ᐲᑦᑐᕉᓯ ᐂᑉᐸᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᓮᒨᓂ ᐲᑦᑐᕉᓯᒥᑦ, ᐱᔨᒋᔭᐅᓪᓗᓂ ᐋᐴᓯᑕᓕᐅᔪᒥᑦ ᔩᓱᓯ ᙭ᔅᑑᓯᒧᑦ, ᐱᑖᕐᓯᒪᔪᓄᑦ ᐅᒃᐱᕐᓂᕐᒥᒃ ᐱᕕᐊᕐᓇᕐᑐᒥᒃ ᐅᕙᑦᑎᑐᑦ ᒎᑎᑦᑕ ᐃᓗᐊᕐᑐᓐᖑᕐᑎᑦᓯᓂᖓᓄᑦ ᐱᐅᓕᔨᑦᑎᒍᓪᓗ ᔩᓱᓯ ᙭ᔅᑑᓯᒃᑯᑦ:

² ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᓮᒻᒪᕐᑎᑕᐅᓂᕐᓗ ᐱᕙᓪᓕᐊᓕᕐᓯᐅᒃ ᑕᒪᑦᓯᓐᓄᑦ ᖃᐅᔨᒪᓕᕐᓂᑦᓯᓐᓄᑦ ᒎᑎᒥᒃ ᔩᓱᓯ ᙭ᔅᑑᓯᒥᒡᓗ ᐊᑕᓂᑦᑎᓐᓂᒃ.

ᒎᑎᐅᑉ ᕾᖁᔨᓂᖓ ᓂᕈᐊᕐᓯᓂᖓᓗ

³ ᒎᑎᐅᓂᖓᑕ ᐱᔪᓐᓇᓂᖓᓄᑦ ᑐᓂᓯᕕᒋᖕᒪᑎᒍᑦ ᑕᒤᓐᓂᒃ ᐃᓅᓯᕐᒥ ᐊᑐᕆᐊᖃᕐᑕᑦᑎᓐᓂᒃ ᐱᐅᔪᓂᒃ, ᑖᑦᓱᒥᖓ ᖃᐅᔨᑎᑕᐅᓂᑦᑎᒍᑦ ᕾᖁᓚᐅᕐᒪᑎᒍᑦ ᓇᖕᒥᓂᖅ ᐱᓐᓇᕐᓇᕐᓂᕐᒥᒍᑦ ᐱᑦᓯᐊᕐᓂᕐᒥᒍᓪᓗ.

⁴ ᑕᒪᒃᑯᑎᒎᓇᖅ ᑐᓂᓯᕕᒋᓯᒪᖕᒪᑎᒍᑦ ᐱᕕᐊᕐᓇᕐᓂᕐᒥᓂᒃ ᐊᖏᕈᑎᒋᓯᒪᔭᖓᑕᓗ ᐊᖏᔫᓂᖓᓂᒃ, ᑕᒪᒃᑯᐊ ᐊᖅᑯᑎᒋᓗᒋᑦ ᕿᒤᑎᑕᐅᒐᑦᓯ ᐱᐅᖏᑦᑐᐊᓗᖕᓂᒃ ᓯᓚᕐᔪᐊᕐᒦᑦᑐᓂᒃ ᐃᒃᓯᒎᕐᓂᒃᑯᑦ ᓴᖅᑭᑎᑕᐅᔪᓂᑦ, ᐃᓚᖏᐅᑎᑎᑕᐅᖁᓪᓗᓯᓗ ᒎᑎᐅᓂᖓᓂᒃ.

⁵ ᑕᒪᓐᓇ ᐱᑦᔪᑎᒋᓗᒍ ᐅᒃᐱᕐᓂᑦᓯ ᐱᔪᓐᓇᕐᓂᓕᒫᑦᓯᓐᓄᑦ ᐃᓚᓇᓱᐊᕐᓯᐅᒃ ᐱᑦᓯᐊᕐᓂᕐᒥᒃ, ᐱᑦᓯᐊᕐᓂᕐᓗ ᐃᓚᓗᒍ ᖃᐅᔨᒪᓂᕐᒥᒃ,

⁶ ᖃᐅᔨᒪᓂᕐᓗ ᐃᓚᓗᒍ, ᓇᖕᒥᓂᖅ ᐱᓯᒪᑦᓯᐊᕈᓐᓇᕐᓂᕐᒥᒃ, ᐱᓯᒪᑦᓯᐊᕈᓐᓇᕐᓂᖅ ᐃᓚᓗᒍ ᕿᓄᐃᓵᕐᓂᕐᒥᒃ, ᕿᓄᐃᓵᕐᓂᕐᓗ ᐃᓚᓗᒍ ᒎᑎᖃᑦᓯᐊᕐᓂᕐᒥᒃ;

⁷ ᒎᑎᖃᑦᓯᐊᕐᓂᖅ ᐃᓚᓗᒍ ᐃᓅᖃᑎᖃᑦᓯᐊᕈᓐᓇᕐᓂᕐᒥᒃ, ᐃᓅᖃᑎᖃᑦᓯᐊᕈᓐᓇᕐᓂᖅ ᐃᓚᓗᒍ ᓇᒡᓕᖕᓂᕐᒥᒃ.

⁸ ᑕᒪᒃᑯᐊ ᐱᓪᓚᕇᑦ ᐱᓯᒪᒍᑦᓯᐅᒃ ᐊᖏᒡᓕᕙᓪᓕᐊᒃᐸᑕᓗ ᐃᓕᑦᓯᓐᓂ, ᑕᕝᕙ ᐱᓇᓱᐊᕐᓂᖃᑦᓯᐊᕐᓂᐊᕐᐳᓯ ᐱᕙᓪᓕᐊᑎᑦᓯᑦᓯᐊᕐᓗᓯᓗ ᖃᐅᔨᒪᓕᕐᓂᑦᓯᓐᓄᑦ ᐊᑕᓂᑦᑎᓐᓂᒃ ᔩᓱᓯ ᙭ᔅᑑᓯᒥᒃ.

⁹ ᑕᒪᒃᑯᓂᖓᓕ ᐱᖃᖏᑦᑐᖅ ᖃᓂᑦᑐᒧᑦ ᑭᓯᐊᓂ ᑕᐅᑐᒃᐳᖅ ᑕᐅᑐᖏᑑᓪᓗᓂᓗ ᐳᐃᒍᕐᓯᒪᓪᓗᓂ ᐊᔪᕐᑐᓕᓂᑐᖃᖏᑕ ᐲᕐᑕᐅᓯᒪᓂᖏᓐᓂᒃ.

¹⁰ ᑍᒤᒻᒪᑦ ᐅᒃᐱᖃᑎᒃᑲ, ᐊᒃᓱᕈᒃᑲᓐᓂᕆᐊᖃᕐᐳᓯ ᕾᖁᔭᐅᓯᒪᓂᓯ ᓂᕈᐊᕐᑕᐅᓯᒪᓂᓯᓗ ᑲᔪᓯᑎᓐᓇᓱᐊᕐᓗᒋᑦ, ᑍᒤᒃᑯᑦᓯ ᐅᒃᐱᕐᓂᕐᒥᑦ ᑲᑕᖕᓂᐊᓐᖏᒻᒪᕆᒃᐳᓯ;

¹¹ ᐱᕕᒃᓴᖃᕐᑎᑕᐅᑦᓯᐊᕐᓂᐊᕐᐳᓯᓗ ᐃᑎᕐᕕᒃᓴᕐᑖᖁᓪᓗᓯ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐱᐅᓕᔨᑦᑕ ᐊᑕᓂᐅᕕᖓᓄᑦ ᐃᓱᖃᖏᑦᑐᒧᑦ.

¹² ᑍᒤᒻᒪᑦ ᐃᖅᑬᑏᓐᓇᕈᒪᕙᑦᓯ ᑕᒪᒃᑯᓂᖓ, ᐅᓃᑦ ᖃᐅᔨᒪᒐᓗᐊᕐᑎᓪᓗᓯ ᐊᑦᑕᕐᓇᖏᑦᑐᒦᓕᕋᑦᓯ ᓱᓕᓂᕐᒥᒃ ᑐᓐᖓᕕᖃᓕᕐᓂᑦᓯᓐᓄᑦ.

¹³ ᐃᓱᒪᒐᒪ ᓈᒻᒪᒐᓱᒋᓪᓗᒍ ᐃᖅᑬᑎᖃᑦᑕᕐᓗᓯ, ᑕᒫᓂ ᓄᓇᒥ ᐃᓅᓂᓐᓂ,

¹⁴ ᖃᐅᔨᒪᓕᕋᒪ ᑎᒥᓐᓂ ᐃᓅᑯᑖᖕᓂᐊᕈᓐᓃᕋᒪ, ᑍᒫᒃ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᑕᑯᑎᓯᒪᖕᒪᖓ.

¹⁵ ᐊᒃᓱᕈᓪᓚᕆᒃᐳᖓᓗ ᑭᖑᓂᓐᓂ ᑕᒪᒃᑯᓂᖓ ᖃᖓᓕᒫᒃᑯᑦ ᐃᖅᑬᔪᓐᓇᖁᓪᓗᓯ.

᙭ᔅᑑᓯᐅᑉ ᐱᓐᓇᕐᓇᕐᓂᕐᔪᐊᖓᓂᒃ ᑕᑯᓯᒪᔪᑦ

¹⁶ ᐅᓂᒃᑲᐅᓯᑐᐃᓐᓇᕐᓂᒃ ᒪᓕᓚᐅᓐᖏᓚᒍᑦ ᐃᓕᑦᓯᓐᓄᑦ ᐅᖃᐅᓯᖃᕐᑎᓪᓗᑕ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐱᔪᓐᓇᕐᓂᖃᕐᓗᓂ ᑎᑭᑦᓱᒫᕐᓂᖓᓂᒃ, ᓇᖕᒥᓂᖅ ᑕᑯᓯᒪᒐᑦᑎᒍ ᑕᑯᒥᓇᕐᓂᕐᔪᐊᖓ.

¹⁷ ᓇᔫᑎᓚᐅᕋᑦᑕ ᐅᐱᒋᔭᐅᑎᓪᓗᒍ ᓂᕐᑐᕐᓇᕐᑎᑕᐅᑎᓪᓗᒍᓗ ᒎᑎ ᐊᑖᑕᒧᑦ ᓂᐱ ᑐᓴᓚᐅᕐᐸᕗᑦ ᐱᓐᓇᕐᓇᕐᑐᔪᐊᒥᑦ ᐱᔪᖅ, “ᑖᓐᓇ ᑕᕝᕙ ᐃᕐᓂᕋ ᓇᒡᓕᒋᓪᓗᒍ ᖁᕕᐊᒋᑦᓯᐊᕐᑕᕋ,”

¹⁸ ᐅᕙᒍᑦ ᓇᖕᒥᓂᖅ ᓂᐱ ᑐᓴᓚᐅᕐᐸᕗᑦ ᕿᓚᖕᒥᑦ ᐱᔪᖅ, ᐃᓚᒋᓚᐅᕋᑦᑎᒍ ᖃᖅᑲᒥ ᐃᑦᔪᕐᓁᑦᑐᒥ.

¹⁹ ᓇᓚᐅᑦᑍᑦᔪᑕᐅᓯᒪᔪᑦ ᓇᓚᐅᑦᓯᑎᑕᐅᓂᖏᑦ ᓇᓗᓇᕈᓐᓃᑲᓐᓂᓚᐅᕐᐳᑦ. ᓈᓚᑦᓯᐊᕈᑦᓯᐅᒃ ᑕᒪᓐᓇ ᐊᑲᐅᔪᒥᒃ ᐱᓂᐊᕐᐳᓯ ᓲᕐᓗ ᖃᐅᒻᒪᖅᑯᑎᑐᑦ ᑖᕐᑐᒥ ᐃᑯᒪᔪᑎᑐᑦ, ᖃᐅᓕᓵᕐᑐᕐᓯᐅᑦ ᐅᓪᓗᕆᐊᖅ ᓴᖅᑭᓂᐊᕐᐳᖅ ᐆᒻᒪᑎᑦᓯᓐᓂ.

²⁰ ᓯᕗᓪᓕᕐᐹᒥᒡᓕ ᑐᑭᓯᔭᕆᐊᖃᕐᐸᓯ ᐅᓇ, ᓇᓚᐅᑦᑍᔪᑦ ᐅᖃᐅᓯᕆᓯᒪᔭᖏᑦ ᒎᑎᐅᑉ ᐅᖃᐅᓯᖏᓐᓃᑦᑐᑦ ᐃᓅᑉ ᓇᖕᒥᓂᖅ ᑐᑭᓕᐅᕆᓂᖏᓐᓄᑦ ᐱᓯᒪᖏᒻᒪᑕ.

²¹ ᓇᓚᐅᑦᑍᑦᔪᑕᐅᓯᒪᔪᑦ ᐃᓅᑉ ᐃᓱᒪᖓᓂᑦ ᐱᔪᖃᓚᐅᕐᓯᒪᖏᒻᒪᑕ, ᐃᓄᐃᓪᓕ ᐅᖃᕈᓐᓇᕐᑎᑕᐅᓯᒪᕗᑦ ᒎᑎᒥᑦ ᐱᔪᓂᒃ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑕᓯᐅᕐᑕᐅᓪᓗᑎᒃ ᑭᓯᐊᓂ.