ᓴᒧᐃᓕ ᐂᑉᐸᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᓵᓚᖃᕐᓂᖓ ᐊᒧᓁᑎᓂᒃ ᓯᕆᐊᒥᐅᓂᒡᓗ

¹ ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᓇᕼᐊᓴ ᐊᒧᓁᑎᒥᐅᑕᖅ ᑐᖁᕗᖅ, ᐃᕐᓂᖓᓗ ᕼᐊᓄᓂ ᐃᓇᖐᓪᓗᓂ ᐊᖓᔪᖅᑳᕐᔪᐊᓐᖑᓚᐅᕐᐳᖅ.

² ᐊᖓᔪᖅᑳᕐᔪᐊᕐᓗ ᑍᕕᑎ ᐅᖃᕐᐳᖅ, “ᐅᐱᒍᓱᖕᓂᕋ ᓇᓗᓁᕋᒃᓴᕆᕙᕋ ᕼᐊᓄᓂᒧᑦ ᓇᕼᐊᓯᐅᑉ ᐃᕐᓂᖓᓄᑦ, ᐊᑖᑕᖓ ᑍᒤᓚᐅᕐᒪᑦ ᐅᕙᓐᓄᑦ.” ᑕᕝᕙ ᑍᕕᑎ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᓂᒃ ᐃᓚᑦᓱᒍᓱᖕᓂᓂ ᓇᓗᓁᕈᒪᓪᓗᒍ ᐊᑖᑕᖓᓄᑦ. ᑎᑭᒻᒪᑕᓕ ᐊᒧᓁᑎᒧᑦ,

³ ᐊᒧᓁᑎᒥᐅᑦ ᐊᖓᔪᖅᑳᖁᑎᖏᑦ ᕼᐊᓄᓂᒧᑦ ᐅᖃᕐᐳᑦ ᐊᖓᔪᖅᑳᕐᔪᐊᒧᑦ, “ᑍᕕᑎᐅᑉ ᐅᖃᕆᐊᕐᑐᕐᑎᑕᖏᑦ ᐃᓚᑦᓱᒍᓲᑕᐅᕚᑦ ᐃᓕᖕᓄᑦ, ᐊᑖᑕᖕᓂᒃ ᐅᐱᒍᓱᒋᐊᕐᑐᕐᑐᕆᕕᐅᒃ? ᑎᓕᓯᓚᐅᕐᐳᕐᓕ ᐃᔨᕋᕐᑐᕐᓗᑎᒃ ᖃᐅᔨᓴᕆᐊᖁᓪᓗᒋᑦ ᐃᒡᓗᒐᓴᑦᑎᓐᓂᒃ, ᓵᓚᒋᔪᒪᓪᓗᑕ!”

⁴ ᑕᕝᕙ ᕼᐊᓄᓂᐅᑉ ᑎᒍᔭᐅᑎᓚᐅᕐᐰᑦ ᑍᕕᑎᐅᑉ ᐅᖃᕆᐊᕐᑐᕐᑎᑕᖏᑦ, ᐅᓐᖏᔭᕐᑕᐅᑎᑉᐰᑦ ᐊᑐᓂᑦ ᐃᒡᓗᐃᓐᓇᖏᓐᓂᒃ, ᐊᓐᓄᕌᖏᓪᓗ ᓇᑲᑕᐅᑎᓪᓗᒋᑦ ᕿᑎᐊᓂᑦ ᑕᐅᓄᖓ, ᐊᐅᓪᓚᕐᑎᓪᓗᒋᓪᓗ.

⁵ ᑍᕕᑎᓕ ᑕᒪᑐᒥᖓ ᑐᓴᕋᒥ ᐱᓂᐊᕐᓂᐅᓚᐅᕐᑐᒥᒃ, ᐅᖃᐅᑦᔭᐅᖁᕔᑦ ᑲᑎᔪᒪᓪᓗᒋᑦ, ᑲᓐᖑᓱᓗᐊᓕᓚᐅᕐᒪᑕ ᐊᖏᕐᕋᕆᐊᒃᓴᖅ. ᐊᖓᔪᖅᑳᕐᔪᐊᓪᓗ ᐅᖃᐅᑎᕔᑦ, “ᔨᕆᑯᒦᖏᓐᓇᓕᕆᑦᓯ ᐅᒥᓯ ᐱᕈᕐᓯᐊᕆᓗᒋᑦ, ᑭᖑᓂᖓᒍᓪᓗ ᑕᕝᕙ ᐊᖏᕐᕋᓛᕐᐳᓯ.”

⁶ ᐊᒧᓁᑎᒥᐅᑦ ᖃᐅᔨᓕᕋᒥᒃ ᑍᕕᑎᒧᑦ ᖁᕕᐊᒋᔭᐅᔪᓐᓃᕐᓂᕐᒥᖕᓂᒃ, ᑍᒤᒻᒪᑦ ᐊᑭᓖᓪᓗᑎᒃ ᑎᑭᖁᔨᓚᐅᕐᐳᑦ ᓯᕆᐊᒥᐅᑦ ᐅᓇᑕᕐᑐᒃᓴᖏᓐᓂᒃ ᐱᑦ-ᕆᕼᐊᐱᒥᑦ, ᔫᐸᒥᓪᓗ, 20,000ᓂᒃ ᐅᓇᑕᕐᑎᓂᒃ, ᒫᑲᐅᓪᓗ ᐊᖓᔪᖅᑳᕐᔪᐊᖓᓂᑦ 1,000ᓂᒃ, ᑑᑉᒥᓪᓗ 12,000ᓂᒃ ᐅᓇᑕᕐᑎᓂᒃ.

⁷ ᑍᕕᑎᓕ ᑕᒪᑐᒥᖓ ᑐᓴᕋᒥ, ᔪᐊᐱ ᑎᓕᕚ ᐅᓇᑕᕐᑐᒃᓴᖁᑎᓕᒫᖏᓪᓗ ᐊᔪᖏᑦᑐᕐᔪᐊᑦ ᐃᓚᒋᓪᓗᒋᑦ.

⁸ ᐊᒧᓁᑎᒥᐅᑦ ᐊᐅᓪᓚᕋᒥᒃ ᐊᑐᐃᓐᓇᕈᓚᐅᕐᐳᑦ ᐅᓇᑕᕐᓂᕐᒧᑦ ᕌᐸᐅᑉ ᐃᑎᕆᐊᕐᕕᖓᓂ; ᐊᓯᖏᓪᓕ ᓯᕆᐊᒥᐅᑦ ᕅᕼᐊᐱᒥᐅᓪᓗ, ᒫᑲᒥᐅᓪᓗ, ᐃᒻᒥᒍᑦ ᐃᓂᑖᓚᐅᕐᐳᑦ ᖃᖅᑲᖃᖏᑦᑐᒥ ᓄᓇᑐᐃᓐᓇᕐᒥ.

⁹ ᔪᐊᐱᓕ ᑕᑯᒐᒥ ᐊᑭᕋᒥᓂᒃ ᐅᓇᑕᕆᐊᕋᔭᕐᑐᓂᒃ ᓯᕗᓂᖓᓂᑦ ᑐᓄᐊᓂᓪᓗ, ᓂᕈᐊᓚᐅᕐᐳᖅ ᐱᓯᑎᐅᓂᕐᐹᓂᒃ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᖏᓐᓂᒃ ᓵᓐᖓᓯᖁᓪᓗᒋᑦ ᓯᕆᐊᒥᐅᓂᒃ;

¹⁰ ᐊᓯᖏᓪᓕ ᐊᖓᔪᖅᑳᖃᕐᓗᑎᒃ ᓄᑲᖓᓂᒃ ᐊᐱᓮᒥᒃ, ᓵᓐᖓᓯᖁᓚᐅᕐᐰᑦ ᐊᒧᓁᑎᓂᒃ.

¹¹ ᔪᐊᐱᓗ ᐅᖃᕐᐳᖅ, “ᖃᐅᔨᒍᕕᑦ ᓵᓚᐅᓕᕐᑎᓪᓗᖓ ᓯᕆᐊᒥᐅᓄᑦ, ᕾᓗᑎᑦ ᐃᑲᔪᕆᐊᕋᔭᕐᐳᑎᑦ; ᐊᒧᓁᑎᒥᐅᓄᓪᓗ ᓵᓚᒋᔭᐅᓕᕈᕕᑦ, ᑕᕝᕙ ᕾᓗᖓ ᐃᑲᔪᕆᐊᕐᓂᐊᕐᐸᒋᑦ.

¹² ᓲᖑᓂᖃᑦᓯᐊᕆᑦ ᓯᕘᕋᖏᓪᓗᑎᑦ, ᐅᓇᑕᓚᐅᕐᑕ ᐊᒃᓱᕈᕐᓗᑕ ᐃᓄᖁᑎᕗᑦ ᐱᓪᓗᒋᑦ, ᒎᑎᐅᓪᓗ ᐃᒡᓗᒐᓴᖁᑎᖏᑦ; ᐊᑕᓂᕐᓗ ᐱᔪᒪᔭᓂ ᒪᓕᒡᓗᒍ ᐱᓂᐊᓚᐅᕐᓕ.”

¹³ ᔪᐊᐱᒃᑯᑦ ᐃᓚᖏᓪᓗ ᐅᓇᑕᕆᐊᓕᕐᒪᑕ; ᓯᕆᐊᒥᐅᑦ ᕿᒪᒃᓯᓚᐅᕐᐳᑦ.

¹⁴ ᐊᒧᓁᑎᒥᐅᓪᓗ ᑕᑯᒐᒥᒃ ᓯᕆᐊᒥᐅᑦ ᕿᒫᓂᖏᓐᓂᒃ, ᑖᒃᑯᐊᑦᑕᐅᖅ ᕿᒪᒃᓯᓚᐅᕆᕗᑦ ᐊᐱᓮᒥᑦ ᐃᒡᓗᒐᓴᖕᒥᓄᐊᕐᓗᑎᒃ. ᑕᕝᕙ ᔪᐊᐱᒃᑯᑦ ᐅᓇᑕᕇᕋᒥᒃ ᐊᒧᓁᑎᒥᐅᓂᒃ, ᐅᑎᓚᐅᕐᐳᑦ ᔨᕉᓴᓕᒧᑦ.

¹⁵ ᓯᕆᐊᒥᐅᓪᓕ ᖃᐅᔨᒐᒥᒃ ᓵᓚᐅᓂᕐᒥᖕᓂᒃ ᐃᓴᕆᐊᓕᒥᐅᓄᑦ, ᐅᓇᑕᕐᑐᒃᓴᖁᑎᓕᒫᒥᖕᓂᒃ ᕾᖁᔨᓚᐅᕐᐳᑦ ᑲᑎᑎᓪᓗᒋᓪᓗ.

¹⁶ ᐊᖓᔪᖅᑳᕐᔪᐊᖅ ᕼᐊᑕᑎᔨᕆ ᕾᖁᔨᓚᐅᕐᐳᖅ ᓯᕆᐊᒥᐅᓂᒃ ᐃᐅᕙᕅᑎᐅᑉ ᑰᖓᑕ ᓯᕿᓂᖓᑕ ᓄᐃᕕᐊᑕ ᓇᓛᓃᑦᑐᓂᒃ; ᕼᐃᓚᒧᐊᓚᐅᕐᐳᓪᓗ ᐊᖓᔪᖅᑳᖃᕐᓗᑎᒃ ᓲᐹᒃᒥᒃ, ᑖᓐᓇ ᐊᖓᔪᖅᑳᖑᔪᖅ ᐊᖓᔪᖅᑳᕐᔪᐊᑉ ᕼᐊᑕᑎᔨᕆᐅᑉ ᔪᐸᒥᐅᑕᐅᑉ ᐅᓇᑕᕐᑐᒃᓴᖁᑎᖏᓐᓄᑦ.

¹⁷ ᑍᕕᑎᓕ ᑕᒪᑐᒥᖓ ᑐᓴᕋᒥ, ᐃᓴᕆᐊᓕᒥᐅᑦ ᐅᓇᑕᕐᑐᒃᓴᓕᒫᖏᑦ ᑲᑎᖁᕔᑦ, ᔪᐊᕐᑕᓂᐅᓪᓗ ᑰᖓᓂᒃ ᐃᑳᕐᐳᑦ, ᕼᐃᓚᒧᓪᓗ ᑎᑭᓪᓗᑎᒃ. ᓯᕆᐊᒥᐅᑦ ᐋᖅᑭᒃᓱᓚᐅᕐᐳᑦ ᓵᓐᖓᓯᔪᒪᓪᓗᑎᒃ ᑖᑦᓱᒥᖓ, ᐅᓇᑕᕐᓂᕐᓗ ᐱᒋᐊᓚᐅᕐᐳᖅ.

¹⁸ ᓯᕆᐊᒥᐅᓪᓗ ᕿᒪᒃᓯᓚᐅᕐᐳᑦ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖏᓐᓂᒃ; ᑍᕕᑎᒃᑯᓪᓗ ᑐᖁᑦᓯᓚᐅᕐᐳᑦ 700ᓂᒃ ᓯᕆᐊᒥᐅᑕᓂᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓃᑦᑐᓂᒃ, 40,000ᓂᒡᓗ ᕿᒻᒥᕐᔪᐊᒦᑦᑐᓂᒃ, ᐃᑭᓕᓚᐅᕐᐹᓗ ᓲᐹᒃ ᐅᓇᑕᕐᑐᒃᓴᖏᑕ ᐊᖓᔪᖅᑳᖓ, ᑖᓐᓇᓗ ᑐᖁᓚᕐᐳᖅ ᐅᓇᑕᕐᕕᒋᔭᖓᓂ.

¹⁹ ᐊᖓᔪᖅᑳᕐᔪᐊᓪᓗ ᕼᐊᑕᑎᔨᕆᐅᑉ ᐃᓄᖁᑎᓕᒫᖏᑦ ᖃᐅᔨᓕᕋᒥᒃ ᓵᓚᐅᓂᕐᒥᖕᓂᒃ ᐃᓴᕆᐊᓕᒥᐅᓄᑦ, ᐅᓇᑕᕈᒪᔪᓐᓃᓚᐅᕐᐳᑦ ᐃᓴᕆᐊᓕᒥᐅᓂᒃ, ᐃᒻᒥᖕᓂᒡᓗ ᑐᓂᓪᓗᑎᒃ ᐃᓴᕆᐊᓕᓄᑦ ᑖᒃᑯᓄᖓᓗ ᐃᓄᖁᑎᑖᕆᔭᐅᓚᐅᕐᐳᑦ. ᓯᕆᐊᒥᐅᓪᓗ ᑲᑉᐱᐊᓱᓕᓚᐅᕐᐳᑦ ᐃᑲᔪᕆᐊᒃᓴᖅ ᐊᒧᓁᑎᒥᐅᓂᒃ.