ᐊᑕᓃᑦ ᐂᑉᐸᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᑎᓪᓗᒍ ᓂᐱᑯᓁᓴ ᐹᐱᓘᓂᒥᐅᑉ ᐊᖓᔪᖅᑳᕐᔪᐊᖓᑦ ᑎᑭᓚᐅᕐᐳᖅ, ᔨᕼᐅᐃᐊᑭᒻᓗ ᐱᔨᒋᓕᓚᐅᕐᐹ ᐊᕐᕌᒍᓂᒃ ᐱᖓᓱᓂᒃ; ᑭᖑᓂᖓᒍᑦ ᐊᐅᓚᑕᐅᔪᒪᔪᓐᓃᕐᓗᓂ ᐊᑭᕋᕐᑐᓕᓚᐅᕐᐳᖅ.

² ᐊᑕᓂᕐᓗ ᑲᐅᓪᑎᐊᒥᐅᑦ ᐅᓇᑕᕐᑎᒐᓴᒡᔪᐊᖏᓐᓂᒃ ᐅᓇᑕᕆᐊᕐᑎᑦᓯᕗᖅ ᔨᕼᐅᐃᐊᑭᒻᒧᑦ, ᓯᕆᐊᒥᐅᓂᑦ, ᒧᐊᐱᒥᐅᓂᑦ ᐊᒧᓁᑎᓂᑦ, ᑲᑐᑦᔭᐅᓪᓗᓂ ᑖᒃᑯᓇᓐᖓ ᔫᑕ ᐊᓯᕈᕐᑕᐅᖁᓪᓗᒍ, ᐊᑕᓂᐅᑉ ᐅᖃᐅᓯᕆᓯᒪᔭᖓ ᐅᖃᕐᑎᒥᒍᑦ ᒪᓕᒡᓗᒍ ᑍᒤᑦᓱᒫᕐᓂᕋᕐᓗᒍ ᐅᖃᕐᓯᒪᓚᐅᕋᒥ.

³ ᑕᒪᓐᓇ ᑍᒤᓚᐅᕐᐳᖅ ᔫᑕᒥᐅᓄᑦ ᐊᑕᓂᐅᑉ ᐱᖁᔨᓂᖓᒍᑦ, ᔫᑕᒥᐅᑦ ᑕᑯᓐᓇᕐᑕᒥᓂᑦ ᐲᕈᒪᓚᐅᕐᒪᒋᑦ, ᒫᓇᓯᐅᑉ ᐊᔪᕐᑐᓕᓯᒪᓂᖓᓄᑦ, ᐱᓇᓱᐊᕐᓂᕆᓯᒪᔭᓕᒫᖏᓪᓗ ᐱᑦᔪᑎᒋᓪᓗᒋᑦ,

⁴ ᐸᓯᔭᒃᓴᐅᖏᑦᑐᓂᒡᓗ ᑐᖁᕅᖃᑦᑕᕐᓯᒪᓂᖓᓄᑦ; ᔨᕉᓴᓕᒥᒃ ᐸᓯᔭᒃᓴᐅᖏᑦᑐᑦ ᐊᐅᖏᓐᓂᒃ ᑕᕐᓴᕐᑖᕐᑎᑦᓯᓯᒪᓕᓚᐅᕐᒪᑦ, ᑕᒪᓐᓇᓗ ᐊᑕᓂᐅᑉ ᐃᓱᒪᒋᔪᓐᓁᓚᐅᓐᖏᓛ.

⁵ ᔨᕼᐅᐃᐊᑭᐅᑉ ᐱᓂᐊᕐᓂᕆᓯᒪᔭᓕᒫᖏᑦ ᐊᒡᓚᒃᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐊᒡᓚᒃᑕᐅᓯᒪᕕᖏᓐᓂ.

⁶ ᔨᕼᐅᐃᐊᑭᒻ ᐃᓅᔪᓐᓃᕐᒪᑦ, ᐃᕐᓂᖓᑕ ᔨᕼᐅᐃᐊᑭᓐ ᑭᖑᕝᕕᓕᓚᐅᕆᕚ ᐊᖓᔪᖅᑳᕐᔪᐊᓐᖑᕐᓗᓂ ᐃᓂᖓᓂ.

⁷ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᕆᐊᕐᑎᑦᓯᓚᐅᕐᓯᒪᔪᓐᓃᓚᐅᕐᐳᖅ ᐅᓇᑕᕐᑎᖁᑎᒥᓂᒃ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓄᓇᖁᑎᕕᓂᕋᓗᐊᖏᓐᓂᒃ ᐊᕐᓵᕐᑕᐅᓯᒪᓕᓚᐅᕋᒥ, ᑰᖕᒥᒃ ᐃᕗᕅᑎᒥᑦ ᐱᒋᐊᕐᓗᒍ ᐄᑦᔨᑉᑎᐅᑉ ᑕᕐᕌᓄᑦ ᑎᑭᓪᓗᒍ ᓄᓁᕐᑕᐅᓯᒪᓕᓚᐅᕐᒪᑦ.

ᔨᕼᐅᐃᐊᑭᓐ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ

⁸ ᔨᕼᐅᐃᐊᑭᓐ ᐊᕐᕌᒍᖃᕐᓗᓂ 18ᓂᒃ ᐊᖓᔪᖅᑳᕐᔪᐊᖑᓕᓚᐅᕐᐳᖅ ᔫᑕᒧᑦ, ᔨᕉᓴᓕᒥᓗ ᐊᐅᓚᑦᓯᓚᐅᕐᐳᖅ ᑕᖅᑭᓂᒃ ᐱᖓᓱᓂᒃ. ᐊᓈᓇᖃᓚᐅᕐᐳᖅ ᓂᕼᐅᓯᑕᒥᒃ ᐃᐅᓪᓇᓴᓐ ᐸᓂᖓᓂᒃ ᔨᕉᓴᓕᒥᐅᑕᕐᒥᒃ.

⁹ ᐊᑖᑕᒥ ᐊᔪᕐᑐᓕᓂᕆᓚᐅᕐᑕᓕᒫᖏᑦ ᒪᓕᒡᓗᓂᒋᑦ, ᔨᕼᐅᐃᐊᑭᓐ ᐊᑕᓂᐅᑉ ᓵᖓᓂ ᐊᔪᕐᑐᓕᓚᐅᕐᐳᖅ.

¹⁰ ᔨᕼᐅᐃᐊᑭᓐ ᐊᖓᔪᖅᑳᕐᔪᐊᖑᑎᓪᓗᒍ ᐹᐱᓘᓂᒥᐅᑦ ᐅᓇᑕᕐᑎᖁᑎᖏᑦ ᓂᐱᑯᓁᓴᐅᑉ ᐅᓇᑕᕐᑎᖁᑎᖏᑕ ᐊᖓᔪᖅᑳᖏᓐᓄᑦ ᐊᐅᓚᑕᐅᓪᓗᑎᒃ ᐅᓇᑕᕆᐊᕐᐳᑦ ᔨᕉᓴᓕᒥᒃ, ᓱᕖᕈᑦᔨᓯᒪᓪᓗᑎᒃ ᐃᓗᒪᒃᓯᓕᓚᐅᕐᐳᑦ.

¹¹ ᐅᓇᑕᕐᑎᖏᑦ ᐃᓗᒪᒃᓯᑎᓪᓗᒋᑦ, ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓ ᔨᕉᓴᓕᒧᐊᓚᐅᕐᐳᖅ, ᐱᔨᖏᑦ ᐊᕙᓗᓯᓯᒪᑎᓪᓗᒋᑦ;

¹² ᐊᖓᔪᖅᑳᕐᔪᐊᖅ ᔨᕼᐅᐃᐊᑭᓐ ᐃᒻᒥᖕᓂᒃ ᑐᓂᑦᔪᑎᒋᓚᐅᕐᐳᖅ ᓴᐱᓕᕋᒥᒃ ᐹᐱᓘᓂᒥᐅᓄᑦ, ᐊᓈᓇᖓᓗ ᐃᕐᓂᖏᓪᓗ ᐅᓇᑕᕐᑎᖁᑎᖏᑕᓗ ᐊᖓᔪᖅᑳᖏᑦ ᐃᒡᓗᖓᓂᓗ ᐊᖓᔪᖅᑳᑦ. ᓂᐱᑯᓁᓴᐅᓪᓗ ᐊᖓᔪᖅᑳᕐᔪᐊᖑᓂᖓᑕ 8ᖓᓐᓂ ᔨᕼᐅᐃᐊᑭᓐ ᑎᒍᓚᐅᕐᐹ ᑎᒍᔭᐅᓯᒪᕕᖕᒥᓃᑎᓕᕐᓗᓂᐅᒡᓗ.

¹³ ᐊᑕᓂᐅᑉ ᐃᒡᓗᖓᑕ ᐊᑭᑐᔪᒃᓴᔭᖁᑎᓕᒫᖏᑦ, ᐊᖓᔪᖅᑳᕐᔪᐊᓪᓗ ᐃᒡᓗᖓᓂ ᐊᑭᑐᔪᒃᓴᓕᒫᑦ ᐊᐅᓪᓚᕈᑎᓚᐅᕐᐰᑦ ᐹᐱᓘᓂᒧᑦ, ᐊᑕᓂᐅᑉ ᑍᒤᑕᐅᔪᒫᕐᓂᕅᓯᒪᓂᖓ ᓇᓚᐅᓪᓗᒍ. ᓂᐱᑯᓁᓴᐅᑉ ᐊᑕᓂᐅᑉ ᐃᒡᓗᖓᑕ ᐃᓗᓕᖁᑎᖏᑦ ᒎᓗᐃᑦ ᓯᖁᑦᑎᕐᐰᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓴᓇᔭᐅᑎᓚᐅᕐᓯᒪᔭᖏᑦ ᑐᒃᓯᐊᕐᕕᒡᔪᐊᒥ ᐊᑐᒐᒃᓴᐅᓂᐊᕐᑎᓪᓗᒋᑦ.

¹⁴ ᓂᐱᑯᓁᓴᐅᑉ ᔨᕉᓴᓕᒥᐅᑦ ᐃᓄᓕᒫᖏᑦ ᑎᒍᓪᓗᒋᑦ ᐊᐅᓪᓚᕈᑎᕔᑦ, ᐊᖓᔪᖅᑳᕐᔪᐊᑉ ᕿᑐᕐᖓᓕᒫᖏᑦ, ᓯᕗᓕᕐᑎᖁᑎᖏᓪᓗ ᑲᑎᓪᓗᒋᑦ 10,000ᓚᐅᕐᐳᑦ ᑎᒍᔭᓕᒫᖏᑦ, ᓴᓇᔨᖁᑎᓕᒫᖏᓪᓗ ᓱᓇᑐᐃᓐᓇᕐᓂᒃ ᓴᕕᕋᔭᓕᕆᔩᓪᓗ ᐱᖃᑕᐅᑎᓪᓗᒋᑦ; ᑕᒪᒃᑯᐊ ᐊᔪᕐᓴᕐᑐᑦ ᑭᓯᐊᓂ ᐱᓐᖏᑕᑐᐊᕆᓪᓗᒋᑦ ᕿᒪᒃᑕᐅᑎᑉᐰᑦ.

¹⁵ ᓂᐱᑯᓁᓴᐅᑉ ᔨᕼᐅᐃᐊᑭᓐ ᑎᒍᓯᒪᓪᓗᒍ ᐊᐅᓪᓚᕈᑎᕚ ᐹᐱᓘᓂᒧᑦ; ᐊᓈᓇᖓᓗ, ᔨᕼᐅᐃᐊᑭᐅᓪᓗ ᓄᓕᐊᖏᑦ, ᐊᖓᔪᖅᑳᖁᑎᖏᓪᓗ, ᔫᑕᒥᓗ ᓯᕗᓕᕐᑎᓕᒫᑦ ᐱᖃᓯᐅᑎᓪᓗᒋᑦ, ᔨᕉᓴᓕᒥᑦ ᐊᐅᓪᓚᕈᑎᓚᐅᕐᐰᑦ ᐹᐱᓘᓂᒧᑦ.

¹⁶ ᓂᐱᑯᓁᓴᐅᑉ ᐊᖑᑎᓪᓚᕆᐅᔪᓕᒫᑦ ᐹᐱᓘᓂᒧᑦ ᐊᐅᓪᓚᕈᑎᓚᐅᕐᐰᑦ ᑲᑎᓪᓗᒋᑦ 7,000, ᓴᓇᔩᓪᓗᑦ ᐱᔪᓐᓇᑦᓯᐊᕐᑐᑦ, ᓴᕕᕋᔭᓕᕆᔩᓪᓗ ᐱᔪᓐᓇᑦᓯᐊᕐᑐᑦ 1000 ᓴᓐᖏᔪᑦ ᐅᓇᑕᕈᓐᓇᕐᑐᓕᒫᑦ ᐊᐅᓪᓚᕈᑎᓚᐅᕐᐰᑦ.

¹⁷ ᓂᐱᑯᓁᓴᐅᑉ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᔨᕼᐅᐃᐊᑭᐅᑉ ᐊᒃᑲᖓ ᒪᑕᓁᐊ ᐊᖓᔪᖅᑳᕐᔪᐊᓐᖑᕐᑎᑉᐹ ᔫᑕᒧᑦ ᐊᑎᖓᓗ ᐊᓯᑦᔨᕐᓗᓂᐅᒃ ᔨᑎᑬᐊᒥᒃ.

ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒧᑦ

¹⁸ ᔨᑎᑬᐊ ᐊᕐᕌᒍᖃᓚᐅᕐᐳᖅ 21ᓂᒃ ᐊᖓᔪᖅᑳᕐᔪᐊᓐᖑᕐᓗᓂ ᔫᑕᒧᑦ, ᔨᕉᓴᓕᒥᓪᓗ ᐊᐅᓚᑦᓯᓚᐅᕐᐳᖅ 11ᓂᒃ ᐊᕐᕌᒍᓂᒃ. ᐊᓈᓇᖃᕐᐳᖅ ᕼᐊᒧᑕᓕᒥᒃ ᔨᕆᒤᐊᐅᑉ ᐸᓂᖓᓂᒃ ᓕᑉᓇᐅᑉ ᐃᒡᓗᒐᓴᒡᔪᐊᖏᓐᓂᑦ ᐱᓯᒪᔪᒥᒃ.

¹⁹ ᐊᖓᔪᖅᑳᕐᔪᐊᖅ ᔨᑎᑬᐊ ᐊᔪᕐᑐᓕᓂᕐᒥ ᐃᓅᓚᐅᕐᐳᖅ ᐊᑕᓂᐅᑉ ᓵᖓᓂ, ᐊᖓᔪᖅᑳᕐᔪᐊᑉ ᔨᕼᐅᐃᐊᑭᐅᑉ ᐱᐅᓯᕆᓚᐅᕐᑕᖓᑐᑦ.

²⁰ ᐊᑕᓂᐅᓪᓗ ᓂᓐᖓᒡᕕᒋᓚᐅᕋᒥᒋᑦ ᔨᕉᓴᓕᒥᐅᑦ ᔫᑕᒥᐅᓪᓗ ᓇᔪᕈᒪᔪᓐᓃᓚᐅᕐᐰᑦ. ᔨᑎᑬᐊᓗ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓂᒃ ᐊᑭᕋᕐᑐᓕᓚᐅᕐᐳᖅ.