ᐊᑕᓃᑦ ᐂᑉᐸᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᓔᓴ ᐅᖃᕐᐳᖅ, “ᐊᑕᓂᐅᑉ ᐅᖃᐅᓯᕆᔭᖏᑦ ᑐᓴᓕᕐᓯᐅᒃ ᐃᒫᒃ ᐅᖃᕐᒪᑦ, ᖃᐅᒃᐸᑦ ᑍᒤᓪᓗᐊᓕᕐᑎᓪᓗᒍ ᓂᐊᖂᔭᒃᓴᖅ ᓯᖃᓪᓕᑦᓯᐊᕐᓯᒪᔪᖅ 10ᓂᒃ ᐅᖁᒤᓐᓂᓕᒃ ᑮᓇᐅᔭᒧᑦ ᓯᐅᓪᕕᕆᒧᑦ ᐊᑕᐅᓯᕐᒧᑦ ᓂᐅᕕᐊᖑᔪᓐᓇᓛᓕᕐᐳᖅ; ᓂᐊᖂᔭᒃᓴᕐᓗ ᐹᕐᓕᒥᒃ ᐊᑎᓕᒃ ᑮᓇᐅᔭᒧᑦ ᓯᐅᓪᕕᕆᒧᑦ ᐊᑕᐅᓯᕐᒧᑦ ᓂᐅᕕᐊᖑᔪᓇᓛᓕᕐᐳᖅ ᓴᒥᐊᕆᐊᒥᐅᑦ ᐃᒡᓗᒐᓴᖏᓐᓂ.”

² ᐅᓇᑕᕐᑏᑦ ᐊᖓᔪᖅᑳᖓ ᐊᖓᔪᖅᑳᔪᐊᑉ ᐊᒃᑐᐊᔭᖓ ᑕᓕᕐᒥᓄᑦ ᒎᑎᐅᑉ ᐃᓄᖁᑎᖓᓄᑦ ᐅᖃᕐᐳᖅ, “ᑕᑯᒋᑦ, ᐊᑕᓂᐅᑉ ᕿᓚᒃ ᐅᒃᑯᐃᕐᓗᒍ ᑯᕕᑎᑦᓯᒐᔭᕋᓗᐊᕐᐹ ᓂᕿᒃᓴᓂᒃ, ᑕᒪᓐᓇ ᐅᖃᐅᓯᕆᔧᑦ ᐊᑑᑎᓕᕈᓐᓇᕋᔭᕐᐹ?” ᐃᓔᓴᐅᑉ ᑭᐅᕚ, ᓇᖕᒥᓂᖅ ᐃᔨᖕᓄᑦ ᑕᒪᓐᓇ ᑕᑯᓛᕐᐸᑦ ᑭᓯᐊᓂᓕ ᐅᖁᒻᒥᕐᓯᕕᒋᔪᒫᓐᖏᓚᑦ.

ᓯᕆᐊᒥᐅᑦ ᐅᓇᑕᕐᑎᖏᑕ ᕿᒫᓂᖏᑦ

³ ᓯᑕᒪᓂᒃ ᐊᖑᑎᑕᖃᓚᐅᕐᐳᖅ ᐅᕕᓂᕐᓗᒍᑎᖃᕐᑐᓂᒃ ᐋᖅᑭᒃᑕᐅᔪᓐᓇᖏᑦᑐᒥᒃ ᐸᕐᑎᕐᓂᕐᒥᒃ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖓᑕ ᓯᓚᑖᓂᑦᑐᓂᒃ, ᑖᒃᑯᐊ ᐃᒻᒥᖕᓄᑦ ᐅᖃᕐᐳᑦ, “ᓱᖕᒪᑦ ᑕᒫᓂ ᑐᖁᑦᓯᑐᐃᓐᓇᕐᐱᑖ?

⁴ ᐃᒡᓗᒐᓴᒡᔪᐊᓄᑦ ᐃᑎᕈᒪᒐᓗᐊᕈᑦᑕ ᑳᒃᑐᐊᓘᖕᒪᑕ ᑐᖁᑐᐃᓐᓇᕐᓂᐊᕐᐳᒍᑦᑕᐅᖅ, ᑕᒫᓃᑐᐃᓐᓇᕋᓗᐊᕈᑦᑕᓗ ᓱᓕ ᑐᖁᕕᒃᓴᑦᑎᓐᓃᑉᐳᒍᑦ, ᐊᑏ ᓯᕆᐊᒥᐅᑦ ᑕᖕᒫᕐᓯᒪᕕᖓᓄᑦ ᐂᓗᑕ ᐅᕙᑦᑎᓐᓂᒃ ᑎᒍᔭᐅᑎᑐᐃᓐᓇᓚᐅᕐᑕ ᑐᖁᓴᕐᑕᐅᖏᒃᑯᑕ ᐃᓅᕕᒃᓴᖃᕐᓂᕐᓴᐅᓂᐊᕐᐳᒍᑦ ᑐᖁᑕᐅᒍᓗᐊᕈᑦᑕᓗ ᑐᕌᕐᑕᕗᑦ ᐊᑑᑎᑐᐃᓐᓇᕐᓂᐊᕐᐳᖅ.”

⁵ ᖃᐅᕙᓪᓕᐊᓕᕐᑎᓪᓗᒍ ᒪᑭᓐᓇᒥᒃ ᓯᕆᐊᒥᐅᑦ ᑕᖕᒫᕐᓯᒪᕕᖓᓐᓄᑦ ᐂᓕᕐᐳᑦ, ᑕᖕᒫᕐᓯᒪᕕᖓᓐᓄᑦ ᑎᑭᒃᑲᓗᐊᕋᒥᒃ ᐊᑕᐅᓯᕐᒥᒡᓘᓐᓃᑦ ᐃᓄᒃᑕᖃᓚᐅᓐᖏᓚᖅ.

⁶ ᐊᑕᓂᐅᑉ ᓯᕆᐊᒥᐅᑦ ᐅᓇᑕᕐᑎᖏᑦ ᑐᓵᑎᓚᐅᕐᒪᒋᑦ ᐅᓐᓄᐊᒥ ᕿᒧᒃᓯᐅᑎᒐᓴᒡᔪᐊᑦ ᕿᒥᕐᔪᐊᓪᓗ ᕿᑭᕐᕋᖏᓐᓂᒃ ᐅᓇᑕᕐᑎᒐᓴᒡᔪᐊᖑᕙᓗᒃᑐᓂᒃ ᐅᖃᕐᓗᑎᒡᓗ ᐃᒻᒥᖕᓄᑦ, “ᑕᑯᒋᑦ ᐃᓴᕆᐊᓕᒥᐅᑦ ᐃᑲᔪᕆᐊᕐᑕᐅᖂᕐᒪᑕ ᕼᐃᑍᑎᒥᐅᓄᑦ, ᐄᑦᔨᑉᑎᒥᐅᓪᓗ ᐊᖓᔪᖅᑳᕐᔪᐊᖏᓐᓄᑦ ᐅᓇᑕᕆᐊᕐᑖᓘᓕᕐᐳᒍᑦ.”

⁷ ᐅᓪᓛᒻᒪᕆᒃᑯᑦ ᒪᑭᓪᓗᑎᒃ ᕿᒫᒃᓯᓚᐅᕐᐳᑦ ᑐᐱᑎᒃ ᐆᒪᔪᖁᑎᑎᒡᓗ ᑍᒤᓕᖓᑐᐃᓐᓇᕐᑎᓪᓗᒋᑦ ᕿᒤᓐᓇᕐᓗᒋᑦ. ᐃᒻᒥᖕᓂᒃ ᐃᓅᑎᒋᐊᑐᐃᓐᓇᓕᕋᒥᒃ ᑕᒤᓐᓂᒃ ᓱᕙᓪᓕᕐᓯᒪᖏᑦᑐᓂᒃ ᕿᒤᓐᓁᓚᐅᕐᐳᑦ.

⁸ ᑖᒃᑯᐊ ᐊᖑᑏᑦ ᐅᕕᓂᕐᓘᑎᖃᕐᑐᑦ ᑕᕝᕗᖓ ᑎᑭᓐᓇᒥᒃ ᑐᐲᑦ ᐃᓚᖓᓐᓄᑦ ᐃᑎᕐᐳᑦ, ᓂᕆᓪᓗᑎᒡᓗ ᐃᒥᕐᐳᑦ ᐱᑖᕐᑐᕐᓗᑎᒡᓗ ᓯᐅᓪᕕᕆᓂᒃ ᒎᓗᓂᒡᓗ, ᐊᓐᓄᕌᓂᒡᓗ ᐱᑖᕆᔭᑎᒡᓗ ᐃᔨᕆᐊᕐᑐᕐᐰᑦ, ᑐᐱᕐᓄᑦ ᐅᑎᕐᒥᒐᒥᒃ ᐊᒻᒪ ᐱᔪᒪᔭᒥᖕᓂᒃ ᑎᒍᓯᒋᕗᑦ ᐃᔨᕆᐊᕐᑐᕆᓪᓗᒋᓪᓗ.

⁹ ᐃᒻᒥᖕᓄᓪᓗ ᐅᖃᓕᕐᐳᑦ, “ᑕᒃᑰᒡᓕ ᑍᒫᖑᖏᑦᑐᖅ ᐱᓕᕐᑐᒍᑦ ᐅᓪᓗᖅ ᑖᓐᓇ ᑐᓴᕈᒥᓇᕐᑐᒥᒃ ᑐᓴᕐᑎᑦᓯᑦᔪᑎᒋᔭᕆᐊᖃᕐᓗᑎᒍ ᖃᐅᔨᒪᔪᑐᐊᕌᓘᕕᒋᓕᕐᑕᕗᑦ, ᐅᓪᓗᑐᖃᓐᖑᕐᓰᑦᔪᑎᒋᒐᓗᐊᕈᑦᑎᒍ ᖃᓄᐃᓐᓇᕐᑐᒧᑦ ᑎᑭᑦᔪᑎᒋᓪᓚᕐᓂᐊᕋᑦᑎᒍ, ᑐᓴᕐᑕᐅᑎᑦᓴᕐᑐᓚᐅᕐᓚᕗᑦ ᐊᖓᔪᖅᑳᕐᔪᐊᖃᕐᕕᑦᑎᓐᓄᑦ.”

¹⁰ ᑕᕝᕙ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᑕ ᑲᒪᔨᖓᓐᓄᑦ ᐅᖃᕆᐊᕐᑐᕐᐳᑦ, ᐅᖃᕐᓗᑎᒡᓗ, “ᓯᕆᐊᒥᐅᑦ ᑕᖕᒫᕐᓯᒪᕕᖓᓐᓄᑦ ᐂᓚᐅᕋᑦᑕ ᐊᑕᐅᓯᕐᒥᒡᓘᓐᓃᑦ ᐃᓄᒃᑕᖃᓚᐅᖏᒻᒪᑦ ᓂᐱᖃᕐᑐᖃᓐᖏᓚᖅ ᕿᒥᕐᔪᐊᑦ ᓯᐅᑎᖅᑯᕐᑐᔪᓪᓗ ᐃᐱᕐᓯᒪᔪᑦ ᑕᒪᑦᔭᑑᓚᐅᕐᐳᑦ ᑐᐲᑦ ᐃᓄᖃᕋᑎᒃ ᑍᒤᓕᖓᑐᐃᓐᓇᕐᑐᑦ ᑕᑯᓚᐅᕐᐸᕗᑦ.”

¹¹ ᐃᑎᕐᑕᕐᕕᖕᓂ ᑲᒪᔨᐅᔪᑦ ᓂᐱᖁᕐᑐᓪᓗᑎᒃ ᑕᒪᓐᓇ ᑐᓴᕐᑕᐅᑎᑉᐹᑦ, ᐊᖓᔪᖅᑳᕐᔪᐊᓪᓗ ᐃᒡᓗᖓᓃᑦᑐᓄᑦ ᑐᓴᕐᑕᐅᓕᕆᕗᖅ.

¹² ᐊᖓᔪᖅᑳᕐᔪᐊᖅ ᐅᓐᓄᐊᒥ ᒪᑭᓐᓇᒥ ᐊᖓᔪᖅᑳᖁᑎᓂ ᐅᖃᐅᑎᕔᑦ, “ᓯᕆᐊᒥᐅᑦ ᐃᓱᒪᒋᔭᖓᑦ ᖃᐅᔨᒪᔭᕋ, ᖃᐅᔨᒪᒐᒥᒃ ᓂᕿᓴᖃᖏᓐᓂᕐᒧᑦ ᑳᒃᑐᐊᓘᓂᑦᑎᓐᓂᒃ ᑐᐱᑎᒃ ᓱᕐᕋᖕᓇᒋᑦ ᐱᔮᕆᓪᓗᑎᒃ ᕿᒤᓐᖑᐊᕐᐳᑦ ᑕᖕᒫᕐᓯᒪᕕᒋᔭᒥ ᓯᓛᑖᓂ ᐃᔨᕐᓯᒪᔪᒪᓪᓗᑎᒃ, ᐃᓱᒪᔪᑦ ᓇᓗᓇᖏᒻᒪᑦ ᐃᒫᒃ, ᐃᓴᕆᐊᓕᒥᐅᑦ ᑕᑯᔭᕐᑐᕐᓂᐊᕐᑐᑦ ᓇᓗᓇᓐᖏᓚᖅ ᐃᒡᓗᒐᓴᒡᔪᐊᓂᑦ ᐊᓂᒍᑦᑕ ᑎᕐᓕᓈᕆᓗᑎᒃ ᐅᕙᑦᑎᓐᓂᒃ ᑎᒍᓯᔪᒪᓪᓗᑎᒃ.”

¹³ ᐊᖓᔪᖅᑳᖁᑎᖏᑕ ᐃᓚᖓᑦ ᐅᖃᕐᐳᖅ, “ᐊᑏ ᐊᖑᑎᓂᒃ ᑎᓕᓯᓚᐅᕆᑦ ᕿᒻᒥᕐᔪᐊᑦ ᑕᓪᓕᒪᑦ ᐃᒡᓗᒐᓴᒡᔪᐊᓂ ᐊᒥᐊᒃᑯᑑᓕᕐᑐᑦ ᐊᑐᕐᑕᐅᓗᑎᒃ ᐃᓘᓐᓇᑕ ᑐᖁᒧᑦ ᑐᕌᕐᑐᐃᓐᓇᐅᓕᕋᑦᑕ ᐊᑦᔨᒌᒥᒃ ᐊᑑᑎᔪᐃᓐᓇᐅᕗᒍᑦ, ᐃᓴᕆᐊᓕᒥᐅᓕᒫᑦ ᐊᓐᓇᒡᕕᒃᓴᖃᖏᑦᑐᐃᓐᓇᐅᓕᕐᐳᑦ, ᐊᑏ ᑕᑯᔭᕐᑐᕐᑎᑕᐅᑐᐃᓐᓇᓚᐅᕐᓕᑦ ᐊᓯᕆᐊᒥᐅᑦ ᖃᓄᐃᓕᓐᓂᕐᒪᖔᑕ.”

¹⁴ ᕿᒧᒃᓯᐅᑏᖕᓂᒃ ᒪᕐᕈᐃᓂᒃ ᐋᖅᑮᓪᓗᑎᒃ ᑎᓕᕔᑦ ᓯᕆᐊᒥᐅᑦ ᐅᓇᑕᕐᑎᖁᑎᖏᓐᓂᒃ ᒪᓕᖁᓪᓗᒋᑦ ᕿᒧᒃᓯᐅᑎᓃᑦᑑᒡᓗ ᐅᖃᐅᑎᕔᑦ, “ᒪᓕᒡᓗᒋᑦ ᖃᐅᔨᒋᐊᓕᕆᓯᑦ ᖃᓄᐃᓕᓐᓂᕐᒪᖔᑕ.”

¹⁵ ᒪᓕᒃᓴᕐᐳᑦ ᑰᒃ ᔪᐊᕐᑕᓂ ᑎᑭᓪᓗᒍ ᐊᑐᕐᑕᕕᓂᖓᓪᓗ ᐊᓐᓄᕌᕕᓂᕐᓂᒃ ᓱᒋᐅᑎᓂᒡᓗ ᑲᑕᒊᕕᐅᓯᒪᕗᖅ ᓯᕆᐊᒥᐅᑦ ᑲᑕᒐᕐᑕᕕᓂᖏᓐᓂᒃ ᑐᐊᕕᕐᓗᑎᒃ ᕿᒫᓂᑯᒥᖕᓄᑦ, ᑖᒃᑯᐊᓗ ᖃᐅᔨᓴᕐᑎᑕᐅᔪᑦ ᐅᑎᕋᒥᒃ ᐊᖓᔪᖅᑳᕐᔪᐊᖅ ᐅᓂᒃᑲᐅᑎᕚᑦ.

¹⁶ ᐃᓄᐃᓪᓗ ᓯᕆᐊᒥᐅᑦ ᑕᖕᒫᕐᓯᒪᕝᕕᕕᓂᖓᓐᓄᑦ ᐂᓪᓗᑎᒃ ᐱᖁᑎᖏᓐᓂᒃ ᑎᒍᓯᕗᑦ, ᑕᕝᕙ ᓂᐊᖂᔭᒃᓴᖅ ᓯᖃᓪᓕᑦᓯᐊᕐᓯᒪᔪᖅ 10ᓂᒃ ᐅᖁᒤᓐᓂᓕᒃ ᑮᓇᐅᔭᒧᑦ ᓯᐅᓪᕕᕆᒧᑦ ᐊᑕᐅᓯᕐᒧᑦ ᓂᐅᕕᐊᖑᔪᓐᓇᓕᕐᐳᖅ; ᓂᐊᖂᔭᒃᓴᕐᓗ ᐹᕐᓕᒥᒃ ᐊᑎᓕᒃ ᑮᓇᐅᔭᒧᑦ ᓯᐅᓪᕕᕆᒧᑦ ᐊᑕᐅᓯᕐᒧᑦ ᓂᐅᕕᐊᖑᔪᓐᓇᓕᕐᓗᓂ, ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᒪᓕᒡᓗᒍ.

¹⁷ ᐊᖓᔪᖅᑳᕐᔪᐊᖅ ᑎᓕᓯᓯᒪᓚᐅᕐᐳᖅ ᐃᑎᕐᑕᕐᕕᖕᒥ ᑲᒪᔨᐅᓂᐊᕐᑐᒥᒃ ᐊᒡᒐᖏᑎᒍᑦ ᐊᒃᑐᐊᓚᐅᕐᑕᖓ, ᑖᓐᓇᓕ ᐃᑎᕐᑕᕐᕕᒃᑯᑦ ᐊᓂᓇᓱᐊᕐᑐᓄᑦ ᑐᓪᓕᕋᕐᑕᐅᓪᓗᓂ ᑐᖁᕗᖅ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᖃᐅᓯᕆᓚᐅᕐᑕᖓ ᓇᓚᐅᓪᓗᒍ, ᐊᖓᔪᖅᑳᕐᔪᐊᕐᒧᑦ ᑕᑯᔭᕐᑐᕐᑕᐅᓯᒪᓪᓗᓂ ᐅᖃᐅᓯᕆᓚᐅᕐᑕᖏᑦ.

¹⁸ ᑕᕝᕙ ᒎᑎᐅᑉ ᐃᓄᖁᑎᖓᑕ ᐅᖃᐅᓯᕆᓚᐅᕐᑕᖏᑦ ᐊᖓᔪᖅᑳᕐᔪᐊᕐᒧᑦ ᓇᓚᐅᑦᓯᔪᐃᓐᓇᐅᓚᐅᕐᐳᑦ ᐅᖃᓚᐅᕐᒪᑦ; ᓂᐊᖂᔭᕐᓴᖅ ᓯᖃᓪᓕᑦᓯᐊᕐᓯᒪᔪᖅ 10ᓂᒃ ᐅᖁᒤᓐᓂᓕᒃ ᑮᓇᐅᔭᒧᑦ ᐊᑕᐅᓯᕐᒧᑦ ᓂᐅᕕᐊᖑᔪᒫᕐᐴᖅ, ᓂᐊᖂᔭᒃᓴᕐᓗ ᐹᕐᓕᒥᒃ ᐊᑎᓕᒃ ᐊᑕᐅᓯᕐᒥᒃ ᐅᖁᒤᓐᓂᓕᒃ ᑮᓇᐅᔭᒧᑦ ᐊᑕᐅᓯᕐᒧᑦ ᓂᐅᕕᐊᖑᔪᓐᓇᕈᒫᕐᐳᖅ, ᖃᐅᒃᐸᑉ ᓴᒥᐊᕆᐊᒥᐅᑦ ᐊᕙᓗᕐᔪᐊᖓᑕ ᐃᑎᕐᑕᕐᕕᖓᓂ.

¹⁹ ᑍᓐᓇᓕ ᐅᓇᑕᕐᑎᓄᑦ ᐊᖓᔪᖅᑳᖅ, ᑭᐅᓚᐅᕐᑐᖅ ᒎᑎᐅᑉ ᐃᓄᖁᑎᖓᓄᑦ ᐅᖃᕐᓗᓂ, “ᑕᑯᒋᑦ ᐊᑕᓂᐅᑉ ᕿᓚᐅᑉ ᐃᒐᓛᖏᑦ ᐅᒃᑯᐃᕈᓐᓇᕋᓗᐊᕐᐸᒋᑦ, ᑍᒤᑐᖃᕈᓐᓇᕐᓯᓇᔭᕐᐹ?” ᒎᑎᐅᑉ ᐃᓄᖁᑎᖓᑕ ᑭᐅᕚ, “ᑕᑯᔪᓐᓇᕐᓯᓛᕐᐳᑎᑦ ᑕᒪᑐᒥᖓ ᑭᓯᐊᓂᓕ ᓂᕆᖃᑕᐅᕕᒋᓂᐊᓐᖏᓚᑦ.”

²⁰ ᑕᕝᕙ ᑕᒪᓐᓇ ᐊᑑᑎᓚᐅᕐᐳᖅ ᐅᖃᐅᑦᔭᐅᓂᖓ ᐃᓄᖕᓄᑦ ᐊᓂᓇᓱᐊᕐᑐᓄᑦ ᑐᓪᓕᕋᕐᑕᐅᓪᓗᓂ ᑐᖁᓚᐅᕐᒪᑦ ᐃᑎᕐᑕᕐᕕᖕᒥ.