ᓴᒧᐃᓕ ᐂᑉᐸᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᑐᓴᕐᓂᖓ ᓴᐅᓕᐅᑉ ᑐᖁᓂᖓᓂᒃ

¹ ᓴᐅᓕᐅᑉ ᑐᖁᓂᖓᑕ ᑭᖑᓂᐊᒍᑦ, ᑍᕕᑎ ᐅᑎᓚᐅᕐᐳᖅ ᓵᓚᖃᕇᕋᒥ ᐊᒪᓕᑬᒥᐅᓂᒃ, ᓄᖅᑲᖓᓚᐅᕐᐳᕐᓗ ᔨᒡᓛᒡᒥ ᐅᓪᓘᖕᓂᒃ ᒪᕐᕉᖕᓂᒃ.

² ᐅᓪᓗᐃᑦ ᐱᖓᔪᖓᓐᓂ ᐅᕕᒃᑲᒧᑦ ᑎᑭᑕᐅᕗᖅ ᓴᐅᓕᐅᑉ ᑕᖕᒫᕐᓯᒪᕕᖓᓂᑦ ᐱᔪᒧᑦ. ᕿᒃᓵᖕᓂᓂ ᓴᖅᑭᔮᖁᓪᓗᒍ, ᐊᓐᓄᕌᓂ ᐊᓕᒃᑐᕐᓯᒪᓚᐅᕐᐰᑦ ᓂᐊᖁᓂᓗ ᐊᕐᔭᓕᓂᓕᕐᓯᒪᓪᓗᒍ. ᑖᓐᓇ ᑍᕕᑎᒧᐊᕋᒥ, ᐹᒻᒪᒃᑎᕐᐳᖅ ᒪᓂᖅᑲᒧᑦ ᐅᐱᒍᓱᖕᓂᕐᒧᑦ.

³ ᑍᕕᑎᐅᑉ ᐊᐱᕆᕙ, “ᓇᑭᓐᖔᕐᐲᑦ?” ᑭᐅᕗᖅ, “ᕿᒪᒃᓯᓚᐅᕐᐳᖓ ᐃᓴᕆᐊᓕᒥᐅᑦ ᑕᖕᒫᕐᓯᒪᕕᖓᓂᑦ.”

⁴ ᑍᕕᑎ ᐅᖃᕐᐳᖅ, “ᐅᖃᐅᑎᓚᐅᓐᖓ ᖃᓄᐃᑦᑐᖃᕐᓂᕐᒪᖔᑦ?” ᑭᐅᕗᖅ, “ᐅᓇᑕᕐᑐᒃᓴᖁᑎᕗᑦ ᕿᒫᓚᐅᕐᐳᑦ ᐅᓇᑕᕐᑐᓂᑦ, ᐃᓄᖁᑎᕗᓪᓗ ᐅᓄᕐᑐᑦ ᑐᖁᑕᐅᓪᓗᑎᒃ; ᓴᐅᓕᓗ ᐃᕐᓂᖓᓗ ᔫᓇᑕᓂ ᑐᖁᑕᐅᒋᕗᑦ.”

⁵ ᑍᕕᑎᐅᑉ ᐊᐱᕆᕙ, “ᖃᓄᖅ ᖃᐅᔨᒪᕖᑦ ᓴᐅᓕᐅᑉ ᔫᓇᑕᓂᐅᓪᓗ ᑐᖁᓂᖏᖕᓂᒃ?”

⁶ ᑭᐅᕗᖅ, “ᖃᖅᑲᐅᑉ ᒋᐅᓪᐳᐊᑉ ᖄᖓᓃᓪᓗᐊᓚᐅᕋᒪ; ᑕᑯᓚᐅᕐᐳᖓ ᓴᐅᓕ ᖃᓗᒋᐊᒥᓄᑦ ᐄᒐᖓᑎᓪᓗᒍ ᐊᑭᕋᖏᑦ ᕿᒧᒃᓯᐅᑎᒃᑯᑦ ᐊᒃᓴᓗᐊᓕᒃᑯᒃ ᕿᒻᒥᕐᔪᐊᒃᑯᓪᓗ ᑖᑦᓱᒧᖓ ᖃᒡᓕᕙᓪᓕᐊᓕᕐᑎᓪᓗᒋᑦ.

⁷ ᑕᑯᓴᕋᒥᓗ ᐅᕙᓐᓂᒃ ᑕᑯᒐᒥ, ᕾᖁᓚᐅᕐᐹᖓ. ᑭᐅᕙᕋᓗ. ‘ᐄ, ᐊᖓᔪᖅᑳᒃ.’

⁸ ᐊᐱᕆᕚᖓ, ‘ᑭᓇᐅᕖᑦ?’ ᐅᖃᐅᑎᕙᕋᓗ, ‘ᐊᒪᓕᑬᑎᒥᐅᑕᐅᕗᖓ.’

⁹ ᑖᑦᓱᒪᓗ ᐅᖃᐅᑎᕚᖓ, ‘ᕾᒋᑦ, ᑐᖁᓚᐅᓐᖓ; ᐊᒃᓱᐊᓗᒃ ᐋᓐᓂᐊᒐᒪ, ᑐᖁᕙᓪᓕᐊᓂᐊᓕᕐᓗᖓᓗ.’

¹⁰ ᑕᕝᕙ ᐅᐸᒃᓱᒍ ᑐᖁᓚᐅᕐᐸᕋ, ᖃᐅᔨᓚᐅᕋᒪ ᐅᕐᕈᑐᐊᕈᓂ ᑐᖁᒐᔭᓕᕐᓂᖓᓂᒃ; ᓂᐊᖂᑎᖓᓗ ᑎᒍᓚᐅᕐᐸᕋ ᓂᐊᖁᐊᓂᑦ ᐊᒡᒐᐅᒻᒥᐅᑕᖏᓪᓗ ᑕᓕᖓᓃᑦᑐᑦ, ᐃᓕᖕᓄᓪᓗ ᑐᓂᕙᒃᑲ ᐊᖓᔪᖅᑳᒃ.”

¹¹ ᑕᕝᕙ ᑍᕕᑎᐅᑉ ᐊᓐᓄᕌᓂ ᐊᓕᒃᐰᑦ ᕿᒃᓵᖕᓂᕐᒧᑦ, ᐃᓅᖃᑎᓕᒫᖏᓪᓗ ᑍᒤᓚᐅᕆᕗᑦ;

¹² ᕿᒃᓵᒡᓗᑎᒡᓗ ᕿᐊᓚᐅᕐᐳᑦ ᓂᕆᑦᑍᓕᓪᓗᑎᒡᓗ ᐅᓐᓄᒧᑦ ᑎᑭᓪᓗᒍ, ᓴᐅᓕ ᔫᓇᑕᓂᓗ ᐃᓴᕆᐊᓕᒥᐅᓕᒫᓪᓗ ᐱᓪᓗᒋᑦ ᐊᑕᓂᐅᑉ ᐃᓄᖁᑎᖏᑦ, ᐅᓇᑕᕐᓂᒃᑯᑦ ᐅᓄᕐᑐᐊᓗᐃᑦ ᑐᖁᑕᐅᓚᐅᕐᒪᑕ.

¹³ ᑍᕕᑎᐅᑉ ᐅᕕᒃᑲᖅ ᑐᓴᕐᕕᒋᓚᐅᕐᑕᓂ ᐊᐱᕆᕚ, “ᓇᓂᒥᐅᑕᐅᕖᑦ?” ᑭᐅᕗᖅ, “ᐊᒪᓕᑬᑎᒥᐅᑕᐅᕗᖓ, ᓄᓇᑦᓯᓐᓂ ᓄᓇᖃᕐᐳᖓ.”

¹⁴ ᑍᕕᑎᐅᑉ ᐅᖃᐅᑎᕚ, “ᖃᓄᐊᓗᒃ ᑲᑉᐱᐊᓱᖏᑦᓱᑎᑦ ᑐᖁᑦᓯᔪᓐᓇᕐᐲᑦ ᐊᖓᔪᖅᑳᕐᔪᐊᒥᒃ ᐊᑕᓂᐅᑉ ᓂᕈᐊᕐᓯᒪᔭᖓᓂᒃ?”

¹⁵ ᑕᕝᕙ ᑍᕕᑎ ᕾᖁᔨᕗᖅ ᐊᖑᒻᒥᒃ ᐅᖃᐅᑎᓪᓗᒍᓪᓗ, “ᐅᓇ ᑐᖁᓚᐅᕈᒃ.” ᐊᖑᑎᐅᓪᓗ ᑲᐱᓪᓗᒍ ᐊᒫᓕᑬᒥᐅᑕᖅ ᑐᖁᑉᐹ.

¹⁶ ᑍᕕᑎᓗ ᐅᖃᕐᐳᖅ ᐊᒫᓕᑬᒥᐅᑕᕐᒧᑦ, “ᓇᖕᒥᓂᖅ ᐱᓂᐊᕐᓯᒪᔭᕐᓄᑦ ᐱᔭᐅᑎᑉᐳᑎᑦ; ᐃᓕᖕᓂᒃ ᓇᖕᒥᓂᖅ ᐅᖃᐅᓯᕆᔭᕐᓄᑦ ᓵᑕᒃᓴᕈᕐᑎᑉᐳᑎᑦ, ᑐᖁᑦᓯᓂᕋᓚᐅᕋᕕᑦ ᐊᑕᓂᐅᑉ ᓂᕈᐊᕐᓗᒍ ᐊᖓᔪᖅᑳᕐᔪᐊᕈᕐᑎᓯᒪᔭᖓᓂᒃ.”

ᑍᕕᑎᐅᑉ ᕿᒃᓵᒍᑎᖃᕐᓂᖓ ᓴᐅᓕᒥᒃ ᔫᓇᑕᓂᒥᒡᓗ

¹⁷ ᑍᕕᑎᓗ ᐅᒡᒍᐊᕈᑎᒥᒃ ᐃᓐᖏᓚᐅᕐᐳᖅ ᓴᐅᓕᒧᑦ ᐃᕐᓂᖓᓄᓪᓗ ᔫᓇᑕᓂᒧᑦ,

¹⁸ ᐅᖃᓚᐅᕐᐳᕐᓗ ᐃᓕᓮᑦᔪᑕᐅᖁᓪᓗᒍ ᔫᑕᐅᑉ ᐃᓄᖏᓐᓄᑦ; ᑕᑯᒋᓪᓗ ᑖᒃᑯᐊ ᑎᑎᕋᕐᑕᐅᓯᒪᕗᑦ ᔮᓴᐅᑉ ᐊᒡᓚᖏᓐᓂ. ᐅᖃᕐᓗᓂ:

¹⁹ “ᐃᓴᕆᐊᓕᒥᐅᑉ ᖃᖅᑲᖓᓂ ᓯᕗᓕᕐᑏᑦ ᑐᖁᕗᑦ! ᐅᓇᑕᕐᑐᒃᓴᖁᑎᑦᑕ ᓯᕘᕋᔪᐃᑦᑑᓂᕐᐹᖏᑦ ᐅᕐᕈᕗᑦ!

²⁰ ᐅᖃᐅᓯᐅᑦᑍᓕᓕ ᒑᑎᒥ, ᐊᓯᑭᓗᓂᐅᓪᓗ ᐊᖅᑯᑎᖏᓐᓂ; ᐱᓕᔅᑍᓂᒥᐅᑦ ᐊᕐᓇᖏᑦ ᖁᕕᐊᓱᒃᑎᑕᐅᖁᓇᒋᑦ; ᒎᑎᖃᖏᑦᑐᓪᓗ ᐸᓂᖏᑦ ᖁᕕᐊᓱᒃᑎᑕᐅᖁᓇᒋᑦ.

²¹ ᓯᓚᓗᓕᕐᑍᓕᓕ, ᒥᓂᑦᑍᓕᓗᓂᓗ ᒋᐅᓪᐳᐊᑉ ᖃᖅᑲᖏᓐᓂ; ᐱᕈᕐᓰᕕᖏᓪᓗ ᐱᕈᕐᑐᖃᕐᑍᓕᓕᑦ! ᓯᕘᕋᖏᑦᑐᑦ ᓴᐴᓗᑕᖏᑦ ᒪᓂᖅᑲᒦᑉᐳᑦ ᑲᓐᖑᓇᕐᑐᒦᑎᑕᐅᓂᒃᑯᑦ; ᓴᐅᓕᐅᑉ ᓴᐴᓗᑕᖓ ᕿᓪᓕᕐᓴᕐᓯᒪᔫᓐᓃᕐᐳᖅ ᐅᕐᓱᒧᑦ.

²² ᔫᓇᑕᓂᐅᑉ ᖃᕐᔪᖏᑦ ᑐᖁᓐᓇᕐᑑᓚᐅᕐᐳᑦ, ᓴᐅᓕᐅᑉ ᓴᕕᒡᔪᐊᖓ ᓈᒃᑭᒍᓱᖕᓂᖃᓚᐅᓐᖏᓚᖅ, ᐱᓯᑎᐊᓘᒐᓗᐊᑦ ᔫᓇᑕᓂᐅᑉ ᖃᕐᔪᖏᑕ ᐅᕐᕈᑎᓚᐅᕐᐰᑦ, ᓴᐅᓕᐅᓪᓗ ᓴᕕᒡᔪᐊᖓ ᐊᑭᕋᒥᓂᒃ ᑐᖁᑦᓯᓚᐅᕐᐳᖅ.

²³ ᓴᐅᓕᒃᑯᒃ ᔫᓇᑕᓂᒃᑯᒃ, ᐱᐅᒋᔭᐅᓚᐅᕐᐴᒃ ᐅᖓᒋᔭᐅᓪᓗᑎᒡᓗ; ᐃᓅᖃᑎᒌᓚᐅᕐᐴᒃ, ᑐᖁᓂᕐᒧᑦ ᑎᑭᓪᓗᑎᒃ ᐊᕕᓚᐅᓐᖏᓚᒃ; ᓇᒃᑐᕋᓕᖕᓂᑦ ᓱᒃᑲᓂᕐᓴᐅᓚᐅᕐᐴᒃ, ᓛᔭᓂᓪᓗ ᓴᓐᖏᓂᕐᓴᐅᓪᓗᑎᒃ.

²⁴ ᐃᓴᕆᐊᓕᒥᐅᑦ ᐊᕐᓇᖏᑦ, ᓴᐅᓕ ᕿᒃᓵᒍᑎᒋᓯᐅᒃ, ᑖᑦᓱᒪ ᐊᓐᓄᕌᕐᑎᓚᐅᕐᒪᓯ ᐊᐅᑉᐸᕆᒃᑐᓂᒃ, ᑕᑯᒥᓇᕐᑐᓂᒡᓗ ᒎᓗᓂᒃ ᐊᑐᕈᓐᓇᕐᓯᑎᓪᓗᓂᓯ.

²⁵ ᐅᓇᑕᕐᑐᒃᓮᑦ ᓯᕘᕋᖏᑦᑐᑦ ᐅᓇᑕᕐᑐᓂ ᐅᕐᕈᕗᑦ, ᔫᓇᑕᓂ ᓇᓚᕗᖅ ᑐᖁᖓᓪᓗᓂ ᖃᖅᑲᓂ ᐳᕐᑐᔪᓂ.

²⁶ ᕿᒃᓴᐅᑎᒋᕙᒋᑦ ᖃᑕᓐᖑᑎᒐ ᔫᓇᑕᓃ; ᐅᕙᓐᓄᑦ ᐅᖓᓇᕐᑑᓚᐅᕐᐳᑎᑦ; ᐅᕙᓐᓂᒃ ᓇᒡᓕᒍᓱᖕᓃᑦ ᐱᐅᔪᕐᔪᐊᖑᓚᐅᕐᐳᖅ, ᐊᕐᓁᑦ ᐊᒡᓛᑦ ᓇᒡᓕᒍᓱᖕᓂᖓᓂᑦ ᐱᐅᓂᕐᓴᐅᓚᐅᕐᐳᖅ.

²⁷ ᐅᓇᑕᕐᑐᒃᓮᑦ ᓯᕘᕋᖏᑦᑐᑦ ᐅᕐᕈᕗᑦ, ᐅᓇᑕᐅᑎᖏᑦ ᕿᒪᒃᑕᐅᕗᑦ ᐊᑐᕉᓐᓃᕐᓱᑎᒃ.”