᕋᓗᐊᕈᒪ ᐃᓅᓂᐊᕈᒪᓘᓐᓃᑦ ᓇᔪᕐᑕᖓᓃᖃᑕᐅᖏᓐᓇᕐᓂᐊᕐᐳᖓ.”

²² ᑍᕕᑎᓗ ᑭᐅᕗᖅ, “ᐊᑏ, ᑲᔪᓯᓕᕆᑦ!” ᑍᒤᒻᒪᑦ ᐃᑍ ᒋᑍᑎᒥᐅᑕᖅ ᒪᓕᒃᓴᕐᐳᖅ ᐃᓅᖃᑎᓂ ᐃᓚᓕᒫᓂᓗ ᐃᓚᒋᓪᓗᒋᑦ.

²³ ᐃᓄᓕᒫᓪᓗ ᓂᐱᖃᕐᓗᑎᒃ ᕿᐊᓚᐅᕐᐳᑦ ᑍᕕᑎᒃᑯᑦ ᐊᐅᓪᓚᓕᕐᑎᓪᓗᒋᑦ, ᐊᖓᔪᖅᑳᕐᔪᐊᕐᓗ ᐃᑳᓚᐅᕐᐳᖅ ᑭᑐᕌᓂᐅᑉ ᑰᖓᓂᒃ, ᒪᓕᒃᑕᐅᓪᓗᓂ ᐃᓄᖁᑎᓕᒫᒥᓄᑦ, ᐃᓄᖃᔪᐃᑑᓪᓗ ᓇᓛᓄᑦ ᑐᕌᓚᐅᕐᐳᑦ.

²⁴ ᐊᐰᐊᑕᓗ ᑐᓂᕐᕈᓯᕐᑎᑦᓯᔨ ᕾᓚᐅᕆᕗᖅ, ᔭᑑᒃᓗ ᐃᓚᒋᔭᐅᓪᓗᓂ, ᐃᓚᖃᕐᓗᑎᒃ ᓕᕔᑎᓂᒃ, ᐊᒡᔭᕐᓯᓪᓗᑎᒃ ᐊᖏᖃᑎᒌᒍᑏᑦ ᐃᒃᓯᕐᕕᖓᓂᒃ; ᒪᓂᖅᑲᒧᑦ ᐃᓕᓯᒪᓚᐅᕐᐹᑦ ᐃᓄᓕᒫᑦ ᐃᒡᓗᒐᓴᖕᓂᑦ ᐊᓂᔪᐃᓐᓇᐅᓚᐅᖅᑳᕐᑎᓐᓇᒋᑦ.

²⁵ ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ ᔭᑑᒃᒧᑦ, “ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᐅᑎᕐᑎᓚᐅᕈᒃ ᐃᒡᓗᒐᓴᖕᓄᑦ. ᐊᑕᓂᐅᑉ ᖁᕕᐊᒋᒍᓂᖓ, ᐅᓪᓗᐃᑦ ᐃᓚᖓᓐᓂ ᐅᑎᕐᑎᓛᕐᐹᖓ ᑕᑯᒃᑲᓐᓂᕐᓗᒍ ᐃᓂᒋᕙᒃᑕᖓᓂ.

²⁶ ᖁᕕᐊᒋᖏᒃᑯᓂᖓᓕ, ᐅᕙᓐᓄᑦ ᐱᓂᐊᕈᒪᔭᒥᓂᒃ ᐃᓱᒪᕐᓱᓕᕐᓕ.”

²⁷ ᐅᖃᕆᐊᒃᑲᓐᓂᕐᐳᖅ ᔭᑑᒃᒧᑦ, “ᑕᑯᒋᑦ, ᐃᕐᓃᑦ ᐊᕼᐂᒫᔅ ᔫᓇᑕᓂᓗ ᐊᐰᐊᑕᐅᑉ ᐃᕐᓂᖓ ᐃᓚᒋᓗᒋᒃ ᐅᑎᓕᕆᑦᓯ ᐃᒡᓗᒐᓴᖕᓄᑦ ᐃᓱᒫᓗᖏᑦᓯᐊᕐᓗᑎᑦ.

²⁸ ᐅᕙᖓᓕ, ᐅᑕᖅᑭᓂᐊᕐᐳᖓ ᑰᑉ ᐃᑳᕐᕕᖏᓐᓂ ᐃᓄᖃᔪᐃᑦᑐᒥ ᐃᓕᖕᓂᑦ ᑐᓴᓚᐅᖏᓐᓂᓐᓂ.”

²⁹ ᑍᒤᒻᒪᑦ ᔭᑑᒃᑯᒃ ᐊᐰᐊᑕᒃᑯᒃ ᐊᖏᖃᑎᒌᒍᑏᑦ ᐃᒃᓯᕐᕕᖓᓂᒃ ᑎᒍᓯᓚᐅᕐᐴᒃ ᐅᑎᕐᑎᓪᓗᒍᓗ ᔨᕉᓴᓕᒧᑦ; ᑕᕝᕙᓃᓕᕐᓗᑎᒡᓗ.

³⁰ ᑍᕕᑎᓕ ᖃᖅᑲᒧᑦ ᐅᕐᓱᒃᓴᕐᑕᓕᖕᒧᑦ ᒪᔪᐊᕐᐳᖅ, ᕿᐊᓪᓗᓂ ᐂᕙᓪᓕᐊᓚᐅᕐᐳᖅ; ᑲᒥᓪᓛᓚᐅᕐᐳᖅ ᓂᐊᖁᐊᓗ ᐅᓕᒃᓯᒪᓪᓗᓂ ᕿᒃᓵᖕᓂᕐᒧᑦ ᓇᓗᓁᒃᑯᑕᐅᓪᓗᓂ; ᒪᓕᒃᑐᓕᒫᓪᓗ ᓂᐊᖁᕐᒥᖕᓂᒃ ᐅᓕᒃᓯᓯᒪᓚᐅᕆᕗᑦ ᒪᔪᕋᕐᓗᑎᒃ ᕿᐊᒋᓪᓗᑎᒃ.

³¹ ᑍᕕᑎ ᐅᖃᐅᑦᔭᐅᒐᒥ ᐊᕼᐃᑐᐱᐅᓪ ᐃᓚᓕᐅᑎᓂᖓᓂᒃ ᐋᑉᓴᓚᐅᑉ ᐊᑭᕋᕐᑐᓕᕐᓂᖓᓄᑦ, ᑐᒃᓯᐊᓚᐅᕐᐳᖅ, “ᐊᑕᓃᖅ, ᐃᓕᖕᓄᑦ ᑐᒃᓯᐊᕐᐳᖓ, ᐊᕼᐃᑐᐱᐅᑉ ᐃᓱᒪᓕᐅᕆᓂᖓ ᑐᑭᖃᕈᓐᓃᕐᑎᓚᐅᕈᒃ!”

³² ᑍᕕᑎ ᖃᖅᑲᐅᑉ ᖄᖓᓄᐊᕋᒥ, ᑕᕝᕙᓂ ᑐᒃᓯᐊᕐᕕᐅᕙᒃᑐᒧᑦ ᒎᑎᒧᑦ, ᑕᑯᒋᑦ, ᕼᐅᓮᑉ ᐊᑬᑎᒥᐅᑕᐅᑉ ᑲᑎᕚ ᐊᓐᓄᕌᖏᑦ ᐊᓕᒃᑐᕐᓯᒪᓪᓗᑎᒃ ᓂᐊᖁᐊᓗ ᒪᕐᕋᒥᑎᕐᓯᒪᓪᓗᓂ.

³³ ᑍᕕᑎᐅᑉ ᐅᖃᐅᑎᕚ, “ᐅᕙᓐᓄᑦ ᒪᓕᒃᑯᕕᑦ ᐅᖁᒤᒃᓴᐅᑎᒋᑐᐃᓐᓇᕐᓂᐊᕐᐸᒋᑦ,

³⁴ ᐅᑎᕈᕕᓪᓕ ᐃᒡᓗᒐᓴᖕᓄᑦ, ᐋᑉᓴᓚᒻ ᐅᖃᐅᑎᓗᒍ ᐱᔨᑦᓯᕐᓂᐊᕐᓂᕋᕐᓗᒍ ᐊᑖᑕᖓᓂᒃ ᐱᔨᑦᓯᓚᐅᕐᓂᕐᑐᑦ, ᑕᕝᕙ ᓵᓚᒃᓴᐅᑎᔪᓐᓇᕐᓂᐊᕐᐸᕐᒪ ᐊᕼᐃᑐᐱᓕᐅᑉ ᐃᓱᒪᓕᐅᕈᑎᒋᔭᖏᓐᓂᒃ.

³⁵ ᑐᓂᕐᕈᓯᕐᑎᑦᓯᔩᒃ ᔭᑑᒃᓗ ᐊᐰᐊᑕᓗ ᑍᑲᓃᓐᓂᐊᕐᒥᔫᒃ; ᐅᖃᐅᑎᖃᑦᑕᕐᓂᐊᕐᐹᒃᑭᒃ ᑐᓴᕐᑕᓕᒫᕐᓂᒃ ᐊᖓᔪᖅᑳᕐᔪᐊᖃᕐᕕᖕᒥᑦ.

³⁶ ᑕᑯᒋᑦ, ᐃᕐᓂᕐᒥᖕᓂᒃ ᑕᕝᕙᓃᖃᑎᖃᕐᐴᒃ, ᐊᕼᐂᒫᔅᒥᒃ ᔭᑑᑭᐅᑉ ᐃᕐᓂᖓᓂᒃ, ᔫᓇᑕᓂᓗ ᐊᐰᐊᑕᐅᑉ ᐃᕐᓂᖓᓂᒃ, ᑖᒃᑯᐊᒃ ᐅᕙᓐᓄᑦ ᑎᓕᔪᓐᓇᕐᐹᒃᑭᒃ ᖃᐅᔨᔭᓕᒫᕐᓂᒃ ᐅᖃᐅᑎᓗᒋᒃ.”

³⁷ ᑍᒤᒻᒪᑦ ᕼᐅᓮ, ᑍᕕᑎᐅᑉ ᐱᖃᓐᓇᕆᔭᖓ, ᐅᑎᓚᐅᕐᐳᖅ ᐃᒡᓗᒐᓴᖕᓄᑦ, ᐋᑉᓴᓚᒻ ᑎᑭᓪᓗᐊᓕᕐᑎᓪᓗᒍ ᔨᕉᓴᓕᒧᑦ.