ᐊᑕᓃᑦ ᐂᑉᐸᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓕᒪᐅᑎᐅᑉ ᑭᕕᔨᔭᐅᔫᑉ ᐅᑎᕐᑎᑕᐅᓂᖓ

¹ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᐱᓇᓱᐊᕐᑎᒌᖃᑦᑕᕐᑐᑦ ᐃᓔᓴᒧᑦ ᐅᖃᓕᕐᐳᑦ, “ᑕᑯᒋᓪᓕ, ᐅᓇ ᑲᑎᒪᕕᒋᕙᒃᑕᕗᑦ ᒥᑭᓗᐊᖃᑦᑕᓕᕐᒪᑦ ᐅᕙᑦᑎᓐᓄᑦ.

² ᔪᐊᕐᑕᓂᒧᓐᖓᐅᔪᒪᒐᓗᐊᕋᑦᑕ ᐃᓘᓐᓇᑕ ᐊᑐᓂᑦ ᓇᐹᕐᑐᓂᒃ ᓇᑲᑎᕆᓗᑕ ᐃᓂᒋᖃᑦᑕᕐᓂᐊᕐᑕᑦᑎᓐᓂᒃ ᐃᒡᓗᓕᐅᕈᒪᓕᕋᑦᑕ.” ᐃᓔᓴᐅᑉ ᑭᐅᕔᑦ, “ᐊᑏ.”

³ ᐃᓚᖓᑦᑕ ᐃᓔᓴ ᐊᐱᕆᕚ, “ᐱᖃᑕᐅᔪᓐᓇᕐᐲᑦ? ᐅᕙᑦᑎᓐᓄᑦ.” ᐃᓔᓴᐅᑉ ᑭᐅᕚ, “ᒪᓕᒍᓐᓇᕐᑐᖓ.”

⁴ ᑕᕝᕙ ᐱᖃᑕᐅᓪᓗᓂ ᑰᖕᒧᑦ ᔪᐊᕐᑕᓂᒧᐊᕋᒥᒃ ᓇᐹᕐᑐᓂᒃ ᓇᑲᑎᕆᓕᕐᐳᑦ.

⁵ ᓇᑲᑎᕆᓕᕐᓗᑎᒃ ᓇᐹᕐᑐᓂᒃ ᐃᓚᖓᑦᑕ ᐅᓕᒪᐅᑎᖓᑕ ᓂᐊᖁᖓ ᐲᕐᒪᑦ ᐃᒫᓄᑦ ᑭᕕᔨᐊᕆᕙ, ᕾᒐᓛᕐᓗᓂ ᐅᖃᕐᐳᖅ, “ᐊᖓᔪᖅᑳᒃ, ᐊᑐᕐᑐᐊᑐᐃᓐᓇᕐᑕᕅᓐᓇ.”

⁶ ᒎᑎᐅᑉ ᐃᓄᖁᑎᖓᑕ ᐊᐱᕆᕚ, “ᓇᒧᑦ ᑭᕕᔨᐊᕆᒐᕕᐅᒃ?” ᑕᑯᑎᑉᐹᓗ ᐅᓕᒪᐅᑎᐅᑉ ᑭᕕᕕᒋᔭᖓᓂᒃ, ᐃᓔᓴ ᕿᔪᑯᓗᖕᒥᒃ ᓇᑲᑦᓯᓪᓗᓂ ᑭᕕᕕᐅᕋᑖᕐᑑᑉ ᓇᓛᓄᑦ ᐃᒋᑉᐹ, ᐊᑯᓂᐅᖏᑦᑐᖅ ᐅᓕᒪᐅᑦ ᐳᒃᑕᓪᓚᕐᐳᖅ.

⁷ ᐃᓔᓴᐅᑉ ᐅᖃᐅᑎᕚ, “ᑎᒍᓕᕈᒃ.” ᑎᑭᐅᑦᔪᕐᓗᓂ ᑕᕝᕙ ᑎᒍᕚ.

ᓯᕆᐊᒥᐅᑦ ᐅᓇᑕᕐᑎᖁᑎᖏᑕ ᐱᕕᒃᓮᕈᑦᔭᐅᓂᖓᑦ

⁸ ᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐅᓇᑕᕐᓂᕐᔪᐊᖃᕐᑎᓪᓗᒍ ᐃᓴᕆᐊᓕᒥᐅᓂᒃ, ᐅᓇᑕᕐᑎᖁᑎᒥᓄᑦ ᐊᖓᔪᖅᑳᑦ ᐃᓱᒪᓯᐅᖃᑎᒋᓚᐅᕐᓗᓂᒋᑦ ᐃᓂᒋᔪᒪᔭᒥᖕᓄᑦ ᑕᖕᒫᕐᑎᕐᐳᑦ.

⁹ ᐃᓔᓴ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑦᔭᐅᒃᑲᕐᐹ, “ᖃᐅᔨᒪᑦᓯᐊᕆᑦᓯ ᒪᐅᓈᕐᑍᓕᓗᓯ ᓯᕆᐊᒥᐅᑦ ᑕᐅᓄᓐᖓᕐᓂᐊᕐᒪᑕ.”

¹⁰ ᑍᒤᒻᒪᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᑐᓴᕐᑎᑦᓯᔨᒥᓂᒃ ᑎᓕᓯᕗᖅ ᑍᒃᑯᐊ ᐅᓇᑕᕐᑎᖁᑎᖏᑦ ᓯᕆᐊᒥᐅᑦ ᑕᖕᒫᕐᓯᒪᕕᖓᑕ ᖃᓂᒋᔭᖓᓃᑦᑐᑦ ᐅᑦᔨᕐᓱᑦᓯᐊᖁᓪᓗᒋᑦ ᑎᕐᓕᓈᕐᑕᐅᖁᓇᒋᑦ, ᑕᒪᓐᓇᓗ ᓯᕆᐊᒥᐅᑦ ᖃᐅᔨᔭᐅᑦᑍᓕᓂᕆᖃᑦᑕᕐᑕᖓᑦ ᖃᐅᔨᔭᐅᖃᑦᑕᓚᐅᕐᐳᖅ ᐊᑕᐅᓯᐊᑐᐃᓐᓇᕋᓂ ᒪᕐᕈᐃᕐᓱᑐᐃᓐᓇᕋᓂᓗ.

¹¹ ᑕᕝᕙ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓂᓐᖓᒃᐳᖅ ᑎᕐᓕᓈᕐᓯᓇᓱᒃᑲᓗᐊᕐᓗᑎᒃ ᖃᐅᔨᔭᐅᑐᐃᓐᓇᖃᑦᑕᓕᕋᒥᒃ; ᐊᖓᔪᖅᑳᖁᑎᓂ ᑲᑎᑎᓪᓗᓂᒋᑦ ᐊᐱᕐᓱᕐᐰᑦ, “ᓇᓕᕐᓰᓐᓇ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐃᑲᔪᖃᑦᑕᕐᐸ?”

¹² ᐊᖓᔪᖅᑳᖁᑎᖓᑦᑕ ᐃᓚᖓᑦ ᑭᐅᕗᖅ, “ᓇᓪᓕᑦᑎᓐᓂᐅᖏᑦᑐᖅ, ᐊᑕᓂᕋ ᐊᖓᔪᖅᑳᕐᔪᐊᖅ! ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐃᓔᓴ ᐅᓂᒃᑲᐅᑦᔨᖃᑦᑕᕐᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᓯᓂᒃᕕᖃᕐᕕᖕᓂ ᐅᖃᕐᑕᑎᑦ ᐊᒡᓛᑦ ᖃᐅᔨᒪᖃᑦᑕᕐᐰᑦ.”

¹³ ᐊᖓᔪᖅᑳᕐᔪᐊᖓᑦ ᐅᖃᕐᐳᖅ, “ᓇᓃᒻᒪᖔᑦ ᕿᓂᕆᐊᓚᐅᕐᓯᐅᒃ ᑎᒍᔭᐅᑎᓚᐅᕐᓂᐊᕋᒃᑯ.” ᐅᖃᐅᑎᔭᐅᕗᖅ, ᓄᓇᓕᖕᓂ ᑑᑖᓂᒦᓐᓂᖓᓂᒃ.

¹⁴ ᐅᓇᑕᕐᑎᖁᑎᒥᓂᒃ ᐅᓄᕐᑐᓂᒃ ᕿᓂᕆᐊᕐᑎᑦᓯᕗᖅ ᕿᒧᒃᓯᐅᑎᒃᑰᕐᑐᓂᒃ ᕿᒥᕐᔪᐊᑎᒎᕐᑐᓂᒡᓗ ᐅᓐᓄᐊᓐᖑᕐᑎᓪᓗᒍ ᓄᓇᓕᖕᓄᑦ ᑎᑭᓐᓇᒥᒃ ᓄᓇᓕᒃ ᐊᕙᑕᖏᕐᐹᑦ.

¹⁵ ᒎᑎᐅᑉ ᐃᓄᖁᑎᖓᑕ ᐃᑲᔪᕐᑎᖓ ᐅᓪᓛᒻᒪᕆᒃᑯᑦ ᐊᓂᒐᒥ, ᑕᑯᓕᕐᐳᖅ, ᐅᓇᑕᕐᑐᒃᓴᓄᑦ ᕿᒥᕐᔪᐊᒦᑦᑐᓄᑦ ᕿᒧᒃᓯᐅᑎᒥᑦᑐᓄᓪᓗ ᓄᓇᖓᑦ ᐅᖓᓗᔭᐅᓯᒪᑦᓯᐊᕐᓂᖓᓂᒃ. ᐱᔨ ᐅᖃᕐᐳᖅ, “ᐊᖓᔪᖅᑳᒃ ᖃᓄᕐᓕ ᐱᓂᐊᓕᕐᐱᑖ?”

¹⁶ ᒎᑎᐅᑉ ᐃᓄᖁᑎᖓ ᐅᖃᕐᐳᖅ, “ᑲᑉᐱᐊᓱᖏᓪᓗᑎᑦ, ᑍᒃᑯᓇᖓᑦ ᐅᓄᕐᓂᕐᓴᓂᒃ ᐃᓚᖃᕐᐳᒍᑦ.”

¹⁷ ᐃᓔᓴ ᑐᒃᓯᐊᕐᐳᖅ, “ᐊᑕᓃᖅ ᐃᔨᖏᒃ ᐅᐃᑎᓚᐅᒃᑭᒃ ᑕᑯᓂᐊᕐᒪᑦ.” ᑕᑉᕙ ᐊᑕᓂᐅᑉ ᐃᓅᓱᒃᑑᑉ ᐃᔨᖏᒃ ᐅᐃᑎᑉᐹᒃ, ᑕᑯᓪᓗᓂᓗ, ᐱᖑᐃᑦ ᓯᕕᖓᓂᖏᑦ ᓈᓯᒪᔪᑦ ᕿᒻᒥᕐᔪᐊᓕᔭᕐᑐᓂᒃ ᕿᒧᒃᓯᐅᓯᔭᕐᑐᓂᒡᓗ ᐃᑯᐊᓚᔪᓂᒃ ᐊᕙᓗᓯᓯᒪᑦᓯᐊᕐᒥᔪᓂᒃ ᐃᓔᓴᐅᑉ ᓇᔪᕐᑕᖓᓂᒃ.

¹⁸ ᓯᕆᐊᒥᐅᑦ ᐅᓇᑕᕐᑎᖁᑎᖏᑦ ᕾᒋᐊᓯᖕᒪᑕ, ᐃᓔᓴ ᑐᒃᓯᐊᕐᐳᖅ, “ᐊᑕᓃᖅ ᐅᑯᐊ ᐃᓄᐃᑦ ᐱᒋᐊᓚᐅᒃᑭᑦ, ᑐᒃᓯᐊᕐᕕᒋᕙᒋᑦ, ᑕᐅᑐᒍᓐᓃᕐᑎᓪᓗᒋᑦ.” ᐊᑕᓂᐅᑉ ᐱᒋᐊᕐᐰᑦ ᑕᐅᑐᒍᓐᓃᕐᑎᑕᐅᕗᓪᓗ ᐃᓔᓴᐅᑉ ᑐᒃᓯᐊᕐᓂᖓ ᒪᓕᒃᓗᒍ.

¹⁹ ᐃᓔᓴᐅᑉ ᐅᐸᒡᓗᓂᒋᑦ ᐅᖃᐅᑎᕔᑦ, “ᐊᖅᑯᑎᒃᑯᑦ ᐊᑐᕐᓂᐊᓐᖏᑕᑦᓯᒎᕐᓂᕋᑦᓯ ᓄᓇᓖᑦ ᐅᑯᐊ ᐅᐸᒐᓱᐊᕐᑕᓯ ᑖᒃᑯᐊᖑᖏᒻᒪᑕ, ᒪᓕᓕᕐᓯᓐᖓ ᐊᖑᒻᒧᑦ ᕿᓂᕐᑕᑦᓯᓐᓄᑦ ᐂᑎᓐᓂᐊᕋᑦᓯ.” ᑕᕝᕙ ᓴᒥᐊᕆᐊᒧᑦ ᐂᑎᑉᐰᑦ.

²⁰ ᓴᒥᐊᕆᐊ ᐃᒡᓗᒐᓴᒡᔪᐊᖏᓐᓄᑦ ᐃᑎᕋᒥᒃ, ᐃᓔᓴ ᑐᒃᓯᐊᕆᕗᖅ, “ᐊᑕᓃᖅ ᐃᔨᖏᑦ ᐅᐃᑎᓚᐅᕐᒥᒃᑭᑦ ᑕᑯᓂᐊᕐᒪᑕ.” ᑕᑉᕙ ᐊᑕᓂᐅᑉ ᐃᔨᖏᑦ ᐅᐃᑎᑉᐰᑦ ᑕᑯᓪᓗᑎᒃᓗ, ᑖᒃᑯᐊᓗ ᖃᐅᔨᓕᕐᐳᑦ ᓴᒥᐊᕆᐊᒥᐅᑦ ᐃᒡᓗᒐᓴᖏᑦᑕ ᐃᓗᐊᓃᓕᕐᓂᕐᒥᖕᓂᒃ.

²¹ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᓯᕆᐊᒥᐅᑦ ᐅᓇᑕᕐᑎᖏᑦ ᑕᑯᓕᕋᒥᒋᑦ ᐃᓔᓴ ᐊᐱᕆᖃᑦᑕᓕᕐᐹᑦ, “ᐊᑖᑕᒃ ᑐᖁᕋᓕᕐᓚᒃᑳ? ᑐᖁᕋᓕᕐᓚᒃᑳ?”

²² ᐃᓔᓴᐅᑉ ᑭᐅᕚ, “ᑖᒃᑯᓂᖓ ᑐᖁᑦᓯᓂᐊᖏᑦᑐᑎᑦ. ᑐᖁᕅᒐᔭᕐᐱᓯ ᐅᓇᑕᕐᓂᕐᒥ ᑎᒍᔭᑦᓯᓐᓂᒃ ᔭᕕᒃᔪᐊᒧᑦ ᐱᑎᒃᓯᒧᓪᓘᓐᓃᑦ? ᓂᕆᑎᒃᑭᑦ ᐃᒥᕐᑎᓪᓗᒋᓪᓗ, ᐱᔭᕇᕐᐸᑕ ᐊᖓᔪᖅᑳᖏᓐᓄᑦ ᐅᑎᕐᑎᓐᓂᐊᕐᐸᑎᑦ.”

²³ ᑕᕝᕙ ᑖᒃᑯᓂᖓ ᓂᕆᕕᒡᔪᐊᕐᑎᑦᓯᕗᖅ; ᓂᕆᔭᕇᕐᒪᑕ ᐊᖓᔪᖅᑳᖏᓐᓄᑦ ᐅᑎᖁᕔᑦ, ᑕᒪᑐᒪᓗ ᑭᖑᓂᖓᒍᑦ ᓯᕆᐊᒥᐅᑦ ᑲᒪᓇᓱᑦᓵᕈᓐᓃᓚᐅᕐᐳᑦ ᐃᓴᕆᐊᓕᒥᐅᑦ ᓄᓇᓕᖁᑎᖏᓐᓂᒃ.

ᓴᒥᐊᕆᐊᒥᐅᑦ ᐃᓗᒪᔭᐅᓂᖓᑦ ᐊᑭᕋᒥᖕᓄᑦ

²⁴ ᐊᑯᓂᐅᓕᕐᒥᑎᓪᓗᒍ ᐱᓐ-ᕼᐊᑖᑦ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᕐᑎᖁᑎᓕᒫᒥᓂᒃ ᐅᓇᑕᕆᐊᕐᑎᑦᓯᓕᓚᐅᕆᕗᖅ ᓴᒥᐊᕆᐊᒥᐅᓂᒃ; ᓄᓇᖓᓐᓄᑦ ᑎᑭᐅᑎᒐᒥᒃ ᓄᓇᓖᑦ ᐊᕙᑖᓂᑦ ᐊᓂᔪᓐᓁᓪᓕᑎᑉᐰᑦ ᐃᒡᓗᒐᓴᖕᓂᑦ.

²⁵ ᓴᒥᐊᕆᐊᕐᒥᐅᑦ ᓂᕾᕈᑎᒐᒥᒃ ᑳᒃᑐᐊᓘᓕᕐᐳᑦ ᐃᒡᓗᒐᓴᒡᔪᐊᓂᑦ ᐊᓂᑦᔧᕐᑎᑕᐅᓯᒪᓂᖓ ᐊᑯᓂᐊᓘᓕᕐᒪᑦ ᑳᖕᓂᑯᒧᑦ ᓯᐅᑎᖅᑯᕐᑐᔫᑉ ᓂᐊᖁᐊ ᐊᑭᖃᓕᓚᐅᕐᐳᖅ 80ᓂᒃ ᓯᐅᓪᕕᕆᓂᒃ; ᑎᖕᒥᐊᓪᓗ ᑑᕖᑦ ᐊᓇᖓ ᐊᑕᐅᓯᕐᒥᒃ ᐅᖁᒤᓐᓂᓕᒃ ᑕᓪᓕᒪᓂᒃ ᓯᐅᓪᕕᕆᓂᒃ ᐊᑭᖃᓕᕐᓗᓂ.

²⁶ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐊᖅᑯᓵᕐᑎᓪᓗᒍ ᐊᕙᓗᕐᔪᐊᑉ ᑭᒡᓕᖓᒍᑦ, ᐊᕐᓇᒧᑦ ᓂᓪᓕᐊᕕᐅᓕᕐᐳᖅ, “ᐊᑕᓃᖅ ᐊᖓᔪᖅᑳᕐᔪᐊᖅ, ᐃᑲᔪᓚᐅᓐᖓ.”

²⁷ ᐊᖓᔪᖅᑳᕐᔪᐊᑉ ᑭᐅᕚ, “ᐊᑕᓂᕐᒧᑦ ᐃᑲᔪᕐᑕᐅᓂᐊᖏᒃᑯᕕᑦ, ᓇᑭᓪᓕ ᐃᑲᔪᕐᑎᒃᓴᕐᓯᒐᔭᕋᒃᑭᑦ? ᐃᕖᔧᕕᐅᑉ ᓇᑎᖓᓂ ᐊᒥᐊᒃᑯᑕᖃᕐᑐᕆᒃᓯᕖᑦ, ᐸᐅᕐᖓᓂᒡᓗ ᐃᑦᑏᔧᕕᖕᒥ ᐱᑕᖃᕋᓱᒋᒃᓯᕖᑦ?”

²⁸ ᐊᖓᔪᖅᑳᕐᔪᐊᑉ ᐊᐱᕚ, “ᖃᓄᐃᓐᓇᕕᑦ?” ᐊᕐᓇᐅᑉ ᑭᐅᕚ, “ᐆᒪ ᐊᕐᓇᐅᖃᑎᒪ ᐅᖃᐅᑎᓚᐅᕐᒪᖓ, ‘ᐃᕐᓃᑦ ᕾᓚᐅᕈᒃ ᐅᓪᓗᒥ ᓂᕆᓂᐊᕋᑦᑎᒃᑯᒃ, ᖃᐅᒃᐸᑦ ᐃᕐᓂᕋ ᓂᕆᓛᕆᕙᕗᒃ.’

²⁹ ᐊᓱᐃᓛᒃ ᐃᕐᓂᕋ ᐆᔪᓕᐊᕆᓪᓗᒍ ᓂᕆᓚᐅᕐᐸᕗᒃ, ᖃᐅᖕᒪᑦ ᐅᖃᐅᑎᓕᓚᐅᐸᕋ, ᐅᓪᓗᒥ ᐃᕐᓂᕐᓂᒃ ᓂᕆᔭᕆᐊᖃᕐᓂᐊᓕᕐᐳᒍᒃ, ᑭᓯᐊᓂᓕ ᐃᔨᕐᓯᔪᕕᓂᐅᖕᒪᑦ ᐃᕐᓂᕐᒥᓂᒃ.”

³⁰ ᐊᖓᔪᖅᑳᕐᔪᐊᖅ ᐊᕐᓇᐅᑉ ᐅᖃᐅᓯᖏᓐᓂᒃ ᑐᓴᕋᒥ, ᐊᓐᓄᕌᓂ ᐊᓕᒃᐰᑦ. ᐊᕙᓗᕐᔪᐊᑉ ᑭᒡᓕᖓᒍᑦ ᐱᓱᒃᑎᓪᓗᒍ ᐃᓄᖕᓄᑦ ᑕᐅᑐᒃᑕᐅᒐᒥ ᐅᑦᔨᕆᔭᐅᓕᕐᐳᖅ ᐊᓐᓄᕌᒥ ᐃᓗᐊᒍᑦ ᐊᓐᓄᕌᕐᓯᒪᓂᖓᓂᒃ ᕿᒃᓵᒃᑐᕐᓯᐅᑎᓂᒃ.

³¹ ᐅᖃᕐᓗᓂᓗ, “ᒎᑎᐅᑉ ᓱᒋᐊᕐᓕᖓ, ᐊᑦᑕᕆᖏᓪᓗᓂᖓ ᐃᓔᓴᐅᑉ ᓴᕚᑎᐅᑉ ᐃᕐᓂᖓᑕ ᓂᐊᖁᐊ ᓱᓕ ᐅᓪᓗᒥ ᑎᒥᖓᓄᑦ ᐊᑕᓂᐊᕐᐸᑦ!”

³² ᐃᓔᓴᓕ ᐊᖏᕐᕋᕐᓯᒪᕗᖅ ᐃᒡᓗᒥᓂ, ᐃᓄᐃᑦ ᐊᖓᔪᖅᑳᖏᓐᓂᒃ ᐃᓚᖃᕐᓗᓂ, ᐊᖓᔪᖅᑳᕐᔪᐊᖅ ᐃᒡᓗᖓᓄᑦ ᑎᑭᖏᓐᓂᕐᒥᓂ ᑎᓕᓯᕗᖅ ᐅᖃᐅᑦᔨᔭᕐᑐᕐᑐᒥᒃ ᐃᓔᓴᒥᒃ, ᓱᓕ ᑎᑭᓚᐅᕐᑎᓐᓇᒋᑦ ᐃᓔᓴᐅᑉ ᐊᖓᔪᖅᑳᑦ ᐃᒃᓯᕙᖃᑎᓂ ᐅᖃᕐᕕᒋᕔᑦ, “ᑕᑯᓐᖏᓚᓰ ᑍᓐᓇ ᐃᓄᐊᕐᑎ ᑎᓕᓯᒻᒪᕆᓕᕐᒥᔪᖅ ᓂᐊᖁᐃᕐᑕᐅᖁᓪᓗᓂᖓ? ᑍᒃᑯᐊ ᑎᓕᔭᖏᑦ ᑎᑭᐅᑎᒃᐸᑕ ᐅᒃᑯᐊᖅ ᐅᒃᑯᐊᕐᓗᒍ ᓇᔪᒻᒥᓂᐊᕐᐸᓯ ᐅᒃᑯᐃᕐᑕᐅᑦᑍᓕᑎᓪᓗᒍ, ᐊᖓᔪᖅᑳᖓᑦ ᑭᖑᓂᖓᓐᓂ ᒪᓕᒡᕙᓗᖓ ᑐᓴᕐᓴᐅᖕᒪᑦ.”

³³ ᓱᓕ ᐃᓔᓴ ᐅᖃᓪᓚᒃᑎᓪᓗᒍ, ᐅᖃᕆᐊᕐᑐᕐᑐᖅ ᐃᒡᓗᖓᓄᑦ ᑎᑭᐅᑎᕗᖅ, ᐊᖓᔪᖅᑳᕐᔪᐊᑉ ᐅᖃᖁᓯᒪᔭᖓ ᐃᒫᒃ, “ᑕᒪᓐᓇ ᐃᓱᒪᔮᕐᓂᐊᓗᒃ! ᐊᑕᓂᕐᒥᑦ ᐱᖕᒪᑦ ᐊᑕᓂᕐᒥᒃ ᓱᓕ ᐅᑕᖅᑭᔪᒃᓴᐅᕕᑖ?”