ᐊᑕᓃᑦ ᐂᑉᐸᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᒧᐊᐱᒥᐅᓪᓗ ᐅᓇᑕᕐᓂᖓᑦ

¹ ᔨᕼᐆᓴᐸᑎᐅᑉ ᐊᖓᔪᖅᑳᕐᔪᐊᖑᓂᖓᑕ ᔫᑕᒥ ᐊᕐᕌᒍᐃᑦ 18ᒋᓕᕐᑕᖓᓂ ᔨᕼᐅᕋᒻ ᐂᕼᐋᐱᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ ᓴᒥᐊᕆᐊᑉ ᓄᓇᖓᓂ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 12ᓂᒃ.

² ᐊᑕᓂᐅᓪᓗ ᓵᖓᓂ ᐊᔪᕐᑐᓕᕗᖅ, ᑭᓯᐊᓂ ᐊᑖᑕᒋᓚᐅᕐᑕᖓᑕ ᐊᓈᓇᒋᓚᐅᕐᑕᖓᑕᓗ ᐊᔪᕐᑐᓕᑦᔪᑎᒋᓚᐅᕐᑕᖏᑎᑑᖏᑦᑐᖅ ᒎᑎᓐᖑᐊᓕᐊᕆᓯᒪᔪᖅ ᐰᓕ ᐃᒋᑕᐅᑎᓚᐅᕐᒪᒍ ᐊᑖᑕᒋᓚᐅᕐᑕᖓᑕ ᓴᓇᔭᐅᑎᑕᕕᓂᖓ.

³ ᑭᓯᐊᓂᓕ ᔨᕈᐳᐊᒻ ᓂᐹᑎᐅᑉ ᐃᕐᓂᖓᑕ ᐊᔪᕐᑐᓕᑦᔪᑎᒋᓚᐅᕐᒥᔭᖏᑕ ᐊᑦᔨᖏᓐᓂᒃ ᐊᑐᓕᓚᐅᕆᕗᖅ ᐃᓴᕆᐊᓕᒥᐅᓄᑦ ᑕᒻᒪᕐᓯᒪᑦᔪᑕᐅᓚᐅᕐᑐᓂᒃ; ᑕᒪᑐᒥᖓ ᕿᒤᓚᐅᖏᓐᓇᒥ.

⁴ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦ ᒦᓴ ᓰᐱᓂᒃ ᕿᑐᕐᖏᐅᕐᑎᑦᓯᔨᐅᒐᒥ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑐᓂᓯᔭᕆᐊᖃᖃᑦᑕᓚᐅᕐᐳᖅ ᓰᐱᐅᑉ ᓄᕐᕋᖏᓐᓂᒃ 100,000ᓂᒃ ᐊᒻᒪᓗ ᓰᐲᑦ ᐊᖑᓴᓪᓗᖏᑕ 100,000ᐃᑦ ᒥᖅᑯᖏᓐᓂᒃ.

⁵ ᐂᕼᐋᐱᐅᑉ ᐃᓅᔪᓐᓃᕐᓂᖓᑕ ᑭᖑᓂᖓᓂ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦ ᐊᑭᕋᕐᑐᓕᓚᐅᕐᐳᖅ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓐᓂᒃ.

⁶ ᑕᒪᓐᓇ ᐱᑦᔪᑎᒋᓪᓗᒍ ᐊᖓᔪᖅᑳᕐᔪᐊᖅ ᔨᕼᐅᕌᒻ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᓕᒫᖏᓐᓂᒃ ᐅᓇᑕᕕᒃᔪᐊᕆᐊᕐᑐᕐᑎᑦᓯᓕᓚᐅᕐᐳᖅ ᓴᒥᐊᕆᐊᑉ ᓄᓇᖓᓂᑦ.

⁷ ᔨᕼᐆᓴᐹᑎᒧᓪᓗ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᐅᑦᔨᔭᕐᑐᕐᑎᑦᓯᕗᖅ ᐃᒫᒃ, “ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᑭᕋᕐᑖᕆᖕᒪᖓ, ᐅᓇᑕᕆᐊᖃᑎᒋᔪᓐᓇᕐᐱᖔ ᒧᐊᐱᒥᐅᓂᒃ?” ᑭᐅᕗᕐᓗ, “ᐱᖃᑎᒋᓂᐊᕐᐸᒋᑦ ᐃᓕᒃᑐᑦ ᑍᒤᓐᓇᒪ ᐃᓄᖁᑎᒃᑲ ᐃᓄᖁᑎᑐᐃᓐᓇᕆᔮᕋᕕᒋᑦ ᕿᒻᒥᕐᔪᐊᖁᑎᒃᑲᓗ ᕿᒻᒥᕐᔪᐊᖁᑎᑐᐃᓐᓇᕆᔮᕐᐸᑎᑦ.”

⁸ ᐊᐱᕆᓪᓗᓂᓗ, “ᓇᐅᒃᑰᕐᓗᑕ ᐅᓇᑕᓪᓚᕆᓯᒋᐊᕐᓂᐊᕐᐱᑖ?” ᔨᕼᐅᕌᒻ ᑭᐅᕚ, “ᐄᑐᒥᐅᑉ ᐃᓄᖃᖏᑦᑑᓂᖓ ᐊᖅᑯᑎᒋᓗᒍ.”

⁹ ᑕᕝᕙ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᑦ ᓅᒋᐊᓯᓚᐅᕐᐳᖅ ᐅᓇᑕᕆᐊᓕᕐᓗᓂ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐱᖃᑎᒋᓪᓗᒍ ᐄᑕᒥᐅᓪᓗᑕᐅᖅ ᐊᖓᔪᖅᑳᕐᔪᐊᖓᑦ ᐃᓚᒋᔭᐅᓪᓗᓂ, ᓴᖑᔪᒥᒃ ᐊᖅᑯᑎᖃᕐᓗᑎᒃ ᐅᓇᑕᕆᐊᕋᒥᒃ ᐅᓪᓗᓂᒃ 7ᓂᒃ ᐊᐅᓪᓚᕐᓯᒪᓕᕋᓗᐊᕐᓗᑎ ᐃᒤᕈᑎᓚᐅᕐᐳᑦ ᑕᖁᐊᒥᖕᓂᒃ, ᐃᓄᐃᓪᓗ ᐆᒪᔪᖁᑎᖏᑕᓗ ᐃᒥᒃᓴᖏᓐᓂᒃ.

¹⁰ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᕐᐳᖅ, “ᓱᕕᑖ, ᐱᖓᓲᓪᓗᑕ ᐊᖓᔪᖅᑳᕐᔪᐊᑦ ᐊᑕᓂᕐᒧᑦ ᑲᑎᖁᔭᐅᓐᓂᕐᐱᑕ ᒧᐊᐱᒥᐅᓄᑦ ᑎᒍᔭᐅᑐᐃᓐᓇᖁᔭᐅᓪᓗᑖ?”

¹¹ ᔨᕼᐅᓴᐸᑎᐅᑉ ᐊᐱᕆᓕᕐᐰᑦ, “ᐊᑕᓂᐅᑉ ᐅᖃᕐᑎᖓᓂᒃ ᑕᒪᓃᑦᑐᖃᓐᖏᓛᖅ, ᐊᑕᓂᖅ ᖃᐅᔨᒋᐊᕐᕕᒋᓂᐊᕋᑦᑎᒍ ᑖᓐᓇ ᐊᖅᑯᑎᒋᓗᒍ?” ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖏᑕ ᐊᖓᔪᖅᑳᖓᓐᓂᒃ ᓂᓪᓕᕐᑐᖃᕐᐳᖅ, “ᐃᓔᓴ ᓴᕚᑎᐅᑉ ᐃᕐᓂᖓ ᑕᒫᓃᑦᑐᒐᓗᐊᖅ, ᐃᓔᑦᔭᐅᑉ ᐊᒡᒐᖏᓐᓄᑦ ᐃᒥᕐᒥᒃ ᑯᕕᓯᕙᓚᐅᕐᑐᖅ.”

¹² ᔨᕼᐆᓴᐸᑎ ᐅᖃᕐᐳᖅ, “ᐊᑕᓂᐅᑉ ᐅᖃᐅᓯᖓ ᑖᑦᓱᒪᓃᑉᐳᖅ.” ᑕᕝᕙ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ, ᔨᕼᐆᓴᐹᑎᓗ, ᐄᑐᒥᒥᐅᓪᓗ ᐊᖓᔪᖅᑳᕐᔪᐊᖓᑦ ᐃᓔᓴᒧᑦ ᐅᐸᒍᑎᕗᑦ.

¹³ ᐃᓔᓴᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᕚ, “ᖃᓄᖅ ᐱᓇᓱᐊᖃᑎᒌᒍᓐᓇᓕᕋᓐᓅᒃ? ᐊᑖᑕᒋᓚᐅᕐᑕᕕᑦ ᐅᖃᕐᑎᖏᓐᓄᑦ ᐊᓈᓇᒋᓚᐅᕐᑕᕕᓪᓗ ᐂᖓᓕᕆᑦ.” ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑕ ᑭᐅᕚ, “ᐋᒃᑲᓕ; ᑭᓯᐊᓂ ᐱᖓᓲᓪᓗᑕ ᐊᖓᔪᖅᑳᕐᔪᐊᖑᔪᒍᑦ ᐊᑕᓂᕐᒧᑦ ᑲᑎᖁᔭᐅᓯᒪᔫᔮᓕᕋᑦᑕ ᒧᐊᐱᒥᐅᓄᑦ ᐱᔭᐅᑐᐃᓐᓇᕐᓂᐊᕐᓗᑕ.”

¹⁴ ᐃᓔᓴᐅᑉ ᑭᐅᕚ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᒃ ᐆᒪᔪᒥᒃ ᑭᒡᒐᕐᑐᕋᒪ, ᐅᐱᒋᔭᕋ ᔨᕼᐆᓴᐹᑎᑦ ᔫᑕᐅᑉ ᐊᖓᔪᖅᑳᕐᔪᐊᖓᑦ ᑕᒫᓃᖏᑉᐸᑦ, ᕿᕕᐊᕋᔭᖅᑲᐅᓐᖏᓚᒋᑦ ᑕᑯᖏᓪᓗᑎᓪᓗ.

¹⁵ ᒫᓐᓇᓕ ᑯᑭᑦᑕᐸᐅᑎᐅᔭᕐᒥᒃ ᐱᓐᖑᐊᕈᓐᓇᕐᑐᒥᒃ ᕾᔪᖃᓚᐅᕐᓕ.” ᑯᑭᑦᑕᐸᐅᑎᐅᔭᕐᒥᒃ ᐱᓐᖑᐊᕐᑐᖃᓕᕐᑎᓪᓗᒍ ᐊᑕᓂᐅᑉ ᓇᔫᑎᓂᖓ ᐃᓔᓴᒧᐊᕐᐳᖅ,

¹⁶ ᐅᖃᓕᕐᓗᓂᓗ, “ᐃᒫᒃ ᑕᕝᕙ ᐊᑕᓂᖅ ᐅᖃᕐᐳᖅ, ‘ᓇᕐᓴᖅ ᑕᒪᓐᓇ ᐸᓂᕐᑐᖅ ᑰᒐᓛᕕᓂᖅ ᐃᒪᕐᒥᒃ ᑕᑕᑎᓐᓂᐊᕐᐸᕋ.’

¹⁷ ᐃᒫᒃ ᐊᑕᓂᖅ ᐅᖃᕐᒪᑦ, ‘ᑕᑯᓂᐊᓐᖏᓚᓯ ᐊᓄᕆᒥᒃ ᓯᓚᓗᖕᒥᒡᓘᓐᓃᑦ, ᑭᓯᐊᓂᓕ ᑕᒪᓐᓇ ᓇᕐᓴᖅ ᓇᔪᕐᑕᓯ ᐃᒪᖃᓕᕐᓂᐊᕐᐳᖅ ᐊᒥᒐᖏᑦᑐᒥᒃ, ᐃᓕᑦᓯᓗ ᐆᒪᔪᖁᑎᓕᒫᓯᓗ ᐃᒥᒃᓴᖃᖁᓪᓗᓯ.’

¹⁸ ᑕᒪᓐᓇᓕ ᑍᒤᑎᑕᐅᓂᖓ ᐊᑕᓂᐅᑉ ᓱᓇᐅᒋᓐᖏᑕᖓ ᒧᐊᐱᒥᐅᓪᓗ ᐃᓕᑦᓯᓐᓄᑦ ᑐᓂᑦᔪᑎᒋᓂᐊᕆᕔᑦ.

¹⁹ ᓄᓇᓕᒡᔪᐊᖁᑎᓕᒫᖏᑦ ᐊᕙᓗᕐᔪᐊᖃᕐᑑᒐᓗᐊᑦ ᓵᓚᒋᓂᐊᕐᐸᓯ, ᓄᓇᓕᒡᔪᐊᖁᑎᖏᓪᓗ ᐱᓪᓚᕆᐅᔪᑦ, ᓇᐹᕐᑐᖏᑕᓗ ᐱᐅᓂᓕᒫᖏᑦ ᓇᑲᑎᕐᓂᐊᕐᐸᓯ, ᓄᓇᐅᓪᓗ ᐃᓗᐊᓂᑦ ᑰᒐᓛᖁᑎᖏᑦ ᓯᒥᒃᑐᕐᓗᒋᑦ, ᐱᕈᕐᓰᕕᖁᑎᓕᒫᖏᓪᓗ ᐱᐅᔪᓐᓃᕐᑎᓐᓂᐊᕐᐸᓯ ᐅᔭᕋᓕᕐᑐᕐᓗᒋᑦ.”

²⁰ ᖃᐅᑎᓪᓗᒍ ᐅᓪᓛᒃᑯᑦ ᐆᒪᔪᕕᓂᕐᒥᒃ ᑐᓂᕐᕈᓯᕐᓂᖅ ᓇᓪᓕᐅᑎᓯᒪᓕᕋᓗᐊᕐᑎᓪᓗᒍ, ᑕᑯᓕᕐᐳᑦ ᐃᒪᕐᒥᒃ ᑰᒃᑐᒥᒃ ᐄᑐᒥᐅᑉ ᓇᓛᓂᑦ, ᓇᕐᓴᓕᒫᑦᓯᐊᖅ ᐃᒻᒪᒃᑎᓯᒪᓕᕐᐳᖅ.

²¹ ᒧᐊᐱᒥᐅᓕᒫᑦ ᑐᓴᐅᒪᓕᕐᐳᑦ ᐊᖓᔪᖅᑳᕐᔪᐊᓄᑦ ᐅᓇᑕᕆᐊᕐᑕᐅᓕᕐᓂᕐᒥᖕᓂᒃ. ᑕᒪᓐᓇ ᐱᑦᔪᑎᒋᓪᓗᒍ ᐊᖑᑎᓕᒫᑦ, ᐃᓅᓱᒃᑐᐃᑦ ᐃᓄᑐᕾᓪᓗ ᐅᓇᑕᕐᑐᕐᓯᐅᑎᓂᒃ ᐊᑐᕈᓐᓇᕐᑐᑦ ᐅᑕᖅᑭᑎᑕᐅᓕᕐᐳᑦ ᓄᓇᖁᑎᖓᑦᑕ ᐊᕕᒃᓯᒪᓂᖓᑕ ᑭᒡᓕᖏᓐᓂ.

²² ᐅᓪᓛᒻᒪᕆᒃᑯᑦ ᐃᖁᒻᒫᓕᕐᑎᓪᓗᒋᑦ, ᓯᕿᓐᓂᔮᓚᐅᕐᐳᖅ ᐃᒪᐅᑉ ᓇᓛᒍᑦ, ᒧᐊᐱᒥᐅᑦ ᑕᑯᓪᓗᓂᑦᔪᒃ ᓯᕿᓂᐅᑉ ᓵᓐᖓᔭᖓ ᐃᒪᖅ ᐊᐅᐸᕐᑐᖅ ᓲᕐᓗ ᐊᐅᒃᑎᑐᑦ.

²³ ᐅᖃᕐᐳᓪᓗ, “ᐊᐅᒑᓗᖕᒪᓐᓇ, ᐊᖓᔪᖅᑳᕐᔪᐊᓂᒃᑯᐊ ᐃᒻᒥᖕᓄᑦ ᑐᖁᕋᐅᑎᔪᕕᓈᓘᖅᑰᕐᑐᑦ. ᒫᓐᓇᓕ ᒧᐊᐱᒥᐅᖑᓗᑕ ᐱᖁᑎᖏᓐᓂᒃ ᐱᐅᕋᕆᐊᕐᑐᓕᕐᑕ!”

²⁴ ᒧᐊᐱᒥᐅᓪᓕ ᐃᓴᕆᐊᓕᒥᐅᑦ ᑕᖕᒫᕐᓯᒪᕕᖓᓐᓄᑦ ᑎᑭᐅᑎᖕᒪᑕ ᐃᓴᕆᐊᓕᒥᐅᑦ ᒪᑭᓪᓗᑎᒃ ᐅᓇᑕᕐᕕᒋᓕᕐᒪᒋᑦ ᕿᒫᔭᕆᐊᖃᓕᕐᐳᑦ. ᐃᓴᕆᐊᓕᒥᐅᓪᓗ ᒧᐊᐱᒥᐅᑦ ᓄᓇᖁᑎᓕᒫᖓᓐᓂᒃ ᑎᒍᓯᕗᑦ ᐃᓄᖏᑦ ᑐᖁᕋᕐᓗᒋᑦ.

²⁵ ᓄᓇᓕᓕᒫᖏᑦ ᓱᒃᑯᓪᓗᒋᑦ, ᐅᓇᑕᕐᑐᒃᓴᖁᑎᓕᒫᖏᑦ ᒥᓘᑎᕕᓂᕐᓄᑦ ᐱᕈᕐᓰᕕᖁᑎᖏᑦ ᐅᔭᖅᑭᕐᓱᕐᓯᒪᓚᐅᕐᐳᑦ, ᑰᒐᓚᓕᒫᖏᓪᓗ ᑰᒍᓐᓃᕐᓗᑎᒃ, ᓇᐹᕐᑐᑦᓯᐊᕙᓕᒫᓪᓗ ᓇᑲᑎᕐᑕᐅᓪᓗᑎᒃ. ᑭᕆ-ᕼᐃᕆᑎ ᖃᓄᐃᓕᓯᒪᖏᑦᑐᑑᓚᐅᕋᓗᐊᕐᓗᓂ ᐅᓇᑕᕐᑐᒃᓴᓄᑦ ᑎᑭᑕᐅᖕᒥᒐᒥ ᐃᓪᓘᓕᔭᕐᑐᓄᑦ ᐅᖓᓗᔭᐅᓪᓗᓂ ᐅᓇᑕᕐᕕᐅᓕᕐᒥᒐᒥ ᐱᔭᐅᒋᕗᖅ.

²⁶ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦ ᖃᐅᔨᓕᕋᒥ ᓵᓚᐅᓕᕐᓂᕐᒥᓂᒃ, ᐅᓇᑕᕐᑐᒃᓴᖁᑎᒥᓂᒃ 700ᓂᒃ ᐃᓚᖃᕐᓗᓂ ᐄᑐᒥᐅᑉ ᓄᓇᖓᓄᑦ ᐊᓂᒎᑎᒋᐊᕋᓗᐊᕐᓗᓂ ᐱᔪᓐᓇᓚᐅᓐᖏᓚᖅ.

²⁷ ᑕᕝᕙ ᐃᕐᓂᓂ ᐊᖓᔪᒃᓕᕐᐹᖅ, ᐊᖓᔪᖅᑳᕐᔪᐊᖑᓂᖓᓂᒃ ᑭᖑᕝᕕᐅᑎᔪᒃᓴᖅ ᑎᒍᓪᓗᓂᐅᒃ ᑐᖁᓪᓗᒍ ᑐᓂᕐᕈᓯᕈᑎᒋᕚ ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖏᓐᓂ; ᑕᕝᕙ ᐃᓴᕆᐊᓕᒥᐅᑦ ᑲᑉᐱᐊᓇᕐᑐᕐᔪᐊᕐᒧᑦ ᑎᑭᑕᐅᕗᑦ. ᐅᓇᑕᕋᓱᒍᓐᓃᕐᓗᑎᒃ ᓄᓇᒥᖕᓄᑦ ᐅᑎᑐᐃᓇᓕᕐᐳᑦ.