ᓴᒧᐃᓕ ᐂᑉᐸᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᓗ ᐸᓰᐸᓗ

¹ ᐊᕐᕌᒍᒥ ᑕᕝᕙᓂ ᐅᐱᕐᖓᕐᑎᓪᓗᒍ, ᐊᖓᔪᖅᑳᕐᔪᐊᑦ ᐅᓇᑕᕆᐊᖃᑦᑕᕐᑎᓪᓗᒋᑦ, ᑍᕕᑎᐅᑉ ᔪᐊᐱ ᑎᓕᓚᐅᕐᐹ ᐊᖓᔪᖅᑳᖁᑎᖏᓪᓗ, ᐃᓴᕆᐊᓕᒥᐅᓪᓗ ᐅᓇᑕᕐᑐᒃᓴᖏᑦ; ᐊᒧᓁᑎᒥᐅᓪᓗ ᓵᓚᒋᓚᐅᕐᐰᑦ, ᕌᐸᐅᓪᓗ ᐃᒡᓗᒐᓴᖏᑦ ᑎᒍᓪᓗᒋᑦ. ᑍᕕᑎᓕ ᔨᕉᓴᓕᒦᖏᓐᓇᓚᐅᕐᐳᖅ.

² ᐅᓪᓗᐃᑦ ᐃᓚᖓᓐᓂ, ᐅᓐᓄᓴᓕᕐᑎᓪᓗᒍ, ᑍᕕᑎ ᓯᓂᒃᑐᕕᓂᐅᓪᓗᓂ ᒪᑭᓚᐅᕐᐳᖅ ᐃᒡᓗᖓᑕᓗ ᖁᓛᓄᑦ ᐊᓃᕋᔮᕐᕕᖓᓄᐊᓚᐅᕐᐳᖅ, ᐊᕐᓇᒥᒡᓗ ᑕᑯᕗᖅ ᐃᒡᓗᒥᓂ ᐅᕕᓂᖕᓂᐊᕐᑐᒥᒃ; ᐊᕐᓇᕐᓗ ᑖᓐᓇ ᐃᓂᖁᓇᕐᑐᒻᒪᕆᐅᕗᖅ.

³ ᑕᕝᕙ ᑍᕕᑎ ᑎᓕᓯᕗᖅ ᐊᕐᓇᖅ ᑭᓇᐅᖕᒪᖔᑦ ᑲᐅᔨᔭᕐᑐᕐᑐᒥᒃ, ᖃᐅᔨᕗᕐᓗ ᐹᓯᐸᐅᓂᖓᓂᒃ, ᐃᓕᐊᒻ ᐸᓂᖓ, ᔪᕅᐊᐅᑉ ᓄᓕᐊᖓ ᕼᐃᑍᑎᒥᐅᑕᐅᑉ.

⁴ ᑍᕕᑎᓗ ᐅᖃᕆᐊᕐᑐᕐᑎᑦᓯᕗᖅ ᐱᔪᒪᓪᓗᓂᐅᒃ; ᑖᓐᓇᓗ ᑕᕝᕗᓐᖓᕐᐳᖅ, ᐃᓐᓇᖓᖃᑎᒋᕚᓗ. (ᑕᖅᑭᑕᒫᕐᓯᐅᑎᒥᓂᒃ ᓴᓗᒻᒪᕋᑖᕐᑎᓪᓗᒍ.) ᑭᖑᓂᖓᒍᓪᓗ ᐊᖏᕐᕋᒥᓄᑦ ᐅᑎᕐᐳᖅ.

⁵ ᑭᖑᓂᐊᒍᑦ ᖃᐅᔨᓕᕐᐳᖅ ᓄᑕᕋᒃᓴᖃᓕᕐᓂᕐᒥᓂᒃ; ᐅᖃᕆᐊᕐᑐᕐᑎᑦᓯᕗᕐᓗ ᑍᕕᑎᒧᑦ.

⁶ ᑕᕝᕙ ᑍᕕᑎ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᒥᒃ ᔪᐊᐱᒧᑦ, “ᔪᕅᐊ ᕾᖁᓚᐅᕈᒃ ᕼᐃᑍᑎᒥᐅᖅ.” ᔪᐊᐱᐅᓪᓗ ᑍᕕᑎᒧᐊᕐᑎᑉᐹ.

⁷ ᔪᕅᐊ ᑎᑭᒻᒪᑦ, ᑍᕕᑎᐅᑉ ᐊᐱᕆᕚ ᔪᐊᐱᒃᑯᑦ ᐅᓇᑕᕐᑐᒃᓮᓪᓗ ᖃᓄᐃᖏᒃᑲᓗᐊᕐᒪᖔᑕ, ᐅᓇᑕᕐᓂᕆᔭᖓᓪᓗ ᖃᓄᐃᒻᒪᖔᑦ.

⁸ ᑕᕝᕙ ᑍᕕᑎ ᔪᕅᐊᒧᑦ ᐅᖃᕐᐳᖅ, “ᐊᖏᕐᕋᓕᕆᑦ ᐃᑎᒐᑎᑦ ᐅᐊᓴᕆᐊᕐᑐᕐᓗᒋᑦ.” ᔪᕅᐊᓗ ᐊᖓᔪᖅᑳᕐᔪᐊᑉ ᐃᒡᓗᖓᓂᑦ ᐊᓂᑎᓪᓗᒍ, ᑍᕕᑎ ᑐᓂᕐᕈᑎᒥᒃ ᐋᑕᐅᑎᑦᓯᕗᖅ ᐃᒡᓗᖓᓄᑦ.

⁹ ᔪᕅᐊᓕ ᐊᖏᕐᕋᓚᐅᓐᖏᓚᖅ, ᓯᓂᒃᑕᓚᐅᕐᐳᕐᓕ ᐊᖓᔪᖅᑳᕐᔪᐊᖃᕐᕕᐅᑉ ᐃᑎᕐᑕᕐᕕᖓᓂ ᐊᖓᔪᖅᑳᕐᔪᐊᑉ ᖃᐅᔨᓴᕐᑎᖏᑦ ᐱᖃᑎᒋᓪᓗᒋᑦ.

¹⁰ ᑍᕕᑎᓕ ᐅᖃᐅᑦᔭᐅᒐᒥ ᔪᕅᐊᐅᑉ ᐊᖏᕐᕋᓚᐅᖏᓐᓂᖓᓂᒃ, ᑍᕕᑎᐅᑉ ᐅᖃᐅᑎᕚ, “ᐅᑎᕋᑖᑦᓯᐊᕋᕕᑦ ᐊᑯᓂᐊᓗᒃ ᐊᐅᓪᓚᕐᓯᒪᓚᐅᕐᓗᑎᑦ; ᓱᖕᒪᓪᓕ ᐊᖏᕐᕋᓚᐅᓐᖏᓚᑎᑦ?”

¹¹ ᔪᕅᐊ ᑍᕕᑎᒧᑦ ᑭᐅᕗᖅ, “ᐃᓴᕆᐊᓕᒥᐅᑦ ᔫᑕᒥᐅᓪᓗ ᐅᓇᑕᕆᐊᕐᓯᒪᖕᒪᑕ, ᐊᑕᓂᐅᓪᓗ ᐃᒃᓯᕐᕕᖁᑎᖓ ᑍᑲᓃᒻᒪᑦ; ᐊᖓᔪᖅᑳᕋᓗ ᔪᐊᐱ ᐅᓇᑕᕐᑐᒃᓴᖁᑎᖏᓪᓗ ᑕᖕᒫᕐᓯᒪᓪᓗᑎᒃ ᑕᒫᓂᑐᐃᓐᓇᖅ; ᓱᖕᒪᓪᓕ ᐊᖏᕐᕋᕆᐊᖃᕐᐳᖓ, ᓂᕆᓗᖓᓗ ᐃᒥᕐᓗᖓᓗ, ᓄᓕᐊᕋᓗ ᓯᓂᖃᑎᒋᓗᒍ? ᑕᒪᓐᓇ ᐃᑦᔪᕐᓁᑦᑑᖕᒪᑦ, ᑍᒤᓕᐅᕐᓂᐊᖏᒻᒪᕆᒃᐳᖓ!”

¹² ᑍᒤᒻᒪᑦ ᑍᕕᑎᐅᑉ ᐅᖃᐅᑎᕚ, “ᑕᕝᕙᓃᑐᐃᓐᓇᓕᕆᑦ ᐅᓪᓗᓕᒫᖅ, ᖃᐅᒃᐸᓪᓗ ᐊᐅᓪᓚᕐᑎᓐᓂᐊᕐᐸᒋᑦ.” ᑕᕝᕙ ᔪᕅᐊ ᔨᕉᓴᓕᒦᓚᐅᕐᐳᖅ ᐅᓪᓗᒥ ᑕᕝᕙᓂ, ᖃᐅᖓᓂᓗ.

¹³ ᑍᕕᑎᐅᑉ ᕾᖁᓪᓗᒍ ᓂᕆᔭᕐᑐᖁᕚ, ᓂᕆᓚᐅᕐᐳᖅ ᐃᒥᕐᓗᓂᓗ, ᐋᖓᔮᓕᕐᑎᑉᐹᓗ; ᐅᓐᓄᒥᓕ ᑍᑦᓱᒪᓂ ᐊᖏᕐᕋᓚᐅᓐᖏᓚᖅ; ᓯᓂᓚᐅᕐᐳᕐᓕ ᕿᐱᒃᓯᒪᓪᓗᓂ ᐊᖓᔪᖅᑳᕐᔪᐊᖃᕐᕕᐅᑉ ᑲᐅᔨᓴᕐᑎᖏᑕ ᐃᒡᓗᕈᓯᖏᓐᓂ.

¹⁴ ᖃᐅᑎᓪᓗᒍ ᐅᓪᓛᒃᑯᑦ ᑍᕕᑎ ᑎᑎᕋᓚᐅᕐᐳᖅ ᔪᐊᐱᒧᑦ, ᓇᒃᓴᕐᑕᐅᑎᓪᓗᒋᓪᓗ ᔪᕅᐊᒧᑦ.

¹⁵ ᐃᒫᒃ ᑎᑎᕋᓚᐅᕐᐳᖅ, “ᔪᕅᐊ ᓯᕗᓪᓕᕐᐸᐅᑎᓪᓗᒍ ᑎᓕᓚᐅᕈᒃ ᐅᓇᑕᕐᕕᐅᓂᕐᐹᒧᑦ, ᕿᒪᒡᓗᒍᓗ ᑐᖁᑕᐅᖁᓪᓗᒍ.”

¹⁶ ᔪᐊᐱᓗ ᓴᐱᓯᓯᒪᓕᕋᒥ ᐃᒡᓗᒐᓴᖕᓂᒃ, ᔪᕅᐊ ᑎᓕᕚ ᖃᐅᔨᒪᔭᒥᓄᑦ ᐊᑭᕋᖏᑕ ᓲᖑᓂᕐᐹᖓᓄᑦ.

¹⁷ ᐊᑭᕋᖏᑦ ᐃᒡᓗᒐᓴᖕᓂᑦ ᐊᓂᓪᓗᑎᒃ ᐅᓇᑕᕆᐊᕐᐳᑦ ᔪᐊᐱᐅᑉ ᐅᓇᑕᕐᑐᒃᓴᖁᑎᖏᓐᓂᒃ; ᑍᕕᑎᐅᓪᓗ ᐅᓇᑕᕐᑐᒃᓴᖁᑎᖏᑕ ᐃᓚᖏᑦ ᑐᖁᑕᐅᕗᑦ. ᔪᕅᐊᓗᑦᑕᐅᖅ ᕼᐃᑍᑎᒥᐅᖅ ᑐᖁᑕᐅᒋᕗᖅ.

¹⁸ ᔪᐊᐱᓗ ᐅᖃᕆᐊᕐᑐᕐᑎᑦᓯᕗᖅ ᑍᕕᑎᒧᑦ ᐅᓇᑕᕐᓂᖏᑕ ᖃᓄᐃᑉᐸᓪᓕᐊᓂᓕᒫᖏᓐᓂᒃ;

¹⁹ ᐃᒤᓕᐅᖁᓚᐅᕐᐹᓗ ᐅᖃᕆᐊᕐᑐᕐᑐᖅ, “ᐊᖓᔪᖅᑳᕐᔪᐊᖅ ᐅᖃᐅᑎᔭᕇᑐᐊᕈᕕᐅᒃ ᐅᓇᑕᕐᓂᐅᑉ ᖃᓄᐃᑉᐸᓪᓕᐊᓂᖓᓂᒃ,

²⁰ ᓂᓐᖓᑐᐃᓐᓇᕆᐊᖃᕐᒪᑦ ᐊᐱᕆᓗᓂᓗ, ‘ᖃᓄᐃᒻᒪᑦ ᐃᒡᓗᒐᓮᑦ ᖃᓂᒋᔭᖓᓄᐊᓗᐊᕐᐱᓰ ᐅᓇᑕᕆᐊᕐᓗᒋᑦ? ᖃᐅᔨᒪᓚᐅᓐᖏᓚᓰ ᖃᕐᔪᓄᑦ ᐱᒋᐊᑐᐃᓐᓇᕆᐊᖃᕐᓂᖏᓐᓂᒃ ᐊᕙᓗᐊᓂᑦ?

²¹ ᐃᖅᑲᐅᒪᓐᖏᓚᓰ ᑍᒫᒃ ᐊᐱᒥᓕᒃ ᔨᕈᐱᑎᐅᑉ ᐃᕐᓂᖓ ᑐᖁᑕᐅᓚᐅᕐᓯᒪᖕᒪᑦ? ᑍᑲᓂ ᑎᐱᔾᒥ, ᐊᕐᓇᒧᑦ ᓯᖃᓪᓕᓯᕕᖕᒧᑦ ᒥᓗᕐᑕᐅᓚᐅᕐᓯᒪᖕᒪᑦ ᐊᕙᓗᕐᔪᐊᑉ ᑭᒡᓕᖓᓂᑦ ᑐᖁᓪᓗᒍᓗ. ᓱᖕᒪᑦ ᐊᕙᓗᕐᔪᐊᑉ ᖃᓂᒋᔭᖓᓄᐊᓗᐊᕐᐱᓰ?’ ᑍᒫᒃ ᐊᖓᔪᖅᑳᕐᔪᐊᑉ ᐊᐱᕆᒃᐹᑎᑦ, ᐅᖃᐅᑎᓂᐊᕐᐸᑦ, ‘ᐅᓇᑕᕐᑐᒃᓴᖁᑏᑦᑕᐅᖅ ᔪᕅᐊ ᕼᐃᑍᑎᒥᐅᑕᖅ ᑐᖁᑕᐅᓚᐅᕆᕗᖅ.’”

²² ᑕᕝᕙ ᐅᖃᕆᐊᕐᑐᕐᑎᑕᐅᔪᖅ ᑍᕕᑎᒧᐊᕐᐳᖅ ᐅᖃᐅᑎᓪᓗᒍᓗ ᔪᐊᐱᐅᑉ ᐅᖃᐅᓯᐅᖁᔭᓕᒫᖏᓐᓂᒃ.

²³ ᑍᕕᑎᒧᑦ ᐅᖃᕐᓗᓂ, “ᐊᑭᕋᕗᑦ ᓴᓐᖏᓂᕐᓴᐅᖅᑲᐅᖕᒪᑕ ᐅᕙᑦᑎᓐᓂᑦ ᐃᒡᓗᒐᓴᖕᓂᓪᓗ ᐊᓂᓪᓗᑎᒃ ᐅᓇᑕᕆᐊᓚᐅᕐᐳᑦ ᓄᓇᑐᐃᓐᓇᕐᒥ, ᐅᑎᕐᑎᓚᐅᕐᐸᕗᓪᓕ ᐃᒡᓗᒐᓮᑦ ᐃᑎᕐᑕᕐᕕᖓᓄᑦ.

²⁴ ᖃᕐᔪᓄᓪᓗ ᐱᒋᐊᕐᑕᐅᓚᐅᕐᐳᒍᑦ ᐊᕙᓗᕐᔪᐊᒥᑦ, ᐊᖓᔪᖅᑳᕐᔪᐊᓪᓗ ᐅᓇᑕᕐᑐᒃᓴᖁᑎᖏᑕ ᐃᓚᖏᑦ ᑐᖁᑕᐅᓚᐅᕐᐳᑦ, ᐅᓇᑕᕐᑐᒃᓴᖁᑏᑦᑕᐅᖅ ᔪᕅᐊ ᕼᐃᑍᑎᒥᐅᖅ ᑐᖁᑕᐅᓚᐅᕆᕗᖅ.”

²⁵ ᑍᕕᑎᐅᑉ ᐅᖃᕆᐊᕐᑐᕐᑎᑕᐅᔪᖅ ᐅᖃᐅᑎᕚ, “ᑲᔪᖏᕐᓴᑦᓯᐊᕈᒃ ᔪᐊᐱ ᐃᓱᒫᓗᖁᖏᓪᓗᒍ ᑕᒪᑐᒥᖓ, ᖃᐅᔨᒪᔪᖃᕈᓐᓇᖏᒻᒪᑦ ᑭᓇ ᑐᖁᑕᐅᓂᐊᕐᒪᖔᑦ ᐅᓇᑕᕐᑐᓂ; ᐅᖃᐅᑎᒍᒃ ᐊᒃᓱᕈᒃᑲᓐᓂᕐᓗᓂ ᐱᒋᐊᖁᓗᒍ ᐃᒡᓗᒐᓴᖕᓂᒃ, ᓵᓚᒋᓗᒍᓗ.”

²⁶ ᐸᓰᐸᓕ ᑐᓴᕋᒥ ᐅᐃᖓᑕ ᔪᕅᐊᐅᑉ ᑐᖁᑕᐅᓂᖓᓂᒃ, ᕿᒃᓵᒍᑎᒋᓚᐅᕐᐹ.

²⁷ ᕿᒃᓵᖕᓂᖓᓕ ᐊᓂᒍᕐᒪᑦ, ᑍᕕᑎ ᑎᓕᓯᕗᖅ ᐊᖓᔪᖅᑳᕐᔪᐊᖃᕐᕕᖕᒧᐊᖁᓪᓗᒍ; ᓄᓕᐊᕐᑖᕆᓪᓗᓂᐅᒡᓗ ᐃᕐᓂᕐᑖᓚᐅᕐᐴᒃ. ᐊᑕᓂᐅᓪᓕ ᑕᒪᓐᓇ ᖁᕕᐊᒋᓚᐅᓐᖏᓛ ᑍᕕᑎᐅᑉ ᐱᓂᐊᕐᓂᖓ.