ᓴᒧᐃᓕ ᐂᑉᐸᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᔪᐊᐱᐅᑉ ᐋᖅᑭᒃᓱᐃᓂᖓ ᐋᑉᓴᓚᐅᑉ ᐅᑎᕐᓂᒃᓴᖓᓄᑦ

¹ ᔪᐊᐱ ᔨᕈᐃᐊᐅᑉ ᐃᕐᓂᖓ ᖃᐅᔨᒪᒐᒥ ᐊᖓᔪᖅᑳᕐᔪᐊᑉ ᑍᕕᑎᐅᑉ ᑭᐱᓂᐊᕐᓂᖓᓂᒃ ᐋᑉᓴᓚᒻᒧᑦ.

² ᑍᒤᒻᒪᑦ ᔪᐊᐱ ᐊᕐᓇᒥᒃ ᓯᓚᑐᔪᒻᒪᕆᖕᒥᒃ ᕾᖁᔨᓚᐅᕐᐳᖅ ᓄᓇᖃᕐᑐᒥᒃ ᑎᑯᐊᒥ. ᑎᑭᒻᒪᓪᓗ, ᐅᖃᐅᑎᕚ, “ᕿᒃᓵᓐᖑᐊᕐᓗᑎᑦ; ᐊᓐᓄᕌᓪᓗ ᕿᒃᓵᒍᑎᑎᑦ ᐊᑎᓗᒋᑦ, ᓄᔭᑎᓪᓗ ᐃᓪᓔᕐᑍᓕᓗᒋᑦ, ᐊᕐᓇᑎᑐᑦ ᐊᑯᓂᐊᓗᒃ ᑐᖁᓯᒪᔪᓄᑦ ᕿᒃᓵᒃᑐᑎᑐᑦ ᐱᓂᐊᕐᐳᑎᑦ;

³ ᐊᖓᔪᖅᑳᕐᔪᐊᕐᒧᐊᕈᕕᑦ ᐅᖃᐅᑎᓂᐊᕐᐸᑦ ᐅᖃᐅᓯᕆᖁᔭᓐᓂᒃ.” ᔪᐊᐱᐅᓪᓗ ᐅᖃᐅᑎᓚᐅᕐᐹ ᐅᖃᐅᓯᕆᖁᔭᒥᓂᒃ.

⁴ ᑕᕝᕙ ᐊᕐᓇᖅ ᑎᑯᐊᒥᐅᑕᖅ ᐊᖓᔪᖅᑳᕐᔪᐊᕐᒧᐊᕐᐳᖅ, ᒪᓂᖅᑲᒧᓪᓗ ᐅᑯᕗᖅ ᐃᒃᐱᒍᓱᑦᓯᐊᕐᓂᕐᒧᑦ, ᐅᖃᕐᓗᓂᓗ, “ᐊᖓᔪᖅᑳᕐᔪᐊᖅ, ᐃᑲᔪᓚᐅᓐᖓ.”

⁵ ᐊᖓᔪᖅᑳᕐᔪᐊᑉ ᐊᐱᕆᕚ, “ᓱᓇᒦᒃ ᐱᔪᒪᕖᑦ?” ᑭᐅᕗᖅ, “ᐅᐃᒡᒐᕐᓂᐅᕗᖓ, ᐅᐃᒐ ᑐᖁᓯᒪᖕᒪᑦ.

⁶ ᐃᕐᓂᖃᓚᐅᕋᒪ ᒪᕐᕉᖕᓂᒃ, ᐅᓪᓗᐃᑦ ᐃᓚᖓᓂ ᐂᕙᖃᑎᒌᓕᓚᐅᕐᐴᒃ ᐱᕈᕐᓰᕕᖕᒥ, ᓇᐅᒥᒡᓘᓐᓃᑦ ᓄᖅᑲᕐᑎᑦᓯᔨᒃᓴᖃᕋᑎᒃ, ᐂᑉᐸᖓᑕ ᐱᒋᐊᕋᒥᐅᒃ ᑐᖁᓚᐅᕐᐹ.

⁷ ᒫᓐᓇᓕ ᐃᓚᓕᒫᒃᑲ ᐅᕙᓐᓂᒃ ᐊᑭᕋᕐᑐᓕᕐᐳᑦ, ᐃᕐᓂᓐᓂᒡᓗ ᑐᖁᑦᓯᔪᒪᓪᓗᑎᒃ ᑐᖁᑦᓯᓂᕆᓚᐅᕐᑕᖓ ᖃᑕᓐᖑᑎᒥᓂᒃ ᐱᓪᓗᒍ; ᑍᒤᑐᐊᕐᐸᑕᓗ, ᐃᕐᓂᖃᕈᓐᓁᕐᓂᐊᕐᐳᖓ. ᐱᔪᓐᓇᐅᑎᑐᐊᕋᓗ ᓱᒃᑯᑕᐅᓂᐊᕐᐳᖅ ᐅᐃᒐᓗ ᐃᕐᓂᖃᕈᓐᓃᕐᓂᐊᕐᐳᖅ ᐊᑎᖓᓗ ᑲᔪᓯᑎᑦᓯᔨᒃᓴᖃᕈᓐᓃᕐᓗᓂ ᓄᓇᕐᔪᐊᒥ.”

⁸ ᑕᕝᕙ ᐊᖓᔪᖅᑳᕐᔪᐊᖅ ᑭᐅᕗᖅ, “ᐊᖏᕐᕋᓕᕆᑦ, ᑕᒪᓐᓇ ᑲᒪᒋᔭᐅᑎᓐᓂᐊᕐᐸᕋ ᐱᑦᔪᑎᒋᓗᑎᑦ.”

⁹ ᐊᕐᓇᖅ ᑎᑯᐊᒥᐅᑕᖅ ᐅᖃᕐᐳᖅ, “ᓱᓇᑐᐃᓐᓇᒥᒃ ᐱᓇᓱᐊᕐᓂᐊᕈᕕᑦ ᐃᓚᒃᑲ ᐸᓯᔭᒃᓴᐅᓂᐊᕐᐳᑦ, ᐊᑕᓂᕋ ᐊᖓᔪᖅᑳᕐᔪᐊᕋ; ᐃᕝᕕᑦ ᐃᓚᑎᓪᓗ ᐊᖓᔪᖅᑳᑉ ᐃᓚᖏᑦ ᐸᓯᔭᒃᓴᐅᓂᐊᓐᖏᓚᑦ ᑕᒪᑐᒧᖓ.”

¹⁰ ᐊᖓᔪᖅᑳᕐᔪᐊᖅ ᑭᐅᕗᖅ, “ᑭᓇᑐᐃᓐᓇᒧᑦ ᑲᑉᐱᐊᓵᕐᑕᐅᓐᓂᕈᕕᑦ, ᐅᕙᓐᓄᐊᕐᑎᓐᓂᐊᕐᐸᑦ, ᐸᒡᕕᓴᒃᑕᐅᑎᒃᑲᓐᓂᕐᓂᐊᓐᖏᓚᒋᑦ ᑖᑦᓱᒧᖓ.”

¹¹ ᐊᕐᓇᖅ ᐅᖃᕐᐳᖅ, “ᑐᒃᓯᐊᓚᐅᕆᑦ ᐊᑕᓂᕐᒧᑦ ᒎᑎᖕᓄᑦ, ᑍᓐᓇ ᐃᓚᒐ ᐊᑭᒋᐊᕐᑐᒃᓴᖅ ᐃᕐᓂᕐᒪ ᑐᖁᑕᐅᓚᐅᕐᓂᖓᓄᑦ ᐊᖏᓂᕐᓴᒥᒃ ᐱᓂᕐᓗᖁᓇᒍ ᐃᕐᓂᕐᒪ ᐂᑉᐸᖓᓂᒃ ᑐᖁᑦᓯᒃᐸᑦ.” ᑍᕕᑎ ᑭᐅᕗᖅ, “ᐊᑕᓂᖅ ᐃᓅᖕᒪᑦ, ᐃᕐᓂᕕᑦ ᓄᔭᖓᓂᒃ ᐊᑕᐅᓯᕐᒥᒡᓘᓐᓃᑦ ᓄᓇᒧᑦ ᑲᑕᒃᑐᖃᕐᓂᐊᓐᖏᓚᖅ.”

¹² ᐊᕐᓇᖅ ᐅᖃᕐᐳᖅ, “ᐊᑕᐅᓯᕐᒥᒃ ᓱᓕ ᐅᖃᕆᐊᓪᓚᑬᓐᓇᕐᓚᖓ ᐊᑕᓂᓐᓄᑦ ᐊᖓᔪᖅᑳᕐᔪᐊᓐᓄᑦ.” ᑖᓐᓇ ᑭᐅᕗᖅ, “ᐊᑏ ᐅᖃᓕᕆᑦ.”

¹³ ᐊᕐᓇᐅᑉ ᐅᖃᐅᑎᕚ, “ᓱᖕᒪᓪᓕ ᐃᓱᒪᖃᕐᓯᒪᕖᑦ ᓈᒻᒪᖏᑦᑐᒥᒃ ᒎᑎᐅᑉ ᐃᓄᖁᑎᖏᓐᓅᑦ? ᐃᕐᓃᑦ ᐊᖏᕐᕋᕈᓐᓁᓪᓕᑎᓯᒪᒐᕕᐅᒃ ᐊᐅᓪᓚᕐᓯᒪᕕᖓᓂᑦ, ᐃᓕᖕᓂᒃ ᐸᓯᔭᒃᓴᓐᖑᕐᑎᓯᒪᕗᑎᑦ ᐅᖃᐅᓯᕆᕋᑖᕐᑕᕐᓄᑦ.

¹⁴ ᑕᒪᑦᑕ ᑐᖁᔪᒃᓴᐅᕗᒍᑦ; ᐃᒥᕐᑐᑦ ᑍᒤᑉᐳᒍᑦ ᓄᓇᒧᑦ ᑯᕕᔭᐅᔪᑎᑐᑦ, ᑲᑎᑕᐅᓗᑎᒃ ᐅᑎᕐᑎᑕᐅᒃᑲᓐᓂᕈᓐᓁᓪᓕᔪᑎᑐᑦ; ᐊᒡᓛᑦ ᒎᑎᐅᑉ ᑐᖁᖓᔪᑦ ᐅᑎᕐᑎᖃᑦᑕᖏᒻᒪᒋᑦ, ᐊᖓᔪᖅᑳᕐᔪᐊᕐᓕ ᐃᓄᖕᒥᒃ ᐅᑎᕐᑎᑦᓯᔪᓐᓇᕐᐳᖅ ᓇᕐᕈᒋᔭᐅᓕᕐᓯᒪᔪᒥᒃ.

¹⁵ ᒫᓐᓇᓕ ᐅᖃᕆᐊᕐᑐᕐᓯᒪᕗᖓ ᑕᒪᑐᒥᖓ ᐊᑕᓂᓐᓄᑦ ᐊᖓᔪᖅᑳᕐᔪᐊᓐᓄᓪᓗ ᐃᓄᖕᓄᑦ ᓯᕘᕋᓵᕐᑕᐅᓯᒪᓂᕋ ᐱᓪᓗᒍ; ᐃᓱᒪᓚᐅᕋᒪ ᐃᓕᖕᓄᑦ ᐅᖃᕆᐊᕐᑐᕈᒪᓪᓗᖓ ᓂᕆᐅᖕᓂᖃᕐᓗᖓ ᑐᒃᓯᕋᐅᑎᓐᓂᒃ ᐱᓇᓱᐊᕈᓐᓇᕋᔭᕐᑐᕆᓪᓗᑎᑦ.

¹⁶ ᐃᓱᒪᓚᐅᕋᒪ ᓈᓚᒍᓐᓇᕋᓱᒋᓪᓗᑎᑦ ᐱᐅᓕᓯᔪᓐᓇᕋᓱᒋᓪᓗᑎᓪᓗ ᐅᕙᓐᓂᒃ ᐃᕐᓂᓐᓂᒡᓗ ᑐᖁᑦᓯᓇᓱᐊᕐᑐᒥᒃ ᓄᓇᒥᑦ ᐲᕐᓯᓇᓱᐊᕐᑐᒥᑦ ᐅᕙᑦᑎᓐᓂᒃ ᒎᑎᐅᑉ ᑐᓂᓚᐅᕐᑕᖓᓂᒃ ᐃᓄᖁᑎᒥᓄᑦ.

¹⁷ ᐃᓱᒪᓚᐅᕋᒪ, ᐊᖏᕈᑎᒋᔭᖓ ᐊᑕᓂᕐᒪ ᐊᖓᔪᖅᑳᕐᔪᐊᒪ ᐅᕙᓐᓂᒃ ᓴᐳᑦᔨᔪᓐᓇᕐᒪᑦ, ᐊᑕᓂᕋ ᐊᖓᔪᖅᑳᕐᔪᐊᕋ ᒎᑎᐅᑉ ᐂᖏᓕᖁᑎᒋᔮᕐᒪᒍ ᖃᐅᔨᔪᓐᓇᕐᑐᖅ ᐱᐅᔪᒥᒃ ᐱᐅᖏᑦᑐᒥᒡᓗ. ᐊᑕᓂᐅᑉ ᒎᑎᕕᑦ ᐃᓚᒋᓕᑎᑦ!”

¹⁸ ᑕᕝᕙ ᐊᖓᔪᖅᑳᕐᔪᐊᑉ ᐊᕐᓇᖅ ᑭᐅᕚ, “ᐊᐱᕆᓂᐊᕋᒃᑭᑦ, ᓱᓕᑦᓯᐊᕐᑐᒥᒃ ᐅᖃᕐᑐᒃᓴᐅᕗᑎᑦ.” ᐊᕐᓇᖅ ᑭᐅᕗᖅ, “ᓱᓇᑐᐃᓐᓇᕐᒥᒃ ᐊᐱᕆᓚᐅᓐᖓ, ᐊᑕᓂᕋ ᐊᖓᔪᖅᑳᕐᔪᐊᕋ.”

¹⁹ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᔪᐊᐱᐅᑉ ᑕᒪᑐᒥᖓ ᑍᒤᓕᐅᕐᑎᑉᐹᑏᑦ?” ᐊᕐᓇᖅ ᑭᐅᕗᖅ ᐅᖃᕐᓗᓂᓗ, “ᐃᓅᒐᕕᑦ, ᐊᑕᓂᕋ ᐊᖓᔪᖅᑳᕐᔪᐊᕋᓗ, ᓱᓕᑦᓯᐊᕐᐳᖓ ᐊᐱᖅᑯᑎᒋᔧᑦ ᓴᓂᖅᑯᒐᒃᓴᐅᖏᒻᒪᑦ ᑕᓕᕐᐱᒧᑦ ᓴᐅᒥᒧᓪᓘᓐᓃᑦ, ᐃᓛᒃ ᐱᔨᕕᑦ ᔪᐊᐱᐅᑉ ᑍᒤᓕᐅᕐᑎᑉᐹᖓ; ᐅᖃᐅᓯᒃᓴᓕᐅᓚᐅᕐᐹᖓᓗ.

²⁰ ᑍᒫᒃ ᔪᐊᐱ ᐱᓇᓱᐊᓚᐅᕐᐳᖅ ᑕᒪᓐᓇ ᐱᓂᐊᕐᓂᐅᔪᖅ ᐋᖅᑭᑦᓯᐊᕈᒪᓪᓗᒍ. ᐃᕝᕕᓪᓕ ᐊᖓᔪᖅᑳᕋ ᓯᓚᑐᓂᖃᕐᐳᑎᑦ ᒎᑎᐅᑉ ᐂᖏᓕᖓᑐᑦ ᖃᐅᔨᒪᓪᓗᑎᓪᓗ ᖃᓄᐃᓐᓂᓕᒫᓂᒃ.”

²¹ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᔪᐊᐱᒧᑦ ᐅᖃᕐᐳᖅ, “ᑕᑯᒋᑦ, ᑐᑭᑖᕐᓯᒪᓕᕐᐳᖓ ᐊᑐᕈᒪᔧᑦ ᐊᑐᕈᒪᓪᓗᒍ; ᐂᓕᕆᑦ ᐅᕕᒃᑲᕐᓗ ᑍᓇ ᐋᑉᓴᓚᒻ ᑕᒪᐅᖓ ᐅᑎᕐᑎᓪᓗᒍ.”

²² ᔪᐊᐱᓗ ᓄᓇᒧᑦ ᐹᒻᒪᒃᐳᖅ ᑍᕕᑎᐅᑉ ᓵᖓᓄᑦ ᐅᐱᒍᓱᖕᓂᕐᒧᑦ, ᐊᖓᔪᖅᑳᕐᔪᐊᕐᓗ ᓂᕐᑐᕐᓗᒍ; ᐅᖃᕐᐳᖅ, “ᒫᓐᓇ ᖃᐅᔨᕗᖓ ᐅᕙᓐᓂᒃ ᖁᕕᐊᒋᔭᖃᕋᕕᑦ, ᒎᑎᐅᑉ ᓮᒻᒪᕐᑎᓪᓕᑎᑦ ᐊᖓᔪᖅᑳᒃ! ᐱᔪᒪᔭᓐᓂᒃ ᐱᔪᓐᓇᕐᑎᑦᓯᒐᕕᑦ.”

²³ ᔪᐊᐱᓗ ᒪᑭᓪᓗᓂ ᒋᓱᕅᒧᑦ ᐂᕗᖅ, ᐋᑉᓴᓚᒻᓗ ᐅᑎᐅᑎᓚᐅᕐᐹ ᔨᕉᓴᓕᒧᑦ.

²⁴ ᐊᖓᔪᖅᑳᕐᔪᐊᕐᓕ, ᐅᖃᓚᐅᕐᐳᖅ, “ᓇᖕᒥᓂᖅ ᐃᓪᓗᖃᕐᑐᒃᓴᐅᕗᖅ; ᓇᔪᕐᑕᓐᓄᐊᖃᑦᑕᕆᐊᖃᓐᖏᓚᖅ.” ᑍᒤᒻᒪᑦ ᐋᑉᓴᓚᒻ ᐊᖏᕐᕋᖃᓚᐅᕐᐳᖅ ᓇᖕᒥᓂᕐᒥᓂᒃ, ᐊᖓᔪᖅᑳᕐᔪᐊᓪᓗ ᓇᔪᕐᑕᖓᓄᐊᖃᑦᑕᕋᓂ.

ᐋᑉᓴᓚᐅᑉ ᓮᒻᒪᖃᑎᖃᕐᓂᖓ ᑍᕕᑎᒥᒃ

²⁵ ᖃᐅᔨᒪᔭᐅᔪᖃᓚᐅᓐᖏᓚᖅ ᐃᓴᕆᐊᓕᒥᐅᓂ ᐋᑉᓴᓚᐅᑉ ᐃᓂᖁᓇᕐᓂᖓᑐᑦ; ᐱᐅᖏᓐᓂᖃᓚᐅᓐᖏᓚᖅ ᓂᐊᖁᐊᓂᑦ ᐱᒋᐊᕐᓗᒍ ᐃᑎᒐᖏᓐᓄᑦ ᑎᑭᓪᓗᒍ.

²⁶ ᓄᔭᖏᑦ ᐃᑦᔪᔪᐊᓘᓚᐅᕐᐳᑦ, ᐊᕐᕌᒍᑕᒫᓪᓗ ᑭᐱᔭᕆᐊᖃᖃᑦᑕᓚᐅᕐᐰᑦ, ᑕᑭᒡᓕᓗᐊᕅᖕᒪᑕ ᐅᖁᒤᓗᐊᓕᕌᖓᑕᓗ. ᐅᖁᒤᓐᓂᖃᕐᐸᓚᐅᕐᐳᑦ 5ᐸᐅᒥᒃ ᐊᖓᔪᖅᑳᕐᔪᐊᑉ ᐅᖁᒤᓐᓂᕐᓯᐅᑎᖏᑦ ᑍᑦᓱᒪᓂ ᒪᓕᒡᓗᒋᑦ.

²⁷ ᐋᑉᓴᓚᒻ ᐃᕐᓂᖃᓚᐅᕐᐳᖅ ᐱᖓᓱᓂᒃ, ᐊᑕᐅᓯᕐᒥᒡᓗ ᐸᓂᖃᕐᓗᓂ ᑕᒫᕆᒥᒃ ᐊᑎᓕᖕᒥᒃ, ᑖᓐᓇᓗ ᐃᓂᖁᓇᕐᑐᒻᒪᕆᐊᓘᓚᐅᕐᐳᖅ.

²⁸ ᐋᑉᓴᓚᒻ ᔨᕉᓴᓕᒦᓚᐅᕐᐳᖅ ᐊᕐᕌᒍᖕᓂᒃ ᒪᕐᕉᖕᓂᒃ, ᐊᖓᔪᖅᑳᕐᔪᐊᕐᒥᒃ ᑕᑯᓚᐅᕐᓯᒪᓇᓂ.

²⁹ ᑕᕝᕙ ᔪᐊᐱᒥᒃ ᕾᖁᔨᓚᐅᕐᐳᖅ, ᐊᐱᕆᔪᒪᓪᓗᒍ ᐊᖓᔪᖅᑳᕐᔪᐊᒧᐊᕈᓐᓇᕐᒪᖔᑦ; ᔪᐊᐱᓕ ᕾᔪᒪᓚᐅᓐᖏᓚᖅ. ᐋᑉᓴᓚᐅᑉ ᐂᑉᐸᖓᓂᒃ ᕾᖁᒋᐊᓪᓚᓚᐅᕐᐹ, ᔪᐊᐱᓕ ᓱᓕ ᕾᔪᒪᓚᐅᓐᖏᓚᖅ.

³⁰ ᑍᒤᒻᒪᑦ ᐋᑉᓴᓚᒻ ᐱᔨᒥᓄᑦ ᐅᖃᕐᐳᖅ, “ᑕᑯᒋᑦ, ᔪᐊᐱᐅᑉ ᐱᕈᕐᓯᕕᖁᑎᖓ ᐱᕈᕐᓰᕕᖁᑎᒪ ᓴᓂᐊᓃᑉᐳᖅ, ᓂᐊᖂᔭᒃᓴᖏᑦ ᐱᕈᓕᕐᒪᑕ; ᐂᓚᐅᕆᑦᓯ ᐃᑯᐊᓪᓚᒋᐊᕐᑐᕐᓗᒍ.” ᑍᒤᒻᒪᑦ ᐱᔨᖏᑦ ᐂᓚᐅᕐᐳᑦ ᐱᕈᕐᓰᕕᖁᑎᖓᓗ ᐃᑯᐊᓪᓚᒡᓗᒍ.

³¹ ᑕᕝᕙ ᔪᐊᐱ ᐂᕗᖅ ᐋᑉᓴᓚᐅᑉ ᐃᒡᓗᖓᓄᑦ ᐊᐱᕆᓪᓗᓂᓗ, “ᓱᖕᒪᑦ ᐱᔨᑎᑦ ᐃᑯᐊᓪᓔᒋᐊᕐᑐᓚᐅᕐᐹᑦ ᐱᕈᕐᓰᕕᖁᑎᓐᓂᒃ?”

³² ᐋᑉᓴᓚᒻ ᔪᐊᐱᒧᑦ ᑭᐅᕗᖅ, “ᕾᖁᔨᑎᓪᓗᖓ ᕾᔪᒪᓚᐅᖏᓐᓇᕕᑦ, ᐊᖓᔪᖅᑳᕐᔪᐊᒧᐊᖁᓚᐅᕋᒃᑭᑦ ᐊᐱᕆᖁᓪᓗᑎᑦ, ‘ᓱᖕᒪᑦ ᒋᓱᕅᒥᒃ ᕿᒤᓚᐅᕐᐳᖔ ᐅᕙᓐᓄᑦ ᐱᐅᓂᕐᓴᐅᒐᔭᓚᐅᕐᐳᖅ ᑍᑲᓃᖏᓐᓇᓚᐅᕈᒪ.’” ᐋᑉᓴᓚᒻ ᐅᖃᕆᐊᓪᓚᒃᐳᖅ, “ᑍᒤᒻᒪᑦ ᐋᖅᑭᒃᓱᐃᖁᕙᒋᑦ ᐊᖓᔪᖅᑳᕐᔪᐊᕐᒥᒃ ᑕᑯᔪᓐᓇᕐᓯᖁᓗᖓ, ᐸᓯᔭᒃᓴᐅᒍᒪᓗ ᐊᑏ ᑖᑦᓱᒪ ᑐᖁᓚᐅᕐᓛᖓ.”

³³ ᑕᕝᕙ ᔪᐊᐱ ᐊᖓᔪᖅᑳᕐᔪᐊᕐᒧᐊᕐᐳᖅ ᐅᖃᐅᑎᓪᓗᒍᓗ; ᐋᑉᓴᓚᐅᑉ ᐅᖃᐅᓯᕆᖁᔭᖓᓂᒃ. ᑕᕝᕙ ᐊᖓᔪᖅᑳᕐᔪᐊᖅ ᕾᖁᔨᓕᕐᐳᖅ ᐋᑉᓴᓚᒻᒥᒃ, ᑖᓐᓇ ᐊᖓᔪᖅᑳᕐᔪᐊᕐᒧᐊᕋᒥ ᓄᓇᒧᑦ ᐹᒻᒪᒃᐳᖅ ᐊᖓᔪᖅᑳᕐᔪᐊᑉ ᓯᕗᕌᓄᑦ; ᐊᖓᔪᖅᑳᕐᔪᐊᓪᓗ ᑐᓐᖓᓱᒃᑎᓪᓗᒍ ᐋᑉᓴᓚᒻ ᑯᓂᒃᐹ.