ᐊᑕᓃᑦ ᐂᑉᐸᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᓁᒪᐅᑉ ᐸᕐᑎᕐᓂᖓᑕ ᐋᖅᑭᒃᑕᐅᓂᖓ

¹ ᓁᒪᓐ ᐊᖓᔪᖅᑳᖑᓚᐅᕐᐳᖅ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑐᒃᓴᖁᑎᖏᓐᓄᑦ, ᐊᔪᖏᑦᑐᐊᓘᓂᖓ ᐊᖓᔪᖅᑳᕐᔪᐊᖓᑕ ᖃᐅᔨᒪᖕᒪᒍ ᐅᐱᒋᔭᐅᑦᓯᐊᓚᐅᕐᐳᖅ, ᑖᑦᓱᒪ ᐊᐅᓚᓯᑦᓯᐊᕐᓂᖓᓄᑦ ᓯᕆᐊᒥᐅᑦ ᐅᓇᑕᕐᓗᑎᒃ ᐊᑕᓂᕐᒧᑦ ᓵᓚᖃᕐᑎᑕᐅᓯᒪᖕᒪᑕ, ᑲᑉᐱᐊᑍᑦᑑᓪᓗᓂ ᐅᓇᑕᕐᑎᐅᓚᐅᕐᒪᑦ, ᑭᓯᐊᓂ ᐋᓐᓂᐊᖃᓚᐅᕐᐳᖅ ᐅᕕᓂᖓ ᑲᐱᐊᒋᔭᐅᔪᒥᒃ ᐸᕐᑎᓕᓚᐅᕐᒪᑦ.

² ᓯᕆᐊᒥᐅᑦ ᐅᓇᑕᕐᑏᑦ ᐅᓇᑕᕆᐊᕐᓯᒪᓪᓗᑎᒃ ᐃᓴᕆᐊᓕᒥᐅᓂᒃ ᐊᖏᕐᕋᐅᑦᔨᓚᐅᕐᓂᕐᐳᑦ ᓂᕕᐊᕐᓵᒥᒃ, ᓁᒪᓐᓗ ᓄᓕᐊᖓᑕ ᐱᔨᑲᑖᒃᑕᕆᓚᐅᕐᐹ.

³ ᓂᕕᐊᕐᓵᖅ ᐱᓯᒪᔨᒋᓕᕐᑕᒥᓄᑦ ᐅᖃᕐᐳᖅ, “ᐊᖓᔪᖅᑳᕋ ᑕᑯᔭᕐᑐᕈᓐᓇᕈᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᓴᒥᐊᕆᐊᒦᑦᑐᒥᒃ ᐅᕕᓂᕐᓗᒍᑎᐊᓗᐊ ᐋᖅᑭᒃᑕᐅᔪᓐᓇᕐᑑᒐᓗᐊᖅ.”

⁴ ᓁᒪᓐ ᐊᑕᓂᕐᒥᓂᒃ ᑕᑯᔭᕐᑐᕐᐳᖅ ᐅᖃᐅᑎᓪᓗᓂᐅᒡᓗ ᓂᕕᐊᕐᓵᑉ ᐃᓴᕆᐊᓕᒥᐅᑕᐅᑉ ᐅᖃᕐᑕᕕᓂᖓᓂᒃ.

⁵ ᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᖃᐅᑎᕚ, “ᐃᓱᒪᕐᓱᕋᕕᑦ ᑕᐅᕗᓐᖓᐅᓂᐊᓕᕐᐳᑎᑦ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᑎᑎᕋᕐᕕᒋᓂᐊᕐᐸᕋ.” ᑕᕝᕙ ᓁᒪᓐ ᐊᐅᓪᓚᕐᐳᖅ ᓇᒃᓴᕐᓗᓂᓗ, 30,000ᓂᒃ ᓯᐅᓪᕕᕆᓂᒃ, 6,000ᓂᒃ ᑮᓇᐅᔭᓂᒃ ᒎᓗᓂᒃ, ᐊᓐᓄᕌᓂᒡᓗ 10ᐃᕐᑐᕐᓗᓂ ᐊᓯᑦᔨᖃᑦᑕᐅᑎᐅᓪᓗᐊᕐᑐᓂᒃ.

⁶ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑎᑎᖅᑲᑦ ᓇᒃᓴᕐᑕᖏᑦ ᐃᒫᒃ ᐅᖃᕐᓯᒪᕗᑦ, “ᑎᑎᕋᕐᑕᓐᓄᑦ ᐃᓚᐅᑎᑦᓯᕗᖓ ᑭᒡᒐᓐᓂᒃ ᓁᒪᓐᒥᒃ ᐃᓕᑦᓯᓐᓄᑦ ᐋᖅᑭᒃᑕᐅᖁᓪᓗᒍ ᐅᕕᓂᕐᓘᑎᒋᔭᖓᓂᒃ ᐸᕐᑎᕐᓂᕐᒥᑦ.”

⁷ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᑎᖅᑲᑦ ᐅᖃᓕᒫᕇᕋᒥᒋᑦ ᐊᓐᓄᕌᓂ ᐊᓕᒃᐰᑦ, ᐅᖃᕐᓗᓂᓗ, “ᒎᑎᐅᒐᒫ? ᑐᖁᑎᑦᓯᓚᐅᕐᓗᖓ ᐆᒻᒪᕐᑎᑦᓯᒃᑲᓐᓂᕈᓐᓇᕐᐳᖔ? ᖃᓄᐃᒻᒪᓂᓐᓇ ᐅᕕᓂᕐᓗᒃᑐᒥᒃ ᐸᕐᑎᕐᑐᒥᒃ ᐋᖅᑭᒃᑕᐅᖁᔨᓪᓗᓂ ᐅᕙᓐᓄᑦ ᑎᓕᓯᕙ? ᑕᑯᒋᑦ ᐅᕙᓐᓄᓂᓐᓇ ᐂᕙᑦᔪᑎᒃᓴᕐᓯᐅᑐᐃᓇᕐᑐᖅ!”

⁸ ᐃᓔᓴ ᒎᑎᐅᑉ ᐃᓄᖁᑎᖓ ᑐᓴᕋᒥ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐊᓐᓄᕌᒥᓂᒃ ᐊᓕᒃᓯᖕᒪᑦ, ᐅᖃᐅᑦᔭᐅᒃᑲᕐᐹ ᐃᒫᒃ, “ᖃᓄᐃᒻᒪᑦ ᐊᓐᓄᕌᑎᑦ ᐊᓕᒃᐱᒌᑦ? ᑍᓐᓇ ᐊᖑᑦ ᐅᕙᓐᓄᑦ ᕾᑎᑕᐅᓚᐅᕐᓕ ᖃᐅᔨᓂᐊᕐᒪᑦ ᒎᑎᒧᑦ ᐅᖃᕐᑎᑕᖃᕐᓂᖓᓂᒃ ᐃᓴᕆᐊᓕᒥᐅᓂ.”

⁹ ᐊᓱᐃᓛᒃ ᓁᒪᓐ ᕿᒧᒃᓯᐅᑎᒥᒍᑦ ᕿᒻᒥᕐᔪᐊᒃᑰᕐᑐᖁᑎᓂ ᐃᓚᒋᓪᓗᒋᑦ ᐂᕗᖅ, ᑎᑭᓐᓇᒥᒡᓗ ᐃᓔᓴᐅᑉ ᐹᖓᑕ ᓵᖓᓄᑦ ᓄᖅᑲᕐᐳᑦ.

¹⁰ ᐃᓔᓴ ᑕᕝᕙ ᑎᓕᓯᕗᖅ ᑭᒡᒐᒥᓂᒃ ᐅᖃᐅᑦᔨᖁᓪᓗᒍᓗ ᐃᒫᒃ, “ᐅᕕᓃᑦ ᐅᐊᓴᕆᐊᕐᑐᕈᒃ 7ᐃᓱᕐᓗᑎᑦ ᑰᖕᒥ ᔪᐊᕐᑕᓂᒥ, ᑕᕝᕙ ᐅᕕᓃᑦ ᐋᖅᑭᖕᓂᐊᕐᐳᖅ ᓴᓗᒻᒪᑦᓯᐊᓕᕐᓗᓂ.”

¹¹ ᓁᒪᓐᓕ ᓂᓐᖓᒡᓗᓂ, ᐃᖏᕐᕋᓯᑐᐃᓐᓇᕐᐳᖅ ᐅᖃᕐᓗᓂᓗ, “ᑕᑯᒋᑦ, ᑕᑯᔭᕐᑐᕐᓂᐊᕋᓱᒋᖅᑲᐅᔭᕋ ᓵᓐᓂ ᓇᖏᕐᓗᓂ ᑐᒃᓯᐊᕐᓂᐊᕋᓱᒋᖅᑲᐅᒐᓗᐊᕋᒃᑯ ᐊᑕᓂᐅᑉ ᐊᑎᖓᓄᑦ ᕿᓄᓗᓂ ᒎᑎᒥᓄᑦ, ᐃᓴᒡᓗᓂ ᐋᓐᓂᐊᒪ ᓇᓛᒍᑦ ᐊᒃᑐᐊᓗᓂᖓ ᑍᒪᓐᓇ ᐋᖅᑭᒃᑕᐅᓂᐊᕋᓱᒋᓪᓗᖓ ᐅᕕᓂᕐᓘᑎᓐᓂᑦ ᐸᕐᑎᕐᓂᕐᒥᑦ.

¹² ᐊᐹᓇ ᕙᕌᐸᕆᓗ ᑕᒫᓯᑰᓯᐅᑉ ᑰᖏᑦ, ᐃᒪᑦᓯᐊᕆᖕᓂᕐᓴᐅᓐᖏᓛᑦ ᐃᓴᕆᐊᓕᐅᑉ ᑰᖏᓐᓂᑦ? ᑍᒃᑯᓇᓂ ᐅᐊᓴᕈᒪ ᓴᓗᒻᒪᕐᑕᐅᓂᕐᓴᐅᒐᔭᖏᓐᓇᒫ?” ᐅᖓᒻᒧᐊᓕᓚᐅᕐᐳᖅ ᓂᓐᖓᐅᒻᒪᓪᓗᓂ.

¹³ ᓁᒪᓐ ᑭᒡᒐᖏᑕ ᐅᐸᒡᓗᒍ ᐅᖃᐅᑎᕚᑦ, “ᐊᑖᑖᒃ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐱᔭᕆᐊᑐᔪᒥᒃ ᐱᓇᓱᐊᖁᓗᓂᑎᑦ ᐅᖃᐅᑎᖅᑲᐅᒃᐸᑎᑦ, ᐊᑐᕋᓱᒃᑲᔭᖅᑲᐅᓐᖏᓔᑦ? ᐱᔭᕆᐊᑭᑦᑐᒥᒡᓕ ᐅᖃᐅᑎᕚᑎᑦ, ᐅᐊᓴᕆᐊᕐᑐᖁᓪᓗᓂᑎᑦ ᓴᓗᒻᒪᕐᓂᐊᕋᕕᑦ!”

¹⁴ ᑕᕝᕙ ᑰᓕᐊᕐᐳᖅ ᔪᐊᕐᑕᓂᒧᑦ 7ᐃᕐᑐᕐᓗᓂᓗ ᐊᖅᑲᕐᐳᖅ, ᒎᑎᐅᑉ ᐃᓄᖁᑎᖓᑕ ᐅᖃᐅᓯᖏᑦ ᒪᓕᒡᓗᒋᑦ; ᐅᕕᓂᖓᓗ ᐋᖅᑭᒃᐳᖅ ᓴᓗᒪᑦᓯᐊᕐᓗᓂ ᐃᓅᓱᒃᑐᑯᓗᒃᑎᑐᑦ ᐅᕕᓂᖓ ᑍᒤᓕᕐᓗᓂ.

¹⁵ ᑕᕝᕙ ᓁᒪᓐ ᐃᓚᒋᔭᓕᒫᑦᓯᐊᓂ ᐃᓚᒋᓪᓗᒋᑦ ᒎᑎᐅᑉ ᐃᓄᖁᑎᖓᓄᑦ ᐅᑎᕆᕗᑦ, ᓵᖓᓄᐊᕐᓗᓂ ᐅᖃᐅᑎᕚ, “ᑕᑯᒋᑦ, ᖃᐅᔨᕗᖓ ᓯᓚᕐᔪᐊᓕᒫᒥ ᒎᑎᑕᖃᓐᖏᓚᖅ ᐃᓴᕆᐊᓕᒥᐅᓂ ᑭᓯᐊᓂ, ᑭᒡᒐᕕᑦ ᑐᓂᕐᕈᑎᖏᑦ ᐃᓕᖕᓄᑦ, ᐱᔭᐅᖁᔭᕋᓗᐊᑲ.”

¹⁶ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑭᐅᕚ ᐅᖃᕐᓗᓂ, “ᐊᑕᓂᖅ ᐃᓅᖕᒪᑦ ᐱᔨᑦᓯᕐᑕᕋ, ᐱᑖᕐᑎᑕᐅᓇᓱᐊᕈᒪᖏᑦᑐᖓ.” ᓁᒪᓐ ᐊᔪᐃᓐᓈᕆᒐᓗᐊᕐᒪᒍ ᐱᔪᒪᓚᐅᓐᖏᓚᖅ.

¹⁷ ᓁᒪᓐ ᐅᖃᓕᕐᐳᖅ, “ᐱᑎᑕᐅᔪᒪᖏᒃᑯᕕᑦ, ᐃᓕᖕᓄᑦ ᑭᒡᒐᖁᑎᒋᔭᐅᓂᓐᓄᑦᑕᐅᖅ ᓄᓇᑐᐃᓐᓇᕐᒥᒃ ᑕᒫᖓᑦ ᓇᒃᓴᕐᑎᑕᔪᒪᒐᓗᐊᕐᑐᖓ ᓯᐅᑎᖅᑯᕐᑐᔫᖕᓄᑦ ᒪᕐᕉᖕᓄᑦ ᓇᖕᒪᒃᑕᐅᔪᓐᓇᕐᑐᒥᒃ; ᑐᓂᕐᕈᓯᕐᓗᖓ ᒎᑎᓄᑦ ᑐᒃᓯᐊᖃᑦᑕᕈᒪᔪᓐᓃᕋᒪ, ᐊᑕᓂᕐᒧᑦ ᑭᓯᐊᓂ.

¹⁸ ᐊᑕᓂᕐᒧᑦ ᐃᓱᒪᒋᔪᓐᓁᕐᑕᐅᔪᓐᓇᕈᒪᕗᖓ, ᐊᖓᔪᖅᑳᕐᔪᐊᕋ ᐱᖃᑎᒋᓗᒍ ᒎᑎᓐᖑᐊᑉ ᕆᒪᓇᐅᑉ ᐃᒡᓗᖓᓄᑦ ᐂᒍᓐᓄᒃ ᑐᒃᓯᐊᕆᐊᕐᑐᕐᓗᓄᑦ, ᐊᒡᒐᒃᑲ ᑎᒍᒃᐸᒋᑦ ᓰᖅᑯᕆᐊᖃᕋᒪ ᕆᒪᓇᐅᑉ ᒎᑎᓐᖑᐊᑉ ᐃᒡᓗᖓᓂ, ᑐᒃᓯᐊᕐᐳᖓ ᐊᑕᓂᕐᒧᑦ ᐃᓱᒪᒋᔪᓐᓁᕐᕕᐅᔪᒪᓪᓗᖓ.”

¹⁹ ᐃᓔᓴᐅᑉ ᐅᖃᐅᑎᕚ, “ᓮᒪᓂᖃᑦᓯᐊᕐᓗᑎᑦ ᐃᖏᕐᕋᓕᕆᑦ.” ᓁᒪᓐᑯᑦ ᐅᖓᓯᓗᐊᖏᑦᑐᒧᑦ ᐃᖏᕐᕋᓕᕐᑎᓪᓗᒋᑦ.

²⁰ ᒋᕼᐋᓯ, ᐃᓔᓴᐅᑉ ᐃᑲᔪᕐᑎᖓ ᒎᑎᐅᑉ ᐃᓄᖁᑎᖓᑕ ᐃᓱᒪᓕᕋᒥ, “ᐊᖓᔪᖅᑳᕅᓐᓇ ᐱᔭᕐᓂᓈᕐᓯᑎᑦᓯᓗᐊᕐᑐᖅ ᓁᒪᓐᒥᒃ ᓯᕆᐊᒥᐅᒥᒃ, ᑐᓂᑦᔪᑎᒋᓇᓱᒃᑕᖏᓐᓂᒃ ᐃᓚᓐᖎᖏᑦᓯᐊᕐᑐᖅ, ᐊᑕᓂᖅ ᐆᒪᔪᖅ ᐱᑦᔪᑎᒋᓪᓗᒍ ᒪᓕᐊᓪᓚᒡᓗᒍ ᐃᓚᖏᓐᓂᒃ ᐱᑖᕆᐊᕐᑐᓚᐅᕐᓚᖓ.”

²¹ ᒋᕼᐋᓯ ᑕᕝᕙ ᑐᐊᕕᕐᓗᓂ ᓁᒪᓐᑯᓐᓂᒃ ᐊᓐᖑᑎᓵᕋᓱᐊᓕᕐᐳᖅ. ᓁᒪᐅᑉ ᑕᑯᒐᒥᐅᒃ ᒥᒃᓯᒧᑦ ᐅᓪᓚᒃᑐᖅ ᕿᒧᒃᓯᐅᑎᒥᓂᑦ ᐊᒃᓴᓗᐊᓕᖕᒥᑦ ᓂᐅᓪᓗᓂ ᐸᕆᐊᕐᑐᕐᐹ, ᐊᐱᕆᓪᓗᒍᓗ, “ᖃᓄᐃᑦᑐᖃᖏᒃᑲᓗᐊᕐᐹ?”

²² ᒋᕼᐋᓯᐅᑉ ᑭᐅᕚ, “ᖃᓄᐃᑦᑐᖃᖏᑦᑐᖅ, ᐊᖓᔪᖅᑳᒪ ᐅᖃᕆᐊᕐᑐᖁᖕᒪᖓ, ‘ᐃᓅᓱᒃᑑᒃ ᒪᕐᕉᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑕ ᐃᓚᖏᒃ ᑎᑭᖅᑲᐅᖕᒪᑎᒃ ᑕᑉᐹᓐᖓᑦ ᐃᕗᕅᒻ ᖃᖅᑲᖓᓂᕐᒥᐅᓂᑦ ᐱᑎᑕᐅᔪᓐᓇᕐᒪᖔᑕ 3,000ᓂᒃ ᑮᓇᐅᔭᓂᒃ ᒎᓗᓂᒃ ᐊᓐᓄᕌᓂᒡᓗ ᖃᐅᔨᒋᐊᕐᑐᕐᑎᑕᐅᕗᖓ.’”

²³ ᓁᒪᐅᑉ ᐅᖃᐅᑎᕚ, “ᐱᔪᓐᓇᓗᐊᕐᐳᑎᑦ, 6,000ᓂᒃ ᐱᓕᕆᑦ.” ᒋᕼᐋᓯᒧᓪᓗ ᐱᔭᐅᑦᓯᐊᖁᕔᑦ, ᑖᒃᑯᐊᓗ 6,000ᑦ ᑮᓇᐅᔭᑦ ᐃᒃᐱᐊᕐᔫᖕᓄᑦ ᐴᕐᐰᑦ ᐊᓐᓄᕌᓪᓗ ᒪᕐᕈᐃᕐᓱᓪᓗᐊᕐᓗᓂ ᐊᑎᔭᒃᓮᑦ ᑭᒡᒐᕆᔭᒥᓄᓪᓗ ᐊᒃᔭᕐᓯᒍᑦᔭᐅᖁᕚ, ᑖᒃᑯᐊᓗ ᒋᕼᐋᓯᒥᑦ ᓯᕗᓪᓕᐅᓪᓗᑎᒃ ᐋᑦᓯᕘᒃ ᐱᔭᒃᓴᖏᓐᓂᒃ.

²⁴ ᐱᖑᐊᕐᔫᑉ ᖄᖓᓄᐊᕋᒥᒃ ᒋᕼᐋᓯᐅᑉ ᑖᒃᑯᐊᒃ ᐋᓪᓗᓂᒋᒃ ᐃᒡᓗᒧᐊᕈᑎᕔᑦ ᑖᒃᑯᐊᒡᓗ ᐃᑲᔪᕐᑎᒋᔮᖕᓂ ᐅᑎᖁᖕᒪᒋᒃ ᐅᑎᕐᐴᒃ ᐃᓚᒋᖅᑲᐅᔭᒥᖕᓄᑦ.

²⁵ ᒋᕼᐋᓯ ᐃᒡᓗᒧᑦ ᐃᑎᕐᒪᑦ, ᐊᖓᔪᖅᑳᖓᑕ ᓇᔪᕐᑕᖓᓄᑦ, ᐃᓔᓴᐅᑉ ᐊᐱᕆᓕᕐᐹ, “ᒋᕼᐊᔩ ᓇᓃᖅᑲᐅᒐᕕᑦ?” ᒋᕼᐋᓯ ᑭᐅᕗᖅ, “ᓇᒧᓐᖓᓚᐅᖏᑦᑐᖓ.”

²⁶ ᐃᓔᓴᐅᑉ ᐅᖃᐅᑎᓕᕆᕚ, “ᐊᓂᕐᓂᕐᒪ ᐃᓚᒋᖅᑲᐅᓐᖏᓛᑏᑦ ᓁᒪᓐ ᐊᒃᓴᓗᐊᓕᖕᒥᑦ ᓂᐅᓪᓗᓂ ᐸᕆᐊᓯᖕᒪᑎᑦ? ᐱᐅᕚ ᐅᓪᓗᒥ ᑕᕝᕙᓂ ᑮᓇᐅᔭᕐᑖᕋᓱᑐᐃᓐᓇᕈᑦᑕ, ᐊᓐᓄᕋᕐᑖᕐᑐᕐᓗᑕᓗ ᐅᕐᓱᒃᓴᕐᑖᕐᓗᑕ ᐸᐅᕐᖓᖃᕐᕕᒃᓴᓂᒃ ᐱᕈᕐᓰᕕᒃᑖᕐᑐᕐᓗᑕ, ᓰᐱᖁᑎᑖᕐᑐᕐᓗᑕ, ᐆᒪᔪᖁᑎᑖᕐᑐᕐᓗᑕᓗ, ᐱᔨᒐᓴᒃᑖᕐᑐᕐᓗᑕ ᐊᖑᑎᓂᒃ ᐊᕐᓇᓂᒡᓗ?

²⁷ ᓁᒪᓐ ᑲᑉᐱᐊᒋᔭᐅᔪᒥ ᐸᕐᑎᕐᓂᕆᓚᐅᕐᑕᖓ ᐱᑖᕆᓂᐊᓕᕐᐸᑦ, ᑭᖑᕚᑎᑦ ᑎᑭᓪᓗᒋᑦ ᑕᐅᕗᖓᓕᒫᖅ.” ᒋᕼᐋᓯ ᑕᕝᕙ ᐃᓔᓴᐅᑉ ᐃᒡᓗᖓᓂᑦ ᐊᓂᕗᖅ ᐅᕕᓂᕐᓘᑎᓗ ᐱᒋᐊᕐᐳᖅ ᐅᕕᓂᖓ ᐊᐳᑎᑐᑦ ᖃᑯᕐᓯᑎᒋᓪᓗᓂ.