ᐊᑕᓃᑦ ᐂᑉᐸᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᕐᓇᐅᑉ ᓲᓇᒤᑎᒥᐅᑕᐅᑉ ᓄᓇᒥᓄᑦ ᐅᑎᕐᓂᖓ

¹ ᐃᓔᓴ ᐅᖃᐅᑦᔨᓚᐅᕐᐳᖅ, ᐊᕐᓇᒥᒃ ᐃᕐᓂᖓᓂᒃ ᐆᒻᒪᕐᑎᑦᓯᕕᒋᓚᐅᕐᑕᒥᓂᒃ, “ᐃᓚᑎᑦ ᐃᓚᒋᓗᒋᑦ ᐊᐅᓪᓚᓕᕆᑦᓯ ᑕᐅᕙᓃᑬᓐᓇᕐᓗᓯᓗ ᓄᓇᒋᔪᓐᓇᕐᑕᑦᓯᓐᓂ, ᐊᑕᓂᖅ ᑳᖕᓇᕐᑐᕐᔪᐊᖃᕐᑎᑦᓯᓂᐊᕐᓂᕋᕐᓗᓂ ᐅᖃᕐᓯᒪᖕᒪᑦ ᐊᕐᕌᒍᓂᒃ 7ᓂᒃ ᓄᓇᒥ ᑕᒫᓂ.”

² ᐊᕐᓇᕐᓗ ᓈᓚᒡᓗᓂ ᒎᑎᐅᑉ ᐃᓄᖁᑎᖓᑕ ᐅᖃᐅᓯᖏᓐᓂᒃ ᐊᐅᓪᓛᓯᕗᖅ, ᐃᓚᓕᒫᓂ ᐱᖃᑎᒋᓪᓗᒋᑦ ᓄᓇᑖᕆᐊᕐᑐᕐᐳᖅ ᐱᓕᔅᑍᓂᒥᐅᑦ ᓄᓇᖓᓂ ᐊᕐᕌᒍᓂᒃ 7ᓂᒃ ᓇᔪᕐᓂᐊᓕᕐᓗᒍ.

³ ᐊᕐᕌᒍᐃᑦ 7 ᓈᖕᒪᑕ ᓄᓇᒥᓄᑦ ᐅᑎᓕᓚᐅᕆᕗᖅ ᐱᓕᔅᑍᓂᒥᐅᑦ ᓄᓇᖓᓐᓂᑦ ᐱᓪᓗᓂ ᐊᖓᔪᖅᑳᕐᔪᐊᕐᒧᓪᓗ ᐂᕗᖅ ᓄᓇᖁᑎᒋᓚᐅᕐᑕᒥᓂᒃ ᐃᒡᓗᒥᓂᒡᓗ ᐅᑎᕐᑎᑦᓯᕕᐅᔪᒪᓪᓗᓂ.

⁴ ᐊᖓᔪᖅᑳᕐᔪᐊᖅ ᐅᖃᖃᑎᖃᓚᐅᕐᐳᖅ ᒋᕼᐊᔨᒥᒃ ᒎᑎᐅᑉ ᐃᓄᖁᑎᖓᑕ ᐱᔨᖓᓂᒃ ᐊᐱᕐᓱᕐᐹᓗ, “ᐅᖃᐅᑎᓚᐅᓐᖓ ᐃᓔᓴᐅᑉ ᑲᒪᓇᕐᑐᓂᒃ ᐱᓇᓱᐊᖃᑦᑕᕐᓯᒪᔭᓕᒫᖏᓐᓂᒃ.”

⁵ ᒋᕼᐊᔨᐅᑉ ᐊᖓᔪᖅᑳᕐᔪᐊᖅ ᐅᓂᒃᑲᐅᑎᕚ, ᐃᓔᓴᐅᑉ ᑐᖁᖓᔪᓂᒃ ᐅᒻᒫᕐᑎᑦᓯᖃᑦᑕᕐᓯᒪᓂᖓᓂᒃ ᑖᑦᓱᒪᓗ ᐊᕐᓇᐅᑉ ᓄᓇᖁᑎᒥᓂᒃ ᐃᒡᓗᒥᓂᒡᓗ ᐅᑎᕐᑎᑦᓯᕕᐅᔪᒪᓪᓗᓂ ᐊᖓᔪᖅᑳᕐᔪᐊᕐᒧᐊᕐᑑᑉ ᐃᕐᓂᖓᓂᒃ ᐆᒻᒪᕐᑎᑦᓯᓚᐅᕐᓯᒪᓂᖓᓂᒃ. ᒋᕼᐊᔨᐅᑉ ᐅᖃᐅᑎᕚ, “ᑖᓐᓇ ᑕᕝᕙ ᐊᕐᓇᖅ ᐊᑕᓃᖅ ᐊᖓᔪᖅᑳᕐᔪᐊᖅ, ᐅᓇ ᑕᕝᕙ ᐃᕐᓂᖓ ᐃᓔᓴᐅᑉ ᐆᒻᒪᕐᑎᓚᐅᕐᓯᒪᔭᖓ.”

⁶ ᐊᖓᔪᖅᑳᕐᔪᐊᓪᓗ ᐊᕐᓇᖅ ᑕᒪᑐᒥᖓ ᐊᐱᕐᓱᒃᑲᓐᓂᕐᐹ, ᐊᕐᓇᐅᓪᓗᑦᑕᐅᖅ ᐅᓂᒃᑲᐅᑎᑦᓯᐊᕐᐹ ᑕᒪᑐᒥᖓ. ᑕᕝᕙ ᐊᖓᔪᖅᑳᕐᔪᐊᖅ ᐊᖓᔪᖅᑳᖁᑎᒥᓂᒃ ᑎᓕᓯᕗᖅ ᐊᕐᓇᐅᑉ ᐱᔪᒪᔭᖏᓐᓂᒃ ᑲᒪᓂᐊᕐᑐᒥᒃ, ᐅᖃᕐᓗᓂᓗ, “ᐊᕐᓇᐅᑉ ᐱᒋᓚᐅᕐᑕᓕᒫᖏᑦ ᐅᑎᕐᑎᑕᐅᓕᑦ ᑮᓇᐅᔭᓕᐊᕆᓚᐅᕐᑕᖏᓪᓗ ᓄᓇᖁᑎᒥᓄᑦ ᐅᓪᓗᒥᑦ ᑍᑦᓱᒪᓐᖓᑦ ᐊᐅᓪᓚᕐᕕᒋᓚᐅᕐᑕᖓᓂᑦ ᐱᒋᐊᕐᓗᒋᑦ ᐅᓪᓗᒥᒧᑦ ᑎᑭᑦᑐᓂᒃ ᑐᓂᔭᐅᓗᓂ.”

ᐃᓔᓴᓗ ᐊᖓᔪᖅᑳᕐᔪᐊᕐᓗ ᐱᓐᕼᐊᑖᑦ ᓯᕆᐊᒥᐅᖅ

⁷ ᐃᓔᓴ ᑕᒫᓯᑰᓯᒧᑦ ᐂᕗᖅ ᐊᖓᔪᖅᑳᕐᔪᐊᖅ ᐱᓐᕼᐊᑖᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᑲᓂᒪᑎᓪᓗᒍ, ᐊᖓᔪᖅᑳᕐᔪᐊᖅ ᑐᓴᕐᑎᑕᐅᕗᖅ ᐃᓔᓴᐅᑉ ᓄᓇᒥᖕᓃᓐᓂᖓᓂᒃ,

⁸ ᐃᑲᔪᕐᑎᒥ ᐃᓚᖓᑦ ᕼᐊᔧᐅᓪ ᐅᖃᐅᑎᕚ, “ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᑐᓂᕐᕈᑎᒃᓴᒡᒋᕐᓗᑎᑦ ᐂᓚᐅᕆᑦ ᖃᐅᔨᓇᓱᐊᕐᕕᒋᓂᐊᕋᕕᐅᒃ ᐋᖅᑭᓛᕐᒪᖔᕐᒪ ᐋᖅᑭᓛᖏᒻᒪᖔᕐᒪᓘᓐᓃᑦ.”

⁹ ᑕᕝᕙ ᕼᐊᔧᐅᓪ ᑳᒥᓕᖕᓂᒃ 40ᓂᒃ ᓇᖕᒥᕐᓱᐃᓚᐅᕐᐳᖅ ᐱᒃᑯᒥᓇᕐᓂᕐᐹᓂᒃ ᑕᒫᓯᑰᓯᒥᐅᓂᑦ ᐱᓯᒪᔪᓂᒃ ᐃᓔᓴᒧᐊᕐᓗᓂᓗ. ᕼᐊᓯᐊᓕᐅᑉ ᐃᓔᓴ ᑲᑎᒐᒥᐅᒃ, ᐅᖃᐅᑎᕚ, “ᐃᓄᖁᑏᑦ ᓯᕆᐊᒧᑦ ᐊᖓᔪᖅᑳᕐᔪᐊᖅ ᐱᓐᕼᐊᑖᑎᐅᑉ ᑎᓕᕚᖓ ᐊᐱᕆᖁᓪᓗᓂᖓ ᖃᓂᒻᒪᓯᕐᒥᓂᑦ ᐋᖅᑭᖕᓂᐊᕐᒪᖔᕐᒥ ᐋᖅᑭᑦᔮᔪᓐᓃᕐᒪᖔᕐᒥᓗ ᑐᑭᓯᔪᒪᓪᓗᓂ.”

¹⁰ ᐃᓔᓴᐅᑉ ᑭᐅᕚ, “ᐂᓕᕆᑦ, ᐅᖃᐅᑎᓗᒍᓗ ᐋᖅᑭᖕᓂᐊᕐᐳᑎᑦ; ᐊᑕᓂᐅᓪᓕ ᑕᑯᑎᓚᐅᕐᐹᖓ ᐃᓅᑦᔮᖏᓐᓂᖓᓂᒃ.”

¹¹ ᐃᓔᓴᐅᑉ ᕼᐊᓯᐊᓪ ᑕᑯᓐᓇᑐᐃᓐᓇᓕᕐᒪᒍ ᑮᓇᕐᓕᕐᓯᒪᔪᕐᔪᐊᖑᓪᓗᓂ ᕼᐊᓯᐊᓪ ᑲᓐᖑᓱᓕᕐᐳᖅ, ᑕᕝᕙ ᒎᑎᐅᑉ ᐃᓄᖁᑎᖓ ᓮᒪᔪᓐᓇᕈᓐᓃᕋᒥ ᖁᕝᕕᐅᓕᕐᐳᖅ.

¹² ᕼᐊᔧᐅᓪᓗ ᐊᐱᕆᓕᕐᐹ, “ᓱᖕᒪᑦ ᐊᑕᓂᕋ ᖁᕝᕕᐅᕐᐹ?” ᐃᓔᓴᐅᑉ ᑭᐅᕚ, “ᖃᐅᔨᒪᒐᒪ ᐃᓴᕆᐊᓕᒥᐅᓂᒃ ᐱᑦᓯᐊᖏᑦᓱᒫᕋᕕᑦ, ᐃᑯᐊᓪᓔᔪᒫᕐᐳᑎᑦ ᐃᒡᓗᒐᓴᖁᑎᖏᓐᓂᒃ ᐱᔭᐅᑦᔧᕐᓯᒪᔪᓂᒃ, ᐅᕕᒐᕐᑐᖁᑎᖏᓪᓗ ᑐᖁᕋᕈᒫᕐᐸᑎᑦ ᓴᕕᒡᔪᐊᕐᒧᑦ, ᓄᑕᕋᖏᓪᓗ ᐃᖅᑲᑦᑖᕆᓗᒋᑦ ᑐᖁᑦᓱᒫᕐᐸᑎᑦ, ᐊᕐᓇᖏᓪᓗ ᓄᑕᕋᒃᓴᓖᑦ ᓈᖏᑦ ᓰᒡᓗᒋᑦ ᐊᕐᒪᕐᑎᕈᒫᕐᐸᑎᑦ.”

¹³ ᕼᐊᔧᐅᓪᓗ ᐅᖃᐅᑎᕚ, “ᖃᓄᕐᓕ ᑭᒡᒐᕆᔧᑦ, ᕿᒻᒥᐅᖏᓪᓗᓂ ᑍᒫᓗᐊᕌᓗᒃ ᐱᔪᓐᓇᕈᒫᕐᐹ?” ᐃᓔᓴᐅᑉ ᑭᐅᕚ, “ᐊᑕᓂᐅᑉ ᑕᑯᑎᑦᓴᕇᓚᐅᕐᒪᖓ, ᓯᕆᐊᒥᐅᓄᑦ ᐊᖓᔪᖅᑳᕐᔪᐊᓐᖑᕈᒫᕐᓂᕐᓂᒃ.”

¹⁴ ᑕᕝᕙ ᕼᐊᓯᐊᓕ ᐃᓔᓴ ᕿᒪᒡᓗᒍ ᐊᖓᔪᖅᑳᒥᓄᑦ ᐅᑎᕐᐳᖅ ᐱᓐ-ᕼᐊᑖᑦ ᐊᐱᕆᖕᒪᒍ, “ᖃᓄᖅ ᐃᓔᓴᒧᑦ ᐅᖃᐅᑎᔭᐅᕕᑦ?” ᕼᐊᓯᐊᓪ ᑭᐅᕗᖅ, “ᖃᓄᐃᑦᑐᓐᓃᕐᓂᐊᕐᑐᑎᒡᒎᖅ.”

¹⁵ ᖃᐅᑎᓪᓗᒍᓕ ᕼᐊᔧᐅᓪ ᖃᓪᓗᓈᕐᑕᒥᒃ ᖃᐅᓯᓕᕐᑎᑦᓯᓚᐅᕐᓗᓂ ᐊᖓᔪᖅᑳᕐᔪᐊᑉ ᑮᓇᖓ ᑖᑦᓱᒧᖓ ᒪᑐᓪᓗᒍ ᐃᐱᑎᒻᒪᒍ ᑐᖁᕗᖅ. ᕼᐊᓯᐊᓕᐅᓪᓗ ᐃᓇᖏᕐᓗᒍ ᐊᖓᔪᖅᑳᕐᔪᐊᓐᖑᕐᐳᖅ.

ᐊᖓᔪᖅᑳᕐᔪᐊᖅ ᔨᕼᐅᕌᒻ ᔫᑕᒥᐅᖅ

¹⁶ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᔪᕌᒥᐅᑉ ᐂᕼᐊᑉ ᐃᕐᓂᖓᑕ ᐊᐅᓚᑦᓯᓂᖓᑦᑕ ᐊᕐᕌᒍᑦ ᑕᓪᓕᒪᖓᓐᓂ ᔨᕼᐆᓴᐸᑦ ᐊᖓᔪᖅᑳᕐᔪᐊᕆᔭᐅᑎᓪᓗᒍ ᔫᑕᒥᐅᓄᑦ. ᔨᕼᐅᕌᒥ ᔨᕼᐆᓴᐸᐅᑉ ᐃᕐᓂᖓ ᐊᐅᓚᑦᓯᓕᕐᐳᖅ ᔫᑕᒥ.

¹⁷ ᔨᕼᐅᕌᒻ ᐊᕐᕌᒍᖃᕐᓗᓂ 32ᓂᒃ ᐊᖓᔪᖅᑳᕐᔪᐊᓐᖑᕐᐳᖅ, ᔨᕉᓴᓕᒥᓗ ᐊᐅᓚᑦᓯᓚᐅᑦᐳᖅ ᐊᕐᕌᒍᓂᒃ 8ᓂᒃ.

¹⁸ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᕆᖃᑦᑕᕐᓯᒪᔭᖏᑕ ᐃᓕᖅᑯᓯᖏᓐᓂᒃ ᒪᓕᑐᐃᓐᓇᓚᐅᕐᐳᖅ ᐊᖓᔪᖅᑳᕐᔪᐊᑉ ᐂᕼᐊᐱᐅᑉ ᐱᐅᓯᕆᕙᓚᐅᕐᑕᖏᓐᓂᒃ, ᓄᓕᐊᓂᓚᐅᕐᒪ ᐂᕼᐊᐱᐅᑉ ᐸᓂᖓᓂᒃ. ᐱᓇᓱᐊᕐᓂᖃᕐᓗᓂᓗ ᐊᑕᓂᐅᑉ ᓵᖓᓂ ᓈᒻᒪᒋᓐᖏᑕᖏᓐᓂᒃ.

¹⁹ ᑍᒤᒃᑲᓗᐊᕐᑎᓪᓗᒍ ᐊᑕᓂᐅᑉ ᔫᑕᒥᐅᑦ ᐊᓯᕈᕈᒪᓚᐅᓐᖏᓔᑦ, ᑍᕕᑎ ᐱᔨᓂ ᐱᓪᓗᒍ, ᐊᖏᕐᓯᒪᓚᐅᕋᒥ ᑍᕕᑎ ᖃᐅᒻᒪᖁᑎᐅᖁᓪᓗᒍ ᑭᖑᕚᖏᓐᓄᑦ ᑎᑭᑦᑐᒥᒃ ᐃᓱᖃᖏᑦᑐᒧᑦ.

²⁰ ᔨᕼᐅᕌᒻ ᐊᖓᔪᖅᑳᕐᔪᐊᖑᑎᓪᓗᒍ, ᐄᑐᒥᒥᐅᑦ ᐊᑭᕋᕐᑐᓕᕐᐳᑦ ᔫᑕᐅᑉ ᐊᖓᔪᖅᑲᐅᕕᖓᓂᒃ, ᐃᒻᒥᖕᓂᒡᓗ ᐊᖓᔪᖅᑳᕐᔪᐊᕐᑖᕐᐳᑦ.

²¹ ᑕᕝᕙ ᔨᕼᐅᕌᒥ ᔨᐊᒧᑦ ᐅᐸᒃᑐᓕᓚᐅᕐᐳᖅ ᐅᓐᓄᐊᒃᑯᑦ ᑎᕐᓕᐊᕈᑎᓪᓗᑎᒃ ᕿᒧᒃᓯᐅᑎᓕᒫᓂ ᐊᒃᓴᓗᐊᓖᑦ ᐊᑐᕐᓗᓂᒋᑦ, ᐄᑐᒥᒥᐅᓪᓗ ᐅᓇᑕᕐᑐᒃᓴᖁᑎᖏᓐᓄᑦ ᐊᕙᓗᔭᐅᕗᑦ, ᐄᑐᒥᒥᐅᓂᒃ ᐊᕙᓗᓯᓯᒪᔪᓂᒃ ᐅᓇᑕᕆᐊᕐᐳᑦ ᐊᓂᒎᑎᒐᓗᐊᕐᑎᓪᓗᒋᑦ, ᐅᓇᑕᕐᑎᖁᑎᖏᑦ ᕿᒧᒃᓯᐅᑎᓖᓪᓗ ᐊᒃᓴᓗᐊᓕᖕᓂᒃ ᓄᓇᒥᖕᓄᑦ ᕿᒫᑐᐃᓐᓇᕐᐳᑦ.

²² ᑍᒤᒻᒪᑦ ᐅᓪᓗᒥᒧᑦ ᑎᑭᓪᓗᒍ ᐄᑐᒥᐅᑦ ᔫᑕᒥᐅᓄᑦ ᐊᑭᕋᕆᓕᐅᑎᓯᒪᕗᑦ, ᓕᑉᓇᒥᐅᓪᓗᑕᐅᖅ ᐊᑭᕋᕆᓕᐅᑎᓚᐅᕆᕗᑦ ᑍᑦᓱᒪᓂᑦᓮᓐᓇᖅ.

²³ ᔨᕼᐅᕌᒥᐅᑦ ᐱᓂᐊᕐᓂᕆᓯᒪᔭᖏᑦ ᑎᑎᕋᕐᑕᐅᓯᒪᕗᑦ ᔫᑕᒥᐅᑦ ᐊᖓᔪᖅᑳᕐᔪᐊᕆᕙᒃᑕᕕᓂᖏᑕ ᑎᑎᕋᖁᑎᖏᓐᓂ.

²⁴ ᔨᕼᐅᕌᒥ ᑐᖁᖕᒪᑦ ᐃᓗᕕᕐᑕᐅᕗᖅ ᓯᕗᓕᕕᓂᖏᑦᑕ ᐊᖓᔪᖅᑳᕐᔪᐊᑦ ᐃᓗᕕᕐᑕᐅᓯᒪᕕᖏᓐᓂ ᑍᕕᑎᐅᑉ ᐃᒡᓗᒐᓴᖏᓐᓂ. ᐃᕐᓂᖓᓗ ᐊᕼᐊᔧᐊ ᐊᖓᔪᖅᑳᕐᔪᐊᖑᓂᖓᓄᑦ ᐃᓇᖏᐅᑎᕗᖅ.

ᐊᖓᔪᖅᑳᕐᔪᐊᑉ ᐊᕼᐊᔧᐊᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥᐅᓄᑦ

²⁵ ᔪᕌᒥᐅᑉ ᐂᕼᐊᐱᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᑦ 12ᖓᓐᓂ, ᐊᕼᐊᔧᐊ ᔨᕼᐅᕌᒥᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᔫᑕᒥ.

²⁶ ᐊᕼᐊᔧᐊ 22ᓂᒃ ᐊᕐᕌᒍᖃᕐᓗᓂ ᐊᖓᔪᖅᑳᕐᔪᐊᓐᖑᕐᐳᖅ. ᐊᖓᔪᖅᑳᕐᔪᐊᖑᕗᕐᓗ ᔨᕉᓴᓕᒥ ᐊᕐᕌᒍᒥᒃ ᐊᑕᐅᓯᕐᒥᒃ. ᐊᓈᓇᖓ ᐊᑎᖃᕐᐳᖅ ᐊᑕᓔᐊᒥᒃ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᒻᕆᐅᑉ ᐃᕐᖑᑕᖓᓂᒃ.

²⁷ ᐂᕼᐊᐱᐅᓪᓗ ᐃᓚᒌᑦ ᐃᓕᖅᑯᓯᖓᓐᓂᒃ ᐊᑐᑐᐃᓐᓇᕐᐳᖅ ᐊᑕᓂᐅᑉ ᓈᒻᒪᒋᓐᖏᑕᖏᓐᓂᒃ ᐃᓕᖅᑯᓯᖃᕐᓗᓂ ᑍᒫᒃᑕᐅᖅ ᐂᕼᐊᑉ ᐃᓚᖏᑕᓗ ᐱᐅᓯᕆᓯᒪᔭᖏᑎᑐᑦ, ᓄᓕᐊᒥᓄᑦ ᐂᕼᐊᑉᑯᓐᓄᑦ ᓂᖓᐅᒋᔭᐅᓚᐅᕋᒥ.

²⁸ ᐊᖓᔪᖅᑳᕐᔪᐊᖅ ᐊᕼᐊᔧᐊ ᐊᖓᔪᖅᑳᕐᔪᐊᕐᒥᒃ ᔪᕌᒻᒥᒃ ᐂᕼᐊᐱᐅᑉ ᐃᕐᓂᖓᓂᒃ ᑕᐱᖃᕐᓗᓂ ᐅᓇᑕᕆᐊᖃᑎᖃᕐᐳᖅ, ᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᕼᐊᔧᐅᓪᒥᒃ ᕌᒪᑦ-ᒋᓖᑎᒃᑯᑦ ᓄᓇᖓᓄᑦ. ᓯᕆᐊᒥᐅᓪᓗ ᔪᕌᒻ ᐃᑭᓕᕐᐹᑦ.

²⁹ ᐊᖓᔪᖅᑳᕐᔪᐊᖅ ᔪᕌᒥ ᓄᓇᒥᓄᑦ ᔨᔭᕆᐅᓪᒧᑦ ᐅᑎᕐᐳᖅ ᐋᖅᑭᒃᓯᕆᐊᕐᑐᕐᓗᓂ ᐃᑭᓕᕐᑕᐅᓯᒪᓂᕐᒥᓂᑦ ᓯᕆᐊᒥᐅᑦ ᐅᓇᑕᕐᑎᖏᓐᓄᑦ, ᐃᑭᓕᕐᑕᐅᓂᕕᓂᕐᒥᓂᒃ ᐅᓇᑕᕐᓗᑎᒃ ᕌᒪᒥ. ᑕᕝᕙ ᕼᐊᔧᐆᑉ ᔨᕼᐅᕌᒥᐅᑉ ᐃᕐᓂᖓᑕ ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᑕᑯᔭᕐᑐᕐᐹ ᔨᕉᓴᓕᒧᑦ, ᐃᑭᓕᕐᑕᐅᓯᒪᓂᖓ ᐱᑦᔪᑎᒋᓪᓗᒍ, ᖃᓂᒪᓚᐅᕐᒪᑦ.