ᐊᑕᓃᑦ ᐂᑉᐸᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕼᐅᑉ ᐊᖓᔪᖅᑳᕐᔪᐊᓐᖑᕐᑎᑕᐅᓂᖓ ᐃᓴᕆᐊᓕᒥᐅᓄᑦ

¹ ᐃᓔᓴ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᕾᖁᔨᕗᖅ ᐊᖑᒻᒥᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑕ ᐃᓚᖓᓐᓂᒃ ᐅᖃᐅᑎᓪᓗᓂᐅᒡᓗ, “ᐸᕐᓁᓕᕆᑦ ᐂᓗᑎᓪᓗ ᕌᒪᑦ-ᒋᓖᑦᒧᑦ ᐅᓇ ᐅᕐᓱᖅ ᓇᒃᓴᕐᓗᒍ.

² ᑍᒃᑯᖓ ᑎᑭᒃᑯᕕᑦ, ᐊᖑᒻᒥᒃ ᔨᕼᐆᒥᒃ ᐊᑎᖃᕐᑐᒥᒃ ᕿᓂᕐᓂᐊᕐᐳᑎᑦ ᔨᕼᐆᓴᐸᐅᑉ ᓂᒻᓮᓪᓗ ᐃᕐᓂᖓᓂᒃ. ᐅᐸᒃᑯᕕᐅᒃ ᐃᓚᒋᔭᖏᓐᓂᑦ ᕿᒪᕉᑎᑎᓪᓗᒍ ᐃᒡᓗᕈᓯᕐᒧᐊᕈᑎᓪᓗᒍ,

³ ᑖᓐᓇ ᐅᕐᓱᖅ ᐊᓕᒎᕐᒦᑦᑐᖅ ᐱᓗᒍ ᓂᐊᖁᐊᓄᑦ ᑯᕕᓗᒍ ᐅᖃᕐᓂᐊᕐᐳᑎᑦ, ‘ᐃᒫᒃ ᐊᑕᓂᖅ ᐅᖃᕐᐳᖅ: ᐅᕐᓱᒧᑦ ᒥᖑᐊᕐᐸᒋᑦ ᐊᖓᔪᖅᑳᕐᔪᐊᖑᓕᖁᓪᓗᑎᑦ ᐃᓴᕆᐊᓕᒥᐅᓄᑦ.’ ᐱᔭᕇᑐᐊᕈᕕᑦ ᐊᓂᓗᑎᑦ ᐅᓪᓚᒃᓯᓂᐊᕐᐳᑎᑦ, ᓄᖅᑲᕐᑍᓕᓗᑎᑦ.”

⁴ ᑕᕝᕙ ᑖᓐᓇ ᐅᕕᒃᑲᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᕌᒪᑦ-ᒋᓖᑦᒧᐊᕐᑕᐅᕗᖅ.

⁵ ᑎᑭᓐᓇᒥ, ᑕᑯᕗᖅ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᑲᑎᒪᓪᓗᑎᒃ ᐃᒃᓯᕙᖃᑎᒌᒃᑐᑦ ᐅᖃᕐᓗᓂᓗ, “ᐊᖓᔪᖅᑳᒃ ᐃᓕᖕᓄᑦ ᐅᖃᐅᓯᒃᓴᖃᕐᑎᑕᐅᒐᒪ.” ᔨᕼᐆᑉ ᐊᐱᕆᕚ, “ᓇᓪᓕᑦᑎᓐᓅᑦ?” ᑖᑦᓱᒪ ᐅᖃᐅᑎᒃᑲᓐᓂᕐᐹ, “ᐃᓕᖕᓄᑦ ᐊᖓᔪᖅᑳᒃ.”

⁶ ᔨᕼᐆ ᓂᑯᕕᓪᓗᓂ ᐃᒡᓗᒧᑦ ᐃᑎᕐᐳᖅ ᑕᕝᕙ ᑖᑦᓱᒪ ᐊᖑᑎᐅᑉ ᒎᑎᒧᑦ ᐅᖃᕐᑎᒋᔭᐅᔫᑉ ᐅᕐᓱ ᔨᕼᐅᑉ ᓂᐊᖁᖓᓄᑦ ᑯᕕᓪᓗᒍ ᐅᖃᐅᑎᕚ, “ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐅᕐᓱᒧᑦ ᒥᖑᐊᕐᐸᒋᑦ ᐊᖓᔪᖅᑳᕐᔪᐊᓐᖑᖁᓪᓗᑎᑦ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓴᕆᐊᓕᒥᐅᓄᑦ.

⁷ ᑐᖁᕅᔪᒃᓴᐅᕗᑎᑦ ᐊᖓᔪᖅᑳᕕᑦ ᐂᕼᐊᐱᐅᑉ ᐃᓚᓕᒫᖏᓐᓂᒃ, ᐊᑭᓂᐊᕈᒪᒐᒪ ᐅᖃᕐᑎᒪ ᑐᖁᕋᕐᑕᐅᓂᕆᖃᑦᑕᓚᐅᕐᑕᖏᓐᓄᑦ, ᐊᑕᓂᐅᓪᓗ ᐃᓄᖁᑎᖏᑕ ᑐᖁᑕᐅᓯᒪᔪᑦ ᔨᔨᐱᐅᓪᒧᑦ.

⁸ ᐂᕼᐊᐱᐅᑉ ᐃᒡᓗᒥᐅᖃᑎᓕᒫᖏᑦ ᓄᖑᑕᐅᔪᒃᓴᐅᕗᑦ, ᐂᕼᐊᑉᒥᑦ ᐱᓯᒪᔪᓕᒫᑦ ᐊᖑᑏᑦ ᐃᓴᕆᐊᓕᒥᐅᓂ ᓄᖑᑎᑦᓱᒪᕙᒃᑲ ᐱᔨᑲᑖᖑᒐᓗᐊᕐᐸᑕ ᐱᔨᐅᖏᒃᑲᓗᐊᕐᐸᑕᓗ.

⁹ ᐂᕼᐊᐱᐅᑉ ᐃᒡᓗᒥᐅᖃᑎᖏᑦ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ ᐃᒡᓗᒥᐅᖃᑎᖏᑎᑐᑦ ᐱᓂᐊᕐᕕᒋᔪᒪᕙᒃᑲ, ᐹᓴᐅᓪᓗ ᐊᕼᐂᔭᐅᑉ ᐃᕐᓂᖓᑕ ᐃᒡᓗᒥᐅᖃᑎᖏᑦ.

¹⁰ ᔨᔨᐱᐅᓪ ᐱᓪᓗᒍ, ᑖᓐᓇ ᕿᒻᒥᓄᑦ ᓂᕆᔭᐅᔪᒫᕐᐳᖅ ᓄᓇᒥ ᐃᓂᒋᔭᖓᓂ ᔨᔭᕆᐅᓪᒥ, ᑭᓇᒧᓪᓘᓐᓃᑦ ᐃᓗᕕᕐᑕᐅᔪᒫᓐᖏᓚᖅ.” ᑕᕝᕙ ᐊᖑᑦ ᑖᓐᓇ ᐅᖃᓪᓚᒌᑐᐊᕋᒥ ᐊᓂᓪᓗᓂ ᐅᓪᓚᒃᓯᕗᖅ.

¹¹ ᔨᕼᐆ ᐊᖓᔪᖅᑳᖑᖃᑎᒥᓄᑦ ᐅᑎᕐᒪᑦ ᐃᓚᖓᑦᑕ ᐊᐱᕆᕚ, “ᖃᓄᐃᑦᑐᖃᖏᒃᑲᓗᐊᕐᐹ ᓱᖕᒪᓂᓐᓇ ᑐᑮᕈᓯᒪᔪᕐᔫᔮᕐᑐᖅ ᐃᓕᖕᓂᒃ ᑕᑯᔭᕐᑐᐃᕚ?” ᔨᕼᐆᓪᓕ ᑭᐅᕚ, “ᐊᖑ ᑍᓐᓇ ᖃᐅᔨᒪᕙᓯ ᖃᓄᐃᑦᑐᓂᒡᓗ ᐅᖃᐅᓯᖃᓲᖑᖕᒪᖔᑦ ᖃᐅᔨᒪᒋᕙᓯ.”

¹² ᑖᒃᑯᐊ ᑭᐅᕗᑦ, “ᓱᓕᓐᖏᓚᑎᑦ, ᖃᐅᔨᒪᓐᖏᓚᒍᑦ ᐊᑏ ᐅᖃᐅᑎᑦᓯᐊᓚᐅᕐᑎᒍᑦ.” ᔨᕼᐆᑉ ᐅᖃᐅᑎᕔᑦ, “ᐃᒫᒃ ᑕᕝᕙ ᐅᖃᐅᑎᕙᖓ, ᐃᒫᒃ ᐊᑕᓂᖅ ᐅᖃᕐᐳᖅ, ᐅᕐᓱᒧᑦ ᒥᖑᐊᕐᐸᒋᑦ ᐊᖓᔪᖅᑳᕐᔪᐊᓐᖑᖁᓪᓗᑎᑦ ᐃᓴᕆᐊᓕᒥᐅᓄᑦ.”

¹³ ᑕᕝᕙ ᑐᐊᕖᓐᓇᖅ ᐅᓕᒡᔪᐊᒥᖕᓂᒃ ᐃᓯᕕᑦᓯᕗᑦ ᑐᖕᒥᕌᓄᑦ ᖁᖁᐊᕈᒻᒥᒡᓗ ᓂᓪᓕᕐᑎᑦᓯᓪᓗᑎᒃ ᓂᐱᖅᑯᕐᑐᓪᓗᑎᒃ ᐅᖃᕐᐳᑦ, “ᔨᕼᐆ ᐊᖓᔪᖅᑳᕐᔪᐊᖑᓕᕐᐳᖅ!”

ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᔪᕌᒥᐅᑉ ᑐᖁᑕᐅᓂᖓ

¹⁴ ᑕᕝᕙ ᔨᕼᐆ ᔨᕼᐆᓴᐸᐅᑉ ᓂᒻᓮᓪᓗ ᐃᕐᓂᖓ ᑐᖁᑦᓯᔪᒪᓕᕐᐳᖅ ᔪᕌᒥᒥᒃ, ᔪᕌᒥ ᐃᓴᕆᐊᓕᒥᐅᓪᓗ ᓴᐳᔨᑦᓯᒪᓇᓱᐊᓚᐅᕐᐳᑦ ᕌᒪᑦ-ᒋᓖᑎᒥᒃ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᕼᐊᔧᐅᓪᒧᑦ ᐱᔭᐅᓇᓱᐊᕐᑎᓪᓗᒍ.

¹⁵ ᐊᖓᔪᖅᑳᕐᔪᐊᖅ ᔪᕌᒥ ᐅᑎᓚᐅᕐᒪᑦ ᔨᔭᕆᐅᓪᒧᑦ ᐃᑭᓕᕐᑕᐅᓂᕕᓂᕐᒥᓂᒃ ᒪᒥᑦᓯᕆᐊᕐᑐᕐᓗᓂ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᕼᐊᔧᐅᓕᐅᑉ ᐅᓇᑕᕐᑎᖏᓐᓄᑦ ᐃᑭᓕᕐᑕᐅᓚᐅᕋᒥ ᐅᓇᑕᕐᓗᑎᒃ; ᔨᕼᐆ ᐅᖃᕐᐳᖅ, ᑍᒫᒃᑕᐅᖅ ᐃᓱᒪᖃᕈᑦᓯ ᐃᒡᓗᒐᓴᒡᔪᐊᓂ ᐊᓂᔪᖃᕐᑍᓕᓂᐊᕐᐳᖅ ᔨᓴᕆᐅᓪᒧᑦ ᐅᖃᕆᐊᕐᑐᖁᓇᒋᑦ ᑐᓴᕐᑎᑦᓯᔭᕐᑐᕐᓗᑎᒃ.

¹⁶ ᔨᕼᐆ ᕿᒧᒃᓯᐅᑎᒥᓄᑦ ᐊᒃᓴᓗᐊᓕᖕᒧᑦ ᐃᑭᓪᓗᓂ ᔨᔭᕆᐅᓪᒧᑦ ᐃᖏᕐᕋᓯᕗᑦ, ᔪᕌᒥ ᑍᑲᓃᒻᒪᑦ ᐋᖅᑭᒃᓯᕆᐊᕐᑐᕐᓯᒪᓪᓗᓂ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐊᕼᐊᔧᐊ ᑍᑲᓃᒃᑭᕗᖅ ᑕᑯᔭᕐᑐᕐᓯᒪᓪᓗᓂ ᔪᕌᒥᒥᒃ.

¹⁷ ᖃᐅᔨᓴᕐᑎ ᐊᕙᓗᕐᔪᐊᑉ ᔨᔭᕆᐅᓕᐅᑉ ᓇᓯᕝᕕᖓᓃᑦᑐᖅ ᑕᑯᒐᒥ ᔨᕼᐆᑯᓐᓂᒃ ᑎᑭᓴᕐᑐᕐᐸᓪᓕᐊᔪᓂᒃ ᕾᒐᓛᕐᐳᖅ ᐅᖃᕐᓗᓂ, “ᐅᓇᑕᕐᑎᓂᒃ ᕾᔪᖃᓕᕐᐳᖅ.” ᔪᕌᒻ ᑎᓕᓯᓪᓗᓂ ᐅᖃᕐᐳᖅ, “ᕿᒻᒥᕐᔪᐊᒃᑰᕐᑐᒧᑦ ᐅᐸᒃᑕᐅᓕᑦ ᐊᐱᕆᓗᒋᓪᓗ, ‘ᐅᓇᑕᕆᐊᕐᑐᖏᒃᑲᓗᐊᕐᐲᑦ?’”

¹⁸ ᑕᕝᕙ ᕿᒥᕐᔪᐊᒃᑯᑦ ᐃᑭᒪᔪᑦ ᔨᕼᐆᒥᒃ ᐹᕐᓯᒋᐊᕐᑐᓕᕐᐳᖅ, ᑲᑎᒐᒥᐅᒡᓗ ᐅᖃᐅᑎᕚ, “ᐊᖓᔪᖅᑳᕐᔪᐊᑉ ᐃᒫᒃ ᐊᐱᕆᔭᐅᖁᖕᒪᑎᑦ, ‘ᐅᓇᑕᕆᐊᕐᑐᖏᒃᑲᓗᐊᕐᐲᑦ?’” ᔨᕼᐆᑉ ᑭᐅᕚ, “ᐅᓇᑕᕐᑐᖃᕐᐸᑦ ᖃᓄᐃᓕᒐᔭᕋᕕᑦ? ᐅᑎᒧᑦ ᓵᓪᓗᑎᑦ ᑭᖑᓂᑦᑎᓐᓂ ᒪᓕᓕᕆᑦ!” ᖃᐅᔨᓴᕐᑎ ᐊᕙᓗᕐᔪᐊᑉ ᓇᓯᕝᕕᖓᓃᑦᑐᖅ ᐅᖃᕐᐳᖅ, “ᐸᕐᕆᐊᕐᑎᑕᕗᑦ ᑎᑭᐅᑎᔫᒐᓗᐊᖅ ᑭᓯᐊᓂ ᐅᑎᕐᐸᓪᓕᐊᖏᑦᑐᖅ.”

¹⁹ ᑕᕝᕙ ᐊᖓᔪᖅᑳᕐᔪᐊᖅ ᑎᓕᓯᒃᑲᓐᓂᕆᕗᖅ ᕿᒻᒥᕐᔪᐊᒃᑰᕐᑐᒥᒃ, ᑍᒃᑯᓄᖓᓗ ᑎᑭᐅᑎᒐᒥ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᐃᒫᒃ ᐊᐱᕆᖁᔨᖕᒪᑦ, ‘ᐅᓇᑕᕆᐊᕐᑐᖏᒃᑲᓗᐊᕐᐲᑦ?’” ᔨᕼᐆᑉ ᑭᐅᕚ, “ᐅᓇᑕᕐᑐᖃᕐᐸᑦ ᖃᓄᐃᓕᒐᔭᕋᕕᑦ? ᐅᑎᒧᑦ ᓵᓪᓗᑎᑦ ᑭᖑᓂᑦᑎᓐᓂ ᒪᓕᓕᕆᑦ!”

²⁰ ᖃᐅᔨᓴᕐᑎ ᐊᕙᓗᕐᔪᐊᑉ ᓇᓯᕝᕕᖓᓃᑦᑐᖅ ᐅᖃᓕᕆᕗᖅ, “ᐸᕐᕆᐊᕐᑎᑕᕗᑦ ᑍᒃᑯᓄᖓ ᑎᑭᐅᑎᔫᒐᓗᐊᖅ ᑭᓯᐊᓂ ᐅᑎᕐᐸᓪᓕᐊᔪᓐᓃᕐᒥᔪᖅ, ᓯᕗᓕᕐᑎᖓᑦ ᔨᕼᐆᖑᖅᑰᔨᔪᖅ ᓂᒻᓮᑉ ᐃᕐᓂᖓ, ᓱᑲᑦᑐᐊᓘᓪᓗᓂ ᐃᖏᕐᕋᑎᑦᓯᔪᖅ.”

²¹ ᑕᕝᕙ ᔪᕌᒻ ᐅᖃᕐᐳᖅ, “ᕿᒧᒃᓯᐅᑎᒃᑲ ᐊᒃᓴᓗᐊᓖᑦ ᐊᑐᐃᓐᓇᕈᕐᑕᐅᓕᑦ.” ᐊᑐᐃᓐᓇᕈᕐᑕᐅᖕᒪᑕ, ᔪᕌᒻ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐊᕼᐊᔧᐊᓗ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐊᑕᐅᑦᓯᒃᑯᑦ ᐃᖏᕐᕋᓯᕘᒃ ᐊᑐᓂᑦ ᕿᒧᒃᓯᐅᑎᒥᖕᓃᓪᓗᑎᒃ ᐊᒃᓴᓗᐊᓕᖕᒥ ᔨᕼᐆᒥᒃ ᑲᑎᓯᒋᐊᕐᑐᓕᕐᓗᑎᒃ, ᑲᑎᕚᒡᓗ ᓄᓇᒥ ᓁᐹᑎᐅᑉ ᔨᔭᕆᐅᓪᒥᐅᑦ ᓄᓇᖁᑎᕕᓂᖓᓂ.

²² ᔪᕌᒻᒥᐅᓪᓗ ᔨᕼᐆ ᑕᑯᓕᕋᒥᐅᒃ ᐊᐱᕆᕚ, “ᐅᓇᑕᕆᐊᕐᑐᖏᒃᑲᓗᐊᕐᐲᑦ?” ᔨᕼᐆᑉ ᑭᐅᕚ, “ᖃᓄᖅ ᐅᓇᑕᖏᓐᓂᖃᕈᓐᓇᕐᐹ ᐊᓯᓐᓂᐊᕐᓂᖅ ᐊᖓᒃᑰᓂᕐᓗ ᐊᓈᓇᕕᑦ ᔨᔨᐱᐊᓕᐅᑉ ᐃᓕᖅᑯᓯᕆᓚᐅᕐᑕᖓ ᐱᕙᓪᓕᐊᑐᐃᓐᓇᕐᑎᓪᓗᒍ.”

²³ ᑕᕝᕙ ᔪᕌᒻ ᐅᑎᕆᐊᕐᐳᖅ ᕿᒪᒃᓯᓪᓗᓂᓗ, ᐊᕼᐊᔧᐊᓗ ᑭᖑᓕᕆᕋᑖᕐᑕᓂ ᕾᒐᓛᕐᕕᒋᕚ ᐅᖃᐅᑎᓪᓗᒍ, “ᓯᓔᕐᕆᔭᐅᕗᒍᑦ!”

²⁴ ᔨᕼᐆᑉ ᐱᓯᒃᓯᓂ ᖃᕐᔪᓕᕋᒥᐅᒃ ᔪᕌᒻ ᐱᓯᒃᐹ ᑐᐃᖏᒃᑕ ᐊᑯᓐᓂᓪᓗᐊᖏᒃᑎᒃᑯᑦ ᐆᒻᒪᑎᖅᑯᓪᓗᐊᕐᒪᒍ ᕿᒧᒃᓯᐅᑎᒥ ᐊᒃᓴᓗᐊᓕᐅᑉ ᐃᓗᐊᓄᑦ ᐅᕐᕈᕗᖅ.

²⁵ ᔨᕼᐆᑉ ᐱᑦᑳᕐ ᐃᑲᔪᕐᑎᓂ ᐅᖃᐅᑎᕚ ᕿᒧᒃᓯᐅᑎᒥᓂᒃ ᐊᐅᓚᒃᓯᔨᖁᑎᓂ, “ᑎᒥᖓ ᑎᒍᓗᒍ ᐃᒋᓚᐅᕈᒃ ᓄᓇᒧᑦ ᓁᐹᑎᐅᑉ ᔨᔭᕆᐅᓪᒥᐅᑉ ᓄᓇᖁᑎᖓᓄᑦ, ᐃᖅᑲᐅᒪᕖᑦ ᕿᒧᒃᓯᐅᑎᒥ ᐃᖏᕐᕋᑎᓪᓗᓄᒃ ᐂᕼᐊᑉᒥᒃ ᒪᓕᒡᓗᓄᑦ ᑖᑦᓱᒪ ᐊᑖᑕᖓᓂᒃ, ᐊᑕᓂᐅᑉ ᐊᑐᕈᒫᕐᑐᓂᒃ ᑖᑦᓱᒧᖓ ᐅᖃᕐᕕᒋᓚᐅᕐᓯᒪᖕᒪᑎᒃᑯᒃ;

²⁶ ᐅᖃᕐᓗᓂ, ‘ᐃᑉᐸᒃᓴᖅ ᑕᑯᓚᐅᕐᐳᖓ ᓁᐹᑎᐅᑉ ᐊᐅᖓᓂᒃ ᐃᕐᓂᖏᑕᓗ ᐊᐅᖏᓐᓂᒃ, ᐊᑕᓂᖅ ᐅᖃᕐᐳᖅ, ᑕᕝᕙᓂ ᓄᓇᒥ ᐊᑭᓖᑎᑦᓱᒫᕐᐸᒋᑦ.’ ᐊᑏ ᑎᒍᓗᒍ ᑎᒥᖓ ᑕᒪᐅᖓ ᐃᒋᓚᐅᕐᓕ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᑦ ᒪᓕᒡᓗᒋᑦ.”

ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᕼᐊᔧᐊᐅᑉ ᑐᖁᑕᐅᓂᖓ

²⁷ ᐊᕼᐊᔧᐊ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᑕᑯᒐᒥ ᔪᕌᒥᐅᑉ ᖃᓄᐃᓕᐅᕐᑕᐅᓂᖓᓂᒃ ᕿᒪᒃᓯᕗᖅ ᐊᖅᑯᑎᒃᑯᑦ ᐱᐊᔅ ᕼᐃᒐᓐ-ᒧᐊᕐᑐᒃᑯᑦ. ᔨᕼᐆᑉ ᒪᓕᒃᐹ, ᕾᒐᓛᕐᓗᓂᓗ, “ᑐᖁᑕᐅᓕ ᕿᒧᒃᓯᐅᑎᒥᓂ ᐊᒃᓴᓗᐊᓕᖕᒥ ᐃᑭᒪᑎᓪᓗᒍ!” ᐃᑭᓕᕐᑕᐅᕗᖅ ᒎᕐᒧᑦ ᑎᑭᐅᑎᓕᕋᓗᐊᕐᑎᓪᓗᒍ ᐃᑉᓖᒻ ᖃᓂᒋᔭᖓᓂ, ᐱᔭᐅᓐᖏᓚᕐᓕ ᓄᓇᒧᑦ ᒥᒌᑐᒧᐊᕐᓗᓂ, ᑕᕝᕙᓂ ᑐᖁᕗᖅ.

²⁸ ᑭᒡᒐᖏᓐᓄᑦ ᑎᒥᖓ ᐱᔭᐅᓪᓗᓂ ᕿᒧᒃᓯᐅᑎᒃᑯᑦ ᐊᒃᓴᓗᐊᓕᒃᑯᑦ ᔨᕉᓴᓕᓕᐊᕈᑦᔭᐅᕗᖅ. ᑍᑲᓂᓗ ᐃᓗᕕᕐᑕᐅᕗᖅ ᓯᕗᓕᕕᓂᖏᑕ ᐃᓗᕕᖃᕐᕕᖓᓂ ᑍᕕᑎᐅᑉ ᐃᒡᓗᒐᓴᖏᓐᓂ.

²⁹ ᔪᕌᒻ ᐂᕼᐊᑉ ᐃᕐᓂᖓ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 11ᓂ, ᐊᕼᐊᔧᐊ ᐊᖓᔪᖅᑳᕐᔪᐊᓐᖑᕐᑎᑕᐅᓚᐅᕐᐳᖅ ᔫᑕᒥᐅᓄᑦ.

³⁰ ᔨᕼᐆᓕ ᔨᔭᕆᐅᓪᒧᐊᕋᒥ ᔨᔨᐱᐊᓕᒧᐊᕐᐳᖅ, ᔨᔨᐱᐊᓕ ᑐᓴᕐᑎᑕᐅᒐᒥ ᑎᑭᑦᑐᒥᒃ, ᐃᔩᖕᓂ ᐱᐅᓴᓚᐅᕐᐹᒃ ᓄᔭᓂᓗ ᐋᖅᑭᒃᓱᕆᐊᕇᕋᒥᒋᑦ ᐃᒐᓛᒃᑯᑦ ᐃᑦᓱᐊᕐᐳᖅ.

³¹ ᔨᕼᐆ ᐃᑎᕐᑕᕐᕕᒃᑯᑦ ᐃᑎᓕᕐᑎᓪᓗᒍ ᐊᐱᕆᕚ, “ᔨᒻᕇ ᐅᓇᑕᕆᐊᕐᑐᓐᖏᓚᑏᑦ? ᑐᖁᑦᓯᔨᐅᕗᑎᑦ ᐊᖓᔪᖅᑳᕐᓂᒃ.”

³² ᔩᕼᐆ ᖁᒻᒧᑦ ᐃᒐᓛᒧᑦ ᑕᑯᓴᕐᓗᓂᓗ ᐊᐱᕆᕗᖅ, “ᑭᓇᒃᑯᑦ ᐅᕙᓐᓂᒃ ᑕᐱᖃᕐᐹᑦ?” ᑕᕝᕙ ᒪᕐᕈᑐᐃᓐᓇᐅᖏᑦᑑᒃ ᐊᖓᔪᖅᑳᕐᔪᐊᑉ ᐃᓄᖁᑎᖏᑦ ᐃᒐᓛᑯᑦ ᐃᑦᑐᐊᕐᐳᑦ.

³³ ᔨᕼᐆᑉ ᕾᒐᓛᕐᕕᒋᕔᑦ, “ᐃᒐᓛᒃᑯᑦ ᐃᒋᓪᓗᒍ ᑲᑕᒃᑎᓚᐅᕐᓯᐅᒃ!” ᑕᕝᕙ ᔨᓴᐱᐅᓪ ᐱᖑᕚᑦ, ᒪᓂᖅᑲᒧᑦ ᑐᓐᓇᒥ ᐊᐅᖓᑕ ᓯᕐᐹᕿᓂᑯᖓᓄᑦ ᐃᒡᓘᑉ ᐊᑭᓐᓇᖓ ᐊᐅᒥᑦᑕᕐᐳᖅ ᕿᒥᕐᔪᐊᓄᓪᓗ ᑐᓪᓕᕋᕐᑕᐅᑦᓴᐅᑎᒋᓪᓗᓂ.

³⁴ ᔨᕼᐆ ᐃᑎᕐᓗᓂ ᓂᕆᓕᕐᐳᖅ, ᐅᖃᕐᓗᓂᓗ, “ᒫᓐᓇ ᑍᓐᓇ ᐊᕐᓇᕈᓗᒃ ᐃᓱᒪᓂᕐᓗᒃᑕᐅᓯᒪᔪᖅ ᑲᒪᒋᒋᐊᕐᓯᐅᒃ ᐃᓗᕕᕐᓂᐊᕐᐸᓯ, ᐊᖓᔪᖅᑳᕐᔪᐊᕐᒧᑦ ᐸᓂᒋᔭᐅᖕᒪᑦ.”

³⁵ ᐃᓗᕕᕐᓯᔭᕐᑐᕐᑐᑦ ᐊᓂᒐᒥᒃ ᑎᒥᖓᓂᒃ ᑕᑯᓚᐅᓐᖏᓚᑦ, ᓂᐊᖁᕕᓂᖓ ᐊᒡᒐᕕᓂᖏᓪᓗ ᐃᑎᒐᕕᓂᖏᓪᓗ ᑖᒃᑯᑐᐊᑦ ᐊᒥᐊᒃᑰᔪᑦ ᑕᑯᕔᑦ.

³⁶ ᐃᒡᓗᒧᑦ ᐃᑎᕇᕋᒥᒃ ᔨᕼᐆ ᑕᒪᑐᒥᖓ ᐅᖃᐅᑎᕚᑦ, ᔨᕼᐆ ᐅᖃᕐᐳᖅ, “ᑕᒪᑦᔭ ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᐅᖃᕐᑎᒥᒍᑦ ᐃᓔᑦᔭᒃᑯᑦ ᑎᓯᐰᑎᒥᐅᑕᒃᑯᑦ, ‘ᔨᔭᕆᐅᓪᒥ ᕿᒻᒥᓄᑦ ᔨᔨᐱᐊᓕᐅᑉ ᑎᒥᖓ ᓂᕆᔭᐅᔪᒫᕐᐳᖅ;

³⁷ ᔨᓴᐱᐅᓕᐅᑉ ᑎᒥᖓ ᒪᓂᖅᑲᒥ ᑕᒫᓃᕐᕆᔪᒫᕐᐳᖅ ᔨᔭᕆᐅᓪᒥ, ᓇᓪᓕᐊᑦ ᐅᖃᕈᓐᓇᕈᒫᓐᖏᓚᖅ ᐅᓇ ᑕᕝᕙ ᔨᔨᐱᐊᓕᐅᑉ ᑎᒥᖓ.’”